CHHANGCHHENU

                                               ~Toni Râlte

A kum chhira fa pathum zet ka han pawm takah chuan, chhangchhiat hi eng nge a nih chiang takin ka hria a ni. Buai zual lai phei chuan ka inthiar lai chauh hi ka buai ve loh hun a ni mai awm mang e tih mai a awl nia! Inhrang kan lo chang ve luklak tawh bawk si. Puibawmtu leh nau min lak chhawktu tur nei ve ta lo chu, mut hunah meuh hi chuan tho leh tur ka awm tawh lovang a tih theih tur khawp hian ka mutui tawh thin. A manhla ve viau tho mai. Muhil thei ta lo tlat ila, a hrehawm zual dan tur chu..

Kan fa û berin Nursery a kal ve thei tihah a nau chiah erawh kal thei sawlh sawlh a ni a. A te ber erawh thla thum hmel a hmu ve chauh a ni.

“Chhangchhiat hi chu han inzawn se, kan hulhar hma” an lo tih thin kan changchawi ve pawh a niang e. A hlimawm chang a awm a; thinrim engphiara an phiar phiar chang pawh a awm. Nulat laia chhangchhenu ţawp deuh hlek hmuh changa, “Nu ka nih hunah chuan hetiang hi chuan ka awm ve hauh lovang” kan lo ti thin te kha mumang ramah an thambo ta emaw tih mai tur hian intuaihnumna hun reng nei hlei thei ta lo chu kan ţawp hnik hnek viau ta ve ang.

Kan naute thar lah chuan zan ţah a vei mauh mai si. Ka nu ka ngai vawng vawng thin. Hla te khuaah a awm daih bawk si, bakah ka nau neih dawna min rawn awmpui zawk bak kha chu ka phût ngam lo. Kan chhungkaw khawsak harsatzia ka hre ve kur si a. Pa ber lah nitin a service a ngai si a (taxi) a hlawh bak ei hmuhna dang awm hek lo. Kan inneih hma hian kan puklawk ve tum hrang a! Tlan koh ang mai maia inhruai kha kan ni a; an chhungkua an khawsa thei lutuk bik lova, Aizawlah pawh mi inluaha awm ve nawk nawk kha an ni a. Mô pahnih kan lo awm ve bawk nen, ka pa kha tawng tam si lo leh fing ve deuh a ni a. Ka môpui hian a hmingin hna chhete a lo nei ve a, min chaldelh dawn riaua hriatna a lo nei nge kan fa û berin kum khat hmel a hmu ang tihah a thurawn angin kan indang ta a. Ni e, kan indan hma pawh khan ka môpui tawngkam leh mitmei atang kha chuan lungawi a har ve fô reng a. Inah buai em emin hun kan lo hmang ve a, a lo haw a. Thingpui chhawpsak a ngai ziah a, a pasal leh ama thawmhnaw ngei pawh ka suk sak ziah bawk. Ka chawhmeh siamsa sawisel lah a zak lem lova, thawk tam a inti hle thin. Fa pawm ve ve lo nih phei chuan kan innghirngho chang a lo awm thei bik lova, kei lah mawl ru viau si hian chapona tlem ka kawl ve hi ka thupbo reng thei bik lo nen..ka pa mangangin inhrang min chantir ta ngawt mai a ni ber e.

Ka pasal hi kei aiin kum 2 in a upa a. Hang lam, palian deuh, mitmeng no lo zet hi a ni a. A hmelchhe lem lo naa zu a ruih ve chuan mawl taka khawsa chi a ni roh a! Kut phei chu min la thlak lem lo naa inchhung bumgrua sawisak a ching thin. Dintharah mi inhnuai kan luah ve a. Kan eikhawp ngawr ngawr chu kan thawkchhuak ve mial zel a. Beiseina sang tak te suangtuahna lian tham tak te hi kan nei ngai lem lo. Faten rual an awt ang tih erawh ka hlauh ruk ber a ni thin.

Zing dar 5 velah kan pa thoin service turin a chhuak nghal a. Dar 9 velah chaw a rawn ei zawk a. A chhuak leh nghal a. Thim hnuah te a rawn haw leh chang a awm thin. Min duat hluak lo mah se min hmangaih ve tih erawh ka hria, tin, a fel vena riau chu inchhungkhur thil emaw fate mamawh engpawh keima thua ka lo lei mai pawhin a sawisel ngai lova. Bakah a pawisa hmuh ang ang hi chu ka kutah a dahlut ve hmak hmak zel bawk a. Kan khawvel zimtêah chuan kan chhungkaw bilte chuan kan la hlim vein kan la nuiho rawih rawih thei a, thil hrehawm chu a ni miah lo. Retheitê pawh ni ila.

Zing atangin buai ka han tan a. Ka fapa school kal tur siam chungin bai ka chawk a, a te ber ţap thlem pahin a ù chiah chaw ka rawt sak a. Tukthuan ka ei zawhah kan inchhung zimte tihfai hna ka thawk mawlh mawlh a; insuk tur inchherchhuan ùr thlir chungin ka thaw leh hawk zel. Naute lah a lo ţap ve chhen zel bawk si. A û zawk lah ven reng ngai, thil pawi khawih duh deuh hi a ni bawk a. A ruala an mutthilh theih nan ka tawngtai fô mai. Toothpaste te hi comode a a lo tlak chang a awm a. Kan lukham hnuaia an chapal a lo awm ngawt dan te, kan steel almira hlui tawh lam hawn apianga pawisa lem(lehkha thler) lo khat ţun zel te, chaw ei dawhkana ka chawlhni pheikhawk a lo bwk run zel te, inhnuai te ina kan fianpui zuk lak fô a ngai mai te, tv hnung lo inhawng huau zel leh a chhunga hmarcha rawt fung a lo awm ngawt te hi kei nu mawlmang ve tak tan chuan hriatthiam a har ve lutuk tur anih rualin ka hrethiam ve mai zel a. Pa ber chempui thuhruk lah fairel bel chhunga hmuh chang a awm a. Bucket chhunga bible a lo awm leh nawlh zel te hi a hlimawm zawnga lak dawn chuan nuihpui tlawrh tlawrh tham a tling awm e. Fa û ber lah intimipa tak, tuboh leh perek mutpui duh tlat thin a ni a. A nau zawk lah kan towel veng chunga ka pheikhawk sang nena lam kual reng duh a lo ni bawk. Huiham..pa ber a lo haw hi chuan ka lo chinfel tawh hnu a ni a, engkim hi a rawn hmu lova a hre tam lo zawk ang. Kan nautein zan tah a vei tlat avang erawh kha chuan a mangang ve deuh a. A chau ve thin tho si, min khawngaih ve bawk si hi a lo phi ve ruai zel a. a chang erawh chuan a hnar der tlurh tlurh zel.

Hun a lo kal ve zel a. Chhangchhiat zualpui te kan pel deuh tan a. Te ber pawh ven ngai tawk lekin a rawn leikang chho a, a u chiah pawh thian kawma inkhualtelem rual a ni tawh a; tlem chuan buai loh hun ka nei ve ta hlek. Thenawm te lah hi an hulhar si, naupang an ngaithei chai si lo. An pawi hi ka faten an khawih duh riau lehnghal a. Thupha chawi a ngai fô. Fa chhan tina tak ka lo ni ve bawk si, kan pa hian min khapbeh chang a tam thin.

Chawlhni tukah bak inkhawm hman a ni ve lo hul hual. Chupawh taimak a ngai hle. A ù ber hi chu apa nen an insiam thei mai a. A milai hi a khirh lulai êm a ni. Kawrfual ha duh lova ka puan bih anga puan bih a ngen tlat thin te hi apa nen kan inmelh tawn sek ringawt zel. A hmui hnawihsen vur te a ngiat tlat zel a. A mit lah tu te emaw tihdan a hmu thin tih takah hnawih dum te a duh a, a nawrh phah hial chang a awm thin. A pa hi a khirh ve bawk si, a phal lo bur zel a. Inkhawm kan thulh phah fô mai. Chaw ei lai hi chu ka sawi tam lo zawk mai ang. Kaikuang te takte pawh hmuh thuma then sawm a ngai a, dal te hi “A û ta a tak bik” ti tlat thin, “Artui hi a laimu a bo daih” tia a û zawkin a nau thleng a melh hu hu chang a awm a. Chawhmeh tha pawh hi hmeh ve ngam chi pawh a ni lo. Intiat thapa kan chan thei te a nih loh chuan. A tu hi nge maw an chhun ni..!

“U Sen, enteh, inpa hian tunlai chu nuthlawi a phur ziah ania aw” titu kan inhnuai nula Romawii chu ka melh zawk a. Ka nui mai. Driver ania a phur ve  a ni mai a.

“Nui ringawt suh, ka hrilh duh lo chea, thla khat liamtaah pawh khan khilai ami Pu vena te inluahtu nen pawh khan sawi an kai hat asin. Pawn i chhuak ngai lova engmah i hre lo anih kha”

“Mawi, chutiang chu kan pa hian a ti thei lovang. Ka awih lo”

“U sen, thudik chu i la hre mai ang, ka hrilh chhan che pawh helai veng ami te hian an sawi duh sia; inpa i lo zilh ve ka duh vang ania”

Ka mawl huih mai. A ngaihna reng ka hre hauh lo.

Ka han ngaihtuah a. Ka ngaihtuah ka ngaihtuah a. Ka harh zawk mai. A ni, a dik, kan pa nen nupa nun kan hman khàt zia atangin ka ngaihtuah a. Zan dar 8 hmaa a lo haw tawh ngai loh dan te, zu rim a nam zin zia te, a fate pawh a hma anga a ngaihsak ta lo te, a inbual apianga a hnung nawt tura buai lai pawha min koh ziahna hun te kha a rei ta viau mai ka ti. A hlawh that tuma kan fate bakah ka tana eng emaw tal a lo hawn ziah thinna hun pawh a liam ta duai mai. Chumai a ni lo a phone a rik zin tawh zia bakah bathrooma rei tak a be ziah te, a phone hmansak ka tum changa a khawih leh a en hmasa phawt zel ta te..khai a! Ka lova mawl rei êm..

Ka ţhu hnawk a, ka chau rawih rawih mai. Ka buai leh ka fate avanga thil dang ka ngaihtuah hleih theih loh avangin ka pasal danglamna hi ka lo hmuthiam lo mai mai a lo ni. Ni e, ka ngaihthah ve bawk a. Ka namnul chang pawh a awm, a chhan chu ka fate ka dah pawimawhber a, tin, fate an awm tawh chuan inngaihsak vak hleihtheih a ni bik lo nen, amah pawh a vui ka ring lem lo. Sex hman chakna ka neih ngai loh vang leh ka hah rimtawng ka muhil nghal mai thin te khan kan pa nunah danglamna a thlen ta a va nih mai hmel êm..mahse..

Chutiang pawh chu lo ni tehreng se, engvangin nge ka laka a duhkhawp lohna sawi lova ngaihzawng a neih kher? Chu chu ka haw lutuk tlat.

Mittui tla par chungin ka inbual a. Ka fate ţap ri pawh a zawng zawngin ka ngaihtuah hleithei tlat tawh lo. Eng tin nge ka chhungkua hi ka chhanhim anga, angai ang kha ka nihtir leh ang tih chu ka buaina a ni.

A hun ngaiah a lo haw a. Ka fate an muhil tawh a. Tv enin ka lo nghak a. Ka ngawih reng vang chuan a rawn phul hlut a. Zu rim erawh a nam ka hre lo. Chaw ei ka siam a. A inbual zawhah kan mu nghal a.

“Tu nge i bialnu chu?” Ka ti ta hlawl a. A phawk hrûin ka hria. Ka zawh dan teh thut pawh chu.

“Tu nge ti?” Daih mai a.

“In lar nasa tawh alawm. Tu nge sawi rawh” ka vin thak a. Lehlam a hawi a. “I la hre ve mai ang” a ti ta a! Ka sa zawk mai. Zep buai pawh a tum ta lo,. Neih a tum angem? Nge ka chhuahsan hun an lo nghak reng tawh zawk.

“I lova tenawm ve le’h” ka hnuk a ulh deuh a.

“I ngaihdan anih mai chu”

“Engvang nge?”

“Inngaihtuah ve rawh. Vawi engzat nge nupa nun hmanpuia ka sawm chea min hnar thin. I ţawp thei ropui si. I fate ringawt i ngaihtuah a, engahmah min ngai hleinem..i pasal ka ni tih hi i theihnghilh tawh alawm” a tawngkam tin chuan min vit sawk sawk a ni ber mai. “I ţawp” min han ti kher chu ka la na kher mai. Keima tawkah ka buai ve êm a, ka intuaifaiin ka nalh vur reng thei lo tih a hre ve reng sia.

“I chhuanlam a nih chu..i lerh vang anih kha. Nupui khawpkham lo i nih vang anih kha” ka ti tawn tawn a. Ka ţap pur tawh a.

“Ninawm, ka muhil duh” a ti hluk a. A ngawi ta vang vang a. Ka lungawi lo chu ka insawh ka insawh a.

Kan fate avangin ka buai a, ka hah a. Ka chau hnêp thin. Engtin nge eitur tui tak nen ka lo hmuah zantin theih ang? In lam hna bakah naupang ninhlei leh harhvang tak tak te ţhelh buai reng renga ka nilen hnuah engtin nge phur sarha nupa nun ka hmanpui theih tawh ang? Naupang pathumin an hnêk dak tawh ka hnute lo fual ta te, a hnawk thin avanga ka tawnkhawm mai thin ka sam pheng tak te, inbual nana hun ka hman tlem a ngaih thin zia te..engkim chu amah leh kan fate vang a ni ve tho asin. Kan chhungkua a vanga thlanrim ka lo nam thin chu a tan rimchhia a lo tling em em tawh amaw? A hah dawn nia ka hriat vanga hnawk nuaiha kan in chhung a rawn hmuh ka hlauh vanga ka kut a awl hleithei lo te chu engtin nge a hriatthiam theih loh theih? Thil tam tak hi a tan ka ti asin. Ani chuan ka that tawk lohna, ka fel tawk lohna a hmu lian a. A na ka ti hle mai.

A tukah chuan buai chung chungin ka pa te in lamah ka kal ta ngawt a. Ka va thlen chuan chanchin chu ka hrilh a. An fapa mahnise mi fing an ni a, ka thlavang an hauh na khawp mai. Ka môpui a lo haw a, chanchin a han hre ve leh a. Min hmuhsit phah ngawt ang.

“Dik tak chuan inpa ka tan vang ni loin, nang pawh chhangchhiat tih vang ngawtin i intiţawp nghal ngawt a. Kha tuna i thawmhnaw hak te kha nu ûn pui tawh hak chi anih kha. I fate i hmangaih luatah nangmah i inngaihtuah hman lova, a pawi ve tho asin. Sex te hi nupa nunah chuan a pawimawh nasa si a, inpa lahin mi chi hrang hrang a phur kual a, nalh tak tak easy tak tak si te..i laka a tuihalna chu insumzo loin a leihbaw ta aniang. Inpa dem ngawt loin insiamthat tum ve la, inpa pawh a dik ka ti chuang lo. Hrilh ve mai tur che ania” tih thu chu ka mopui hnen atanga ka thurawn dawn a ni. A tirah chuan na ka ti ngang mai a, min hmuhsit vangah ka ngai a. Ka haw khawp mai. Mahse, ina ka hawn hnua ka han ngaihtuah chian chuan a thusawi kha a dik lohna em em ka hre lo tlat. Ngaihpawimawh em em tur ka lo ngaihthah ve bawk atin ni.

“Chhangchhe chung pawh hian a chetfel theih” titu kha keimah ang bawka chhangchhe ve tho a ni a. Mahse, a nalh a, a inchei hlar reng a, hmuh a nuam em em. Engvangin nge ka tihtheih loh bik ang le..ka tlai tawh hial angem aw..

Mahse, ka rilru dam theih loh chhan lian tak a awm.

“A chhangchhiat buai vanga intuaifai hman lo nupui chu ngaihzawng neihsan a thiang em ni?” Tih thu hian min vilh ngut ngut reng a. Ka pasal chu ka lakah a uire tawh a. Vawi engzat chiah nge a hmei nen khan an mutdun ang tih chu ka hre hauh lo. Mahse, min mamawh tawh lo tih ka hriat atang khan ka laka a duh leh beisei chu mi dang atangin a hmu tih ka hrethiam ve.

Ka pasal chu hneh tum phawt ila tiin rilru ka siam a. Min phatsan duhna thinlung a pu erawh chu ngaihzam harsa ka ti khawp ang le.

Ka mopui thurawn angin ka danglam ţan a. Ka theih ang tawka tuiin eitur ka siam a. Fai taka inbualin khumlaizawlah kan chhungkua avangin zah theih loh ka chhuah a. Nupa nun kan hman lai ngei pawhin ka chhungril chu a rum vawng vawng tho mai, mahse, ka pasal hi ka then duh lo. Then ta ila tun ai hian ka dinhmun a chhe zawk dawn si a. Rilrua paidam tum chungin pawnlang takin ka nui lui a, a ruka mittui hru chungin ka fate ka awimu a, melh ngai melh reng chungin   a bialnu bula awmdan tur ka zeldin a. Nun hi a va khirh êm ve le..

Tawng bul bul thawm avangin ka harh hlawl a.

“Min lo tibuai tawh suh. Ka nupui hi ka then phal lo. Ka fate nu a ni a, ka hmangaih bawk, nang leh keia inkara thil awm kha chu theihnghilh zawk ang. Min hrethiam hram dawn nia” titu ka pasal aw ngaithla chung chuan a der tel miah loin ka lo nui a. Ka mopui hnena lawmthu sawi dan tur pawh ka duang lawk sa thlap a. Mahse..

Hei erawh ka zawhna kumkhua tur a ni ang.

“Ka pasal hian ka laka a duhkhawp leh beisei ang a hmuh loh vang maiin, min phatsanin hmeichhe dang a mutpui thei ang tih hi khawvel danah a inziak em?” Tih te.

“Ngawi renga a laka ka tlin lohna sawi si lova min hnungchhawn hi a fair em?”

“A nupui laka a lungawi loh chhuanlama hmangin hmeichhe dang hnenah beiseina a pe a. A tawp a thlenpui leh thei si lo, tichuan beidawng taka a siam tak hmeichhia kha thiam loh kan chantir zawk a. A fair meuh ang maw?”

A chhanna hi ka pasal hian min la pe thei ngeiin ka ring a, chutih hunah chuan chantawka lungawi tumin ka chhungkua avangin chhungril natna hi a kiang ve tawh ang chu…

(Mi pawi ka sawi loh hram ka beisei)