Thunderbolt-12

The Man From The CIA

Bond chuan Interfield Road lam atangin a taxi hman chuan Airport lam chu a panding nghal a, a thawhpui tur CIA (Central Intelligence Agency) ami chu dar 1:45-ah Pan America a lothleng tur a ni a, a hming chu F Larkin niin Bond chu an rawn hrilh a. Bond chuan a thawhpui tur pa chu College chhuak hlim British Intelligence leh an ram ngaisang lo tak a ni ang tih a hlau rilru hle.

Mahse Bond chuan London a chhuahsan hma a Section A kaltlanga hmanrua rawn keng tura a chahte chu a tawn theihnghilhloh hram a beisei a. Section A hi CIA ho nena an inbiakpawhna hmanrua ber a ni dawn a, a thuchahte chu transmitter that leh changkang ber bakah receiver a ni nghal a. Chung chu an neih chuan an hotute Washington leh London a mite thu thawnduh pawhin an awmna atangin an tifel thei zel dawn a ni.

Bond chu a inbualfai a, chaw a ei leh phawt a. Dar 9:30 an Commissioner of Police leh Chief of Immigration and Custom a hmu zui nghal a. Anni bakah hian Deputy Governor a hmu bawk a, thil awmdan chu a rinruk ang chiah a lo ni reng e.

A lehkha leh file a Most Immediate leh Top Secret tih intar avang chuan theihtawpa tanpui anih tur thu hrilh a ni nghal a. Mahse a mi dawrte chuan an hmabak chu thil pawmawm leh rintlak a an ngaih chiahloh avangin tourist te chawkbuai tur zawnga thiltih erawh an tumlo hle.

Deputy Governor, Roddick chu pa fimkhur hmel tak, hmuihmul tlem zuah leh tarmit fai zet mai bun a ni a. A ngaihdan chu, "Commander Bond, thil awmdan kan chhut ngial a, kan thian American ho thlir dan a kan han thlir pawhin thlawhna, khawl pali nei, lian tak si han thuhruk theihna awm chu kan hnaivai ah hian a awm kan ring theilo a ni. Chutiang a thlawhna tum theihna awmchhun chu Nassau ah chauh a ni a, tuia tum thu hlaah chuan thliarkar dang dang thuneitute pawh kan be pawp reng a, mahse anni pawhin engmah an hmu bik lo va. Khaw awmdan thlirna station a radar entu te..." a ti hman chiah a, Bond-a chuan, "Radar chu englai pawha thutchilh reng a ni em? Ka hmuhdan chuan airport hi chhunah chuan an buai hle a, mahse zan lam erawh chu a reh viau thung a. Zan lamah radar chu an vil ngunlo deuh ngei angem?" tiin alo pawtchat a.

Commissioner of Police chuan, "Commander thusawi chuan awmzia a neiin ka hria, ka pu. Airport commandant pawhin zan lamah chuan an inthlahdul deuh thu a sawi ngei a. Mihring an indaih lo va, an michhawrte lah henglai a fawmkhawm mai mai an ni bawk. Mitha tak tak nihlawm mah se, London standard te chu an pha dawn hauh lo va. Radar lah chuan a hmuhniam in, a hmu thui thei miah bawk si lo. Lawng lam thlirna a ni deuh ber zawk leh nghal a," a lo ti ve a. Hepa hi kum 40 mi vel, sipai niawm tak a ni a, a uniform dumpawlah chuan silver rawng kawrkilh a de chuai mai a.

"Anih tak chu. In thilsawi chu ngaihtuah tham tak a ni. Commander Bond hian hma lak a tum thovin ka ring a, tunah hian Secretary of State chuan he thliarkarah hian mi rinhlehawm deuh leh chutiang lam mi chu an awm em tih hriat a duh thu a rawn thawn a ni. Chhanna a awm thei em, Mr. Pittman?"

Chief of Immigration and Custom hi Nassau mi, mitmu buang deuh leh kawm nawm hmel tak, inchei fai zet mai hi a ni a, nui ching hian, "Chutiang thil danglam deuh han sawi tur a awm lo, ka pu. Tourist leh sumdawngho bakah helai hmuna cheng thin zinchhuak ho, lokir leh te an ni deuh ber mai. Kar 2 kalta atang khan mumal takin kan chhinchhiah tawh a ni," tiin a briefcase chu a beng thak thak a.

"Hetah hian lolut ho chanchin chu ka nei vek a, commander Bond hian min enpui se a tha awm e. Hotel lianho hi chuan detective an nei vek a. Chuvangin Commander hian a duh phei chuan an chanchin chipchiar zawkin ka ngaihtuahbelh sak thei ngei ang. Passport pawh mumal taka endik vek zel a ni a, thil diklo a awm hriat a ni lo. Diktak chuan tunah hian sawrkar zawnlai an awm kan hrelo a ni," a ti a.

Bond chuan, "Zawhna ka zawt thei che angem?" a lo ti bauh va.

Lu buk nghat pah chuan Deputy Commissioner chuan, "I duh duh zawt rawh khai. Tanpui tur che kan ni alawm," a lo ti a.

"Mi engemaw zat, a ruala awmkhawm ka zawng a ni deuh ber mai, sawmnai chuan anntlem ka ringlo. An inkawp ngun hle anga, 20/30 pawh an ni maithei bawk. European an nih ka ring bawk a. Lawng emaw, thlawhna emaw an neih ngei ka ring bawk a ni. Nassau ah hian inlhawmpui ang chi, convention in thlen fo ka ring a; sumdawng, tourist, association leh kohhran lamte pawh an rawn tel thin ngei ang a. Khawi laiah emaw, hotela cheng hovin meeting te pawh an neih thin ngei ka ring. Chutiang thil chu tunhnaiah sawi mai theih i nei em?"

Governor pawh chuan, "Chutiang thil chu a awm em, Mr. Pittman?" a lo ti ve vat bawk a.

"Â, chutiang lama kalkhawm chu a tam thin khawp mai. Tourist Board lam tan pawh khual duhawm an ni a. Mahse tun karhnih kalta chhung kha chuan pawl hnih chauh chutiang chu an awm. Moral Reatmoment Group ho chu Emerald Wave ah an innghat a, Royal Bahamian ah Yiptop Biscuit ho an awm bawk. Anni ho hi an haw leh bek tawh a ni. Inkhawmpui dan pangngaiin hun an hmang a, mi pangngai tak vek an niin ka hria,"

"Chu tak chu alawm, Mr. Pittman. Ka mi zawnte hi thlawhna hial ru thei an ni a, mizah leh, a langa rinhlehawm miahlo turin an khawsa ngei dawn a ni. Dan kalh duh hmel an pu dawn hauh lova, a nihna takah phei chuan mi pangngai chunglam vek am ni ang. Chutiang mi chu thliarkarah hian an awm em?"

Nui chung hian Chief of Immigration chuan, "Á, tunah hian kumdang ang bawkin rohlu zawng pawl chu an awm ngei alawm," a ti a. Deputy Governor pawh chuan nui tha chung chuan, "Ngawiteh, Mr. Pittman. Anni ho chu he thilah hian kaihluh chi an nih ka va ring lo ve. Chuti lo chu buaina hian chintawk a neilo palh ang. Commander Bond hian chutiang mihausa tihtur hrelo ho chu a buaipui duh ka ringlo," alo ti ve a.

Inngaihtuah muk zet hian Commissioner of Police chuan, "Mahse kapu, he pawl hian Yatch kawlin, thlawhna pawh an nei asin. Tunhnai khan an shareholders ho pawh an rawn thleng hlawm a ni tih kan hre bawk. Commander ina a  thil min zawh nen chuan a induh viau va, mahse an hotu deuh Largo hi pa zahawm tak mai a ni a, a hote lahin buaina min siamsak ngai hauhlo. Mahse thla ruk zet chhunga an zinga pakhat pawhin zu ruih thubuai tak ngial pawh an neilo hi chu thilmak danglam tak chu a ni ve phawt mai," alo ti ve thung a.

Chu thuthar, innghahna ho a hriat chuan Bond chuan darkar2 lai a chhuizui ta a. Custom leh Commissioner Office ah a hun a hmang a, a hnu chuan khuaah Largo hmel hmuh beiseiin ava lut a, mahse tumloh deuhvin Domino zawk chu ava tawng ta a ni.

A taxi chuanna chuan reilote ah airport chu a thlengphei a. Bond cbuan amah chunlo nghak turin driver chu a hrilh a, waiting room lamah a lut phei ta a. Airport a aurinna chuan Larkina chuanna thlawhna lo thlen thu chu alo puang ve chiah bawk a. Custom leh Immigration velah an muangchang hlek dawn tih a hrethiam nghal mai.

Souvenir zawrhna lamah a lutkual leh a, New York Times a lei a, a thupuiah chuan Vindicator Bomber bo thu chu thukhuh tak siin an lo tarlang ve a. Atom Bomb bo thu chu rawn ziak chiahlo mah se an hria ni ngei tur a ni. Arthur Krock chuan NATO a security lam fimkhur tawk lohzia te chu a tawn tial nasa mai a.

Chutia chanchinbu a chhiar lai chuan a bengbul maiah chuan aw hian, '007 i ni em? No. 000 ka lo thleng e,' a rawn ti a.

Bond chu a han inher a, chupa chu a thian hlui, CIA ami Felix Leiter alo ni reng mai le!!

Leiter nen hian vawi tam tak harsatna tawkin, an lo inkawp tawh thin a. Chu agent chuan a kut dinglam aia thirkawm a vuah tak chuan Bond chu a banah a rawn vuan a. "Inbengdai rawh, thianpa. Engkim ka hrilh ang che. Ka bag pawh in hmalamah an dah tawh e. Tirawh, i chhuak nghal ang hmiang," a rawn ti ta a.

Bond chuan, "Hrep tak chuan!! Nang lo ni reng a!! Keimah min rawn hmu dawn tih i hrelawk em?" a han ti a.

Leiter a bungrua te chu car ah chuan an hlang a, Royal Bahamian lam pan turin driver chu a ham hrilh a. Chutih lai tak chuan Ford Consal Saloon bula ding hian a rawn pan phei a. "Mr. Larkin ini tiraw? Herz car company a thawk ka ni a, i car chahsa pawh ka rawn keng nghal e. I duh ang chi a nih ngei ka beisei. Car satliah deuh kha i duh niin ka hria a," a rawn ti a.

Leiter pawh chuan car chu a'n bih thuak a, "A that hi, a tlan theih chuan a tawk mai. Mi pakhat chauh phurh theihna tih ang chi hi ka duhlo. Hnathawk tura lokal ka nih hi," a ti a.

"Ka pu, i New York driving license ka en thei angem..? A that hi. He laiah hian i hming ziak la... I dinners club card no hi ka lo la ve nghal ange. Car hi I hman zawh ah i duhna laiah dah tawp la, min rawn hriattir chuan kan lo buaipui mai ang. Holiday nuam takin i hmang dawn nia, ka pu,"

An pahnih chuan car ah chuan an chuang a, Bond a chu a khalhtu thutna lamah chuan a thu a. Bahamas ramah hi chuan veilam kawng zel chuh tur a ni a, America nen chuan a inang lo deuh a ni. Airport an chhuahsan hnu chuan, "Awle, thil awmdan mi han hrilh teh. Kan inhmuh hnuhnun ber khan Pinkerton angin i che a, enge thil awmdan chiah?" tiin Bond chuan a han zawt a.

Ma peihlo chung CIA hian min chhawrlui leh mawle. James, CIA hnuai a vawikhat i thawh tawh chuan i ban hnuah pawh reserved officer anga dah ini zui zel ang. Thu awihloh vang leh thil pawi engemaw i khawih vanga bam te inih ngawt loh chuan. President in a mangan thu a han puan khan kan pu hlui Allan Dules chuan tirhchhuah tur mihring a duh ang a hmulo ni ngei tur a ni. In-report nan darkar hnih chiah hun min pe lehnghal a. Tichuan Nassau hi ka rawn pan ga nghal a ni. Ka phun nasat lutuk an hlauh deuh a ni mahna, nang nena thawk duh tur kan nih thu min hrilh ta a ni. O pu 'N' emaw ni, 'M' emaw ni khan silai nen helai hmunah a tir che a nih chuan thil engemaw tak chu a awm a ni ngei ang tiin ka insiam a, i thil rawn chah ho nen, thal leh a ngul nena intam in ka rawn thawkchhuak ta a ni. Chu zawng chu a ni mai e. Nang ve thung hi?"

Bond chuan Leiter chu thil awmdan chipchiar takin a hrilh ve nghal a. An HQ kawta car khalhtuin a lokah ringawt dan te leh a kaptu ngei thihdan thleng chuan a hrilh a. Chutia a sawilai chuan Leiter chuan, "Chu chu engtin nge i ngaih ve reng reng? Kei chu ka pawmzam theih zawng a ni lo. Tunhnai maiah minu te  khawihsak i nei a ni lo maw? Ngaih chu a tha zan lo anih chu" tiin alo pawtchat a.

"Keipawhin a ngaihna reng ka hrelo. Khatianga che duh mai tura ka rin chu clinic a ka mitawn chauh kha a ni. Chupa chu Chinese pawl lian tak, Red Lighting Tong mi leh sa a ni a..." tiin thil awmdan chu a han hrilh a.

"Chu mi a dahna chu khawilaia awm nge?"

"A hmun chu Washington a ni a, nangni Washington ai chuan te tak leh nep tak a ni. Brighton atanga hnaite a ni,"

"Lehkha chu Brighton Dak In atanga thlak a ni a"

"Ni e, mahse an inzawm lo maithei a ni,"

"Anig leh heti zawng hian chhut chhin teh ang. Kan pawl lam mi pakhat chuan thlawhna chu zana ruktir a tum anih chuan thla biallai chu a thlang ngei ang. Mahse thlawhna bo kha ni 6 hnuah a ni a. I mihring ur hmin tep chu lehkha kengtu lo ni ta se, i hem avang khan a lehkha thawn tur pawh chu a tlaiphah a ni mahna. Chuti anih chuan amah ruaitu te chu an thinur hle ngei ang,"

"Thinur viau maithei a ni,"

"A chet felloh avangin thah tur lo ni ta se, i chunga a thinurna hrikthlak a tum lai takin an pawl killer chuan a rawn nang ve a ni thei asin. A mizia i sawi atangin a chunga i thiltih chu tuar dam mai mai chi anih hmel loh tlat a ni. Khai le, enge i ngaihdan? Ka thusawi chu a inkhai mar nalh viau lo maw?" inchhuang tak, nui var var chung hian a han ti a.

Bond chu a nui hawk a, "Ruihtheih i lem hlek a ni lo maw? Chutiang thil chu hringnunah a thleng ngai lo," a lo tihsan a.

"Atom Bomb phur thlawhna te pawh a taka thil thleng ngailo a ni a, a thleng miau si a nih hi. I ngaihtuahna a chau ta riau mai, James. Nang nena kan hna buaipui tum mek hi mi engzatin nge a taka pawm duh a i rin? A tak tak tih vel kha chu sawiduh ting lo mai rawh. Tunlai khawvelah chutiang thil thliarfel tum chi a ni lo,"

Bond pawh chu a ngawi ta vang vang a, chutah thutak deuh zawk hian, "Ni e, Felix. I thilsawi chuan engemaw chen chu dikna a neih hmel tlat mai. Zanin ah M chu ka va bia ang a, engchen nge thil an chhui theih ka va zawt ange. Mahse khapa kha a pheikhawk bak mumal a chhar tur a awmloh avangin chhui a buaithlak viau ang. Motor cycle khalhtu lah kha manchhuah chi a ni der si lo. Professional chetna hnuhma dik tak a ang khawp mai," a ti ve ta a.

"Engah nge a nih lohvang. Thlawhna rutu te pawh hi an chetdan a zeiin professional chetdan dik tak a ni. Han chhut vang vang pawhin a inrem thluam mai asin. Va zawt la, kan ngaihtuah chhuah anga sawi pawh va zak suh. Kan pawl ka chhuahsan hnu hian ka chawimawina tangkapui dawn pawh a tlem ta deuh reng reng mai,"

Chutiang lam hlir sawi chung chuan Royal Bahamian chu an thleng ta a. Leiter pawh chu a inziak lut ve a, a pindanah chuan an inzui lut a, ei-in tur lam pawh uluk takin an lam zui nghal a.

Pindan bathlarah chuan thu dunin zing atanga Bond-a lo chhuichhuah tawh chin chu an sawidun ta a. An eitur chah alo thleng a, mahse tu an ti hranlo hle mai. A tawpah chuan Leiter chuan a chemte leh thirkut chu dawhkana thehthlak pahin, "Ava tui hranlo hlawm ve. An French Onion Ring te hi France atanga lak a ni miah lovang." a han ti ngawt a.

"Kan tana pawimawh hmasa ber chu 'hmun hrana chaw ei tawh tur' tih hi a ni a, chumi dawtah chuan disco va tlawh a ni leh ang. Chumi zawhah chuan sawng mi te sawn rohlu a - Pieces of Eight (Spanish pawisa hlui) nge an zawn a, pound 100,000,000/- zawk tih kan hrethei mai ang. Chumi hnuah chuan chetzui zel dan tur kan ngaihtuah nghal angai ang," tiin Bond chuan kil khata bawm engemaw zat lam hawi chuan a ban a han vai a. "Police HQ chungah sawn pindan ka hawh nual a, an Commissioner lah saw pa tha tak mai a lo ni kher bawk a, an police hote pawh an fel khawp mai. Radio kan hung anga, tlai lamah a tul tul kan bekual dawn nia. Zanin ah hian Casino ah party a awm dawn a. Va kal ila, mit iva len teh ang. A hmasa berin Yatch chu rinhlelhawm a nih leh nihloh va chian a tul a ni. I Geiger Counter ( hei hi atom zung zam manna a ni) chu i phawrh mai thei em?" a han tihzawm leh a.

"Thei tuk e a," tiin Leiter chuan pakhat chu a han hawng a. Rollerflex camera niawm tak hi a bawm savun nen a rawn lachhuak a.