James Bond-The Man with the Golden Gun-13

13. HEAR THE TRAIN BLOW 


Dar 12:00 a rik chuan Hotel pindan lianah chuan an awmkhawm vek tawh a. 

Scaramanga chuan stetson lukhum var hi a khum a, han en mai chuan fu huan neitu hausa tak hi a ang hle. Mr. Hendriks chu a pangngai deuh reng hian ala ninchei a, mahse lukhum a khum ve tawh thung a. Midang pali te chuan Calupso kawr an tih mai fual tak, an khup thleng deuhthaw hi a n ha vek thung a, silai pai an nih chuan an chet a tifum ngeiin a rinawm a. Bond pawh chuan ngaihthatthlak deuh huai hian a hria a. Kawtah chuan Scaramanga car bakah car dangte pawh chu an lo ding nual tawh a. 

Scaramanga chuan receiption dawhkan chu a pan phei a, Nick Nicholson chuan lo ngaihven hmel tak hian, "In inpeih thawkhat tawh em ni?" a lo ti var a. 

"Khawnge i thianpa Travis kha? Ka va hmu lo ve," 

Thu tak hmel deuh hian Nicholson chuan, "A hanget a na tlat mai a, phawitir turin Savannah La Mar-ah ka tir ta anih kha. Vawiin tlai chuan a che leh thei mai ang, ka pu," a lo ti a. 

"Ava pawi ve. Vawiin hlawh chu a chanve chauhvin siamsak ang che. Kan pawlah hi chuan mi zelthel tan hmun a awm lo. Kan indaihloh tehreng nen, heta a lokal hmain a ha chu phawitir daih tur alawm, a dik em?" 

"Ni e, ka lo hrilh ang, Mr. Scaramanga" 

Scaramanga chuan a thiante lam chu hawiin, "Awle, thiante u, hei hi thil awmdan tur chu a ni ang. Rel station thlen hma melkhat chu car-in kan tlan anga, chuta tang chuan rel te chi ah kan chuang zui ang. Rel hi a tha danglam reuh khawp a, Denver, South Park leh Pacific Line te ho rel ang deuh, Thunderbird hotel ta tur liau liau va mi pakhat, Lucius Beebe-a'n a siam a ni a, a hmel pawh a nalh reuh khawp a nia. Tichuan Green Island Harbour lam panin fu hmun zingah mel 20 vel kan tlan anga, relkawng hnaivaiah phei chuan sava, sazu chikhat leh awle te pawh an tam khawp ang. Kan phur deuh leh sa te pawh kan phiul nghal dawn nia, silai hmanna hun te pawh in nei thei mai ang. In silai in keng vek maw? A tha e, a tha e. Green Island-ah Champagne nen chaw kan ei anga, rimawi leh nula pawh in duh ang chu. Chhun chaw kan eikham ah Christcraft lawng Thunderbird-ah kan chuang anga, vaukam thlanglam deuhva Lucea khua kan pan dawn a ni. Kawng lakah sangha eitur man thlak kan tum bawk dawn nia. Kan nin deuh hunah kan kir leh mai ang chu. In ngaihdan a ni hlawm meuh emaw chu, pute u? Awle, rawtna hran in neihloh chuan kal ang u le," a ti ta a. 

Car ah chuan an chuang ta sang sang a, Bond chu Thunderbird hnung lamah chuan chuang tura hrilh a ni a, a hma driver bulah chuan Scaramanga chu a chuang a, an tlan tan ta a. 

Bond chuan Scaramanga chu a tukkhum lam atanga han kah thuai mai chu a chak hle mai. Mahse hmun ualau lai a tlan an nih bakah an hnung car ah chuan mi pali, silai keng thiau an chuang ve bawk si a, a tan chuan thiltih chi lutuk a ni hran lo tlat. Amah thah an tum hun tur pawh chu sa an pelh hunah chuan anih ngei a ring a. 

Midang hmuh lemloh chuan a han thensak a, ani pawh chu a ruk tak chuan a phur ru riau tlat a ni. A awmdan tak phei chu sawifiah harsa a ti zawk hle. A hma car seat-a thu chu kar 6 zet alo zui ve tawh a, a zuichhan ber pawh vawiinah chuan hlen theih a inbeisei a ni. Chetsual chu thihna a ni tih pawh a hrechiang a. Hmelma lam chu an tam daih zawk a, mahse thil thui tak a hreru hlauh chuan a dinhmun a tiziaawm tlat a ni. 

Ralthuamah enge an hman ang? Midangte chu lo dahtha thei ta pawh ni se, Scaramanga ringawt pawh chu a huphurhawm hle. Colt .45 chu a ngul a sei deuh avangin phawichhuah lamah chuan tlemin a muanphah deuh mai thei a. Mahse a ngul a sei avang tak chuan hla deuh kah dawn phei chuan a Walther PPK ai chuan a kah a dik zawk ngei a rinawm thung si a ni. Silaimu paitam lamah chuan Walther dinhmun chu a that zawk hlek a rinawm a. Scaramanga khan a silaimu chamber hmasa ber a kimlo tih chu a hrechhuak anih loh chuan chu ringawt pawh chuan kawngro thui tak a su thei tlat a ni. 

Bond chuan kutngil nge pawimawh anga rilru fim zawk tihte a han ngaihtuah a. Silai hmehper hunah chuan hmanhmawh lutuk a chi dawn lo tih pawh a hria. Rilru fim leh vawt raih mai put a tul zawk ngei ang tih a ring tlat a ni. Ani chuan a nunna chhanhim turin theihtawp a chhuah dawn a, anni erawh chuan intihhlimna ang lekah an ngai dawn tih pawh a hai lo a ni. A kut dinglam chu hman chak hian a phu zeih zeih mai a. A kut chu a ipte ah a zenlut ta daih a. 

A ngaihtuahna a vak thuiin a hmabak chu hreh lam aiin a chakin a chak zek zek tawh zawk a. Mahse chumi a phurna nasa tak chuan fimkhur tawklohna a thlen palh ang tih a hlauh avangin a theih ang tawkin a in-control hram hram thung a. Cigarrette a han phawrh a, a tan hnu chuan a han fawp kawk kawk a. Reivaklo an tlan hnu chuan rel station chu an thleng ta. 

He station hi USA-a Colorado State a relkawng te chi, an hmanlai huna an cheibawl dan ang deuh va chei a ni a. Kawtthlera inhniam te te intlar zinga a hmasa berah chuan 'Thunderbird Halt' tih hi bathlarah chuan a intar a. Fakna chi hrang hrang - 'Chew Roseleaf Fine Cut Warranted Finiest Virginia Leaf,' 'Trains Stop for all Meals,' 'No Checks Accepted," tihte chu a intar thluah mai a. 

Rel chu a dum leh var a chei tle vur mai, rel pangngai aia te zawk fe hi a ni reuh va. Rel lu, meikhu chhuahna dawt atang chuan meikhu a chhuak vat vat a. Rel lu pangah chuan a hming, 'The Belle' tih chu a intar va mai a. Rel pindan ti mai ang, a hmasa ber ami chu chung neilo dahlau tak, thutna dup nuam tak tak inrem hi a ni a, a chung siamchawp chu nisa laka inhliahna chauh a ni tih a hriattheih a. Rel brake van bik pawh chu a dum leh eng a chei bawk a ni a. Rel tihdinna bul maiah chuan chair nalh leh rinawm hmel deuh hi a inhung a. Rel chu a han kiu vang vang a. Rel pangngai ang tho va uluk lutuk a siam ve tho anih avangin han en mai pawh chuan mit a la hle a ni. Phur deuh hian Scaramanga chuan, "A kiu ri chu in hria em, thiante u? Khai le, chuang ang ule," a han ti a. 

Bond-a beisei loh takin a rangkachak pistol chu a phawi a, vanlam hawi chuan a han hmetper ta a. A puah mai loh avangin (Bond-a'n mu khat a paihsak kha) a han hmetnawn leh a, silai chu a puak khawk ta rum rum mai a. tation master, station-a ding chuan silai ri chu ngaihthlak hrehawm a tih hmel hle nghe nghe a. A sana ken chu a ak a, a flag hring kenlai chu thlakthlain a pensawn ta nghal a. 

Scaramanga chuan a silai chu a han endik a, Bond chu chik deuh hian a rawn en vang vang a. "Awle, ka thian, nang chu a hmalamah a khalhtu bulah va chuang rawh le," a han ti a. Hlim hmel deuh va nui chung hian Bond chuan, "A lawmawm anih chu. Naupan lai atanga ka thil chak ber thin a lawm," a lo ti mai a. 

Scaramanga chuan a lu a lo bu nghut a, a han hawilet a. "Nang, Mr. Hendriks. Lungalhthei dahna bulah chuang la, i hnungah midang an rawn intlar ang; kei chu brake van-ah ka chuang thung ang. Sa kah tur thlir vel nan a remchang tlat a ni," a ti ta zung zung a. An awmna tur theuh chu an pan ta sang sang a. Rel chu a han kiu leh a, hmalam pan chuan meikhu chhuah hlat hlat chungin a tlaan tan ta a. Bond chuan an hmalam chu a han en a, kawng chu ngil tak hian an hmalamah chuan a zuihral parh a. 

Bond chuan rel tlanchak zawng tehna sana chu a han thlek a, darkar khata mel 20-a chak hian an lo tlan tawh a. Rel khalhtu chu a han en leh a, chupa chu Rastafari khaki, thawmhnaw inzawm vek chi ha, en reng reng pawh a hnunglam chhawn chakawm loh zet mai hi a ni a. Hmuihmul tlem a zuah a, a khabe hmul neihchhun chu a khat hle mai bawk a. A kamsir a cigarrette peh chu a zawr hle tawh mai bawk a. 

"Ka hming chu Mark Hazard a ni a, tunge i hming ni ve le?" 

"Ross. Man Bukra ka be ngailo," Ross tih hi Jamaican hovin 'ngawi mai mai teh' an tihna a ni a. 'Bukra tih chu Mingo ho an elsenna pakhat a ni. 

Ngai thutak lo deuh hian Bond chuan, "In sakhuana hian in vengte hmangaihna a huam tel emaw ka ti asin," a lo ti a. Chu Rasta chuan rel chu a han tikiu vak a, "Sheet" a han ti a. Meipui vurna kawngkhar chu a tlawh hawng a, lungalhthei chu a vur nghal mawlh mawlh a. Bond chuan an awmna chu a han enkual a, a beisei thil chu reilo teah a hmu ta a. 

Kilkhatah chuan Jamaican hovin an hman thin ang ngunhnam chu a lo intung ran mai a, han en mai pawhin a hriam a ni tih chu a hriat hliah hliah mai a. A hmawr pawh chu a zum tha kher mai. Bond chuan ngunhnam hmang em chuan thah an tum a ringlo deuh va. Scaramanga chuan puitham deuh tak leh ama insawi fihlim theihna ngei tur zawngin thil tih a tum a rinawm a ni. 

Scaramanga thachhang dawl tura inpeih reng tur chu Hendriks anih ngei pawh a ring a. Bond chuan an hnung lungalhthei dahna hnuai awng atang chuan a han bihphei a, Hendriks chuan mit lasawn miahlo leh a ngaihtuahna hriat harsa zet mai hian a lo en a. Bond chuan rel tlan ri karah chuan, "A nuam iti em, Hendriks?" tiin a han au hram a. Hendriks pawh chuan a mit a lasawn ta a. 

Bond chuan kun deuh hian Hendriks a hnunglam chu a han en a, midang pali te pawh chuan che changlo lek hian amah chu an lo en a. Bond chuan engmah hrelo ang hrim hian a ban chu a han vai a, mahse rawn vailet tum an awmlo chiang hle. An endan leh awmdanah chuan a chanchin chu an hrevek tawh ni hian alang a. 

Bond chu anmahni enthlatu a ni a, 'dahthat tur' tih chu an zavaia ngaihdan pawh a ni ngei ang. Bond-a tan pawh chung ho rilru hrereng chung chuan an mitmeng en reng chu a nuam vak awm lo ve. Bond chu a thungil a, Scaramanga pawh chu chiang takin a hmuthei ta a. An inkar chu feet 20 vel chauh hi a ni a, ani pawh chuan Bond-a chu ngun zet hian a rawn en ve bawk a. An rel chuanna chu a te chi a nih miau avangin atu amah chu an inhlatlo hlawm hle. 

Bond chuan a hmalam chu a han hawi leh a, a pistol kawm chu a han dawm a, ngaihtha deuh huai hian a inhria a. A ipte ah chuan magazine thum lai ala ak bawk a, a lo chechhe ta deuh anih pawhin a tam thei ang ber chu thihpui ngei a tumruh hle a ni. 

Rel khalhtu thutna ah chuan lang theilo turin a thutlum leh ta a. Kahfuh theih mai tura tul hleilo va intarlan reng chu a ngam bik chiahlo a ni ngei ang. Rel khalhtu chuan a cigarrette zuklai chu a paihchhuak a, a dang a tan lehnghal a. Rel chu buaipui ngai lovin amahin a tlan zur zur zel a. 

Bond chuan Mary'n Overseas Survey Map a pek a en atang chuan an tlanna lai hmun awmdan chu a hrechiang thawkhat hle. Mel 5 chin chu fuhmun hlir ala ni dawn a, chutah Middle River an thlen hnuin dum hmun an thleng leh dawn a ni. Chulai hmun chu an daidar mek a, a hmingah pawh 'The Great Morass' an ti a. Chumi pelh hnu chuan Orange River an thleng phei leh anga, chulai atang chuan Green Island Harbour bul hnaivaia in leh lo thenkhat chu an thleng leh dawn a ni. 

An hma rel kawng yard 100 vel atang chuan mulukawlh pakhat hi a thlawkchhuak nalh a, thui pawh a thlawh hmain Scaramanga silai chu a puak thuai a. Mulukawlh chu a vir zawk a, sang zawngin a invawrh chho ta a. Silai chu a puak leh dur a, mulukawlh chu a leng lawp a, a rawn tlathla ta tawp tawp a. Lei a thlen hmain silaimu dang hian a rawn deng her leh nawk a, mulukawlh ruang chu fuhmun ah chuan a tlathla ta a. Scaramanga thiante chuan kut an beng ta dar dar a. Bond chu a han hawilet a, "I sava kah kha phalna ilak loh chuan dollar 5 i chawi a ngai ang," tiin ring tak hian Scaramanga chu a va au va. Silai a puak thuai a, silaimu chuan Bond a lu chu a rawn thawi ta thuak mai a. Scaramanga chuan nui hawk hawk chung hian, "Ka tihpalh. Sazu hmuin ka inhre deuh atin a ni," a rawn ti a. Amah vek chuan, "Mr. Hazard, i silai chelek thiamdan kha lo thlir leh ila. Kan hmalam a saw ran tla an awm nual a, pen 10 danah bawng ho saw i kapfuh thei em tih lo en teh ang hmiang," a han tihzawm leh a. A thiante chu an lo nui tlawrh tlawrh hlawm a. 

Bond chu a rawn dakchhuak leh a, Scaramanga chuan a silai chu a malchungah a lo dah leh tawh a. A mitsir chuan Hendriks chuan a kawrchung ipte chu a zen sa reng tih a va hmu thei a. Chutah, "Ka eiduh loh chu ramsa ka kap ngailo. Bawng pum saw i eiduh dawn chuan ka kahsak ang che," a han ti ve nghal a. Scaramanga silai chu a puak lehnghal thuai a, Bond chu a tawlhlet leh vat a. Nui chung hian Scaramanga chuan, "I ka kha veng ngun rawh, Limey. Hmui i neilo palh hlauh ange," a rawn tizui leh a. 

Rel khalhtu chuan anchhia a han phuhchhuak bawrh bawrh a. Rel chu a han pawt kiu leh a, an hma la hla deuh tak, rel kawng lai takah chuan thil engemaw hi alo hmu a lo ni. Driver chuan engemaw hi a han pawt leh a, rel chu tuihu tichhuak vut vut chungin a tlanmuang tan ta a. Chutah silai vawihnih a rawn ri a, silaimu chuan rel chung thir chu a rawn deng ri bawl mai a. Scaramanga chuan thinur tak hian, "Tlanmuang hlek suh," a rawn ti tuarh tuarh a. 

Driver chuan a hmaa Lever a pawhthlak chu a kuaichho leh vat a, rel chu a hma anga chak chuan a tlan leh tan ta a. Chutah a khalhtupa chuan a dar a chhinawk a, a hmui liak huhin Bond chu a rawn en ta a.

 "Kalkawngah sawn Mingo a awm tlat mai. Kan pu thianhluite pawh an ni maithei a ni," a rawn ti a. Bond chuan an hmalam chu ngun deuh mai hian a han en a, relkawng a mi chu Mingo hmeichhia, sambuang lampang a ni tih a hrethei ta a. Scaramanga aw chuan ring deuh hian, "Thiante u, thil danglam deuh tak in tan ka ruahmansak che u a nia. Relkawngah sawn hmeichhe pakhat thlunbeh a ni a. Ngun deuhvin en ula, mi pakhat, James Bond an tih mai bialnu a nih saw. A hming chu Mary Goodnight a ni a, ani zawngin a hming a puzo hle dawn anih hi. Kan in mangtha hlen mai thei a ni. Kan mi sawi Bond-a chu he relah hian chuangve sela chuan zahngaihna a ngen ruai tawh ang chu," a ti ta lung lung a.

Comments

Popular Posts