THUNDERBOLD-14

Soul Martinis

Tlai lama Bond a thil ruahman chu a chanve lai chu tumloh deuhvin a awm nghal pang mai. Domino chuan telephone atangin, chumi ni chuan a guardian leh a thiante ho chu chhuah an tum avangin In chu hmuh a remchanloh thu a rawn hrilh a. Mahse Casino ah an inhmuh theih tur thu a sawi thung. Mahse amah chu Disco a chawei tur leh lawng chu a chhuahtep tawh thu a rawn hrilh a. Tin, Casino ah chuan Bond chu lokal pawh ni se, engtinnge a lo hriat ang tiin a rawn zawt nghal bawk a, mi hmel hre rei theilo hle ni hian a rawn insawi vel a. Bond chuan nui chung a chhan pahin, a mitmeng mawi tak atanga amahin ala hriatreng thu chu a lo hrilh a.

Mahse lawng chu a chechhuak har dawnlo tih a hriat avangin chetdan thlak a ngai tih pawh a hrethiam nghal.

Lawng chu a chetchhuah tak tak hma a lawng chawlhna a va chian hmasak chu thiltih chi ber niin a lang ta. 

Vaukam atangin tuihnuai hlira pan tur pawh ni se a hlat lutuk loh avangin a remchan lai tak a nih hmel ber bawk a ni. Lawng chu a chetchhuah hunah pawh a awmna mawng tuipui chu enfiah a harsa dawn lo va. Mahse Largo thiltih danah chuan Bomb chu lawng hnuaiah chuan a phum angem tih chu thil rinngam pawh a ni chiah chuang lo. Bond chuan lawng ruangam sakdan a hriatchian huna chulam chu relfel atan a dah ta zawk a ni.

M hnena report tur chu uluk takin a ziak zung zung a, mahse a report ah chuan engmah hriatchhuah la neilo angin a in-report a. A lo dawngtu tan chuan hnual rawihna tham a ni. An thil rinhleh chinte chu sawi mai tur em ni ang tiin a han ngaihtuah a, mahse engmah finfiahna awmlo chuan thil tih chi niin a hre ta lo zawk a. Intelligence khawvelah chuan midangte tihlawm duh avanga thu dikhlel deuh inhriattir hi thil pawiber a tling tlat a ni.

Bond chuan an thil rinhlelh ang chi chu han thawn vaih sela chuan Whitehall a Thunderbolt War Room a beiseina bo tawh tak tak te chu an phili nghal sung sung ang a, M chuan fimkhur deuhvin heti hian a han ti anga; 

'Bahamas ah thil chhuizui tur kan neih a rinawm khawp mai. Thil chiangkuang chu la awm hauhlo mah se, thu min rawn thawntu hian thil a tisual ngai zen zen lo. Ni e, ka han chian anga, chhutzui a ngaihdan ka rawn hrilh ang che,' ti a hotute a biakna phone chu muk taka inngaihtuah chung chuan a ham dah anga.

Thuruk mah nise, a ruk tak tak thei dawn lo. 'M in hriat a nei tlat mai. A agent in a chhui fuh hlauh a ni awm e. PM kan hrilh vat a that a rinawm,' tih te a ninawk ngei ang.

Bond chuan a chal a han nuai a, Cipher machine dahna bawm chu hawngin a lehkha ziah chu a han enmil zung zung a, police HQ lam chu a pan ta a.

Leiter pawh chu thuthawnna hmaah chuan thlan tla phungin a lo thu a. Ngawi reng chuan a bulah Bond chu a lo ding a. A hnu minute 10 vel ah chuan Leiter chuan a earphone chu a hlip a, Bond pek pah chuan a hmai chu a rawmawl zawr tawh tak chuan a han hru pawk pawk a. 

"Min tibuaitu hmasa ber chu ni eng zam nasa lutuk avangin radio waveband thlaksek a ngai a, a tawpa ka han biakpawh ber lah chu pa tawngthei lutuk, Shakespeare a thuziak pawh sawichhuak thei hial a mawi a ni lehnghal," nin hmel zet hian a ti a. Dawhkana lehkha darh nuaih mai kawhpah chuan, "An thu rawn thawnte lah mumal taka chinfel vek ala ngai lehnghal. Accounts hovin he thila sum ka hmanral tur zat an hriat duhna te pawh a tel ta ve ang," a han tihzawm leh a. 

Bond chuan thu a han thawn ve lehnghal zung zung a, an office, pindan chhawng 8-na a an lo dawnsawn dan turte chu a mitthla thei nghal vek a. Chu hmuna an duhtawk an ngah hnu chuan Commissioner office lamah chuan an inzui thla ta a. 

Harling a chuan a dawhkan phena thu chung chuan police belthum hnenah hian thu ziah tur alo hrilh zung zung a. Bond-a te lolut a hmuh chuan belthumpa chu a chhuahtir a, cigarette bawm hi Bond-a te lamah chuan rawn nawr phei pahin, "Hmasawnna kan nei emaw chu?" a han ti bauh va.

Bond chuan an hmalam tawh chin chu tawifel takin a han hrilh zung zung a. Mahse a ngaih ala that theih chuanloh avangin a mamawh leh duh ang te chu commissioner chu a hrilh nghal a. Disco tui paitheih zat leh tuibawm dahna lai tak awmna hriat a duhthu te chu a hrilh nghal bawk a. 

Commissioner chuan a lu a bu nghut a. Phone chuna la a, Harbour police a thawk, Sergeant Malony chu a han hrilh nghal a. Chumi zawh chuan, "Lawnga tui an dah dan hriat vek kan duh a. Lawng chawlhhmun zimte a ni a, lawng chi hrang hrang a tam bawk si; vanduai thulhah pawh kangmei lakah te kan fimkhur a ngai a ni. Kangmei thelh a ngaih thut takin lawng reng reng chetdan tur hrilh thei tura an awmdan kan hriat vek a ngai a ni," tiin Bond te chu a han hrilh leh zung zung a. Phone ah chuan, "Sergeant Malony," tiin Bond a zawhna te chu a han zawt chhawng a. A han ngaithla hlek a, phone chuna dah leh ta a. Chutah, "Disco tui paitheih zat chu a tam berah diesel gallon 500 chiah a ni. Hei hi Jun 2 chawhnu lam kha chuan ala khat a, khawl tihnalna Lubricating oil gallon 40 vel bakah tui thianghlim gallon za engemaw zat a pai bawk a ni. Heng hi engine hmalam a dah vek an ni," a ti ta a.

Commissioner thusawi chuan Largo thusawi thenkhat chu a phet ta tlat mai. Largo-a'n lawng inbuk tawk nan a lateral tank tih a sawite nen khan a induh thei ta tlat lo. Rohlu zawnna tur hmanrua thup duhte pawh a ni thei tho mai a. A enga pawh nise thil thup leh puanzar duhloh a nei tih chu a chiang a ni. Chu chuan Bond a rilru chu a sawhngheh tir sauh mai le!! Lawng bang leh hnuailam vel enfiah chu lohtheihloh ah an ngai ta. Leitera'n Olterra lawng a sawi nen kha chuan a inang lo mai thei a, rinloh takin an lo inang khiah maithei bawk.

Bond pawh chuan commissioner chu a rilru a hrilh nghal ta vek a. Zan lama Disco an dahna tur bakah tuihnuai luhthiam deuh, a hote zingah an awm mial em tih leh tuichhung luhna hmanrua a neih leh neihloh te a zawt nghal bawk a. 

Commissioner chuan aw dam duma hian Bond-a thiltum chu, "A finthlak ber dawn em ni?" tiin a han zawt a. Dan bawhchhiatna ni chiahlo mah se, Largo te chu sum pawh renlo taka hmang thin, mi pangngai tak anga lang thin an nih avangin fimkhur a tulin a hria a ni ber mai. Largo chu mi hriat hlawh tak a ni si a, police ten amah avanga hming hliau deuhna an tawk anih vaih chuan thliarkar pumah chuan a darh nghal thuai dawn a, helaia roreltu te tan pawh chu chu a duhawm chiah lo a ni. 

Luhlul leh tumruh deuh hian Bond chuan, "A pawi ka ti ngawt mai, Commissioner. I ngaihdan chu ka hmuhthiam-pui khawp mai che. Mahse ka thil engto tak mai chu tih ngei ngei a ngai a ni. Secretary of State thupek kha a tawk viauvin ka lo hria a, mahse kha kha a tawklo anih chuan darkar khat lek chhung pawhin Prime Minister thupek kan dil leh thei tho ang chu," a han ti a.

Commissioner chuan a lu a thing a, nui chung hian, "Chutia silai liana han inkah ngawt te chu mawle. Commander, i duh leh mamawh chu kan ti em em ang. Helai boruak kalphung ka han sawilang mai a nia. Governor pawhin ka ngaihdan hi min tawmpui ngeiin ka ring. Kan awp chin hi a zim a, Whitehouse atanga suasam hi kan la tawk ngai lo va. He thil hian a daihrei viau phei chuan ngaiah kan la neih chhunzawm ve mai ang. Awle, i mamawh zawng te chu kan nei teuh mai. Harbour savage unit ah pawh mi 20 lai kan nei e. Kan lawng te hi anntalbuai fo avangin  hetiang pawl hi fel taka nei lo theilo kan ni. Constable Santos i thawhpui dawn nia. Eleuthara mi a ni a, mi tha tak a ni. I hmanraw mamawh te pawh alo ngaihtuah vek mai ang. I duhzawng te chu mumal takin min han hrilh la.." a ti ta a.

Hotel a thlen phei leh hnu chuan Bond chu a inbual a, bourbon tlem lemin a mu chawl ta a. Hmanhmawh taka helai kal anih bakah khawlum leh an hmalak na vel avang chuan haj ve hle hian a inhria a, a thiltum pawh chuna ringsual mai ang tih a hlau rilru hle. A hahna te chu muthilh in a tizangkhai thei tih a hriat avangin reilote ah a muhil zui ta a. 

A mumangah chuan Domino chu shark ha var zet hian alo um a, chu shark chuan Largo hmel a rawn pu leh a. Largo chuan amah Bond chu a kut hrawl tak chuan a rawn ban a, a kokiah chuan a rawn khawih ta a....

Telephone ri chuan Bond chu a rawn tiharh a. Mutkhamlo tak chung chuan phone chu a han ban a, Leiter alo ni a. Dar 9:00 a rik tawh avangin alo nghah reng thu a rawn hrilh a lo ni a.

Pineapple room chu uluk taka mauphel bel chhuah vek a ni a, tlumpiin a eichhiat loh nan varnish hnawih leh vek a ni bawk a. Sathaukhawnvar a inchhi thluah a, inchung darthlalang sen atang chuan eng tlemte hi a rawn lut raih bawk a. Bar nghaktu mi pathumte chuan kawr sen tak leh kekawr dum an inbel bawk a.

Kilkhata dawhkan chu Bond lei Leiter chuan an kildun a, martini an lam nghal a. No hnih an lam hnu chuan, "A chang chuan sawrkar hna han thawh leh te pawh hi a nawm viau rualin ka thin a ur deuh hlur bawk thin. James, keini helai hmun kilkhawr leh lum lutuka kan phar buai hlan hian kan thian thenkhatte chuan hmun nuam zawkah thil buaipui eng engemaw an lo nei a. Zep lovah chuan vawiin a Geiger Counter nena khup a lawng kan va hrutkual vel pawh kha ka zak lek lek asin. Indo lai chu nise thuhran; ralmuan lai pawhin hetia han chetkual vel hi chu a danglam tlat asin," Leiter chuan a ti nuah nuah a.

"Ni e, i rilru ka hrtiatthiampui khawp che a nia. Mahse nangni American ang hian keini England ho chu kan ralmuang lutuk ve ngailo tlat a ni. Kan tan chuan indo hi reh tak tak a awmlo. Tunhma a SMERSH ho ka buaipui kha chu sawiloh, kan sawrkar hian Berlin, Cyprus, Kenya leh Suez ah te buaina a nei chho reng a, eng engemaw hi rawn irhchhuak a awm reng mai a ni. Tunah heng thil hi a rawn thlwng zui lehnghal a. Ka la thutak lutuk pawh a ni maithei, mahse thil fel zanlo chu a awm a ni. Lawng tuipai kha chik zawkin ka zawtkual a, Largo khan dawt min hrilh a lo ni," tiin Bond chuan thil awmdan a han hrilh zung zung a. "Chu angin zaninah chian ngei ka duh a, darkar 70 vel chauh kan nei tawh a ni. Hmuhchhuah engemaw ka neih chuan naktukah thlawhna te chi hmangin helai tuipui vel hi daidar tak tak ila a tha ang. Thlawhna bo kha tuihnuaiah meuh pawh nise, han thupbo mai atan chuan a lian deuh a ni. Pilot licence kha ila nei em"? a han tihzawm leh a.

Leiter chuan a dar han chhin ak pah hian, "Nei e, i duh ang chuan kan che poh a ni ang chu. Hmuhchhuah i neih hlauh chuan vawiin a ka signal dawn pawh kha a lak thutak theih deuh ang chu," a lo ti let a.

"Chu chu enge ni a?"

Leiter chuan a zh chu a han lem khawlh a. "Pentagon a thuneitu ho vin an thiltihtheihna an lantir pek a nih kha. Ka lehkha pakhat lekchhuah kha army, navy leh air force ten a tul chuan CIA ho chu hnial miah lovin an tanpui tur a ni tul ziahna a lo ni a," a han ti bauh va. Thinur hmel deuh zawk hian, "Han ngaihtuah mah teh!! Khawvel pumpuia chutianga CIA te min tanpui tura inkau reng tura an awm ringawt pawh chuan sum leh pau a heh dan tur chu (h)!! Keia tan pawh a tul thuta pun theih tur 'Striking Force' min pek kha i lo hre tawh em?" a ti a, a nui hawk a. A tul ang anga min tanpui mai turin Pensacola a Super Dabre Fighter Bomber squadron chanve ka ko nghal thei a nia," tih paha Bond a bana na deuh va hawlhsak pah chuan, "Chubakah e, ka thuhnuaiah kan atomic tuihnuailawng thar ber, 'the MANTA' chu an rawn dah bawk a nih chu maw le," a ti ngal ngal a.

Bond chu engmah sawi lovin a nuisuk a. Leiter chuan a hma aia thil hrethiam hmel zawk hian, "Mahse kan ngaih ang lutuk a thil âwmlo chu a ni lo ve. Heng Sabre te hi anti-submarine a duty depth charge pai an ni a, inpeih reng a an awm chu a ngai reng a. Manta lah chu helai hnaivai ah training chikhat neiin a lo awm hnaivai hlauh bawk si nen. He tuihnuailawng hi tun atanga reilote ah chhimtawp vir hnuaia luttlang tur a ni nghe nghe. Mahse han ngaihtuah teh!! Heng indona hmanrua, dollar maktaduai chuang mante hi kei Leiter-a, Royal Bahamian hotel pindan no.201 a awm ve satliah thupek nghakin an awm anih chu mawle, neplo tak a ni," a han tih zawm leh a. 

Bond chuan a dar a chhin awk a, "Ka hmuh leh ngaihdan chuan in President hian Nassau a in hotupa aiin thil a la thutak zawkin ka hria. Kan Chief of Staff te pawhin Atlantic ralah pawh chetdan an ruahman tihna a ni mai a. Chutianga tanpuitu neihte chu duhthusam a ni mai alawm," a lo ti vat a. 

An han ngawidun vang vang a, chutah, "Tak ana, inmi leh sate chuan kan mi zawn ho target tur chu enge ni thei awm a an ngaih ve le? SPECTRE lehkha a an hmun sawi kha hmehbel theih awm chu helai Grand Bahamas chhaklam a Northwest Cay a rocket base chauh kha kan nei a. Chulai hmuna in sawrkar leg kan sawrkar tangkawpin an dah chu pound 100,000,000 man chu a ni ngei ang," tiin Bond chuan thudang deuhvah a pakaipui ta a. 

"Kan ven ngai ber tur nia an ngaih chu Pensacola Naval Base, Cape Cunaveral a ni a. Miami chu no.2; tin, target no.3 chu Tampa a ni. SPECTRE khan 'khawthlang ram ho ta' tiin an sawi a. Chu chuan khawl hmun lam a kawk berin ka hria. Entirnan, Conga a uranium laihchhuahna khur ang te pawh khu a ni thei a, mahse rocket base chu thil âwm tak a ni tlat. Kei chuan Canaveral emaw, Grand Bahamas emaw chu ka ring khawp mai. Ka hriatthiamloh chu - 'Bomb hi an nei anih pawhin engtin nge an tihpuahna tur hmun chu an thlen theih ang' tih hi a ni,"

"Tuihnuailawng pawh an hmang thei mai ang chu. Torpedo kahchhuahna atangin vaukam hnaih laiah an kapchhuak thei mai anga; anih loh leh, thelret lawng pawh an hmang thei mai ang chu. Tin, kan hmun sawia bomb phur thleng tur cbuan Disco pawh sawn duhthu a sam hlein ka ring a ni. Zanlai velah Grand Bahamas bul hnaiah bomb chu va dah se, zing chaw ei turin Palmyra an rawn thleng leh hman daih ang chu. Ka sawi chu i manthiam em? A dik thlap lo maw?" a han tih zawm a, Leiter a lamah chuan a han thle nghat a.

Eiter chuan, "Ka marohu tun aia tihran i duh chuan chu aia thu fumfe deuh chu i chhakchhuah a ngai ang. A engapawh chu ni se, Bay Street lamah eitur iva dap teh ang hmiang. Dollar 20 vellai va chawi mah ila, Manta pawhin a tikaltu mei vawikhat a tihvir ringawt pawhin chuti zat lek lek chu a hmanral tho ka ring. Chumi hnuah Casino ah Largo chuan tute nge a kilkawi chu kan va en dawn nia," a ti ta a.