James Bond-Thunderbolt-16

SWIMMING THE GAUNTLET

Vaukam, Police Wharf an tihlai a tuifinriat tui dum kûk mai chuan lawngkai dawhsei innghahna tuiek tawh tak tak te chu a rawn khuh leh hlup hlup thin a, thla chu a de tantir chauh anih avangin a eng lutuk tlat lo. 

Constable Santos chuan tuichhung luhna cylinder pakhat chu Bond hnunglamah chuan a hlang a, an hreng nghet nghal mawlh mawlh a. Bond chuan tuichhunga nuclear leh atomic zungzam zawnna bik Geiger Counter, Leitera'n a rawn ken chu uluk takin a kawngah chuan a hrengbet a. A oxygen paina dâwt chu hmuamin a han enchhin vel a. Boruak chu a duh angin a hip thatawk tih a hriatchian hnu chuan a han hawikual a, oxygen pipe hmawr chu a han phawi leh a. An piah lawka Junkanoo night club ah chuan rimawi tang zet mai hi an tum ruai ruai a.

Colonel Santos chu negro palian zet mai hi a ni a. Kekawr bul chauh hi a ha a, a banbul sek laite chu chawei thleng tiat laia hrawl niawm a mawi a ni.

Bond chuan, "Tun ang zanah hian tuiah hian eng nge hmuhtur awm ang? Sangha lian te an awm em?" a han ti a.

"Vaukam bawr chiho an ni ber ang, ka pu. Barracuda pawh an awm zeuh mai thei. Chubakah shark ho hian rawn kal zeuh chang an nei bawk. Mahse bawlhhlawh paihluh hi an ei nasa a, an puar tlangpui thin. I taksa ah pem leh thi te a awm lemloh chuan an tibuai kher lovang che. Tuipui mawngah hi chuan chakai bakah octopus te chu an awm nual maithei bawk. Phulin a bawh deuh vek a, thirchhia, um leh chutiang thil hnawk chi chu a tam ang. A chirh dum viau maithei bawk. Mahse tui a fim tha a, thla eng deuh leh Disco eng atang sawn I bo lovang. Minute 10/15 velah chuan I thleng maiin ka ring. Mak deuh mai chu.. Lawng saw darkar 1 vel ka thlir tawh a, lawng vengtu hmel leh a khalhna a mi chevel awm tumah ka hmulo tlat mai. Thlir thaw hian I oxygen paihchhuah phuan chu a nuaireh nghal zelin ka ring a, harsatna I neih ka ringlo,"

Bond chuan, "Chuti chu darkar chanve velah kan inhmu dawn nia," tih pahin a chemte pai chu a han endik a. A thawkna pipe chu hmuamin tuiah chuan a penlut ta a. A hmaikawr darthlalang chu a ham hrufai leh a, reilo te ah  a pilzui ta a. 

Tuihnuai lei chirh tak chu a lo awih deuh vut mai a. Bond pawh chuan feet40 vel a thuk chu a thlengthla ta thuai a, tuipui mawng pawh chu a hnaih ta thuak mai. A sana a han bih a, dar 12:00 chiah a ni. Chutah hmanhmawh lutuk lem lovin a hleuh chhunzawm leh ta a.

Chunglama tui inhlap vel karah chuan thla eng chu a lang ruau ruau a, tuipui mawnga satin, zu um leh motor ke chhiate chu chiang vak lovin a hmu thei a. Octopus tereuh te, tuipui mawnga thil si laimek chuan a rawng chu a thlak a, oil dahna but ruak ah chuan a tlanlut nghal vat a. Tuichhung hnim leh hnahte chu tui ham che ah chuan an phe suau suau mai bawk a. Chirh zinga rannung thenkhat chu Bond a tuihleuh hlimthla chuan a tithlabar ni ngei tur a ni; chirh leh tui an rawn phuhchhuak a, hermit chakai te pawh chu an tlanchhe nghal sang sang mai a.

Thla leilung, thilnung awmna a kal vel te pawh a angin a inhre rum rum mai. Chung rannungte chu ngun deuh mai hian a han enkual vel a, tuihnuai boruak thim muk maiah chuan suangtuahna thalo leh duhawmlo chi hi a hlauhawm ber a ni tih pawh a hai lo.

Bond chuan hmanhmawh lutuk lovin tui chu a hleuh zel a. Domino chu a han ngaihtuah let vel a. Thlawhna rubo-tu bera an ngaih farnu alo ni reng si. Lrgo chu he thilah hian a inhnamhnawih ngei anih pawhin chu thil chu hriain a rinawm hran lo. An inkawp dan ber chu tihpalh tak tak anih a rinawm. Nula awmdanah lah khan engmah hrelo ni ngeiin a lang bawk si. Mahse Largo-a a rinhlelhna tur chhan a khawlkhawm zingah chuan thil pawimawh tak a ni leh ta a ni. Largo-a'n Spectre tih thumal a dawnsawn dan pawh kha. a pangngailo reng reng mai. Chung zawng zawng chuan vur hlawm lian tak thu a inchiah, a hmawr chauh lang si ang berin Bond chuan a hre tlat a ni. Thil awmdan chu an hotute hnena report tur nge report loh tur zawk ni ang tihte chu a ngaihtuah zui neuh neuh va. An hotute hnenah pawh lo thlen dawn ta se eng chen nge hriattir tur ni ang tihte thlengin ngun taka a ngaihtuah a ngai dawn ta a ni.

Mihringte taksa a hmanlai, kum nuaih tam tam tawh atanga an lo inrochun thin, hlauhawm lo thleng tur hriatlawktheihna hi mi hrang hrangah a inang lo va. Mahse nitin tihtheih deuhthaw a hlauhawm leh harsatna lo su thinte hriatna hi chu a harhvang bik tlat a ni.

Bond chuan thildang daih ngaihtuah mah se a rilru chhungril zawk chuan thildang a rawn hriattir ta tlat mai. Chu chu 'hlauhawm' a ni.

A insangmar awt a, a chemte dawm pah chuan a hriatnain en tura a tihna lam, dinglam chu a en ta vat a. 

Tuifinriat thilnung zingah chuan Barracuda, pound 20 chuanga lian leh rit te hi thil hlauhawm  leh tihbaiawm berte zinga chhiartel an ni reng a ni. Sangha ngil per pawr, lang fai thah mai hi a ni a, mahse hlauhawm a ni tlat. A kareh zim tak, rul ang maia zau taka ang thei si ah chuan tuifinriata cheng zawng zawng zinga ha zum ber leh hriam ber mai chu a inrem tlar tuarh mai a. A taksa chu silver rawng leh pawl lam deuh a ni a, sangha zingah chuan tuihleuh chak bera sawi a ni bawk.

Bond a piah lawk, yard10 vela hla tui paw chuk maiah chuan chu 'hlauhawm' ngei mai chu Bond a tuihleuh zulzui chuan a lokal ve mek a. A taksa rang lai chu eitur zawng leh a thinur tih entir nan a sen khuih mai bawk a. A mitmu dum leh rangkachak rawng chuan Bond cbu a rawn en a, a ka chu zimtea ang mah nise, a ha hriam hmel tak pawh chu thlaeng no nghual maiah chuan a hmuhtheih tho mai. Hetiang ha tha lutuk nei an nih avang hian Barracuda ho chuan an thil ei reng rengin an ei satliah lova, a hapin an hap thla hlawih hlawih mai a ni.

Bond chuan tim sung sung hian a inhria a. A sana a han bih zawk a, Disco awmna thleng tur chuan minute3 vel ala mamawh niin a hria. Mahse thlen hmasak tum chi niin a hre ta lo.

A chemte a phawi a, chu 'hlauhawm' awmna lam pan chuan chak takin a hleuh phei ta phut mai a. 

Harsa lo tak hian chu 'hlauhawm' chuan alo kiansan thuai a, Bond a tuihleuh rual bawk chuan alam panin a rawn phei leh nghal vut a, a pawisakloh hmel hle mai. A rawn en danah chuan Bond-a taksa khawilai ber nge pehthlak hmasak tur ni ang tih a ngaihtuah ni ber hian a lang a.

Bond chuan hringei sangha chanchin a hriat tawh leh ama lk tawn tawhte a ngaihtuah zawk a. A hmasa berah chuan an hmuhlai a hlau awm taka awm miahloh tur a ni. Ui leh sakawrte ang bawk hian sanghate pawh hian anmahni hlau te chu awlsam takin an hrethei a ni. Khawsak dan pangngai renga khawsak tur a ni a. Phili buai a, phet ruai na tur chi a ni lo. Tuifinriatah hi chuan chetdanin thui tak a hril a ni. Chuvangin Bond chuan hmanhmawhlo leh pawisak nei awm lo takin hmalam a pan zel a, a bul hnai maia sangha tihbaiawm tak pawh chu mitsir reng mah se hre awmlo tak hian a lang lui tlat a.

Tuichhung awmdan pawh chu a lang danglam tan ta. Phulhmun zau tak mai hi a lo awm ta duai mai a, tui chet rual chuan hnimte chu an che suau suau va. Bond a hlimthla chu a chet rual chuan mahni a nunna nei ve niawm tak hian a dum phei ve nul nul zel a. Dinglam hmuhphak tawk vela Barracuda hlimthla pawh chu phul chungah chuan a rawn lang phei ve zut zut bawk a.

An hma lawkah chuan sangha te rual,  tam zet mai hi an lo inhlawmkhawm a, mahse Bond-a thlenphei dawn chuan a hleuhna tur zawn chu kawngkian niawm tak hian a fai duak a, Barracuda kalna tur pawh chu chutiang bawk chuan an lo kian a, anni pahnih in an pelh phei hnu chuan an inhlawm leh nghal tup tup bawk a.

Bond chuan sangha rual karah pawh chuan Barracuda chu a mitmei reng a. Chu sangha chuan a bul vela nghate te chu hreawm pawh hian a lang lo. Sihal, ar lak tumin sazupui vel a ngaihtuahlo te pawh hi a ang ber a.

Bond chuan tui chu a hleuh pangngaiin a hleuh zel a, reilo teah chuan phul hmuna thir chakai chu a hmu ta. Chu thirchakai hmawr lam chu chunglamah a inkhai chho va, Barracuda pawh hre chang lovin Bond chuan a pan ta nghal a.

Fimkhur takin chu thirchakai hrui zui chuan tui chu a hleih chho va, thla eng pawh chu  a langfiah tial tial bawk a. A hnuailam a han en a, Barracuda pawh kha a lo bo tawh a, chutah chunglam a pan ta zel a. 

Lawng ruangam pawh a lang ta. Lawng hnuai sir a hydrofoil chu khawr hlun hian a hmu a.  Chumi kil hnunglamah chuan inham tanhin a han chawl hlek a. A hnuai veilamah chuan Lawng tikaltu propeller pahnih chu an lang tle vur mai bawk a.

Bind chuan Lawng hnuai vel chu ngun tak hian a han enkual a, reilote ah kawngkhar ruangam chu fiah takin a hmu thei ta. A len lam chu feet 12 bial vel a ni a, a laiah chuan a inphel tlang riah mai tih a hmu nghal bawk a. Kawngkhar chhunglamah chuan enge awm ta ang le? A Geiger counter chu a phawrh a, kawngkharah hmehbelin a tinung ta nghal a. A ban veilama sana chu bihin, sana chu a nung tih pawh a han chet dat dan atang chuan a hrethei a. A khawl chu a hmethlum a, haw nghal mai loh chu tihtur pawh a nei tawhlo tih a inhria.

Bond chuan a koki veilama engemaw rawn su dawt leh a beng bula ri bawl mai chu a rual chiahin a hria a. Rang takin Lawng hnuai atang chuan a persawn nghal a, a hnuaiah chuan tuihnuai silai, speargun mu, thal hriam tle var mai chu tuipui mawng lamah chuan a tla mek a.

A inher vat a, a hnuai deuhva tuichhung luhna thelret kawr dum vek ha chuan a silai ah chuan thal alo vuah leh mek a. Bond chuan chupa lamah chuan chak takin a pan phei ta a.  Mahse a thlenphei hmain chupa chuan a silai kauna chu a pawtlet a, Bond chu a rawn tin ta. An inkar chu feet10 vellai ala nih avangin a rawn kah hmain a thlemgphei hman dawnlo tih a hre nghal a. A tawp thut a, hnuailamah a bir ta thut mai a.

Thelret kawr ha pa Silai puak chuan tui chu a nghawr dawt a. Bond a ke chu engemaw hian a rawn su dawt mai a. Chupa hnuai lamah chuan Bond chuan a hleuh chho va, a chemte chu a han vai pawp mai a. Chemte chu chupa taksaah chuan a tlum thawih mai a, a thelret kawr hak chuan Bond a kut chu a rawn tai thei hial a. Bond a bek bulah chuan a silai kawm chuan a rawn chhu ve nghal zat bawk a. Kut var deuh hian a thawkna dawt chu pawhthlak tumin a hmai chu a rawn dap nghal bawk a. Bonda chuan a chemte chu a han vai leh a, tuichhunga che an nih avangin a kut chu kalmuang a tihle. Chutah chemte hmawr chuan engemaw hi a thaitlang ta hrawih mai a.

A hmaikawr vuantu kut chu a kiang ta. Mahse Bond a pawh chuan khua a hmu mai thei ta biklo. Silai kawm chuan a luah a rawn chhu leh a, Bond a hmaikawr chhunglam ah chuan tui dum ngeih nguih hi a rawn khat ta burh burh mai. A tawlhkir a, a hmaikawr a bawlhhlawh rawn lut chu a tifai ta vat vat a.

Tuibawlhhlawh nia a hriat chu thelret kawr hapa dul atanga thisen lochhuak chu alo ni zawk a. Chupa chuan rit tiawm deuh chung hian a Silai chuan Bond chu a han tin leh a. A hmawra fei kibar lolang atang chuan a mu alo thunfel leh tawh tih a hriat mai. Chupa chu ke pawh phut manglo hian Bond a zawn velah chuan  a rawn tlahniam ta a.

Bond pawh chu a lu-a chhutna avang chuan a duh angin a chevel mai thei bin lo. A kutte chu thir ang maia rit ni hian a  hria a. A lu a han thing a, mahse a duh ang chuan ala che maithei bik chuang lo. Thelret kawr hapa chuan a thawkna dawt seh chung chuan a silai chuan a han tin leh a,  Bond a lah chu chethei hek lo, a awm zawnah chuan a kut chu a dah ta ringawt a.

Mahse thelret Mawr ha pa in a Silai a hmehper hma chuan hnunglama tlawh chawrh ang mai hian a leng phei dawrh a. A ban a phar a, a silai pawh chu a thlauh ta a.  A hnunglam atang chuan thisen dum ngen ngun  hi a chhuak nguai nguai a. Chupa chuan chutia rawn khawihtu hriat ngei tum hian a hnunglam chu a han thlek hram hram a.

Chupa hnunglam, yard tlemte ah chuan a khabe a thelret kawr la uai nuaih hian Barracuda chu a lo awm reng mai.

He sangha hi feet 8 vel zeta sei a ni a. A ka atang chuan thisen tlem hi ala rawn chhuak ngiai ngiai bawk a. Chutia a rawn che ta mai chu thisen rim a hriat vang a nih hmel hle mai.  

Barracuda chuan Bond chu a rawn en a, an hnuai lama mihring tla thla mek chu a han en leh a. A thelret them la hmuam chu lemin a in her vut a, tek tla ang maia bir thla vutin, thelret ha pa koki ah chuan a han hap thawih mai a. Na zet hian a thingzui a, chutah  a tawlhkir leh ta a. Bond chu luak lo turin a insum hram hram a, chulai hmun atang chuan muangchangin a tawlhsawn ta a.

Thui pawh ala hleuh hmain a veilam a tui chu eng emawni hian a rawn deng per chuai a, chutah Bond chu thui pawh ala hleuh hma hma chuan let hawl hawl khawp hian tui chuan a rawn hnawl nghal a. Bond chu a harh zawk a, lui mawnglamah chuan a theih anga chakin a bir thla ta nghal a. Grenade rawn tla chu a ri nawn dur dur a, mahse a puahna lai chu lawng bulhnai vel hlir anih avangin Bond chu a nghawr na lutuk lo.

Tuipui mawnga phul zingah chuan a theih anga chakin a hleuh va, reilo teah tuichhung lut mi midang an rawn tirh leh a rinawm a. Bond a vanneihna a kaltluang anih chuan a va kal pawh kha an hrechhuak lo mai thei a ni. An mitirh pa pawh kha shark emaw, Barracuda in emaw  a thatah an ngai hlauh mai thei a ni.

Vaukam police te hnena Largo chungchang thu thlendan tur chu hriat a chakawm hlein Bond chuan a hria a. Lawng satliah veng tura ralthuam keng vengtu dah chu sawifiah a harsa fu maithei a ni.

Bond chuan tui chu a hleuh zel a. A lu chu a na ut ut mai bawk si a. Tuichhunga inkhawih nilo se la chuan nikhua hre lovin a awm ngei pawh a ring. Chuti chung chuan zawi deuh nghulh hian a inhre nghe nghe a ni.