James Bond-Thunderball 20

TIME FOR DECISION

Rinai daihin submarine chhung chu alo zau va, a chhunglam luhthlakna kailawnte pawh chu zau tak tak a ni hlawm a. Bang reng reng chu rawng hringdal lam deuh hnawih a ni a, hrui inzam hmuhtheih ho chu rawng sen lar tak hnawih vek an ni thung.

Bond te pahnih chu officer incharge in a hruaikual zung zung a, boruak pawh chu a lo dai nuam ruih mai a. kailawn thui tak an zawh hnu chuan veilamah an kal leh hlek a, kawngkhara commander P. Peterson USN tih lo inziahna chu officer chuan a han kik karh karh a.

Submarine captain chu kum 40 vel hmelpu hi a ni a, hmai tluak deuh leh sar vuah mai hi a ni a, a sam pawh chu a var nasa tawh hle a. A mitmeng chu a fingin a tak ran mai a, mahse fiamthu duh tak hmel hi a pu lek lek a. A kareh leh khabe invuah danah chuan pa luhlul leh huaisen tak ni ngei hian a lang a. Dawhkan thira siam lehkha tam tak inremna phenah hian a lo thu a, kuaite a lo zu tual tual a. A hma dawhkanah chuan noruak leh signal lakchhawnna lehkha hi a lo awm a.

Bond te pahnih loluh veleh captain chu a dingchhuak a, chibai a lo buk vat a. Dawhkan hmaa chair pahnih lama kut vai pah chuan anmahni rawn hruaitu officer hnenah chuan, "Khawngaihin coffee han ngaihtuash belh ta che, Stanlon. Tin, hei hi thawn nghal bawk ila a tha ange," a ti a, a lehkha ziah chu a pe a. A lehkha ziah tlanga 'MOST IMMEDIATE' tih chu chiang takin alang thei a.

Captain chu a tho leh a, hawihhawm tak hian, "Awle, Gentlemen. Kan lawng in rawn chuangkai chu kan lawm khawp mai. COMMANDER Bond, Royal Navy mi leh sa in min rawn tlawh ve chu a lawmawm hle mai. Tuihnuai lawngah hian i chuang tawh reng reng em?" a han ti a.

"Chuan chu chuang ve tawh e. Mahse telve satliah mai maiin a ni ka tel. Kei chu intelligence RNGR lam ka ni a, ka lawng sipai nih dan pawh tlemin a dang deuh a ni,"

"A tihzia a nih chu. Anih nang zawk, Mr. Leiter?" tiin Captain chu a nui hawk a.

"Kei hi chuan hetiang lam hi ka daizaulo khawp mai, Captain. Ka inbual thleng a a lem ka khalh thin hi a ni mai. Chutah lah chuan a hnim huh thuk theihdan hriatduh pawhin tui tam dah an phal ngai tlatlo a ni,"

"US Navy nen pawh a inang lek lek anih chu. Keipawh he lawnglian hian eng chen chiah nge thil a tihtheih han chhin vel ka duh viau laiin an phal ngai tlatlo a ni. Chet hanchhuah tak tak dawn ila, lawng sana-a rin sen mi thenkhatin  an lo rin hian min dang leh tlat mai thin a," tiin Captain chuan Bond te pahnih chu a han en vang vang a. "Awle, Gentlemen. Enge thil awmzia chiah le? Tun anga Top Secret tih ang chi thuruk lengvel tam hi Korea Indo hnua ka hmuh hmasak ber tum a ni ang. Ka dawn hnuhnun ber phei chu Chief of Navy-in ka tana a rawn thawn a ni nghe nghe a. I thuhnuaia kun tura min hriattirna a ni ber mai. Nangin i theihloh palh chuan Commander Bond-a kaihhruaia awm turin min rawn hrilh a ni. Chu chu dar 19:00-a Admiral Carlson alo thlen hmaa thil awmdan tur a ni a, enge maw thil awmdan chiah le? Ka signal dawn apiangah Operation Thunderball tih a tel zel a. He Operation hi enge ni reng reng a?" a han tihzawm leh a.

Commander Pederson chu en mai pawhin Bond-a rilrem leh ngaihsanzawng tak a ni a. Leiter chuan thil awmdan ngun takin a hrilh a, a thusawi chu dar 1:30 a Largo te thlawhna thlawhchhuah dan leh Domino Vitali pawh Bonda'n a tirhdan thlengin a tlang a kawm a.

An awmna atang chuan lawng chhunga thawm chi hrang hrang chu ring vaklo hian a hriattheih a. Generator ri te, music leh ri eng egne maw chu chiang vak lovin a hriattheih a. PS System a an inkohna chu Captain dawhkan chungah chuan a rawn ri chhawng zel a. An inkohna chu 'Chief of Board-in Robert a mamawh e,' 'Openshaw in Chief Engineer pan vat tur a ni,' 'Compartment F-ah Blue Team kal vat tur a ni' tih te a ni. Khawilaiah emaw ni hian thil enge maw hi a in-pump ri bawrh bawrh a. Robot khawl chhunga awm hi ang deuh berin a hriat a.

Leiter chuan ngun takin minute 10 lai Captain chu thil awmdan a hrilh a. A hrilhzawh chuan Captain chuan a chair hnunglam chu a ngheng a, ngaihtuahna vak hla awm deuh hian a kuaite chu a beng mawlh mawlh a, nui chung hian, "In thuthar min thlen chu a theuneulo hle mai. Navy Department lam hian signal min thawnlo mah se in thusawi ngau ngau pawh chu rinawm tak a ni," a ti charh charh a. 

A han ngawi hlek a, tihian a sawi chhunzawm leh a. "Hell!! He thil hi engtik ni ah emaw chuan a la thlen ka ring reng a ni. Hetiang missile hi ka paipawn teuh mai si a, nuclear submarine ka enkawl a, chu chuan hetiang thil hi ka hlauhloh phah tihna phei chu a ni hauh lo va. Nupui leh pa hnih ka nei a, chu chuan ka rilru a tizing thin hle bawk a ni. Atomic ralthuam te hi an hlauhawm hleihluak lutuk deuh a ni. Ka missile pakhat ringawt pawh hian henglai hmun khawimaw lai atang hian United States khu vau betin sum tam lutuk ka karchhuak thei hial ang chu. Chutiang anga ralthuam hlauhawm 16 lai mai chu hei kei kum 38 mi, Pederson ve mai chuan ka phurkual vel a ni a, ka missile ken zawng zawng hi England nuai chimih vek theih thuakna a ni lehnghal. Chutiang chu thil awmdan a ni a, kan hmabak chu ngaihtuah ta ila. Harsatna kan hmabak tlat mai. Engtin nge kan chet dawn reng reng le? In ngaihtuah dan nia ka hriat dan chuan Largo chu Atom Bomb a va chhar hnu chuan a lo kir leh anga, bomb a rawn hawn chuan nula chuan min rawn hriattir anga, tichuan kan va man nghal emaw, lawng chu kan kapchhe nghal emaw tur a nih hmel a. Ka ngaihdan chu a dik em? Mahse bomb chu rawn hawn lovin hmeichhia chuan engmah min rawn hriattir ta lo se engtin nge ni ang?" Zawi fiah fek fawk hian Bond chuan ti hian a rawn ti a.

"Hun kan la neih chhung darkar 24 chhung chu kan zui ru mai tur a ni. Chu chu kan tihtheih chu a nih mai hmel rih a ni. Huntiam chin tawpah pawh engmah kan nihloh chuan sawrkar kutah kan hlanlet leh tawp anga a ni mai. Anni in Disco leh thlawhna pil chu an duh ang angin an buaipui zui a ngai tawh ang. Chumi hunah chuan tuin emaw speedboat hmangin bomb chu America vaukamah an lo kam hman tawh reng mai thei a. Miami khua pawh meivapah a chang zui nghal a ni mai thei. Anih loh pawhin khawvel hmun hran khawilaiah emaw pawh bomb chu a puak tawh maithei bawk a ni. Thlawhna a bomb  mel sang tama thuhruk bo daihna hun tam tak an nei a, chutiang thil a thleng ta anih chuan kan hnathawhah kan hlawhchham tihna a ni dawn a ni. Mahse tunah chuan detective in tualthah tum nia a rin enthlarutu dinhmun ah kan ding mek ani. Detective chuan tualthah tumtu chuan silai a pai leh pai loh pawh a hre lo va, mahse hman tuma a phawi tak tak hma chuan a zui mai a ngai a ni. Chumi hunah chiah chuan detective chu a che thei dawn a, a dik em, Felix?"

"A dik khawp mai, Captain. Commander Bond nen hian Largo chu kan ringfuh ngei a, kan rinfuh bakah a chet tumna chu reilote ah a pan ngei ang tih kan ringnghet tlat a. Chuvang tak chuan ania nangpawh hi kan rawn pan che. Bomb chu zan lamah a khawih ngei a rinawm a, zanin hi a zan hun neih hnuhnung ber a ni tawh bawk a. Taka, Captain, tunah hian che chhuak maithei kan ni reng reng em?"

"Thei a ni mai ang chu. Tun atanga minute 15 ah chuan kan chhuak thei ang," Captain chuan a ti a,mahse lu thin nar nar pah chuan, "Mahse thu lawmawmlo deuh mai sawi tur ka nei a. Engtinnge Disco chu kan chhuizui ang?" a han ti leh a.

Leiter chuan a thirkut lama Bond-a kawh pah chuan, "Chu! Enge ni a awmzia? In umpha thei tho a ni lawm ni?" a ti a, inthiamlo deuh hian a thirkut chu a lathla lehnghal vat a.

"Ngil taka kal chuan kan intluk thial maithei. Mahse nangni gentleman pahnih ten a inchhut hmaih chu helai tuipui biala chet fimkhur a ngaihzia hi a ni," tiin captain chuan banga chart chu kawh pahin, "En teh u, sawtianga chart hnawk saw in hre ngai em? Fanghmir bu thaidarh ang mai a nih saw. Saw saw tui thukdan landan a ni a. Tin, Disco chu tui thuklai ngar ngar, 'Tongue of the Ocean, 'North-West Province Channel' emaw 'The North-East' emaw a zawh zar zar loh chuan kan chechhe der a ni mai. A dangte hi chu Map ah hi chuan a lang pawl vek a ni maithei a, mahse thlawhna a infan vel pawh khan helai tuipui vel hi pawnlang tak tak a ni hlawm tih inhria ang chu. A thukzual lai pawh fathom 3 atanga 10 vel chauh a ni ang chu. (Fathom hi tuithukdan tehna a ni) Vaukam lama hnathawh duh ni ta ila, navigator chu a ka hupin Echo Sounder (hei hi tuithuk dan 'ri' hmanga tehna) chu lawng hnathawkte hmuh theih lohvin thup ni ila chuanlawng hi tui fatyhom10-a thukah ka kalpui ngam tawk ang. Fathom 10 ah chuan engemaw chen kalthei pawh lo ni ta ila, he chart hi a hlui tawh a, tuipui hnuai leilung hi a danglam ve reng si a. Chart hi an ziah atangin kum 50 lai a ni tawh a, tuichhung awmdan pawh hi chart a mi nen hi chuan a inang tawh miah lovang tih chiangsa a ni. Tin, tuipui fawn dan pawh hi chik a ngai hle bawk. Chutiang ngun taka chhut thlaploh chuan engmah hmu thei lovin tuipui mawng titoh leh kosang lai kan su bur a ni mai. (Submarine-te hian an vel hnaivai thlirnan radar, sonar leh echo sounder te an hmang thin tih kan hriat a tha ang.) Gentlemen, he Italian lawng hi an thlang fuh hlein ka hria. Hydrofoil a hman phei chuan Fathom 1 bak tuiah a inchiah a rinawm lo va, tui pawnlangah hlir a kal phei chuan kan tan han chetve ngaihna a awm miahlo a ni,"

An ngawi ta thap a. Captain chuan chung Intelligence Officer pahnihte chu a entawn vat vat a. "Navy Department ka va bepawp anga, Fort Lauderdale-a an fighter bomber kan enthlak tir zui mai dawn em ni?" a han ti leh bauh va.

Bond chuan, "Lawngah hian eng chi lam engmah an tihchhuah ka ring lo va, Zanah lehnghal chuan thlawhna tan chuan zui an harsa khawp ang.  Enge i ngaihdan, Felix? America vaukam tal thlir turin Bomber te chu chah chhuak mai ila a tha angem? Tichuan Captain hian rem a tih chuan North West Channel lam kan pan ve mai anga, Disco a chetchhuah chuan ka tihna anih chu. Bahamas Rocket Station target no 1-ah an lo tinzawn hlauh takin," a ti charh charh a.

Felix Leiter chuan a sam a han tuai thur te te a, "Hrep hian aw!! Manta kan chahlut ringawt pawh hi atkhat chu a tlingin ka hria. Mahse heti chen thil kan ti tawh a, thlawhna Squadron khat chabelh mai mai te chu enge pawi tawh ang? Kan rinna chu kan bawhzui a ngai si a nih hi. Ti teh u, Captain ho hian signal atthlaklo deuh thawn teh ang u. A copy chu CIA leh inhotupa kan thawn dawn nia. Engtinnge kan tih ang?" a han ti a.

Bond chuan, :Admirality 'M' ta tur, Operation Thunderball' ti mai rawh," a ti a, a hmui chu a han hui pawk a. "Kan thuthawn chuan a tiphili hle dawn a nih hi," a tileh a. Banga sana chu a han en a, "Hetiang signal dawn nan chuan duhthusam a ni," a han ti zui a.

Pindan chhunga PA System-ah chuan aw fiah tak mai hian, "Captain, hei hi Watch Officer a ni. Commander Bond ta tur thu hmanhmawh tak Police Officer in a rawn keng e," a rawn ti a. 

Lawng Captain chuan a bula switch chu a hmet a, dawhkana microphone ah chuan, "Rawn tirlut nghal mai rawh. Reilo te-a chhuak nghal turin inring bawk rawh se," a lo ti ve nghal a.

Captain chuan nuichung hian, "Nula kha Domino iti em ni kha(h)?" a han ti leh bauh a.

Chutih lai tak chuan pindan kawngkhar chu a rawn inhawng a, police officer pakhat hi a lukhum zakzeh chung hian a rawn penlut ta a. Khawng deuh hian a ke a han per a, lehkha ip, OHMS tih inziak chu Bond chu a pe nghal a. Bond chuan a zaithler a, a chhunga thute chu a bih thuak thuak hnu chuan tihian a han chhiar chhuak leh ta a.

"Thlawhna chu dar 1730 ah a lokir leh. Lawnga khailuh nghal a ni. DISCO chu dar 1755 ah a chhuak. a theihtawpa chakin a kal. hmarthlang lam an pan. Nula a lo lang lo. Ka han sawinawn ange. Lawng bathlarah nula hmuhtur a awmlo.

Bond chuan Captain x signal thawnna lehkha chu ala a, heti hian a han ziak ve leh nghal a.

"MANTA CHUAN NORTH WEST CHANNEL ATANGA ZUI A TUM. FORT LAUDERDALE-A FIGHTER BOMBER SQUADRON CHU FLORIDA BIAL MEL 200 CHHUNGA CHE TURIN NAVY DEPARTMENT KALTLANGA HRIATTIR AN NI ANG. MANTA CHUAN WINDSOR FIELD ATANGIN A RAWN BEPAWP RENG BAWK ANG. HEMI CHUNGCHANG HI NAVY DEPARTMENT LEH ADMIRAL CARLSON LEH BRIGADIER FAIRCHILD TE PAWH HRILH TUR AN NI BAWK."

A tawpah chuan a hming a ziahhnan a, Leiter pawhin a rawn ziak veleh bawk a. Bond chuan lehkha ipah a khung a,  Corporal chu a pe a. Ani chu a inkheng auh a, inherin a chhuak ta nghal a.

Captain chuan dawhkana intercom ah chuan lawng chu tuichunga hmarlam chu knot 10-a chaka chechhuak turin thu a pe nghal a. Lawng chhungah chuan khawlri leh lawng sipai ho thawm a inpawlh nghal nuai nuai a. Tuihnuailawng chu a han che lawih a, Captain chuan zawisap hian, "Awle, gentlemen. Kan chechhuak ta a ni a, kan thilchhui hi chiangkuang deuh ni se ka duh a. Mahse tunah pawh hian kan theih ang angin kan chezui a ni ang chu. Signal tul ang ang pawh chu thawn nghal ula," a ti ta a.

Bond chuan Commissioner-in nula chungchang a rawn hrilh chu a han ngaihtuahlet a. Thu ngaihthlak nuamlo tak niin a hria a. Thlawhna chuan bomb chu a rawn phur hawlo a ni mai thei a, chuti anih chuan MANTA nena han umzui vak mai pawh chu awmzia a neih tam hmel vak lovin a hria. Thlawhna tla leh bomb bo chu anni (Largo te ni lo) tih ni lovin pawldang daih thiltih pawh alo ni ve reng thei a. Chuti anih chuan Disco an umzui hlan hian chu pawl chuan chhaihbuaitu pawh neimiah lovin an tihtur an ti char char thei tlat a ni.

Mahse chu ngaihdan chu rilru chhungril takah Bond chuan a pawm hleithei tlat lo. Hetiang khawpa thil liantham leh rapthlak kengkawh tur chuan thil ruahmanna felfai leh dikthlap a ngai tlat a. Largo chuan an thiltih thupnan chuan rohlu chu a zawng tak tak pawh a ni thei a, chutiang thil tihpah chuan anmahni enthlatu lawng leh thlawhna awmhnaih leh hnaihloh a thlithlai pah thei reng a ni. Anihloh vek pawhin bomb kam tur chuan a kal mek pawh a ni maithei a, ngaihdan mumal tak pawh siamthiam a har hlein a hria a ni.

A enga pawhchu ni se, khawnge Aom Bomb chu a awm ang le? Thlawhna chuan rawn phurlutin lawng chu an rawn thlen anga, Domino chu engemaw avangin a rawn inlan theilo em ni ang le? Nge, tuna an chetchhuahna kawngah hian bomb chu an chharchawp dawn em ni zawk ang?  Chu chu an kaldan Berry Island Channel kaltlanga North West lam an pan tlat avangin a inrem thei tlat a ni.

Thlawhna tla kha Bimini thliarkar chhim lama awm a ni a, Miami leh US vaukama target nithei awm te pawh chhimlam a awm an ni vek bawk si.

Anihloh vek leh channel kaltlang hnuah Nassau thlen hma mel 50 velah Disco chuan hmarlam pan thutin mel 50 zeta thui tui pawnlang tak taka a kal leh hnuah North-west Province channel-ah kalin Grand Bahamas a missile station chu a pan thei bawk a ni.

Bond chuan Leiter nen chuan thil lian tak an tisual ang tih hlauvin a rilru pawh a buai hle mai a. Mahse an thiandun leh MANTA chuan an theihna zawng zawng an thap a ni tih a hrechiang a ni. Bomb chu Disco-a a awm a nih a Grand Bahamas pana hmarlam kawngzawh anih chuan North West Channel-ah chak taka an kal ve anih chuan a tlaichhiat hmain MANTA chuan a nangching hman  thei tih erawh chu a rindan a ni.

A thil ruahman chu a dik anih si chuan engah nge Domino kha lawng bathlara a rawn inlan loh? A chungah engnge lo thleng ta ang le?