Apache Fighter-1

Khua a var tan chiah a, kawl a lo eng tan tih chuan Apache ho chu zankhuaa an bawhna vaivut hmun atang chuan an thil tum chu tih hlawhtlin ngei tumin an rawn tlan chhuak a. Choka hnunga cook zing tho hlim hlawt hnungzangah chuan chemte hriam zet hi an rawn vawm bur chawt a. A thih hmain vawi khat chu a au chhuak hman hram a. Chirichua ho (Apache ho hnam khat) chuan in vel chu an luah khat a ni deuh ber mai. Ral an beih a an tihdan pangngaiin an khek chel chul a. Zing boruak thiang tak leh reh vung vung chu an thawm ri chuan a luahkhat zo ta a.

Old Larrabe zing tho, corral lam pana kal a tum lai takin chung ho chu a lo hmu a. A rifle a chuh vat a, chung ho tawk tur chuan a tlanchhuak nghal a. A tlan pah chuan a silai chu a kap zawih zawih a. Bunkhouse a cowboy ho in an hriata an tanpui vat theih nan a au chul bawk a. A silaimu pakhatna chuan Apache ho zinga pakhat ke ah a va kah sak a, a kal pai tawng tawng a. A kah nawn leh hmain chemte sei zet mai hi a awmah a rawn bur chawt a. Larrabee chu engmah sawi thei lovin thisen chhuak puat puat chung chuan a thal ta tawp mai a.

Bunkhouse a cowboy panga te pawh chu silai ri leh au thawmah chuan an rawn harh ve ta a. Pistol nen inring takin an rawn tho chhuak a. An foreman Jackson-a phallo chungin pahnih chu silaimu sur sung sung hnuaiah chuan an tlanchhuak nghal a, An thi ta mai reng a. Midang pahnih leh amah chuan tukverh atanga an hmuh theih ang ang chu an kap pawp pawp a. Jackson-an pistol a load leh mek lai chuan Indian pakhat chu a rawn zuang lut nawlh mai a, mahse a naute pahnih chuan a rualin an lo tlir a, a thi chiang kher mai.

Mexican hmeichhia, upa tawh tak leh mit khing del, kum 20 zet he ina rawng lo bawl tawh thin chuan inpui kawngka chu a veng a, mahse Indian pakhat hian a hmaiah rifle kawmin a rawn vuak tak avangin in chhungah chuan a zuang lut ta vat a.

Mahse Sarah Davis-i Navy Colt ken chu chupa awmna atanga feet hnih vel atang chuan a rawn puak dawt a, a hnunga mi pahnih te pawh chu rang takin an tlan kir leh ta a. Chu nu chuan bedroom lam a pan ta vat a, a pistol kenna kut chu a khur dar dar a. A fanu nen chuan dressing table lian zet an zawn a, kawngkhar kalh nan chuan an hmang ta a. A fanu Barbara-i kut chu a vuan a, thlamuan tumin a chul heuh heuh a. Mahse pawn lam thawm avang chuan in thlamuan hleih theih pawh a ni lo.

Bunkhouse chhunga cowboy pathum te chuan tukverh tin atangin an chang a, che hlek chu an kap nghal thuai a. Pathum lai an kahhlum ve avang chuan Bunkhouse chu an venghim mai dawnin a lang a. Mahse chu in dinglama Indian ho hotupa chuan a ho te zinga pakhat chu a han signal zauh a,chupa chu rangtaka sakawr atanga chhukin mei a chhem ta nghal a. Midang ho chuan an thal chu an phawrh chhuak a, hnim ro tak tak chu an thalfang hmawrah an phuar ta sang sang a. An hotupa chuan signal a han pek leh chuan an thal te chu van lam hawiin an kap alh ta pup pup mai a. Bunkhouse chungah chung meialh te chu a tla a, a tirah chuan chhe te te in a alh a, mahse reilote hnuah chuan bunkhouse chung chu a kang ta hluah hluah mai a. A chhunga cowboy pathum te chuan an hmai chu kawmawla tuam chungin Ranch chu hum tumin an bei zel a, mahse Indian ho chuan nuam ti takin mei khu hnuaia an lo tlan chhuak chu an lo that hmiah hmiah mai a ni.

An hotupa chuan signal dang a han pe leh a, an rawn inhawr khawm hlawm a. Barbara te in chu an hual a, tukverh te chu an chhu chhia a, a chhungah an lut a, zu chi hrang hrang te chu an leihbua in an paih keh pawp pawp a. An duhtawka an suasam hnu chuan bedroom-ah an lut a; Sarah Davis-in pahnih lai a lo thah hnu in midang ho chuan an rawn man ta a.

* "Ka fanu lakkir leh theih anih dawn phawt chuan helai ram chhunga Apache ho zawng zawng pawh hi thi vek mahse pawi ka ti lo. Bleke, ka fanu hmuh kir leh hi ka duh a ni,". He thu sawitu pa hi pa te ren rawn, sa nghet tak leh zahawm taka inthuam, Arizona chhim thlang lama Rancher lian ber, John Davis-a,kum 45 mi vel a ni a, civil war zawh chiah khan helai hmunah hian sabengtung pahnih leh bawng hnute sawr lai pakhat nen a lo kal a, harsatna tinreng su tlangin hmun ruak chu ropui taka cheiin helaiah hian in tha tak tak a rawn din a. Kum tamtak chhunga harsa taka a thawh chhuah chu meivapah a lo chang ta thut a. Nidanga a tih loh dan takin a hote tam tawk nen Phoenix-ah sumdawnna thil a an kal hlana a hote duhtawka sawisak hnua thi a hmuh te leh, a inchhung ngeia thi, an sawisak dan rapthlak zia a han hmuh chuan zan khat thil thu lekah a sam pawh a var zo deuh vek a ni.

A hmaa ngawi renga thu chhanna a nghah lai chuan a in sawh tha sauh sauh a, chupa chuan "John, i rilru nat dan tur chu ka hrethiam khawp mai. Governor anga ka tih tur chu ka ti tawh a, ka ti mek zel bawk a....," a tih lai chuan John Davis chuan "I remti emaw, remti lo emaw, ka duh dan angin keiman ka bei mai dawn," a lo ti ngut a. "Buaina namenlo min thlen tawh hi ngaihtuah ve ta che," Governor Bleke-a chuan a han ti a. Bleke-a hi pa tawng ring lo, mahse tawng fiah kek kawk a ni a, a bula thu ang bawk hian amah hi pa te leh sa tha tak a ni a; a pa tet ngaihtuah erawh chuan chak tak a ni thung. Tupawhin a mitmeng hi rei tak a en ngam phawt chuan, a huaisen zia te, a tum ruh zia te hi an hai lo ang. Bleke-a hi dan bawhchhetu te tan chuan hlauhawm tawp a ni a, mi tha pangngai tan chuan mi tha tawpkhawk a ni bawk. "John, ka thusawi hi ngaithla rawh, lawmman atan dollar 50 ka phal atang khan outlaw leh gunman leh scalp hunter tam tak Tucson ah hian an rawn lut a, Apache ho ramah kalin pawisawilo Indian tam tak an that a, Indian hmeichhia leh pawisawilo tam tak an that bawk a. Sand Greek a thisen chhuak aia tam thisen a chhuak tawh a. Chu chu i fanu zawngtu te thil tih vek a ni. Indian pasaltha hnathawhin Indian War a rawn hring thei mai dawn a, John, tih tawp a ngai a ni tih ka hrilh duh che a ni," a ti leh a.

Davis-a chuan "Anih leh ka fanu chu la chhuak phawt la, Apache pasala neih mai te hi a duh i ring em ni?" a lo ti vat a. "Teuh nang, mahse .........." a tih mek lai chuan Davis-a chuan "Mahse....mahse... engmah in an loh hi. Barbara hi thla hnih lai rukbo in a awm tawh a, tun thleng hian hmuh a la ni lo chu a nih hi," a lo ti a. Bleke-a chuan "Sipai ho....." a han ti leh dek dek a, Davis bawk chuan "U.S Cavalry chanchin chu min hrilh duh suh. Ka hre chak lo. Fort Cochise-a an Adjutant, lungin a den lai hun pawh hre theilo khawpa tawng te an ni," a lo ti leh a. Bleke-a chuan "Army patrol te pawh hmun tinah an chhuak a, an thu hriatte chu a in ang deuh vek a. Indian dang ho hnen atanga kan hriat dan chuan Chirichuaha ho zinga 'Juano' an tih chuan i fanu hi a kawl niawmin an sawi a ni," a ti ta a.

Davis-a chuan "Tumahin amah chu an hmu thei silo tihna a ni maw? A....chu, min pui nasa khawp alawm. A awmna hmun ka hriat phawt chuan ka hote zawng zawng nen Injun ho bei tur chuan kan chhuak ngei ang," lung nilo tih hriat tak hian a ti a. Mahse Bleke-a chuan "John, i tawng na lua deuh a ni.... I fanu hi i...." a ti hman chauh a, Davis bawk chuan " Bleke, enga ti nge i sipai te chu Dragon ramah tir chhuakin ka fanu an hmuh hmaloh zawng tura i tirh loh?" a lo ti leh a. Bleke-a chuan " John, keimah ang bawkin dragon ramah hian tlangkar dragon ho tawmna tur tam zia chu i hre vek a, Juano hian a duh reng vang a nihloh chuan Cavalry ho hian an hmu hauhlo ang," a ti a, a thusawi awihlo tih hriat takin Davis chuan a lu a lo thing a.

"A dik khawp mai. Ram zau tak a ni reng a ni. Chuvang tak chuan an awmna leh an thlen chin hrelo a awm hi ka duh lo reng a ni," Davis chuan a lo ti a. Bleke-a chu a ngawi reng a, khun taka thil ngaihtuahin a khabe dawm meuhin dawhkan a bawh a. "Mi pakhat, nungdama Apache rama va kal a, i fanu va la chhuak thei chu awmin ka ring a. Chu chu tunah hian ka chah mek a ni," a ti ta a. A thusawi awih loh hmel fe hian Davis-a chuan "Mi pakhat maw? I upa tawh a, i â ta a nih dawn hi! Engti kawng mahin sawtiang tlangramah mi pakhatin thil a ti theilo reng reng. Army i tir zawk tur a ni," a ti a.

"Chutiangin thu min pe tur a ni lo," Bleke-an aw pangngai taka a han tih chuan rancher pa thin ur pawh chu a reh ta deuh a, aw nem deuh tak hian "Tunge ni chu pa, thilmak ti thei tura i rin chu?" a ti ta a. Bleke-a chuan "A hming chu Green a nia, ka thian a ni," a lo ti a. Davis bawk chuan "Green-a maw? Ka hriat mi pawh a ni hreplo e. Khawilam mi nge a nih? Texas mi nge halfbreed zawk?" a han ti a. Bleke-a chuan "Halfbreed chu ni lul lo e. Mi ngo diktak a ni. Amaherawh chu a naupan laiin Indian ho zingah rei tak chu a khawsa tawh a ni," a ti a. Davis chuan "Chu, i ring hle a ni maw?" a han ti leh a. Bleke-a chuan "Tun thleng hian ka thian a la ni reng a, tih tur ka tih pawh tih theih loh a nei lo," a lo ti a.

Davis chuan ringhlel tih hriat takin a lu a thing nar nar a, "Bleke, chutia i tih miau chuan ka tawmpui a che. Amaherawh chu Indian kutah minute sawm pawh a awm theih ka ring lo. Mahsela......" tih pah chuan a kut chu a phar chhuak a, Bleke-a chuan a lo man a, inzah tawn tak chuan an in chibai a. Davis-a a chhuak dawn tep tih chuan Bleke-a chuan "John, ka tih theih sang ber ka ti ang tih ka tiam a che. Green-a nen pawh kan lo sawi dun ang. Tunah chuan lawmman tur i phal kha i la kir thei tawh lawm ni?" a ti ta a.

Davis chuan "Ka ringhlel che tihna ni lovin hepa lakah hian rinna i nghat hnem lua niin ka hria, Bleke, lawmman ka siam hi a awm chhung chuan midangte pawh ka fanu zawng hian an khawsa ve reng dawn tihna a nia, tu emaw tal chuan an hmu mial mahna ka ti a ni. I thianpa pawh chu hrilh la, ka fanu a hmuh phawt chuan lawm takin ka lawmman siam chu ka pe ang. Chumi chu misual leh tualthah hmang ber pawh ni se, ka lawmman siam chu ka lakir thei lo ang," a ti ta tlat a.

Bleke-a chuan "A pawi hle mai, ka mi tirh tur tan hna i ti har sawt dawn a nih chu," a ti a. Davis-a chuan "I mi tirh tura chu i sawi anga mi tha leh fel anih chuan a ti thei tho ang. Mawhphurhna lian tak a lakna kawngah lawmman tha tak ka pe ang tih hrilh nghe nghe ang che," a ti a. Mahse bung tak hian Bleke-a chuan "Pawisa vangin hna a thawk ve ngai lo," a lo ti nghut a. Davis chuan "Pawisaa lei theih loh mihring hi ka la tawng lo," a lo ti ve a. Mahse Bleke-a chuan "Hepa hi chu pawisa in i lei hauh lovang," a ti leh a. Davis pawh chuan "Kan la hria ang chu," a ti a, a chhuahsan ta a.

Davis hian a hausakna avangin engpawh a nei thei zel a, mi zawng zawng pawh hi pawisa a awm chuan neih theih a in ring a. Bleke-a chuan office tukverh lam chu a pan phei a, Tucson khua chu a thlir vang vang a. Tucson khua atanga hmar lam tlang lian takah chuan Apache ho chu mingo ho thah chimih dan ngaihtuahin an in hawrkhawm mek ang tih a ring a. Hetia an indo reng avang hian Mexico sawrkar chuan Apache pasaltha pakhat thah zelah Peso sawm nga a phalsak a. Hmeichhiaah sawmhnih panga, naupangah sawm a phal chu sumdawnna tenawm ber a ni tih a hria a. Mahse chumi ti tawp tur chuan thu a nei si lo. Chubakah Davis-a lawmman siam hian mi tam tak a hip dawn bawk nen. Apache ho pawh hian mi tam tak chu rapthlak taka sawisa in hrehawm tinreng tuar tir a an thah lai hian pawisawilo naupang leh hmeichhia pawh tam tak thah an ni a. Mexico sawrkar chuan khawi atanga heng luvun te hi lak nge an nih a zawt chuanglo a. Indian an nih phawt chuan lawm takin lawmman chu a pe hmiah hmiah mai si a. Chu chuan Indian ho thah chakna mi tam tak a neih tir a. Hetiang a nih reng chuan indona rapthlak tak leh thisen chhuahna namen lo a ti chhuak dawn a ni.

Chutih lai chuan a fanu Indian hoin an kawl tlat avangin Davis -a chuan a fanu chhanchhuak thei tu tan lawmman itawm tak alo siam ve bawk si a. He nula lawmman hi lakbo ni ta se chuan mi tam tak hi Apache ramah hian an lut lo ang a, Inthahna pawh a ziaawm a rinawm. Mahse he hna thawk tur hian mi pakhat mai hi a tawk angem? A tirh tura hi ringtawk viau mahse a hna hi a hautak lu deuh lo maw? A inngaihtuah buai viau lai chuan kawngkhar chu a rawn ri dat dat a, tlangval sang deuh, mingo mah nise hang lam deuh, sa pan thlerh thlawrh leh dar pharh hah mai, a office-a rawn lut chu a hmu ta a. Bleke-a hmel ngui tak mai chu hlimna in a luahkhat ta a.

Phur tak hian "Jim, ka hmu che chu ka va lawm tak em. Helaiah hian lo kal la, ka'n han en ngun leh zual ang che," a lo ti chul a. Kum 30 hnuailam, tai fek ret rawt, zawi taka ding, Bleke-a inleng pa hian cowboy thawmhnaw pangngai ve mai a in bel a. A kawr te chu hlui deuh tawh mahse a fai tha hle a. A hmelah chuan Indian rawng a kai hle bawk a, mahse Indian ho angin a biang ruh a sang vak lo a. A kareh ah chuan hlim hmel a lo lang a, a mitmeng pawh nelawm tak a ni. A thusawi dan atang chuan fiamthu duh mi a ni tih hriat tak hian "Pawna mi sawn helaia ka thil pai chung hian rawn luh a phallo deuh a," tih pahin a kawngbawra fual taka a pistol pai chu a khawih zauh a. Bleke-a chuan ti tak zet hian "Khang kha i mamawh ngei ang le, ka nau, thu la, ka kohna chhan che hi ka hrilh ang che," a ti ta a.

Darkar khat dawn lai Bleke-an a sawi lai chuan dawhthei takin tlangval chuan a lo ngaithla ran a. A sawi zawh chuan a han faifuk raih a, "A huphurhawm hle mai," a han ti a, a in seh ruh deuh a, "Ka kal ange," a ti ta a. Bleke-a chuan "Kal tura ngen thei che ka ni lo a," muangchang hian a ti a., Mahse tlangval chuan then sak chungin "Nangin min tirh lohin tuin nge min tir ang?" a ti a, a tho nghal a. Bleke-a chuan tlangval chu kal nghal mai a inpeih tih a hmuh chuan a ban a phar chhuak a, "Good luck, Jim," tih pah chuan nghet taka in vuanin an in chibai ta a. Fiamthu ang reng takin Jim-a chuan "Vanneihna zawng zawng ka mamawh hmel e," a ti ta a.