Apache Fighter-10

Quincy chuan a chal chu a nuai nawk nawk a. Silai thla ang tak hian a chal chu a vual tawn tawn a, hmun khat laiah phei chuan thisen hi a rawn chuak ser ser bawk a. Shilloh chuan khawngaihna nei miah lo hian Rusty-a mu reng chu a en a," Mi a tih buai dan tur hriat chhuah vat hi a tha reng a ni. Tangka hmuh hunah insem kan duh lo reng bawk nen," a ti a. Quincy hmai ser kuau chuan," A thi em?" a rawn ti vat a. Shilloh chuan," Ka hre bik lo. Thi ta pawh nise pawi ka ti lo. Min beih a tum a, a hloh zawkah a tang ta a ni mai alawm," a lo ti hmiah a.

Quincy chuan," Thil ngaihtuah tur kan nei ta a ni. Chu chu nula hi engtinnge kan tih tak ang tih hi a ni," a ti a. Shilloh chuan chhan tuma a ka a an zuau lai chuan hla deuh hlek hi a'n en a, hlau leh thlabar tih hriat tak hian a ip chawih a. Khur dur dur chung chuan a kawk a," Saw ta saw i zawhna chhanna chu a awm e, rang tak a kan kal nghal a tha ang," a ti thuai a." Chu halfbreed kawhna lam a'n en chuan Quincy-a chuan, an piah hla vak lova Red Indian ho anmahni lam pana lo tlan chu a hmu ve ta a.

Quincy chuan Barbara Davis-i Rusty-a bawihsawma a thisen puana hru fai mawlh mawlh lai chu a'n tham kang lawp a, "I sakawrah chuang vat rawh," a ti a. Barbara-i chuan Quincy-a mitmu chu ham chhuahsak tumin a te tung a, "A la thi lo, khawngaih takin thi mai tur chuan hnutchhiah lul suh u," tap chung chuan a ti chul a.

Nula tap chu haiderin Quincy chuan," Ani hi sakawrah hlangin kan phur ang i tihna a ni maw?!" tih pah chuan nula chu a sakawrah a hlang kai lawp a. Quincy pawh chu sakawr chungah a zuang kai lawp a, na zet mai hian sakawr chu a beng thuai a, a lim ta puat puat a. Shilloh Platt-an hma a hruai a, Wilderness Canyon lam pan chuan an kal ta a.

*Thlaler ni eng leh lum, sa tlawk tlawk hnuai ah chuan Sudden-a chuan Apache sakawr chu chak zawka kal turin a tur sauh sauh reng a. A taksa sil them thum leh chaw mumal a ei lohna a rei tawh avangin a chau tawh hle a. Chawhnu lam nisa hnuaia phei chuan a chau in a kal zawi sawt hle mai a. Mahse zamna reng nei lovin a hma lam chu a pan tang tang zel a, thui fe chu a kal ve mai reng bawk a. Thlaler ram zau taka a hnu chhui ngun taka thlir chung chuan a insehruh a, "Apache hovin hetiang khaw lum hi an tuar theih chuan engvangin nge ka theih loh bik ang," a ti a.

Juano leh a hote hian an hnu khuh tumna reng an nei lo. Tuman an hnu hi chhui tumna leh hlauhawm khawpa an hnu chhuitu tur an awmin an ring lo emaw tal a ni ang. Chuvang tak chuan Sudden-a tan pawh an hnu hi chhui nuam tak a ni. Khaw lum leh nisa tawrhhlelhawm tak hnuaiah chuan a chhui zel a, a hnu chhui chhim thlang lam a pan ta chu mak a ti viau mai a.

Mahse Juano te hian Shilloh-a te hnu an chhui ngei a ni tih erawh chu a ringhlel lo. Mahse engatinge Shilloh te hian Fort Cochise lama himna pan lova, thlaler ram ril lam an pan tlat mai, Fort Cochise atangin inthiarfihlim thei ni tehreng pawh nise, Quincy-a, a bula a awm chhung chuan Shilloh pawh a inthiarfihlim thei chuang lovang.

Engpawhnise, Shilloh hian thil tum tha tak chu a nei a ni phawt mai. A hnu chhuiin chhim thlang lam a pan takah chuan Sudden chuan a awmna lai awm chu a'n suangtuah ta a. Fort Cochise chu tuna a awmna atanga chhim chhakah a awm tawh a. Fort Cochise leh thlaler ram in karah chuan Wilderness tlangdung chhengchhe tak zet chu a awm a. Wilderness ram leilung hi a khawk rawkin a chhengchhe em em a, kham chhengchhe tak leh puk te, tlang dung hriam tak leh hnim pawh to theih loh na te an ni.

A khaw hming putu ber Wilderness chu Fort Cochise chhim lam, Apache panna khawthlang lamah a awm a, he hmun ngei hi Shilloh te chuan an pan ngei a ring a ni.

Sudden chuan chu khaw chanchin a hriatte chu a'n ngaihtuah chhuak a, a kal dawn tuma Bleke nena an titi tuma an sawite leh, thenfai a tul ziate leh, mahse Indian ho nen inbeih a ngai dawna a lan avangin tun maia va thenfai chu tha an tih rih loh thute kha a hre chhuak a, Bleke-an," Jim, he khua hi a uchuaka thil tihna hmun leh tenawm tawp lutuk a nia, engtikah emaw chuan thianfai tura i kal a ngai ang," a tihte kha a hre chhuak zel a.

A sakawr tereuh te pawh chuan a pu thu chu a awih hle a, taima takin a kal tauh tauh zel a. A pu hmel chu tumruhna hlir in a khat tawh a;a rin dan a dik chuan Juano leh a hote pawh um pha tep tawhin a inring a. Chuvang chuan biru thei ang berin a kal zel a.

Tlang pawng a thlen dawn chuan a sakawr chu a thlung a, fimkhur taka bawk vakin a tawlh chho ta a. A rifle pawh a keng zel a, tlang a lawn chhuah veleh chuan a hnuai ruam chu a bih thla a. Makti leh hlauthawng tak hian a han ang zuau a, mahse a au chhuak lem lo. A chet sual hlauh chuan Tucson khua atanga a kalna chhan leh mi huaisen tam takin an nunna an chan tawhna te chu a thlawn a ni mai dawn a. Chumai chu nilovin hreawm tinreng tuarin a thi mai dawn a ni. A thil hmuh a'n en nawn leh chuan, "My God," thaw hak pah hian a ti ta sap a.

A awmna zawn hnuai chiah ah chuan Juano leh a hote chu an lo ding kual pap a. An din hual chhunga thing hling nei kunga an phuar beh pawh chu a zu hmu thei a. A'n en vang vang hnuin Rusty-a a ni tih a hre ta a. Chu tlangval chu na tak tuar hmel niin a hria a, a samte chu thisen hian a khat tlat mai bawk a. Chu tlangval chuan hmuh duh loh nei niawm tak hian rem lo zet chung hian lehlam a hawi tlat a.

Sudden chuan ngun leh zual hian a'n en a, Juano thil ken chu a zu hmu a. Rul tur hlauhawm ber pai chi a ni tih a hre ta a. Juano chuan rul nghawngah chuan a kut dinglamin a man a, a veilamin a mei lamah, a tal pawha amah a rawn zem loh nan a dawm tlat a. Chu rul chuan mihring rim a ngaih theih vak loh avang chuan a lei chu a khat tawkin a chhuah zawl zawl reng a.

A an pah chuan a ngho tha leh hriam hmel tak chu a lang chiang hle a. Rusty-a hmai bul lawkah, a chuk phak loh tur deuh si hian Juano chuan a tih thaih thin a. Rusty chuan a chuk mai hlauvin a lu chu a thle a, a thlek pah chuan hling thing khan na tak takin a lo chhun leh thin a. Juano chuan rul theh phei pah chuan, "Engvangin nge hmeichhia kha a pawimawh em em? Sawi vat rawh?" a ti a. Rusty chuan, rul lakah a lu chu a hla thei ang bera dah tum pah chuan, "Ka sawi dawn lo," a ti tlat a.

Juano chuan,"Sawi vat rawh," tih pah chuan a rul ken chu a theh hnai leh sauh a. Rusty-a hlau chuan a hnunglam thing hling hriam tak tak te chu a lu leh taksaah te chuan a ti bur fur tawhin a ring hle a. A chiau vawng vawng a. Apache lalpa chuan chil chhak phurh phurh pah chuan," Tucson khaw lam an pan nge kham kar khua kha an pan sawi vat rawh," a ti leh a.

Rusty-a chuan lu thin pah chuan,"An......Tucson khaw lam panin an kal,"a ti a. Mahse Juano chuan," Dawt i sawi a ni. Tunah chuan Juano chuan an kalna lam a hre ta, i sawi loh zawkah an kal a ni. Tunah chuan i thi tawh ang,"a ti ta a.

A rul ken chu khuahkhirh hauh lovin Rusty-a lamah chuan a theh phei leh ta a. Mahse chutihlai tak chuan silai mu a rawn vung thuak a. Chu rul lu lawk tak chu silaimu chuan a rawn phin darh ta vek a.

A mu hnihna chuan Juano mit leh mit inkarah tak chuan a rawn verh kaw phawt a. Juano pawh chu a let ta tawp a. A mu thumna chuan Juano-a sira ding Apache pahnihte chu a rawn thal leh ta tawp tawp a," Jim," Rusty chuan a rawn ti chuak thawt a. Juano leh a hoten Rusty an sawisak lai vel khan Sudden chuan a lo pan hnai zel a, tunah chuan thihna lalpa ang hrimin Apache ho awmna atanga yard sawm leka hnaiah a lo ding vang tawh a ni.

Khawngaihna tel hauh lo leh thelh hauh lo tur in a kap ta hmiah mai a. A silai mu ngana chuan Indian pakhat khek tuarh tuarh lai chu a thal leh tawp a. Midangte erawh chu Sudden-a a rawn lan tak thut avang khan silaimu leng lak atanga inthiarfihlim tur leh an hlauh em avangin an tlan kual vel a. Texas silaimu leng lak atanga inthiarfihlim kha a fin thlakin an tih tur hmasa ber a ni reng a ni.

Sudden-a pawh a lansarh lutuk loh nan a thingthi ve bawk a. Apache pakhat chuan khek tuarh tuarh chungin a rawn zuan a. Mahse a zuan san lai tak chuan a dulah a lo kap a, rifle a kah a ni bawk a, a thi chiangin a tla zawi hnap mai a ni. Sudden-a chuan Rusty-a, engmah ti thei tawh lo hnenah chuan chak takin a tlan phei a, a tlan lai chuan Apache silai mu chu a beng bul lawk lawkah chuan a rawn ving thiak thiak a. Silaimu pakhat chuan a kawr hma a thawi thler thawt a, a veilam ban puamah a thawi thi sawr sawr bawk a.

Rusty-a bul a thlen veleh Rusty an phuarna chu a zai chhum vat a. Rusty pawh chu a bawk vat a. A bula Indian pakhat thi ta rifle thlauh chu a chhar nghal vat a. Indian pa,amah rawn beih tuma rawn pan lai chu a kap vat a, chu Apache chu lungpui su ta ang hrim chuan a ting tawk a,a let ta tawp a. Chutih lai bawk chuan Indian pakhat hian Sudden chu a rawn zuan bawk a. Rifle-a kah hman anih tak loh avang chuan Sudden chuan a rifle ken chuan a lo hem nghek mai a, a zuan kan laia hem anih bakah, a lu taka hem anih avangin chu pa pawh chu a thi chiang kher mai. A lu pawh chu a phel phawk a. Mi dang rawn bei zui tur an awm tak loh avangin a reh ta vang vang a. An inbeihna vela vaivut khu pawh a nasa kher mai.

Rusty chuan," Tunah chuan Sudden tia an ko che pawh hi mak ka ti ta lo," thaw ham ham chung hian a han ti a. Mahse Sudden chuan," Min ngainatute chuan an ti ve hleinem," a lo ti vat a. Rusty chuan inthiamlo tak hian," Jim, ka at vang ania, ka dam chhung zawngin khatiang thil, thil mak kha ka la hmu ngai lo, khawi atangin nge i rawn chawr chhuah leh theih? Thi daih tawh tur ah ka ngai che a sin," a han ti a. Sudden chuan,"A ni pawh hian," tih pah in Juano mu reng chu a kawk zauh a,"Rula han chhaih buai vel che kha nuam ti hle lo se la chuan," a tih lai chuan Rusty chuan lu thin pah hian,"Ka lawm tak zet ani,Jim," zawi fiah tak hian a lo ti a.

Sudden chuan then sak chung hian," Lawmthu sawi a ngai lo. Enge i an? I tha maw?" a ti a. Rusty chuan,"Ka tha sawt khawp mai," tih pah chuan Shilloh-an a kah dan leh engmah hre lova Juano an a man tak dan te chu a hrilh ta a.

Rusty vek chuan,"A luck lo kher mai," tih pah chuan Juano ruang chu a kawk a,"Rang taka min thata Quincy pawh kha engvang a umzui lo nge a nih pawh ka hrethiam lo," a han ti leh a.

Sudden chuan thutak fe hian," Mi thenkhatte hi chuan an tih lam hi an ti lutuk fo reng a ni. Apache kher an ni bik lo. Mingo ho zingah pawh hetiang hi chu an tam ve tho mai. Engmah ti thei tawh lo chungah nuam an sa a, he pa pawh hian a ti lutuk hret a ni," a ti mai a. Sudden chuan Apache chungchang a sawi dan hmang atang chuan Rusty chu a lo tim ur ur a. Kum tam tak atang tawha mi pahnih a zawn a, an sawisak dan kha Rusty chuan a hre chhuak a.

Sudden chuan an vel ram chu a thlir kual a," Silai mu i hmuh theih ang apiang lo chhar khawm rawh. Thal leh a ngul pawh i hmuh ang apiang lo chhar khawm bawk la. An sakawr ho hi ka'n endik ang e. An thiante ho hman leh theih turin pakhat mah kan hnutchhiah tur a nilo," a ti a. Rusty chuan mak ti tak in alo en ha a, Sudden chuan then sak pah hian," Rusty, a tawpna tur emaw i ti hman elo? A teuh lo mai. Ho khat chuan kan hnu hi an rawn chhui mek a, an hotupa chuan Juano ai hian thil a ti thei daih zawk a, heng ho an rawn hmuh lai a lo awm chu ka thlang lo teh a nia," a han ti a.

Apache ho thi tawh, vaivuta let phung ho khan an veh a ni maithei. Mahse tunah chuan an hmelma tawp beih nana an tha khek khawl chu an hmang duh tawh ngei ang le. Rusty chuan sil leh na thum chung chuan rifle te chu a chhar khawm a, Sudden-an an sakawr thlun that a rawn khalh chhuah pakhatah chuan an hlang a, a dangah chuan Rusty chu a chuang a, tichuan an kal leh ta a.

Sudden chuan hlim fe hian," Kan ti fuh phian mai," tih pah chuan Juano sakawr niawm tak atang chuan pistol paina kawnghren pahnih leh pistol te nen chuan a'n lek chhuak a, pakhat chu Rusty chu a pe a. Ani chuan nui var var pah chuan a kawngah a hreng ta nghal a. In sehruh teuh chung chuan," Tunah chuan Shilloh Platt, silai ka nei ve ta e," Rusty chuan a lo ti bal bal a.

Chhim thlang lam panin an kal leh zel a," Nichin lawka i hmel lan dan atang kha chuan, rul hlauhawm tak khan a chuk ta ngei che niin ka hria,"a tih ve leh chuan Rusty chu hlim hmel tak in a lo awm a. Mahse chu Texas tlangval thu sawi zawm chuan a hmel a ti danglam leh ta thut a," Phuba lak tumna rilru hian thil tam tak a hmuh thelh tir thei bawk," Sudden chuan a rawn ti leh ta a. Hūmun hrehawm leh thil nung reng reng awm theih lohna Wilderness khaw lam pan chuan an tlan dun leh ta zel a.

Khaw luh dawn kawng peng thuam ah chuan," Thil eng pawh Wilderness khuaah chuan thleng thei a ni," tih hi lian fe hian a lo intar a. He signboard a intar atang hian a khaw mipui chet dan tur chu a hriat theih mai. Wilderness khua hi khaw lian tak chu a ni lo. A mi chengte pawh hian an chhuang teh chiam lo reng a ni. Khaw kawtthlerah te chuan in chhe te te chu a ding ve a. Chung zingah te chuan lian deuhte pawh a awm ve nual a.

Chumi zinga pakhat chu saloon angreng atana an hman a ni a. A dangte chu sakawr in a ni deuh vek thung a. An in te chuan tukverh te reuh te te an nei hlawm a. Khaw khawtthler lun leh lian deuh bik pakhat a awm a, chutah chuan thil chi hrang hrang leh mi chi hrang hrang, pistol leh chemte paite chu an awm reng a. California emaw, Old Mexican-a thil ti sual tawh ten, he hmunah hian awmhmun an khuarin hun an va hmang deuh ber a. Dan leh hrai pawh he khuaah hian a awm thei tak tak lo.

Dan pakhat chiah an nei a, chu chu silai hi a ni. Judge Colt chuan a tih ang chiah zelin ro a rel a, chu silai rorel tawh chu tuman an hnial thei lo. Khaw chhung hmar tawp lam in pakhat tukverh atang chuan Quincy chuan kawtthler chu a bih thla a," Shilloh, hmun ruak a zau khawp mai. Kan hmuh loh chuan tuman he hmun hi an rawn thleng thei hauh lovang," a han ti a.

Shilloh pawh chuan," Ka hria asin," a lo ti vat a. A hmelah chuan him tawk hlein a inhria a. An chenna in chu chhung lam leh pawn lamah vaivut hian a bawh nasa hle a. A chhungah chuan chair chhe zet pakhat leh dawhkan tawng tak leh a chunga khawnvar chu thil awm chhun a ni mai. Tukverh pakhat chauh a nei a, chu tukverh atang chuan a kawt hmun awl zau tak chu a lang thei a.

Shilloh Platt chuan," Eitur engemaw leh in tur kan mamawh dawn a ni. Eng chen nge hetah hian kan awm dawn pawh kan hre thei silo," a han ti a. A thusawi pah chuan Barbara Davis-i, khum chhe zeta thu chu a en a. Barbara chu ram ro leh lum hrehawm lutuka a kal tlangna a a hah em avangin chu khum chhe zetah chuan a hah chawl a ni. He nula hian amah mantu mi hrang pui pui lak atanga tlan chhuah leh beiseina reng a nei tawh lo.

Shilloh Platt-a mitmeng atang chuan Barbara chuan thil duhawm lo tak hi hmu tlatin a inhria a. Chu chuan a dam chhung zawnga a la hriat ngai loh hlauhna namen lo a siam nghe nghe a ni. Chutia ding taka a inngaihtuah lai chuan Rusty-a, Apache ho kalna ngei tura an hnutchhiah tak a kha a'n ngaihtuah ta a, chu tlangval chu a ngaina tan dawn chauh a, a tana a inhuamna nasa takte a ngaihtuah phei chuan a mittui te chu a rawn parawl ta teuh a.

Quincy chuan a pistol te a pai hnu chuan kawngka chu a hawng ta a." Eitur thil lam in ka'n kal ange. Khaw chhungah eng thute nge thang hriat te pawh ka duh dawn avangin ka thang rei deuh ang,"tih pah chuan Shilloh chu thip zet hian a'n melh a." Kei pawh in ka tih duh loh tur thil chu lo ti reng reng suh," a'n ti zui hram a. Shilloh pawh chuan a dar a lo chhin uk uk a.

Quincy-an kawngkhar a khar veleh chuan, Davis-i lam chu nghakhlel tak hian a hawi phei thuai a." I pa chuan i chanchin a hriat hunah chuan mak a ti ngawt ang. I thi tawh emaw te pawh a ti maithei asin," a ti a. Davis chuan," Thihna hun pawh tam tak a awm tawh reng alawm, ka duh ang hi hlawhtling thei se ka duh ngawt mai," a lo ti a.

Mahse Shilloh chuan," I duh ang chu tih hlawhtlin a la ni ngei ang. Nula, nang leh kei hian inhmelhriatna hun kan nei dawn alawm. Hun tha tam tak kan la nei dawn asin," a han ti a. Barbara Davis-i chu a khur hi a ni ngawt ta mai a. Mahse chu tawng chu a chhang reng reng lo.A ngawih reng avang chuan halfbreed mitmeng chu a rawn tur tan leh ta hle mai. Shilloh chuan,"Mi ngainat dan i zir a tha ang. Mi i kalsan hma hian mi tih lawm thiam a ngai viau dawn a ni," thinrim meng dur khui chung hian a ti a.

Mahse Barbara-i chuan,"Teuh lo mai," hlau miah lo hian alo ti a."Rei tak kan khawsak ho hnu ah pawh,'teuh lo' te i la ti a ni maw? My dear," tih pah chuan a kut a phar chhuak a, Barbara-i kokiah chuan han man a tum a.

Mahse Barbara-i chu khum atang chuan a tho vat a. Thlaphang leh hlau tak chung chuan pindan kil lehlamah chuan a kal ta nghal a. A thlaphang hlau meng vel an hmuh chuan za deuh leh khawngaihna nei miah lovin a nui vel a.

He mi chang lo midangte pawh in a mitmeng hur leh hmelchhe tak hi duh lovin vawi tam tak an lo tlan chhiatsan thin reng a. Hetianga hun tha tak a nei hi a intithei ve em em a, an hlauthawng chung han nanchin vel hi nuam hlei hleiin a hre tlat a ni. Ngaihtha leh nghakhlel tih hriat tak hian a hmui chu a liak zoh zoh a," Thu rawh nula, thu rawh. Tihnat che ka tum hleinem," nui sung chung hian a ti a.

A nui hmel te chu hmuh a nuam lo em em a, a thauah a man a, mahse a hmelah hlauhna lang lo se a tih tlat avangin a inseh ruhin a insum hram hram a," Din hi ka duh zawk, ka din hian ka hlat thei zel zawk dawn si che a," a ti ngat a.

Shilloh chuan," A tawpah zawng tawngkam tha dilin i la awm tho tho dawn alawm. I duh dan dan le hun dang pawh kan la ngah dawn alawm. A tawpah zawng tawngkam tha dilin i la awm tho tho ang," a han ti a. A mitmeng chu a thim fu mai a," Nimahsela tunah pawh han infiam chhin vel i duh phawt chuan ka inpeih reng e," a han ti leh a. Barbara chuan," Engatinge min chhuah mai loh? Ka pa hnenah chuan in lawmman tur chu pe turin ka hrilh mai ang. In pahnih hian in insem ang a, in kal bo daih dawn a nia. Engatinge ka thusawi hi i ngaihthlak loh?" thinrim tak chung hian a ti a.

Shilloh Platt chuan a kut chu a tukkhuma suih chung hian chair chhe zetah hian a thu a." Kan pahnih in maw? Kha kan mi â pa khan he in kawngkhar a rawn hawn rual rualin a khawh hmuhna kha ka lo kap leng vek dawn a sin. Sakeibakneiin a eitur sihal a sem ngai em ni?" a han ti leh a. A hlim hmel vel chu a ngeiawmin a tihbaiawm em em a, a hmelah chuan mahni hmasialna leh sualna lo chu hmuh tur a awm lo. Chuta tang phei chuan Barbara Davis-i pawh chuan beiseina reng a nei tawh lo.

Tucson khuaa a in luah kawt zawlah chuan John Davis-a chu a vei tarh tarh a. Chu kawt zawlah bawk chuan mi pakhat, sam var vau tawh ram hla tak atanga lokal tih hriat tak hi a ding bawk a. A thawmhnaw inbelah chuan vaivut hi a khawn uaih mai a. A mitmeng pawh chuan mutmu a hmu ngai lo emaw ni tih tur hian a meng sen rum mai bawk a. Chu pa chuan a lan dan leh a nih dan chu thup a tum chuang lo reng reng bawk a.

Kawt zawl a lo vei tarh tarh hnenah chuan," Nang hi John Davis i ni em?" a ti a. Chu pa chu a lo bu nghat a." Helai hmunah hian sakawr pakhat chu ka rauh san der mai a. I fanu chanchin ka rawn thlen dawn a ni," a han ti a. John Davis chuan," Barbara," tih pah chuan chu pa kawr hak awmah chuan a'n tham a. Nghakhlel tih hriat tak hian a en a. Mahse putar chuan,"Mr. khati tur a ni lovang. Ngun takin ngaithla zawk mai rawh. Ka hming chu Tobias a ni. Tobias Eddy a ni. Ni e, i fanu ka hmu a ni. Mi pakhat a hming 'Green' an tih khan Apache ho kut atangin Apache Wells-ah a rawn thlen a," a tih lai chuan, Davis chuan "Apache Wells-ah chuan an la awm em ni?" a lo ti vat a. Eddy chuan,"I hmanhmawh lu deuh a ni. Lo ngaithla ta che, ka sawi zel dawn alawm. Ka sawi zawh hma chuan lo awm hle hle mai teh," a ti leh te te a. Davis pawh chuan, "A nih leh han sawi zel teh," a lo ti thuai a.

"Hawihhawmna i nei lo kher mai. Mahse ka hrethiam a che, chuti chu nilo se ka pawi i sawi tawh ngei ang. Ka sawi tak ang khan Green-a chuan Apache Wells chu a rawn thleng ngei a. Mahse midang pali an tel ve tlat a ni. Chung mi pali te chu ro thap hmel pui pui,Sculphunter an ni hlawm a. Chuta kan awm lai chuan Apache ho in min rawn bei a. Mahse Green-a remhriatna avangin kan tlan chhuak thei hram a. Thlaler ram tan tlang a, Fort Cochise pan tumin an tlan chhuak a ni, kei chuan ka tawpsan ta a, midang ho khan Green-a chu khawih buaiin nula kha an laksak maithei," a ti a.

"Chutianga an tih vaih chuan i fanu chu Chiricahua kuta a awm aiin a letin a hlauhawmin a ngaihtuahawm ngei ang tih ka hrechiang," Eddy chuan a ti ta a. John Davis chuan "Anih leh he tlangval, Green-a i tih hian Fort Cochise thlenna hun a nei tawh reng em?" a lo ti vat a. Eddy chuan "Teh reng mai. A thlen leh thlen loh chu hriat a harsa nang. Fort Cochise ah thirhrui pawhin i zawt mai thei alawm. An la thleng lo anih chuan Green-a chu an theh chhuak tawh tihna a ni ang a, i fanu pawh chu sculphunter ho kutah a awm tawh tihna a ni mai," a ti leh a.

Davis chuan "Thil tih harsa anih loh chu," tih pah chuan a au that a. Mexican tlangval a rawn tlan lut thuai a. Davis chuan "Pedro," tih pah chuan lehkha them a han pe a. "Hei hi telegraph office ah kalpui la, va thawn nghal ang che," a ti a. Pedro chu kal tuma a inher lai chuan "Cleve kha han tir lut nghal nghe nghe ang che," a ti leh a. Pedro chu a chhuak ta nghal a.

Eddy hnenah chuan "Cleve hi ka foreman a nia, Apache hoin ka ranch an rawn beih tum khan ka mi te enge maw zat an that a. Mahse chutih lai chuan ka mite tam zawk chu phoenix a an awmlai a ni hlau a. Tunah hian mi sawm panga chauh ka ruai a, mahse a tul dan azir in mi pawh ka lak belh thei tho a ni. Ka fanu hi Cochise a a awmloh vaih chuan chung ho, amah la bo tu te tukdawl tur chuan mi tam tak ka hruai ang a, ka phin darh vek ang," a ti a.

"Heng sculphunter ho hi hmun dang, an kalna tur awm rin i nei thei em?" a ti leh a. Eddy chuan "Hmun khat dang bak chu pan tur awm an neih ka hre hauh lo mai," a tih chuan Davis chuan thip zet hian a lo melh a, hrethiam ni awm takin a bu nghat a. "A ni dawn tak maw! Wilderness khua a ni mai alawm. Eddy, chu khuaah chuan min hruai thei angem? Heng misual ho hi nang chauhin i hmuh tawh avangin an hmel i hre thei dawn a. Keiin ka la hmu ve hlawm silo a; chu khuaah chuan ka fanu hi a lo awm hlau anih chuan chu khua chu ka phin darh hneh teh ang chu. Ka fanu chunga kut lo thlaktu chu Pathianin lo la zuah hram se ka ti ngawt mai," a ti ta a.