Apache Fighter-2

"Kan thleng chu a ni ta der mai, Nig," a ti a, a sakawr chu a be mawlh mawlh a. A hma ram zau tak, thlaler ti tih, a khat tawka thing to phoh phoh na ram chu a thlir vang vang a. Tlangdung pakhat chu cactus thing hian a cham dur a. Ni sa tak chuan chunglai ram ruak leh zau tak chu ngilneihna tel miahlo a em tui tum ni awm tak hian a em tlawk tlawk a. Laiking tak ngial pawhin nilum ai peih loin lungpui hlim an bel ringawt mai a ni. Chu ram zau tak leh reh ruihah chuan mi pakhat hi a che ve leih leih a, a hnungah chuan sakawr pakhat thil phur hian a zui hnak hnak a.

Tlang sang lam pan chuan hmanhmawh lo takin an kal a. Sakawr dum lian tak chunga chuang chuan a lukhum chu a kai kun a, a hmalam ram chu ngun takin a thlir a. Tumah helai ramah hian awm an awmlo emaw tih laiin, mupui tluka mit var, thlaler rama che hlek pawh hmuh hmaih hauhlo chuan amah pawh hi an hmu chiang hle in a ring a. Mikhual anih pawh chung mi te chuan an hai lo. An thu inthawnnaah te chuan "Mi ngo amah chauhin a lo kal," an ti reng a, Apache hmuh lohin helai ram hi tuman an paltlang thei lo a ni.

Green-a chu a saddle-ah chuan a thu tha sauh sauh a, a hmaia vaivut leh thlan te chu a hru zauh zauh reng a. Lum a ti bawk a ni ngei ang, "Tui chhuan so a inchiah sat dan tur chu tunah ka hre ta mai," tia amah inbe mawlh mawlh chung chuan a sakawr chu a ti ding a. Hnah ro te leh thing tang nawite fawm khawmin mei a chhem ta a. A mei chhem chungah chuan kawmawl hi a pharh a, mei khu chu van lamah a khu chho bial pup pup a. Chutianga vawi hnih a tih hnuin mei chu a ti mit a, a sakawrah a lawn a, hmalam chu a pan leh ta a.

"Kha mei khu khan thil tam tak a ngaihtuah tirin ka ring. Mi tam tak helai hmun kal tlang tum hian an hriattir hmasak thin pawh ka ring lo," tiin a sakawr chu a be mawlh mawlh a. A sakawr pawh chuan a pu biakna chu hria ni awm tak hian a thaw halh halh a. An kalna khân, puk lian pui pui kara thli rawn thaw chuan Nig-a chu a ti phawklek hle a.

Mahse Green-a chuan awm hle hle tura a hrilh hnuah chuan tha takin a kal leh mai a. Sakawr chu a khupa chep tlat chungin a ban chu a sang thei ang berah a phar a, a pistol paina chu a awmlo ngei tih an hmuh theihna turin a ti lang hram hram a.

Fimkhur takin tlang kar kawngah chuan Nigger chu a kal zel a, sava lian deuh pakhat hi a rawn thlawk thuak a, chumi rual chiah chuan a chhak tlang lungpui atang chuan aw a hre ta a. Green-a chu a saddle ah che miahlo in a thu a, aw lo chhuahna lam chu ngun deuhin a en a. Mahse engmah a hmu lo. Amah mai loh chu thil nung dang awmna awm pawh a ni lo.

"Hmu thei lo mah ila an awm chiang alawm, tun thlenga min la kaphlum lo chu ka vannei thui tawh hle mai. Ngaihtuahna enge maw tak chu ka siamsak khawp mai hi maw," ti rilru chungin aw lo chhuahna chu a pan zel a. Thil che hlek leh amah rawn beih tum tu hmuh mai tumin a hawi kual vel a. Hmun rem zawl tha tak a thlen chuan a sakawr chu a ti ding a, muangchangin a zuangthla a, hmanhmawh hauhlo in sakawr pakhat thil phurh chu a hlangthla a, leiah chuan a kai pharh ta a. Kawmawl chhungah chuan bungraw chi hrang hrang, darthlalang te, chemte te leh thildang tlereuh chi te an awm hlawm a. Chumi zinga langsar ber chu Winchester Carbine a ni. A kawm chu ni em zawnga tih chet chuan a tle zawk zawk a. A thil phurh ho bula dingin Green-a chuan aw lo chhuahna lam chu ngun tak maiin a en a. Vawilehkhatah a lu chung feet 30 vela hlaah chuan mi pakhat hi a rawn lawng hlawl mai a.

Chu pa chuan che miahlo in rifle in a rawn tin reng a. Ring zet hian a han khek zui a. An awmna velah chuan a khawk rum rum a. Sakawr te pawh chuan an hlau deuh a ni ang, an beng an tun hru mai a. Green-a chuan a sakawr te hnenah chuan "Awm hle hle rawh u, a thian te a hrilh vel a nih chu," tiin dam thlap hian a hrilh a. Sakawrte pawh chu an che ta biklo a. Muangchangin Indian pa lam chu a hawi a, a kut chu chupa hmuh theih ngei tur chuan a lek lang reng a. A chezia chuan hmanrua engmah a neilo tih a lantir a. A kut dinglamin a awm bawr a khawih a, a phar chhuak leh a. Chu chuan thian anih thu a ti lang a, sign dang a siam leh a, chu chuan "lo kal la, rawn en teh" tih a entir a.

Chutiang chuan a ti nawn leh a, lungpui chunga Apache chu aw danglam takin a au ruai ruai a, a khawk leh ta rum rum mai a. Green-a chuan midangte pawh chu a hmu ta hlawm a. Dawithiamin an dawi chhuak phawk phawk ang mai hian vaivut atang chuan an rawn tho phawk phawk hlawm a. An tel in hnawih avangin vaivutin a bawh khat tlat hlawm a. Chu chu an tum reng pawh a ni. Che miahloa vaivuta an bawh lai khan vaivut nen danglamna an awm chuan loh avangin hmuh mai mai theih an ni lo. An vaiin mi pariat an ni a, thal leh a ngul invuah sa vekin an keng a, a chanve velin an kau sa reng bawk a. Chet hlek a tum takin hman nghal mai theih turin an ti a ni. An hmaia rawng dum an hnawih chuan War Party an ni tih a ti lang a. Green-a chuan thian a nih thu chu zai zir bawkin a hrilh leh a, Apache zinga tam takin spanish tawng an thiam tih a hriat vangin " Estoy Amigo, Tengo Cosas Finas, Mirs," a han ti a. Green-a chuan an thian a nih thu te, sumdawng tura lo kal a nih thu leh thil hlu tak tak a ken thu te sawiin lo kal a, a hmun ngeia en turin a sawm leh a. Tunah zet chuan pathiante zahngaihna hnuaiah liau liau a awm ta. Rawn chhukthlain a thil ken te chu an rawn en thei a, awlsam taka thatin a thil ken te chu an rawn chhuhsak thei bawk a. Engti zia nge an chenna ram ril tak thleng hian hepa hian a lo kal tur sawi lawk zel chungin leh bungraw tlemte nen rawn thleng thei mai nge a nih an ngaihtuah ve ngei ang tih a ring a, "Ka beisei anga an tih duh loh chuan reiloteah mi thianghlim Petera nen chibai inbuk a ngai ngei dawn anih hi," tiin amah chu a inhrilh mawlh mawlh a.

Lungpui chunga Apache pakhat leh midang chu an inhnial a. Green-a chuan an thinrim rawl te pawh a hre thei a. An sawi awmzia hriat kher pawh a tul lo. Lungpui chunga mi chu an hotu ni ngei tur a ni, sa tha tak leh sang tak a ni a, a awmbawr te chu a lianin a sek tha hle a. Chupa chu a awmah a in hnawih rang ruai a, an inhnial zawh hnu chuan amah chuan hmahruaiin Green-a chu an rawn pan ta a. An che vel chu an fimkhur ngei mai. Sakeiin a seh tur thawm nei miahlo leh in tha zo em em a a veh ang mai hian chu pa chu a rawn kal thoh thoh a, "Thian an nih loh hmel hle mai," tiin Green-a chu a lo phun sap a.

Midangte chuan an hotupa chuan rawn zui a, vaivut te pawh an la kai nual a. Hmanhmawhlo leh inring tak chungin Green-a chu an rawn pan a. Green-a chu lungpui ang maiin a lo ding to mai a. Chung ho chuan an rawn kal hual a, a thil ken te chu an en a, rifle phei chu an hmu duhin tha an ti hle a ni ang, an in pe chhawng dan dan a. Chutih chhung zawng chuan an hotupa chuan Green-a chu thip fe hian a lo melh reng a. "Engvangin nge kan ramah i lo kal? Eng thil nge i duh?" a ti a. Satawng a rawn hmang ve leh nghal a. "Sumdawng turin," Green-a chuan a lo ti vat a. Chupa chuan "Bungraw hman tlakloh lutuk kengin kan ramah i lo kal a, engvangin nge meikhu in i lo kal tur thu i rawn sawi hmasak zel?" a han ti leh a. Green- chuan "Mi te nen sumdawnna kan neih hma a thah mai ka nih loh nan," a lo ti a. Apache chuan "Sumdawn maw? Thil ho mai maia sumdawn hi engah mah kan ngai lo. Silaite a tel a nih loh chuan. Silai pawh hi Manolito hian a la ang a, a that che anga, a nei nghal mai dawn a ni," nelawmlo fe hian a han ti a.

Green-a chuan "A dang pawh ka la nei," a lo ti vat a. Chupa chuan "Khawiah maw? Ka va hmu lo ve. Engmah dang i nei lo. Sculp hunter te pawh i ni maithei a ni. Midang tam zawk i hmuh hunah thah i tum ang a, sumdawn nan hman i tum a ni ngei ang," a lo ti a. Green-a chuan "Sculp hunter ka ni lo. Sumdawng tura lo kal mai ka ni. Silai pawh ka neih loh hi. Engtin nge silai pawh nei loin i mite ka thah theih ang?" a tih chuan Manolito chuan "Thil mak tak te pawh i hmang dawn a ni ang chu," a la ti talh a.

Green-a chuan a hlauhawm zualpui chu kal pel tawhin a inhria a, hmanraw engmah a neilo tih Indian pa in a hriat chuan "Eng kawnga sumdawn nge i duh? Vertherna tinreng hmanga mingo ho zawn thin Lunghlu in tih hian em ni?" a ti a. Green-a chuan a lu thin pahin "Rangkachak leh Lunghlu chu ni love, mingo hmeichhia, i miten an ruk bo kha ka zawng a ni," a ti ta a. Manolito chu a mengphawk hru a, chapo leh inti thei tak hian a han meng zui vel a, za vakloa a nuih zawh chuan "Heta tanga hla vak lo ah hian a awm a, mahse i hmu chuanglo ang," a ti a. Mahse Green-a chuan hepa hian dawt a sawi anih a ring tlat a, dar chhin ak pah hian "A tha lo hle mai. Amah avang khan sumdawnna tha tak pawh kan nei thei asin," a han ti leh a. Indian pa chuan "Sumdawnna tur engmah i nei lo, i nunna mai lo kha chu. Tunah hian i nunna kan la lehnghal dawn si a," a lo ti leh nghal hmiah a.

Green-a chuan "Khawngaihna pawh tlemin in han lantir ve phawt ang chu mawle," aw pangngai tak leh zam hauhlo hian a han ti leh a. A khawsa zia chuan Indian ho chu a hneh riau a, a khawsa ziaa a hneh theihloh hun hun chu rannung ang leka an thah hun tur a ni tih a hriat avangin an rilru lak pen dan a ngaihtuah ngat ngat a tul a ni. "Nula awmnaah chuan min hruai rawh u, chumi hnuah chuan ka sumdawnna hi ka hrilh ang che u," tiin a ngen leh a. Indian ho zinga pakhat chu ram zet hian Spanish tawngin a rawn tawng chhuak a, "That la, heta tang hian i kal thuai teh ang u," a rawn ti a. Green-a chuan "Nula hnenah chuan min hruai rawh. Enge i hlauh?" tia a zawh leh chuan Indian pa hmel chu chapona in a khat ta a. "Manolito hian tumah a hlau lo," a rawn ti a. "Chutiang chuan i tawng a, anih leh min rawn that rawh le. Enganga huaisenna nge i neih? Hmeichhe chunga huaisenna chauh i nei a nih awm hi maw," Green-a chuan a ti ta a.

Apache chuan ngun deuh hian a han en a, hepa hi mingo dang a lo tawn tawh te nen chuan a dang daih mai. Hlauhna reng reng a hmelah a lang lo a, khawngaih dil hmel pawh a lang chhuak chuang lo. Indian hoin mingo an man a an sawisak dan te pawh a hriain a rinawm si. He tlangval, tawng muang leh sa pan tak hian danglamna riau a nei a ni. Midangho pawh chuan an hotupa nen chuan an en tawn sek tawh mai a ni.

Manolito chuan "Huaisen awm takin i tawng a, huaisen taka thih i duh em?" tia a zawh takah chuan Green-a chuan "Duhthlan tur kan siam ange. Ka nunna chhanhim tura inbeihna min siam sak rawh," a ti ta a. Indian pa mitmeng chu a phawk leh ta hru mai a. Green-a pawh chu a innuihzat ril ru hle a. Eng ang inbeihna nge la thleng dawn tih pawh a hriat hma a chutia a nunna thap ngawt chu a fel ber angem? "Kan inbeihna tur chu i duh duh han thlang la," a han tih leh chuan makti zeta meng phawk hru chungin Indian pa chuan "Manolito beih hi i duh a maw?" a han ti a.

Green-a chuan bu nghauh chung hian "Inremsiamna awm sela," a lo ti thuai a. Indian pa chuan "Eng inremsiamna maw?" a ti a. Green-a chuan " Min thah theih chuan a tawk a ni mai a. Min thah theihloh erawh chuan hmeichhe awmnaah chuan min hruai thei angem?" a han ti a. Apache zinga pakhat, nichina rawn tawng chhuak bawk khan "That nghal la, chingfel nghal thuai teh," a rawn ti leh a. Mahsela Manolito chuan ban phar pah hian "Lo tawng suh. He mingo pa hian infiamna tha tak min siamsak dawn a nih hi. A vaupung nat ang hian a chet theih leh theih loh kan hre dawn alawm," tih pah chuan a chemte sei zet zawt, tle zet mai chu a rawn phawrh chhuak a.

"Chemte in aw," a rawn ti a. Green-a pawh chuan a remti tih entirnan a lu a lo bu nghauh a, "Inremsiamna nen chuan a ni ang chu maw," a ti leh a. Manolito hmel chu a lo dur khuih khuih a, a mitmeng te pawh chu a verther hmel ta hle a. "Chu zawng, nakinah kan la sawi dawn nia," a rawn ti a, za vaklo hian a nui suk a. Green-a chuan "Manolito thutiam chu a tha tawk e, a vawng reng dawn tih ka hre si a," a han tih chuan Manolito chuan "Manolito tan hriat reng a tullo ang," tih pah chuan a inher vut a, a hote chu thu a han pe tuar a, anni pahnih chu an kalsan ta dial a, lungpui atang chuan ngun em em hian an thlir ta thap a. Chemte nena insual ngat hi chu Indian ho ngaihsan ber a ni a. Chubakah an hotupa hmaa mingo tlangval han che vel tur chu hmuhmawm dawn hlein an hre bawk a.

Manolito hian mi a beih hi an lo hmu tawh thin a, he tlangval ria tak leh sa pan tak an sawisa a, muangchanga a sawisa hlum tur chu a hmuhnawm dawn bakah zana an meichhem khawmna a nunau leh pasaltha dangte hnen a han sawi hun tur an nghakhlel hle a ni. Chirichua-a Fox Lodge hotupa in amah choti American leh nghal hneh taka a sawisa tur leh a kut dinglam tihchhiatsak phawt a, chutah a ke dinglam, chumi hnuah a ke vei lam, a tawpa zawimuanga a that tur chu hmuh an nghakhlel em em a ni.

Manolito chuam zaizir hian a hote zinga pakhat chu a han bia a, chupa chuan chemte sei tak, a hma ami chen vel chu a rawn la vat a. Chu chemte chu inches 8 vela sei a ni a. Tin, Texas emaw, Mexican emaw an nunna a laksak tuemaw ta anih a rin avangin Green-a thinrimna pawh chu a nasa zual sauh a. Heng ho hi rancher te rawk a, am duh hun huna mi rawk hnam an nih zia leh Bleke-a khan Davis-a chhungte a nghaisak dan zawng zawng kha a lo hrilh tawh avangin a thinurna pawh chu a sosang tial tial a.

Manolito chuan chemte pahnih te chu leiah a paihthla a, a fawng ve ve chauh chu a lang a. Chuta tanga pen rukah chuan a kal phei a, a ke artui chuan lei chu a rin ta a. Tih dan tue tlangpui chu a han sawi a, Green-a pawh chuan "Apache ho tihdan chu ka hria a lawm," a ti mai a, Manolito chuan tanhmun a siam fel hnu chuan Green-a pawh chu a inring tawh kher mai.

Chemte la hmasa sa hi an nihlawh dawn a ni ber a. Green-a hian Apache ho tih dan hi a lo hmuh fo tawh avangin a hrechiang hle a ni. Manolito hian rang takin, tum lawkna pawh awm tehchiamlo in chemte hi a rawn zuan thut dawn anih a ring a. Chumi lo beilet tur chuan a inrin a ngai a ni. Indian pa chuan a khingpui pa lak atang chuan a mit a la sawn lo reng reng a. An pahnih chuan an rin bialah chuan remchang hmasa melh ran chungin an kal kual vel a. Tumah mahin rin bial chu an pel hauh lo. Mitkhap kar pawh tlinglo ah chuan Manolito chuan chemte kawm chu a vuan ta thut a.

Chemte fawng a man chiah tih ah chuan a ke veilamin pakhat zawk pet len chhuah daih tum chuan a ke chu a khai kang a. Chutia a khai kan lai tak chuan Green-a chuan chemte pakhat chu a man chat a, Manolito in rin tak tak hma, a kun lai tak chuan a hnungah na zet hian a han nam a, Manolito chu ama chemte ken chuan a awmah a in rin hrawk mai a. Green-a chu rang lutukin a persawn thuai a, Monolito lo tho leh chu a thinrim kher mai. A awma chemte rinna atang chuan thisen a rawn chhuak tuam tuam mai a.

Chu mite pahnih inthen leh chiah chuan Apache ho chu an thaw huai a. Manolito chuan chapo tak hian a khingpuipa chu a han en a. An in vehkual leh ta theuh theuh mai a. Manolito chet dan ang zelin Green-a pawh chuan a ti ve zel a. An kut veilam ve ve chu rang takin an phar chho a, chemtea in vih an tum hunah an kut veilam chuan an lo man dawn a ni. Vawilehkhatah Indian pa chuan a zuan leh thut a, Green-a tan pawh inrin hman a har hle mai. A theih ang tawkin a lo inveng ve na in Indian pa a kal kian meuh chuan Green-a ban puam lai chu a thler hawk a, a thip zawk bawk a.

Manolito hian a kut veilam hi che theiloa siam phawt a tum tih a hre mai a. Mahse tun tumah chuan a tum ang chu a thleng ta rih lo. Manolito chuan a zuan leh thut a, mahse Green-a chu a lo indang thei hram a. Thip zet hian an inmelh a, Manolito chuan rang taka sawisak hlum ai chuan zawimuanga tihhlum a tum a ni. A rawn beih dan ngaihtuahin engtia lo beih tur nge tih Green-a chuan a ngaihtuah nauh nauh a. Manolito hian a rawn zuan leh ngei dawn tih pawh a hria a, a rin ang ngeiin a rawn zuan leh ta a. Tunah chuan hnungtawlh loin a chemte chu a zak hnuaiah chiah a rawn vai a. Nghet takin Green-a chuan a kut chu a lo chep bet a, chumi rual chiah chuan a ke ah na zet hian a rah sak ta vak mai a. A nam zui bawk a, Indian pa chu a pai tuang tuang a, a duh anga a sawisak theih loh bakah tham lo awm taka hetia atih vel avang hian Manolito chu a thinrim zual sauh a. A hmel chu huatna hlirin a khat tawh a. Indian pa thinrim chuan "I thi dawn, White eye," a ti a, "Tunah chuan rang takin i thi dawn ta," tih pahin fimkhur em em hian a veh leh ta a. Green-a chuan chuti taka a thinrim avang chuan Manolito chuan fimkhurna a hlauh then tawh ngei a ring a. A che vel chu hmaih nei miahloin a thlir ran a, rang tak bawk chuan a rawn zuan leh a. Green-a chuan a chemte in Indian pa chemte chu a lo dang a, chutih kar second chanve pawh tlinglo ah chuan Green-a chuan Indian pa nghawngah chuan a kut veilam chuan a kuah ta thut a, a ke veilam chuan a ke lehlam chu a kherh tlat bawk a. Na zet hian a nam leh ta ngheng mai a. Indian pa chu paih ang thlawrh hian vaivutah a let tawp mai a. A khu rum rum a, a tluk pah chuan a chemte hum kha a thlauh leh nghal a. Rang takin Green-a chuan a man zui a, a kur veilam bawk chuan a nghawngah chuan a rek leh a, a kut dinglam, chemte a kenna chuan vih mai inpeih takin a tin ran bawk a. Chutih lai chuan Apache ho, anmahni lo thlir tute chu hmanraw kim nen an rawn pen chhuak ta a.

Green-a chuan "Thih nge i duh dam? Sawi vat rawh," a ti ta a. Manolito mit chu thinrimna hlirin a khat a, A nghawng a rehna phelh tum chuan a han tal a, mahse engmah a ang thei chuang lo. Apache mitmeng atang chuan Green-a chuan a thil tum chu a hre thei mai a. "Manolito a tlawm e," Manolito chuan a rawn ti ta a. Green-a pawh chuan a sirah chemte chu a paih a, a ding chhuak a. Indian pa pawh chu a rawn dingchhuak ve ta bawk a.

Green-a chuan Indian hoin hriamhrei a an tin leh an khek thawm chu a haider lui tlat a. Manolito hian thu a pek loh chuan an that dawnlo tih a hre reng a. Manolito hian a tlawmna hi eng angin nge a ngaih ang? Green-a chuan a thawmhnaw a vaivut kai te chu a beng fai mawlh mawlh a, Manolito pawh biak buai hun a niin a hrelo. A rilru a siam ve rih a tulin a hria a ni.

Manolito-an a kokia a rawn vawn veleh chuan a han thlir chho a, Manolito mitmeng nelawm tak chu a hmu ta a. Manolito chuan "Nungdama ka zuah che hi i ring tak tak em ni?" a ti a. Green-a chuan muk tak hian "Manolito hi Apache a ni a, hei hi Manolito ram a ni bawk. A thutiam kha a vawng reng a ni tih ka sawi nawn mai a ni," a lo ti a. Manolito chuan "Kawng lakah te pawh i thi maithei tih hre reng chung hian hmeichhia chu hmuh i la duh talh a maw?" a han ti leh a. Green-a chuan "Chu chu ka lo kal chhan a ni tlat," a lo ti a, Manolito chuan a lu a thing a, Green-a dar chu a chul leh thuak a, "Mi huaisen tak i ni. Kan inbeihna tihtawpna engemaw kan siam tur a ni. Chu chu eng ber nge ni ang kan la hre chhawm zel ang chu," tih pah chuan a hote lam chu a hawi a. Anmahni tawng chuan thu a'n pe leh tuar a, rang takin leia Green-a thawmhnaw chu kawmawlin an zial sawk sawk a, a phurtu sakawr chungah chuan an hlang ta thuai a. Green-a pawh chu sakawr chunga lawn turin zai zirin an hrilh a. Winchester rifle kha chu amahin a saddle-ah a dah hmiah a.

Green-a chuan Apache dang sakawr chunga an lawn sap sap chu a en reng a. An hotupa thupek nghakin an awm thap hlawm a. Manolito chuan Green-a lam chu hawiin "Lo kal ve rawh le," a ti a, an chenna lam pan chuan an kal ta a.