Apache Fighter-3

Hnim to hleih theih lohna ram, tlangkar kawngah chuan ngil takin an chho a. Dinglam pang pana an kal leh hnu chuan chho zawng bawkin an kal leh a. Indian ho camp chu an thleng ta a. Ui paruk velin an lo bauh laih laih tih mai loh chu engmah thawm dang hriat tur a awm lo. Manolito leh a hote an lo luh chuan tlangkara vengtu pasaltha te chuan ngun takin an lo bihthla a. An khua hi tlangin a hual chhuah deuh vekna hmun, nuam tak mai a ni a. Green-a chuan "Hmun tha thlan an thiam kher mai" a ti rilru nauh nauh a. Indo mi tam takin mit la lek lo a an lo en leh an inrin hlawm zia te pawh chu a hmu hlawm a. Mahse tumah chuan an khawih hauh lo.

Manolito chet zia chu an thlir ber a ni tih a hmuh chuan Manolito chu an zinga hotu ber a ni tih a hrethiam mai a. A thu lo chuan an mi man chu an tihnat a ring lo a ni. Naupang pakhat hi Green-a sakawr kai tur chuan a lo chhuak vat a. Green-a chuan naupang chu a lo ti ding a, Apache pakhat hnenah chuan "Naupang hi ka sakawr hi khawih lo turin hrilh rawh. A khawih hlauh chuan ka sakawr hian a ti hlum mai ang," a ti a. Manolito chuan fiamthu deuh hian "He sakawr hi hmeichhe tha tak ang a ni a, mi pakhat chauh khawih a duh a nia," a ti a, Green-a chu amah zui turin a hrilh a, hma a hruai ta a.

Hmun zawl zau lai taka an buk an thlen chuan buk kawta ding turin Green-a chu a hrilh a, hmeichhe pakhat hi a hruai lut a, rang takin hmeichhia chu an mi man hmeichhe pakhat nen chuan a lo chhuak leh vat a. Chu hmeichhia chuan thu awih tak leh hnial miahlo hian a rawn zui chhuak a. Ngui takin lei lam chu a bih a. Mahse Green-a a han hmuh chuan hlim hmel tak leh beisei nei takin a meng kawk kawk a. Reilo teah Green-a chuan pistol a pai lo tih a hriat erawh chuan a hmel hlim tak chu a lo ngui zo leh ta a. Amah anga an mi man ve tho ni turah a ngai ta nghal a.

Green-a chuan hmeichhe hnenah chuan "Ngaihtha takin awm la, engmah sawi suh," a ti a. Hmeichhia chuan a han ennawn leh a, a tawngkam chhuak rinawm tak chuan a ti phawklek deuh a. A bula ding Manolito nen chuan a en tawn chhen a. Manolito chuan Green-a hnenah chuan "Hei hi a ni em i hmeichhe zawn chu?" a han ti a, Green-a chuan "Ka hre lo, amah hi ka zawh phawt loh chuan," a lo ti a. Manolito chuan a remti tih a hriat hnu chuan a panhnai a, chu hmeichhia chu Apache inchei dan chiahin a inchei a. A sam te chu a bal hle na a, a rawng pangngai chu a la hriat theih tho a. A mitmeng chu chhun pachangah chuan a dumpawl dal raih ni hian a hriat bawk a. Green-a chuan "I hming hi Barbara Davis a ni em?" a han tih chuan hmeichhia chuan a lu a lo bu nghat a. Zawite hian "Min hruai haw tura lo kal em ni i nih?" a ti a. Green-a chuan "Chu chu ka tum dan tlangpui chu a nia lawm," a han tih chuan beiseina thar a siamsak a, Green-a vek chuan "Mahsela chuti mai chuan kan chhuak thei kherlo ang," a ti zui a. Lu thing chungin Barbara chuan "A warrior zinga pakhat, a hming Juano an tih chuan min nei bik a, a nupuia min siam a tum vang chauhin ka la him a ni," a ti sap a.

"Ngaihtha takin lo awm phawt mai la, enge kan tih theih kan la hre chhawm mai ang," a tih chuan hmeichhia chu a bu leh nghat a. He hmeichhia, chauh hmel tak a hmuh hian Green-a chuan mak a ti hran lo. Apache lungin tang te chu an thawkrim hle a, a chang phei chuan hmeichhia te pawhin an sawisa thin tih a hre reng a. Nimahsela he nula rilru hi an lo la la peng loin an la ti beidawng chuanglo tih a hmu a, hun remchangte a hmuh ngai chuan lakchhuah theih pawh a in beisei a ni. Manolito lam chu a han hawi a, "Hei hi anih hi," a han tih chuan Manolito pawh a lo bu nghut a, "A neitu ka ni lo a, midang ta a ni. Midang nen in inbiak a ngai ang," a lo ti nghal a. An zinga pakhat chu thu a han pe a, chupa chuan hmanhmawh tak hian pungkhawm ho chu a keu sawt sawt a, a kal ta nghal a. Reiloteah pungkhawm ho hnung atang chuan mi pakhat hi a rawn ang bawrh bawrh a, a rawn inhnawh tawlh tawlh a. Amah chu la naupan hmel tak, kum 30 la tlinglo hmel hi a ni a, pa ria lam leh sang tak a ni. A cher avang chuan anihna aiin a lang sang a, a kut dinglamah chuan Copper Band hi a vuah a, a awmah chuan rawng varin kawlphe lem a in ziak a, chu chuan kawlphe anga rang tih a entir a.

A mitmeng dum kak leh a biang ki sang tak chuan mi nunrawng lutuk anih zia a ti lang chiang hle a. Green-a hma takah chuan a rawn ding a, "Ka unau pa in helai hmunah hian a rawn hruai che a, he hmun hi i chhuahsan leh tawh hauh lo ang," a rawn ti tawn tawn a. Green-a chuan dar chhin ak pah hian "Kawng tluanin ka ngaihtuah reng a ni. Chutiang anih chuan a pawi ngawt ang. Kan in sumdawn tawn theih ka beisei teh lul nen," a lo ti a.

Apache chuan thinrim taka hnar tum dat dat chung chuan "Juano hian mingo nen in sumdawn tawn a duh lo," a ti a, Green-a chuan "Silai tha tak, englai pawha puak reng thei nen pawh maw?" a han ti a. Juano chuan "Silai ka hmu reng reng lo," tih pahin a thlir kual vel a, Green-a chuan "Juano ang hian thil ka peh hel ve lo, Manolito hian silai chu a nei a ni. I hmuh atan ka rawn keng a ni," a ti a.

Manolito chu a rawn pen chhuak a, "Chu chu a dik a ni," a ti a, silai chu Green-a hnenah a rawn theh phei a. Green-a chuan Juano lam hawi chuan "Juano, he rifle hi la la, han en vel teh. Hetiang anga tha silai sawm nen chuan mi tu pawh a hote zingah chuan hruaitu a ni thei ang," a han ti a. Juano chuan silai chu rang takin a la a, hmang thang tih hriat taka a han khawih vel hnu chuan Manolito chu cho tih hriat tak hian a han en a, chutah silai chuan Green-a chu a rawn tin ta a, a hmet per ta mai a. Midang zawng chu an ngawih thup lai a nih avangin silai tlawlh ri chu a ring khawp mai. Green-a chuan nui var var chungin "A mu thun loh anih kha," a lo ti a, Juano pawh chu a nui ve na a, a mitmeng chu huatna hlirin a khat a.

"Juano hian hmeichhe pakhat leh rifle mu neilo hi inthleng a remtih i ring amaw? Silai hi chu a nei mai dawn a ni. Engtin nge ni ta zel ang?" a ti a. Green-a chuan "Chutianga i tih chuan mi â i ni mai alawm, rifle dang chu engti kawng mahin i hmu leh tawh ngailo ang le," a ti ve ta hmak a.

Juano mitah chuan vertherna chi tinreng leh huatna a lo lang chhuak a. Manolito lam a hawi a, an mahni tawngin a bia a.Manolito chuan a lo ngaithla ran a, nakin deuhah chuan a lu a thing a. A hma aia vin zawkin an in be leh a, mahse Manolito chuan a hnial leh ta a. "Manolito hnenah min nghaisak vak a rifle ka dahna min sawitir turin a dil ang a, Manolito hian a remti lo anih dawn hi," Green-a chuan a ti riru a. "Kei leh hmeichhia hi min chhuah la, rifle awmna ah chuan ka hruai ang che," tiin Juano chu a dil a, Juano chuan phawk fe a a en hnu chuan a remti ta a.

Manolito-an thah a dil a remtih tak loh khan awmzia a nei ta lo. Silai dahna hmunah chuan Green-a leh hmeichhia hi a that ang a, silai chu nei mai dawnin a inhria a. Barbara hi nupui tha tak ni tur chuan a cherin a chak tawklo in a hria a, thah mai pawh pawi a ti tawhlo a ni. Anni pahnih a thah hnuah silai chu a nei mai dawn a ni. "Ka remti e, silai awmna chu min hrilh dawn nia," thawveng takin a ti a, Green-a chuan "Ka thusawi i hresual a ni maithei, silai awmna hmunah ka hruai ang che ka ti anih kha," a lo ti a. Juano chu a thin a ur kher mai. "Tunah hian ka that nghal mai thei che a ni," a han tih chuan Green-a chuan "Chutia min thah nghal mai chuan silai chu i nei hauh lo ang," a ti thuai a, Juano mitmeng chu ngun takin a en a.

Juano hlemhlet zia leh a u, Manolito ngei pawh chu hruaitu anihna a itsik a ni tih chu a hre thei a, silai sawm lai nena a ropui theih dan tur chu amah a inhriat aiin a hrechiang zawk a ni. Thinur tak chuan Juano chuan "I sawi tur chu sawi rawh, ka ngaihthlak lai hian," a ti leh a. Green-a chuan "Rifle ka phumna thlengin ka hruai ang che. Chu hmun kan thlen hunah chuan min phuarna hi min phelh anga, chutah chuan kan pahnih hian min chhuah tawh ang," a ti a. Juano chuan "Silai chu engzat chiah nge?" a han ti leh a, Green-a chuan "Sawm," a lo ti a, Juano chuan "Hmeichhe thleng nan chuan a tawk lo," a lo ti nghut a. Green-a chuan "Mahse, ka neih zawng a ni miau a, chu chu tawk i tih loh chuan tunah hian min that mai la," a ti ta a.

Juano chuan a tih duh tak tak mai chu thil hlauhawm tak a ni. Mahse "Naktuk zing khawvar veleh kan kal nghal ang, la bo nghal rawh u," tiin a hote chu thu a pe ta a. Juano chuan nula chu a tawmna pukah kir leh turin a nam phei dawr dawr a. Green-a pawh chu ban tha chak tak hian a rawn hnuk leng lawng lawng a, puanin pakhatah hian kut hnungkhirh leh ke phuar tlat chung chuan an nam lut phei rawk a, savun chungah chuan a bawk phei ta thlawrh a, a bul vela Indian awm ve te rim chu a chhe hle a, tawrh har a ti hle bawk a ni.

A riltam tawh tehlul nen rei tak chhung chu chaw pawh an pelo a. A beidawn tawh lamah chuan puanin kawngkhar chu a rawn inhawng a, Manolito chu a rawn lut a, "Juano nen sumdawnna kawng in sawi theih avangin a tha e. Hmeichhia hi Juano ta a ni a, nang venhim che bak chu engmah tih theih ka neilo a ni," a rawn ti a. Green-a chuan "Manolito, i venhimna hnuaia ka awm avangin ka lawm tak meuh a ni," a lo ti ve a. Manolito chu a rum nghut a "I mi ten ka mi te an that a, an luvun te an hih sak a, hmeichhia leh naupang te thlengin. An thlarau kha a awm hle hle thei tawh lova, an vak vel ruai a ni. Remna leh muanna hi kan duh ber a ni a, mahse hetiang thil a thlen chhung hi chuan remna chu a thleng thei bawk si lo," a han tih chuan Green-a chuan "Chung chu tih tawp theih a ni maithei a ni. Hun remchang kan la nei maithei asin," a lo ti a.

"Heng thu hi Juano pawh hrilh ve ang che. Ka mi te hian remna thu hi ka sawi thin avangin ka thu hi an pawm tawh lo a, reiloteah Juano hian Apache hi a hruai tawh mai dawn a ni," a ti a, a hmel chu lungngaihna in a khat a. "I huaisen hle a, nang ang hi i mite zingah an tam em?" tiin a zawt zui a. Green-a chuan bu nghauh pah hian "Scalp hunter chu ka ni velo alawm, Manolito," a lo ti a.

Manolito chuan chhanglet tawhlo in a kalsan ta a. Green-a chuan Manolito rinawm zia leh a dinhmun tur chu a ngaihtuah nauh nauh a. Manolito chuan a thutiam chu a bawhchhiat a ring lo. Mahse an chhuah hun chuan Juano hian a thu thu leh a duh ang takin thil a kal tir zel dawn tih chu hrechiang hlein a inhria. Green-a chu a thil tum te a hlawhchham loh nan a tawngtai a. Tlawlh chhete pawh a awmloh nan a theih ang tawka a fimkhur a ngai dawn a ni. Amah inven mai bakah hmeichhia a kutah a awm dawn tlat si a. Zan pawhin rei lam a pan ta bawk a, muthilh tha zawkin a hria a. Naktuka an hna turin a chakna la awm zawng zawng chu hman a mawmawh dawn tlat avangin mut hma a, a tha khek deuh a tum ta a ni

Zing khawvar tirh chuan Green-a chu warrior pakhatin a rawn sawi harh a. Reilo teah chuan Indian hmeichhe naupang pakhat hian sazuk sa leh chaw tam tawk hi a rawn pe a. He hmeichhia hi a la naupang bawk a, a hmel pawh tha thei mai awm a ni. Mahse a hnar bawng luattuk avangin a that tur angin a tha phak lo a. Buk pawna vengtu chuan vin zet hian hmeichhia chu a rawn au a, a rang a rangin a inthiar fihlim ta thuai a. Chupa chuan Green-a an phuarna chu a rawn phelh hnu chuan chaw leh sa chu tui ti takin a ei bawrh bawrh a. Green-a chuan a rilru te te in "He Juano lakah hian inches khat pawh ka tawlh tur a ni lo. Winchester rifle ka pek hma chu min thah a duh lo tihna chauh a ni," a ti neuh neuh a. A chaw ei kham chuan a iptea cigarette chu a tan kai chauh tihin pawna mah vengtu chuan thupe aw tak leh intithei tak hian pawna rawn chhuak turin a ti a. Green-a chuan "Kal a hun tawh em ni? Coffee pawh ka in dawn nange?" tia a zawh chuan a vengtu chuan rifle in a rawn tin a, a hmel han en chuan chupa chuan hun remchang hmuha han sawisak a chak hle tih a hriat theih a. Buk pawnah chuan Indian ho chu an lo inpeih vek tawh a. An hotupa lo kal hun an nghak ringawt tawh a. Juano lo chhuah rual chiah chuan Manolito chu a rawn chhuak ve a, Barbara pawh chu sakawr pawr zet chungah an hlangkai bawk a, "Thui chu an kal theih dawnloh saw," tiin Green-a chu a phun nang nang a.

A pawiti hmel chu lantir loh hram a tum avangin hmun dang a hawisan ta daih a. An din bialna laiah chuan a kal phei ve ta a. Juano chuan Green-a chu a lo melh vat a, a hmaia a thil inhnawih thar pawh chu Green-a chuan a hmu chiang khawp mai. Juano chuan "Hma i hruai tur a ni. Rinhlelhawm deuha i awm vaih chuan hmeichhia hi a thi hmasa ber ang," a ti a. A lehhawi zawk chhung chuan Barbara chu chung ho zingah chuan a laitak velah zamna nei hauh lo hian a lo kal ve a. Green-a a rawn hmuh phei chuan a nui sak a. Green-a chuan Juano leh a pawlte chu sawm panga niin a hria a. "Han beih atan chuan an tam deuh si a, tlanchhuahna hun lah chu a awm theih hmel bawk si lo. "Tihdan dang ngaihtuah ngun chu a ngaih dawn khawp hi maw," a ti rirlu nauh nauh a.

Rei tak an kal hnu chuan lungpui lian deuh bul hi an thleng ta a. A vel ram chu a zauin a pharh tha hle a. Zing boruak thiang tak leh mawi taka Green-a a hawikual lai chuan "White eye, vawiin ni anga boruak thiang leh mawi hi tuk dangah i hmu leh tawh dawn hauhlo ania," Juano chuan a lo ti a. Green-a chuan "Helai hmun hi a ni," a tih veleh chuan an sakawr chu an ti ding a, Juano chuan Texas tlangval chu sakawr chung atanga chhuk tur chuan a han zai zir a. Green-a chu sakawr chung atang a chhuk a, lungpui chunga a din thlengin a en reng a. Chuta tanga pen sawm emaw lai a kal hnu chuan Green-a chuan "Silaite chu helaiah hian ka phum a," a han ti a. Juano chuan a hote chu thu a han pe a, hmanhmawh tak hian an sakawr atangin an chhuk a, Green-a dinna bul lei chu an lai ta mawlh mawlh a. Juano pawh chu sakawr chung atang chuan a rawn chhuk a, an thil laihna bulah chuan a lo kal ve a. Thuk vakloah chuan thingrem, a pawn a Winchester Repeating Arms Company tih hi a lo inziak kalh a. Nghakhlel takin thingrem chu an hawng a, silai pakhat chu an la chhuak a. Juano chuan intithei takin silai chu a la a, Green-a hmachhawn zawng chuan "Silai te chu heta hi an awm e. Kan insumdawn tawnna chu a tawp ta," a tih lai chuan Green-a chuan "La tawp chiah lo e," a lo ti thuai a.Texan tawngkam chhuak, muang leh fiah tak si chuan thildang ngaihthlak tur a la nei tih Juano chu a hriattir a. Green-a hmel zahawm tak chuan Juano hmel rawng tak chu a rawn luahlan leh ta a.

Green-a chuan "I ngaih ang ngawt hian ka â lo ania, Juano, khang rifle te kha thir tlang awm khawm satliah ringawt an la ni," a han tih chuan Juano hmel chu a rawn dur leh ta khuih mai a. A hote chu an hotupa hmel landan atang chuan an lo inringin, Green-a chu an rawn pan hnai sauh sauh a. Juano chuan "He kan mingo meng rang pa hian zawimuanga thih a duh em ni? A muang thei ang bera sawisak hlum a duh em ni?" a ti tun tun a. Mahse Green-a chu a lo nui mai a. Hetia a chezia hian Juano pawh a thinur tur angin a tih thinur theihloh phah a. A pasaltha te hmaah mingo in heti taka a ti thinur ta mai hi zahthlak hlea a hriat avangin a inphah hnuai leh deuh a,"I thil tih awmzia hi sawi vat rawh," a rawn ti ta zawk a.

Green-a chuan a bul lawka thingrem kawk pah chuan "He thingrem hi ka phum hma in a firing pin zawng zawng hi rifle atangin ka la chhuak vek a, ram dangah ka phum bo a ni. Insurance policy atan a tangkai ka rin vang a ni," a ti a. Manolito chu a rawn tawngchhuak ve ta a. "He mingo pa hian Apache hi min finkhalh vek a ni," tiin Juano chu anmahni tawngin a hrilh ta a. Hei hi camp an chhuahsan atanga a vawikhat tawng chhuahna a ni. "Kan inhnial bur bur lai pawhin hlim takin a nui thei a, kan mipui te hmaizah vang ringawt pawhin he tlangval leh hmeichhia hi chhuah mai teh ang," a han tih chuan Juano chu a lo inrawlh vat a, mahse Manolito chuan a lo khap a.

"A tawk tawh. I khawsa zia hian kan vaiin awm nuamloin min siam tawh a, ngaithla la, zir rawh," a ti ta hmiah a. Green-a chuan an inhnial buai lai chu hmuhnawm ti takin a lo thlir a. Green-a lam chu rawn hawiin Manolito chuan "Engtin nge an koh che?" tiin a zawt ta a. Texas tlangval chuan "James Green,"tiin a lo chhang vat a. Manolito chuan "Coyote tiin ka ko ang che. Chu chu 'Fing lutuk' tihna a ni," a han tih chuan Green-a chu a lo bu nghat a. An chawimawi hle niin a hria a ni. Manolito chuan "I sawi duh zawng zawng chu sawi rawh le," a ti ta a.

Green-a chuan bu nghauh chung hian "Tunah chuan hmeichhia nen hian saw lam pan sawn kan kal tawh ang," tih pah chuan an awmna atanga chhim lam chu a kawk a. "Nang leh i pasaltha te zawng zawng hi hetianga signal ka pek hma loh chuan hetah hian in awm reng tur a ni," tih pah chuan a iptea rawmawl chu a phawrh chhuak a. A lu chungah a han vai lap lap a. "Hetia ka rawn vai hunah chuan firing pin te chu ka la chhuak tawh a, awlsam taka hmuh mai theihin lungpui chungah ka dah tawh a ni tihna a ni ang. Chuta tang chuan hmeichhia nen hian hmalam panin kan tlan zel tawh ang. Tichuan in silai chu in nei thei tawh ang," a ti ta a.

Juano chu thinrim takin a rawn pen chhuak a, "Silai te chu ka ta tur a ni. Hmeichhia hi ka ta a ni ang bawkin silai te chu ka nei vek ang. Manolito ka sem ve lo ang," a rawn ti a. Apache hruaitu Manolito chuan chan neih ve chu a tum hauh lo a. Green-a chu a han en a, "I sawi ang chiah chuan i ti ang maw, Coyote? A bak engmah a awm tawh lo ang chu maw," a ti leh a. Green-a chuan "Ka sawi ang ngei chuan ka ti ang. Hmeichhe phuar hi phelh ula, kan kal nghal ang," a lo ti thuai a. Barbara Davis chuanna chu an rawn kai phei a, Green-a bulah chuan an phelh ta a. Green-a chuan he Davis-i chuanna sakawr hian thui tak a tlanpui theihloh tur zia chu a hmu tlang reng a. Mahse an hun neih leh an hmanraw neih a nih miau avangin tlan chhin phawt chu an tih tur awmchhun a ni bawk si. Silai te an khawm hnu chuan Juano hian a rawn um ngei ngei dawn tih a hre reng a. Tunah pawh hian Manolito a zah vang chauhin amah chu a zuah tih a hre reng bawk a. Manolito chuan chhim lam kawk pah chuan "Kal rawh ule," tiin thu a pe ta a.

Green-a chuan chibai buk nan a kut chu zah takin a phar chhuak a. He Apache chapo tak hi ngainatna riau a nei a, a bula ding Juano erawh chu ngainat theih loh khawpa sual leh mingo nena inremsiam duh lo khawpa sual a ni thung Nula hnenah chuan "Nghet takin sakawr chungah khan chuang la, hawi kir reng reng suh," tia a hrilh hnu chuan "I inring em?" a han ti a, a lu a lo bu nghat a, a in pet ruh hle bawk a. Apache ho sakawr buai ram ramna tur khawpa ringa a au hnu chuan a lukhum chu Barbara chuanna sakawr beng bulah chuan a va zap fua a.

Chutih lai chuan a sakawr dum lian zet pawh chu chak zet hian a lim chhuak puat bawk a. Karloah chuan Apache lak atang chuan hla fe an tlan hman ta mai a. A rei leh deuh hnu phei chuan Indian ho chuan hla taka dum nel nel pahnih leh vaivut an pal khuk chauh chu an hmu thei ta a. Hmun rem chin an thlen chuan Green-a chuan a sakawr chu a ti ding a, an sakawr te hian chakna an mamawh dawn chauh tih a hre chiang em em a ni. Nula chuan "Mr. Green, khang ho hnenah khan rifle te chu i pe tak tak dawn em ni?" a han ti a, Green-a chu a nui sak a, "Ka lo tiam tawh a ni lawm ni kha?" a ti mai a. Barbara hmel chu a dang daih mai a. "Tichuan pawisawilo tam tak an that leh anga," a lo ti zui zat a. "Eng ang mihring nge maw i nih le?" tiin a zawt zui a. Green-a chuan "I rin ang loh mi hi ka ni ang. Silai barrel zawng zawng kha ka hnawh vek alawm. Kal chak deuh rawh," a ti leh mai a. Hmun zawl tawp lam an thlen dawn tep chuan Green-a chuan sakawr chu muangchang hian a kaltir leh a. A sakawr atang chuan a chhuk a, lungpui hnuaiah chuan a lut a, reiloteah catridge bawm ruak hi a rawn la chhuak a, a han thing ri rak rak a. Hmeichhia chu a nuih var var a, "Indian thian thenkhat te chuan an rifle an kah hunah chuan an phu zawk dawn zawng a nih hi," a ti a, "A hmasa berah Juano kha ni nghe nghe se ka ti hle mai. Tunah khawnge?" a ti a, puk kil lehlama a pistol paina leh a pistol chawp chuan a la chhuak a, a kawng bawrah chuan fual hnalh hian a pai nghal zat a, "Tunah chuan kan ziaawm hret tawh ta ve ang," tih pah chuan lungpui hnuaia a rifle thawlh chu a la chhuak leh a. Saddle a a dahna ah chuan a thawlh leh ta zan a. "Juano leh a hoten min rawn um vaih chuan an phu zawk zawk tawh dawn a ni. Silai ka nei tih hi an hre hauh si lova," a ti a.

Barbara thusawi ve pawh chu nghak chuanglo chuan a rawmawl chu a phawrh a, Indian ho chu signal pein a vai ta lap lap a. Rang tak leh chak takin an sakawr te chu a tlan tir leh ta puat puat a. Thlaler ram reh a ni bawk a, an thawm chu a tha khawp mai.

Green-a chuan nula sakawr leh a sakawr chu a thlunzawm zat a, hma a hruai a, chhim thlang lam hawi hretin a tlanpui ngat ngat a. Tunah hian Butterfly Stage Road a thil an in pekchhawnna station pakhat, Apache Wells an tih chu an pan mek a ni. An tlan pah chuan Green-a chu a hmeichhe hruai enin a leh hawi a, a sam chu a hnunglamah a phe vawn vawn a, a mitmeng chu thliin a chhem nasat em avangin a sen deuh ram a. Mahse fel tak leh nghet takin sakawr chungah chuan a thu a, amah man tu rawng tak leh rothap tak tak lak atang chuan he cowboy hian a chhanchhuak ta phawt chu a ni a, enge an an zel dawn zawng tuman an sawi thei rih lo. An kalna tur Tucson khua chu hlate khuaah a la awm si a, Green-a chuan an kalna tur chin hre rengin a sakawr Nigger chu kal chak turin a fuih sauh sauh reng a.