Apache Fighter-4

Rei tak an tlan hnu chuan Green-a chuan a hnunglam chu a thlir a.An kalna hnu hlataka vaivut khu rum rum chu rang tak hian a va hmu a.An inkar chu hla thawkhat hle mahse hmeichhe chuanna sakawr chu a hah tawh hle a,thlan tuiin a bual a ni ringawt tawh.A sakawrah chuan han chuang dun dawn se Nigger chuan zawh chu a zo teh meuh mai a,mahse pakhat ai chuan an rih zawk ngei dawn avangin reitak chu an tlan chak thei dawn lova.Chutih lai chuan Indian ho chuan an rawn hnaih hriau hriau bawk si.Chutia thil awm dan a ngaihtuah nauh nauh lai chuan Barbara chu khawthlang lam kawk pah chuan a te thawt a.

Green-an a'n en chuan khawthlang lam atang chuan anmahni rawn pan bawkin vaivut khu laih laih chu a hmu a.Texan tlangval pawh chu a phun nang nang a,"Khawilam atangin nge heng misual ho hi an rawn chawr chhuah ni ang," a ti a.A hnunglam chu a han hawi leh chuan a rawn umtute chuan an rawn hnaih ta hle bawk nen,"Min rawn hnaih ta hle mai a,"a ti chhuak ta a.Hmeichhe hnenah chuan,"Lung hmun lam khi pan rawh,"a ti a.An dinglam pangah chuan lungpui lian pui pui hi a insir khup a.Chung lungpui inkarah chuan Cuctus lian pui pui a to bawk a. Bihrukna hmun tur tha tak tak pawh a awm thei mai ang.Barbara leh a sakawr te nen lungpui phen tha tak hnuaia an awm hnu chuan Green chuan a pistol chu an sawi thawl deuh a,a rifle ah pawh a mu te a load mawlh mawlh a.

A lu a thing nar nar a.He hmun chhete hi theihtawp chhuaha tan khawh nan hman a tum a ni.Man a,hrehawm tinreng tuar a,amah leh a hmeichhe chhanchhuah hi an thah ai chuan a tawp thlenga tan ral raih tum chuan a inbuatsaih a.

A mit var tak chuan chung ho hnihte pal khuk vaivut van sanga a insuihfin chu a hmu reng a.Apache hoin an rawn umna lamah khan yard zanga laia hlaah an la awmin a hria a.

An ding lampangah chuan midang lo kal tharte ho chuan anmahni chu an rawn pan mek bawk a.Chu mite ho hnih chu in hre tawn ang hrimin an in pan ngat ngat hi a ni ber a.Green-a pawh chuan a Carbine Rifle chu rem takin a nghat a,a kah apiang chhiar theih zat zat a tum bawk a.Chutia a nghah reng lai chuan eng thil mak tak nge lo thleng ta le!Inrinna tur silai kah chhin pawh awm hawt lo chuan chung ho hnih te chu an in kap ta zawt zawt mai a.Green pawh chuan an sakawr atanga an tla lai chu a hmu a.Chung war party te chuan ho thar lokalte chu an beih tak avangin an veilam hretah chuan an tawlh liam a.Green-a chuan ho thar lokal te chu mingo bawk an ni tih chu a hre ta a.

Mingo ho chuan chak taka lungpui hmun pan pah chuan an silai chu an hmet puak zawih zawih a.An hmanraw hman a in that hleih deuh em avangin Indian ho chu an tanhmun atang chuan an tawlh liam tan a.Indian ho zinga pakhat chuan rifle thar tak pakhat hi a rawn hum a.Chu rifle chu hman tum a a han kah chuan a kaptu pa chu hnunglamah a sakawr chung atang chuan a vawrh thla dawrh a.A thiante hovin Green-a thil tih dan an hriat leh an mit ngeia an hmuh chuan an thinrim chu a nasa leh zual a.Tichuan hmun biru lamah reilote atan Indian ho chu an insaseng ta rih a.

Mingo palite chu tlan chung zelin Green-a awmna piah lungpui phenah chuan an rawn ding ve chawt a.Chung mi palite chuan rang takin tanhmun an siam sawk sawk a,Indian ho lokal lehna tur lam nia an rin hawi chuan an silai chu an lek far hlawm a.Apache hote chuan an thil tihdan leh an silai hman that dan te an hriat reng avangin chuti mai chuan an rawn beih leh Green-a chuan a ring lo.Lokal tharte chu eng ang mi nge an nih Green-a chuan chian hmasak thain a hre ta a.

Sual hmel tak tak an ni a.An zinga pakhat phei chuan Green-a chu a vaihlo hmuam lang hung chuan a lo nuih a. Chupa chuan,"Enge i an?Kan rawn chhanhim hman lo thelh che u alawm le," a ti a.Green-a chuan,"Chutiang chiah chuan ka lo ngaihtuah mek a ni.Helam pana in lokal hlauh chu kan tan vanneihthlak tak niin ka hria.Khawi lam pan tum nge in nih a,enge tih in tum?"a ti a.Chupa chuan,"Thil engemaw tiin kan ram chhuak alawm mawle,"tih pah chuan a ban a rawn pharchhuak a, "Shilloh tiin min ko thin.Tin,ka bula mi hi Quincy-a a nih hi,"a ti nghal a. Green chuan, "Ka hria e,"a ti mai a,a ban rawn phar chhuak pawh chu a ngaihsak zui hauh lo.Platt-a chuan Buckin kawr a ha a,stetson lukhum a khum bawk a. Apache ho bun ang pheikhawk a bun bawk a.A chemte paiah chuan Apache hman thin chemte sei tak hi a inthawlh zan bawk a. A pistol painaah chuan Army Colt hi a inthun zan bawk a.

Green chuan a rilru te tein,"He pa chu halfbreed a nih hi.Midangte pawh hi Sculphunter an ni,"a ti a. Tawng pangngai hian,"Ka hming chu Green-a a ni.Jim Green min ti bawk thin.Nula hming hi chu......"a tih lai chuan Platt chuan,"Tunge a nih ka hria.Kan hriatsa reng sawi chhuak tur chuan kan phut lo che,"then deuh sak chung chuan a lo ti a.Green chuan chu Halfbreed thusawi chu lawm lo mahse hlim hmel put a tum hram a,"Ka hrethiam hauh lo mai che u.He hmeichhia hi in hria maw?"a ti leh hram a.Platt chuan,"Green,chutianga min chhaih buai chu tum duh suh.He ram chanve ngawt hi he tiang rual hmeichhia Indian ho ruk bo zawng hian an phe huai huai alawm.Chiricahua rual in an um che u a,he nula hum tum a i tlante leh he nula hmel atang ngei pawh hian ka thusawi chu a dik i ti ve mai lo maw?"a ti ngat a.An zinga pakhat chuan,"Mrs.Davis nula i ni em?"a rawn ti a.Thu rawn sawitu hi naupan hmel tak,kareh zau tak leh hnar var harh mai a ni.A sam chu a tle sar bawk a.38 chu a hmalamah a hian a pai bawk a.Green chuan heng mi palite hi an chanchin Governor Bleke-an a sawi kha an ni theih maite a ring deuh a.Mahse he tlangval la naupang tak tel ve hian a ti awmlo deuhin a hre bawk si.Mahsela William Bony pawh a landana naupang a ni na a,chu chuan rawlthar tam tak a hruai sualin amah ngei pawh Billy the Kid niin Killer ropui leh hmingthang berah a tang thei tho.He naupang tak tel ve pawh hian Bleke-a thusawi a ti dik lo chuang lo.

"Green,i lu kha i ven ngun deuh a ngai ang,"Platt chuan a rawn ti a.Green-a ngaihtuah hria niawm tak hian,"I thiante khan min rawn beih leh duh hmel hlein ka hria,"a ti leh a.Ring deuh hian,"Quincy,ka tawng chu i hria em?"a ti a.Hla deuh hleka palian awm chuan,"Hria e,"a rawn ti a.Mahse chu hmel chu Green chuan a hmu thei lo.A inchei dan atang chuan pa tawp tak chu a ni phawt mai.Pheikhawk a bun a tang chuan Mexican-ah pawh a rothap pawl a ni tih a hriat a.Thawmhnaw mak tak a inbel a.

Green chu hmeichhe awm na lamah chuan a va kir leh a.Nula chuan,"Mr.Green,heng mite hi tute nge an nih hlawm?"a lo ti a.A tawngkam chhuakah chuan hlauhna a neihte chu a lan chhuah loh nan thup hram hram a tum tlat a.Green chuan thlamuan tum taka nui chung hian,"Apache zawng an ni lo phawt mai a.Chu chu an nihna tak ni mai awm ani.Thudik tak sawi takah chuan heng ho ai hi chuan setana hian silaite hmang theia a rawn awm ve chuan a lama tan ka duh zawk.Heng ho lam a tan ai chuan,"tih pah in nula dar chu a beng thak thak a,"Thlamuang tak in lo awm phawt la,engmah enghelh suh.Inkahna a lo awm leh reng reng in ilu hi lo veng tha phawt mai ang che,"a ti leh a.Barbara Davis-i pawh chuan a hlauhna te chu lantir loh a tum tlat a,a kir leh lai pawh chuan hlim awm taka nuih a tum hram hram a.

Green-a chuan lungpui phen a thlen leh chiah chuan lokal tharte chuan an sakawr pakhat chunga thil intel khawm a hmuh chuan a mit ala ta hle mai a. Chu thil tel khawmin a thin a tih rim zia chu a hmelah pawh a lo lang ta.Rinhlelh rual lohin chu thil tel khawm chu Apache ho luvun tel khawm a nih a hriat theih a,"Sazu bawmah zawhte kan khung dawn ta a nih hi le,"a ti nauh nauh a,"Kan inthiarfihlim thei dawn si lova,a pawi dawn kher mai,"a ti zui a.

He Texas tlangval hian hmeichhia leh naupang thah leh mahni in veng thei lo thah hi a chin ngai loh a nih avangin a hre thiamlo hle a ni.Mexico rama thisen chhuah chak ngawih ngawihte tih atan pawh zahthlak in a hre thin,mahse an ti mek tho si. A bul lawka awm Shilloh chuan Green-a hnenah chuan,"Engtinnge nula chu a awm zel?"a lo ti a.Green chuan,"A tha e,"a ti mai a.Platt chuan a thiam ang tawk tawk chuan fiamthu a thawh a,a nui huah huah a."Engtizia nge ni kan hmeichhia te reuh chuan ama buk hen rangkachak hlutna a neih tak le? Ka thil hriat mak pawl tak a ni," te a ti a, sawi zawm zel tuma a an lai chuan an thianho zinga palian ber chuan "Helaia hi a lo kal leh ta," a tih tak avangin a tawp chawih a, Apache ho pawh chu an lo lang leh tan ta a.

Tun tum chu ke in an lo kal tawh a. Hmun hrang hrangah an inthen darh avangin kah vel pawh an harsa hle a. Chak fe hian an rawn tlan hlawm a. Quincy an tih chuan "Nunrawng ho, lo kal zel teh u," tih pah chuan a rifle chu a hmet puak zawt zawt a. Indian pakhat chu a ke ah a kap a, a let tawp tawp a. Pakhat dang leh pawh chu ke nei lo ang mai hian a zuang han tla leh chu a hlawm thla chiang kher mai. Pahnih dang te pawh an let tawp tawp a, an thih chian hmel kher mai. Silai mu chu an lu chung lawk lawkah a ving fua fua a, thal fang te pawh chu lungpui leh lungpui inkarah te chuan a rawn bur chawt chawt bawk a.

Thingbuk atanga feet sawmnga leka hlaah chuan Indian palian zet hi a rawn zuang chhuak a. A thinur chiar nawk nawk pawh chu feet sawm hnih pawh a tlanpui hma chuan silaimu chuan a rawn ti reh chiang kher mai. A piah thing buk a thlen leh hma chuan a let tawp a. Shilloh Platt-a hma lawka lungpui pawh chu a rawn khem hlawk a. A thinur chuan a silai chu a load sauh sauh a, rang takin Apache la dam chhun pawh chu leiah an let tawp tawp a, an bo zo ta diak a. Reiloteah chuan sakawr tlan thawm an hre ta a. Chung sakawr pariata chuang te chuan chu an tawmna lungpui hmun chu chak fahran hian an rawn pan a. Sakawrah chuan an bawk phek tlat a. An rawn tlan pah chuan an silai chu an rawn kap fur fur a. Lungpui hmun an rawn hnaih deuh chuan an sakawr atangin an zuangthla a, lungpui chungah chuan an rawn chuangkai ta mai a. Ni a sa in an thlan te chu a tla nasa bawk a, an vun te chu a tle sur mai a. An rawn thleng hnai hle tawh tih chuan kah chimih vek tuma an inrin lai chuan Green-a chuan la kap rih lo turin thu a pe ta tlat a. Feet sawmnga leka an awm takah chuan kah thu a pe ta a. Chu veleh chuan an rifle chu an theih anga rangin an hmet puak ta char char a. An rifle an kah ruah hnu chuan an pistol te phawiin an kap leh ta zawih zawih a. An in hnaihchilh tawh em avang leh Indian ho chu an lan chian em avangin pistol a hman chi tawh reng a ni.

Thihna ruah, silai mu chu tawrh zawh rual a ni lo. A la dam chhun te pawh chu hmun him lam pana tlanchhiat mai loh chu tih tur dang an nei lo. A tlanchhia te pawh chu khawngaihna nei miah lo silai mu in a um zui zel bawk a. Reilote ah chuan a reh leh ta vawng vawng mai a. An silai khu vung vung tih mai loh chu inkahna a awm tih hriatna tur pawh a awm ta lo.

Green-a chuan,"In in ti na hlawm em?"a ti a.Shilloh chuan,"Anmahni tih mai loh chu kan awm lo a ni ang,"tih pah chuan Indian ho let reng chu a kawk a,"Pasarih lai chu ka chhiar thei,"a ti leh a.An zinga naupang ber chuan,"A tirah engzat nge an nih Mr.?"a ti a.Green chuan,"sawmparuk emaw sawmpasarih emaw an ni ang,"a lo ti a.An palian ber chuan,"Kei leh Quincy ringawt pawhin engemaw zat chu kan that ani lawmni,Quincy?"a rawn ti a.Pa hmui hmul chhar mai, lungpui phena fimkhur taka hla tak en reng chu Green-an a hmuh chuan Quincy tia an koh chu a ni tih a hre mai a.

He pa hi kum sawmthum panga mi vel a ni.Mahse a hmai ser nasa tak avang chuan a kum aiin a lang upa zawk a. A hmai ser chu a chal tawp veilam atang chuan a intan a,a mithmul then phawkin,a khabe hmul pawh tlem a zawng chu a zuk then leh hial a.Chu chuan a ti lang upain a ti hmel hem hle a ni.He pa hian Army ho hak thin kekawr dumpawl a ha a.A khel dinglamah chuan pistol hi a pai zar a,chumi buk tawk tur niawm tak chuan a khel veilamah chuan chemte lian tak Bowie Knife hi a pai bawk a.Green chuan he pa hi a hmuh fo tawh thin leh a hriat tawh thin niin a hria.A'n ngaihtuah vang vang thin a,mahse khawi hmunah nge a hmuh chu a hre chhuak zo ta chuang lo a.

"Kan ti tha hle mai,Tucson.Mi pasarihte bakah midang pahnih kan thah belh leh tawh.An vaiin pakua an ni tihna a lo ni ta a.Sawmpasarih zinga pakua kan thah tawh chuan a dang chu eng han ti thei tur an awm tawh lo tihna a nih chu,"a han ti a.An zinga naupang ber Rusty an tih chuan,"Quincy,i tidik ang. Che thei tur an awm tawh loh avangin an tlan chhe ta mai alawm,"a rawn ti bawk a.Indian ho hian hneh an nihna hnuhma hi hmuh an duh lo reng a.Rang takin an inthiarfihlim thin.

Mahse rei tak chu an rial hauhin a ring lova,Green chuan an tlanche tur a hmuh khan an zinga hotupa ber Juano an tih khan "Phuba ka rawn la leh dawn.Tuna kan inbeihnaah hian ka hloh rih a ni mai a,kan indona hi ka la bansan chuang lo.Ka rawn timit vek dawn che u,"tia zaizir a arawn sawi a hmu a.Tun atang chuan Juano hian langsar taka chet a tum tawh reng reng a ring lo.Apache ho tihdan dik takin an inrin loh laia beih thut bakah ambush tein a bei tawh zawk ang a.

An chan a that dawn chauhin an bei tawh bawk ang Texas tlangval hian tunah rih chuan Chiricahua ho lak atang hian an fihlim felin a hre tlat lo a.Mahse Shilloh Platt-a thlir dan chu a ni lo thung.Hlim awm takin a dul a beng thup thup a.Engmah veng thawng leh hlauh pawh nei lovin lungpui chungah chuan a rawn ding chhuak a. Vaivut zinga let reng Apache ho ruang chu pan tumin khawi ber nge ka pan ang ti niawm takin a ending bik a.Mahse chutih lai tak chuan,"Che sawn reng reng suh,"tih thu pek a hre ta a.

Shilloh Platt chu khawih her sawk ang mai hian aw lo chhuahna lam chu a her thuai a.Midang pathumte chu che thei lo ang hrim hian an ding tlat a.Chu thu pe tu aw chu zawi hle mahse thu tawp a ni.Zawm loh chuan thihna pawh a awn tih a lo ngaithlatute chuan an hre chiang hle a ni.Shilloh-a hlim hmel leh mitmeng pawh chu a dur khuih a.

"Green,engtizia nge?"a tih lai chuan Green-a chuan,"Lu vun khawnkhawm zel tumna in nei a nih chuan tun atang khan theihnghilh nghal hmiah rawh,"a lo ti vat a. Tun hi Shilloh Platt hian a hmaa ding a hmachhawnna hmasa ber a ni.A lo ngaihdanin Green hi cowboy satliah ve mai,a vanneih deuh bik vanga hetia Barbara-i va hruai chhuak thei maiah a ngai mai a.Mahse tunah chuan a mitmeng chu hlauhawmnain a khat ta niin a hria a.A pistol paina kawmte pawh chu inring hliah hliah hian a hmu bawk a. Tichuan a thiante ngaih dan hriat tum ni awm tak hian an en kual vel a.Quincy-a ngaihdan lak tum deuh bik niin a lang a.Green chuan,"I thiante pawh hi an rawn in rawlh ve maithei a,mahse nang chu i thi hman tho ang Shilloh. Ka sawi ang chiah hian ti la,kan zingah hian rawn kir vat mai rawh,"a ti leh a.

Shilloh Platt chu ala ding cheu a,ngawi reng leh che hauh lovin thil awmzia chu a ngaihtuah a.Green-a thu sawi chu thu tawp zawng a ni ngei mai. Mahse vaupung na mai mai a ni ve thei bawk.Tun hi he tlangval mize dik tak lanna tur hun leh fiahna tur hun remchang niin a hre ta a. Green-a mize dik tak,Gunman a nih leh nih loh te,silai pahnih hi Indian ho rikrapna atana pai mai mai nge a nih leh a hmang thiam tak tak em tihte finfiah na remchang tak ani ngei ang. Shilloh-a hian Green-a chuan a silai pai te hi a hman thiam chu a ring na meuh mai. Mahse thupek hmu tu a ni lova,a tlawmngai tlat..

A hote hmaa thupek a hmuh khan a kir tir thei tawh lo. A kut chu a pistol kawm lam hnaih chuan a phar thla ta thu thu mai le. Green chuan che miah lo leh ngawi rengin a lo en a. A che vel chu pakhat mah hmaih a nei lo reng reng. Tin,chu Halfbreed chet dan lo do let tur chuan a in ring em em bawk. Platt-an a pistol kawm a vuan tep tih in chu boruak rit leh sang tak chu Quincy-a rawl ring tak chuan a rawn ti buai ta a," Shilloh,i silai kha chuh hauh suh. I hmaa mi kha Texas Outlaw,SUDDEN-a an tih kha a nih kha,"a rawn ti ta a.

SUDDEN tih hming an hriat chuan Platt-a chu mak ti in a meng val tawp tawp a. A mak ti lutuk chu a ka hau mai bawk a.

Sudden,mi huaisen leh phawi rang rura lutuk thawnthu ngaihnawm leh tak tak pawh ni thei lo tur khawpa ngaih,helai chhimthlang rama hmingthang em em a lo hma chhawn mai bakah alo draw ve tep mai chu mak a ti thar ta thut emaw tih mai tur hian a kut pawh chu a la sawn ta daih mai a. Chutih lai pawh chuan Texas tlangval chuan chu Halfbreed lak atang chuan a mit ala sawn chuang hauh lo," I awmna hmun a kir leh tur in ka hrilh tawh che kha,"a ti leh ta a. Platt pawh chuan,"Tehreng mai,"tih pah chuan a awmna lam pan chuan a kir ta nghal a.

A thinur na leh huatna kha a reh ta tih na a ni hauh lo. Mahse thupek a hmuh ang khan a ti lo thei silo. Green chu a inthlahdul hret a. Quincy lam chu a hawi ta a. A mitmeng a hlauhawmna lang chhuak kha chu a la reh fel chiah lo."Min hria a ni maw?"tiin a zawt a," Hre teh reng mai che,Sudden. Nang pawhin min hria ang, Texas rama Fort Griffin kha ngaihtuah la, khatih hunlaia Surgeant Quincy kha ka ni,"a rawn ti a. Green chuan thil kal tawh an ngaihtuah kir zung zung a. A hmel hmuh tawh thin,ser awm lo leh hmui hmul pawh nei ngai lo, Quincy, Infantry 6th Cavalry-a mi kha a ni tih a hre chhuak ta a.

A nun a rawng lutuk a, tang thar pakhat a lo sawisak hlumthelh avanga sipai atana an ban tak kha a ni tih a hre chhuak ta zel a. Army Scout-a a tan laia hemi nen hian tum khat an lo inhmu tawh tih a hre chuak ta zel a. Chu Sculphunter hnenah chuan Green chuan," Ka hmuh che khan i hmaia khatiang ser kha a awm ka hre tlat lo,"an ti a." Engtizia nge ni ta aw?"a ti zui a. Quincy chu za lo deuh hian a then suk a, "Indian ho zawng zawng hian namen lovin min lo bei ve a, min that thelh nghe nghe alawm,"a ti mai a. Ngundeuh hian Green chu a en vel a. Chutih lai chuan nula chu a tawmna atangin a lo chhuak a, an zingah alo kal ve ta a.

Quincy chuan zalo chunga hlim hmel put tum tih hriat tak hian," E, nula, min rawn zawm ve tak teh khai. I thianpa Sudden-a hnenah hian Apache hovin min tin san lai hian kal chhuah vat a tha e,tiin thu ka lo rawn mek asin,"a ti a. Nula chuan," Kan hnenah in lo kal ve zel dawn em?"a ti a. Quincy chuan," Nula,he ram hlauhawm tak hi mahni chauha pal tlang tum chu i mumang lamah pawh ila man ngai ka ring lo. Chubakah in nunna kan chhanhim hnu hian i Gunfighter thianpa hian a lawmman dawn tur hi a ui deuh dawn a ni awm a. A ni lawm ni?"a ti a.

Shilloh hian awmze nei tak hian hmeichhia chu a lo melh a," A tu a mah hi in tina lo ila,kan duh a ni lawm ni Green," an ti a. Sudden chu bung vat hian," I thu sawi ah fimkhur deuh a tha ang. Ka thinur a chhuah hlauh chuan i lu kha ka thlawh bo dawn sia," a lo ti a. Shilloh chuan,"In beng dai rawh Sudden, kan zinga pakhat emaw, pa hnih emaw chu i that thei ang. Mahse kan that tho tho ang che," a lo ti a.

"Chubakah kan Apache ho khan min rawn bei leh ngei dawn a, nangmahni tanpui thei tur leh hum thei tur i nei hi lawmthu sawi tur i niin ka hria. Engmah harsatna siam lovin i lawmman dawn tur hi hmun nga athen remti mai la a tha ang,"a lo ti a.

Green-an a chhan hma chuan Barbara chu a lokal chhuaka, Green-a hma takah chuan a rawn ding a. A thinrim hmel chu hlauhawm ve tak a ni. A mitmeng mawi tak pawh chu thinurnain a khat a," Eng lawmman nge an sawi hi?" a rawn ti a. Quincy chuan tim deuh dui hian," Nula, chu, hrilh pawh ala hrilh nache nge?"an tih chuan nula chuan a lu alo thing nar nar a," Nang ka be lo che," tih pah chuan a ke a per tarh a," Mr. Sudden-a hian a hruai sual tawh che niin a lang. Thudik pawh a hrilh loh che hi. I pain nangmah lakkir leh nan che hian dollar sangnga a tiam a, chu dollar sangnga chu Mr.Sudden-a hian amah chauha neih a tum a, a ni lawm ni, Jim?"a han ti a. Texas tlangval chuan a chhang hauh lo. Shilloh chuan a lo nuih a," A tum chiang a ni. Mahse thiltih sual pakhat a nei. Apache ho kha mahni chauha hneh a tum a. Mahse a ti dik lo tih a inhriat vangin keini ho hi him taka i pa hnen i thlen theihna turin min hire ta a ni,"a ti ta zel a.

Barbara darah chuan a kut a nghat a. Mahse Barbara chuan a lo duh hauh lova, a paih thla dawrh a. Shilloh pawh a lawm chiah lo. Barbara hian he pa hi a tan a tha tawk lo em ni? Mahse Shilloh chuan hun remchang a la awm ang a, chung hunah chuan a khawngaihna a dil ngei a la ring tlat a ni

Quincy chuan boruak tih zangkhai tum chuan thiamlo deuh chung hian fiamthu ka thawh e a ti a, "Shilloh Platt hi ka chiahhlawh a ni a, kha laia pa lian pui kha Tucson-a anih kha, bawng lianpui chak tak leh chhawr nahawm tak ania," a rawn ti a. Shilloh pawh chuan "Kha laia hmai ser ruah kha Quincy, pistol leh chemte hmang thiam tak, tharum ringawt pawhin sakawr ang maia chak a nih kha. Tin, helaia tlangval hi Rusty ania," tih pah chuan "Rusty, lo pen chhuak la, nula hi han inhmelhriattir ta che," a han ti a.

Mahse, Rusty chuan lu thin pah hian "Chu chu a tawk mai," a lo ti a. Platt bawk chuan "Kan pawlah hian mi thar a la nih avangin i ngaihthiam a ngai rih a nih chu," nula hnenah chuan a ti zaih a. Nula chuan mak tih vanga lu thing nar nar pah chuan "Mr. Green, khawngaihin thil awmzia hi min hrilh thei em? Engti zia nge heng ho hian 'Sudden' tia an koh che?" a lo ti a. Quincy chu inti thei takin a lo nui a. A hmai ser chuan a nuih pah chuan a hmui chu a kai sawi tlun mai a. Nula hnenah chuan "Mr. Green-a hi nula, Texas ramah chuan wanted a nia, nangmah chhanchhuah tuma a lo kal chhan pawh hi a lu man nuai bo tumna atana tih anih hi ringhlel hauh suh. Tangka hian thil tam tak a ti thei si a," a han ti zui leh a. Barbara Davis-i chuan ngun leh zualin Sudden chu a han en a, "Min tanpui tura lo kalah chiah ka lo ngai che asin le," a han ti a. Texas tlangval chuan "Chu chu ka tum tak chu a ni," a ti ve bawk tak na a, Barbara chuan "Aw, chu zawng ka ring thei ta lo tawp mai," thinrim tih hriat tak maiin a ti ta a. Sudden chuan "Chutiang ngaihdan i siam chu ka ring bik hauh lo," a lo ti a, nula chuan "Engtin nge ka rin theih tak ang che? Nangni ho pawh hi engtin nge ka rin theih chuan ang che u?" a ti ta bawrh bawrh mai a. Quincy chuan ti fuh inti fahran hian "Nula, min ring emaw ringlo emaw, engmah a danglam chuang lo. Kan zingah i awm tawh si a," a han tih chuan Tucson-a, pa lian pui chuan "Nula, thlaphang reng reng suh, i pa hnen chu him takin kan thlen ngei ang che," a lo ti ve chuar chuar a.

Nula chuan," Ka pa hnen min thlen in tum a ni tih pawh hi rin harsa tak a ni," lungngai tak hian," Engpawh nise, in thu sawi chu a dik alawm. Tal chhuak thei pawh ka ni lova, duh thlan tur pawh ka nei chuang hleinem,"a ti a. Quincy bawk chuan," Nula, i pa duh ang ti hlawhtling tur hian kei ni lo midang tu mah an awm lo tih hi hre chiang phawt mai teh. Tah chuan innghat phawt mai rawh,"a rawn ti leh a. Nula pawh chuan chu thu chu dik a ti em em a, a ngawi ta reng a. Apache fin lehkhalh tur leh fin khalh tur chuan heng ho mi tawp leh rawng tak tak hi an ngai tlat. A pa inah lo leng a,nalh tak taka in chei leh kut no hlai ho tih theih chi niin a hre ta bik lo.Heng ho hi mirawng tak tak pawisak nei lo an ni. Chutiang chiah chuan tuna an awmna ram hi a rawngin a rothap a, pawisak pawh a nei bik lo. Apache ho in an rawn beih dan leh a hnu midang an rawn thah dante kha an ngaihtuah leh chiah a.Mahse a lungchhe mai dawn a hriat avangin leh ram harsa tak kar a seilian leh a pa pawh thil ti thei a nihzia te ngaihtuah ta zawk in a inti pachang leh a.

A hmelah pawh chuan chapona hmel hmuh tur in a lo awm leh ta a. "In chu mi thlen phawt mai ula,ka pa chuan in thil phut chu a pe mawlh ang che u," a ti ta a.

Barbara thusawi an hriat chuan Shilloh Platt chu a lawm hle a, a hmelah pawh chuan a lang chhuak a. Sudden lam hawi pah chuan," Sudden, a changtu ber chu i ni ta lovin a va lang ta em. Mahse a tha ber chu i chang tho dawn nia," an ti vel a. Sudden chuan," Drag ka chang a nih pawhin i enghlel lo a ni ang chu,"tia a lo chhanna chuan Quincy-a mak ti tak hnenah chuan," Drag tih awmzia chu bawng vulhtu ho hman danah chuan bawng khalh nikhuaa an hman danah chuan, a hnung bera kal tihna," a nih thu an hrilh a." Mr.Sudden-a hian a hnunglam atanga kan kah mai a ring deuh a nih chu," an ti zui a. Barbara chuan," Chutianga rinna chang a hria chu a demawm vak lo," a lo ti vat a.

Quincy-a hmel chu a lo dur khui khui a. Blackboard a chalk-a ziak, tuia han hrukfai ang mai hian a hlim hmel chu a bo hmiah mai a. Mahse a thinurna lantir lo tur chuan a insum hram hram a. Sudden chuan Quincy-a hmel danglam leh a thinur zia chu a hmu chiang em em a. Mahse a thinurna lam ngaihtuah chuan a punlun zel dawna a hriat avangin theihnghilh hram hram a tum a. Chu hmai serpa chu hun remchang dangah sawisakna hun remchang dang a neih theih a ring a.

Amah leh amah ala in khaihlum tir mai awm hi maw a ti nauh nauh a. Ring deuh zawk chuan," Tuna kan kal chhuah hi chuan Apache Wells thim hma in kan thlen hman ka ring. Mi an rawn beih hman pawh in inchhung ah kan lo tawm hman tawh dawn a ni,"a tih chuan an zinga tlangval la naupang tak Rusty an tih chuan,"Chu rawtna chu ka tawmpui e," a lo ti vat a. Green-a hmel chu hlim takin alo nuih a. Shilloh Platt pawh chu remti tih hriat tak hian a lu a lo bu nghut a.

Green hian thil awmze nei a sawi a ni. An silaimu te hi kiam thei lo a ni bik lova, a hmaa an rawn beih ang meuh a Indian ho hian an rawn beih leh vaih chuan an tawpna chu a dang zar tawh dawn a ni. Shilloh Platt chuan," Tucson, sakawrte kha han buatsaih la, hma kan hruai ang e," tih pah chuan Sudden chu then deuh sung chung hian a en a." Sudden, nang hnunglam dawl rawh le," tih pah chuan a nui vel a.

Hmalama Quincy kal chu an han umpha a, a rilrua thil thleng thei nia a ngaih chu thleng lo se a duh a ni ang a lu a thing nur nur a. "Quincy, a nuihzat thlak viau na a, Sudden-a hlauhthawn ang, hnunglam atanga silaimu rawn leng hi hlauhthawn a, ngaihtuah loh theih pawh a ni lo a, Enge i ngaihdan?" a tih chuan Quincy chuan," Sudden-a chanchin hi ka hre hnem hle tawh a. Mahse, hnunglam atanga mi kah ching a nih ka la hre hauh lo," a lo ti a.