Apache Fighter-5

Apache Wells hi William Buckley leh Silah St.John ten Butterfly state tan Station pakhat atana an siam a ni a. 1853 kuma an sak a ni.Indian ho leh midang reng reng pawhina an beih mai mai theih loh tur a rinawm leh thaa an sak a ni. Mahse he Butterfly Stage hi a dinna a rei tawh avangin khualzin ho riah buk a ni ber tawh. Station an tih a Bill Buckley-a Cottonwood thing a phun, lianpui lo ni tawh hnuaiah chuan chu in chu a awm a. Vawi tam tak he hmuna an awm lai hian Indian ho hian an lo bei tawh thin a. Mahse tun thleng hian an beih reng rengin an la hlawhtling ngai lo. A bang chhah tak takte hi tawng thei sela chuan Apache ho lo do let dan ngaihnawm tak sawi tur an hre ngei ang.

Mi panga te leh hmeichhe pakhat te chu chau tak chung chuan thing hnuai chu an pan a. An sakawrte chuan tui rim an hriat chuan an hnar an tum dut dut a.

Mi chuangte pawh chu an chhuk a, an lukhum in an vaivut kai te chu an vaw thawr thawr a. Kawngkhar lam pan chuan Quincy chuan a hruai hlawm a. Tucson chuan tukverh khawimaw lai atanga silai rawn ri te a awm takin tia sakawrte ngaihven vat tur a a hrilh lai la la chuan silai a rawn ri thawr a. A lukhum chu a rawn len lawp a." Enge ni ta!" tih pahin a pistol chu a chuh vat a. Silai lo rikna lam hmuh tum chuan a mit zim tak chu a len nghal ruai a.

"Che miah lovin khatah khan ding rawh u,"tih thupek chu inchhunglam atang chuan a rawn chhuak ta nghal a. Sudden chuan tukverh eng chau tak kara Savage Rifle bairel rawn lawr chu chiang takin a hmu mai a.Quincy chuan," Min kap suh. Mingo kan ni e,"a ti a. Aw chuan," Chiang taka ka hmuh theih na lai turah lo ding chhuak rawh," a rawn ti a. Rei vak loah chuan tukverha rifle rawn lawr chhuak chu a la lut zal zal a. Kawngka chu a rawn hawng ta a.

"Apache ho,hmeichhe rutute chu ka mikhual hauh lovang," a lo ti leh tlat a. Quincy chuan,"Mister i hriat sual anih chu. Apache ho laka kan chhanchhuah nula a nih zawk hi,"a tih chuan putar chuan an thu sawi a rin vang pawh ni chuang lo chuan a rum nghat a. Shilloh chuan," He hmun hi i ta em ni? Kawngte min kian in kan lut dawn lawm ni," a ti a. Quincy chuan," Mingo kan nih min hmu reng si a, engtizia nge min rawn kah kher," a ti leh a. Putar chuan," Mingo kawr hak thin chu ka hmu teh meuh mai. Chiricahua ho zawng ni ula,a thawi mai chuan ka rawn kap hauh lo ang che u le. Tin, khatiang mai mai khan tumah fuh a neih loh chuan a pawi teh chiam lo bawk.Indian hovah chuan ngai ngat che u ila chuan tuna tawng tur hi i awm hauh tawh lo ang," a ti chhar chhar a, "War Party nen kan inbeih avangin tunah thui tak kan rawn tlan tawh a, kan nula hruai pawh hi a hah tawh nawt ang. I remti......"Rusty-an a tih lai chuan chu putar chuan." Tehreng mai, tehreng mai. Engah nge in din reng ni? Rawn hruai lut vat rawh u," a ti ta sawk sawk a. Inchhungah chuan an in zui lut diah diah a. Inchhung rim chhe lek lek tawh chu putar meichhem leh coffee rim chuan a rawn luahlan ta vat a.

"Ka hming chu Eddy a ni. Tobias Eddy. Helai velah hian hna chhete ka nei ve a," a ti a. Rusty chuan phawk fe hian alo en a," Enge i tih? Helai vel hi Hostile in an khat tih i hre lo em ni?" a ti vat a. Eddy chuan,"Hre tehreng mai. Anmahni ka tawh chang pawhin ka hrilhfiah mai thin" a ti a.

"Tha taka an thil tih tur an tih theih hian an duh tawk mai a, min thlahthlam hmiah mai a, kei pawh in ka ti buai bik lo. In hriatthiam tawn na chu nei ila, ka lu vun chu sawi loh tuna tawng tur pawh hi ka awm nang," tih pah chuan a nui deuh sak a." Boys, ei tur chi te in nei em? In neih chuan ka lo buatsaihsak ang che u. A hmasain ka coffee te hi min han in sak phawt ula," a ti leh a.

Green chuan ei tur lak chhuah pah in," Kan lawm ngawt ang chu Eddy," a rawn ti a. He hmun an thlen hnu a a tawng vawikhat na ani. A hma zawng kha chuan a bang rinawm leh rinawm lohte, tukverh leh kawngkapui leh Indian ho rawn beih dan tur te ngun deuh maiin a lo enthla vek tawh a. Nasa lutuka an rawn beih loh chuan he in hi a rinawm tawkin a hria a.

"I mi hmuhte hi an hming kan sawi hlawm ang a. Kei hi Jim Green ka ni a, nula hi Barbara Davis a ni," tih pah chuan a ngawi vang vang a. Eddy chuan eng angin nge chu hming a hriat chuan a ngaih tih hriat tum niawm takin a en ran a. Mahse Eddy hmelah engmah a lang lo,"Tlangval sam sen deuh hi Rusty-a ani," Nui deuh chung hian," Palian deuh hi Tucson a ni a. Midang pahnih te hi Quincy leh Platt te an ni," a ti zui zel a.

Eddy chuan ngaisang hranpa lo tak in a lo bu ringawt a, nula chu a en zawk a," Inbual te i duh chuan tui a tam a nia. Reilote chhungin a lum mai ang," a ti a. Barbara chuan phur tak hian," Aw, a van tihzia dawn em, ka bal tawh teh a sin," a ti vat a. Putar vek chuan," Apache ho hi khawvela thianghlim bera sawi tur chu an ni hauh lo," tih pah chuan bel lian berah tui a thun a, thukah chuan a chhuang nghal a.

"Thlanglam pang ber pindan khu i hmang dawn nia," tiin nula chu a hrilh a. Tui chhuan chu a suan thla a tinah a ruak leh a." Tu ber emaw chuan he tui hi pindanah chuan nula hman tur in va dah sak ta che u,"a ti a. Rusty chu a lo chhuak vat a, tuilum chu pai tak tak chung in a chawi phei a. Pindan kawng khar chu a chhir hawng a, Barbara pawh chuan a zui nghal a. A lut fel tih chuan Shilloh Platt chuan Quincy chu awmze nei fe hian a melh a," Quincy, thil awmzia hi thlir ngun rawh. Kan nula chu a tlanbo lo ngei a ni tih hi hriat ka duh a ni. Ngun deuhin kei pawhin ka thlithlai dawn," a ti a.

A thusawi hmang atang chuan Quincy chuan thil awmzia leh Platt-a thik thu chu a hai miahlo. Lehlam hawiin a then sak a. "Tehreng mai, Shilloh, hmeichhe....." a tih lai chuan zawi fiah angreng tak leh thupe aw taka "Shilloh," tia ko thawm chuan an thusawi lai chu a ti tawp chawt a. Chu halfbreed Shilloh chu a inher vat a, a beisei loh lam atanga chutiang chona thawm rawn ri ta chu mak a ti hle tih a hmelah chuan a langchhuak chiang hle a. Sudden-a hi a rawn inrawlh dawn em tih ngaihtuah chung chuan Rusty hmachhawn chuan a ding ta a.

A kut chu a lang chiangin a pistol pawh a la hnaih chuang lo. Shilloh-an a pan mek Barbara Davis-i awmna leh Shilloh inkarah chuan Rusty chu a ding kak tai a. Shilloh chuan "Enge ni a awmzia?" a ti a, Rusty chuan bung vut hian "Enge a nih chu i hre reng alawm, Shilloh. A bulhnaiah hian i kal hauh lo ang," a lo ti a. "Chuti a ni maw? Tunge anih leh min lo dal dawn," Shilloh chuan a ti ta a.

Rang takin Rusty chuan "Keiman. Helai kawngkhar hi hawn i tum anih chuan kei hi min hmachhawn hmasak a ngai tlat. Chu chu i ti thei dawn em ni?" a ti ta a. Shilloh chuan Quincy chezia leh mitmeng chu a man vat a. Quincy chu bar hlui lam pan chuan muangchangin alo kal a, Shilloh nena Rusty karcheh theih dan tur a zawng mek a ni. Thui pawh a la kal sawn hman lo tih chuan inbiakna tawngka satliah lo tak hian Sudden chuan "Pen khat dang i pen leh anih chuan i in tina palhin i tlu ngei tawh ang, Quincy," a rawn ti ta a. Quincy chu a ding chawih a, thinrim leh nelawm lo zetin an piah deuh a Sudden-a ding reng chu a melh nghal a.

Mahse Sudden hian a mai maiin thu a chhak chhuak ngailo tih a hriat chian em avang leh thil lo thleng mai tur tawn lui tur khawpa a ât loh avang chuan a chesawn duh bik lo a. Old Eddy pawh chuan makti fein chumi te chu a en ran a. Tucson-a sakawr thlung fel lo lut pawh chuan makti takin kawngkhar atang chuan a rawn thlir ta reng a.

Shilloh pawh chuan Sudden-a thusawi chu a theihnghilh mai bik lo. An thiltih tum hi an chhunzawm anih vaih chuan Quincy hi innghahna tlak a ni lo tih a hria a. Quincy chu rang lutukin Sudden hian a kap tlu mai dawn si a. A hmaa tlangval ding ran zia pawh a hria a, vanneih thil thu ah Rusty-a hi lo hneh ta pawh ni se, a aia rang zawk leh huphurhawm zawk Texas tlangval khin leh tur a la nei bawk si. A ngaihtuah vang vangin he hmeichhia, nalh lutuk pawh nilo hian hetiang buaina hi phu in a hre ta lo a. Dar chhin ak chungin "Rusty, hetianga intih buai hi a tul love, eng pawh chu nise, tu lamah nge i tan zawk?" tiin a zawt ta a. Rusty chuan "Tanna lam ka thlan dawn reng reng ka hrelo. Thlang tur te ka nih ngai chuan hmeichhe lamah ka tang a, ka tang zel bawk ang," a ti ta a. Eddy pawh chuan "Son, i ti tha e. Thlan awm tak i thlang ani," a lo ti vat a.

Shilloh chu a thin a rim kher mai. A inrawlh lohna tura he putar a lo inrawlh hian a thin a tirim zual a ni. Mahse tumah han tihbuai tak tak chu a duh lo. A hmelah pawh lantir loh hram a tum a. A thuhrimah ama hmakhua tê ah lo chuan showdown tumah neihpui a tum lo. "Kan inkarah thu sawi dunna tha tawk tak neih a tul dawn anih hi," a han ti a. Rusty chuan "Teh reng mai. Thusawi dun tur ngaihnawm tak ka lo ngaihtuah dawn nia," a lo ti let a.

Shilloh chu a lawm lo kher mai. Tucson-a kawngka bula ding reng chu a va en a, "Bawng tar pa, zankhua in khatah khan i ding reng dawn em ni?" a ti a. Eddy lam chu a hawi leh a, "I lo inrawlh ve na tur a awm reng reng em ni? Eng chen nge hepa lamah hian tan i tum?" a ti leh ngat a. Eddy chuan "Nula tan chen chen hi a ni mai. I thusawi avang hian zamna chhete pawh ka nei lo," a lo ti a.

Shilloh chuan Tucson-a saddle bag kenlai chu a va laksak a, bag chhung chu a zen rawk rawk a, mahse a thil zawn a hmuh tak loah chuan ""Kal la, saddle bag dang va zawng leh vat rawh. A chhungah khan whiskey um a awm kha," a ti a. Mahse Tucson-a chuan a lo duh bik hauh lo. Thum deuh chhur hian "I chhiahhlawh ka ni bik lo," a lo ti a. Shilloh chuan "Mi â pa, zu um chu va la vat rawh. Zankhuain ka nghei thei hleinem," a ti leh a. Eddy chuan awmze nei tak hian Sudden chu a en a, "I thian te ho chu an leili a tha in tawng bungrua pawh an ngah hle mai," a han ti a. Sudden chuan "An nei tha ngawt mai. Mahse ka thian te an ni lo," a lo ti a. Eddy chu a bu nghat a. Tucson-a eitur rawn lak chu a kang mawlh mawlh a, Sudden chuan Quincy leh Shilloh, bar hlui bula an phun ru sar sar chu a hmu reng a. Eddy-an a sawi zawh hlawl, an leili thatna hian a hun hmain harsatna te pawh a rawn siam mai te pawh a ring deuh rum rum a. Eddy chuan chawei tur thlenga a rawn dah lai te chuan Sudden chuan a rilru in "Ka tan a tha zawk dawn pawh a ni maithei," a ti neuh neuh a. Ngawi renga zanriah an kil lai chuan Barbara pawh chuan a rawn kil ve a. Khawnvar engah chuan a ti te pawh chu no set hian a hriat a, a sam te chu a tle sar mai bawk a. A mitmeng paw dal raih te, a heh sen hiam te leh a hnar invuah dik lutuk te chuan dawhkan kil ho te mit chu a la in a hmelthat zia pawh an hmu chiang leh zual a ni.

Rusty chuan chu nula a lo melh dan leh a lo lakrun dan chu Sudden chuan a hai hauh lo. An mit leh mit intawng lai te pawh chu a hmuh hmaih hauh lo. Tin, Shilloh Platt-an nula pianhmang a hmuh a, a it dan leh a awmdan danglam tak zia te pawh a hai hek lo. Tucson-a meuh pawh a phur ve hle ni tur a ni, nula in chaw a eikhama a thawh dawn a thutthleng a lo dawm sak dan atangin a hriat mai.

Rusty chu Sudden-a bulah chuan a va kal a, "Green, nula hi a hah hle mai a, chawlh leh thahnem tawk taka mut a mamawh a ni," a ti a. Sudden chuan "Ka hria alawm. Mahse hmun hlauhawm pawh kan la pel tlat lo anih hi mawle," a lo ti a. Rusty chuan "Shilloh hian lawmman sem ve che a tum lo tih i hria em?" a ti leh a, Sudden chuan "Chutiang i rawn sawi avang chuan ka lawm khawp mai. Chutiang ti duh awm hmel a pu reng a ni," nui chung hian a lo ti mai a. Sudden-a nui hmel a hmuh chuan Rusty chuan lang naupang ta sawt hian a hria a.

Sudden vek chuan "Engtin nge Shilloh Platt te ang hi i kawp theih? Rusty, Sculphunter ni tur chuan ka hmu thei lo che a ni," a ti a. Hmel ngui raih chung hian Rusty chuan "Sculphunter angin min hmu ve mai rawh. Thil awmzia kei aiin i hrechiang em em zawk a, miten an thil tih tawh ah leh an tih mekah hian danglamna tehchiam a awm lo. Thil sual la ti lo mahse ti mek te zinga an awm chuan an danglam tak tak chuang lo," a ti a.

Texas tlangval hmel atang chuan Rusty thusawi chu a dik tih a lang thei a. Rusty chuan "Jim, inrawlh ve hi ka......" a tih lai chuan Sudden chuan "Ka hrethiam e. I tum hauh lo ang. Mahse loh theih loh hun te a awm thin tih ka theihnghilh thut alawm mawle. Shilloh nen in lo inkawp tak dan hi min hrilh thei em?" a ti ta a. Mahse Rusty chuan a lu a thing a, intih pachan tuma in seh ruh teuh chung hian "Jim, he nula hi chhanchhuah ka duh a ni," tih pah chuan nula chu ngui deuhin a melh a, "Kan tlai lutuk tawh loh chuan," a ti leh a. A mitmeng atang chuan tuna a awmdanah hian inchhir hluah hluahin a lang a ni. Sudden chuan "Sawi zawm zel ila duh chuan min hriattir leh dawn nia. Shilloh hi ka tei theih loh ang bawk hian i tei thei bik chiah lo niin ka hria," a ti a.

Rusty chuan "Ka tei thei chai lo. A khawsa zia hrim hrim hi ka hua," tih pah chuan engmah dang sawi leh tawh loin pindan kil lehlam chu a pan ta daih a. Thutthleng chungah ngui zet hian a thu ta reng a. Sudden chuan an mutna tur theuha an inthawlh hnu chuan a tuk zinga Indian ho rawn beih hma chuan Rusty-a thusawi kha a ngaihtuah zui nauh nauh a. Duty hmasa ber tur Quincy chu a melh zauh a, Quincy hmel chu han en zuai chuan nelawm tak, mahse belhchian a sual em em, mi thah pawisakna nei miahlo niin a hria a. A thian Shilloh te, Tucson te leh Rusty te, mi in ang reng reng lo insuihfin dan chu a ngaihtuah zui ta zel a. Nakin deuhah chuan tui takin a muhil ve ta a.