Apache Fighter-6

Zing khawvar hlim chuan station atanga chhim lampang atang chuan Apache ho chuan fimkhur em em in an rawn veh phei tan ta a. Lungpui te leh phen tur dang te phen zel chung chuan hmai hang nuau khawpa inhnawih chungin an rawn veh hnai zel a. Chu station chhungah chuan inring em em in an lo nghak ve mek bawk a. Mitin chuan tukverh chan bik an nei theuh a. Barbara Davis chu silai mu bawm chungah chuan a thu ran a. A thian ten an silaimu an kah ruah veleha rang taka lo thun sak zel chu a hna tur a ni. Sudden chuan zawi tak si, mahse fiah ang reng tak hian"Hnaih takah kap ang che u. Kan kahna lai ngaihtuah ai chuan lo kal hnai thei loa siam kha a fuh zawk ang," tiin a thian te ho chu a hrilh a.

Rusty chuan zawm tum tih hriat takin a lu a bu nghauh a, in chhung hmun hrang hrang enkual chung chuan Barbara awmna pawh chu a hmuh hmaih hauh lo a.

Barbara-in hlim hmel taka a lo en chu a hmu nghe nghe a. Barbara-i pawh chuan a thian dangte ai chuan Rusty chu tha fal hle hian a hria a. Heng ho te nen hian engtia inkawp thei nge anih pawh hi mak a ti viau a ni.

Shilloh chuan "Heta hi mi pakhat chu a lo kal e. Ka that nghal mai dawn em ni?" a rawn ti a. Mahse Sudden chuan "La kap rih suh. Vawi khat naah a tam thei ang ber thah a tha ang. Hetiangin kan lo chang reng tih hi an hre hauh lo ania," a ti a. Shilloh bawk chuan "Tuikhur a rawn hnaih tawh em mai a, tur te reu reu a rawn phul ka hlau deuh mawle," a han tih chuan Eddy chuan "Mingo ho ang bawkin he tui hi Indian ho pawh hian an tlan ve a, tur zawng a phul hauh lo ang," tih pah chuan pawn lam chu a thlir kual a.

"Reilo teah hian an zinga pakhat saw kan kah mai beiseiin a rawn inlar ang a, mahse tuman kap suh u. Apache ho chuan mi tam tak thih ai chuan mi pakhat hi an tawk tarh chawk thin," a ti zui a. Quincy chuan "An rawn hnai luat loh chuan le," a lo ti a. "Heta pawh hi mi dang a lo kal leh ta," a han ti leh a. Eddy chuan "Helamah pawh mi pahnih an lo kal," tih pah chuan a rifle chu hman mai theihin a lek a. Sudden chuan hlauhawm hle mah se a han thlir kual vel a, a hma zawnah pawh chuan mi pathum hian bawkvakin an rawn pan mek a.

"Kap tawh ru le," tih pahin tukverh atang chuan khawngaihna tel hauhlo silai mu chu a sur ta sung sung a. Apache ho chu chutia an rawn beih tak thut ah chuan an mangang em em mai a. Birukna tur zawngin an zuang nawk nawk a. Mahse an zinga pakhat tih loh chu silai mu tuarin an let pheng phung mai a. Insaseng awm chhun pawh chu Eddy-a Bufallo rifle mu khat chuan a keah a deng hram a. Indian ho chu an beisei loh ang taka hmun him atanga an lo beih thut avangin an thin a rim hle a. Pawl dangte chuan ral khat atangin nasa takin an rawn kap let ve a, an tawmna bang lung chu a khem ur ur a.

Chutiang hlir chuan rawn kap ta se chuan rei an tuar bik hauh lo ang. Mahse chu chu Apache indo dan a ni lo. Chulo ah silaimu pawhin a daih lo ang. Sudden chuan tukverh atang chuan a han thlir a, hla tak, rifle kah phak loha Apache ho khat ding bial thinrim taka an awmna lam rawn kawk chu a va hmu a. Shilloh chuan "Green, eng rilru nge an put i hre lo maw?" a rawn ti a. Sudden chuan "Lang lo liamah khian tihdan tur an ngaihtuah dawn ani ang," a ti mai a.

Quincy pawh chuan "Eng ruai an ang awm chuang si lo a," tih pah chuan chung ho inthen darh lai chu a thlir reng a. Reilo teah chuan a reh leh ta tlawk tlawk a. Engmah hmuh leh hriat tur a awm ta lo. Ni te pawh chu a lo chhuakin tlangsang te pawh a rawn chhun pel ta a. Mahse thawm engmah a la awm chuang lo. Shilloh chuan a zawhna chu ringhlel tak si hian "An kal bo in, min rawn bei ngam tawhlo tihna em ni ang?" a han ti a. Rusty chuan "Ngun takin en ringawt mai teh," a lo ti a.

"An rawn thah hunah che an la kalsawn lo a ni tih kan la hre thei chauh dawn a ni," a ti a. "A nuihzatthlak thin e," tih pah chuan Shilloh chuan Eddy hnenah chuan "Tui i ngah tawk em? Putar," a han ti a. Eddy chuan "Tam tawk chu nei e. Rei lutuk te cham in tum anih loh chuan. Mahse pasarih ren rawn chuan tawkfang chu kan tla tho ang," a ti a. Quincy chuan "Chu, kan ramhuaia te ho chuan min tam chhuah an tum chuan tui chu kan nei dawnlo tihna a ni maw?" a lo ti a. Eddy chuan "Ni chiah love," hmusit tak chunga Quincy en chung chuan "In zavai hian in hlau ta hluah hluah a nih loh chuan," a ti leh kher a. Quincy chuan a lo ngaithei lo hle a "I lei kha veng tha rawh khai," nin hmel fe hian a lo ti vat a. Eddy chuan Quincy-a vauna chu haiderin Sudden-a hnenah chuan "Jim, Apache ho chuan min tam chhuah chu i ring em ni?" a ti a. Sudden chuan "An tum maithei. Ka rindan tak chuan chumi hma chuan vawikhat chu min la rawn bei lehin ka ring," a ti a.

Putar chuan "Kei pawh ka ring deuh. Apache ho hian dawhtheihna tlakchham thut chang hi an nei ve thin a. Mahse chu chu an thih phah chawk," tih pah chuan ha pawh awm tawhlo a hmui vel chu a thial nuau nuau a. A rifle kawm chu a chul hauh hauh bawk a. Tlanchhuah mai duhna kha Shilloh Platt-a rilru ah a len ber avangin "Khaw thim thleng han nghak ila, chutah tlanchhuak ta ila," tiin a rawt a.

Sudden chuan "I duh chuan han tum chhin teh reng la. Kan rawn zui ve loh che a, i khawsak dan kan rawn thlir ringawt pawhin min dem lem lo a ni ang chu," a lo ti vat a. Chu tawngkam dengkhawng tak chuan halfbreed pa chu a ngawih tir hmiah a. Chutia an ngawih thap lai chuan Quincy chuan "Shilloh thusawi ve hi chu bara khawn chi a ni lo, hetianga hual beha awm hi a ngaithei lo ve hrim hrim a. A luvun nen hian tlanchhuah hlen ngaihna chu a awm loh zia a hre rengin ka ring," a rawn ti a.

Eddy chuan "Hun a la awmlo reng a ni. Engtin nge an chet leh dawn tih ngaihchan rih phawt a tha ang," a lo ti a. Sudden chuan nula thutna lam chu a hawi phei a, "I tha maw?" a ti a. Davis chu chapo takin a hawi vel a " Mr. Green, min ngaihtuah lutuk duh suh. Ka la tlanbo lo a, i lawmman tur pawisa pawh hlauhthawnawmin a la awm love," a lo ti bul hmak a. Shilloh chu chu tawngkam a hriat chuan a lo nui chiam a "I sawi dikin i hrilhfiah dik kher mai, sister, mi kan hmang mei ang i lo ni tih chu sawifiah kher a ngai love," a han ti a. Rusty-a chuan a sawi zawh hma in "Platt, i lei kha veng tha deuh rawh. Chuti lo chu ka....." a tih lai chuan Shilloh chuan "Chuti lo chu engtin maw?" a lo ti vat a. A hmel pawh chu a dur khuih a. Rusty-an a chhan leh hma chuan Sudden chuan "Kan zinga intihbuaina hian tumah min tanpui hauh lo ang," a rawn ti a. Chu tawngkam thlum tak chuan tumah a ni lo zawng chuan a hruai hauh lo.

Sudden bawk chuan "In hma zawn theuh kha ngun takin veng ringawt mai rawh u. Mahni ven tukverha Indian zuan luhtir chu a thi sa a ni mai," a ti zui leh a. Shilloh Platt chu rang takin a tukverh chan lam hawi chuan a inher thuai a. Reilote chhung khan Indian pakhat chu lut hmanin a ring tlat. Tunah pawh a inring em em a, a rifle pawh chu hmang mai tur ni awm tak hian a load rap a.

"Helam sirah hian engemaw chu a awm. Bang sira vaivut khu sat ka hmu a ni," Tucson chuan a rawn ti a. Sudden chuan a kalsan tukverh chu lo veng turin Rusty a tih pah chuan Tucson-a chu a kal pel a. Tukverh atang chuan a va thlir a. "Vaivut khu nilo in mei khu a nih zawk saw. Hla deuhah sawn mei an chhem anih saw,"a ti a. Quincy chuan hlauthawng tak hian "Chu, engtin nge ni ta ang?" a rawn ti a. Chu zawhna chhanna atan chuan mei thal pathum hi an rawn thlawk phei nghal a. Boruakah chuan an kalna hnu chu a paw ngiai ngiai zel a. Inchungah chuan a rawn tla ta dawt dawt a. Sudden chuan Eddy chu thil zawt niawm takin a han en a. Mahse chu putar chu a lo nui mai a. "He in satu te hian thil lo thleng tur zawng zawng hria ang hrimin inchung hi lungchang leh vaivut chhah takin an chhilh tlat a. He inchung ti kang tur khawpa meithal kah chu Quincy atan Paradise a kal a harsa ang bawk in a harsa ang," nui hawk hawk chungin a ti a. (Kher kher zel a!!).

Inchhunga awm ho chuan meialh rawn tla thawm chu an hre chiang na in an awmna inchung avang chuan a hlauhawm lo tih an hre reng a. Eddy-an thlaphanna chhete pawh neilo mahse midang ho chuan meialh thalin a rawn tih kan mai theih ringin sulhnu a neih leh neih loh chu an thlithlai reng a. Mahse reilo teah Indian ho chuan an thal thil tih theih loh dan an hmuh in an kap duh ta biklo a. Thal thlawk thawm a reh fel hnu chuan Eddy pawh chu intithei takin a tei vel a. "Enghelh tur engmah a awm lo tiin ka hrilh che u kha. He in satu te hian Indian ho trick hi an hre hneh hle zawng a lo ni," a ti leh a.

Chumi nileng chuan inbeihna a awm zui leh ta lo.

Barbara Davis chuan zawite hian "Midangte nen hi chuan in inang lo hle mai," a ti sap a. Rusty nen chuan dawhkan pakhat kilin an thu dun a, sa thing, an eitur neih chhun chu an ei malh malh a. Sudden chuan chu hun remchang chu hman remchan a duh avangin "An mi rawn beih hun tur hi an rawn sawi silo a, hun thawl kan neih lai hian eitur kan neih ang ang hi ei ila a tha ang," tiin rawtna a siam a. Chu rawtna zawm chuan an thil ei tur neih ang ang chu an ei hlawm a ni.

Chutia Rusty leh Davis-i thil ei dun leh an ti ti chu Sudden-an a hmuh chuan hlawhtling a inti hle a. Barbara chuan a bula tlangval thu chu beiseina nen a en fo a. Rusty pawh chuan beiseina sang tak nen a lo melh ve bawk a. A hmelah chuan a beiseina chu a lang chhuak hial a. Khun taka thil ngaihtuah chung chuan Rusty chuan "Midangte ang bawk ka ni. Thil awmzia i hrelo mai mai a ni," a ti a. Barbara chuan "Mahse an ni ang chu i ni emlo ti raw? Rusty, in awmdan hi chu a ho mai mai ngawt mai. A thu hrimah heng ho pawl tur hi chuan ka ring tak tak theilo che," a ti a. A thusawi pawh a sawi tawp hlei thei meuh lo.

"I thusawi tum tak, Indian ho lu lakna ah hian ka tel ve ngei alawm. I thusawi dikna chu keimahah hian tlem chu a awm a ni, Apache lu laknaah hi chuan ka tel ve chiah lo na a, mahse chu chu thiamchanna tur a ni chuang lo. An zinga mi pakhat ka ni a, sawi hran theih ka ni chuanglo," a ti tlat a. Barbara chuan "Heng mi rapthlak tak te nena in inchhar dan hi khawngaihin min hrilh thei lawm ni?" tiin a zawt ta a. A awka chhuak leh a thusawi chuan a awm a ti nuamlo hle a, a thutna chu a rem tha sauh sauh a, a awmdan danglam zia chu nula hian hrelo se a duh hle a ni. Rusty chuan "I hre duh tak tak em ni?" a tih chuan Barbara chuan "Rusty, ka hre duh tak tak," a lo ti vat a. Heng mi te nen an inkawp tan dan a ngaihtuah chuan Rusty-a hmel mawi tak chu a lo hnim tan a. Barbara Davis-i, rancher zahawm tak fanu hriat atan chuan a thawnthu chu a chhuanawm fahran lo. A thlatin hlawh chu a iptea chambang loin a chenna khaw pakhat saloon ah a luangliam thin a. Zu rui chung hian saloon inkhelhna dawhkan pakhatah tumkhat chu a inkhel a. A neih zawng zawng a thap zo ta a.

Mahse a tawpah a man ve ta hlauh a. Mahse a khelhpui pa chuan trick hmangah a puh a, silai a chuh ta mai a. Mahse ani aia a phawi ran zawk avangin a that ta a, tiin a chanchin chu a hrilh zel a. "He mite pahnih hian khawchhunga mi thah chu an dim loh zia leh nasa taka an sawisak thin thu te min hrilh hnuin puitu an mamawh thu te min hrilh a. Rei tak khua chhuahsan tur anga min hrilh vangin an zingah ka tel ve ta a ni," a tih chuan Barbara chuan "Anni pahnih hian maw?" a lo ti vat a. "Ni e, Quincy leh Shilloh te hian duhthlan tur pahnih min pe a. Kawng laka pawisa lakluhna ka hmuh chuan a chanve an nei ang a, tichuan Bisbee khuaa dan hmaa min hum an intiam a. Duhthlan tur dang reng reng ka nei lo. Khaw pawnah Tucson-a hian min lo nghak a, anni pahnih hi chu an insawi danin Dragon khuaah an kal dawn niin ka lo ngai a, ka lo ringsual ngei mai. Hetianga sumdawn an tum ang tih reng ka lo hrelo a ni," a tih chuan Barbara chuan "Bounty hunter mai an ni tih i hrechhuak ta amaw?" a lo ti vat a.

Rusty chuan thinrim ha thial rap rap chung chuan "Annih ang takin sculphunter tih mai tur an ni. Ni e, an nihna ka hrechhuak ta a. Zan khat chu camp a kan awm laiin Quincy leh Shilloh te hi Apache luvun khaiin an rawn haw a, anmahni chu lo hmachhawnin luvun hik pawla thawh ka duhloh thu ka lo hrilh a, mahse min nuih mai a. Shilloh chuan "Kal chhuah theih i inrin chuan chhuak ta che. Mel khat pawh nangmah mai chuan i kal hman ngut na maw chu? Injun ho chuan keimahni ho zing ami ang chiahin an ngai tawh che a. Keini ho min nghaisak tur ang chiahin an nghaisa ve ang che," min lo ti a. Keimah mai chuan chanvo chhete pawh ka neihloh avangin Tucson khua kan thlen veleh ka kalsan mai ang chu ka ti a. An mi tih dan chu ka theih ang anga lo do let ve tumin ka inbuatsaih ta a. Tucson khaw pana kan kal laiin nang leh Green-a Apache hoin an um lai che u khan kan rawn hmu ta che u a ni," a ti ta a. Thutak fein Barbara chuan "Green-a i tih hi helaia pa lian pui, halfbreed aia a thatna tur chuang ka hre lo," a lo ti a.

"Chu zawng ka hrechiang biklo. Sudden-a chanchin an sawi hi ka hre hnem ve tawh a, a chhe zawnga an sawina zawng zawng hi chu ka awi reng reng lo," Rusty chuan a lo ti a. Nuihzat deuh tak hian Barbara chuan "Tual thattu leh danin a zawn mek, wanted a ni si a, engtin nge i tan theih chu le?" a lo ti a.

"Kei pawh wanted chu ka ni ve tho," Rusty chuan a lo ti vat a. Barbara chuan lu thin pahin "In in ang miah lo. Rusty, phat pawh tum duh suh. Sudden-a hming hi chu silai phawi ran leh mi thahah te a hmingthang em em asin," a la ti talh a. Rusty chuan "A ni mai thei e, mahse kan danglam chuang lo. A thuhrimah Sudden hian Quincy te ang hian mahni pawh inveng theilo Indian ho luvun te hi chu nuam ti takin a hik chuan ka ring lo. Shilloh Platt te ang hian nawmchen nan a hman duh ka ring lo bawk a ni, a ti ve reng reng lo ang, Miss Davis," a tih chuan Barbara chuan a kut a lo chul sak a,"Barbara min ti zawk rawh," a lo ti a. "A....ka sawi tum tak chu he hmun hi dama kan chhuahsan anih ngat chuan Jim chiah hi min hruaichhuak tur chu a ni ang tih hi a ni," a ti ta a. Barbara chuan "I ngaina viau ani maw?" tiin a zawt a, Rusty chuan "Ka ngaina bawk chu a ni ang, ka beisei angin lo ti ta lo pawh ni sela hei hi min lo hriatsak ka duh," a ti a. "Harsatna leh natna i tawh loh nan theihtawp ka chhuah ang," a ti ta a. 

Nula chu a kun ngaih a, a biang chu a lo sen tan tan a, a hmel lo danglam ta chu thup hram tumin "Rusty, ka ring tawk che tih hi min hriatsak ka duh. Platt te nen in inkawp dan te leh Bisbee a thil thleng i sawi te kha ka ring a. Khua kan thlen hunah chuan," a ti a....a tawp chawt a," Oh, Rusty, Tucson khua hi dama kan thlen theih i ring tak tak em?" tiin a zawt a, Rusty chuan "Thleng teh lul e," a lo ti mai a.

An ngawih vang vang hnu chuan Eddy chuan "Naute u, helai ram in rawn chuan chhuah dan min la hrilh lo a," a ti a. Quincy leh Shilloh te chuan an chhan takloh ah chuan "Nangni ho hi in kal ho thin reng em ni?" tiin Sudden chu a zawt leh a. Texas tlangval chuan a lu a lo thing a, "Pawl ho kan nilo," a lo ti a. Shilloh chuan "Inhmu khawm thar mai kan ni," tih pah chuan "Eddy, he tlangah hian rangkachak hmuh tur i hria em?" a ti a.

Eddy chuan "Eikhawp chu hmu e," a tih hnu chuan "Eng chen nge hetianga lu la hian in khawsak tawh?" tiin a zawt ta a. Chu putar thusawi chuan boruak a ti reh tha kher mai. An che vel chu ngun takin a en a, Quincy chuan za lo zeta nui chung hian "I thusawi awmzia chu ka hre hauh lo. Lu vun khawn chu kan ni hauh lo. Nangmah ang bawka rangkachak zawng mi kan ni," a ti ta a. Mahse Eddy chuan "Keimah ang chu in ni hauh lo ang. Ka tar tawh deuh avang hian â turah min ngai hauh suh. In sakawr chungah sawn luvun khai khawm ka hmu a, chuvang chuan China ram lal ka ni lo ang bawk hian rangkachak zawnga vak vel zawng in ni lo chiang a ni," a ti leh ta ngat a.

Shilloh Platt chu muangchang hian a thutna atangin a tho a, Eddy hmachhawn chuan "Anih tak chu. Tichuan sculphunter chu kan lo ni ta a, engtia min tih nge i tum a? Enge a pawina, Putar?" a ti ta a. Dar chhin ak pah chuan Eddy chuan "Ka ngaihdan ka sawi chhuak satliah mai ani. Apache ho hi sculphunter chungah chuan an ngilnei vaklo tih inhriat a tha ang. He ram hi in ngeih vak lo ang tih chu a chiang a ni. Helai ram hi in lu vun te nen khan tlanchhuahsan in tum anih chuan thil pakhat ka hrilh lawk ang che u, in zingah hian ka kal ve dawn lo a, Apache ho in an man lai che u a in bul hnaia awm chu ka duh miah lo mai," a ti ta hmak a.

Shilloh Platt chuan "Min man hauh lovang tih ka sawi ngam e," a lo ti a. Mahse chhang ta lem lo chuan Eddy chuan Sudden-a lam chu a hawi a, "Nang hi i chanchin i la sawi ve lo a, anni nen hi chuan in inang chiah lo ti raw?" a han ti a. Sudden-an a chhan hma chuan Barbara Davis chuan "Mr. Green-a hi chu adventure ropui tak a nih hi," a rawn ti a. An ti ti hre thawia rawn zawm hlawt a ni a. Rusty-a a vawnna pawh a lo thlah tawh a.

Mahse a thinur vanga vuan ta lo chu a ni lo. "A hming lar zawk chu Sudden ti ila i hrechiang thei zawk ang," a ti zui a. Eddy chu makti takin a faifuk raih a, "Chu, Sudden an tih hi i ni a maw? I chanchin hi ka hre tam tawh teh asin," a ti a. "I chanchin ka hriat thenkhat chu chhe tak a ni. Thenkhatte chu tha tak te pawh a ni bawk. Mahni chauha khawsa thin i ni maw?" a ti leh a. Barbara Davis chuan "Pawisa tamna lam apiangah a khawsa deuh ber thin a ni," a lo ti leh vat a. Eddy pawh chu a bu nghat a, Eddy-an ani lo zawnga thu a dawng chu Sudden chuan pawi a ti deuh a. Eddy chuan Sudden leh sculphunter ho inkarah hian thil mak tak leh hlauhawm thei tur awma a hriat avangin sawi chhuah a tum lai chuan Shilloh Platt chuan "Heta hi an lo kal e," tih pah chuan tukverh atang chuan a silai chu a kap chhuak ta zawt zawt a.

An zavai chuan training lo nei lawk ang hrimin tukverh zawn leh tanhmun tha laiah chuan an insem sang sang a. Indian ho lo kal chu an kap nghal zawt zawt a. Mahse Apache ho chuan silaimu sur sung sung chu pawisa lo ang hrim hian an awmna lam pan chuan an rawn tlan zel a. Sudden chuan "An han inthawi zo hlawl a, silaimu kah tlang theihloh emaw an inti anih hi. An tisual chiang kher ang," tih pah chuan a kap zawt zawt a. A pistol han tlir thawm leh a han lek dan velah te chuan a hmang thang tih chu hai rual a ni lo. Eddy leh midangte pawh chuan an theih ang anga rangin an kap mawlh mawlh a. An silai kawm a sat vur thlengin an kap hlawm a. A tawpah chuan Indian ho chu an tlanchhe leh ta a. A reh leh ta hmiah mai a.

Mahse kawtlai zawlah chuan Indian pasarih chu an let reng hlawm a. Quincy chuan hlim tak hian "Han en ve teh u, kawtlaia saw tangka tam tak hu, lakkhawm nghakin an let phung mai," a ti a. Shilloh chuan "Anih chuan kal la, va khawm ta che," nuihzat ang reng tak hian a lo ti a. Quincy chuan "Ka lawm khawp mai, sumdawnna chu a lo thleng chawp zel mai alawm," a ti a, Eddy chuan thum chhak hian "Ka beisei ai daihin i lo fing tawh," a lo ti hmuk a.

Quincy-an rum taka a lo melh reng chu a lo en reng a, Eddy bawk chuan "Bengchheng su, eng thawm nge?" a tih chuan an ngaithla thap a. Mahse engmah an hre lo. Eddy bawk chuan "Sakawr tlan thawm ang tak ka hria," a tih chuan Sudden chuan "An rawn kir leh pawh a ni maithei," a lo ti a, mahse Shilloh Platt chuan "Teuhlo mai. I mumang te i rawn sawi anih loh chuan," a lo ti a. Thawm engmah hriat zui tur a awm leh ta lo.

Rei deuh hnuah phei chuan sava te pawh an rawn hram ta nauh nauh a. Indian ho hi an kalbo hlen mai angem? Hneha an awm avang hian an ram lamah an kir tawh mai angem? Texan tlangval hian Juano chuan a mi huaisen tha tha an thih tawh hnu hian chuti mai chuan a kirsan a ring thei lo.

Tukverh atang chuan a hawi chhuak vang vang a, khua te pawhin thim lam a pan ta a. Hmun thenkhat phei chu a hmuh chian theih ta meuh loh. Rusty chuan "Jim, an thlawk bo zo ta in i ring em?" a ti a. Sudden chuan "Ring chiah lo. Thil pakhat chiah fiahna tur a awm," tih pah chuan tukverhah chuan tuma chelh hman lohin a zuang chhuak a, engtin mah an tih hman hma in zan khawthiang leh reh tlawk tlawk hnuaiah chuan a kal chhuak ta daih a.