Apache Fighter-7

Minute sawmhnih hnuah chuan Sudden chu a rawn kir leh a. A kawra vaivut a phiah fai mawlh mawlh lai chuan midang ho chuan chanchin thar a va hriat te hriat chak in an lo kil taih a." An la kal bo lo. Heta tanga furlong hnih vel lek, sawlai kham hnuai hmun remah sawn an awm," a ti a. An meichhem te chu ka hmu thei a. Mahse hnai takah chuan ka kal thei lo na a, ka hriat chhun leh an khawsak dan atang chuan an thinur hle zawng a ni.

"Naktuk zing atan an inbuatsaih a, an in thun puar mek a ni," a ti zel a. Chu chanchin thar chu an ngaithla ngun kher mai. Rusty chuan an hmabak ko tak avanga Barbara tana lungngai ni awm taka a kut a han khawihsak chuan Barbara chu a lo nui sak a. Quincy chuan "Sudden, chanchin lawmawm lo tak anih chu mawle, chu chen chen chu kan tang thei dawn em ni?" a lo ti thuai a. Sudden pawh chuan "Chu chu ka ngaihdan chiah a ni. Chuvang chuan kan tlanchhuah a tul ang," a ti mai a. Chu tlangval hmel, hlim angreng tak chu makti takin an en thap a.

Shilloh Platt phei chuan mak a ti zual deuh a ni ang "Sudden, i â ta em ni?" a ti ta hial a. Quincy pawh chuan "Hetiang ram bumro leh Indian ho karah chuan min hruai chhuak thei hauh lo ang. Thil theihloh lutuk anih chu i sawi," a lo ti bawk a. Mahse Sudden chuan "Chuti anih chuan ka thusawi hi lo ngaithla zel mai teh. Hetia kan awm reng chuan thil pahnih zinga pakhat chu a thleng ngei ang. Chu chu tui in tur kan tlachham emaw a ni ang a, hrehawm tawp khawk pakhat a ni. Chumi anih loh vek pawhin silai mu kan tlachham tho tho bawk ang," a ti ta a.

"A enge maw zawk zawk chu a lo la thleng tho tho dawn," a tih tak zelah chuan tumah rengin thu chhak chhuah tur an hre ta lo. An ngawi ta thap a. An zavai chuan a eng zawk pawh chu lo thleng se an thawpik dan tur chu an ngaihtuah hlawm ani ang. Sudden-a meuh pawhin Apache ho hian an hualbet tlat si ang a, silaimu an nei tawh silo anga, chumi hnua thil lo thleng tur chu a huphurh hle ni tur a ni.Rei tak an ngawih hnu chuan "Anni ai chuan helaiah hian kan khawsa rei thei zawk maithei asin," Shilloh chuan a rawn ti ta a. Mahse Eddy chuan "Kan theilo maithei bawk. Jim-a thusawi hi a dik ani. Kan ramhuai misual ho hian mangangin khungkhawm kannih hi an hrechiang khawp mai. An tih tur ber chu nghah hi a ni mai. Ti hian min nghak ngat ngat mai anga, tui kan neihloh thlengin," a tih pah chuan Sudden-a hnenah chuan "Engtia tih zel chi nge nia i rin?" a han ti a. "Ngaihdan sei tak, vanneih ngai tak a ni tlat mai. Tin, i puihna pawh ka mamawh dawn a ni, Eddy," Sudden chuan a lo ti a.

Eddy chuan chhum hmak hian "I ngaihdan chu sawi vat teh," lo ti a. Sudden chuan "Nang pawh Quincy, ka rin tawk che a ngai dawn a ni. Mahse ka ring ngam dawn che em tih hi ka la hre thei lo," a ti a. Za lo taka nui chungin Shilloh chuan "Eng vangin maw Sudden? Enge i sawi tum chu?" a lo ti thuai a. Mahse Green-a chuan chu zawhna chu chhang ta lem lo chuan, Apache camp bula a ngaihtuah chhuah tawh diam chu a sawi ta zawk a. "Chiricahua ho hian an inbeihnaah hian pasaltha tam tak an hloh tawh a. An hlohna chu an la run in an rui hle tawh a. Apache hian zana inbeih hi an duh hauh lo. An tuanfum phah ang tih an hlauh vang nilo in an pasaltha thi ta te thlarau kha zanah hian tumah tibuai loin an leng vel thin a. Chutia zana an len vel na tibuai tu chu chung thlarau chuan an huat an rin vang a ni. Chu an rinna chu kan belhchhah hlek theih chuan an tlan darh vekin ka ring a, chumi chhung chuan kan tlanchhuah hman ka beisei," a ti ta a.

Eddy chuan "Thawnthu sei tak zawng a ni," a lo ti a. "A sei mai bakah thil tih harsa tak pawh a ni. Mahse kan tih theih awmchhun chu a ni tlat si," Sudden chuan a lo ti leh a. Rusty chuan "Jim, i ngaihdan chuan thil ti thei ta in lo tlanchhuak ta ila, an hriatchhuah hnuah min rawn um leh tho angem?" a lo ti vat a. Sudden chuan bu nghauh pah hian 'Min rawn um ngei ang, chuvang tak chuan Tucson khaw lam pawh ding takin kan pan lo anga, chhim lam hawi, thlaler lam panin kan kal zawk dawn a ni," a ti ta a. Lungawilo tak leh thinrim aw lek lek hian Shilloh Platt chuan "Thlaler maw? Thlaler lama tlan tur chuan min duh amaw? Engvang berin maw?" a lo ti a.

"Kan tih atan an beisei dawn loh vang mawle. An aia kan hmasak miau chuan min rawn um pawh nise min rawn um phak hmain Fort Cochise kan hnaih hle tawh ang. Sipai an hlauh vang ringawt pawhin Indian ho hi an tlan kir leh maithei a ni," Sudden chuan a ti a. "I thusawiah chuan ta ila tih a tam hle mai," Eddy chuan a lo ti a. Then deuh sang chungin Sudden chuan " Helaiah pawh hian awm ta ila tih emaw, ila tih hi chu ka rawtna zingah a tam zawk ngei ang," a lo ti mai a. Mahse Quincy chuan "Thlaler ram paltlang chu ka duh reng reng lo. Ka hrilh tawp mai ang che u, a lum dawn em asin," a lo ti a. Chu veleh Eddy chuan "Meidil an tih pawh hi a lum teh ania. He laia thil mak tih nghak a i thut ngawt chuan chutah chuan i kal ngei bawk ang," a lo ti vat a.

Sudden chuan fiah fel fai tak hian "I duh chu i thlang thei alawm. Helaia Indian ho sawisak hmabaka awm nge i duh an beiseina ngei kawng zawh a, i luvun an hih sak che?" a ti ta hmiah a. An ngawih thap lai chuam Rusty chuan "Jim, engtin nge chu chu kan tihhlawhtlin theih i rinna chhan?" a lo ti a. Sudden chuan "Kei leh Eddy hi sawng Indian hoin min hmuh hunah chuan min hlau hle dawn a. An tlanchhe nghal dawn a ni. Chu chu in hriat veleh heta tang hian chhim lam panin in chhuak nghal anga, reilo te hnuah kan rawn umpha leh mai dawn che u a ni," a lo ti a.

"Chutia kan lo kal te pawh chu min lo kah te pawh i duh ani maithei, Shilloh, mahse hetiang ram reh leh zanah lehnghal chuan silai thawm a ring duh hle ang. Apache ho hi an bengvar hrep bawk si a, chuvang chuan silai hmanna chi chu a ni hauh lo ang," aw pangngai tak si, thupe aw tak hian a ti zui a. Rusty lam hawi chuan "Ei tur leh tui i theih anga tam buatsaih nghal rawh. Thawm i hriat veleh tlan chhuak thei nghal turin lo inbuatsaih la, amaherawh chu, min lo that maithei bawk a. Chutiang thil a thleng anih chuan in theih anga fimkhur leh thaa in chet a ngai ta tihna a ni mai. Kei leh Eddy chu min ngaihtuah a ngai lo ang," a ti ta a.

Thisen chaka tui hal Apache ho hnena anmahni ho tana thih pawh a huamna chuan an zinga hisap chak lo ber Tucson-a thinlung pawh a khawih hle ni tur a ni. "Chutiang chuan kan tan i in pe anga maw?" a rawn ti chhuak ta hial a. Nui deuh sang chung hian Sudden chuan "Chance awmchhun a ni miau alawm. Loh theih loh thil anih loh chuan inbarh luih chu kan tum chuang nang," a ti mai a. Rusty hnenah chuan thutak hmel fe hian "Nula hi i kutah ka dah hmiah a nia," tiin a hrilh leh ngat a. Rusty chuan he tlangval sa pan leh sang raih mai inpekna hi ropui a tiin a tawngkam chu a bengah a ri ring hle a. "Jim, hlauthawng reng reng suh. Ka bulah chuan a him ngei ang," a lo ti a. Chu tawngkam huaisen leh thlamuanawm tak avang chuan Shilloh Platt hmel chu a lo dur khui khuih a. Thinurna in a lo khat zo ta a. Sudden chuan "Chutianga i tih theih ngei chu ka ring nghet tlat a ni," tih pah chuan "Quincy, ka rinna tur che chu hei hi a ni........Indian ho hnen atanga kan rawn tlanchhuah leh theih chuan he hmun hi chhuahsan thuai thuai chakin kan rawn tlankir dawn a. Sakawr han buatsaihna hun kan nei dawn hauh lo. I hrethiam em?" a ti a. Quincy chuan "Hrethiam e," tih pah chuan ngeiawm deuh hian a han nui a.

"Sudden, mi i ring ngam tak tak dawn em ni?" a ti a. Chutah Tucson chu phawk deuh hru hian a rawn pen chhuak a. Quincy-a hma chiahah chuan a va ding ta a. "Quincy, i tana mi ten an nun an thap lai hian Apache khawngaihna dil turin chung mi te chu i hnutchhiah ang maw?" a rawn ti chhur chhur mai a. Quincy hmel chu ramhuai hmel chiah hi a ni mai. Thu nei tak anga han awm vel hi a lawm a ni ber. "A awm duh maithei. Tunge chutiangin han awm duh pawh ni se han dal thei tur ni reng reng?" Shilloh chuan a lo ti leh nghal a. Quincy chu a intithei leh zual a.

Shilloh Platt chuan he hun hi remchanga hman hram hram a tum tlat a ni. Eddy leh Sudden-a te chuanna tur sakawr chu lo khawih khawloh a, chutih hun chhunga lo tlanchhuah daih a, lawmman kha amah chauha pumbilh vek tumna a nei tlat a. Chuvang chuan helaiah hian buaina siam a tum tlat a ni. Mahse Rusty-a aw fiak tak chuan a hmel a ti danglam leh ta. Rusty chuan "Keiman ka dal ang," a rawn ti a. Quincy chu a insiam tha te te a, then deuh suk chung hian "Kei leh Shilloh hi min hneh theih i ring amaw?" a ti a. Rusty chuan "Ka tum chhin dawn alawm," a lo ti ve mai a. Shilloh-a, za vaklo a a nuih lai chuan Tucson-a chu a rawn tawng chhuak leh a," Quincy, chutiang tih i tum anih ngat chuan he tlangval lamah hian ka tang nghal e," a rawn ti leh ta a. Chu veleh Quincy chu a rawn zuang phei a, Tucson-a chu rawn beih a tum ta mai a.

Mahse chet pawh che sawn chuanglo chuan Tucson-a chuan a ban a lo vai a, Quincy-a khabe ah tak mai chuan a lo dawm a, duh loh paih ang thlawrhin leiah chuan a tla tawp mai a. A khabe chu a nuai nuah nuah a. Tucson chuan Shilloh lam chu hawi phei pahin "Shilloh," a ti tuar a.

Shilloh pawh chu a hnungtawlh dawrh a. A kut pahnih chu a pistol atanga hla thei ang ber hian a dah a. "Nilo e, tunah chuan Tucson, engah mah ngai suh, ka.......," a tih lai chuan Tucson-a chuan "I huaisen tawk lo. Chu chu a chiang a ni," a lo tih khalh a. "Quincy i rawn fuihpawrh a, chu i mi fuihpawrha chu engmah ti theilo a ka siam hnuah nang i tlanchhe leh si ang maw? Shilloh, eng ramsa nge maw i nih le?" a ti zui leh nghal a.

Shilloh chuan awmngaihna pawh a hre lo a. Amah thlirtu, hmel nelawm loh tak tak chu a en kual a, a bulhnaih bera ding nula hnenah chuan "Lo ngaithla teh. Ka fiamthu mai mai anih kha. Engmah tih kan tum lo tih hi han hrilh teh. Quincy hian a lo la thutak viau ang tih reng reng ka ring lo a ni. Indian ho ke bulah an lu vun lak mai turin mi ka hnutchhiah chu i ring bik hauh lo ang ti raw?" a ti a. Barbara chuan "I sawi ang chu i tum dan chiah a ni ang. Chu bakah, daw thei lutuk, mi bum hmang leh tualthah ching mi i nih ka ring," a lo ti hrep a.

Chu tawngkam duhawmlo tak chuan Shilloh Platt chu a ti thinur em em a. Insum theilo khawpin a thinurna chu a lang chhuak a. A mitmeng te chu a dur hian a dur khuih a. A mexican thisen chuan chu tawngkam chu a tuar ta ngang lo a ni ang, "Nang pawh hi enge....." tia ben nghek tuma a ban a kau lai chuan Sudden chu an pahnih inkarah chuan a rawn tla zep thuai a. Hmuh hman loh khawpa ranga a kuta pistol rawn chawr chhuak nawlh chuan Shilloh-a dulah a va chuktuah ta a. "Tenawm pa, han tum zel teh. Rul verther tak i ni ang chiah hian ka'n that teh ang che," a ti zui ta a.

Shilloh Platt chuan Sudden-a mita thihna sar zam a hmuh meuh chuan a zam ta hle a ni ang, a kut pawh chu a la thla thuai a. A thinrim thup nan a mit chu a nuai ta mai mai a. A mit nuai pawh chuan "A.........pawi ka ti khawp mai. Ka thiamloh a ni. Tih nat pawh ka tum lo. Ka thin hi a chhe......" a tih lai chuan Sudden bawk chuan "I thinchhiatna hian a la ti hlum dawn che a nih hi," a lo ti hmak a. Hnung tawlh pah chuan rang zetin a pistol chu a bawmah a khung nghal a. "In beng dai rawh. Hun khawhral hman kan ni lo," a ti zui a. Shilloh Platt chu rang zet hian a inher vut a, pindan kil khata thutthlengah chuan a thu hnawk a, bang chu ngun zet hian a thlir ta tlawk tlawk a. A thinrimna leh huatna chuan a tur ut ut a, amah leh amah chu "Ka la thungrul ang, in zavaia chungah ka phuba ka la ang. Nang pawh hmeltha chungchuang nu, leiba tlak tur i nei sang ber. Ka duh ang thil ka tih zawh hma in thingthiin ka hmaah khawngaihna dilin i la kun mawlh ang," tiin a inhrilh mawlh mawlh a.

Chung hun tur chu a mitthla in a hmu a, Eddy leh Sudden te insiam mawlh mawlh pawh chu a hre chang tawh lo. Chutihlai chuan Quincy khan a rawn zawm ta bawk a. Zan thim hnuaih chuan Eddy leh Sudden-a chu an insiam sawk sawk a. Kawmawl buang pahnih lai takah chuan lu leng tawkin an rek pawp a, chuta an lu an han rawlh chuan kawmawl hmawr chuan an ke rek thlengin a khuh hnulh a.

Chutia an tih zawh chuan Sudden chuan chhuatlai takah chuan tui a leih huh a, chirhdiak dum zul nen a chawhpawlh a, an kut leh hmaiah chuan an hnawih ve ve a. An pheikhawk an phelh a, an pistol chu an kawngah an zep ve ve a. Sudden chuan a pistol paina kawnghren chu awmze nei taka Rusty melh pahin a bulah a dah a. Rusty pawh chu thil awmze hre takin a bulah a va ding a, "I saddle horn ah hmuh ka rawn tum ang," Sudden chuan a ti a. Rusty pawh chu a bu nghat a. Engkim an peih fel hnu chuan Sudden chuan "Tobias, enge ka an?" a ti a, Eddy chuan "I mak khawp mai," tih pahin a then sak a.

"Apache ho chu engtin tak i va ti dawn chu ni maw? Kan hriatpui der silo che a. Siamtu chuan hremhmunah min hnutchhiah em lo'ng chu maw," a ti zui a. Engkim an tih fel a, thil awmzia an in hrilh tawn vek hnu chuan thim zingah an tawlh chhuak ta a. Hla lo te an thleng hman chauh tih chuan hla taka khuang vaw thawm ri an hre ta a. Eddy chuan "Tum khat chetsual chuan kan tih tur zawng zawng hi a hlawhchham tihna ani mai a," a tih chuan Sudden pawh chu a lo bu nghat a. "I kal zel phawt ang," a ti a. A mitmeng chu zanah chuan a var rah a. Eddy chuan kawmawla inkhuh tlat chung chuan a tihdan tur chu a zir pah zel a. Zan thim hnuaiah chuan thil lianpui, taksa pawh nei lo, rawng buang kara thil dum lo lang zoh zoh, lu leh ban pawh nei lo, phung te pawh an ang ber awm e. Zawite hian "A nuihzatthlak in a hlauhawm fu awm hi," a ti sap a. A thianpa pawh chuan "Hlauhawm viau atan a tha hle," a lo ti sap bawk a. An pahnih chuan hmuithla ang maiin ram reh takah Apache mei chhemna lam pan chuan thawm nei hauhlo in an kal ta zel a. Apache ho chuan mei chu kilin a khat tawkin khuang chu an beng a. An inthawina hla ang zel chuan an lo thle bawih bawih a.

Meichhemna atanga feet sawmnga a hlaa an awm hnu chuan Sudden chuan a thianpa chu dinglama peng turin a hrilh nghal a. Amah pawh chu vei lamah chuan Eddy-a kal chak ang vela chakin a kal ve ta a.

Fimkhur theih tawpa kal chung chuan meiin a en phakna hmun thleng chuan an kal ta a. Ke vawikhat chheh sual palh emaw, lungte vawi khat rah sual palh a awm hlauh chuan an thi ngei dawn a ni. Piute mi pakhat, amah lo zirtir liantu in a zirtir thin ang khan a thiamna chi hrang hrang hmang chuan a hnaih phei zel a. Nakin deuhah phei chuan mei chhemna atanga feet sawm awm vel leka a dinglamah chuan thil dum hi a va hmu ta a.

He pa, Eddy-a hian Indian ho ang bawka trick chi hrang hrang thiam a ni a. Anmahni ai maha thiam hnem anih avangin tun thlenga hetiang hmuna mahni chauha khawsa thei hi a ni reng a. Sudden chuan muang changin number za thleng a chhiar a, a thaw halh a, a tih ang chian chuan Eddy pawh chuan a lo ti ve ani tih a hria a.

Number a chhiar zawh chiah chuan thawk a han la leh te te a, tichuan a thingthi ta a. A theih ang tawka mak chuan a au ta ruai ruai a. Chumi rual chiah chuan Eddy pawh hla lo teah lei atangin a rawn tho chhuak ve chiah a. Mak tak mai chuan a au ta ruai ruai a. Apache ho chu makti leh hlau em em a mengphawk hru chung hian an zuang tho a, an hlauh em avangin engmah tih nachang hrelo in reilote chu an han ding hlawm a. An hmanrua te pawh an keng na in hman nachang pawh an hre tawh lo. Chutihlai tak chuan Eddy chu hlauhawm em em hian a'n au chhuak leh ta nghal a. Texas tlangval pawh chuan a hlau deuh rum rum a ni. Chu veleh Indian pakhat chuan "Ayee, Death Face leh a puitu an ni," a ti a, an te ta chel chul mai a.

Chutah Sudden chu a han au leh ruai ruai a, au mai pawh chu duhtawk loin anmahni lam hawi chuan a zuang leh ta nghal a. Kawmawla inthuam chu thim zingah chuan taksa pawh neilo, mak leh rapthlak deuh hian a lang a. Apache ho chu hlauin an darh ta vek a. Sazuk rual thawn darh thut ang mai hian am darh huk a, an sakawr chungah an zuang kai a, tum lam pawh nei chuanglo in an sakawr te chu an lim ta puat puat a. He thihna lal hmuh phak loh a a hla thei ang bera tlan an tum ta ringawt mai a ni.

Indian ho tlanchhe vaivut khu luih luih karah chuan Eddy leh Sudden-a chu an rawn ding chhuak a, Eddy chu khel bengin a nui ngial a. "Khatiang ang reng khan ka la hmu ngai lo. Jim, I ngaihdan chu a ropuiin a zawngchhang thlak hle mai," a han ti a. Sudden pawh a in sum thei bik lo." Tawpna ni a thleng ta emaw an ti ngei ngei ang le, Lucky Luck pawh an lam a atang ta lo ah an ngai ang. Rawn fiah duh na huaisenna a neih a, rawn kir leh tumna an neih hmain i thlawk bo thuai ang," a ti a. A thianpa dara beng thak thak pah chuan an pahnih in station lam pan in chak takin an tlan ta puat puat a.

Station an thlen chuan an sakawrte chuan mai theih tur a peih sa diam in a lo in thlung ve ve a. Sudden chuan a rilru in," Rusty, i ti tha e," tih pah chuan a sakawr, Ngger-a chungah chuan a zuang kai nghal a, Eddy lam hawia a sakawr a pawh her chiah chuan Eddy pawh tleirawl zawk te it tur khawpa nalh leh inthazo tak hian a sakawr chungah chuan a lo zuangkai ve chiah bawk a.

Chak tak in an thiante sulhnu chhui chuan an tlan chhuak ve ta nghal a. Minute sawm lai an tlan hnu chuan an thiante pawh an um pha dawn ta a. An thiante pawh chuan an thawm te hriain an lo nghak mai pawh ni lovin an lo inring hle ani. An lo kalna lam hawi chuan silaite pawh an lo keng far a.

Rusty-an," Eddy leh Green-a te an ni e, in silaite dah thla rawh u," a lo tih chu Sudden chuan a va hre pha hman a. Texas tlangval chu Rusty leh Barbara te chungah a lawm hle a. Rusty tello chuan he tiang hmun hi an thleng thei lo ang. Quincy Shilloh te khan Rusty hi awm lo se chuan Apache ho rawn um kha pawisa lovin hetih hun hian Sudden leh Eddy chu an lo kah duh ngei a ring tlat a ni. An zingah chuan an tlan lut ta nghal a, an ding ve ta a.

Sudden chuan," Kan zuk thawng darh thei ta ani awm e. Darkar hnih khat emaw zawngin kan kal hma thei tawh ang," a han ti a. Rusty chuan," Chuti chu i kal vat ang ule," a tih ve leh chuan," Khalai ah khan ding rawh u," tih thupek chu Old Eddy ka atang chuan a lo chhuak ta a. Makti tak in an en thap hlawm a. Ram vut hian Shilloh chuan," Enge a awmzia? hun kan nei tlem......"a tih lai chuan Eddy chuan," Hun chu a tam mai, in zingah ka kal ve zel lo ang tih ka sawi tawh kha in hre reng ang a, hei hi kan in thenna tur chu a ni e, thiante u," a lo ti a.

Sudden chuan," Mahni chauh chuan vanneih sen pawh a harsa viau ang, i lu vun kha ani mai i chhuan tur chu," tia fimkhur taka a fuih chuan," Mahsela ka tan chuan engmah an ni lo. In Red Indian thiante in rawn hruai hma pawh khan ka lo khawsa tawh thin a, tha tak in ka khawsa thei tho a ni. Kei putar hi chu min zawng lo. Nang ni ho hi an zawn chu in ni. In zinga chen ai chuan mahni in ka him zawk ngeiin ka ring," a ti leh a. Quincy chuan hma deuh a sakawr pen chhuah tir pah chuan," I thusawi chu enge a awmzia? I......" a tih lai mek chuan Eddy chuan," Ka sawi kha i hria ni lawm ni? Ka kalbo dawn, in kal na tur lam pan chuan kal ula, kei pawh in ka kawng tur lam chu ka pan mai ang. Ka ngaihdan in pawm lo anih chuan......" tih pahin a rifle chu a kau rap a.

Quincy chu a tin nghal a. He putar che zia hian Sudden pawh a barakhaih deuh a ni ang, a phawk hra a. Kha leh chen kha amahin thlaler lungpui leh a silai chauh thiana lo neih tawh a nih avangin a ngaihdan ang zawm chu thain a hre ta a. Sudden chuan," Tobias, hetiang kawnga ngaihdan i siam chu pawi ka ti khawp mai. Engpawh ni se, tun tumah tal hi chuan min pui hle mai" a'n ti a. Eddy pawh chuan pawi ti awm tak hian," Jim, i chungah ka lawm khawp mai, mahsela mi lu lak hi ka hna ala ni ngai lo a. In hna pangngai chunzawm tur in kal ula ka ti mai che u a ni. Keipawh ka hna chhunzawn turin ka kal dawn. I hrethiam mai in ka ring" a ti leh a.

Shilloh Platt hian thinrim fe hian," A.....tar â pa, heta i chen chuan i luvun i inhih sak ang tluk ani, ti rawh u i kal teh ang u," a lo ti a. Quincy chuan kal mai chu a tlawmngai hle a. Mahsela a sakawr chu a pawt her tho a," A tha e. Sudden i kal nghal ang u," a ti ve ta bawk a. Sudden chuan," Kan chunga i thil tih avangin kan lawm khawp mai, Adios Old Timer," a ti ta a. Ngun takin an inen a,"Lawmthu sawi a ngai lo, Adios Sudden. I hnunglam kha veng tha deuh ang che," Eddy chuan a lo ti a," Ka lo tum ang e," tih pah chuan Sudden chuan a thiante kal tawh chu a um ve ta a.

Quincy chuan hma a hruai a, Shilloh leh Tucson chu dinglam leh veilam deuh ah chuan an kal a, a laiah chuan Rusty leh Barbara chu an kal a. Sudden-an Tucson -a a umphak chiah chuan Tucson chuan," Green, kan fihlim tawh angem?"a ti a. Sudden chuan," Sawi mai harsa tak a ni. Engpawhnise, Apache ho hi mi â ni leng an ni lo a, kan thil tih kha hriat chhuah hun an la nei ang. Ka beisei ber zawk chu Juano khan thlaler lam pan tur khawp chuan kan at hi ring lo sela," a ti a.

" Tichuan an kal loh na lam kha thui fe an chhui ang a. Chutih chhung chuan he lamah thui tak kan lo kal daih dawn a ni,"a ti a," Chu i beisei hle tihna a ni maw?" Mahsela Sudden-a chuan a chhang hranpa ta lem lo. Tunah tak chuan chu zawhna chu a pawimawh ber a ni lo. A pawimawh zawk chu Indian ho hian an rawn um a ngem? tih leh he thlaler ram, ram lum leh reh hi a zau vak lova, an tlan tlang hman maithei. Rawn um ta tehreng pawh nise San Petrito an thlen hman chuan Fort Opchise atanga sipai patrol velin Indian ho chu an rawn um darh hman a beisei awm. Sudden chuan a rilru te tein," Tak in," tih leh" Chuan-ah kan innghat a ni ber a," a ti mai a.

"Juano chuan an rawn beihthut mai chuan emaw hmun him tawk an thlen hma a Quincy leh Shilloh ten an beih thut mai, chuan" tia a ngaihtuah lai chuan Governor Bleke-a nena a kal hmaa an thu khawchang kha a hre chhuak zawk a. A nui sak a. Bleke chuan," Jim, i hlawhtlin loh chuan," a tih lai mek chuan Sudden chuan." He tawngkam tawi te CHUAN tih hi hman nuam tak zawng a nih hi. A hmasa berin mi pangai chu ni ila CHUAN he hna hi ka pawm lo phawt ang. Tin, he hna hi ka pawm lo a nih rau rau chuan, chu chu a tawk a ni. Chuvangin, chuan emaw ila ah hi chuan a tak a awm thei lo.Whisky tia in vuah kha i la nei a nih chuan leh pawi i tih lem loh chuan min pe la ilo in teh ang," hlim hmel taka a tih lai leh Governor pawhin a hlawhtlin duhsak em em a, a pek laite kha a mitthla in a hmu reng a.