Apache Fighter-8

Zankhuaa an kal hnu chuan thui tak an thleng hman a. Zing ni a lo chhuah meuh chuan an vel chu thlaler ram zau tak, lungpui sen vel vul leh khat tak tak a cactus thing awm te chu an ni mai a. Ni a lo tlangsan chuan hmun pharh tha tak an thleng ta a. Helai ram ah hi chuan an kal na chin hi tawp chin neilo hmel an pu vek ringawt mai a. An kal rei deuh hnu chuan an hmalam pawnlang tak takah chuan tui tling ni awm tak hi an hmu a; hei hi thlaler ram zau tak awm dan a ni ve reng a.

Sudden chuan "Sawtiang saw a ni fo tawh dawn a ni. Heta tang hi chuan engmah hriat tur dang a awm tawh lo, a lum tih mai loh chu," a ti a. An thil tawn thar, khawlum chu ngawi rengin an tuar tlawk tlawk hlawm a. An hmaa chawlhna nuam tak chu beiseina in an thlir reng ringawt hlawm a. Tlang sang tak, Dragoon chungah chuan ni chu tlangsang zel a. Thahnemngai taka a lumna chu chhuahin a em tlawk tlawk hlawm a. Rusty chuan Sudden chu a va pan hnai a "Jim, he ram hi kal chhuah chu i rilruk chu a ni amaw? A va han zauh hmel ve!" a ti a. Sudden chuan "A atthlak ngawt mai ti raw? Hmun thenkhat laiah chuan mel 60/70 a zau te a ni a. Mahse he thlaler hi "U" ang deuh hi a ni a. A tawina lam panin kan kal mek a ni. Chulai chu mel 30 emaw vel chauh a ni ang," a ti a.

"He ram kan kal chhuah hnu hian ram dang pakhat kan paltlang leh a ngai dawn a. Mahse Apache ho khan Tucson khaw lam pana kan kal an rin a, chu lam hawia an kal hlauh chuan chulai ram chu kan paltlang hman ang. Fort Cochise kan hnaih tawh chuan Indian ho pawh hian min rawn kah mai chu an chak vakin ka ring lo. Sipai hoin kan thawm an hre vat dawn si a," a ti leh a.

Rusty chuan "I ngaihtuah dan chu a tha khawp mai. Mahse Quincy hian mi a tibuai ang reng riau alawm mawle. Fort Cochise lut tur khawp hian a at ka ring thei tlat lo," a ti a. "Ka ring chiah lo, mahse duhthlan tur dang kan nei tlat lova, engpawhnise, kan la hre chhawm mai ang chu," Sudden chuan a ti ve mai a. Ngawi renga thui tak an kal hnu chuan Rusty bawk chuan "I ruahman anga thil a kal loh chuan Barbara Davis chungah enge lo thleng ang tih hi ka ngaihtuah thin a, a tan a pawi dawn em asin," a ti a, Sudden chuan "Buaina pumpelh zawngin thil ka ti reng a ni. Quincy leh Shilloh te hi thil ho mai mai vang chuan indona hmunah an kal hauhlo a. Tin, he lawmman atana pawisa an tih pawh hi ka duhlo a, ka kal chhan pawh ani lo," a ti a. "Enga ti nge chu chu min hrilh kher?" tiin mak ti takin Rusty chuan Sudden chu a en a. A thianpa hmel a en chuan a bu nghat a. "A ni khawp mai, mahse an ni hi chuan an ring chuang lo ang. Sudden-a i ni tlat a," a ti a. Sudden chuan "A dik alawm," a ti mai a. A aw ka chhuak avang chuan Rusty chuan Sudden chu a han en leh a, aw nem tak hian "Sudden-a chan chin an sawi hi ka awih ngai hauh lo a, Jim, mi sual tak ni chuan ka ring theilo che a ni," a ti a. Sudden chu a nui mai a, a nui hmel avang chuan la naupang tak hian a lang nghe nghe a.

Sudden chuan "Rusty, ka lawm khawp mai. Ka chanchin zawng zawng hi hria la a tha khawp mai. Rilru chhe deuh i put hunah phei chuan ka chanchin hi i tan a tangkai khawp ang," a han tih chuan a hmel te pawh chu a lo danglam zo ta a. An kal pah chuan a chanchin chu a hrilh ta zel a. Rusty chuan ngun takin a ngaithla a, chu tlangval sam dum hlarhin mitthi tur hnena a thu tiam te, a thattu pawh hre chianglo a a zawn dan te, heti taka a lo hmingthan dan leh a chhe zawnga a than vanga helai ramah amah chauha a lo khawsak dan zawng zawng te leh amah rawn cho tute a lo nghaisak dan te a hrilh ta vek a.

A sawi zawh chuan Rusty chuan lu thing nawk nawk chung chuan "Jim, ka sawi tawh ang khan tunah chuan i lam ka tang tlat tawh ang. Heng kan mihringa te hian hun remchang an hmuh veleh nuai bo che an tum ngei ang," a ti ta a. "Chutiang rilru chu Shilloh hian a put ka lo ring reng a. Tha taka sawiho dan kan ngaihtuah a ngai anih chu," Sudden chuan a ti mai a. A rilru te te chuan Rusty chuan "Heng thil hi ti thei an awm ngai anih chuan Jim chauh hi a ni ngei ang. Nangmahah hian rinna ka nghat a, i thu min pek ang zelin ka ti ang," a ti ta nauh nauh a.

Chumi hnu chuan muangchangin Barbara Davis chu a pan ta a. Davis hnena thusawi a tum lai chuan Barbara pawh chu a lo nui sak a.

Shilloh leh Quincy chuan chet zui zel dan tur an lo sawi dun ve malh malh bawk a. Tucson chuan an thusawi chu a lo ngaithla ve reng bawk a. Shilloh Platt hian phuba lak a chak em em tawh a. Tin, Cochise khua hi thlen a tum reng reng lo bawk a. Cochise a thlen vaih chuan sipai ho nen thu khirhkhan tak tak sawi tur an ngah dawn vang a ni. Tin, Quincy pawh hian sipai hmel hmuh a duhlo chang niloin a theih chhung chu a tan pumpelh zar zar a tul tlat.

"Thlaler ram kan pelh hman phawt chuan kan buai tihna a ni mai. Mr. Sudden hian Cochise ah kan hmel kan lan ngamlo tih a hre reng a, mahse Cochise lam min pan pui a tum tlat a. Chumi awmzia chu kan lawmman lak tur hi kan chan loh dan a ngaihtuah tihna a ni. Chumi hma chuan amah hi kan thangkamah awh tir a ngai a, tunah hian chu chu tihhlawhtlin ka tum mek a ni," Shilloh chuan a ti a. Quincy chuan "A thil tum chu engtia thulh tir nge i tum?" a lo ti a.

Shilloh chuan "Ngaihdan ka nei alawm. In ngaihtuah buai duh suh," tih pah chuan a hnunglam chu a thlek zawk a, Tucson chuan an tawng chu a hre phak lo tih a hriat chuan "Chumi rual chuan saw pa lian si, â si saw kan nuaibo ve nghal tur a ni. A tel ve na hauhlo turah ka'n inrawlh tir nghe nghe a nge," a ti a.

Quincy chuan thaw huai chung chuan "Chuti tur maw? Sudden leh Tucson-a kan nuai bo anga, chumi hnuah chuan engtin nge ni ta zel ang?" a ti a. Shilloh chuan "Kan kalkawngah kan chingfel mai ang chu," verther taka meng leh nui chung chuan "Khawthlang lam hawiin kan kal ang a, thlaler kal tlangin dinglamah tlangsangah kan chhuak ang," a ti a. Quincy chuan hlim tak hian "Wilderness-ah maw? My God! Ni dawn tak e," a ti a. "Shilloh, i fing hle mai, Wilderness khua,Sheriff leh Dan reng reng awmlohna, tuma rawn inrawlh theihlohna hmunah rei tak chhung chu zalen takin kan khawsa thei tawh ang chu," a ti a.Quincy chu hlim takin a bu nghauh nghauh a, Wilderness khua hi Tucson khaw hmarlam mel 20 vela hlaa awm a ni a. Sculphunter te, tualthah hmang leh ruk ruk chingte leh misual tinreng fuan khawmna hmun a ni a. Tucson khuaa inlan duh tawh lo ho chuan he khua hi an pan khawm mai thin a ni. Chu khuaah chuan eng dang mah a awm lo, zalen takin an nung thei mai thin. Chu khaw tereuh teah chuan outlaw ho chu anmahni danin an in vawng ve mai a. He khuaa lut tawh reng reng chuan dan bawhchhetu hremna chu thihna a ni tih an hriat a ngai phawt a ni.

Shilloh bawk chuan "Chu hmun kan thlen hun chuan kan nula pa, Davis-a hnenah lehkha kan thawn anga, i sawi tawh ang khan pawnpui hnuaiah nuam takin kan lo nghak veng veng tawh mai dawn a ni," a ti a. "Anih leh kan tlangval hi engtin nge ni ang?" tiin Quincy chuan a zawt leh a. "Ani hi maw? Nula hi a hmangaih anih phawt chuan tirhkah velah kan hmang mai a ni ang chu. Wilderness khua dama a thleng ve anih chuan," Shilloh chuan a lo ti a. A thusawi awmzia chu Rusty hian Wilderness khua hi dama a lo thleng anih pawhin thah tho tho tur a tihna a ni. Nunrawng leh sual tak, Quincy meuh pawhin chu chu tha a ti chiah lo . A thianpa in a sawi lai pawh chuan tim deuh hian " Chu pawh ni teh reng se, Green-a thah hi thil awlai a ni hauh lovang. A pistol nen hi chuan a rang teh ania," tiin Shilloh chu a hrilh leh a. "Rang teh reng e," tih pah chuan a nui a. "Silai hmanglo in kan that dawn alawm. Mr. Sudden hian silai telloin eng chen nge a awh dawn kan hre dawn alawm," Shilloh chuan a ti a. "Engtia tih nge i tum?" Quincy chuan mak tih hmel zet hian a han ti leh a. Shilloh chuan "Keiin ka that dawn hleinem, Tucson-an alawm khawih dawn," a lo ti thuai a.

Makti zet hian Quincy chuan "Tucson-an maw? A hma pawh khan Sudden-a lamah a tan tawh kha. Engtin nge ni ang?" a ti hu a. Shilloh chuan "Tucson-an a ti fel vek mai ang, inti buai duh suh. Ka kutah dah vek mai rawh," a ti ta a.

An thil tih tum chu lawm tawk tak hian Quincy chuan a sakawr chu a ti muang deuh a, Shilloh chu amah chauh in a kal ta a. A thil ngaihtuah chu a hlawhtlin ngei ringin a tawpah chuan nula pawh hi a ta ni ngei turah a ruat ta a. A thisen lum tak avang chuan he nula, ngaihno bei tak mai hi a chakin a chak et et mai a. A thuhnuaia dah theih dan kawng hmuchhuak tawhin a in hre bawk a. Chu chu a taka a thlen hunah chuan a khawngaihna a la dil dawn a, a tawngkam ngilnei pawh a la dil dawnin a la beisei ang. A duhtawka a khawsak pui hnuah a pa hnenah a pe kir chauh dawn a ni.

Chumi zanah chuan thlaler hmun biru lai deuhah an riak a. Zan reilam ni tawh mahse chhun nisa khan lungpui te a lo em hneh bawk a, a la lum vut vut a. Naktukah chuan thlaler ram bawka kal an la hmabak dawn a. Khua a lumin an tui a hal tehlul hlawm nen Sudden-a chuan tui chu a khuahkhirh hle mai a. Chu tak chu buaina chawh chhuah nan Shilloh chuan a duh tlat a.

A beisei ang ngeiin Sudden chuan tui chu a roh hle reng a. Mei an chhem ngam siloh avangin chaw te pawh a daiin an ei mai a. An chawhmeh lah chu a al laileng khawp mai si a. Chuti anih chuan an zinga palian ber Tucson-a tui chu namenlo in a hal ngei dawn a. Chumi hre ran chuan Shilloh chu ti fuh inti fe hian a kawmawl chuan a in zial ta a.

Khawvar hnu, ni chhuah hma chuan an tho ta hlawm a. Shilloh chuan tui chung chang thu bawk kha a sawi chhuak leh ngat a. Sudden chuan "Thlaler ram hi kal tlang kan tum anih chuan tui hi far khat pawh kan in rih tur a ni lo. Keini ho ai chuan sakawr hian an mamawh tam zawk dawn bawk a. Chung zawng zawng chu keimah ang bawkin i hre tho a, chuvangin sawi buai tawh loh tur a ni " a ti a. Shilloh mitmei denchhen chuan Quincy chuan " Chutiangin min ti thei lo ang. A tlem berah no khat tal chu min pe leh tur a ni," a lo ti a. Sudden chuan "No khat mah kan sem tawh lo ang. Chu chu thutawp a ni," a ti a. Chutah Shilloh chuan "Sudden, i tan chuan a tawk a ni maithei. Anih leh Tucson-a hi engtin nge ni ang? Amah a len bik em avangin midangte ai chuan tui a mamawh tam zawk a ni," a rawn ti leh ta a. Chutih lai chuan Tucson-a chuan "Ka tui a hal teh ania," a rawn ti ta bawk a.

"A pawi khawp mai, Tucson," tih pah chuan Sudden chuan a lu a thing a. "Midangte dawn ang tho nang pawhin i dawng ang," a ti leh a. Quincy chuan "Sudden, ani zawng ngaihhnathiam mai teh," tih pah chuan a inher a, Tucson-a hnenah chuan "Tucson, kal la, nangmahin va in ve mai rawh," tiin a fuih ta a. Tho uaih pah chuan Tucson chuan "Vawikhat chu ka'n in leh ange," a ti a, Sudden chuan chang fek fawk hian "Tucson, tum duh ting suh," a lo ti a. Mahse Tucson-a chu a rawn ding chhuak ta tho a. "Khai a, Green, no khat avang ngawt chuan engmah kan ang chuang lovang," tiin a hnial ta a. Chutih lai chuan Shilloh chuan a lo fuih sek a. "Kal rawh, kal zel rawh. I hlau em ni? Kal zel ta che," a lo ti sek a.

Tucson-a chuan a lu a thing a, a lei ro tak chuan a hmui chu a liak lup lup a. Tui in a duh a ni. Ngaihdan nghet tak a siam ta. Tui chu a in ngei tur a ni ringawt. Shilloh-a thusawi kha a dik a ni. Midang aiin a lian bik a, tui pawh a mamawh tam bik a ni. A tuihalna chuan engmah a pawisak tir tawhlo. "Tumah ka hlau lo," a han ti a. "Tucson," tih pah chuan tuma hmuh hmanloh chuan Sudden-a kutah chuan pistol hi a rawn chawr chhuak nawlh a. Tucson-a awm zawnah chuan a tin ta ran mai a. Quincy chuan nuihzat awm deuh hian "Tucson, tui chu in rawh. Sudden khan pistol kha a tih puah vaih chuan Apache ho, heta tanga mel 40 a awm pawhin an hre ngei dawn a, a hmang ngam chuanglo ang," a rawn ti a.

Tucson-a chuan Sudden chu a en ngun leh zual a, hmalam panin a pen hret a. "Green, tih nat che hi ka duhlo asin," a ti a, "Chuti pawh chu nise ka thusawi kha chu a la ding reng, lo kal duh suh," zawi raih si, thupe aw tak hian Sudden-a chuan a ti leh a. Mahse Tucson chuan "Green, tui ka in dawn alawm mawle. Ka in ngei dawn a ni," a ti tlat a. Sudden chuan "Fiamthu a ni lo. I tum tlat anih chuan tui i in hmain kei hi min tih kian hmasak a ngai ang," a ti a. Tucson-a pawh chuan "Ka kawng dala i awm loh hi a tha zawk ang," a ti ve a.

Tucson-a khawsak dan chuan Sudden pawh a ti mangang thelh a. Tucson-a hi hetiang ngaihdan han siam mai chi a ni lo. A hma zan lawk khan inhriatthiamna tha tak neiin an awm a. Mahse tunah chuan chu chu a awm ta lo. Shilloh Platt-a fuihpawrhna avangin a lut thuk lutuk ta tlat.

Sudden chuan a hmaa palian pui ding awm len lam leh san zawng chu a teh ru nauh nauh a, amah aiin nasa takin a lian zawk a. A san zawng pawh inches ruk zetin a sang zawk bawk a. Sudden-an a teh ru vek tih Shilloh Platt chuan a lo hriat chuan a lo nuih el vel a. Sudden chu a lo sawi thaih a. "Sudden, Tucson kha khawih hauh suh. Bung hnihah a bung ngei ang che," a han ti a. Rusty pawh a rawn ding chhuak a, a pistol kawm chu vuan deuh thaw in Sudden chu a rawn pan hnai a. Mahse Sudden chuan a lo vai kiang a."Silai nena inbeihna a awm tur a ni lo. A hlauhawm lutuk," a lo ti a. "Anih leh tui chu in mai rawh se, chuti lutukin a pawimawh tawh lo ang," Rusty chuan a ti a.

Mahse Sudden chuan "Tui thua inhnial pawh kan nih tawhloh hi. Kan din chhuah leh chhuah loh tur thu anih zawk hi. Shilloh-a hian Tucson-an ka ruh pahnih khat a tih tliah theih a beisei a. Chutianga a tih theih hlauh chuan tun atang hian hruaitu nihna chu kan changlo nghal dawn ani," a ti a. Rusty chuan "Duh leh chutiang pawh chu lo ni ta se enge a danglamna tur teh chiam? Barbara kan chan phawt ahnu," a lo ti a. Sudden chuan "Chu pawh chu kan chiang ngam chiah hleinem," tih paha Shilloh Platt-a a melh zawk chuan a thusawi dik zia chu a hmu chiangin a inhre ta. Shilloh hian Tucson hi hmanruaah a hmang tih a hre chiang ta.

Dam thlap hian "Tucson, hmanruaah an hmang che tih i hria em?" a ti a. Tucson chuan lu thin pah hian "Ka hriat zawng chu tui halin ka thi tep tih hi a ni. Sudden, enga ti nge i kal kian mai loh ni? Tichuan tui chu ka in mai dawn alawm," a ti a. Sudden-a chuan ding turin a hrilh leh a, a rilru chu a siam fel ta.

Sudden chuan "Tucson, tah khan ding rawh," a tih leh chuan Tucson pawh chu makti takin a ding a, mahse a hma ami chu a zuan ta tho a. Sudden chuan a theihtawp tak zeta na chuan Tucson-a khabe ah chuan a dawm chho ta nghek a. Tucson pawh chu paih ang thlawrh hian a hnung lamah chuan a tlu ta a. Vaivut chu a khu ta rum rum mai a. Sudden chuan thip fe hian a melh ran a. Tucson-a chu rei vaklo a mu a, a maimitchhing tlat a. Sudden chuan a tum ruh viau na a, a duh tawk mai dawn emaw a ti nghe nghe a.

Mahse Tucson chu a rawn che leh tan ta a. A kut pakhata in beng kang hian a rawn thingthi a. A hmui thi a vaivut kai chu a nuai mawlh mawlh a.

Sudden-a chu muang chang hian a rawn en a, hlim hmel tak hi a pu ta tlat mai a. Sudden-an chu chu a hmuh chuan Tucson-a hian inbeih a peih ta a ni tih a hre thiam mai a. Chu palian pui chuan bawng kawlhin mi a bei ang hrim hian Sudden-a chu a bawh phei leh ta ruak a.

Mahse Sudden-a chuan chu kut chak tak man theih loh tur chuan a lo tawlh sawn hram a. Tucson-a nghawng hnunglamah chuan a lo nam vak ringawt a. Sudden-a chance neih chhun chu he kut chak tak in man tir loh hi a ni deuh ber. A man fuh hlauh chuan thingtang ro elh tliah ang lek fang hian a thuai bung mai dawn a ni. Vawi tam tak Tucson-a chuan man tumin a bei a. Mahse Sudden chuan a lo pumpelh thei zel a. Chu bakah a hmuiah te, a biangah te a lo hnek siah siah thin a.

Thisen te chu Tucson-a hmaiah chuan a luang nuaih tawh a. A mit leh lam phei chuan khua pawh a hmu thei tawh lo a ni. A mita thisen hrukfai ngai leh thin chuan a ti tuan fum hle a. Han man fuhin han che tha deuh dawn mahse Sudden chu a tal pit in a insaseng leh hlauh thin a. Chuti chung pawh chuan tum hnih chu Tucson chuan Sudden chu na fe hian a vai fuh hram a. Sudden chu a pai tawng tawng a, leiah a tlu tawp tawp a. Mahse a duh anga a nanchin hmain Sudden chu a insaseng hman zel a. Chau hle mahse Sudden-a hian din hram hram a tum tlat. Chuti lo chu he paliana hian khawngaihna tel hauhlo in a sawisa dawn tlat si.

Tucson hian an inbeih chhan lam a ngaihtuah tawh lo. A hliam vel vang chuan rilru mumal a nei tawh lo a, a tawp thlen a duh a ni ringawt. Hah theilo, chau theilo leh dan theih loh Tucson-a chuan Sudden chu a um kual a um kual a. Vawikhat chu Sudden-a kawrah a man fuh a, hneh zet hian a phih ngheng mai a, hnehna aw rawl chhuaha a au dawn lai tak chuan Sudden chuan na em em in a nakah a hnek thuai mai a. Thawk harsa tur khawpa a hnekna ngaia a han hnek leh chuan Tucson-a pawh chu a thaw kawk kawk a. A lu a kun deuh ngut lai chuan Sudden chuan a khabe ah na deuh hian a dawm chho leh siah mai a. Tucson-a meuh pawh a hnungtawlh dawrh mai a. A lu a thing nawr nawr a, Sudden pawh chu a hnungtawlh thuai a, a thaw ham ham a, inring takin a lo nghak leh ta a.

Tuman he savawm lian leh chak tak hi an tuk zal thei lo a ni ber. Tucson-a chuan a rawn bei leh ta thut a, mahse Sudden chuan a nghawng lian takah chuan theihtawp takmeuhin a lo sat nghek mai a. Tucson-a chu a thingthi leh ta hnawk mai a. Mahse a hmaa mi anglo takin a inher vut a, Sudden-a ke chu a va man thelh thuak a. Tucson-a awmah chuan na zet hian a pet leh a, mahse Tucson chuan tawp mai a tum hauh lo. A vir vel thuak thuak a, a tawpah chuan Sudden-a taksaah chuan a man fuh ta a. Phelh rualloh leh na em em mai hian a man bet ta tlat a. Sudden-a tan chuan beisei tur a vang sawt hle mai. Thawk harsa a ti tanin a hmai te chu a sen ta tawn tawn mai a, reilo teah nikhaw hreloin a awm mai dawn tih a hre ta a.

Hnehna awrawl nena au chung chuan Tucson-a chuan Sudden chu a pawm kang a, hneh zeta leia paih nghek tum chuan a hnungtawlh a, chutih lai chuan Sudden chuan a chakna zawng zawng sawm khawmin a ke chuan lungpui chu a tlawh vak a, a rinloh taka Sudden-an tha a thawh leh avang chuan Tucson-a chu a pai uan uan a, tlemin a lo inthlahdah deuh bawk nen, chutih lai tak chuan Sudden chuan a khing hnih hian Tucson-a bengah chuan a chum ta ngheng mai a. Tucson-a chuan na a ti hle a ni ang, a au chhuak ta hial a. Sudden-a hnekna chu tuboh a chhut ang maia na a nih avangin Tucson-a chuan a vawnna chu thlah in a beng chu a dawm ta zawk a. Sudden-a pawh chu a inthiarfihlim thei ta a. Boruak thianghlim chu thahnemngai tak chuan a hip mawlh mawlh a. A thlan te chu a luang zawih zawih a. A ban te pawh chu a khawng thum tawhin a hria a.

Tucson-a pawh chu a chau ve hle a, mahse nghet tak hian a ding mauh mai a. A mitko ah chuan thisen hi a kai nuaih a, a hmui phei chu a kak ruah tawh a. Sudden chuan Tucson-a chu a pan hnai a, na zet zet hian a dulah a va hnek zawt zawt a. Tucson-a chuan thawk harsa a ti hle a, mahse chuti chung pawh chuan man beh leh tumin a bawh zel tho a, Sudden erawh chu inthiarfihlim tumin a tawlh zel thung a. Quincy leh Shilloh te chu a duh aiin a va hnaih ta. A dinhmun hlauhawm zia chu a hre hman hram a. Mahse a tlai lutuk ta. A insaseng hman tep tih chuan Quincy chuan a hnungah a rawn nam vak a, Tucson-a hmaah chuan a thingthi phei hnawk a. Quincy chuan "Mi â pa, that nghal law law rawh," a ti zui a. Tucson-a chuan au ruai ruai pah chuan a man a, feet thum vel dawn laia sangah chuan a chawikang te te a, lungpui den nan a hmang ta a.

Tucson-a chu a ding luah a, a beihpuipa mu reng chu a thlir vung vung a, "Khatianga in rawn tih kha a ngai hauh lo, keimah pawhin ka ti thei tho ang," a ti a. Barbara chu Sudden-a, engmah hreloa mu reng bulah chuan a va thingthi vat a. Quincy chuan thinrim fe hian "Mi â pa, a sawisa chau lo chauh che a nih tawh kha. Rawn nam lo phei ila chuan zawi muangin a sawisa hlum der ang che," a ti tuarh a.

Inhera kalsawn mai a tum lai chuan Tucson-a chuan a rawn man a, a khai kang leh ta vaw vaw a, "Ka hneh leh hneh loh kha i tan enge a sawtna awm? Enge nangmahah danglamna awm chuang, Quincy?" a ti a, a khai kang ta reng a. Quincy chu a tal laih laih a, Tucson-a ban te chu a chum vak vak a,mahse engmah a sawt chuang lo.

A tham nat em avangin Quincy hmel chu a lo danglam ta vek a. A mitmengte pawh chu a pual tan ta bawk a. "Mi â pa, min thlah rawh, min thlah vat rawh," a ti tuarh tuarh a, Mahse Tucson-a chuan hneh zet hian a thing lawp lawp a, "Mi â pa ti chuan min ko tawh suh," a ti a.

Shilloh Platt chuan "Tucson, thlah vat mai rawh," a rawn ti a, a rawn kal hnai nghal a. "Zawng lian pa, thlah vat rawh," a rawn ti leh tuarh a. Chu halfbreed pa thusawi chuan Tucson-a pawh chu a rawn ti harh deuh a ni ang, Quincy chu a thlah ta a. Leiah chuan a tla hnawk a, a hmui atang chuan thisen hi a rawn chhuak zaih zaih a.

Thawh tum awm tak hian a inher a, a delh loh lam zawk a kut chuan a pistol chu a chuh ta thut a. Tucson-a awm bawra tin chung chuan a hmet puak ta a. Silai mu denna avang chuan Tucson chu a pai dawrh a, a awm zawnah chuan thisen a rawn val chhuak ta pawp pawp a. Mahse Tucson-a chuan tluk mai chu a hreh hle a ni ang, a ding mar hram hram a. Platt-a man tum niawm tak chuan a ban phei a, mahse engmah hrelo leh chakna reng reng neilo ang maiin leiah chuan a tlu ta tawp a.

Barbara pawh chu hlauin a te thawt a. Quincy thinrim rawn dingchhuak mit meng chu hlauhawm tak a ni. A kuta pistol keng chung chuan a ding khur hlawk hlawk a. A hmel atang chuan pawisak reng reng a nei tawh lo tih pawh a chiang hle a. A thinrim khaw hmulo hian a hmaa ding apiang thah zel a ngam a, a tawpah amah chauh a inzuah mai dawn em ni ang le?

"Tunge lo dingchhuak leh dawn? Tunge inhnial buai leh duh?" tih pah chuan thisen chhuah chak hliah hliah men a meng chung chuan Rusty-a lam chu a hawi a. "Nang kha sawi tur i nei em? I neih chuan lo ding chhuak la, i silai kha han chuh chhin teh. I han sawi fel nghal vek teh ang," a ti a. Shilloh Platt chuan "Ngawi chip cham rawh. Ka thu thu a awm i ni a, ka thu pek ang ang che in ti ringawt rawh," a lo ti ta hmiah a.

Rusty chuan a rawn en a, dam deuh thluam hian "Anih leh i thu ang zelin Apache ho hian thil an tih i ring em?" a rawn ti a. Chu tlangval zawhna dam dap chuan Quincy rilru pawh a hneh hle. Mak ti awm hmel hi a pu a, intih harh tum ni awm tak hian a lu chu a thing nawr nawr a. Tualthah chak mit meng a put pawh chu a reh tan ta. Rusty bawk chuan "Quincy, tunah chuan thil engkim i ti langsar zo ta. I silai kah ri khan Apache ho, mel sawmhnih bial chhunga awm te chu rang takin a rawn tir tawh dawn a ni," a ti leh a. Quincy hmel pawh chu a danglam tial tial a. Shilloh chuan Quincy thinrim khaw hmulo a reh tan ta tih hriain a rawn pen chhuak a. Pistol hum chung hian Rusty hnenah chuan "I pistol kha a paina chawp khan thlauh thla rawh," a rawn ti a. "Tunah ti nghal rawh," tiin thu a pe zui a. Rusty chuan han phelh thlak mai chu a tum hmel lo hle na a, Barbara chuan thisen chhuah leh a hlauh hmel em avangin Rusty chu a banah a rawn vuan a. Rusty chuan then sak chungin a pistol paina kawnghren chu a phelh a, leiah chuan a tla thla ta a. Shilloh chuan a va chhar a, a sakawrah a dah ta a.

Shilloh chuan "Nula, i ti tha khawp mai. Quincy, hruizen han la rawh," a ti a. Rusty chuan "Platt, ka hrethiam hauh lo mai," a lo ti a. Mahse Platt chuan "I hrethiam tur a ni. Quincy, khalaia nawhchizuar fapa, sam duma kha ngun takin phuar rawh. Rusty, i sawi anga Indian ho te an lo kal anih ngat chuan hun khawhralna tha tak an nei tihna a ni dawn a, chutih chhung chuan thui tak kan thleng hman mai ang," a ti ta a.