Apache Fighter-9

Rusty chuan Platt chu makti takin a en a. A rin phak bak thil lo thleng chu mak a ti hle a. "Platt, Pathian hmingin ka ngen a che. Sudden hi Apache ho kutah i hnutchhiah ngawt thei lovang," a rawn ti leh a. Mahse Platt chuan a pistol chu a kau a, nula lam tin chung chuan "Sorry, nula nunna hi i thap phal em ni?" a ti ta a.

Lungawi lo leh makti tak chung chuan Rusty chu a inher sawn a. Shilloh chuan "I thap phal ka ringlo reng a ni. Sakawr chungah khan chuang vat rawh. Indian zawng rual an lo thlen hmain i tlanchhuak vat ang u," tih pahin inti thei fe hian a nui a. Tucson-a mu reng leh Sudden-a engmah ti theilo a let reng chu a thlir leh thuak a. "Sudden, Indian hoin meipuiah an hem hmin che ka beisei. Engpawh nise, thil pakhat chiang sa a awm. Min rawn ti buai leh ngai tawh dawn lo tih hi," a ti a. Quincy chuan sakawr chu a kai phei a. "Green-a zawng, ka phuar hlawm tha khawp mai," Shilloh hnenah chuan a va ti a. "Kan mi â pa chuan ka ban a elh tliak hman thelh a ni," a ti leh a.

Shilloh chuan "Theihnghilh vek rawh. Kan mamawg leh tawh dawn chuang hleinem," a lo ti vat a. Engmah dang sawi leh tawh loin an sakawr chu an kheng kal a. Rusty leh Barbara chu a laiah an kal tir a, Quincy-an hma a hruai a, hmalam pan chuan an kal leh ta a. Chung ho vaivut pal khuk pawh a la reh fello tih chuan Sudden pawh chu a rawn rum tiah tiah a, a rawn meng ve leh ta a.

Van sang takah chuan mulukawlh hi a vir kual a vir kual a, zawi zawiin lei lam chu a pan hniam zel a, lungpui chungah chuan a rawn fu ta chut a. Hlim awm tak hian a hram vel a. Mulukawlh hi dawihzep tak an ni a, leia mi ruang an hmuh hi an tum hma hian an thih chian leh chian loh hriat an tum hram hram thin. Sudden leh Tucson-a te hi an chet miah loh avangin chu mulukawlh chu Sudden-a bul lungpuiah chuan a rawn fu ta a ni.

Chu sava lian tak Sudden-an a hmuh chuan, a thil tum leh beisei a hriat chian em avangin anchhia a lawh lo chauh a ni. "Khilaia sava khi ka la dam tih ka hriattir vat loh chuan rang takin ka mitmu hi min rawn kher chhuah sak ngei ang," a ti rilru a. A kut leh ke phuar chu phelh tumin theihtawp chhuahin a tal vel a. Mahse Quincy chuan a lo tawn nghet kher mai. Chuti maia tal put chi a ni hauh lo mai.

Theih tawp chhuaha a han beih leh fat fat hnu pawh chuan engmah a ang thei lovin chhete pawhin a tawlhsawn phah chuang hauh lo. A thlan te chu a tla pheng phung tawh mai a. A chhak lungpui chunga mulukawlh fu pawh chu a rawn sawt hnai thurh thurh a, van sang lamah chuan a dang pawh an rawn vir kual sek tawh a. Vawilehkhatah a bula mulukawlh chu a hram vak a, a thlawk chhuak ta daih mai a.

Chu chu Sudden-an a hmuh chuan rawn thawng tho tu an awm tih a hria a. Chu sava rawn thawng tho tu chu amah rawn puitu tur chu anni hauh lovang tih a ring nghet nghal a. A hnu reilo teah chuan a bula lungpui chungah chuan awm ve sa reng niawm tak hian Apache pasaltha ho chu an rawn pen chhuak ta a. Fimkhur tak hian an rawn pan a, an thal chu an kau sa ran bawk a. Sudden-a chuan chu thal tawi te chu a hmawrah tur hlauhawm tak an hnawih a ni tih a hria a. Apache pakhat pawh chuan Tucson-a ruang chu a va pan a, dimlo bak sak hian a chhir let tawp a. Chutia a han chhir leh chuan Tucson-a pawh chu na tuarin a rawn rum chhuak ta a. 

Sudden-a chuan thi ngaiha a ngaih tawh avangin chutia Tucson-a rawn rum chhuak leh chu mak a ti hle a. Tucson-a chu a la dam a ni tih a ngaihtuah zawr chhung chuan Apache pakhat chu a bulah a rawn ding a. A mitmeng atang chuan huatna namen lo hi a rawn lang chhuak a. Engmah ti thei lo Sudden-a chu tin chung chuan a thal chu a theih tawpin a kuai kul a. Chutihlai chuan "Ti suh," tih thupek a hre ta. Chu aw chu Sudden-a chuan a hriat thin tawh aw a ni. Chutia rawn ti tu chu hmuh tuma Sudden-a a hawi chhuah chiah chuan Juano chu lungpui phen atang chuan a rawn ding chhuak a. A mitmeng atang chuan hlawhtling inti hmel hliah hliah hian a hriat a. Juano hmel han hmuh chu Sudden-a tan chuan lawmawm ang reng tak a ni. Apache pakhat khan tlema tlemah a thal kha a thlah lo chauh a ni si a. Vawi tam tak a mit ngeiin mi an that lai lo hmu fo tawh thin mahse, he thal tur nei hmanga thah hi chu a duhthusam a ni lo. Hetiang tur hian zawi zawiin mi a fan a, zawimuangin, na tin reng tuarin an thi thin a ni. Vawilehkhata thih aiin a let tam takin a hrehawm a. Inbeihnaa hneh lo zawka tan chu thih a ni mai a, mahse tur thil tih theihna a thlaler nisa hnuai a thih chu han ngaihtuah mai pawhin Sudden-a chu a tirilah a tim uaih uaih mai a ni.

Mahse a hlauhna chu a hmelah chhete mahin a lan tir lo. Apache hotupa, Juano lam chu hawiin "Kan in hmuh lohna a rei leh ta hle mai," a han ti a. Sudden-a hlim hmel Juano-an a hmuh chuan a thin a rim hle a. A lo kal hnai a, "Nakin lawkah chuan i nui tawh lo ang," a rawn ti a. Sudden chuan "Hriat ni suh le. Kei chu thil reng reng hi a hlimawm lam leh a nuihzatthlak zawngin ka la thin a. Chu chu ka chin ve dan a ni," tih pah chuan a then sak a. "Tun hnai maiah khan phung in hmu nghe nghe lo maw?" a han ti zui a.

Chu zawhna chuan Juano chu a deng na deuh a ni ang, a hmel chu a rawn dur khuih khuih a. A thisen zam te chu a rawn pawng tawlh tawlh a, a mitmeng chu huatna hlirin a khat a. Sudden chuan "Ka kal thui lua hret em ni aw?" a ti rilru hman a. Mahse Juano chuan a thinrimna chu harsa ti fe hian a beng dai leh thei ta a. Juano chuan "Tum hnih Apache ho i bum ta. A tum thumnaah chuan i bum tawhlo ang," tih pah chuan a hote chu thu a pe ta a. Sudden chu an tung tho nawlh a, a phuarna hrui te chu an phelh dul a. Sakawr chungah chuan an hlangkai ve ta mai a.

Sakawra a lawn hnu chuan sakawr awm hnuaiah a ke chu an phuar bet ta tlat a. Apache pahnihin Tucson-a sakawr chunga an hlangkai lai leh, an tlan zawnga a ban uai hnuang hnuang loh nana an phuar lai te chu a en reng a. Thil zawh tum hian Sudden chuan Juano chu a han en a. Juano chuan hnar tum dut chung hian "Miliana saw a la thi lo. Mahse reilo teah thih chu a thlang daih zawk ang," a lo ti a.

Indian ho sawisak dan rapthlak leh muang changa thih ai chuan Tucson chang lo pawhin silai hmanga thih chu an thlang zawk daih ang. Eng ang sawisakna nge an hmabak tih lah an hre si lo. Juano chuan thu a pe a, chak vak lo chuan an hmalam pan chuan an kal ta a. Sudden chuan chung ho chu a chhiar a, a hmuh theih zawng chu pasarih chauh an ni. Manolito hmel a lang ve hauh lo. Indian ho hi hmun hnihah inthen in Tucson khaw lam an pan ta em ni ang?

Sudden chuan Juano ho thenkhatin sakawr an nei lo tih a hria a. Mahse chung ho chuan sakawr hnunga rawn tlan chu pawi tihna an neih hmel tlat lo. Uisathiamin an pu te hnung an chhui a, an hnunga an tlan ang mai hian phur em em hian sakawra tlan ho chu an um mai a ni.

Sudden chuan thil hlui a hrechhuak zawk a. Apache pasaltha ho chu nikhata mel 50 an tlan hnu pawhin an ral beih tur chu chau chuang hauhlo in an la bei thei tho a ni. Mi tumruh leh zamna reng reng neilo annih avangin an vaia an thih hma loh chuan an ral beih te chu an bei zel thin a. Tin, Indian ho zinga mi tha awm chhun chu a thi ta te kha an ni tih thu erawh chu a awih ve lem lo. Indian hnam chi hrang hrang a hriat te hi mingo aiin an sual chuang bik vek lo.

An vun a sen deuh tih mai loh chu mingo hian an inkara buaina lo chhuah dan hi an ngaihtuah tha duh lo a. A bul tum tu zawk leh tisual hmasa zawk chu mingo vek an ni in a hria a. An ram atanga hmuh phakloh a nawr bo tum tu pawh mingo vek an ni zawk. Chiricahua ho, khawthlang ram ril taka an lo kal leh, thlaler thuk an rawn dai mai hi thil mak tak a ni.

Hei hian Juano tum ruh zia leh mingo hmaa tlawm a hreh zia leh phuba lak a tum ruh zia a lantir a ni. Sudden chuan Juano a bum thei kha a inchhuang ve hle a. Juano chu a melh zawk a, ani chu a hma lam ding taka thlirin a nui tet tet a. Mi man a lo ni ta erawh a lungawi lem lo.

Sudden chuan a dar a chhin ak a, a mizia reng reng hi mihlim thei leh lungngai duhlo mi a ni. Tunah pawh hian a dinhmun hi chau hle mahse hlim taka awm a tum tlat a ni. Chu chuan amah mantu te thin pawh a tirim zual sauh tih pawh a hria a. Vawikhat chu pasaltha pakhat a che sual deuh a, cactus thingah a intauh nghek mai a, chumi tum pawh chuan Sudden pawh chu a thiante ang bawkin a nui ve mai a. Cactus hling a taksa atanga an phawi chhuah lai te chuan Sudden-a hmel chu a pangngai em em reng a.

Chu chuan Apache ho mak tih pawh a hlawh phah hle a. An mi man te hian khawngaihna an dil chung thin. Mahse Sudden hi chuan a dil ve hauh lo. Rei tak an kal hnu chuan thlaler ram pharh tha lai leh ruam deuhah hian an ding ta a.

Lung lian pui pui hi a khat tawkin a awm thluah a. Chhun pachang a la nih avangin Sudden-a chuan hetia an ding ta hi riahbuk sual tur an ni lo tih a hria a. A thihna hmun tur a ni ang tih pawh a ring nghal a ni. Indian pakhatin a kut phuar dimlo baksak a a phelh zawh a, leia a namthlak dawn lai tak chuan Juano chuba melh zawr a, a rindan pawh chu a dik zia a hmu nghal a ni. Juano hmel chu ramhuai lem, lung hmanga ker ang mai hian a lang a. A tawngkam atang reng reng chuan hnehsawhna ri hi a tel chiang em em a ni.

"In hrethiam em? Juano hian muangchanga in thih hi a duh a ni. Tui leh thildang awmlohna, thil nung reng reng awmlohna ah hian zawi muangin in thi dawn a ni. I thianpa saw a thi hma deuh ang. Nang erawh chu muang changin i thi ang," a ti ta a.

Sudden chuan "Ngawi teh, i lo fing hle mai. I sumdawnna ve reng kha. I rifle te kha i kap tawh reng em?" a ti a. Chutia a bumna a rawn sawichhuak thar leh chuan Juano thin chu a ti rim thar leh zual a. Insum nachang pawh hrelo chuan a chemte hriam em em chu a phawichhuak a, a zuan phei nghal a. Han vih nghek tuma a zak a kau lai chuan a inhre chhuak leh thut a. Sudden-a bulah chuan a ding leh ta mai a. "Mi i bum leh hman thelh a ni," tih pah chuan a chemte chu a paiah a khung leh ta a. "Nuamsa tak zawngin i thi hauh lo ang. Apache ho tih dan pangngaiin muanhchangin i thi ang a, i lei khan i hmui ro huam huam chu i liak anga, i taksa chu a sat in a sa huam huam ang. I thluak chuan ngaihtuahna mumal pawh a pe theilo ang che,"a ti leh a.

Texas tlangval chuan "I sawi zawng ringawt pawhin ka â thei dawn alawm mawle. Min ti hlau lutuk a, ka khup te pawh a in sawi hlawk hlawk mai," a lo tih el vel a. Mahse a chezia atang chuan a thusawi chu awih theih a ni lo. A hmelah hlau hmel a pu lova, a khup lah a sawi chhete si lo. Juano chuan "A tawk e," a tih veleh a thuihruai te chuan Sudden-a an phuarna chu an zai chat a, savun tuia an chian hnawn chuan a kut leh ke ah an phuar tan ta a.

Chutihlai chuan an zinga pakhat chuan lei zawl rual rem laia chuan thing chu hmun li ah nghet fe fe hian a lo vas lut zawt zawt a. A zo ta maw tih chuan Sudden chu a hnunglam atangin rifle kawmin a rawn chhu a, a thing hem inkarah chuan a tlu ta a. Thing phun tinah chuan a kut leh ke chu savun hnawng tak chuan an phuar bet ta a. Nisa rum rut hnuaiah chuan Sudden chu an mut zangthal tir a, chumi hnu ah chuan Tucson-a, engmah hrelo pawh chu an ti ve zel bawk a.

Apache ho zinga pakhat chuan tuithawl hi a rawn la a, savun te chu a rawn leih huh belh a. Sudden chuan hetianga ni sa hnuaiah chuan heng savun te hi an ro thuai dawn a. Chumi han in pawt khawr velin a a thuai vel dan tur chu huphurhawm hlein a hria a. Mahse chu chu Juano chuan a la duhtawk tlat lo. A sakawr saddle a sazuk vuna siam ip pakhat chu amah ngeiin a va la a. Sudden chu a rawn pan phei leh ta a. A hote pahnih chu sudden kawr a hlih tir phawt a, a ip chhunga thil awm chuan Sudden chu a rawn leih ta vek a.

Texas tlangval pawh chuan mak a ti hle a ni ang, a meng zau kawk a. Chu thil tui chu khawizu a ni. Sudden chuan a bul vel hawi pah chuan a lu a khawizu chu a thing per sak sak a, mahse engmah a sawt lo, a thing darh zau deuh tihna mai a ni. Chubakah a taksa ah chauh a leih lo, a mutna bul vel te pawh chu khawizu hlirin a khat a ni mai. Juano chuan Sudden-a lu ah te chuan a leih zel a, a leih zawh vek hnu chuan a han thlir vung vung a, "Tunah chuan kan mitmeng mawia hian thlaler fanghmir seh na chi a lo bum theih leh theih loh kan hre thei ang," a ti ta a.

Apache ho hian reilote hnuah thlaler fanghmir seh na chi leh ei tur thlahlel ngawih ngawih te chu khawizu rim hian a hip khawm thuai dawn tih an hre chiang a. Chung ho chuan khawizu chauh niloin Sudden-a taksa pawh chu zawimuangin an ei tan mai dawn a ni. Chutihlai chuan savun kha a lo ro tawh anga, a hreng na tial tial dawn bawk a ni. Tichuan zawimuangin Sudden chu a thi dawn a ni. Juano bawk chuan "Mi bum ching chu Apache hian an hre reng thin. Apache hian hriatna tha tak an nei a, mingo pa chuan ngaihtuah ang che,"a ti leh a, mahse Sudden chuan "A, a hlah tu zawk chu i ni tho tho," hlim hmel tak leh nui chung hian a han ti leh hram a. A nihna takah chuan a dinhmun chu a hlimawm loh kher mai. Apache ho in a chungthu an rel, tuna a thihna tur hi chu a hma ami ai chuan a thlang zawk ta reng reng.

Juano chu sakawr chungah chuan a zuangkai a, dimlo tak hian a sakawr chu a pawt her sawk a. "Tunah chuan kan kalsan tawh ang. I thiante kan zawng zel dawn. Khawizu pawh tam tak ala awm," tih pah chuan a hote chu signal a pe a. Chu thihna hmun chu an tlansan ta diak a.

Sudden-an a thlir liam hnu chuan a dinhmun tur chu a ngaihtuah a. Beiseina chhete pawh a nei lo. Hmanrua leh lung hriam takngial pawh a bul hnaiah chuan pakhatmah a awm lo. Vanneihthlak takin han tal chhuak thei ta pawh ni sela, a sakawr leh silai nen tui far khat pawh tello chuan he thlaler ram ro hi kal tlang ngaihna reng reng a awm lo. Sudden chuan "A rapthlak lu hrat. Ka che thei chai si lo," a ti sap a.

A aw chhuak pawh chu a ro hian a ro hulh tawh. Nisa tak pawh chuan a taksa chu a em tlawk tlawk a. A rang thei ang ber leh chakna a la neih lai ngei hian a talchhuak ngei ngei tur a ni. Engtia tih tur nge ti a a ngaihtuah lai chuan a beng chu enge maw ni hian a rawn zar ta a. A lu thin pah chuan a han en a, khawizu bawm tur leh bawm mek fanghmir seh na deuh mai chu, lian pui pui mai an lo intlar dul tawh a. An la rawn inzui kawi duah duah lehnghal.

Minute khat pawh awm mai mai a hun ta lo. A taksa a an rawn vah kai hunah chuan khawilaiah pawh an seh hlawk hlawk dawn. Seh satliah mai duhtawk lo in a eiin an ei dawn bawk. Savun te chu a la huh dum hlap a. A in sang sek a, a chakna zawng zawng chu a sawm khawm ngial a, talchhuah tum chuan a bei a. A taksa te chu a'n sep kang dawrh dawrh thin a. Mahse a sawt lo kher mai. A banrek leh a ke reka an tawnna lai chu a na hlur tawh mai a.

A banrek te chu savun chuan a at tawh ni ngei tur a ni, a thip mai pawh ni tawhlo in a nat hian a na vawng vawng tawh. A'n chawl vang vang a, a thaw halh halh a, tlem talin savun chu a fan deuh em? Nisa in a em char hma a tlem tala a tih fan hlauh chuan beiseina tlem tal a la nei. "Nasa tak chuan fan kher lo mah se engmah tih loh ai chuan a tha reng reng," a ti chhuak a.

A aw chhuak chu a tial ruai tawh a. Mihring aw chhuak pawh a ang tawh lo. Vawi tam tak insang ruh in an phuarna te chu phelh tumin a bei a. Mahse a sawt eih lo. Nisa leh khawlum huam huam karah chuan a thaw halh halh a. Fanghmir sehna chi te chuan a taksa then laiah chuan an seh hlawk hlawk a. Mahse a ngaihsak hman lo, na erawh chu a ti hle a ni.

A lu chu a thing nawr nawr a, chuti lo chuan a hmaiah leh a mitah te fanghmir khan an seh mai dawn a. A tawpna a thleng mai dawn tih a hriat tak avangin thih ngam takzetin a kut hrenna pawh hrechang tawhlo chuan a kut dinglam chauh chu a kuai leh vak a. Vanneihthlak takin a tawnna chu a put ta. Tlem a han chawl leh hlek a, a ke dinglam phuarna chu phelh tumin a sang leh vak a, a phuarna ni lovin a thing phun kha a rawn inphawi ta hlawl a. Chawl hman anih loh avangin a ke chu a per vak a, a tho chhuak ta hlawl mai a. A pai tawng tawng a, a ding thei hram tih chuan a nghawngawrh chuan a taksaa fanghmir te chu a hru fai thuak thuak a. A taksa hmun tinrengah chuan fanghmir sehna chu a bawl thliah thluah a. A kut bawr te leh a banrek te chu a lo vung ta bawk a. Mahse chung zawng zawng aia tawrhhlelhawm zawk chu a tui hal lutuk chu a ni. "Tui awmna hmunah kal a ngai a ni," tial ruan hian a ti a.

Tucson-a, engmah hrelo a mu reng lam pan chuan a pai phei tuang tuang a, a awm chu thisen hian a lo khat vek a. Mahse chung thisen te chu a khang vek tawh a. Sudden chuan Tucson-a lu chu a han chawi kang a, a beisei ang ngeiin leh ramri hrula mi te tih dan angin a hnungzangah chuan chemte hi a lo thawlh zan a. Rang takin Sudden chuan a la chhuak a, an phuarna zawng zawng chu a zai chat zung zung a. An awmna vel chu a han enkual thuak thuak a, yard za sawmnga vela hlaah chuan cactus thing ang tak hi a va hmu a.

Chemte keng chuan a va pan phei a, a hling hriam tak chu pawisa loin a kit a. Harsa tak chung chuan a laimu chu a la chhuak a. A laimu ah chuan tui tih tham phei chu a awm hauh lo. Mahse a hnawnna ringawt pawh chu helai hmunah chuan thlakhlelhawm tak a ni. Chu thing lai chhungmu a ei zawh chuan a dang a kit leh a, a laimu a ei leh hnu chuan pakhat dang a lakchhuah leh chu Tucson-a tan tiin a kir pui ta a. "A la tawk lo kher mai a," tiin a phun nuah nuah a. "Mahse engmah lo ai chuan a tha zawk e," tih pah chuan Tucson-a lu chu a chawikang a, a hmuiah chuan a thil ken chu a sawr lut a. Chu pa chu a rawn rum tuah tuah a, reilo te chhung a rawn meng zawk a.

Sudden chuan hepa mak zia hi a hre ta. A tawrh ang chanve hi mi tam takin an thihpui laiin Tucson chu a la dam cheu a ni. Sudden chuan Tucson-a kawr hak chu a phelh a, silai hlo phuhna lai chu a hrukfai sak a. A hliam rapthlak tak chu a awm hnuaiah a ni. Silai mu pawh chu a tlang lo lehnghal. Silai mu luhna lai chu a duk chur a, a pawrh tuar bawk a.

Tih fai tuma a khawih vel lai chuan Tucson-a thlan chu a tla bawrh bawrh a. Na ti takin a rawn thaw huam huam a. Sudden chuan "Tucson, che suh," a ti a, ngun taka a tihfai hnu chuan a kawr leh nghawngawrh chuan a thiam ang tawkin a tuam sak ta a. Pawi ti takin Sudden chuan "A la tawk lo kher mai, mahse ka thiam tawk a ni miau a," a ti a, a lu a thing nar nar a.

Ni tla liam tur chu an thlir vawng vawng a, tlemin khawvawt avang chuan a ziaawm a beisei deuh a. Mahse zan vawt tak chuan a hmet khawng anga, a natna tanpuitu tha tak a ni ngei ang. Thil a tih theih loh em avang chuan anchhia a inlawh thin a, amah ngei pawh chu tuihalin a thi lo chauh a ni si. Tui tam zawk an hmuh vat loh chuan an pahnih hian an thi ngei ngei dawn a ni. A mitthla in tui hmun nuam tak, amah ngei a lo khawsak tawh thinna chu a hmu a, a changin tui khawhthla nuam tak taka a inkhawh tir lai te a hmu bawk a.

Chu a ngaihtuahna chu tak tak emaw tiin a kut te chu a phar chhuak a. A harh zawk a, a nui chhuak ta a. A nui thawm chu Tucson chuan a hria emaw tih turin a rawn che tual tual a. Harsa ti tak chungin rawn thut chhuah a tum a. A bul lawka Sudden-a lo thu chu a hmu ta a.

Tucson chuan "Uh, Jim, Jim, nangmah i ni em? Hremhmun khawilaiah nge kan awm?" a rawn ti a. Sudden chuan "Hmun khat laiah chuan i awm a ni khawp mai," hlim hmel pu hram hram chungin a lo ti a. Harsa takin thawh tumin a bei leh a, a kutin a hliam lai chu a khawih a. Mahse Sudden chuan "Che lo khan mu rawh. Han thu chhuak chi i la ni lo," a lo ti vat a.

Tucson chuan hetianga a lo awm tak dan a zawt a, Sudden chuan thil awmdan zawng zawng a hrilh hnu chuan a thil va lak kha a melh zawk a. "Tucson, hei hi in tur kan neih chhun chu a ni mai. Ramhuai lal pawh nise hemi ringawt hi chuan he thlaler hmun ang hi chu a tan tlang thei bik lo ang, chuvangin tui dang kan hmuh a ngai a ni," a ti a. Tucson chuan "Ka kal thei kher lo ang. Jim, helai hian harsatna min siam deuh tlat," a ti a, pawi ti awm tak hian a then suk a. Sudden chuan "Ka at vang mai mai zawk a ni. Keimah chauh ka in ngaihtuah thin alawm mawle," a lo ti vat a. Mahse Tucson chuan "Ni love, nangmahin kal chhuak mai la a tha zawkin ka hria. I tih tur ka ti bahlah mai mai zawk che a ni, Jim," a lo ti a.

Mahse Sudden chuan "Thian te kalsan chi ka ni lo ve," then sak pah chuan "Zanin chu helaia kan hahchawlh hi a tha zawk ang. Zing khawvarah Saguaro thing dang te pawh kan melh leh dawn nia," a ti leh a. "Ni e mawle," Tucson chuan a lo ti a. A lu pawh leia a nghah leh hma chuan engmah hreloin a let leh tawp a. Nasa takin a thaw bawrh bawrh a. A thianpa chuan tihngaihna hrelo chuan a en reng a. Tucson hi a kalsan thei silo. Han paw tur chuan a chak tawk tawh bik si lo. Thlalera an awm reng chuan tuihalin an thi ve ve dawn bawk si. Tihngaihna hrelo chuan a en ta reng mai a. A tihngaihna hrelo chuan a bula thingtang ro chu a la khawm a, Apache ho tih danin, lang tham lo turin mei a chhem ta a. Tlem a zawng tal hahchawlh tumin a mu ve ta a. An harsatna chu tih kian a la ni ta chuang lo.