Apache Fighter-11

Sudden-a chu a lo than harh chuan ni chhuak turin khawchhak lam chu a rawn kâp eng tan a. Lei lam erawh chu a la thim angreng viau a. Che miahlo in a than harh chhan chu a ngaihtuah a, thawm enge maw hriat a nei a ni ang. Pasaltha ten hriatna chi ruk an neih thin hi Sudden pawh hian a nei a. Hlauhawm lo thleng tur hriat lawk theihna hi a nei a ni. A lu pawh chet chuanglo chuan an vel chu a en kual a. Tucson chu che miah lo hian a mu a, a thaw ri deuh hruam hruam a. A mei chhem pawh chu a thi tep tawh. A ling tlem te tih loh chu a thi deuh vek tawh a. Fimkhur em em chuan a thai let kual a, khawthim hnuaia thil a hmuhfiah theih nan a changin a meng a, a changin a mamit chhing thin a. Vawi tam tak a tih hnu chuan a khaw hmuh pawh a fiah ta. A ban leh ke te chu a sil thum a. Thil enge maw ri hi a hre ta a. A kawng bawr a han dap ngawt a, mahse pistol a neilo tih a hrechhuak a.

Apache pakhat chu lungpui phen atangin khek tuar chung chuan a rawn zuang chhuak a, Sudden chu chemtea vih tum chuan a rawn zuan a. Sudden chuan chu Indian pa bum pah chuan "Tucson," a ti tuar a, Indian pa in a zuan tur a zuan fuhloh avanga leia a tlak thlawrh lai chuan Tucson-a rawn thu chhuak leh a awm a dawm vawng vawng lai chu Sudden chuan a hmu a.

Hnungtawlh dawrh pah chuan Sudden chuan chu Indian pa chemte kenna kut bawr chu a veilamin a lo man sak a. A kut dinglam chuan Tucson-a chemte a laksak kha a phawi a, Indian pa chu a tluk pui a, chho zawng hian Indian pa chu a vit ta a. Apache chu a zawi hnak a, Sudden pawh chu zawi hnuang hian a bawk reng a. Apache a vihna chemte chu a phawi a, thisen hi a rawn chik tuarh a.

A tho a, Indian pa chemte a chhar hnu chuan Tucson chu a lo ding luah a. Apache pahnih hian chemtea vih tumin an lo chhaih buai mek a. Hliam tuar lo ang mai hian Tucson-a chu a lo vir sek a, pakhat zawk chu a man lawk a, a khai kang vaw vaw a, leiah na zetin a paih ta a. Chupa chu a hnungzang ruh a tliak ni ngei tur a ni, che leh tur pawh a awm miah lo. Tucson-a pawh chu a chau deuh a ni ang, indian pa a paih rual khan a thingthi hnawk a, a awm hliam atang chuan thisen tharlam tak a rawn chhuak leh tiam tiam bawk a. Indian pakhat zawk chuan Tucson-a thingthi thah tuma chemte a a lo tin lai takin Sudden chuan rang zet hian a chemte ken chu a vawm tle zawk a. Indian pa nghawngah tak chuan a vawm fuh a, a tlu zawi nghal thlawrh a. Tucson-a chu a chau em em a, a khuh bawrh bawrh a. A khuh zawng te chuan a awmah chuan thisen hi a rawn chik chhuak zawk a. Sudden chuan an bul vel chu Apache dang an awm leh awm loh a en kual zung zung hnu chuan Tucson-a tlu reng bulah chuan a kal ta a.

Khuh bawrh bawrh chung chuan Tucson-a chuan "A dang chu ka lo beisei rih lo asin mawle," a lo ti a. Sudden pawh chuan "Kei pawh mawle, Juano leh a hote hian Quincy-a hote hnu kha an hloh anga, a bul atangin rawn chhui that leh an tum a ni ang. Heng mi pathum te hi Scout an ni a, midang pawh an hla tawh hauh lo ang," tih pah chuan Tucson-a banah a vuan a, a kaih kuah a, "Heta tanga kan kalsawn a ngai a ni," a ti a.

Tucson-a hmel chu a dang vek tawh a. "Ka tangkai tawhlo, ka kawchhungah hian thil min kalhtu enge maw a awm tlat," harsa ti tak chung chuan a ti a. A mitmeng te chu a dul raih a, a marte chu a phu dut dut a. Khawvar hlim engah chuan Tucson-a chu a eng pup hian a lang a. Van lam boruak chu eng hle tawh mahse an bul vel chu a la thim hle a. Lungpui phenah te chuan Apache tan chuan bihruk a awlsam hle ang. Sudden chuan a thianpa hnenah chuan "Heng ho hian sakawr an nei ngei ang, lo chawl lawk la, an dahna ka'n zawng ang e," a ti a.

An awmna atanga yard 50 lekah chuan sakawr pathum hi a lo inthlung a. Pakhat phei chuan tui tin hnih, a pang a U.S tih chuang hi a lo phur a. Sudden chuan a mitthla in army ho an ambush lai leh an thah lai vel chu a hmu thiam mai a. "Tui chu tui a ni miau a, ka la mai ani ang chu," a ti malh malh a. Rifle leh a mu engemaw zat leh thal te chu a hmu a. Chung zawng zawng chu sakawr pakhatah a hlang vek a. A dang te nen chuan Tucson-a hnen lamah chuan a kai phei ta a.

Tucson-a pawh chu a lo meng a, "Sakawr te chu i rawn hmu maw? A...kei......chu ka chuang......thei....," a tih lai chuan Sudden chuan "Tui hi in phawt mai teh," tih pahin tui chu a pe a, Tucson-a chuan a lo in khawlh khawlh a. Sudden-an laksak a tum chuan a phal ta lo a. Mahse Sudden chuan a laksak lui ta tho a. "Tam lutuk in hi tlem lutuk in nen a that loh dan a in ang reng. Tucson, i tha deuh em?" a ti a. "Tlem chuan ka tha deuh," Tucson chuan a lo ti a. "Anih leh sakawr pakhatah hian chuan tum ta che. Chuti anih loh chuan thi sa kan ni mai," Sudden chuan a ti a. Tucson-a huphurh hmel chu Sudden-a thusawi, "Saw, midang pawh an lo kal ta mai," a tih chuan a ti reh ta vek a.

Tucson-a pawh chuan midang ho, mel chanve vela an rawn tlan chu a hmu ta bawk a. Sudden chuan Indian ho, anmahni rawn pan mek chu a chhiar a, "Pasarih, pariat, pakua an nih saw. Juano leh a hote chu an ni thei lo. Chuti anih chuan Manolito ho te an ni ang. A tirah khan hmun hnihah an inthen a, Manolito hian hnu hma a hmuh tak loh avangin Juano hote zawn tuma an kal laiin ka meichhem kha a scout ten an rawn hmu a, helam hawi hian a rawn hruai ta a ni ang," a ti a.

Sudden chu a inseh ruh a, a lungawilo hle a. Lo do thei dinhmunah dingin a inhre si lo. Tucson-a chu sakawr chungah hlangkai ngawt pawh ni se thui a tlan thei dawn si lo. A rifle chu a la chhuak a, a load ta a. Tucson-a chuan "Min rawn pui rawh," a rawn ti a. A tawngkam chhuak chu a thu pe aw in a chang fek fawk hle a. Chutianga aw chang leh sakawr chungchuang thei tur khawpa chakna a rawn nei leh ta mai chu Sudden chuan mak a ti hle a. Chau tak leh na tih hriat taka meng chungin Tucson-a chu thawh a lo tum a. Sudden chuan a banah a rawn vuan a, tichuan a rawn dingchhuak ve ta a. "Min pui rawh. Sawlaia sakawr chungah sawn min hlangkai rawh," tih chu Tucson-a thupek pahnihna a ni leh ta.

"Nang pawh sakawr dinglam atangin lawn kai ang che. Apache ho hi veilam atangin an lawn...," a tih lai chuan Sudden chuan "Ka hria e, ka hria e. Zawimuangin aw, Tucson," a lo tih khalh a. Tucson chuan Apache ho chet tlat dan sawi a tum a ni. A tlangpui thu in Apache ho hi sakawr veilam atangin an lawn kai ngai lo. Veilam atanga lawnkai an tum chuan sakawr an te vak a, an chunga lawnkai an phal ngai mang lo a ni.

Na tuar rum tuah tuah chung chuan Tucson chu sakawr chungah chuan a thu a, "Ka ke kha sakawr chungah khan phuarbet tlat rawh, Jim," a ti leh a. A ke a phuar mawlh mawlh lai chuan Sudden chuan Indian ho pawhin an rawn hmu tih a hre ta a. Indian ho chuan khek tuar tuar chung chuan an awmna lam chu an rawn pan a. Chak takin an rawn tlan a. Tucson-a chuan rifle pakhat chu a dil tlat avangin Sudden chuan rifle leh a mu enge maw zat chu a pe leh ta a. Tucson chuan "A tha e, Jim, ka thusawi ngaithla rawh. Thui tak ka tlan thei dawn lo a. Chuvang chuan nangmah in tlan vat rawh. I hria em?" a ti ta a. Mahse Sudden chuan "Ni love, ka rualin i kal ve ang," bung vut hian a ti a.

Tucson chuan a rifle chu a kau rap a, Sudden-a chu a tin ta to mai a. Sudden chuan a hriatthiam loh em avangin ha chang a thial rap a. Tucson-a chuan harsa ti tak chung chuan "Ka hrilh ang che chuan ti mai rawh. Kan pahniha min thah ngawtna tur chhan a awm reng reng lo. Nula kha va hmu la, ka thiltih hi i hrilh dawn nia," a ti a. Harsa ti tak chung chuan nuih hram hram a tum a.

"Kan mihring pahnih te kan ti tawp theilo hi pawi ka ti khawp mai. Mitha tak zawng i lo ni e," tih pahin a sakawr chu a pawt her thut a, chak deuh hian Indian ho, anmahni rawn pan mek te chu a pan ve ta a. A ke kha sakawrah phuar beh tlat anih avangin awlsam takin a silai chu a hmang theiin a load belh zel thei a. Indian ho chu hmachhawnin a kap ta zawt zawt mai a. Chuti thuta beih chu an rin loh em avangin Tucson-an a beih tak thut si avangin an chi ai chu an tlan darh ta sang sang a. Mahse reilo teah an rawn inhawr khawm leh vat a. Tucson-an lo beih tuma a sakawr a pawh her lai chuan an rawn bei ve tak tak a. Chuti chung pawh chuan Tucson-a chuan pahnih lai a lo kap thla leh a, mahse an tam hneh em avangin Tucson-a chuan a hneh ta lo.

* Thlaler rama mel tam tak an tlan hnu chuan an chau tawh hle a. Nisa lah chuan khawngaihna tel hauhlo in a em tlawk tlawk reng bawk si a. Nisa leh khawlum avang ringawt chuan an hma lamah chuan dil ni awm tak te an hmu thin a. Mahse chu chu an ngaihruatna mai ani. Thlaler ramah chuan hetiang hi an hmu fo thin a, thenkhat phei chuan tak tak emaw tiin an pan thin a, a tawpah chuan an thi nge nge thin.

Quincy chuan "Thil pakhat ka sawi duh chu Pathian thu sawitu tumah in hetiang baka hrehawm chuan hremhmun pawh an sawi hrehawm thiam tawh bik lo ang," a'n ti ngawt a. A tawngkam chhuak reng reng chu a ro huk tawh a. Chung lama ni chu a han en thuak a, anchhe lawh tuma a ka a an lai chuan Shilloh chuan " Engtianga hla nge kal la ngaia i rin?" a lo ti a. A tuithawl chu a'n thing a, tui pawh a tlem tawh hle tih chu a rik dan atang chuan a hriat theih a.

Quincy chuan "Kan chhuak tep tawh chu a ni mai, Indian hoin min tih buai leh tawh loh chuan," a ti a. Darkar sawmhnih pali lai chu Apache ho hmuh tur an awm tawh lo a. Mahse an hmel hmuh tur awmloh vang ringawt hian Apache ho hi an tlanbo ta emaw ti a ring tur khawp chuan heng Sculphunter te hi an â lo. "Red sons ho i hmuh loh chuan fimkhur zual sauh rawh," tih chu Shilloh-a thuvawn ve pakhat a ni. Nula, chau taka sakawr chunga chuang chu a en zawk a. Rusty chu huatna hlira khat hian a melh leh a, chhim thlang lam pan hret hretin an kal zel a.

Sudden-a rawtna ang kawng kha chu zawh se nikhat kal chauh an hmabak tawh ang. Mahse Shilloh Platt-a duh dan an zawm zawk avangin nikhat dang an la mamawh leh dawn a ni. Shilloh Platt chuan thlaler ram hmawr an thleng tawh dawna a rin avangin a tuk lamah chuan Wilderness ram pana kal theih tawh a in beisei avangin Quincy-a chu titi pui a tha in a hria a. Mit meiin a ko a, Quincy pawh chuan a rawn pan phei a,"Enge ni ta?" a rawn ti a.

Shilloh chuan "Ka rin danin reilote ah hian he ram hi kan chhuahsan tawh mai ka ring a. Kan tlangval Rusty-a hian thupek a zawm dawn leh dawn loh enchhin hi tha in ka hria," a lo ti a. "Thupek chu a zawm i ring reng reng em ni? Sudden-a Indian ho kuta kan hnutchhiah dawn lai khan khatiang khawpa a thinrim kha i hre reng alawm," Quincy chuan a ti a.

Mahse Shilloh Platt chuan "Amah hi thil pahnihin kan phuar tlat. Pakhatnaah chuan nula hi a hmangaih a ni. Pahnihnaa chuan Bisbee-a a thiltih khan a phuar bawk. Chuvang chuan min ti buai thei tak tak lo ang. Lawmman kan dawn hma chuan nula hi a pa hnenah a kir thei dawn reng reng lo tih hi a hre reng a. Rusty hian a pa hnena thil awmdan a sawi rual rualin Davis-a pawh a rawn thawh phei ngei ka ring," a ti a. Chung rawtna chhuanawm lo tak a sawilai te chuan Shilloh chuan nula chu it fe hian a thlek vel a. Quincy pawh chuan chutianga a thlir lai a hmuh chuan a lo tim ur ur a ni.

Quincy chuan "Thu a awi dawn leh dawn loh chu hmanrua kan pek hmain fiah a tha in i hrelo maw? Atthlak taka che tur khawpin a thinur si a," a ti a. "Engah mah ngai duh suh. Chutiang tur chuan engmah kan tih tir dawn hleinem," tih pah chuan Shilloh chuan Rusty awmna lam chu a pan phei a. Rusty chuan "Shilloh, enge ni i duh tak?" a lo ti a. Shilloh chuan "Tun atanga rei vaklo ah thlaler hi kan pel tawh dawn a. I tih tur i lo zir lawk a tul tawh a ni," a ti a.

Mahse Rusty chuan, "In ngaihtuah leh tum dan bawlhhlawh takah hian engmah tih tur ka nei ve lo," thinur tak hian alo ti hmiah a. Quincy chu makti awm tak hian an meng kual a." Naua, nula hi him taka in a thlen i duh lo em ni?" a ti a, "Chu chu ka duh dan anih i hai hleinem. Mahse nang ni mi tenawm, luhlul pahnih hian chutiang tumna chu in neih ka ring mawlh lo," Rusty chuan a lo ti hmiah a.

"Engvangin maw? Chu chiah chu alawm kan tum chu. Lawmman chauh hi alawm kan duh. Chu chu kan phu ve reng a ni lawm ni," Quincy-an a tih chuan Rusty chuan "Phu pawh in phu ta ve ang. Enga tan nge hman pawh in tum? A..a danglamna pawh in hre chuang lo. Thil pakhat chiah ka hrilh ang che u. In zinga thil tih ka neih ve hi Barbara, a pa hnena him taka a thlenna tur pawh nise, ka ti tawh dawn chuang lo," a ti a. Shilloh chuan thinrim tak hian "I tih mai a that zawk ka ring. I tih loh chuan hmeichhia hian harsatna a tawk ngei ang," a ti a.

Rusty-a hmel chu a dur khuih a, "Kut hmawr pawha in khawih vaih chuan khawvel tawp thlengin ka zawng ang che u a, rul tur hlauhawm tak pai innih ang ngei hian ka that ngei ang che u," a ti a. Platt-a thinrim chu a rawn sen chhuak tawn tawn a. Rusty-a pistol, a paina chawpa sakawra inkhai en pah chuan " Engtia min tih nge i tum tlangval? Lungtuma ka thluak vawm darh vek i tum ta em ni?" a ti a. Rusty-a pawh tlemin a thinrim a kiang deuh emaw tih tur chuan "Engti atan nge min duh a?" a ti ta a. Quincy chuan "Chutiang tur chu a ni reng asin. Kid, tlangval fel leh rin ngam tak i ni thinin ka hria," a lo ti bawk a. "Tih tur in tih chu sawi thuai thuai rawh u," Rusty chuan a lo ti leh a.

Shilloh chuan "Thil hote a ni. Tucson khuaah i kal anga, putara hnenah chuan thil awmzia i va hrilh mai dawn a ni. A fanu kan hnenah a awm tih i va hrilh anga, a tlan chhuah nan dollar sing hnih a ngai tih i va hrilh mai dawn anih chu," a ti a. Mahse Rusty chuan "I â anih chu. A pe duh hauhlo ang che u," a lo ti vat a. Inti thupui fun fe hian Shilloh chuan "Min pek mai chu a tan a tha zawk ang. Min pek duhloh avanga a hnua a chunga thil thleng tur ngaihtuah mai pawh hian...." tih pah chuan nula chu a melh a. A mit men dan atang chuan Rusty chuan huatna engemaw tak chu a lo hmu mai a. Amah maia kutruak leh nghal a han beih ngaihna a hriat tlat loh avangin "Duhthlan tur dang vak zawng a nei lo alawm," a ti a. "Kan nula hian lehkha ziakin emaw kan kawl zia lantir nan thil a kentir che anga, Davis-a chu Sheriff emaw midang reng reng tello in i rawn hruai tur anih zia i hrilh ang a, thil kalsual engemaw hlek a awm vaih chuan a tuartu tur chu nula hi ani mai tih chiang takin i hrilh tur a ni," Platt chuan a ti leh a.

Rusty chuan buk nghat nghat pah hian "Silai ka mamawh ngei ang," a lo ti vat a. Shilloh chuan chu chu la ngaihtuah lawk hauhlo ang hrim hian makti awm takin a en hu a. "I mamawh ngei tak ang chu. Silai nen lo chuan Tucson khua i thleng thei hauh lo tak ang. Indian ho lakah inven te pawh a ngai dawn si a," tih pah chuan a sakawr chu a han her hret a. Rusty-a pistol chu a phelh a, "Kha le, i pistol chu," tiin a pe a.

Rusty pawh chuan check hranpa lemlo chuan rang tak hian a kawngbawrah a pai ve nghal mai a. Shilloh chuan "Tihdan tur kimchang zawkin kan ziak ange," a ti a, pencil a lehkha a ziah lai chuan Rusty chuan a sakawr chu a kalsawn tir hret hret a. Barbara leh anni pahnih inkar a thlen chiah chuan "Shilloh, Quincy, in pistol paina kawnghren kha phelh vat rawh u," a ti that a.

Quincy chuan makti awm fe hian a en a. Chu pistol chuan an pahnih inkar chiah hi ding takin a lo tin a. Ngeiawm zet hian Shilloh Platt chu a lo then sung a. Rusty chuan "Ka thusawi chu i hria em? Number pathum thleng chiah ka chhiar ang. Chuta in la phelh thlak loh fo chuan ka kap ve ve dawn che u a ni," a ti a. An piah deuh a Barbara-i hnenah pawh chuan "Thu ka pek veleh che a chak thei ang berin chhim lamah tlan vat ang che. I hria em?" a ti a. Barbara pawh chuan a hria tih nan a lo bu zauh a.

Shilloh chuan hmel dur khuih chung chuan "Mi â pa, han kap chhin teh reng la. I rinawm zia hre hmasa lovin silaimu thun sa pe tur khawp che in ka â in i ring em ni?" a lo ti a. Rusty chuan a beisei loh ang taka Shilloh-an thil a lo tih avang leh a pistol hmeh chu puak tur a awm tak hauh loh avangin a thinrim em em a.

He hun remchang melh hian rei tak a lo awm tawh a. Mahse Shilloh-an a lo finkhalh avang chuan a thinrim lutuk chu a te thawt a. A sakawr chu na zet hian a kheng a, Shilloh-a lam pan chuan sakawr chu a zuang phei ta a. Chutihlai bawk chuan a pistol mu awmlo chuan Quincy chu a vawm phei bawk a. A chalah a va thawi fua a. Quincy pawh chu a sakawr atangin a tla thelh a. Rusty-an Shilloh-a bul a thleng tep tih chuan Shilloh chuan a pistol a lo phawi hman ta tlat a. "A...khatiangin i ti vei ang maw?" tih pahin a pistol chu a kap thawr a, Rusty chu leiah a tla ta tawp a. Vawikhat a let tawp a, che loin a mu ta reng a. A lu atang chuan thisen lar tak hi a lo chhuak ngiai ngiai a,Barbara chu thlaphang takin a au chhuak thawt a. Rusty lam chu a pan phei vat a. A bul a thleng tep tih chuan Shilloh chuan na zetin a hmaiah a lo beng thuai a. Mahse pawisa lo takin Rusty chu a pan zel ta tho a.