THUNDERBOLD-11

DOMINO

Nula chuan zei lutukin a MG seat hnih nei dumpawl chu Parliament Street ah chuan a rawm khalhthla a, Bay Street in a rawn finna laiah chuan third gear atanga second gear a lutin hneh tak hian a han her mawp a.

A dinglam a en zawk a, kawngsir deuh va tawlailir muang taka kallai chu an sir veilam ah chak takin hian a pel fua a. Sakawr hlau chu a ding uaih uaih a, tawlailir khalhtu chuan thinur deuh hian a bell chu a tiri vak vak a. Nula chuan a ban a rawn vai zui a, car chu second gear a dahin chak takin a tlan puat puat a, the Pipe of Peace hmaah chuan a ding chawt a.

MG car kawngkhar hniam tak chu hawng buai peih lovin a mal thui tak lang khawp hian kawngkhar chungah chuan a pen chhuak a. Chutihlai chuan sakawr tawlailir khan a bul a rawn thleng ve tawh a, a khalhtu putar thinur tak pawh chu nula hmeltha tak a han hmuh chuan a nem leh deuh ta ni ngei tur a ni; "Ka pi, ka sakawr Old Dreamy hmuihmul i rawn chhawk tep alawm, fimkhur deuh tawh rawh," a rawn ti a.

Nula chuan kawng dawm teih tawih chung hian putar chu a hmachhawn sauh sauh va. "I duh leh old Dreamy chu buaipui mai mai teh. Tihtur pawimawh te pawh ka nei ve ang tih ring ta che. Kawtthlera mitan a hnawksak a vak vak lovin nangni ho hi chu dahbo daih in hun tawh asin," a lo ti zek a.

Negro putar chuan hnial tumin a han ang zuau va, mahse hnial ta lemlo chuan, "Awle, ka pi," a ti ve ta mai a. A sakawr chu a vaw kal a, a phun nuah nuah a. Nula chu ennawn tumin a han hawilet a, mahse dawrah alo lut daih tawh a lo ni a. "Nula duhawm tak a nih kha mawle," a han ti ngawt a.

Yard 20 vela hlaa ding James Bond chuan engkim alo thlir ve reng a. Nula chu putar ngaihdan chiah khan a ngai ve a. Mahse ani chuan nula chu tunge anih a hria a, nula luhna dawrah chuan alut ve ta a.

Nula khan kawngkhar bula ding chung chuan dawr nghaktu pakhat chu alo hnial lang lang a.

"Senior service ka duhlo ka tih tawh kha. Cigarette tuilo lutuk, ka zuk zui duh miahloh tur ka duh a ni. Miin an zuk duh miahloh chi in nei em? I rem zozai zingah khian chutiang chi a awmlo em ni?" tiin cigarette inrem tuarh ho chu a han kawk a.

Dawr nghaktu chu tourist mak danglam pui pui lo dawr thang tawh anih avangin a buai phili mai biklo. "A, ka pi..." a ti a, chhuarlam chu a han thlir a.

A bula lo ding reng Bond chuan, "Mei zuk tlem i duh chuan cigarette pahnih thlan chi a awm ang," a rawm ti ve ta a.

Nula chu a rawn hawi vat a, "Tunge i nih a?" a rawn ti há a.

"Ka hming chu James Bond a ni. Meizuk sim dan tur lamah chuan khawvelah hian a hre ber pawl ka ni ang. Ka nghei deuh reng bawk. Ka lo awm hnai chu i vannei hle mai,"

Nula chuan ngun deuh hian a han en vang vang a, Bond chu Nassau ah hian ala hmu ngai hauh lo. Feet 6 vela sang, kum 30 chunglam chu ni ngeiin a hria a. Hang lam deuh, nunrawng hmel lek lek pu a ni tih a hmu a. A mitmeng pawl uk khak mai chuan nula chu a lo enlet a, a biang dinglam ser chu a hmai ni em han deuhvah chuan a lanfiah em avangin he thliarkarah hian alo thlenna ala reilo ni ngeiin a lang a.

Rawn 'pick-up' a tumna ni ngei hian a lang a, nula pawh chuan hnial lem lova intih tlangnel a tum ve ta a. Mahse aw nelawm lemlo tak hian, "Anih leh i thil hriat chu han sawi teh," a ti ve ta a.

"Meizuk nghei dan awmchhun chu nghei hlen vang vang a ni mai. Kar hnih/khat nghei i tum anih chuan insum pawhin awmzia an nei chuanglo; i  zuk leh vek vekin i heh lehzual zawk ngei ang. Kawng dang awm leh chu - cigarette nem lutuk emaw, ru lutuk emaw zuk a ni mai. Itan chuan a nemlam chu a tha ber zawk ang," tiin Bond chuan dawr nghaktupa hnenah chuan, "Duke KingSize, filter awm cartoon khat rawn la teh," a han tizui nghal zat a. Nula hnena pekchhawn pah chuan, "Kha, hei hi zu teh. Ka duhsakna che a nih kha," a han ti a.

"Oouhh, mahse chuti ringawt te chu...."

Bond chuan nula ta tur leh ama ta tur Chesterfield man chu a pe nghal a, pawh lamah an inzui chhuak ta a. Bond chuan, "Mei leh intur hi a inchawbe tlatin ka hria. I bansan ve ve dawn nge, a indawtin?" awmze nei deuh hian a han ti a.

Nula chuan Bond chu a han en vang vang a, "Ava rang teh thut ve mawle, Mr. Bond. Awle, i sawmna chu ka pawm mai nange. Mahse khawpawn ah ni se, helaiah chuan a sa lutuk deuhvin ka hria. Fort Montague piaha 'the Wharf' kha i hria em? A hrehawm lo va, chutah chuan i kal ang hmiang. Mahse khawlai hi a sa lutuk a, kal fimkhur a ngai a nia," a ti ve ta seuh seuh va.

Car thutna lai pawh chu alo sat em avangin mal leh mawngtam chu a kang ta mai emaw tihtur hi a ni a. Mahse Bond chuan chu nula chu a hnaih theihna anih dawn phawt chuan a pawiti hauhlo mai. Car ah chuan a thu rem sauh sauh va, nula chu ngun takin a en ta a.

Bond chuan tukin lama Immigration form za tam a en atangin chu nula chanchin chu tam tak alo hre tawh a. A hming chu Dominetta Vitali a ni a. Italian Iyrol bial a Bolzano khua a piang a ni. Kum 29 a upa a ni a, Actress ni anga inchhal a ni. Thlaruk kalta khan Disco ah a rawn tel ve a, lawng rutu Italian mi, Emilo Largo a nula leh hmei a ni tih pawh khawtlang hriat a ni.

Bond chuan hmeichhe inzuar thinte hi khawlaia dawr tur ang zawng leh nawhchizawrhna a khawsa an nih loh chuan nawhchizuar leh ks inzuar, mihur a ti ve ngai lo va. Mahse he nula hi Commissioner of Police, Harling leh Chief of Immigration and Custom, Pitman te chuan 'Italian mihur' an ti mai a. Mahse Bond chuan ngaihdan dang daih a nei thung. Nula chu a han en vang vang chuan a ngaihdan neih chu a dik thawkhat hle ang tih a ring bawk.

Nula chu mahni inring tawk tak, fing leh hawiher zau tak a ni tih a hriattheih a. Nuam taka nunkhua hman a, hlim taka khawvel chen a thlang anih pawhin a demawm hranlo a ni. Mipa a mutpui anih pawhin a duh dante leh ngaihdan te bak chuan a tihtheih hauh lovang tih a chiang a ni.

Hmeichhia te hi lirthei khalh chungchangah chuan uluk leh fimkhur tak an ni tlangpui a, mahse first class a chhiar chi erawh an ni hranlo. Car pakhat a hmeichhe pali chuangho chu hlauhawm tak an ni a, pahnih chuang lah an hlauhawm dan a nep vak chuanglo. Thusawi satliahah pawh an hmel inen kher an tum a, kutke hmanga thusawi tihfiah an tum fo bawk thin.

Mahse Bond chuan a nula chuanpui chetdan erawh danglam hlein a hria a, mipa zia a pu ni berin a lang. Kawng chu ngun takin a en a, driving mirror thlengin a ngaihthah miahlo bawk. A car khalh chu nuam a ti hle niin a lang a, gear leh break hman hun a hre hle bawk.

MG car chuan Shirley Street tlanpelin vaukam hrula Eastern Road ah chuan chak takin a duk par par zel a. Kawng veilamah chuan kawng te deuh, vaivut zet mai hi a lo awm a, nula chuan chu lamah chuan a tlakthlak tir ta a. Lunga sak in hlui hmel tak, ram rup tawh bilah hian car chu a dintir ta a. In hmalamah chuan puan sendang deuhva kaih in te, fel ren rawn, a tukverh frame pawh rawng var hnawih hi a lo ding a. In hmaa kawngkhar chungah chuan silai zen dahna thingrem leh luruh leh malruh inkawkalh hi a intar kuau bawk a.

Nula chu kawngkhar pawh hawng chuang lovin a karchhuak leh pawp mai a, chaw eina pindanah chuan tlangnel takin a lut phei nghal a. Chaw eina pindan chuan in hnunglam a tuipui kam maia dawhsan chin chu thui fe a va awh a, chulai hmuna dawhkan pakhat chu an kildun ta a. Bond chuan a sana a han en a, "Chhunlai tak a ni a, intur nem lam nge i duh tak deuh zawk le?" a han ti a.

"A nem chi. Double Bloody Mary leh Worcester sauce tam tawk nen ka duh ang,"

"A tak i tih chu eng tak ni ang maw? Kei chuan Bodka leh Tonic ka duh ang," tiin Bond chuan waiter hnenah chuan an duhzawng chu a lam nghal zat a.

Nula chuan, "Kei chuan Vodka hi zu tak ka ti tlat. Mahse tomato tui telh chuan a tinem deuh thei ang," a ti a. Chair pakhat chu a kein a han hnukhnai a, a chungah chuan thluangin a sandal chu a tlawhthlawn nghal a. Awn deuh leh remchang deuh va a thut hnu chuan, "Engtikah nge helai hmun hi i rawn thlen ve reng reng? A hmain ka la hmu ve lo tlat che in ka hria. Tourist ho hawdarh hnuah hi chuan mithar hmel hi chu kan hai meuhlo a nia," a han ti a.

"Tukin khan ka rawn thleng ve chauh. Ram lei tur ka rawn zawng deuh va, mi tam lai ai chuan tun hi a zawn hunlai tak ni zawkin ka hria. Millionaire ho tam lai hi chuan thilman a sang lutuk deuh zawng a ni. Tunah chuan an haw zo ta bawk a, thilman a tlawm deuh tawh ka beisei a ni. Nang zawk, helaiah eng chen nge i awm tawh le?"

"Thlaruk kalta khan keipawh ka lut ve a ni. Disco Volante ah sawn ka rawn tel ve a, i hmu tawh mai thei. Vaukam maiah an thlun nghe nghe kha. Windsor Field a in rawn tum dawnin in rawn thlawhkhum hial mai thei a ni,"

"Lawng hniam, sei deuh kha maw? Ita em ni? A pian pawh a nalh hlein ka hria,"

Nula chuan Bond-a mitmeng ngun taka en chung chuan, "Kan laina hnai te ta a ni," a lo ti a.

"Lawngah chuan em ni i chen deuh mai?"

"Ooh, ni lo ve. Vaukam ah pawh hmun kan nei tho va, kan hawh a ni ber zawk e. A hming chu 'Palmyro' a ni a, kan lawng thlunna ep maia awm a ni. English mi pakhat ta a ni a, hralh a duh niawmin ka hre nghe nghe. Hmun mawi tak leh nuam deuh mai a ni a, tourist hovin an bawhbuai ve bawk si lo. A awmna hmun hming saw Lyford Key an ti nghe nghe,"

"Ka hmun duh ang tak ava ni mai awm ve,"

"A, karkhat hnu velah chuan kan kalsan leh mai ang; a ruak a ni zui mai ang,"

Bond chuan nula mit taka en chung chuan, "Oh, ava pawi dawn ve le," a han ti a.

Nula chuan, "I mi han chhaih dan chu(h)..." a ti hlak a, inthiamloh hmel deuh zawk hian, "Tak taka, ka ti mai mai anih kha. Thlaruk chhung zet chu he thliarkar a tar ho lak atang hian chutiang tawngkam chu ka lo dawng tawh a, min fiam hrat tak tak ho hi kum 60 chin chunglam deuh vek an ni lehnghal a; keini naupang deuh tan phei chuan a ninawm mah mah a ni. Hmeichhia an nih phawt chuan hmui kak leh hmuihmul tlem nei pawh an duh vek ang chu. Hmeichhia reng reng an atchilh ruai vek mai a ni," a ti a, a nui hawk hawk a. A hma ai chuan a nelawm sawt hle bawk a. "Nang pawh hi putar tarmit vuah tawh ho pawhin an melh zui tawk tawk chein ka ring a ni," a han tihzawm leh a.

"Chu, chhun chaw ah thlai chhum te an ei hial lo maw?"

"Ei ang chu le. Carrot leh purun tui thlengin an in mawle,"

"Chuti chu kan inmil hlawm lovang. Kei chuam Conch Chowder (an rama ei chi chikhat, mipat hmeichhiatna tanpui thei a an ngaih) aia tuilo chu ka ei dawn lo,"

Nula chuan, "Nassau ram chanchin i hriat hmel riau mai," ngun deuhva enchung hian a han ti a.

"Mipat hmeichhiatna 'Conch' in a tanpui thei tia an sawi  ka sawichhawn vang mai chuan maw? Nassau ho ngaihdan chauh a ni hleinem; Conch awm tawhna ah chuan an ngaihdan a ni vek alawm,"

"Anih leh an sawi hi a dik tak tak angem?"

"Henglai thliarkara chengte hi chuan an ngaihdan chu a ni alawm. Kei chuan min nghawngna a neih ka hre miahlo,"

Nula chuan, "Chu, nupui i nei tawh tihna em ni?" a lo ti hâ a.

Nui chung hian Bond chuan, "Nei nang aw, anih leh nang?" a lo tilet a.

"Nei bik lo,"

"Chuti chu Conch soup chu la eidun chhin ila, a hnathawh dan ngaichang ta ila a that phian dawn chu.."

"I hma lakdan chu Millionaire ho aiin tlem chuan a changkang deuh va, mahse hmabak ila ngah deuh,"

An intur chah chu alo thleng a; nula chuan WorcySauce chu a pawlh a, a kutzungtang chuan a chawk zui a. A chanve chu a han in pawp a, a Duke Cigarette cartoon thar chu hawngin pakhat chu a lachhuak a, a ham hnim te te a. Bond chuan a lighter lachhuakin a han tan sak a, a hip kawk a, a han thaw bial pap pap a.

"A tuiloh lem loh hi, a khu pawh meikhu ang ve tho alawm. Mei nghei tum lamah khan expert ka ni itih chham kha enge ni?"

"Ka nghei ngun em alawm. English iva thoam ve, mahse i awphawi chuan Italian awphawi a pawl lawi si,"

"Ka hming chu Dominetta Vitali a ni a, England a Cheltenham Ladies School ah ka zir thin,"

"Lawng neitu, 'Ka chhunghnai' i tih khan a enkawl che em ni?"

Nula chuan bung nghut hian, "Enkawl lo," alo ti a, an han ngawidun hlek a. Chutah, "Kan inchhung hnaivai lutuk lo. Thiantha, min uaptu a ni ber ang chu," a han tihzawm leh a.

"Ohh, anih tak chu,"

Nula chuan boruak siamzan leh deuh tula a hriat avangin, "Lawngah chuan min rawn tlawh vela a tha ang. A hming chu Emilio Largo a ni a, helaiah hian rohlu an zawng mek tih pawh i lo hre tawh mai thei," a han ti leh a.

"Chuti elo. Ava nawm hmel ve. Amah chu hmuh ka duh ngei tak ang. An thil zawnah chuan beisei mumal deuh an nei reng em ni?"

"Ka hriatpui pha hauhlo mai, amah lah chuan an map pawh mi entir duh hauh lo, mak pawh ka ti hranlo. Mi engemaw zat chu sum thawhin an tel ve lehnghal a. An lo thleng vek tawh a. Karkhat lekah kan chhuah mai dawn avangin an thil zawn hna chu an tan dawn anih ka ring,"

"Shareholders!! Chanpual neiho chu eng ang mi nge an nih hlawm? Mi á lo tak tak an ni ang tiraw?"

"Mi pangngai tak tak chu an ni, mahse an puithu mah mah ka ti thin. Rohlu zawn te chu a phurawm viau dawn vei nen; an vawt ruih reng mai a ni."

Nula chuan sana a han bih a, "Ka kal a hun tlat mai," tiin a tho ta nghal a.

"Intur min leisak avangin ka lawm e. Mahse ka kalna lam tur a dan avangin ka hruaizui thei dawnlo che a, a zialo ngawt mai. Taxi ka laksak mai ang che,"

Restaurant bathlarah chuan an inzui chhuak a.

"Zaninah Casino ah chuan hmuh leh che ka beisei, Dominetta," a han ti leh a.

Nula chuan car tihnun pah chuan, "Maithei," a han ti liam puat a. Nond chu a han chhoh en a, hmuhleh chu ani pawhin pawi a tih lemloh avangin, "Mahse Dominetta ti chuan min ko tawh suh. Domino tiin min ko dawn nia," a ti a. A nuisak a, car chu a tlantir ta nghal a. Kawngpui ava pawh hnu chuan Nassau panin chaktakin a tlanzui ta a.