James Bond : The Man With The Golden Gun-6

The Easy Grand

Bond chu Tiffy bulah chuan ava thingthi a, na lutuk lo hian a biangah chuan a han beng a. Nula pawh chu a rawn meng harh veleh deuh ta a. A biang a khawih a, mak tih hmel deuh hian Bond chu a han en a. Puanchhia pakhat chu a tihuh a, nula chu kuah thovin a hmai chu dimte hian a han hruksak a. Dawhkan phena a bag chu pein, "Khai, Tiffy. Intuaiharh rawh le. Hnathawh tur in nei thuai maithei a, a changtunu ber chu intihnalh deuh a tha ang," a han ti a.

Tiffy pawh chuan a bag chu a hawng a, dawhkan phena thuhniam tlat annih avangin Scaramanga chu silai puah atang khan a hmuh hmasak lehna chiah a ni. Thinur deuh hian a insehruh a, Bond a hriattham leka zawi hian, "Hepa hi ka la rul let dawn chiang khawp mai. Orange Hill ah khian Mother Edna a awm a, dawithiam a ni. Naktukah ka han hmu ang. Ni reilote ah a chunga thilthleng pawh hre hman lovin ala awm ngei ang," a han ti a. Bag atang chuan darthlalang a lachhuak a, inen chungin a insiam tha mawlh mawlh a. Bond chuan a ipte atanhin dollar khat tlang panga a phawrhchhuak a, nula bagah chuan a hnawhlut ta a. "Chulam chu theihnghilh daih rawh. Hei hian sava leh a khawina tur bawm i lei leh dawn nia. Chubakah eitur i hlui chhuah chuan Kling-Klings dang pawh an lokal leh mahna," a lo ti a.

Zoram Online Store ah hian lo lenglut ve ta che.

Scaramanga chuan ringhlel mitmeng deuh hian, "Enge circus i sawi kha a awmzia? Chesawn miah suh, Mister. Ka zawhna thenkhat hi i chhang hmasa phawt tur a ni. Ka sawi ang khan police ini em? An rim i nam deuh tlat a nia. Chuti chu nilo se hetah enge i rawn tih reng reng?" a rawn tileh ta a.

Bond pawh chuan hul zet hian, "Tumahin ka awmdan tur min hrilh ngailo; ka hrilh zawk thin," a lo ti bung nghut a. Piah deuhva dawhkan chu a panphei a, a bul chairah chuan a thu ta nghal a. "Lo phei la, i duh leh ka bulah hian lo thu rawh. Nawrluih min tum anih chuan i tisual ngawt ang. Namnul vak chi ka ni lo," a han tizui a.

Scaramanga chuan a dar a chhin awk a, a rawn panphei ta a. Thir chair pakhat chu tuaiherin, a nghenchhan bawh zawng chuan a rawn thu ve ta a. A ban veilam chu chair nghenchhanah chuan nghatin, a kut dinglam chu  a kawnga a silai pai chuh maithei turin a malchungah a dah thung a. A chetdan chu gunmen ho chetdan diktak a ni tih Bond pawh chuan a hria. Thutthleng nghenchhan thirphek chuan a taksa chu silaimu lakah a veng tha tawk a, a chetdanah lah mi fimkhur leh hlauhawm tak a ni tih hairual lohvin a hriattheih a.

A kut pahnih dawhkana dahchhuah pahin Bond chuan muangcharh hian, "Nilo, police lam mi ka ni lo. Ka hming chu Mark Hazard a ni a, Transworld Consortium hnuaia thawk ka ni. WISCO fu hmunah ka thawk mek. I hriat zawng a ni ang chu maw?" a ti ta a.

"Hria e. Enghna ber nge i thawh a?"

"Ngawiteh, ka thian. I hmanhmawh vut vut lutuk. A hmasa berin tunge i nih a, enge maw i hna ber le?"

"Ka hming chu Francisco Scaramanga a ni. Labour Relation ah ka thawk a, ilo hre tawh ngai em?"

"Ka hriat awm pawh ka hrelo. Hriat awm chi thil a awm em ni?"

"Hre mumal hmanlo hian tam tak chuan mual an liam thin reng a sin,"

Zoram Online Store ah hian lo lenglut ve ta che.

Bond pawh chuan, "Ka chanchin hre miahlo hian tam takin mual an liam ve tawh bawk," a ti sup a. Bawp khawkherhin a han thu awn a, a kut lehlamin a ngalrek a dawm a. Ngaihsanloh hmel deuh hian, "In tibuai deuh hlir chuan insawi tawh lo la ka ti hle mai. Chinese maktaduai 800 vel zet te chuan kan pahnih chanchin hi an hre miah lo va. Nang pawh hi dil tereuhte a chungu pakhat ini satliah ve ringawt anih hi," a han tileh a.

Scaramanga pawh chu haw awm pawhin alang lo va. Muangchang hian, "Ni e, Caribbean hi dil te deuhva sawi theih chu a ni mai ang chu. Mahse hlawkpuina tur thil chu tam tak a awm ve asin. Helai ramah hi chuan 'The Man With The Golden Gun' tiin min ko bawk thin," a lo ti ve mai a.

"Harsatna chinfel nana hmanraw tha deuh chu a ni ngei ang. Min rawn tanpui thei nghe nghe la chuan kan tangkaipui ngawt ang che,"

Scaramanga chuan ngai ho tih hriat zet hian, "Buaina in nei deuh em ni?" a lo ti a.

"Fu a kang ngun mah mah tawh a ni,"

"Chumi buaipui chu em ni i hna ber?"

"Ni deuh mai. Company hna peng pakhat chu Insurance Investigation a ni bawk,"

"Security hna lam a ni maw? Nangmah ang hi chu ka lo tawng zeuh zeuh tawh. Police rim namna in nei deuh tlat thin," tiin alo rinhlelh danah chuan lungawi hmel deuh hian, "I chetluang emaw chu?" a han tihzawm leh a.

"Fu haltu nia kan ngaih mi tlemte chu kan man a, mahse hrem tak tak theih lohvin an Union te hnenah an sakhuana avanga rikrap bik angin an zualko va, han tih vak ngaihna pawh a awmlo. Chuvang chu alawm dan lekkawh thei tur khauh tak, nang ang hi nei thei ila ka tih ni. 'Enforces' tih chu i hna hming pakhat a ni ang chu maw?"

Chu zawhna chu chhang lemlo hian Scaramanga chuan, "Silai i pai em?" a han ti thut a.

"Pai e. Ka hnaah hian a tul tlat si alawm,"

"Eng silai nge ni?"

"Walther PPK 7.05mm"

"I pai that viau chu," tih pahin Scaramanga chuan bar lam chu hawiin, "Hey, Cool Cat, i hna i tan leh tawh anih chuan beer kan duh ang," a ti a, Bond lam chu hawi lehin, "Eng hna nge i thawh leh dawn?" a han ti a.

"Ka hre chiah rihlo. London ka biak phawt a, helai velah thawhzui tur a awm leh awmloh ka zawh hmasak a ngai a ni. Ka hmanhmawh lemloh avangin min rawn hrilh nghal mai lo mah se pawi pawh ka ti hranlo. Mahni duh dana tal thei tura Free Lance deuhva thawk ka ni reng reng a. Enge, rawtna i nei deuh em ni?"

Tiffy chu bar phen atang chuan a rawn chhuak phei a, thleng hian beer leh no a rawn chawiphei a, Bond-a hmaah chuan Scaramanga pawh en lovin a hung a. Scaramanga chu a nui hawk a, a kawrchung chhunglam atang chuan awle vuna a siam bag a phawrh a, dawhkanah chuan dollar 100 tlang a han thehthla a. "Rilru tihnat reng lovah kan ti ang chu, Cool Cat. I ke kha chip lui tlat reng lo la chuan thil engkim tha mai tur hi a nia. Kha khan sava dang chu lei leh mai rawh. Ka bul vela mite hian nui hmel pu reng se ka duh a ni," a han ti a.

Tiffy chuan pawisa chu a la a, "Ka lawm e, Mister. I pawisa ka hmanna tur hi hria la chuan mak iti ngawt ang," tiin, thip zeta Scaramanga melh chung chuan a kalsawn leh ta nghal a.

Scaramanga chuan a dar a chhin awk a, Bond nen chuan an indun ta a. Scaramanga chuan sikret bawm manto hmel zet mai hi a phawrh a, meizial sei leh zen deuh mai chu tankaiin a pak bial talh talh a. Ngun deuh hian Bond chu a han en leh vang vang a, mei chu a han fawp leh kâwk a.

"Dollar 100 hlawhna tur i duh em?"

"Duh maithei. Ka ring deuh,"

A rilru tak chuan Scaramanga bula awmtheihna anih chuan a pawmsa em em mai.

Scaramanga chuan ngawi rengin meizial chu a han pak leh talh talh a.

Zoram Online Store ah hian lo lenglut ve ta che.

Kawtah chuan car a rawn inhung dawt a, mi pahnih hi nui hawk hawkin an lo lut ta a. Mahse mingo pahnih an hmuh chuan an nui tawp hmak a, hla deuh takah hian an hel a. Tiffy chu an pan phei a, zawite te hian eng enge maw an sawi niah niah a. Bar chungah chuan dollar1 ve ve dahin in hnunglam ah chuan ngawi rengin an phei a, a hma ang bawka ringin an nui zui leh ta a. Inchung panna kailawnah chuan phur leh hmanhmawh takin an inzui chho ta nghal a.

Scaramanga chuan Bond-a hmel ngun taka en chung chuan aw zawi, fiah tak si hian, "Buaina engemaw ka nei. Ka hnathawhpui thenkhat ten Negril Development ah hian an rilru an pe deuh tlat mai a, a hmun chu Bloody Bay an ti nghe nghe. I hria em?" a han ti a.

"Map ah chuan ka hmu tawh a, Green Island Harbour bul maia awm a ni nghe nghe,"

"I sawidik e. He sumdawnna ah hian chanpual ka bei ve nual a. Hotel kan sa tan tawh a, a chhawng hnuaiber kan zo tawh. Mahse tourist ho an lokal tîm ta deuh tlat mai a, Cuba an nello thar riau mai a ni awm e. Bank lamah harsatna kan tawk a, pawisa kan tlachham tan ta a. Ka sawi chu i manthiam em?"

"Manthiam e. In tum angin in che hleithei ta lo a ni maw?"

"Ni e. Hmanni lawk khan ka rawn thleng a, Thunderbird Hotel ah ka khawsa a. Kan hotel siama chanpual nei ho chu thil awmdan sawipui turin ka chahkhawm a, engtia thiltih nge tha ang tih kan rel ho dawn a ni. Ka thian lokal turte hian hlim taka hun hman an duh a; zaithiam, lammi leh rimawi tumthiam te pawh ka chahfel vek tawh a. Tuichenna te thlengin a awm. Helai hmun pawimawhna leh tinuamtu pakhat chhu fu thiarna atana rel te chi tlanna kawng an siam saw a ni. He relkawng hian feet 40 a sei tuipui thuk laiah pawha hman ngam ngat, Christcraft Roamer kuang ka dahna Green Island Harbour chu ava pawh a, chulam hawi te pawh chuan kan la chhuakin a rinawm. Ka thiante chu hlim taka siam ngei ka duh a ni. I hrethiam zel em?"

"Hrethiam e. An hlima an phur chuan i chanpual pawh an leisak duh maithei che tiraw?"

Thinur deuh hian Scaramanga chuan a chal a han chuar a. "Mahni a ngaihtuah eng enge maw nei turin dollar1000 in ka ruailo che tih hre rawh. Thildang i ngaihtuah vak pawh a ngai lovang," a ti ta hmiah mai a.

"Chuti chu enge ka thawh ber dawn a?"

Scaramanga chuan a meizuk chu a han hnarkhuchhuah leh a. "Ka thawhpui thenkhatte hi chu rothap ve tak tak an ni a. Chanpual nei theuh mah ni ila, thian erawh kan ni lo. I hrethiam mai em? An rilru theuh hre turin a mal mala kawm te pawh ka duh dawn a, chutah chuan kan sawm ve loh te pawhin lo ngaihthlak ruk an duh thut thei a. Tichuan nang hi security guard ang reng a hman che ka duh deuh a ni. Kan meeting neihna tur i endik anga, mi lolut tur i veng bawk ang. Ka sawi chu i manthiam ang chu maw?" a ti charh charh a.

Bond chu a nui hawk a. "Nangmah vengtu bik deuh, Personal Bodyguard ah min duh tihna a ni maw?" a lo ti a.

Chal chuar nâng chung hian Scaramanga chuan, "Eng nge ni nuihzatthlak viau va, Mister? I tan chuan sum hlawhna tha tak a ni mai lawm ni? Hotel nuam lutuk maiah ni 2/3 vel i khawsa anga, a tawpah dollar 1000 i hlawhzui bawk dawn nen; enge mak tehchiam ta a!?" a lo ti a.

Bond chuan rilru siam harsa tiawm fahran hian a sam a han hui pap pap a. Diktak chuan thutlukna han siam mai pawh chu harsa a tiviau reng a ni. Thil awmdan pawh chu tlemte chauh ala hria tih a hria a. Hepa in a hriat ngaimi pawh ni hleilo, bodyguard a a ruai mai duh pawh chu thil mak tak a ni ve reng reng mai.  A hna sawi pawh chu a belhchian tlak lohvang tih pawh a hlauhawm hle a. Scaramanga chuan khawtual mi emaw, police bang emaw chu a ruai duh lovang tih a lang mai a. Chutiang mi chu rawih tur lo hmu ta pawh ni se hotel velah hmelhriat an hmuin Negril hnathawhah pawh chuan thui tak inhnamhnawihna an nei duh maithei tlat a ni. A engapawh chu ni se, Bond chuan a beiseiphak miah lohvin thuk takin Scaramanga rin a hlawh dawn tihna a ni a. Nge, chu lam chu a lo ringsual reng zawk!? He thilah hian 'thang' rim pawh a nam tel tlat hian Bond chuan a hria a. Mahse a nihna an hriat lohvin he hna hi lo thawk ta nise, 'thang' chu enge ni ta ang? Engpawh nise, atana hun remchang rawn inhawng chu bawhpelh loh hram thain a hre ta zawk a.

Bond chuan cigarette a han tankai te te a, Scaramanga rilru thawidam nan, "Ka nuihchhan chu nang meuhvin bodyguard i mamawh ta hi a ni zawk. Mahse a nawm viau dawn chu. Engtikah nge kan tan dawn? Pawnah sawn car pawh ka neisa e," a ti ta a.

Scaramanga chuan a rangkachak sana pan dengdawng, man to hmel zet mai chu enin, "Dar 6:32 a ni a, ka car pawh pawnah a awm tho," tiin a dingchhuak ta hluai a, chutah chang fel fawl hian, "Kal ang. Mahse i hriatreng tur pakhat - Tu-a pawh chu lo ni ta la, ka thin a ram viau a nia," a ti ta a.

Bond pawh chuan, "Sava pawisawi hleilo te chunga i thin thawhdan pawh la hmu alawm. A tua mah mah kan thiurna tur a awmloh hram ka beisei," a han tilet sak a.

"Kal rawh, chuti chu," tih pahin Scaramanga chu a thova, kilkhata a suitcase chu la in pawnlamah chuan a chhuak ta nghal a.

Bond cbuan bar lam chu a panphei a, "Dam takin, Tiffy. Engtikah emaw chuan lokal leh ka inbeisei. Min rawn zawng an awm anih chuan Bloody Bay a Thunderbird Hotelah ka awm tih ilo hrilh mai dawn nia," ava ti ta a.

Tiffy chuan tim leh inthlahrung deuh hian a kawrban hmawr chu a rawn chelh a, "Fimkhur viau ang che, Mark. Saw hmun saw Gang ho khawsakna a nia," a rawn ti sa sa a.

"Sawpa chanchin saw ka hriatah chuan ala rapthlak ber awm e. A bag khaiah sawn ganja pound 1000 man hu zet a khai alawm. Tukin khan a rawn lak mai turin Rasta in a hnutchhiah a ni. A bag kha ka hnim a, a rim atangin ka hrethei a ni," a han tizui a.

Bond chuan, "Ka lawm e, Tiffy. Mother Edna chu i dawitir hrep dawn nia. A chhan chu engtik niah emaw ka la hrilh ang che," a ti a, a chhuak ve ta nghal a.

Pawnah chuan Thunderbird sen hi a khawl tinung sain alo ding reng tawh a. A khalhtu cbu Jamaican, inchei nalh zet mai hi a ni a. Car wireless aerial ah chuan 'The Thunderbird Hotel' tih hi a intar phe hlap hlap mai bawk a. Scaramanga chu driver bulah chuan a lo thu kûk a. "A hnungah khan chuang la, i car awmna thleng chuan ka va hruai ang che. Min rawn zui leh mai dawn nia. Kawng pawh hi a chhe vek lemlo a nia," a lo ti a.

Bond chu car hnungah chuan a lut a, an tlan zui ta nghal a. Scaramanga chu KGB leh Gestapo ho tihdana a tukkhum lama kah mai a han duh thut thut a, mahse thil hriatbelh a duhna avang leh mi inringlo lai kahhlum a hrehna avang chuan a insum ta hram a. Lo kap ta pawh nise car khalhtupa pawh chu a thah telve ngei a ngai dawn bawk nen. Car tape ah chuan a hla duh deuh mai thin, 'After You've Gone' tih chu an zaitir a. Bond chuan Scaramanga a that nghal mai lo chu thupek a bawkchhia mai ni lovin a finglo hle a ni tih pawh a inhrechiang hle a ni.