Kristiana Vanram Kawngzawh-16

BUNG I6 

Tin, ka mumangah chuan an pahniha chutia an kal dun zel lai chuan Rinawma chu a han hawi a, an piah hla deuh fe-ah chuan mi pakhat kal a han hmu a. A hming chu Dangnala a ni. Amah chu mi sang tak a ni a. a hmuna en ai chuan ralkhata enin a hmel tha hlein a lang a. Rinawma chuan chu mi hnenah chuan hetiang hian thu a han sawi a.

"Ka thian, khawiahnge I kal dawn? Van ramah I kal dawn a mi?" a han ti  a. 

"Aw ni e, chutah chuan ka kal dawn a ni." Dangnala chuan a ti a.

Rinawma chuan, "A that chu, tha takin Inpawlho ang u aw?" a ti a.

Dangnala chuan, "Inpawl tuk e a. In thianah ka awm ang e," a ti  a. 

“A nih lo kal rawh le, I kal rual ang u khai. Kan tana sawt tur thukhawchang I sawi ho ang u," Rinawma chuan a ti  a. 

Dangnala chuan, "Thil tha chu I hnenah pawh. Tu hnenah pawh kal duhzawng a ni fo thin reng a ni. Hetianga thil tha tih duh mi ka tawk fuh che hi ka lawm ngawt mai. Mi tam takin hetiang thil tangkai tur sawi hi an duh lo va, engmaha tangkai hlei lo tur sawite hi an duhzawng a ni zawk a, chutiang chuan keizawng mi tilungngai thin a ni,” a ti a. 

Rinawma chuan, "Chu chu thil lungngaihthlak tak a ni reng a ni. Mihringin kan lei leh ka a kan Pathian chanchin sawi nana kan hman aliama thil ropui hi engnge awm?" a ti a. 

Dangnala chuan, "I thusawi zawng zawng hi tha tak leh dik taka I sawi avangin ka mi duhzawng tak i ni. Pathian thu sawi loh aliama thil tangkai leh nuam engnge awm? Miin thilmak ah te lawmna nei sela engnge nawmna chutah chuan awm? Miin chanchin sawite leh thilmak te, chhinchhiahnate hi a sawi duhzawng ni sela, chutiang thil zawng zawngte chu Pathian Lehkhabua mi anga mawi leh mak khawiahnge a hmuh ang?" a ti a. 

Tin, Rinawma chuan, "Chu chu a dik a ni; nimahsela kan thukhawchang sawiah hian kan tana tha ber tur engnge kan hmuhtheih kan ngaihtuah tur a ni," a ti a. 

Dangnala chuan, "Chu chu alawm ka tih reng ni. Chutiang thil sawi chu a tangkai ber a ni alawm. Hetiang thu sawi hian miin thil tam tak an zir thei a ni; Khawvel thil maite pawh hi a zir theih a, van lam chanchinte pawh a zir theih bawk. Hetiang hian pianthar tulziate leh Krista felnate a zir theih. Chung lo pawh chu simna te, rinna te. tawngtaina te pawh a zir theih bawk a ni. Hetiang hian miin thutiam ropui tak leh Chanchin Tha ama thlamuan nan a zir thei a ni. Tin, thiltih tha lote leh thudik chu a dik tih an hre thei a, mifing lote pawh an zirtir thei a ni," a ti a. 

Rinawma chuan, "Chung chu a dik ngawt mai. Heng thute hi min hrilh avangin kal lawm e," a ti  a. 

Dangnala chuan, "Hetiang an tih loh avang hian mi tam takin an thlarau tan chatuan nunna chu an hre lova, atthlak takin dan thuhnuaiah an awm a. Chutiang zawngin tumahin van ram chu an chang thei lo vang. Mi tlemte chauhvin chutiang chu an hria a ni," a ti a. 

"Van thu hriatna chu Pathian thilpek a ni a. Mihring thusawi avang maiin tumahin an hmu Iovang," Rinawma chuan a ti  a. 

Dangnala chuan, "Chungte chu ka hre vek a ni; nimahsela tumahin vana mi Pa a nih loh chuan engmah an hmu thei lo. An thiltih avang a ni lo va, khawngaihna avanga pek a ni. He mi hi a dik tih entirna turin Pathian Lehkhabu thu tam tak ka entir thei ang che,” a ti a. 

"A nih leh kan tana thil tangkai dang engnge kan sawi leh ang?" Rinawma chuan a ti a. 

Dangnala chuan, "I duh apiang le: Van lam thil emaw, lei lam thil emaw, thlarau lam thu emaw, Pathian lam thu emaw, thil serh leh serh loh lam thu emaw, thil lo awm tawh emaw, thil lo la thleng tur emaw, ram dang chanchin emaw, mahni ram chanchin emaw, kan tana tangkai tur apiang kan sawi ange," a ti a. 

Chuti chuan Rinawma chuan mak a ti deuh va, Kristiana lam chu a pan a. Chu mi hma chuan Kristiana chu a hrang deuhvin a kal a ni; a hnenah chuan zawitein, "Kan thian hian thu a va ngam em! Vanram zawng mi, mi aa tak a ni phawt ang," a ti a. 

Kristiana chuan hul deuh hian, 'He mi I ngaihhlut teh huam hian amah hre lo mi chu a tawng theihna ngawt hian mi tam tak a thlem thlu thei ang," a ti a. 

Rinawma chuan, "Chu nang chuan i hria elo?' a ti a. 

"Hreawm teh e, amah a inhriat ai mahin ka hrefiah zawk ang chu," Kristiana chuan a ti a. Rinawma chuan, "Chuti  chu mi engang nge a nih mi hrilh teh khai," a ti a. 

Kristiana chuan, "A hming chu Dangnala a ni a, kan khuaa awm a ni. l lo hre ve lo chu mak ka ti  mang e ka ti. Kan khua a len vang a nih dawn chu," a ti a. 

Rinawma chuan, "Tu fapa nge a nih a, khawi lai venga awm nge a nih?" a ti a. 

Kristiana chuan, ''Kamthaa fapa a ni a. Kamtam venga awm a ni. A hmelhriat apiang a hming avang chuan Kamtam venga awm a ni tih an hre zel a ni. Amah zawng mi tha tak a ni a. a sual deuh pawh a ni," a ti a. Rinawma chuan, "Mi thatak niawm zawnga a Ian hi le!" a ti a. 

Kristiana chuan, "Amah hre chiang lote tan zawng tha awm takin a lang a, a hriate tan erawh chu a tha lam lo a ni: ‘Tha awm takin a lang,’ I tihah chuan, milem ziaktu in milem ralkhat atanga ena mawi tak, a hmuna ena mawi si lo mi hriatchhuahtir e ka ti," a ti a. 

Rinawma chuan, "A, I nui em mai, i tifiam a niawm mang e," a ti a. 

Kristiana chuan, "Nui mah ila, chutianga fiamthu tha lo leh dik lo taka mi chungchang thu sawi Pathianin a awih hleinem. A chanchin ka han hrilhfiah lehzual ang che. He mi hi zawngin mitin a pawl a, thukhawchang a sawipui a, tuna i hnena a sawi ang bawk khan zu hmunah pawh awm se la a sawi ang. A sawi zawng zawng chu a leiah chauh a awm a ni. Sakhaw thu a sawite hi bengchheng mai a ni," a ti a. 

Rinawma chuan, "Chutia ni maw? Chuti  a nih chuan mi lo bum let der tawh zuk ni a!" a ti a. 

"Bum tawh teh ang e. Nangmah pawhin chu chu i hre lawm ni? 'An sawi a, an ti si lo' tih thufing hi hre reng rawh. Thiltihtheihnaah lo chuan thu-ah mai chuanPathian ram a awm si lo va,' (Mat.* 23:3; I Kor. 4:20) Tawngtai te, simnate leh piantharnate a sawi a, a enga mah chu a hre si lo; a sawia mai chauh chu a hriat a ni. An chhung zingah pawh chuan ka awm tawh a. An inchhungkhura a awm dan leh ram danga a awm dan pawh ka hre tawh a, ka thu sawi chu chiang takin a dik tih ka hria a ni. An inah chuan sakhaw dan te, sual sim chhinchhiahnate reng reng a awm lo. Ani ai chuan rante pawhin Pathian rawng an bawl tha zawk a ni. A hria apiangin mi bawlhhlawh leh zahpuiawm an ti theuh a ni; a awmna khuaa mi tawh chuan tumahin tha pawhin an be lo. Mi naran amah hriate chuan, 'Ram dangah a tha a, ama awmna khuaah chuan ramhuai ang a ni,' an ti  thin a ni. A chhungte pawhin chutiang chu a ni tih an hria a ni. Mi vin tak a ni a, mi hau pawh hmang tak a ni. A chhiahhlawhte pawh engmah lovah a hau mai mai thin a, a dimdawi dan reng reng an thiam thei lo. A inhlawhna a hnathawh pawh mi a bum fo thin a ni an ti. A bum theihna ang apiangin bum a duh thin a ni. Amah anga awm turin a fate pawh a zirtir a. Dawih deuhva an awm chuan, 'Mi a leh mi fing lo ho,' a ti  mai thin. Mi hmuh leh hriatah reng reng chuan anmahni chu a fak ngai lo. A sual avangin mi tam tak a titlu tawh tih kal hria a ni. Pathianin a dil loh phei chuan mi tam tak chhiatna a la thlenin ka ring a ni," a ti a. Rinawma chuan, “Unaupa, i thu chu ka ring e. 'Amah chu ka hria e.' I tih avang maia ring zawng ka ni lo va. Pathian thu awi miten mi dang chanchin an sawi duh tur anga I sawi avangin awih ka ni zawk e. I huat avanga heng thu hi i sawi a nih ka ring lo. I sawi ang tak chuan a awm avang a ni," a ti a. 

Tin, Kristiana chuan, "Kei pawh a hmain lo hre tawh lo ila chu tuna nangin I rin ang bawk hian ka ring ang chu. Sakhaw duh lo mite ka mai atanga heng thute hi hria ni pheila chu mi sualte hian mi thate hi an hek mai mai thin a ni e ka ti mai awm e. Nimahsela heng thil zawng zawngah hian keimah ngeiin a dik lo tih ka hrechhuak a ni, chu chang lovah pawh mi thate chuan an zahpui thin a. thianah leh phung changah pawh an siam duhlo a ni.  Amah an hriat hnu chuan a hming lam ngawt pawhin an thin a ur thin a ni." a ti a. 

Rinawma chuan, "Tunah chuan a sawia sawi leh a tiha tih chu a Inang lo tawp mai tih ka hre ta. Tun hnuah pawh a danglam dan ka chhut tawh thin ang." a ti  a. 

Kristiana chuan, 'Thil hrang daih a ni reng a ni; Thlarau leh taksa a inhrang angin a inhrang a ni. Thlarau tel lo chuan taksa hi mitthi ruang ang chauh a ni a; chutiang bawkin sawi mai chu tih a awm si loh chuan mitthi ruang ang chauh bawk a ni. Sakhaw biak dan bulpui ber chu a tiha tih hi a ni. ‘Pathian leh Pa mithmuha sakhaw biak dan thianghlim leh sual tel lo chu hei hi a- ni; fahrah leh hmeithaite an hrehawm laia kan leh khawvel bawlhhlawh kai lova insiam thin hi a ni.' (Jak I:27. chang 22:26 pawh en la) Dangnala chuan chutiang rengin a ngai lo va: sawifiah ngaihthlak ngawt hian pathian thu ring nihna emaw a ti a, chutianga a tih chuan amah leh amah a lo inbum ta a ni. Ngaihthlak chu thlai chi tuh ang chauh a ni a, thu sawi chuan rilruah a rah tak tak nge tak tak lo tih a hriat fiahtir theilo. Nikin niah chuan mitin an thiltih ang zelin an rel sak ang tih kan ring tur a ni. (Matt. I3:23). 'I awi em?' ti maiin an zawt lo vang a. Titu nge i nih, a sawia sawi mai mi? tih a ni zawk ang a. An thiltih ang zelin an reIsak ang. Khawvel tawp hun tur chu buh seng nen tehkhin a ni. (Matt. I3:32) Buh seng hun chuan a sengtute chuan buh hmin tha chauh lo chu engmah an duh lo tih i hria a ni. Nimahsela hengte hi, chu mi ni atan chuan Dangnala thu chu a pawlmawh lohzia entir nSn che kal sawi mai a ni e," a ti  a. 

Rinawma chuan, "Mosia’n sa thianghlim thu a sawi kha hei hian min hriat chhuahtir hle mai a. Chutiang ran chu tinkak nei mi a ni a, a irh chhuah chu a thial bawk thin. Tinkak ngawt pawh a ni lo va, irh chhuah thial mi ngawt pawh a ni lo. Sazupuiin a irh chhuah a thial a, nimahsela a tin a kak loh avangin a thianghlim lo a ni. Dangnala pawh hi chutiang tak chu a nih chu. A irh chhuah chu a thial a, finna chu a zawng a. Thute chu a thial a, nimahsela a tin a kak lo. Mi sualte kawng a hawisan bawk hek lo va, ui leh savawm ke ang mai a nei a, chuvangin a thianghlim lo a ni," a ti a. 

Kristiana chuan, "Pathian Lehkhabu thu ang i sawi a ni a , kei pawhin ka han belhchhah ve ang e; Paula chuan mi thenkhat, mi dangnal em em, thu mawi tak sawi theite nimah sela dar ri leh dar benthek mai a vuah a. Tin, hmun dangah chuan thil nung lo ri nei si a vuah a. Thil nung lo chu rinna tak nei lo leh Chanchin Tha nei lo hi an ni. Thu mawi tak leh ri mawi takin Pathian vantirhkohte angin sawi thei mah sela, van rama nun neitute zingah chuan, an tel tawp lo vang," a ti  a. 

Tin, Rinawma chuan, "A tirah pawh khan a thian nih zawng ka duh chiam lo va, tunah lek phei chuan a ninin ka ning ta. Amah ka then theihna turin engtinnge ka tih ang le?" a ti  a. 

Kristiana chuan, "Ka thu awih la, ka hrilh ang che hian ti  rawh khai. Chutichuan Pathianin a rilru a tihdanglam nghal loh chuan amah pawhin a ning thuai ang che," a ti a. 

"A nih, engtia tih tur nge ni ang?" 

Kristiana chuan, "A hnenah va kal langin, sakhaw biak dan thu khauh takin va sawi la, chung thilte chu a In lama a vawn fel leh fel lohte fiah takin va zawt rawh." a ti a. 

Chutichuan Rinawma chuan Dangnala chu a va pan leh a. "Engtinnge I awm tak?" a va ti  a. 

Dangnala chuan, "Ka la dam e, kal lawm e. Thu sawi dun ta reng ila chu tam kan sawi hman tawh tur a," a lo ti a. 

'I duh chuan i sawi dun leh ang hmiang; Tin, kan thusawi tur chu hetiang thu hi ni rawh se: Engtinnge ni Pathian chhanhimna ropui tak chu mihring rilruah a inhriat chhuahtir tih hi,” a ti a. 

Dangnala chuan, "Kan sawi tur chu thiltihtheihna a nih dawn chu: Chu chu thusawi awm tak a ni, a sawi vel pawh ka nuam sarh mai. A tawi zawngin ka han chhang mai ang chia. Pakhatnaah chuan, Pathian khawngaihna mihring rilrua a awm chuan sual avangin nasa takin a tahtir thin. Tin, a pahnih na chu….” . 

Rinawma chuan, "Ngawi teh rih, a pakhat zawka chauh chu I ngaihtuah teh rih ang. Rilruin amahin sual huat a tum tur a ni I tih zawk tur niin Ka ring e," a ti a. 

Dangnala chuan, "Sual avanga tah leh sual huat chu eng nge a danglamna?" a ti a. 

Rinawma chuan, "Nasa takin a danglam a ni. Mi, sual avangin an tap thei. Nimahsela sual chu a haw lo thei a, mi tha leh mi fel chu a haw zawk thei a ni. Pulpit-ahte sual avanga tap mi tam tak ka hre tawh a, nimahsela an rilru chu an titi-ah leh an In lamahte ngawt a cheng si a. (Gen. 39:I5) Josefa pi chu thianghlim tak ni awmin aw ring takin a au va, nimahsela Josefa lakah chuan thil thianghlim lo tak tih a tum si. Nuin a fate chu an sual e ti  thin mah sela, an malchungah an chawi a, an fawp an fawp si thin ang hian, mi thenkhat chuan sual hi deu deu chung siin an duh viau si a ni," a ti  a. Dangnala chuan, "Dawt I sawi a ni." a ti a. Rinawma chuan, "Daw teh suh e. thudik tak ka sawi zawk a ni. A nih leh engnge ni rilrua khawngaih thiltih hmuhchhuahna thil pahnihna i tih chu?" a ti a. 

"Chanchin Tha thilmak hriatna hi." Dangnala chuan a ti a. 

Rinawma chuan, "He mi chhinchhiahna hi a hmasa ber tur a ni; Nimashela he mi hi a hmasaah emaw, a hnuhnungah emaw lo awm mah sela a dik lo reng reng a ni. Chanchin Tha thilmak ropui chu nasa takin a hre thei a. Nimahsela rilrua khawngaihna thil chu a awm lo thei a ni. Miin hriatna zawng zawng nei mah sela engmah a la nei lo thei. Pathian fa pawh a ni chuang hek lo. Isuan a zirtirte hnenah "Heng thilte hi In hria em?" tia a zawh kha annin, 'Hria e,' an tih lai khan ani chuan "Hengte hi in tih chuan in eng a thawl ang.' a tih kha. 'An hriat avangin an eng a thawl ang' a ti lova, a tiha an tihin an eng a thawl ang a ti  zawk a ni. Hriatna ngawt chu tih lohva awm a awm si. A Lalpa duhzawng chu a hre reng a, a ti si lo. Miin vantirhkoh tluk laiin a inhre thei a, nimahsela kristian a ni chuang kher lo thei. Chuvangin I thu sawi chu a dik lo a ni. Hriatna hian mi dangnal leh 'chapote chu a tilawm a. Pathian erawh chu thiltihin a tilawm a ni. Hriatna neih hauh loh phei zawngin rilru pawh a tha thei lo va, Chuvangin hriatna chu kawng tam tak a awm a, thil mai mai hriatna a awm a; rinna leh hmangaihna leh khawngaihnaa hriatna a awm bawk a. Chu chuan mihring rilruah Pathian duhzawng a hriattir a ni. Hriatna mai mai chu kamtamna a ni a. Rinna, khawngaihna leh hmangaihna hriatna lo chuan Kristian tak tak chu a lungni thei lo a ni. 'Hriatna min pe la, l dan chu ka vawng ang. Tin, ka rilru zawng zawngin ka ngaihtuah ang,' tih a ni." a ti a. (Sam 119:34) 

Dangnala chuan, "I daw leh ta. Hei hi hriatfiah lehzualna a ni lo ve." a ti a. 

Tin, Rinawma chuan, "A nih leh khawngaihna thiltih hi engtinnge a chhuah tih chhinchhiahna dang sawi leh rawh le." a ti a. 

Dangnala chuan, "Sawi tawh lo ve, kan inngeih dawn lo ve," a ti a. "A nih i sawi dawn loh chuan kei talin sawi ila a rem dawn lawm ni?" Rinawma chuan a ti ta a. 

Dangnala chuan, "I sawi duh a thu a ni ang chu." a ti a. Tichuan Rinawma chuan, "Khawngaihna thiltih chu a changtu emaw, a lo thlirtute hriatah amahin a langchhuak thin a ni. Tupawh khawngaihna changtu hnaah chuan hetiang hian a lo lang chhuak thin. A sualna, a nungchang tenawmzia a hriattir a, rin lohna sualziate a hriattir a. Chu mi rinna chu a neih loh va, Isua Krista a rinna avanga Pathian zahngaihna a hmuh loh chuan hremhmuna kal ngei tur a ni tihte a inhriatchhuahtir thin. Chung thilte chuan thiltih sual lungngaihthlakzia leh zahthlakziate a hriattir thin. (Sam 38:I8; jer. 3I:I9; Joh. I6:8; Rom 7:24; Markal I6; I6; Gal. 2;I6; Thup. I;I6). Tin, chung lo pawh chu khawvel Chhandamtu chu hriattirin amah zui tlat tulziate a hriatir a. Tin, amah zuinaah chuan riltam leh tuihal tuarnate a tulzia leh a chan ang tuarte tan chuan thutiam a awm tihte a hriattir a ni. A rinna tlem leh tamzia ang zelin a lawmna te, a thlamuanna te, thianghlim duhna te, amah hriatchianna deuh deuh te, a rawng a bawlnate chu a awm a ni. Amahin a lang chhuak ka ti nain hei hi khawngaihna thiltih a nih an hre mang thin lo. A sualna leh a hriat dik lohnain a hruai bo thin a ni. Chuvangin he mi hi miin a neih chuan khawgaihna thiltih a ni tih a hriat hmain thil ngaihtuah tur a awm a ni. (Joh. I6:9: Gal. 2:I5; T.T. 4:I2: Matt. 5:6: Thup. 2I:61) Mi thenkhatte hnenah chuan hetiangin a lang a ni. Krista an ring tih an tilang phawt a ni. Tin, a dawtah chuan nungchang thianghlim put thu te, titi thianghlim sawite leh chhungkaw vawn thianghlim thu te, sual huat tur a nihziate an tilang leh. Chutiang mi chuan thianghlimna hi an chawisang hle mai a. Amaherawhchu mi vervekte anga a sawia sawi mai mai lovin rinna leh khawngaihna leh tih tak zetin an ti zawk thin. (Job. 42:5,6: Sam 50:23: Ezek. 20:43; Matt. 5:8: Joh. I4:I5: Rom I0:9, I0: Ezek. 36. 36:26: Phil. I:27: 3:I7) Khai le, kal pu. Tunah khawngaihna hnathawh leh a lo Ianchhuah dan ka sawi chu a dik lohna I hriat chuan sawi la, I hriat loh erawh chuan a dawttu ka sawi leh zel ang e." a ti a. 

Dangnala chuan, 'Tunah zawng ka sawi dawn lo ve. Sawi leh la, ka lo ngaithla zawk ang e.” a ti a. 

Rinawma chuan, "He mi thu hrilhfiahna hi i bel tawhin I hre tawh ngai em? I nungchang leh i thu sawitein I zawm ngai em? I sakhaw biak hi tawngka maiin nge I biak thudik leh thiltihin? He mi thu hi mi chhan I tum chuan chiang taka I hriat leh Pathianin a dik a tih tur ang lo Iiam chuan sawi suh ang che. I hriatnain a hriattir chauh loh che chu sawi bawk suh ang che. Lalpain a fak lo va mahni infak mai mai chu engmah a ni si lo va. Chu lo rengah pawh mahni thenawm khawvengte hriat a dik hauh si lo va, ‘chutin khatin ka awm’ tih mai mai chu sual nasa tak a ni bawk a ni" a ti  a. 

Chutichuan Dangnala chu a lo zak tan ta a, a hmaite a lo sen ta awp awp mai a, nimahsela a inthup hram hram a, hetiang hian a chhang ta a. 

“Tunah hian chhia leh tha hriatna leh Pathian hriat thu i sawi a ni a. A lakah thiam chan leh chan loh dan thu pawh I sawi a. Hetiang zawh hi kal lo beisei lo va, chhan pawh kal chhang lovang che. Hetiang thu hi ring tura tihluih pawh ka ni lo. Hetiang hian min zawt fo dawn nghe nghe emaw a ni awm a. Mi zawt fo dawn mah la, hetianga kal chunga thu neitu I nih hi kal duh lo thei a ni. Eng vangin nge hetiang thu hi mi zawh mi hrilh teh," a ti a. 

Rinawma chuan, “Thu sawi sawi duh mi leh engmah ngaihtuah mang lo mi nia mi sawi ka hriat che avangin. Chu mi lovah pawh chuan dik takin kal han sawi ang e. Thusawi mai mai hi sakhuaa nei mi i ni tih ka hria a ni. Kristiante zingah chuan daltu nasa tak I ni a. I thusawi chuan mi a tikhawlo va, i chetdan sual avang hian mi tam tak an tlu tawh bawk a. Mi tam tak chhiat hlauhawm takin an awm a ni. I sakhaw dante leh zu hmun leh thil bawlhhlawh tih i chin te. Thian sual pawla thu tha lo leh dawt sawi i chin zawng zawngte hi a la langfiah vek ang a. Nawhchizuar chungchang thua thufing an siam, 'Hmeichhia zawng zawng ti mualphotu a ni,' an tih ang hi I ni. Chutiang bawk chuan, Pathian thuawih zawng zawng timualphotu i ni,' an ti thin che a ni,” a ti a. 

Dangnala chuan, "Hetiangte hi i thusawi dan a ni a, mi ka sawisel e, l ti vel a, mi thinchhe tak i nih hi. Thu sawipui tlak pawh i nih loh hi. Dam takin awm rawh khai," a ti  a, a kalsan ta a. 

Chuti chuan Kristiana chu a thianpa hnenah chuan a han kal a, a hnenah, "A heti ang ka tih reng kha. I thusawi Ieh a awm dan chu a inrem thei lo vang. A nungchang siam that tum ai chuan kalsan che a duh zawk ang. Ka sawi ang ngeiin a kal tak mai kha. Duh leh kal rawh se. Tuma tan a pawi love, ama tan chauh a pawi zawk ang. Awm reng sela keini talin kan kalsan tho tho awm si a, amahin min kalsan ta a, a tha hle alawm. A awm reng zawngin a awmdan kha a sim ang tih ni hek lo. Min tibawrhbang ting mai a ni ang: Chu lo rengah pawh tirhkoh pakhat chuan, 'Chutiang mi chu kalsan rawh u,' a tih kha." a ti  a. 

Tin, Rinawma chuan, "A hnenah tlem tala thu kan lo sawi chu lawmawm ka ti hle mai. Ngaih pawh a la rawn ngaihtuah chhuak thiam mahna. A hnenah chuan fiah takin ka sawi a ni a, a boral pawhin ka sual a ni lo reng reng tawh mai a, a lakah kal thiang a ni,"  a ti  a. “A hnenah fiah taka thu i sawi kha I ti tha em em a ni. Tun laiin chutianga rinawm taka tih chu a awm loh avangin mi tam takin sakhaw biak dan chu an tikhawlo thin a ni. An biak dan thu mai mai leh thu sawi mai maiin an bia a, khawvel an tibuai em em a, Kristian sakhua an tikhawlo va, Pathian thuawi tak takte chu an tilungngai thin a ni. I tih ang tak hian mi tinin ti theuh sela ka duh a ni; chuti chuan an sakhaw dan chuan sakhaw dan dik tak a tawmpui ang a. Chuti a nih loh vek leh mi thianghlimte hi an pawl ngam lo law law ang," Kristiana chuan a ti a. 

Rinawma chuan, "A tirah kha chuan Dangnala khan huai takin thu a sawi a, mi zawng zawng hi lehthlak a tum a; nimahsela, rei lo teah a lo chuai leh ta mai a ni." a ti a. 

Chuti chuan kalkawnga an thil hmuhte chu sawidun chung zelin an kal a; chu an kalna chu thlaler ram a ni si a, an chau hle tur a ni. 

Thlaler ram an kal chhuak lek lek lawh a, chutih lai chuan an han hawikir a. Mi pakhat anmahni rawn zuiin an hmu a, amah pawh chu an hria a. A unaupa hnenah chuan Rinawma chuan, "Sawta lo kal saw tunge maw a nih chu le?" a ti a, a zawt a. Tin, Kristiana chuan a han en ve a, "Aw, kal thian tha tak Pathianthuhriltua a nih saw," a ti a. 

Rinawma chuan, "Kei pawh ka thiantha tak a ni bawk asin. Amah saw asin kawngkhara kala mi tirtu chu," a ti a. Chutichuan Pathianthuhriltua chuan an hnen chu a lo thleng a, chibai a rawn buk a, "In hnenah thlamuanna awm rawh se, unau duh takte u. Nangmahni pui thintute chungah pawh awm bawk rawh se," a ti a. 

Kristiana chuan, "Kan lawm em em a che, kan lawm em em a che. Pathianthuhriltu duh tak, i hmel ka hmuh hian chatuana nunna ka neihtheihna tura I ngilneihna leh I Intihhahzia ka hre chhuak thin a ni." a ti a. 

Rinawma pawh chuan, "Kan lawm em em a che, aw Pathianthuhriltu tha. Keini vanram zawng mite tan hian I mi pawl hi a va thlakhlelhawm tak em!" a ti a. 

Tin, Pathianthuhriltua chuan, "Thiante u, kan inthen tak achin kha engtinnge in awm le? Engte nge In tawh a, engtinnge In tih?" a ti a. 

Chuti chuan Kristiana leh Rinawma chuan kalkawnga an thil hmuh leh an chunga thil lo thleng zawng zawng chu an hrilh vek a; chu mi hmun chu thlen a harsatzia leh an lo thlen tak dan chu an hrilh vek a. 

Pathianthuhrlltua chuan, "Ka lawm ngawt mai. Buaina in tawh avang leh hrehawm in tawh avangin ka lawm a ni lo va, in ngam zel avangin kal lawm a ni zawk e. In chauhziate pawh pawisa lo va vawiin thlenga In la tih zawm peih zel avang hian ka lawm a ni. Keima chungah leh nangmahni chungah ka lawm a ni. Keiin ka tuh a, nangnin In at a, chutichuan "A tuhtu leh attu an Iawm dunna ni chu a lo thleng ang, (Joh. 4:36). 'In inthlahdah loh chuan a hun takah chuan in la seng dawn si a.' (Gal. 6:9) Lallukhum chhe thei lo chu In hmaah a awm. Chutichuan tlan rawh u, in chan theihna turin, (I Kor. 9:24*27). Mi thenkhatte chu mi Lallukhum la tur chuan an tlan a. Thui tak an thleng tawh a. midang an lo kal a. an rawn lakkhalh leh mai thin a ni. Chuvangin nghet takin chelh tlat ula, tumah laktir suh u, (Thup. 3: I I) Ramhuai thlemna chu In la ngam zo rih lo va, sual do turin thihna khawpin In la bei lo. Vanram in hmaa awm chu hre reng ula, thil in hmuh theih loh chu ring tlat rawh u. He mi khawvel thil reng reng hi pakhat mah in rilruah luhtir suh u. Tin, in rilru a awm dan chu tha takin en rawh u. Thil azawnga mi bumn hmang leh tha lo ber a ni si a. In hmel chu meilung angin awmtir rawh u. Van leh leia thiltihtheihna chu in lama tang a ni e." a ti a. 

Chutichuan Kristiana chuan a fuihna avang chuan lawm thu a hrilh a: Tin, an kalna a an tana tangkai tur thudang sawi atan a la duh ta cheu va. Amah chu Pathian thu hriltu a nih avangin an chunga thil lo thleng tur leh a ngam dan turte a hrilh theih an ring a ni. Chu chu Rinawma pawh chuan a remtih zawng tak a lo ni ve a. 

Chutichuan Pathianthuhriltua chuan a sawi leh ta a ”Ka fapate u. Chanchin Tha, thu dik tak, "Van rama Iut turin hrehawm tam tak in tuar a ni,” tih hi in hre tawh a; tin. khaw tinah chuan kawl bunna leh lungngaihna in tawk tawh a. Chuvangin chutiangte tawk lo chuan kal zel in beisei tur a ni lo ve. Chutiang thilte chu In chungah a thlen pawh a thleng tawh reng bawk a, a dang pawh a la thleng leh thuai ang. Tunah hian thlaler ram chu in kal chhuak lek lek tawh a; tichuan in hmaa khua chu In thleng thuai tawh ang. Chu khuaah chuan hmelma tam tak in tawk ang a, an man ang che u, a tih pawh an tihlum che u a ni thei e. In thurin avang hian a tu zawk emaw tal chu in thi ang; Nimahsela 'Thih thlengin rinawmin awm rawh u, tin, Lalpan nunna lallukhum a pe ang che u," Tupawh chuta thi chu na tak tuara sarthi ni mah sela mi dangte ai chuan a nuam zawk ang. Van ram chu a thlen hma dawn avang chauh a ni lo va, Midangin hrehawm tam tak an tuar tur chu a pumpeih dawn avang a ni. Tin, khua in han thlen hun chuan heng ka thu sawite hi a dik tih in hria ang a; in thian hi mi han hre reng ang che u. Mipa takin awm ula, thil tha tiin in thlarau chu Pathain siamtu rinawm tak hnenah chuan kawltir ang che u." a ti a.