THELMA-21

Hmasang Latin-ho zinga thu phuah thiam pakhat chuan,"Khaw chin leh khaw lo haw dan tur chu kan hre thiam lo. A tirah chuan van dum-pawl eng ruai hnuaia kawlkilah chhum them fahrah tak mi pakhat chauh hi a awm asin mawle!" a lo ti a.

Aw le, kan thu sawi lai chu i sawi zawm teh ang. Fiamthu thiam hmingthang Ogden Nash-a chuan,"Ka hlim ber lai hi nge ka thlan anga ka ngui ber lai hi aw? Ka hlim lai chuan lungngaihna-in min rawn hmuak thuai dawnin ka hre si a. Ka ngui lai lahin hlimna leh lawmna a hla lotih ka hre bawk si a. Thlan tur bik reng ka hre thiam lo," a lo ti tawh a ni.

Thelma-i chuan mi-lian, mi-hausa-ho chu a hnehin a hmin ta. Thian inkawmngeiha neih tur hual a ngah mai. Mahse, a la hmin ngut na maw? A ngaih dan ang rawkin khawvel hi a kal duh dawn lo. Mipui inkawm khawmna zinga a vawikhat inlantirnaah a tuitla thawkhat tawk a ni ang, ruai-pui an siamna leh party an neihna apiangah chuan an inchhung chawih-mawitu leh mwitu atan miin sawm chik takah an neih ta mai a. Thelma-i chuan London khawpui nun leh khawsak dan chu a ning tan ta hle mai a. Mahse, puipunna leh ruaithehna reng reng ah Thelma-i a tel loh chuan miin famkim an inti thei si lo; Errington-a nupui thar chu a tel ngei tur a ni!

Chutiang inkawm khawmna leh ruai-thehna siamah chuan Thelma-i chu lem ziak thiam, thu leh hla phuah thiam, ri-mawi tum thiam, England mi hausa chungchuang, politics lama mi challangte leh amah lo ngaizawng ru hranpa hrim hrimte chuan an bawr huai huai reng mai a. Thelma-i chuan a ningin a kham thawkhat tan ta a ni. Chutiang khawpui nun chuan Norway thingtlang rama an nun dan hahdam tak mai kha chu a tluk dawn lo. Thelma-i chuan hahthlak a ti tan ta. a hah reng mai a!

Entir nan, Thelma-i chu kawng hrang hranga khawvel mi hmingthangte'n an rawn kawm thin. Mi hmingthang chu an inkawmngeih vek ang chu a lo ti thin a. A lo ni lo. A ruk leh alangin an lo initsik kual tham vek mai hi a lo ni awm e. Hla phuah thiamte lahin, an tlukpui ve bawk hla phuah thiam dangte thu chheh chu an sawisel a; thawnthu phuah thiam hmingthang lahin chutiang bawkin. Sakhaw hruaitu lar zualte lahin kohhran dang thurin leh ngaih dan chu a mualpho thei ang bera kalh thlak an lo tum bawk. Chutiang chu mihring nun dan tur a lo ni thei ngai reng em ni? Chutiang thil ngaihtuah chuan Thelma-i chu a mangang tan ta em em mai a ni.

Lehkhabu thu phuah thiam leh ziak thiam hi chuan thu mawi leh thu tha elkhen an sawi thin. Mahse, anmahni nunin a zir si loh chuan farisai mai an lo ni dawn a ni! Chu chu Thelma-i ngaihdan a ni tan ta.

Thuziak thiam-ho zingah chuan mi pakhat ngaihsan deuh mai a nei a; chu chu Beau Lovelace-a a ni. Lovelace-a hi chu pa rilru tha tak mai, nel-awm tak, lehkhabu chhiar tam si lovah chuan a vengva pawl leh thu thiam ber pawl, a duh loh chinah chuan tu-mah hi dimdawi nei duh lo, a kutchhuakah mipui fak leh dem pawh ngaisanga ngai-haw duh chuang lo hi a ni a. Chu chu vantlangina an zahdera an ngaihsan em emna chhan hi a ni awm e. Thangthar-ho thu ziak thiam zingah chuan Thelma-i chuan a mi ngaihsan ber pawl a ni.

Mahse, Thelma-i ngaihthiam loh ber mai pakhat chu khawvel khawpui liana mi-lian hmeichhe-ho nungchang chu a ni. Nulat chu sawi loh, mi nu pawhin "mi nu ka ni" an inti duh tawh lo. Pasalte an thlimin an thlauthla a. Thenkhatin ai-en leh mitdawivaihte an atchilh. Bumtu tlangval an hmuh zawh loh pawhin, bumtu dawithiam dawr tur tal an ngah mai!

Hmeichhe thenkhat lah chu 'Pathian thu awih lo' ti mai ila, Pathian awm pawh ring lo an ni a. An hmeichhiatna chanvo zahawmzia hi hre lovin, mipa nazawng hmaa inphalrai a tul thu sawi mawitu hi an ni a. Awm chin tawk an hre lo, ni lovin, awm ngaihna an hre lo a ni ber awm e. Thufingah pawh 'Setana chuan mi tlawng-awl kut chu pawi khawihtir nan a hual ru reng thin," an tih ang hi a ni. Hetiang hi an ninhlei zual duh a ni.

Chutah, "Ei zawn nana mahni pianpui hmelthatna hmang chi" tih hi an awm leh a. An silhfen nalh tak tak chu han hlihsakin, an hmaia powder leh lipstick inhnawih zawng zawng chu han phihsak ila, hmel naran pu ve bawk mai hi an lo ni thin.

Tum khat chu, Thelma-i chuan Beau Lovelace-a hnenah, "A nih leh, eizawn nana mahni hmelthatna hmang chi in tih hi eng nge maw a awmzia le? Mi rethei fa, hmeltha si, mahni eizawn nana puipunna hmunah leh, chanchinbu, lehkhabu ilova hmel leh thlalaka inzuar chi hi an ni thin an maw?" tiin a zawt ta a. A tawpah chuan,"Hetiang-ho hi tuin nge hlawh pe thin?" a han ti a.

Beau Lovelace-a chuan a khabe chu a han tuai a, a han inngaihtuah vang vang hnu chuan, "Lady Errington, i mi zawhna tawngkam chu i chhep dik kher mai! Hetiang-ho hi tuin nge hlawh pe thin, i ti maw? Hmannia i hmelhriat thar Pi Gresham-i te ang te kha kan lal upa min pakhatin thla tin cheng sang chuang a pe thin asin. A pasal chuan a hai hlei nem. An chhungkaw ei hmuhna a nih avang maiin a sawisel phal lo a nih hi. Mahse, a kham hunah chu lal upa chuan rul inlihna kawr ang mai hian a hnawl leh mai ang a, nula dang tituai nalh zawk a zawnsan leh dawn a ni. Sum lut tur a awm tawh loh chuan Pi Gresham-i te nupa chuan tuk-zan tha an nei tawh ngai lo vang. Chu chu leplerh lukhawng a ni ngai e," tiin a chhang a.

Thelma-i chuan,"I thusawi awmzia chu ka hrethiam lo tawp mai," a ti a, a chala thlanchhe lo chhuak tuam tuam chu rawmawlin a han huih a. A ngaih-na hre lo chuan thil eng eng emaw a ngaihtuah chhuak ta a: Engati nge Pathian thuhriltu tam zawk hian mipui benga an thu fah nalh tak tak hi an zawm duh loh? Engati nge Politics lama hotu tam zawk hian 'tih tur leh tih tul' tia an sawi dum dum reng pawh hi anmahni ngei pawhina an tih duh lohva, an kut hmawr tal pawha an khawih duh loh? Engati nge mi rethei zing atanga hla phuah thiam lo chawr chhuakte hi, faktu leh sawimawitu mi challang sa an nih loh avang maia kan hupbeh thin? Engati nge? Thelma-i rilruah chuan "Engati nge?" tih tur chu a tam ta mai.

Derdepna, hlemhletna leh inbumna khawvel a lo nih dawn hi! Thelma-i chuan a ngaihna a hre ta lo. Chumi nia Beau Lovelace-a nena an inkawm hnu chuan Thelma-i chuan a tihngaihna hre lovin, amah lo paktu leh nu hawihhawm bera a ngaih Lady Winsleigh-i chu a belbul ta a ni.

Thelma-i chuan Lady Winsleigh-i chu a kawm zingin a bel zing ta viau mai a. Pi Winsleigh-i lah chuan talh tur duat tak hian a lo duat a. Pi Winsleigh-i rilru-ah chuan, "Eng nge, hetiang naupang rilru tlang lh thianghlim lutukah chuan tur far khat lek han pawlh ila, an hmingchhia-in an kehchhe der mai ang. A nunkhuaah hian tawngkamin tur chu ka phul ka phul dawn. Nile Lui kama lili parte pawh dimdawi nachang hre lovina an han thliah hi chuan a vuai nghal mai thin a ni lo'm ni? A rilru a tlangin a thianghlim si; amah tihchhiat nana ka thil tum eng mah hi a hre chuang lo vang. Amah Thelma-i hmel leh nungchang mawi hi ka itsik hranpa vang pawh ni lovin, Philip Errington-ana ka ngaizawng tih hre reng sia khatia min ngaih duh loh avang hrim hrim khan Errington-a elsen nan ka hmang dawn a ni," tih ngaihtuahna hi a lo awm ta a.

A tum chu a hlawhtling tan niin a lang: Thelma-i nen chuan an inpawl nel tan ta viau mai a. Philip Errington-a pawh chuan Lady Winsleigh-i chu a lo hlauthawng ru tawh thin a. Mahse, Thelma- nena an inkawmngeih em avang leh, Thelma-i chuan Philip-a hnena Pi Winsleigh-i that thu ringawt a sawi thin avangin Errington-a chu a ngaih a ngam leh ta deuh va ni.

Pi Marvelle-i chuan thil awmzia chu a lo hmu thiamin Thelma-i leh Pi Winsleigh-i inkawp chu thil dik a ni dawn lo tih chu a hre nghal mai a. Mahse, a pawisa duh avangin, Miss Marcia Van Clupp-i leh Lord Marsherville chu innei ngei tura chuktuah rem a lo tum bawk si a. Innei tura chuktuah rem tur mi dang dang chu a lo buaipui bawk nen. Chuti ni suh se chu, Pi Winsleigh-i laka Thelma-i dinhmun derthawnna chu a la thawm nghet hman ngei ang. Mahse, mihring kan ngaihtuahawm tak tak hun lai hi chuan puitu tur hnaivai hi an vang duh thin teh a nih hi!

Thelma-i chuan Pi Van Clupp-i te chhungkua chu a nel tak tak thei der lo. Pi Marvelle-in "Mi tha tak an ni e" a tih avang chauhvin pian leh murna lamah an thlahtute chu America rama pem lut hmasa ber kha niin an sawi. An sawi ni lovin, an insawi. An chhungkua an hausa tawh. Mahse, American mi mi hausa tam zawk an maiin pawisa lama mi chaldelh hi an tum. Mi zah-awm leh khawsak dan mawi zawng zawng hre ve nih chu an tum. Mahse, an tlin si lo. Errington-a hi zawng, nihna san lamah leh sum ngah lamah an ter pah lul lo va, an zah lo thei lo va ni.

Van Clupp te chhungkua chuan hleihluak leh luak tichhuak thei tur khawp hian Thelma-i chu an tlawnin an be-tha a; Thelma-i chu a hrilhhai lek lek zawk thin a. Pawisa ngah tehchiam lo American lo zin mi dang pawhin an be-tlawn ve tho va; mahse an pianphung leh an mizia a dik miau tak si loh chuan tu mahin an nel tak tak thei lo. A thinlung thianghlimna leh a rilru dikna chuan eng emawti mai maia a laka tlaktlum tumtute chu tawngka cheh ngai kher lo hian a hnar zel mai a ni.

Thelma-i kawmngeih luih tlat tumtu zingah chuan Sir Francis Lennox-a a tel ve a. Hei hi chu a sum ngah vang leh nihna (lal upa tluk titih) a ropui avanga England rama mi challang pawl a ni ve a. Pa tlawng-awl tak mai hi a ni a. Mi-lian nula-ho erawh chuan an kherh hle.

Francis Lennox-a nena an inhmuh tirh phat atangin chhan tehchiam sawi tur awm si lo hian Thelma-i chuan a ngeiin a hlau rilru tlat mai a. Amah phei chu Thelma-i lakah chuan pa hawihhawm ber pawl hi a ni a. An chaw-hlui kil-ho lai te pawhin,"Thingpui i la duh em? Vawt i ti em?..i kawrchung ka va lak ang che....I thutna ai khan ka thutna hi a nuam zawk lo maw?... thutna inthleng ang hmiang," te a ti thin a; Thelma-i lakah chuan bawih dik tak ang mai hian a khawsa peih a ni.

Mahse, Sir Francis Lennox-a bulah chuan Thelma-i chuan nuam a ti thei chuang lo. Tum khat pawh Thelma-i chuan a pasal hnenah chuan chutiang thil chu a sawi chhuak a. Sir Philip-a erawh chuan nui chung hian,"Sir Francis Lennox-a hi chu menah thlak rawh. Ngaih pawimawh tham a ni ngai lo ve. A peih phawt chuan a uite angin kan kut hi liak lap lap thin se a tawk mai, hlauthawng duh suh, ka Thelma. Mi liak mahse, mi a seh ngai lo vang. A pianken ve reng a nih hi," tiin a chhang mai a. Mahse, "pianphung" tih leh "pianken" tih chu thil hlauhawm tak a ni thei dawn niin Thelma-i chuan a hria a ni.

Chutih lai chuan Philip-a thian tha ber George Lorimer-a chu Paris khawpui panin London ata a "tlanchhe" ta a ni. "Tlanchhia" i ti mai ang a hmelma hlauhawm ber mai Thelma-i hmel chu hmu zing ngam hek lo. Thelma-i hmel a hmuh apiangin a lungphu a danglam a, a awm dan a theihnghilh a; thian tha berte han thik ngawt thu chu awm hek suh, baihvai leh chanhai hi a inti hliah hliah mai thin a. Chuvang chuan Paris khawpuia an thian Duprez-a hnena han tamtal mai mai chu a thlang ta zawk a ni.

Thelma-i chuan Lorimer-a kal bo leh ta chu a ngai ngawt mai a; a hman chang apiang hian Lorimer-a nu, nu tar lam tawh tak chu a va tlawh thin a. An vawi khat han inhmuhnaah chuan Lorimer-a nu chuan a fapa beidawnna chhan chu a hre ta mai a. Mahse, nu fing leh nu rilru tha tak a nih avangin a rilru chu a lantir duh lem lo va. A thian chhar tharte zingah Lady Winsleigh-i dawrah Thelma-i chuan Lorimer-a nu chu a ngaina ber a ni.

Thlasik a lo hnai ta. Nipui leh favang chhung zawng chu Thelma-i chu mi-lian puipunna ilo leh hna dang dangah a buai phili a; a rimtawng tan ta niin a lang a. Khawvel siam-chawp leh phuahchawp, farisai khawvelah a rawn cheng ve a; a rilru pawh a hah ta reng a ni; nuam a ti lo.

"Philip-a bula awm reng chung siin, engatinge, engati nge ka hlim tak loh? Kawng engkima Philip-a nupui nih tling turin theihtawp ka chhuah thin a ni lo vem ni? Mahse, engati nge hmun tingreng maia hmelma ka insiam thin ni? Dik lohna leh tlin lohna eng emaw tak ka nei a ni ngei ang," tiin a inngaihtuah ru thin a. Mahse, a dik lohna leh a tlin lohna ber chu, mi zinga thudik chauh a sawi duh thin vang hi a ni tih a hre si lo. Dikna hi chu khawvelah hian mikhual hnawksak ber mai a lo ni thin awm e.

Ni e. Thelma-i te ang pangpar mawi lutuk si chu duh hun huna thliaha thuai vuai theih mai an ni. Pi Winsleigh-i chuan ni rei vak lovah Thelma-i chu a hmin ta der mai. Thelma-i chuan Lady Winsleigh-i chu nghenchhanah a ring ta ringawt mai a ni. Biak-bul leh bekbawr berah a hmang a ni ber e.

A beng hriat lek lekah hian mi hian,"He nu hi chu mi danglam, mi piangsual a nih hi! A rilru hian atkhat chu a cheng a ni," te an ti sap thin a. Thelma-i chuan khawvel awm dan chu hre lo ta telh telh mai a, rual kawm hreh-ah a tlak phah ta ringawt mai a ni. Mi-ang-lo niin a inngai tan ta a ni ber awm e.

Chutah, Errington-a nena an inneihna chungah chuan chhum them te a lo zing tan ta. "Ruaipui" tih leh "Party" tih chuan an nupa chu vawi tam a kai-then ta kau mai le! Mi-lian, mi hausa ho vang a ni ber ang chu.

Chhungkaw laina-ho fuihpawrh avangin, Sir Philip Errington-a chuan politics a khel ta thut mai a. 'Member of Parliament' hmun chu inthlanna lo awm lehpek turah a chuh ta a ni. Chu a thil tum pawh chu a nupui Thelma-i hming tih-mawi zual tum nan chauh a ni. Amah ringawt atan chuan heta a dunhmun aia sang zawk hi engmah a beisei duh tawh lo.

Tichuan, Philip Errington-a chu M.P atan chuan a in-candidate ve ta a. A Secretary tangkai tak mai Neville chu phungbawmah a sawm a; an pahnih chuan chhun-zan zawmin khawl hi an chhu-in, politics kalhmang zawng zawng hi an bih dun tlauh tlauh reng ta mai a.

Errington-a chuan Thelma-i chu a hmangaih tawh lo ni lovin, tun hma ang chuan a ngaihsak hman ta lo. A hman chang hi chuan a la ngaihsak khawp mai. Mahse, Thelma-i chu a khawhar rilru tan ta tlat mai a ni. A mittui pawh aruk te hian a parawl zauh zauh thin. Chu chu a awmpui-nu Britta-i chuan a lo hmu fo thin a; chhan a awm ngei ni hian a hria a, na hi a ti thei khawp mai a, "London khawpui hi a lum lutuk a; mi hian zanlai pel pela leng turin an sawm kual fo thin si a; chu chu a taksain a tuar lo tan ta a ni ang," tiin a lo suangtuah a.

Thelma-i chu a chhe lutuk ta deuh nia a hriat hnu chuan, tuk khat chu Britta-i chuan,"Ka u, i hmel hi hmuh a hahthlak ta em mai! Engin nge mawl che? Eng nge i vei? I ngai i ang ta lo tawp mai....!" a han ti a.

Tawng hreh zet chung chuan Thelma-i chuan,"Britta, min ngaihtuah suh. Ka nuamhnai lo, ka damsam lo deuh hlek a ni," tiin a chhang a. Mahse, a insum zo lo va a tap chhuak ta phawng mai a; Britta-i chuan a han kuah vat a.

Chutih lai chuan tu'n emaw pindan kawngkhar chu a rawn kik a,"Thelma, i awm em?" a rawn ti a. Britta-i chuan kawngkhar chu a va hawng a; Errington-a chu a lo ni a. Philip-a chuan a nupui hmuhnawm loh dan chu a han thlir a, a ngaih a tha ta hlek lo mai a. Chutah,"Thelma, Thelma, khawvela ka Thelma neih chhun! I lo tap pek em ni? Engati nge? Engati nge?" a ti a, a han pawm kang a.

A pasal awma bei chung chuan Thelma-i chuan,"Philip, ngai pawimawh suh. Min ngaihtuah suh. Eng mah a ni love. Lungchhiatna eng emaw ho tak ka nei a ni mai a ni. Philip, min la hmangaih reng em? Min nin chin leh kham chin hi i la nei thei palh ang em?" a ti ta a.

Errington-a chu mak tiin a mengphawk ta hle mai a. A nupui hnenah chuan,"Chutiang zawhna mak lutuk tak maite chu engati nge nangin i chhak chhuah tak? Nang hi hmangaih che maw? Hmangaih zui ngai che maw? Mambawih, i a lutuk! Chutiang thil chu min zawt ngai tawh suh ang che," tiin a chhang a.

Zak hmelpu tak chung hian Thelma-i chuan,"Kei mi hmangaih tluk hian nula dang chu i la hmangaih ngai lo vang ti raw..?" a han ti leh a. Errington-a chuan na lutuk sawi lo hian a han fawp leh a. Chutah,"Thelma, ka Thelma bik, ka ta liau liau i ni tih i inhria em? Engati nge chutiang zawhna atthlak lutuk takte mi zawh tak ni? Ka nunkhua leh ka hnathawh zawng zawngte hi i tan ka ti vek tih hi i hre-thiam lo'm ni? Mam-bawih, i hah lutuk a nih ber hi. Chawl hahdam deuh tawh teh. Zanin pawh kan tum, kan programme kha pumpelhin Brilliant Theatre-a an ennawm chhuah chu i en lo mai teh ang. Thil ho mai mai leh thil bengchheng a nih leh ngei ka ring. Zanin chu kan pahnih te chauh hian inawm dun teh ang," a ti a.

A mittui hru pah chuan Thelma-i chuan,"Nang nena awm dun chu ka thlakhlelh ber a ni. Mahse, Lady Winsleigh-i hnenah khan zanina Brilliant Theatre-a ennawm enpui kan lo tuam tawh si a. Chu lovah, Warwichshire panin London khawpui hi kan chhuahsan thuai dawn si a; ka thian tha ber Lady Winsleigh-i chu tiam thlawn leh rihhrilhhai ka hlau deuh va ni," a ti a.

Philip-a chuan,"Lady Winsleigh-i hi i ngaina viau a ni maw?" a han ti a. Thelma-i chuan,"Tehreng mai. Ka chungah a thain a hawihhawm thei lutuk. A tluka min duat thiam tur hi an vangin ka ring. Chu lovah,Philip, nang hi a ngai-hluin a ngaisang em em mai bawk che asin. Kan titi karah i hming hi a rawlh ning thei lo," a ti a.

Lady Winsleigh-in ngaih luih phet tuma mualpho pawh dawn lova a kherh luih thin thute kha hre chhuakin Philip-a chu a nui ru sak a; a lang chuan,"Chuti a lo ni maw? Pi Winsleigh-i chuan a lo va han ti lawmawm ve! A nih leh zanin chu Brilliant Theatre-a kal chu i remti tihna a ni maw?" a han ti a. Thelma-i chuan,"Lady Winsleigh-i ka tiam tawh bawk a, remti e. Thutiam hi zawng an bawhchhe ngai lo. Chu lovah, 'Faust' leh 'Hamlet' lemchante kha hmuhnawm ka ti em mai!" tiin a chhang a.

Errington-a chuan,"Zanina Brilliant Theatre-a an chhuah tur chu i rin ang a ni lovang. 'Fraust' leh 'Hamlet' te thawnthu ang a ni hlek dawn lo. Fiamthu-ah pawh a ho-lam lehzual chi 'Burlesque' an tih ang chi hi a ni a, i hre thiamin ka ring lo; i ngaina kher lo mai thei bawk," a ti a.

Thelma-i chuan,"Chutiang kawngah pawh chuan min la hrilh fing thei zel ang chu. Kei hi chu thingtlang mi mawl ka nih hi hre reng la; ka rual-pawl lohna kawngah chuan min kai-hruai zel ang che. Lady Winsleigh-i pawhin,'Rawn en ve rawh; hmuh-nawm i ti ngawt ang,' min tih tawh kha," tiin a chhang a.

Errington-a chuan,"Lungfing lo leh mi mawl i inti maw? Ka duh ber leh ka duh-lai, felna leh thianghlimna-in i khat a; chu chu khawvel rilru leh thinlung eng angin nge chhilh pha ngai le? Chutiang nihna chu eng mahin ka thleng phal ngai lovang," a ti a, a nupui sam chu a han chulsak leh a.

Thelma-i chuan tap nui chung hian,"Tak tak...?" a han ti a. Errington-a chuan,"Engati nge chutiang tawngka chuan min zawh? Hmeichhe lampangah min ringhlel tan em ni? Thelma, Thelma, i laka chutiang khawnga ka lo awm theih ngai chuan, min chhinchhiah rawh. A ni lo ve Thelma, London khawpui hi i chhuahsan phawt mai teh ang. Chutichuan, Warwickshire khawpuia kan inpui pakhatah chuan kan pahnih chauhvin kan awm dun anga; engemaw chen chu ka ta liau liau i ni thei dawn nai," tiin a lo chhang a.

Thelma-i chuan," Tak tak maw? I ta liau liau ka nih bakah ka ta liau liau i ni zui ve ang em? Ti teh, Philip, an ennawm chhuahna hmunah chuan i va kal phawt teh ang... Pi Clara Winsleigh-i kan lo tiam tawh kha. Philip, hei hi min han hrilh teh....ka ta i ni reng phal dawn maw? Mi dang pawm atan chuan ka phal thlawt lo che," a han ti leh a.

Errington-a chuan,"Ka Thelma, ka Thelma, min ngai rilru chhia nge min duh der tih ka hre hrang lo. Ngawi teh, Thelma, zanin chu Brilliant Theatre-a kal chu i ti talh maw? I ring ang a ni hlek lo vang. I nuihna leh i tahna pawh a ni chuang dawn lo. Mahse, i thu thu le. Khawvel chinchang leh mihring ningkhawng i hriat zauna pawh a ni mahna," a ti a; an nupa chuan Brilliant Theatre-ah chuan an kal ta a. Pi Winsleigh-i leh a pasal leh Errington-a Secretary Neville-a pawh chu an tel ve a.

An ennawm chhuah an han tan chu Thelma-i chuan hmuhnawm a ti ngang mai a! Hla mawiina a awih pah chuan tleirawl leh nula hmeltha tawk tak mai chu sava chi hrang hrang thla lem leh khuai leh phengphehlep anga incheiin an rawn lam chhuak a; Thelma-i chu a lo tui hle mai. Malpui leh awmbawr an tilang lutuk deuh pawh chu a lo ngaithiam zel a ni.

Chutah, a chhuah thumnaah chuan tawr thadeuh mai hi sava thla lem nena inthuam hian a lo lang ta a. A hmel phei chu a chhe lem lo, hmeltha tak pawla sawi theih chi hi zawng a ni. Mahse, a pianhmang a pa-til deuh a. Chu lo rengah a hnute-bu leh a mal tluan chuan a lang kim deuhthaw a, Thelma-i chu a tui thei ta hlek lo mai a ni.

Thelma-i chu a han tho titih a; a pasal chu a han melh a. Mitmeia rawn pah chuan,"Ngawi teh, Philip, hetiang thil hi ka hmuh duh chi a ni ngai lo. Ti teh, i haw tawh mai teh ang," a han ti ta a. Chu Thelma-i tawngka chu an bula thu Lady Winsleigh-i chuan a lo ngaithla ru reng a, nui tat tat pah chuan hetiang hian Thelma-i chu a zilh fiam ta a.

"Haw suh; haw mai rih suh. Hetia ennawm chhuah laklawh laia i haw vaih chuan miin an nuihzat ang che.....nangni ang mi-lian-nu tih tur a ni lo. He nu hi nu tuitla tak, nu tlangtla tak a ni a; vantlang hian an lawm asin! Mi-lian-ho hian an ngaina-i an ngaisang a, tuna a zungbun bun hlawm khawm pawh khi cheng nuai tam man asin! Khitiang lunghlu zungbunte khi chu kei leh nang hian kan bun pha lo vang," a han ti a.

An tawngkam chu Thelma-i chuan a la ngaithiam chuang lo va; Sir Errington-a erawh chuan a lo hre ru a ni ang, phun sep sep chung hian,"Thelma, ka Thelma duh tak, i duh loh leh i ning a nih chuan i haw dun tawh mai ang hmiang. Kei pawhin ka kham lampang a ni tawh e," a han ti a. Thelma-i chuan,"Lady Winsleigh-in hmuh-nawm a la tih su chuan, chutiang ngawta kan hawsan a mawi lo vang. I awm hrih lawk teh ang," a ti leh ta zawk a.

Chutih lao tak chuan Errington-a te chhungkaw Secretary lal ber Neville-a chuan Errington-a chu a han kheuh va, hetiang hian a sawi ta a,"Ngawi teh, Pu Philip, i han chhuak lawk teh ang: hmeichhe hriat lohva sawi tul eng emaw a awm tlat mai. Thil pawimawh tak a ni. Lo chhuak lawk teh," a han tia. Errington-a chuan Thelma-i chu a han melh a, a inthiam lo deuh hlek zawng a ni ang,"Min ngaidam rawh:kan han chhuak lawk teh ang," a han ti a.

Errington-a leh Secretary Neville-a chhuah hnu chuan an ennawm chhuahnaa a "changtunu" ber 'Violet Vere' chu a lo chhuak ta a. An puan danah "Chawngzawng" emaw, "Thlikthlidir" emaw te an ti mai a; Violet Vere-i chu sava thla lem hian a rawn inthuam a, hetiang hla hi a rawn sa ta a:
"Ka duh, ka duh ber mai che!
Min hmangaih chuan mipa tling ang che!
Vawi khat min han fawp la min nawn rawh!
Infawh hi zahpuiawm mahse,
A nuam kan hlen, mitthi kan hlep a ni mai,"
tiin. Chang dang tam tak pawh a sa tel awm e. Chutiang kher kher chuan Thelma-i chuan sava-in an sak a ring lo va. Sava lema changtu leh hla rawn satu Violet Vere-i chuan pindan chhungril lamah entu mipui chu a lahsan ta a ni.

Chutia puanzar a han khar hnu chuan Lady Winsleigh-i chu a nui chhuak ta a; a bula lo la thu reng Thelma-i hnenah chuan,"Ka varak khawi-nu, hetiang hi hre thiamin ngai-thiam tan ve rawh...chu chu rual-pawlna a ni ngai. Mipa-ho hian hetiang thil hi an lawm kher asin! Ngai chiah mah rawh; tunah pawh i pasal Philip-a leh in Secretary Neville-a chuan an chhuahsan che a, lem chhuahna pindan chungnung panin an kalsan che a nih hi! Violet Vere-i an hmuh hnu-ah hruai haw turin an rawn lam leh tho vang che," a han ti a.

Thelma-i chu a phu ta zawk mai a; a ngaihna hre lo chuan,"Ngawi teh, Lady Winsleigh, he nu thau leh sa ngah tak mai hmel hmu tur hian Philip-a te pu-tu chuan ennawm chhuahna hnung lam pindan chhungrilah min luhsan ang maw? ....He Violet Vere-i hi hmuhnawm leh tuitang ka lo tih loh tehlul nen! I fiamthu ani lo maw?" a han ti a.

Lady Winsleigh-i chuan,"Ka sava khawi note, ngai thiam la, ngai-thiam rawh. Violet Vere-i hi thlikthliekbawm a ni nge a ngaizawngtu tlangvalhote hi a bawmtu an ni zawk tih pawh ka hre hrang lo. Pawna thingpui dawr pawh a ruah vek saw! Mami, tunah pawh, tunah sawn a pindan chhungrilah va lut mah la, amah Violet Vere-i tih loh chu hmeichhe hmel pakhat mah i hmu lo vang... mipa vek an ni ang. I pasal pawh i va hmuh tel ve ngei chu ka ring. Mahse, Thelma, khati chuan mengphawk suh: i pasal Errington-a hi mipa dang anga taltir ve a ngai dawn a ni. A thiante tih ang a tih duh ve si loh chuan miin mi mawl lutukah an chhal phah tawh ngei dawn a ni. Khawvel hi i rin ang a ni hlek dawn lo. I pasal Errington-a hi i pawnfen hmawr vuantu leh i hnamhrui vuantu kumkhua atan i lo hual rilru palh a ni ang e: i thelh hle ang!" a ti a.

Hawihai tak mai chuan Thelma-i chuan,"Chutiang kawng chu vawi tam min hrilh tawh. Ka U Clara, ka ngaih dan chuan i rin aiin ka pasal Philip-a nungchang hi chu a rinawm ang. Engah nge tunah pawh an ennawm chhuahna hnung lam pindana a changtu-nu Violet Vere-i hmu tur kher kherin min chhuahsan ang? Ka awih thei lo. Ka awih thiam lo. Ka awih duh lo. Thu dang min hrilh zawk teh," a han ti a.

Chutih lai tak chuan Errington-a chauh chu a lo lut ta a,hmel phelh deuh hian,"Neville-a a nuam hnai lo. In-ah ka tir haw ta mai. He lemchan thil hi en tlingtla se pawh ka tih vei nen, a damsam tlat loh avangin ka tir haw ta mai a ni," a rawn ti a.

Thelma-i chuan,"A va pawi thei ngai em! Chu chu i rawn khawtlai chhan a ni maw?" a lo ti a. Errington-a chuan,"Ka khawtlai teh lua em ni? An lemchan chhuahtu-ho pindan chhungrilah sawn thil eng emaw mai mai zawt fiah turin minit sawm vel lek ka va lut mai alawm," tiin a chhang a.

Aw thian ni awm tak hian an bula Lady Winsleigh-i chu a han khuh fiam khar a. Chutah, nui ru titih hian Errington-a chu,"Violet Vere-i chu i va hmu hman tho ti raw..?" a lo ti a. Errington-a chuah hrilhhai hmelpu ang reng hian,"Hmu e. Ka va hmu asin. Pi Winsleigh, i pawitih loh chuan, ti teh u, i haw mai teh ang u. Neville-a damlo thut hi ka ngaihtuah tlat mai a. Chu lovah Thelma-i hian he ennawm chhuah hi a ngaina der si lova; nangina i remtih chuan," a han ti a.

Lady Winsleigh-i chu a tho ta nghal a; tawngkam nem dam deuh mai hian,"Sir Philip, i rawtna hi eng laiin nge ka hnial phal ngai? Hetiang burlesque ennawm chhuah hi chu ka thlahlel ve tak tak ngai hlei nem. Tir'u, i haw tlang mai ang u," tiin a lo chhang a. Lungrual tak chuan an haw tlang ta a.

Sakawr-tawlailir chuan an chhuak ta a. Kawng lakah chuan kawngkam khawnvar eng hnuaiah chuan Errington-a chuan a nupui hmel chu a han en a; a duh aiin a lo dawldang ta niin a hria a. A ngaih tha lo chuan,"Duhlai, ka awmah hian mi han ngheng teh, rawn bei rawh. I hah lutuk a nih hi," a ti ta a. Thelma-i chu Errington-a awmah chuan a han bei a; kut insuih chial chung chuan sakawr-tawlailirah chuan an chuang ta a; tawng chu a ngai tam tehchiam ta lo.

Chutia sakawr-tawlailira an kal pah chuan Errington-a chuan,"A ni; a ni; ka rin ang chiah a ni, i hah lutuk! Kumin chhung chauh hi chu ennawm en pawh kan ching dun tawh dawn lo nia," a ti a, Thelma-i chu a han hrawm nawn leh a.

Thelma-i chuan,"Philip, nichin khan ennawm chhuahna hmuna a changtute incheina pindan chhungah khan i va lut tiraw...?" a ti ta thut mai a. Ngaihsam aw tak mai hian Errington-a chuan,"Lut e! Mahse, sumdawnna lam thil a ni bawk a, nuam chu ka ti tehchiam lo," tiin a chhang a.

Thelma-i chuan,"A nih leh, eng lam thil nge ni ta?" tiin a han zawt leh a. Errington-a chuan,"Duhlai, chu zawng ka hrilh thei lo va che. Hrilh ngam che ila chu ka duh ngawt mai! Mahse, tu hnen maha hrilh lo turin ka lo tiam tawh si a; hming inhnamhnawih tur tu emaw an tel ve tlat mai a, chu chu a mualpho dawn a ni,"tiin a chhang a. Thelma-i chuan,"A nih leh nia mawle. Philip, hetia eng emaw mai maia ka dawp lui che hi chu ngai-thiam ang che," a ti a: ngawi reng chuan an haw ta a.

In an thlen chuan Errington-a chuan a secretary Neville-a damlo chu a pindanah a va kan vat a. Darkar tam an titi dun a. Chutih lai chuan Thelma-i chu khum-puiah chuan mittui tla zawih zawih chung hian a mu a. A hah rimtawng chu a tawpah chuan a muhil ta nge nge a.

Mut-reh hun chuan Errington-a chu an mutna pindanah chuan a lo lut ve a; Thelma-i chu a lo tawngvai nawk nawk mai a:"Ka naupang hian min hmangaih zel tho. Tu mahin min hmangaih chin hi an hre pha lo. Tu mahin khawvelah. Khawvelah tumahin, Hmangaihna hi zawng a daiin a chuai thei tak tak ngai lo. Ka pasal hian min khamin min ning tak tak lo vang," a lo ti niah niah mai a. Philip-a chu a hrilhhai hle.

Chutih lai chuan Lady Winsleigh-i chu veng dang daihah a lo la meng reng mai a. A cheng sang tam man dawhkanah chuan hetiang lehkhathawn hi a lo ziak a, Sir Francis Lennox-a hnenah a ni:-
"Duhtak Lennie,
"Nichin lemchanna hmunah khan ka lo hmu ve che a: nang chuan min hmu lo der a nih kha. I lo va han leplerh ngai ve! Chu chu ka pawiti emaw i ti a ni ang nge.....ka pawiti ther te lo.
"Kan mithianghlim Sir Philip Errington-a pek chuan thu nawi mai mai sawipui atan ka bulah a nupui a hnutchhiah a. Chutah chhuanlam siamin min chhuahsan a. Lemchang-hote incheina pindanah Violet Vere-i a va kan ru a ni tih ka hai si lo. Nang pawhin i va kan ru ve tih chu ka hria. Hrep tak a che! Duh suh! It suh! Naktuk chu chaw-chhun ei paha titi phungchang sawi dun turin hotel-ah emaw inhmu ang hmiang.

I tana rinawm,
Clara Winsleigh"
tiin. A pasal thlima Sir Francis Lennox-a ngaihzawn chu ang mah a sawi tel duh ta lo. Sir Phlilip Errington-a alo ngaihzawn kumkhua vanga a nupui rawn chawk thar hmeltha a thikthu te pawh eng mah a sawi thawi lo. Nu fing tak zawng a ni ber ang.

Chu a lehkhaziak chu an chhiahhlawh za rual dawn lai zinga hmeichhe vengva ber Louise Renaud kutah chuan a pe a,"Hmeichhe fing leh vengva" tih awmzia hi chu kan hrethiam hlawm mai ang chu. Chu nu pawh chuan a lehkha vawn chu a pindanah tui-so hu nen a ur hawng te te a, a chhiar chhuak hmasak leuh mai a ni.

Louise Renaud-i chu sual hranpa pawh hi a ni lo; a hmeichhe ze dik tak hi a chhuah ve zauh thin mai pawh a ni. French hnahthlak nula hmelchhe lem lo, English tawng la lam pai hret hi a ni.

A lehkha chhiar ruk a thawn chhuah hnu chuan nula Louise Renaud-i chuan an chhiahhlawh hotu-pa Briggs-a chu a pan vat a: "Tu nge lemchanna hmuna 'Violet Vere' in tih thin hi?" a han ti chawt mai a. Briggs-a chuan,"Violet-i maw? Hmelthat lama khawvela a ber kai mawle! Milian zawng zaawngin an atchilh asin! Engati nge tun thleng thlenga i lo la hriat ve loh? I hnenah chauh hi chuan kei pawhin ka ngaizawng ru ve tih hi ka han hrilh mai teh ang che. A thlalak pawh ka kawl asin. Mahse, a nungchang avangin a zah-awm lo," tiin a chhang a.

Louise Renaud-i chuan,"Chutiang hrep a nih si chuan, engati nge nizan khan a nupui kalsana Sir Errington-an a va tlawh ruk? Engati nge Sir Francis Lennox-a pawh a kal?" a ti ta phiar phiar mai a. Briggs-a chuan,"Sir Francis Lennox-a hi chu ngaihkhatah ngai rawh. Mahse, Sir Philip Errington-a kher kher chu, mi tawngka i lo ngaisual palh a ni lo maw?" a han ti a. Louise Renaud-i chuan,"Mi sawi mai mai zawng a ni lo; keimah ngeiin ka hria," tiin a chhang a.

Briggs-a chuan,"Hmeichhe awm khawm hi chuan khawvel hi chu inchawk hnawk hneh mang e aw! In mitmu in intham chhuahsak lo hi mak ka ti zawk ngawt mai! Mahse, chu phei zawng huatthu-ah la suh ang che," a ti a, an inkalsan ta a.