CHAWNGMAWII

CHAWNGMAWII (VENUS de MILO)

Kum 1820 khan khatih hun laia Ottoman Empire ( tuna Greek ram chhung) Milo/Melo thliarkar hmun hlui  puk pakhat chhungah  lo neitu pakhat, a hming Yorgos Kentrotas an tih chuan Hmeichhe lim feet 6 leh inche 8 laia sanga a hmuchhuak hlauh mai a. A hlutna a hriat vak loh avangin French mi, Olivier Voutier hnenah man tlawm te in a hralh ta mai a. Chu thu chu thuneitu ( Turks) ho beng a lo thleng ta a, milim chu an chhuhsak a, an khawpuia thawn an tum a, lawnga an kalchhuah dawn tep chuan Olivier Voutier leh a thiante-ho chu a siruk la-in an rawn thawkchhuak  leh ta rup a, milim inchuhin an inphek sual ta chiam mai a. French-ho chuan an chang leh ta nge nge a. France ram lalber King Louis XVIII kutah an hlan ta a, ani chuan Louvre Museum, Paris-ah 1821 kum khan a hlan leh chhawng ta a ni.  

He milim hi marble lunga siam a ni a, a siamtu hi Antiokei khua ami Menides-a fapa Alexandros, a niin Lal Isua pian hma kum 130-100 inkar vel Hellenistic period-a siam a lo ni a. He milim hian Paris khawpui a han thleng chu khawvel a nghawr nghing dawt a ni hrim e! He milim mawi tak mai hi Milo khuaa Chawngmawii (Venus de Milo) tiin a sakhming an phuahsak a. Chawngmawii limah hian Pathian thil siam a zawng a mawi ber mai hmeichhe mawina, zahawm-na leh duhawmna a kim vek niin an sawi a. Khawvela Art critics chhuanvawr leh chhuantawlawl te chuan heti fakauva mit a lakna chhan an ngaihdan an sawi a, an ziak a, ngaihdan a tam, pawm dan a tam tih ang maiin an mawina chhan an sawi inang reng a awm si lo!

Chawngmawii ban vei lam chu a ban bul koki-a invuahna zawnah a bul a, a ban ding lam erawh chu a ban puamah a bul thung a, kawr a ha lova, puan pan tak a veng a, Chhemdam thli leh Zo thlifim leng velin a puanven chu a chhem phe siau va, a puanven tla lo turin a malpui vei lam chu a khai kang deuh hlek a! A malpui puam nalh tak leh a kawng bawr invuahchhoh dan vel leh a awm bawr “vur var ang” mawizai chu sawiin a siak lo!  Aesthetics mithiamte chuan hma khawsang atanga hmeichhe lemziak leh hmeichhe lim siam tawh zawng zawng aiin Chawng-mawii-ah hian hmeichhe mawina a lang famkim ber a ni lo em ni? an ti hial a ni.

Art critics thenkhat chuan Chawngmawii ban bul chu vuahsak turin an rawt chamchi a. Artist thenkhatin a ban vuah dan tur lem an lo ziak chhin a, milim tuk thiam thenkhat lahin a ban vuah chhin na tur plaster an lo chhung  thul. A ban vuah dan tur chungchangah inhnialna  titam ting a ni mai si! A tawp-ah Museum thuneitute’n “A ban vuahsak lovin, a ngaitein dah mai tur” an ti ta a ni. 

Chawngmawii sakruang din dan leh a ban bul chu a inhmeh riau va, a pian nalh tak leh a mawina chuan a entu rilru a tihlim em em a, Chu achhapah “a ban bul lo ta se, a kut chu engang takin mawi ang I maw? tiin a entu rilruah ngiahtuah zui tur leh suangtuah zui tur a neihtir a, a entu khan milim ban awmdan tur a suangtuah mawi thiam zawh  poh leh, kha milim kha a lo mawi zual zel thei ta zawk a lo ni. Mizo hla phuah thiam C.Z.Huala’n “Hla hi thu (Prose) a ni lova, fiah lo deuh riai ni se, lung a leng zawk” a tih ang deuh kha a ni. 

Lemziak te, milim te, rimawi te, thu leh hla te hian a entu / a ngaithlatu / a chhiartute hringnun thil tawn a zirin an rilruah suangtuahna leh vei zui veng vengna (conceptual) a neihtir thin a, chu suangtuahna chuan ramri kham a nei lova, a zalen a, kan chenna khawvela mita hmuh theih, kuta  khawih theih leh benga a ri kan hriat theih (perceptual) te aia mawi zawk leh duhawm zawk ZALENNA RAM-ah mi a chentir thei thin a ni.