Crimean War

'Crimean War'

(Oct 1853 - 30th march 1856)

  ~Lalrochama Saivate

'Theirs not to make reply,

Theirs not to reason why,

Theirs but to do and die.

 Into the valley of Death'

(Charge of the light Brigade)

- Alfred Lord Tennyson

'Ram Thianghlim', Palestina-ah, Lal Isua pianna hmun nia an rinah, kum zabi 4 na ah khan Roman Emperor, a mumanga Kross a hmuh avanga chinchiahna hmangtu tih ang renga kan chawi lar, Constantine-a nu Heleni khan Biakin, 'Church of Nativity' a sak tir a. Chu chu - Eastern Orthodox te, Roman Catholic te leh Anglican Church ten an inenkawl ṭawm a ni. 

Tichuan, chu Biakin chhuatah chuan, an kohhran pualin, 'Arsi' an dah ṭheuh bawk. Vanduaithlak takin 'Arsi' pakhat chu a bo ta hlauh mai a. A hma a Palestina awp chungchang a lo inngur sa an nih avangin : 'Russo - Turkish conflict' thi thei lo te, 'Russian Eastern Orthodox' humhim tumna te, 'French Catholic expansion policy' te, British Empire - 'Ottoman power balancing policy' avang tein, 'Crimean War' hmingthang tak kha a lo chhuah phah ta a ni.

Kha indona ah khan Russian Empire (Eastern Orthodox) chu a mal ṭan a. Lehlamah - French (Catholic), Ottoman Empire, British Empire (Anglican Church) leh Sardinia te an ṭang thung.

Mihring rilru hi a lo chhe awm. 'Remna Lal', Lal Isua pianna hmun atanga indona rapthlak tak, Europe tidanglam hial khawpa nasa a lo chhuak kha a mak hle. Ottoman Empire phei chuan a chhiat phah hle a ni. 

He indona nghawng chhuah, 'Battle of Balaclava' (25th oct 1854) ah English Cavalry tlemte, Lord Cardigan hoten, Russian sipai an let a tam daih te thih ṭhak thlengin an bei a. Tichuan, chumi denchhen chuan, Alfred Lord Tennyson-a'n poem ropui leh dai tawh ngai lo tur, 'Charge of the light Brigade' kha a lo phuah chhuah phah a.

A nihna takah chuan, he Light Cavalry te chetna hian rahṭha engmah a chhuah hran lo. Thi leh hliam an thahnem hle tih zawng a ni deuh mai. An inhnukdawk hnuhnawh leh tho lehnghal.

Tin, 'Crimean War' vanga khawvel pumin an ngaihsan, hmeichhe pakhat a lo chhuah phah bawk a. Chu chu, 'Lady with the Lamp' an tih huai huai, British nurse hmingthang 'Florence Nightingale ' kha a ni.