RIDES AGAIN-22

Devil's Bowl ațanga mel riat velah chuan ruam deuh zawk pakhat hi a awm ve a. Ruam sir lehlam chu ram chhengchhe deuh mai hi a ni a, lehlam chu ruam rem deuh a ni a. Lehlam kil tawpah chuan thing hmun a awm a, chu chu, 'Painted Valley' an ti a, chumi pukah chuan Joan-i leh Belle chu zankhat an riak tawh a, thing hlim hnuaiah an țhu dun a, an piah lawk lung chungah chuan Silver-a chu a țhu a, a hawi vel ruai a. Tin, an sakawrte pawh chu a zin phah sa vekin thing bulah a thlung a.

Joan-i chuan, "A rukin sakawr thlunna hmun saw va thleng ila kan tlan chhuak thei ang em?" a han ti a. Belle chuan, "Thei mah ila tlan chhuah chu ka duh hlei nem! Ei tur pawh kan nei lova, henglai ram palailenga vah vel hi ka thil duh loh ber pawl a ni. Chu lo rengah Silver-a sawn silai a kawl bawk a," a ti a. Chutiang lam chu an sawi zawm ta reng reng lo a.

Chhun lai velah Silver-a chu an awmna lam panin a lo tlan chhuak a, "A lo kal ta, a hmanhmawh awm hle mai," a han ti a. A lo thlen laia lo awm ve ngawt pawh a duh loh avangin Joan-i chu puk chhungah a lut ta thuai a. Silver-a chuan, "Hmuak turin a lo in pen parh a ni maw? A hmel chu a chhe lo viau, mahse a aia chhe lo ka hre tlat," a han ti a. Amah a ti a ni tih hre reng chungin Belle chuan, "I lei kha veng țha rawh, chuti lo chu i pu in a hleh sak daih mai tur che a nia," a ti a. Ni dang ang chu ni se, Silver-a chu a zam hle tur hi a ni a, mahse he mi țum hi chuan engmah hlau lo tawp ang maiin a nui ve vur vur mai a.

Belle-te awmna bul a lo thlenin Setana chuan a sakawr chu a dintir chawt a, a chhuk ta nghal a. A sakawr leh amah chu chau ve ve hle hian an lang a. Belle pawh chuan, "Engti zia nge ni ta?" a han ti a. Setana chuan, "Hell City an la ta. Ka tlan chhuak hman hlauh a, mahse pathumin min rawn umzui a, an zingah chuan Red Rock Sheriff pawh a tel ve," a ti a. Belle chuan, "Engvanga tel ve nge a nih?" a ti leh a. Setana chuan, "A fapa ka kâh hlum sak a ni. Thin a rim mang e, an lo hnai hle tawh ang, Mel hnih pawh a tling tawh lovang. Helaiah lah hian bihrukna tur pawh a awm bawk si lova," a ti a.

Belle chuan, "Tunah hian tlan chhuak nghal vat ula...," a ti chauh a, Setana chuan, "Min umphak thovang, kan hnu kan thup thei awm bawk si lo," a ti ta zel a. Belle chuan, "Jeff, tihder dan ka hria, man an tum ber hi nang hi i ni si a, kan bum thei ang," a han ti a, a ngaihdan chu a sawi ta thuai a. Setana chuan, "A țha, i lo fing kher mai. Chutiang chuan min tihsak duh ang maw?" a han ti a. Belle chuan, "Chu aia tam zawk leh nasa zawk pawh ka tihsak duh ang che chu..... i la hre mai ang. Silver-a hi lang lo turin tir bo la, i hmai tuamna kha min pe bawk rawh. I sakawr, pluto hi puk kotlangah i dintir anga, i faifuk veleh ka tih tur chu ka ti nghal ang," a ti a.

Setana chuan, "Belle, thluak i lo nei țha kher mai, California rama Willow Ben ka pan dawn a, chutah chuan min rawn zawng la, khawvel hi kan la hneh dawn nia," a ti a, a hmai tuamna leh kawrchung chu Belle a pe a, lehlam a hawisan nghal thuai a, sakawr dum chu puk piah zawk kovah chuan a va dah a, a zin erawh chu a thlak nghal a. Chutih lai chuan ruam tawn tirha sakawr chungchuang pathum lo lang chu a va hmu a, rang takin a biru a, a faifuk ta a.

Puk ațang chuan mipa anga inchei, Setana kawrchung ha a, puan sena hmai tuam a lo tlan chhuak a, sakawr dum chungah a lawn kai a, chak deuh maiin a tlantir ta nghal a. Mi pathumte pawh chuan sakawr chungchuang chu an rawn hmu a, an um ve ta chiam mai a. Setana chuan, "Duhtawkin um rawh u. Pluto-a a chauh meuh chuan in hmuh phak lovah ka tlanbo hman tawh ang. Belle, an kah hlum hlauh che chuan a pawi viau ang. Amaherawhchu, Willow Ben-a beidawng taka min la zawnna tur chu i pumpelh dawn tihna a ni mai. Willow Ben khua hi a lo awm ngai reng te a nih chuan," a ti a.

Sakawr chungchuang chu an liam fel chiah tihin Setana chu puk piah zawkah chuan a va lut a, zawi te hian, "Joan," a han ti a. Puk chhunga hmeichhia chuan a rawn hmu a, thil rapthlak tak hmu ta ang maiin Setana chu hnunglamah tlemin a han tawlh kir a, "Uai, nangmah zawk maw? Min tihder ngam a ni maw?" a han ti a. Belle chuan, "Ngam e. I tana țha ka ngaihtuah avangin, he thil hi ka ti ngam a ni," a ti a.

Hmai khuhna tel lova Setana hmel lo lang chu a hmuh vawikhatna chiah a la ni a, nunrawn hmel hle hian a hria a. Setana kut bawr dinglam chuan a puakruk kawm a hnaih sawt hle a, Belle pawh chuan a thih teuhzia chu a hrechiang em em bawk a. Setana hnenah chuan, Jeff, Double K chu i chang tawh lova, Joan-i khan i tan țangkaina enge a neih? Kei hi ka danglam a, i mize anpui, khawvel laka hel ve ngam ngat ka nih hi. Tun țumah hi chuan i hloh ta a, mahse nang ang hi chuan i la bei nawn leh tho dawn a, chutih hunah chuan, i hlawhtling ve tawh ngei ang," a han ti a.

Setana pawh chuan a puakruk kawm chu a thlah ta a. Belle chu a han per ţak ţak a, thinrim deuh maiin, "Khatiang hmeichhia nawi lutuk, thla khat leka i nin mai tur ai khan, kei hian enge it awm lohna ka neih bik? Hmanah pawh, 'hmangaihna hian thil nasa tak a ti thei a, kawng a dap chhuak thei a, a ngaidam țhin a ni' i tih kha, ka hmangaih che a, kawng pawh ka dap chhuak tawh a, ngaihdam erawh chu i tih ve tur a ni ta," a ti a.

Nula hmelțha leh duhawm tawk tak mai si, a tana inpe zo em em a hmuhin, Setana rilru meuh pawh tlemin a nem ve deuh a, a hlawhchhamnate pawh theihnghilhin Belle chu a han pawm a, "I tidik a ni. Ka mit a lo del rei....," a tih lai mekin, ui kawlh rum ri niawm tak hi a hria a, hnunglam a hawi thuai a. Puk kawngkaah chuan kun deuh ngulin, ban pahnih phar chhuakin Silver-a chu a lo lut a, Setana hnenah chuan, "Kha kha ka nula a ni. Țha taka ka enkawl chuan pek min tiam tawh kha," a rawn ti ta a. Belle chuan, thinrim deuh maiin Setana chu a en a, "Chutiang chuan i lo tiam a ni maw? He... ramsa kutah hian min pek i lo tum a ni maw?" a ti a.

Setana chuan, "Belle, i tana țha tur ka ngaihtuah avangin ka tiam ta a nih kha. A kuta pek che hi ka tum lo reng reng," a ti a. A thusawi chu Belle chuan a awih lo tih pawh Setana chuan a hre thei mai a. Silver-a chu, "Chhuak rawh" tiin a vau leh ta a. Silver-a chuan, "Hmeichhia kha ka duh tawh, ka la nghal dawn tunah," a ti a, a rawn hnaih ta zel mai a. Hmeichhia a duhna chuan a pu a hlauhna zawng zawng pawh a ti bo zo vek tawh a, a puin a tiam tawh angin, a lawmman hmuh tur chauh chu a rilruah a khat tawh a ni.

Silver-a leh zelin a thu a han hnial ngam ta chu Setana chuan a tuar zo ta ngang lova, a puakruk a phawi a, Silver-a âwmah a va kap ta a. Silver-a chu a eu awrh a, mahse a la rawn pan hnai ta cheu mai a. Setana chuan vawikhat a han kap leh a, chutah zawng Silver-a chu a ding chawt a, a lu a thle tawn luk luk a, a tlu ta a. Belle chuan Silver-a chu a en reng a, Setana hnenah chuan, "A va han rapthlak em, tualthah hi pawi i ti miah lo a ni maw?" a han ti a. Setana'n a chhan let hmain, "Lander, ka nghak che a nia," pawn ațangin, mi pakhatin a rawn ti ta a.

Setana chuan, midang tam tak pawh khawngaihna nei hauh lovin a lo that tawh țhin a, a vanglai ni si, taksa pawh la chak em em si chu, thihnain pawnah a lo nghak ve ta a ni. Setana rilru mangang lutuk chuan engmah a ngaihtuah thei tawh lova, pawn ațangin Sudden-a chuan, "Lander," a han ti nawn leh ngat a. Tunah chuan puitu tur pakhatmah nei lovin, Setana chu amah chauhvin a ding ve ta a ni. Chuvangin puitu țha a neih chhun, Silver-a a lo that ta mai te kha a inchhir hnuhnawh em em a, a hlauhna chu hnawhbo tumin a han nui a, "Min mamawh hle a nih dawn chu," a ti a, hreh em em chungin pawnah chuan a chhuak ta a.

Sudden-a chu puk ațanga pen 15 vela hlaah a ding a, a kut pahnih chu a thlak thla a, a bulah tumah an awm lo tih Setana'n a han hriat chuan Silver-a a lo that ta mai kha a inchhir em em a. Sudden-a hnenah chuan, "Eng atan nge min tih?" a han ti a. Sudden-a chuan, "I thil bat min rul turin ka rawn zawng che a ni. Mi pakhat zawng chhuak tura tirh ka ni a, mahse ka chhan chhuah tura chu, that lo thei lovin nang hian min siam ta a ni. Amah chu Dolver-a a ni," a ti a.

Sudden-a thu sawi awmzia chiang taka a han hriat meuh chuan Setana chu a thinrim thar leh ta thut mai a, a thinrim em avangin a hlauhna pawh chu a theihnghilh leh ta vek a. He pa, Governor mi rawn tirh hian kawng tinrengah tlan khalhin, a thil lo ruahman zawng zawngte pawh a hlawhchham phah ta vek a ni si a. Chung chu a ngaihtuahin Setana rilruah chuan Sudden-a thah chakna ringawt a khat ta a. Midang tumah an awm lova, pakhat leh pakhat inbei tur an ni tih te Setana chuan a ngaihtuah chhuak a, puakruk kah lah chu thiam ve tawkin a inhre bawk si a. Tichuan, "Enthlatu mi tenawm ber chu i lo ni maw? Engah nge min kah nghal mai loh?" a ti a.

Sudden-a chuan, "I pek ve ngai reng reng loh, 'Chance' ka pe che a ni. Kan inpan tawn anga, kan pen zat kan chhiar zel anga, 'pathum' ka chhiar veleh kan puakruk kan phawi dawn nia," a ti a. Tichuan, 'pakhat' tih pahin hmalamah pen khat ve ve an pen chhuak a, 'pahnih' tih pahin an pen leh a, mahse pathum chhiar thlen hmain Setana chuan a puakruk a phawi a, a hmet puak ta nghal a. Setana chu che rang teh mah se, a kut phe chu Sudden-a chuan a hmu rang em em a, chuvangin a kawngbawr dinglama a puakruk pai chu, mita hmuh hman loh khawpa rangin a phawi chhuak a, a kawngbawr zawn vel ațangin a hmet puak ta a. Setana chu a kimki chawih a, bawkkhupin a tlu a, lei a ham ta vak vak a.

Sudden-a chuan puakruk la hum reng chungin Setana chu a va pan hnai a, mahse kah nawn leh pawh a lo ngai tawh lova. Silver-a hmuh la inbeiseiin Sudden-a chuan puk lam chu a pan phei zel a, mahse Silver-a ni lovin puk ațang chuan Belle a lo chhuak a, Setana ruang chu en chungin, "A tawp thlengin a rinawm lo tluan chhuak zak a nih hi," a han ti a. Sudden-a chuan, "Miss Keith-i hi khawiah nge a awm?" a ti a. Belle chuan thil awmdan chiang takin a hrilh a, Sudden-a chuan, "I lo chhanchhuah avangin i lei kan ba a nih chu," a han ti a.

Mahse Belle chuan, "A tana țha ka ngaihtuah vang ni lovin, hnawk ka tih vangin ka kaltir ta mai zawk a ni," a ti a. A rilru chhung khawi lai berah emaw chuan rinawmna a la awm a ni tih pawh Belle thusawi ațang chuan a chiang hle a, amah vek chuan, "Engtin nge min tih ve dawn le?" a ti a. An piah hla fea an awmna lam pana sakawr chungchuang pahnih lo kal chu Sudden-a chuan a han kawk a, "Pakhat zawk saw, Red Rock khaw Sheriff a ni a. Nang chu ni ila, sakawrah hian ka chuang ang a, a theih anga rangin ka tlan bo nghal ang," a ti a.

Sudden-a thu sawi awmzia chu Belle chuan a hrethiam em em a, chuvangin, "Mi țha tak i lo nih hi. Theih chu ni se....," a ti țan chauh a, Sudden-a chuan, "An lo thleng thuai tawh ang. A zin mawi deuh inphahna sakawr zawk saw hmang rawh," a han ti nawn leh a. Chu sakawr chu Setana sakawr a ni a, Hell City chu kutruakin a chhuahsan hauh lovang tih pawh an hrechiang ve ve a, Sudden-a rilru chu hre rengin leh lawm em em chungin Belle chu sakawrah chuan a lawnkai a, a tlantir ta nghal a.

Sheriff Dealtry-a te pawh an lo thleng ve thuai a, Belle chu an rawn hmu hman lo hlauh a. Dealtry-a chuan Setana ruang chu a han kuai zangthal a, a chal darah puakruk mu luhna a lo thi ser ser a, "Lander-a a nih ngei hi, Jim, i sakawr ke a bai hlauh chu a vanneihthlak hle mai, nang chu awm lo la, a tlanchhuak ngei dawn a nih hi. Kan va um....," a tih lai mekin Sudden-a chuan, "Miss Dalroy-i'n min hrilh a, ka hre tawh asin. Setana remruat ni lovin Belle remruat zawk a lo ni a. An chhuah dawnin Belle chu Setana inchei ang chiahin a inchei a ni awm e. Setana phei chuan a tlanchhe zawk kha Belle emaw a ti a, mahse Belle chuan Miss Joan-i kawr hak lai a thlengpui a ni," a ti a.

Dealtry-a chuan, "Ni e mawle, Miss Joan-i chuanna sakawr kha a țlan chak nasa si a, kan um nasa teh asin. Jeff-a'n a va kap a, a va fuh hlauh a, chuti ni suh se, tunah pawh hian Joan-i chu an la um phak kher lovang. Mahse silai ri a hriat avangin a sakawr chu a tiding ta mai a, kan va um phak ve thei ta chauh a ni. Pa pathumin hmeichhe pakhat puakruka kan tin lai chu i hmuh ve atan ka it ngawt mai, Jeff-a'n a thil tih sual a hriat laia a hmel chu hmuh a nuam lo hle mai. Chuvangin Frosty-a nen hian, ram dangah tih tur pawimawh zawk neiin kan inhre ta thuai a, anni pahnih chu kan kalsan ta a ni. Belle Dalroy chu khawiah nge a awm ve tak?" a ti a.

Sudden-a chuan, "Sakawr pakhat a kim lova, amaherawhchu, Belle sakawr chungchuang chu ka hmu hauh lo mai," a ti a. Belle sakawra a lawnkai lai khan lehlam a hawi daih tih erawh chu Sudden-a chuan a sawi tel lo a ni. Frosty-a chuan, "Jim, Lander-a hi hetah hian a awm tih engtin nge i hriat theih?" a ti a. Sudden-a chuan, "Lui ruam kan pelh lai khan, puk chhunga Silver-a lut lai ka hmu a, chumi hnu lawkah silai ri ka hre ta a ni. Silver-a ruang pawh puk chhungah hian kan hmuh mai ka ring a ni," a ti a. A rin ang ngeiin Silver-a ruang pawh chu an hmu ta thuai a, Silver-a chuan, a kawngbawrah puakruk a lo pai ve nghe nghe a.

Sudden-a chuan, "Setana khan amah chhanchhuak theitu tur ber a kaphlum a, a tisual chiang hle a ni," a ti a. Sheriff Dealtry-a chuan, "Silver-a hi chu kan phum nghal ang a, Lander-a ruang erawh hi chu kan phurh haw a ngai ang. Midangte pawhin an hmuh ve a ngai ang. A hmai tuamna puan sen a tel lo chu a pawi hle mai," a ti a. Frosty-a chuan, "A tel alawm. Kawnglakah khan ka chhar a, Miss Joan-i khan a thlauh a nih ka ring," tih pahin a ipte ațangin rawmawl sen a phawrh ta a. Tichuan, sakawr zinah hruizena phuar behin Hell City khaw lalpa ruang chuan a lalna ram chhe tawh chu a pan ta a ni.

Nula leh tlangval, sawi tur ngah em em si chu, ngawi rengin sakawrah an țhu a, rei fe hnuah a mipa zawk chuan, "Joan, him taka i awm hi ka lawm takzet a ni. Mahse hetah hian engvanga awm nge i nih?" a ti a. Joan-i chuan Belle thil ruahman dan chu a sawi hnuin, "Ka kal loha, ani a kal chuan, misualpa nen khan kan pahnih chauhin kan awmdun dawn tihna a ni si a. Amah kha ka pui a ni tih phei chu ka hre thova, mahse tlansan kha ka châk em a ni. Belle khan 'an kâp ngei ang che' min tih avangin ka sakawr kha a theih anga chakin ka tlantir ta mai a ni," a ti a.

Jeff-a chuan, "Ka kâp fuh palh hlauh ang che tih ka hlau hnuhnawh ta ngawt mai. Kap fuh che ila chuan engtikahmah ka in ngaidam thei lovang. Thil pawi ber chu, kan misualpa chu a tlan bo hman awm si a, mi tam takin min la ringhlel fo dawn a nih hi. Mahse, Dealtry-a khan a fapa chu Lander-a kah hlum a ni tih a hre tawh a, ka hahdam sawt mai," a ti a. Joan-i chuan, "Ka va lawm em, Jeff, Double K-ah i lo kir ve tawh ang chu maw?" a ti a. Jeff-a chuan, "Kir ve ang, a nih nih ka ni ve tawh mai ang," a ti a. Joan-i chuan, "Chuti, hawh i hmanhmawh ang," a ti a.

Jeff-a chuan, "I hnenah hian sawi ngam tur pawh niin ka inhre lo, mahse puk chhunga ka tan lai khan pasal nei tawh angah ka han suangtuah chhin che a, hrehawm ka ti takzet a ni. Joan, khawngaih takin min hrilh la....," a ti a. Joan-i chuan, "Jeff, a chhe ber nia ka ruat lai che pawh khan ka duhna che hi a ngai reng a ni," a ti a. An chuanna sakawrte pawh chuan thil awmzia an hrethiam ve a ni chek ang. A nih loh vek pawhin inbiak duhna an nei ve hrim hrim a ni phawt ang a, Jeff-ate pahnih hriatpui hauh lovin insi rial hian an kal dun ta a. Tichuan, Jeff-a pawhin kut phar chhuah chauh a hmabak ve ta a ni.

Sudden-a te'n Hell City an va thlen leh meuh chuan Merry-a te hovin outlaw ho chu an lo khawm vek tawh a, Scar-a erawh chu inkahnaah a thi tawh a, an zingah chuan Dirk-a pawh a tel ve a. Sudden-a chuan, "Dirk-a hi chu dawrkai ve mai a ni a, nupui fanau te pawh a nei a, thil sual tihnaah a tel ve lo," a ti a. Sheriff Dealtry-a chuan a chhuahtir ta nghal a.

Tih tur dang a awm tawh lo bawk a, kal pahin Frosty-a leh Sudden-a chu Twin Diamond panin an kal ta thuai a. Kal pahin Frosty-a chuan, "Setana sakawr zin kha ka hmu miah lo. Belle khan a la ta a nih ka ring. A chhungah pawisa a tam hle awm si a, engah nge i zui ve mai loh?" a ti a. Sudden-a chuan, "Tih tur dang ka la nei a, hmeichhia ka la ngaihtuah hman rih lo," a ti a. Frosty-a pawh chuan a zawt nawn ngam leh ta lova.

A khumah Keith-a chu, lukhamin a inkam ţhu a. Pindan chhungah chuan Merry-a, Sherrif Dealtry, Sudden-a, Frosty-a leh Langley-a te pawh an awm ve a, Joan-i pawh chu khum bulah chuan a ţhu ve a. Thil awmdan chanchin tlangpui Keith-a an hrilh hnuin kawngkhar chu a rawn inhawng a, pindan chhungah chuan Jeff-a a lo lut a. Keith-a chuan vin zetin, "Rochan tur i paih hnu hmuh kir leh theih beiseiin i lo kal a ni maw?" a lo ti a. Jeff-a chuan, "Ni love, ka pa, ngaihdam dil turin ka lo kal a ni. Thildang engmah ka beisei lo," a lo ti a. Keith-a chuan, "I thusawi chuan rilru a khawih hle mai. Mahse, dawt a ni, rochan tur beiseiin he hmeichhia hi hmangaih ang takin i lang der mai mai a ni," a ti ta a.

Merry-a chuan, "Keith, ka ţhian i ni a, dam ţha ve chu ni la, ka sawi harh deuh hlek ang che. Ka..," a tih lai mekin Keith-a chuan, "Merry, lo inrawlh ve suh. Joan, he pa hi i neih vaih chuan kut ruakin i chhuak ang. Chu chuan, danglamna a siam ngei ang tiraw?" a ti leh a. Joan-i chuan, "Engmah a danglam chuang lovang," a ti a. Jeff-a chuan, "Ka tan, Arizona ram hausakna zawng zawng aiin Joan-i hi a hlu zawk em em a ni. Tunah chuan ka harhchhuak tawh a, hei hi i ngaihdan a nih chuan pawi ka ti ngawt mai," a ti a, chhuah nghal mai a tum ta a. Merry-a chuan, "Jeff, min lo nghak rawh, ka Ranch-ah kan kaldun..," a tih lai mekin Keith-a hmel chu a va hmu a, a tawp ta chawt a.

Ruahsur zawha ni a lo lang ang mai hian Keith-a hmel chu a danglam tawh a, "Merry, ka fapa min ruksak dawn em ni?" a han ti a. Jeff-a chuan a hrethiam thuai a, a tlan phei a, a pa kut chu a va vuan a, hlim deuh mai hian, "Ka pa," a ti ta a. Keith-a chuan, "Boy, min ngaidam rawh, Joan-i vangin ka chhin che a nih kha," a ti a, an kut pahnih chu a buk thuah a, "Double K-ah hian Keith hming a dai tur a ni lo," a ti a. Merry-a chuan, "Keith, min bum chiang hle mai, ka ranch-in, fanu leh fapa thar ka nei dawn emaw ka lo inti tawh asin," a ti a. Frosty-a nui hmel a hmuh veleh, "Ka in chu cheimawi deuh a ngai ngei ang a," a han ti leh thuai a.

Frosty-a pek chuan, "Chei teh chiam a ngai lovang. A chhuat te, a chung te, a bang te thlak a ngai ang tih chauh a ni, a nghahchhan, a leilung chu a rinawm khawp alawm," a ti a, an nui zo ta vek a. Midang chhuah vek hnuin Jeff-a chu a hnuhnung fal a, "Ka pa, min ngaihdam avangin ka lawm takzet a ni," a han ti a. Keith-a chuan, "Ho mai mai, ka dam loh avangin thil tam tak ngaihtuahna hun ka nei a, inchhirna tur pawh ka ngah mai. I ţhiante saw va kawm rawh," a ti a.

Hapta kar engemaw zat a ral hnuah Sheriff Dealtry-a chuan Sudden-a hnenah chuan, "Engtizia nge, kal bo i tum ta a ni maw, Jim?" a han ti a. Sudden-a chuan, "Ni e, Tucson khuaah tu'n emaw min lo nghak a ni," a ti a. Sheriff chu a nui suk a, "Nula a ni ngei ang maw?" a han ti a. Sudden-a chuan, "Ni lo, min nghaktu chu, pa tawi lam deuh, sam var va mai a nia, 'Bleke' tiin an ko ţhin," a ti a. Sheriff chuan, "Governor Bleke-a maw?" a ti a. Sudden-a chuan, "Ni e, 'vuina tur, pangpar thawn tur em ni aw?' a ti hial tawh ang," a ti a. Sheriff chuan, "Chu, a hnen aţanga lo kal i ni maw? I va ngawi thei ve," a ti a.

Sudden-a chuan, "A mi tirh pathumna ka ni," a ti a, midang pahnihte chanchin chu a hrilh nghal a, "An ţawng tam lu deuh a nih ka ring," a ti bawk a. Sheriff chuan, "Engmah ti lovin a ngawi ta mai mai emaw kan lo ti asin. I chungah a lawm hle dawn a nih chu," a han ti leh a. Sudden-a chuan, "Chibai buk a? 'I tiţha e, Jim' tih mai bak, engmah ka hlawh chhuak lovang. Mahse, chu baka thil ngaihthlak nuam chu a vang hlein ka hria," a ti a. Sheriff chuan a pawhdawh aţangin lehkha a rawn phawrh chhuak a, Sudden-a pek pahin, "Hei hi Landera'n a lo ak a, i tan awmzia a nei em?" a ti a.

Lehkha chu Sudden-an hmana a hloh, wanted lehkha bawk kha a ni a. Sudden-a chu a nui sak a, "Hmanrua atana ka rawn ken a nih hi. He lehkha hian thawnthu sei tak a nei a ni," a ti a. Sheriff chuan, "Ka tan hriat tam teh chiam a ţul lo," a ti ta thuai a. Zu um a la chhuak a, hreh tak chungin ţhian ţha inţhen turte'n an tih ang chiah hian muangchangin no an dawm dun a, chumi hnuah Sudden-a chu pawnah a chhuak ta a.

Sudden-a sakawr chungchuang lai leh kawtthlera, a sakawr muangchanga a kal lai chu Sheriff Dealtry-a chuan kawngkhar aţangin a thlir zui reng a. Ralkhat hla feah Sudden-a chu a liam fel ta tih veleh Sheriff Dealtry-a chuan, "I tiţha e, Jim," a han ti a, pindan chhungah a luhsan ta a...

A TAWP TA..