HAUSATA RUANG AN PHAWRH

~Familia Fanai Lalṭansanga

Khawvel ram ni tla seng lova roreltu, Kumpinu sawrkar chuan Lt. Stewards lu latute laka phuba chu lak ngei chu an tum chiang hle a ni. Lushai Hills-a lal ṭhenkhatin an nawm an makin British ram awp chhunga mite an rûn chamchi ta mai bawk nen. Phuba la tura Kumpinu a inbuatsaih mup mup lai hian Lianphunga khuaten Chengri phaia Chakmaho awmna khaw 24 an rûn a, mi 101 an that a, sal 91 an man a. Vûta faten Sirte tlanga Thangluah lal an rûn bawk. 

Kawngpui an sial

Kum 1888 ṭhal lalin India rama Kumpinu sipai lal His Excellency the Commander-in-Chief thupek angin Lushai Hills-a awm Hausata te unau leh Chin Hills-a awm a puzawn Zahuata te hrem tur leh Sap lu pathum la let tura beihpui thlak turin ruahmanna an siam a. Bengsika an han ngaihtuah chet chet hnu chuan fur ruahtui tlak laia ram chengchhe tak taka beihpui thlak chu thil tih chi-ah an ruat lo va, September thla a lo thlen chuan  1988-1899 December- March thla inkara The Lushai Expedition 1889 nei turin a hun an bithliah fel ta a ni. An tih tur pawh sawrkar lehkha No.65L, dated 6th February 1889-ah chiang takin a ziak lang bawk a. He thupek hi March ni 3-a chhuahin a rawn um zui nghal a, an han kalna khuate chu loh theih loh a nih loh chuan a pawnga taka sipai chakna hmanga hrem loh tur (no punitive expedition) tih thu delhkilh a awm nghe nghe a ni. March ni 12-a thupek lo chhuakah chuan beihpui an thlakna chhan ber tur chu Hausatna khua tihchhiat a ni tih a chuang. 

1. Chin Hills thleng kawng laih tlang tur. 

2. Hausata leh Zahuata te hi Lt. Stewards-a an thah avangin hrem ngei ngei tur. 

3. Nakin hnu zela hman theih reng tur sipai hmun nghet buatsaih tur. 

Tichuan, Kumpinu chuan a siruk laiin Lushai Hill-ah beihpui (The Lushai Expedition) a thlak ta a. Sipai hotu tur chu Colonel Tregear a ni a, sipai hi 1200 lai an tling a.

1.  2nd Bengal Infantry sipai leh officer – 250

2.  9th Bengal Infantry sipai leh officer – 250

3.  2nd Battalion 2nd Gorkha Regiment sipai leh officer – 400

4. 4th Madras Infantry (Pioneer) – 200

Laipui (Bombay Mountain Battery) – 2

Heng bakah ian Chittagong Frontier Police tlem an tel ve a. Puakpur atan Bengali leh Punjabi mi 1000 rual vel leh sai 38 an hruai tel a. Kawng lai tur hian Chittagong tlang ram mi Chakma leh hnam dang 2500 vel hlawhfa tur an ruai bawk a. Colonel Tregear kaihzaveng turin officer pathum ruat an ni bawk a. Chungte chu:-

1. Mr. Lyall, Commissioner, Chittagong Political Officer.

2. Capt. J. Shakespear, Military Intelligent Officer.

3. Mr.C. S. Murray, Rangamati Police Superintendent.

Heng sipai leh an puakphur te leh kawng lai tur hlawhfa zozaite innghah khawmna tur leh sipai hmunpui (base headquarter) atan Demagiri (Tlabung) chu hman tur a ni. 

Kum 1889 January thla ni 16 aṭangin Tlabung aṭanga Lunglei, Seipuia khaw panin kawngpui an lai ṭan ta mup mup mai a. Chakma 2500 rualin an han lai chu an lai sawt hle mai a, February thla tawp lamah chuan Phairuang an lai thleng der a, March ni 11-ah Lunglei, Seipuia khua Theiriat bul thleng kawng feet 4 aṭanga feet 6-a zau, sai thil phur kal theihna tur an lai tlang ta a. (Reference: The Lushai Lands phek 51)

Fort Lungleh

Sipaiho chu Phairuang bûk-a an la awm laiin Capt. Shakespeare, Field Intelligent Officer leh C.S. Murray te chuan sipai 12 leh signaler tlemte hruaiin January thla ni 28-ah Theiriat lal Seipuia an han bia a. Ani hi kum 1871-72 Thangliana (Thomas Lewin) hun laia ṭhian ngheta an lo siam tawh kha a ni a, an lamṭang a la ni reng a. A khua Theiriat leh Lalruma khua Zohmun (Ramzotlang) inkarah hian tlang dung, tuifinriat aṭanga feet 3500 vel sang, thengthaw nuam tak a awm a. 

Vai lo len hma hian Lungleiah khua a lo awm tawh niin upa titi chi nga (5) lai a awm a. Chûng zinga ni thei ber awma lang ta chu - Lalrivunga tupa Vansanga, Khawnglung lal Ṭhuama fapa kha a ni, Lunglei luahtu hmasa chu. A hun lai hi Kawnglung khua an ṭeh hnu ni awm tak a ni. Chûng laia Lunglei khaw hmun chu tuna Chanmari veng chung lam leh khaw mawng lam chhuahchhawng mual thluangthla thui tak awhin in 500 khuain an awm niin an sawi. Lunglei pasalṭhaho chu sal ram chhuah an hratin sai pawh an kap thei hle ni tur a ni. Hetih lai vel hian Thehlep khuaah Sailo lal Darliankuala tupa Lalngura, Savunga fapa a lal a. A khua pawh in 500 vel bawk niin an sawi a. Thehlep khua erawh sakei kah tam lama an hming thang ve thung a. An inel tawn deuh hle ṭhin a, an hla fiam han siam aṭang pawh hian a hriat theih a ni: -

“Leitlang valin chhim tiang sai maw lem ang in zawl le,

Hleppui valin Kawlkei ziaṭial dar ang kan chhai, 

Tu than sang maw Bawmzo chenin,” an ti a ni. 

Lunglei khaw hming put chhan chu tuna Lunglei khuaa sipai lui, Vai puithiam in thlang lama lung, leilawn ang deuhva indawh a awm a. Chu chu “Lung lei” an ti niin upa titi hrang hrang an sawi ṭhin a ni. 

Seipuia chuan Lungleia sipai hmunpui siam chu a remti a. Sipaiho lo chho zel chu March ni 15, 1889-ah Lunglei an lo thleng a, Lungleiah chuan sipai hmun nghet siam chu Colonel Tregear chuan a nemnghet ta a ni. Chuta ṭang chuan Lungleiah hian mei a mit ta lo a ni. 

Lunglei kulh (Fort Lungleh) chu Pawi ram beihpui an thlakna atana sipai ral kap tur innghahna (Advance Base) hmun tur a ni a, sipai awmna tur te, silaimu dah khawmna tur te, damdawi in leh kudam te thirhrui thawnna in te an sa a, pawn lamah thing kulh chhah tak an hung chhuak vek bawk a. A dung - yard 167 (feet 501) leh avang - yard 40 (feet 120) a ni. Lunglei kulh hi Chittagong Frontier Police 200 in an luah ta a ni. 

Hausata khua an pan ta

February ni 17, 1889-ah Tlabunga aṭangin C.S.Murray chuan Frontier Police 50 hruaiin Hausata khua panin an chhuak a. Police te chu Assistant Superintendent Mt Welker-a’n a ho va. Seipuia khua aṭangain a unaupa Vandula khuaah an kal zel a. Mat lui an kan a, Chhimtuipui an thleng a. Heta an awm lai hian Darzo lalnu Darbilhi, Hausata nen inlaichin hnai tak chuan palai pahnih tirin C.S.Murray hi a rawn biaktir a. Darbilhi palai pakhat Vaitlaia titi kotlang aṭangin C.S.Murray chuan Hausata chu a thi tawh a, a thlanah Lt.Stewards-a silai laiphir chu an phum tel thu leh a puakruk chu Vaitlaia chuan khawiah nge a awm tih a hriat loh thu te chenin a hre thei ta a ni. Chu achhapah Vaitlaia hnen aṭang chuan Sap lu ruh chu Paawna hnena a awm thu a hre leh ta bawk a. Lt.Stewards leh a pawlte beitute zinga Paawna chu a tel ve thu a hrilh bawk a. Lt. Stewards te rawlrala beitute zingah Hausate unau, Parawna leh Zahuata khua te an tel thu a sawi bawk a ni. Heta an awm lai hian Kenglawt lal Zahuata leh Khawhri lal Zakapa palaiten C.S.Murray hi an rawn hmu bawk a. Inkap lo va an hnuaia intukluh an duh thu an rawn hrilh bawk a ni. C.S.Murray chuan palaite chu an hotu ber Colonel Tregear hmu turin a thu a rawn a.

 

Heng lai chhehvela lalte hian Burma ram, Chin Hills lama Vai lian hotu Sir White George chanchin te an lo hre thawi nial nual a, do hneh rual an nih lohzia an hre chiang a, an hnuaia intukluh an duh thu an thlen ta niin C.S. Murray chuan a ngai a ni. C.S. Murray chu ram chinchang leh Hausata khua te chanchin enthlitlai tura kal hmasa a ni bawk a, Hausatna khua, Lungtianho lo vat thawm pawh hre pha khawpa hnaiah a va  enthla ru a ni. 

Tichuan, Hausata khua luhchhuah tur chuan an inbuatsaih ta rup mai a. Colonel Tregear chuan sipai 1000 zing aṭangin 300 a thlang chhuak a. March ni 15-ah Lunglei aṭangin Muallianpui panin an chhuak ta a. Laipui pakhat an keng a. Pawl hnihah an inṭhen a, pawl hmatawng chu Lt. Col. Niceloy-a’n a ho va. Pawl dang chu Major Channer-a’n a ho thung a. Col. Tregear leh Commissioner Mr.Lyall te pawh an tel ve a. March ni 19-ah Hausata khaw lam panin Muallianpui tlang Darzo lui an zawh chho va. Khenglawt lal Zahuata khua an thleng a. Chuta ṭang chuan km 3 leka hla Hausata khua, Lungtian panin March 20 zingah an chhuak a. Khua aṭanga feet 300 vel, khaw lan theihna hmunah an innghak khawm a. Khaw chhungah chuan silai vawi hnih an kap puak ri ṭhuai ṭhuai a, chu chu sipaiho kah ni lovin, Lungtian hovin an khaw hal hun an inhriattirna a ni a. Sap sipaiho chuan laipui chuan khua chu vawi 3 an kap a, khua aṭang chuan a khaw nawtin mipui chu ramhnuaiah an tlan darh zo va. 

Khuaa sipai nawlpui an luh chuan khawtual mi tu mah hmuh tur an awm tawh lo. Darbilhi khuaa mi Vaitlaia chuan Hausata in leh a thlan chu a kawhhmuh a. Hausata thlan chu an han lai ta a, an rin ai daihin a lo thuk si a. Sipai thlan lai hah chuan Vaitlaia chu, “Thlan a nih loh vaih chuan nangmah kan phum ang che,” te an ti a, an vau ang khur khur a. A ruang awmna chu an zuk lai thleng ta a. Hausata ruang chu a lal kawr haa, diar khimin an lo phum a. A ruang hnuaiah chuan Lt.Stewards-a laiphir chu a hmuchhuak ta nawlh mai a. Silai chu an phawrh ta a, Shakespeare chuan a lawngin silai vawi thum a kap a, “Ka nauvin hetin a ti che maw!” a ti a, a ṭap nghek nghek a, a mittui a tla zawih zawih a. Lt. Stewards te venghimtu atan Capt. Shakespeare kha ruat a ni a, a venghim zo lo bawk a ni. A âwm ve tho mai, lungchhe vaikaia a ṭah vak vak hi!

   

Sipaiho chuan an tihtur an hlen ta bawk a, an haw lamin Kenglawt lal Zahuata khua Vartek chu an hal a, Lungleiah an kir leh ta a ni. 

Chittagong pana an haw thlak leh hmain Col. Tregear chuan April ni 3-ah Sailo lalho nena inkawmhona, “Durbar” Lungleiah a buatsaih a. Tlutpawrha fate lal paruk, Seipuia, Lalthangvunga, Lalluauva, Vandula fa – Sangliana leh Lalruma te an tel a ni. Mr. Lyall, Political Officer chuan thu a sawi a, C.S. Murray-an a thusawi chu Mizo ṭawngin a letling a. Hausatan Lt.Stewards a thah vanga sipai  tam tak nen rawn thawkchhuak an nih thu a hrilh a. Beihpui an thlak laia lalte ṭawiawmna leh ṭanpuina an hmuh avangin Sailo lalte hnenah lawmthu a hrilh hnuin lalte hnenah lawmman a sem a. Tlutpawrha fateho pawhin Kumpinu sawrkar ṭhian rinawm tak nih an tum tur thu an puang bawk a. Fur ruahtui tlak tam hma April thla tawp hmaain sipai nawlpui chuan Lunglei an chhuahsan fai ta vek a, Fort Lungleh bûk nghak tur Chittagong Frontier Police 200 rual an hnutchhiah a, Chittagong Frontier Police hi a hnuah Assam Rifles tiin a hming an thlak ta a ni. 

An excerpt from Khuanu samsuih Ṭialpari leh Dopawrha by Familia Fanai Lalṭansanga, published by Lengchhawn Press, Khatla, Aizawl.