Hlutna Danglam Ngailo

Hlutna Danglam ngai lo!

~Lalrochama Saivate

Mihring nunah hian, kan hun tawn a zirin - kan ngaihlut zawng leh ngaih pawimawh hi a inthlak kual vel reng a tih theih. Vawiina 'Lallukhum' kan khumtir kha, atuk lawkah 'Hling-lukhum' nen kan melh leh to to fo ṭhin. 'Lalpa hminga lokal' ni hiala kan chawimawia kan chhal chiam thin te pawh, a hnu lawkah, 'Ar chuk tlak loh’ hial khawpin kan diriam zui leh mai. 

Chutiangin, do thuhmun neih vanga inkawp rem takte pawh, muang leiah chuan a inngur nasa kan ni fo bawk. Kan khawsak dan, chenna hmun, ei leh in danglam avang ringawt pawhin kan thil hlut zawng a thuhmun lo fo. Chuvangin, kan damchhung hian eng ber hi eng hlu a hlu lo tih hi hriat a har khawp mai.

Ei leh bar tlakchham avanga chhûan engemaw zah nghei chang a awmin; eisen loh khawpa hnianghnar chang a awm bawk a. Hlim leh lawma, lungruala nuih chang a awmin; lungaih vanga mittui dan rual loha sur chang a awm bawk.

Tin, lungkham engmah nei lova rilru a engthawl chang a awm rualin, helhkham leh thinlung nat avanga mutmu tuah loh chang pawh a awm bawk thin. Thlansa phul kaia chet hrep chang a awmin; vawt tih vanga khá khawng hlawk hlawk a awm chang a awm fo bawk. Tuisik far khat a hlut em em laiin; khawchhia, tuilian vanga buai erh tum te pawh a awm fo mai. Chutiang zelin, vannei leh vanduai kar a hla a; thih leh dam kar a zim thung.

Ngaihtuah tham taka langin ngaihven a hlawh loh laiin; thil te tham leh buaipui tham a lang lo pawh a khaw nawta khukpui chang a awm tlat bawk thin.Thinrimna tling awm pawha lang loah so chiam chang a awmin; lawmna awm ngawih ngawihah pawh lawmna chang hriat a har hle lawi fo mai bawk. Bengkhawn tur dik bengkhawn lova, mahni hnaivaia lo inhampuar mai mai pawh thil awl tak a ni. 

Chuvangin, kan damchhunga kan thil ngaih ropui leh ngaihhlut te hian kan ngaihtuahna phak bak a pel meuh lo a tih theih. Awmna hmun a zir te, kan tam leh puar dan a zirte hian kan thil ngaihlut zawng hi a danglam fo mai. Mihring hmathlir a danglam chak dan ang zelin thil reng reng hlutna a inthlakthleng chak a. Mahse, engtiklai pawha a hlutna danglam ve ngai lo; Pathianin a min pek hlu ber a awm a. Chu chu 'Nunna’ hi a ni.

Engpawh nise, 'Nunna' hi a kawltu a zirin; a hlutna hi kan belhchhahin kan tihniam thin a ang zawk khawp mai!