HRIAT LOH AIGUPTA LALNU THLAN HMUCHHUAK

 HRIAT LOH AIGUPTA LALNU THLAN HMUCHHUAK

Hmakhawsang Aigupta khawpui Memphis khuaa  an thlan hlui Abu-Sir-ah tun hmaa an lo la hriat ngai loh lalnu thlan laihchhuah a ni a,an hmuhchhuahna hmun hi Cairo khawpui hmarthlang lama awm a ni. A laichhuaktu  Archaeologist-te chuan kum 4,500 kal ta-a Pharoah Neferefre nupui emaw a nu emaw a nih an rin thu an sawi a, Egypt antiquities minister, Mamdouh el-Damaty chuan a thlan bangah a hming Khentakawess tih Necropolis hawrawp-in a inziak a ni, chuti a nih chuan a ni hi Khentakawess III tih tur ni awm tak a ni, a ti. 

He thlan hmuchhuaktu Miroslav Barta, head of the Czech Institute of Egyptology mission chuan a thlan awmna atang hian Pharaoh nupui a nih ngei a rinawm a, he thil laihchhuah atang hian Aigupta lal inthlah chawng 5-na kan zirchian theih a beiseiawm a, Aigupta lal inthlah chhawng 4-na-te khan pyramid-te hi an lo sa a ni, a ti. 

THU CHU TISA-AH; AIGUPTA THAWNTHU ATANGIN KRISTIAN SAKHUA A LO PIANG?

Mikhual mak tih deuh zawng thil kam hnih khat phuahchhuak leh ang!

Mihring hi mak taka siam kan ni kan timathlawn lovin mumang mak tak tak hlauhawm tak tak te kan nei thin a, lirte a nghing a, thlipuite a tleh chiam  a,ruahpui van-awn leh ruah thiampuite a sur buan buan thin a, kawlte a phe zuai zuai a, tek a tla eng  zǎwk zǎwk  a, khawpui vanah a kal ri dur dur a,hlauh kan nei thin a, mihring hi engnge maw a nih a, heng zan arsi leh chhun leh zante hi tunge siamtu ni ang tiin hmakhawsang atangin an lo ngaihtuah chiam chiam tawh thin a.Thihna hian mihringte hi min rap em em a, mitthi pawh kan rap bawk a.Thihna pumpelh dan kawng a awm em tih nasa takin  kan ngaihtuah thin bawk a. Chu mihring ngiahtuahna chhungril ber  atanga lo chhuakte chu thawnthu (Myth) angin an sawichhuak ta thin a ni. 

Chu thawnthu chu dawt mu hlum phuahchawp emaw kan ti thin a, a zawng a za chuan phuapchawp chu a lo ni bik hlauh lo va,   tu emaw, mihringte aia thil tithei tak awma rinna thawnthu, hnam mawl ber pawhin an neih hi a mak em em hran lo va, a chhia leh tha hriatna fimin a ngaithuah chhuah zawh si loh kha a hriatlohna rilru, unconscious mind khan a lo hre thawi viai viai a,thawnthu angin a sawi ta pawh a ni mai thei ang. 

JOSEFA HRE LO PHAROAH CHU TUNGE NI?

Inhnialna atthlak kan pumpelh theih nan Josefa tan in atanga lachhuaktu Pharoah kha tunge a nih a?, Josefa hre lo Pharoah kha tunge ni thei ang? tih lam sawi lovin a tawi zawngin sawi ta ila.Tuna an laihchuah tak Khentakawess III vanglai hma daih tawh khan Aigupta ram Nile lui kam leh Mesopotamia ram Euphrates lui kama cheng mihringte chu an lo changkang (civilized) hle tawh hlawm a. Sakhaw lamah pawh ngaihdan hrang daih an lo chherchhuak ve ve tawh a ni. Jakoba leh a fate Aigupta rama a pem luh 1700 BC vel  hma daih tawh khan Aigupta thawnthuah chuan thawhlehna thu leh thih theih tawh lohna pialral chanchin thawnthu (myth)an lo nei daih tawh a ni. Chu thawnthua thawhlehna leh thih hnua chatuan nunna an sawi dan chu hetiang hi a ni;

ISIS LEH OSIRIS;

Osiris chu pathian hriakthih Aigupta lal a  ni  a, chutianga ro a rel lai chuan a unau pa sual zet mai, Set chuan phiarru-in a that ta mai a, Osiris  ruang chu Nile lui-ah a paih ta a. A ruang chu pathian hriakthih lalnu leh Osiris  farnu ni bawk chuan a chhar a,a laizawn nu Nephthys leh an pathian Atum-Re te tanpuina-in Osiris  ruang ka leh hnar-ah chuan boruak an zap lut leh a,a lo nung leh ta a.Nunna nei leh mahse he khawvelah chuan a nung tawh lo va,mitthi-te khawvelah lal niin a nung reng ta thung a ni. 

Osiris fapa Horus chuan a pa phiarrua thattu Set chu a khinglet ve ta thung a,pathiante rorelna hmaa-ah chuan ro pui an han rel ta tak tak a, dikna a lal a, Horus chuan hnehna a chang ta a,Set chu a thil tihsual tuh rah sengin thiam loh chantir a ni ta a ni.  Osiris  anga chatuan nunna nei thei tur chuan Aigupta lalte reng reng chu an lo boralin an taksa tawih thei lo turin an sawngbawl (Mummify) ta a,thu chhampual tur tam tak an nei bawk a, an lo thawhleh huna mitthi khuaa an kalna tur lawng leh an ţhuihruai tur chhiahhlawhte nen lam an thlanchhungah an phum tel ta thin a ni. 

BC 1557-1532 vel atang tawh khan Pharoah Ahmose (Nebpehtyre) a lo lal tan niin an chhui a, an rindan leh an thawnthu sawi pawh a inthlak danglam nasa hle ang tih chu hriat sa a ni a, a tlangpui chauh ka han sawi mai a ni.Tichuan, Aigupta kut themthiamho chuan Isis-in a fapa Horus,a hnu-a  pa lalna rawn chang leh ta a chawi lai lim chu dar-in an chhung a,chu nufa inpawm milem chu Aigupta-ho zingah idol ang hialin an hmang a,a lar hle a ni. 

Tichuan Isareal fate chu Aigupta ram tha tak Gosen hmunah kum 430 an awm chhung khan a maka makin an pung a,Aigupta ramah chuan Josefa hre lo, lal thar a lo awm tak hnu khan tihduhdah an ni a, a  hnu-a Mosia lo piang chu mak tak maiin Aigupta finthiamna zawng zawng zirthiam tura buatsaih a lo ni leh ta zel a,chû mǐ ngei chu a hnamte Aigupta ram atanga hruaichhuak tura koh a ni a, chû mǐ ngei chuan kan thurin bu-a thu pawimawh em em awmkhawmna Pentateuch an tih mai,lehkhabu 5; Genesis,Exodus,Leviticus leh Deuteronomy te hi Pathianin finna a pek leh Aigupta finthiamna hmang bawkin a ziak leh a ni.

C.S.Lewis chuan hmakhawsang mite’n thawnthu anga an lo sawi thin, thihna leh thawhlehna chungchang hi Lal Isua khawvela a lo kal tur thu mihringte rilrua Pathianin a lo buatsaih lawkna, a lo thawt-lawkna  a ni thei ang em? tiin ngaihdan a siam a ni. Isis-in a fapa Horus a chawi lai ang chiah chiah,  chunnu Mari leh a hrai chawi Isua lem chu kristian sakhaw chhinchhiahna ang hial a lo ni ve ta chiah a! Juda rama hnam tlemte a tanga lo zichhuak sakhua hian engtin nge khawvel a al hnen em em? Aw,Bethlelhem, Judai khawpuite zingah i te ber tawp lo e” tih tlangau tirtu khan mihring rilru-ah kristian sakhua lo ping tur hi rauthlalengin pi pute ngaihtuahna-ah a lo puang lawk a ni mai lo maw?

Thil kan zir reng reng hi keimahni tan engnge a pawimawhna ti zawnga  kan sengluh thiam a, a inlaichinna chu a tangkai zawnga  kan hman thiam hi  a pawimawh em em a ni. Chu hmasang kan pipute thawnthu sawi  leh kan tunlai Mizo kristianna chuan  inlaichinna a nei reng em? Information leh news pawh hi kan nuna tangkaina nei  miah lo,sengluh tur leh puakchhuah tur awm miah lo  tam tak en leh chhiar nan hun kan khawh ral fo a ni.Han inkhawm ve chhuna, sermon tha tak tak ngaihthlak fuh khiah changte hian mahni nuna sengluh tum lovin thenawm pa te, kan tluk loh ka elrel deuhte, keini aia in leh lo tha zawk deuh neite tan a chheha han chhehsak diat diat hi kan ching fo thin a ni. 

“Sawisel suh u, sawisela in awm loh nan.In sawisel ang bawkin an sawisel ang che u; in tehna ngai bawkin an tehsak leh ang che u. Tin, engatinge mahni mita khanchhuk (chartin aia lian thing) awm chu ngaihtuah si lovin, i unau mita hmawlh te tak te awm chu i hmuh ni?

tih ziak hi a dik a, Pharisaite tan chauhva sawina a ni lo! Mihring pianken ze khat a ni!

Rev.Dr.Zairem chuan heti hian a ziak a. Kristian Missionary-te’n Chanchin Tha an rawn hril atanga kum 60 velah Mizorama awm Mizo hnahthlak khatte chu Kristian an ni ta vek tih tur tur a ni. Hei hi khawvela thil awm zen zen lo a ni a, sakhaw chhui mite phei chuan an ngaihven hle.Mizo rilru a lo inhawngin an rindan atanga Kristian rin dan han pawm hahdamna emaw awlsam riauna emaw a awm em ni? He zawhna pawimawh tak hi han chhang dawn ta ila;

Chanchin tha heti fakauva dawngsawng fuh tur hian kan Mizo  pi leh pute rilru-ah khan kan nungphung leh thawnthu atangin a lo inbuatsaih dimdiam tawh a. Vanah khian mi tha tak leh zaidam tak Pu Vana chuan min enthla reng angte-in ngaihdan an lo nei sa a. Naupang laia  ha hlam bal pawhin Pu Vana nen inthlengah kan dil thin. Van chung nula leh  Sichangneii thawnthu pawh kan nei.

Mizo hnahthlak-te’n khawvel kan thlir danah Thlarau khawvel leh Hring khawvel awm hrangin kan ring a. Tlingi leh Ngama thawnthu mitthi khaw tlawh thawnthu pawh kan nei. Mi huaisen, mahni khuate ral leh sa hrang laka humhim ngamte leh mi thil phal, buhchangrum leh sa nena khawtlang hrai theite tan chuan  thih hnu nun nuam tak Pialral awm tur angin ngaihdan nghet tak an lo siam tawh a. Thenawm khawveng ngaihsak leh chanai tanpuina kawngah ‘sem sem dam dam ei bil thi thi’ tih krisitan sakhaw zirtirna angte kan lo nei diam tawh. Hlauh nei mihring, ramhuai hlau reng renga neih thinglungkhawng ran chi hrang hrang hmanga huai leh ram huai mi tina theite tlawn nana inthawi ngai thinte tan ramhuai ngam loh Pathian han biak chu a thlamuan thlak teh e! Mizoram chhim lama Mizo Pathian ringtu hmasa Khawtinthanga (Pastor hmasa Thankung pa) chuan “Inthawi ngai lova ngaihdam ni theih chu tute nge lawm lo vang ni! a ti hial. 

Mizovin thangchhuah an tihah khan  nausen te, nula thianghlim te pialral kal turin an sawi. Thianghlim han tih reng reng hi lang tlang, tu ma huat tur awm lo, zahpui tur pawh awm hek lo,mihring rilru tha an sawina a ni.chuvangin pialral kalna tura mihring nihna pui ber chu thianghlina kha niin a lang. Pialralah mi nun herh tak te,mi duhawm te, mi elrel ching te an awm thei lo a ni. heng Mizo ngaihdante hi tlang chunga Lal Isua zirtirna khan a rawn khaikhawm chiang viau kan ti thei awm e.

“Thinlunga thianghlimte chu a eng a thawl e;Pathian an la hmu dawn si a”