James Bond-Thunderball-18

HOW TO EAT A GIRL

Nassau lam pana an thlawh hawna kawngah chuan Palmyra-a Disco a awm leh awm loh en nghal a that thu Bond chuan a sawi a.

Disco chu a hma ni-a a awmna ah chuan a lo la awm reng a. Mahse hmalama thirchakai chu an lo lasawn tawh a, lawngah chuan che eih pawh hmuh tur awmlo hian a reh thuap mai.

Leiter chuan, "Ngawiteh, James. Lawngleng dahna lam panga lirthei kalna niawm tak khu I hmu em? An lang thuk hle leh nghal a, engvang nge maw ni dawn le?" a ti ta hluai mai a.

Bond chuan a entlang chuan ngun deuh mai chuan a han thlir vang vang a. Hnuhma chu a thianga kal a ni a, lawngleng dahna in leh tuipui inkarah chuan thil enge maw rit tak an hnuk ni ngei hian a lang a.

"Rang takin inthiarfihlim teh ang, Felix. Eng hnuhma nge mawni dawn le? Engpawh ni ta reng reng se, tihreh vat awm a nia," a ti zung zung a, chak takin an thlawhpel nghal a.

"Tupawhin tihsual leh tihpalh chu an nei alawm. Khalai hmun kha enfiah tur a ni. A hma daih a lo enfiah awm asin mawle,"

Windsor field an thlen leh chuan dar5 alo ri tawh a, darkar chanve vel zet chu control tower chuan radio hmanga biakpawh an lo tum tawh a, airfield commandant hnenah chuan insawifiahna tur an nei ta nual mai. Mahse Governor in an dan bawhchhiatna thenkhat a ngaihdamna lehkha chu a ADC chuan a rawn keng hlauh mai a. Chu ADC chuan Bonda kutah chuan lehkhaip chah tha tak mai chu a pe nghal a, hei hi an pahniha  ta tur a ni.

Lehkha chu thuthar hriattir tura ngenna in a intan a. (Hei hi Nassau lam pana Governor Humber a an tlanlai a an chhiar a ni) Manta lawng lo thlen hun tur chu tlailam dar5 a ni a, Interpol leh Italian police te chuan Petacchi chu Domineta Vitali unaupa anih ngei thu an rawn nemnghet a.

Interpol leh police te chuan Largo chanchin an hriat ang ang chu an rawn thawn tel bawk a. Largo chu pa chelian tak, dan pawn lama che thin niin an ngai a, mahse finfiahna tak erawh an nei biklo. A hausakna hnar tak hriat a ni lo va. Italy atanga hausa a nilo tih erawh an chiang. Disco man chu Swiss franc a pek a ni a.  Lawngsatu te chuan lawng chhung hnuai lamah pindan rûk an siam thu police ho an hrilh a, electric khawl hmanga thil khaina leh tuuhnuai lawng tenau chhuahtheihna bakah tuichhung lutmi te chhuahtheihna tur a awm vek a ni. Rohlu zawn chungchanga shareholder ho chungchang kha chhuizui tlak a awm meuh lova, an vaiin an chanchin kum 6 aia hla chhuilet tur a awm meuhlo. Heta tang hian an chanchin theuh hi phuahchawp emaw a tih rum rum theih hial a ni. Hei hian SPECTRE an tih chu an awm tak tak anih chuan inzawmna an nei ngei niin a tihlan phah a ni. Kumli kalta khan a kalna tur chin hriatlohvin Kotze chuan Switzerland a chhuahsan a, a thlalak hnuhnung ber chu chhunlaia PAN American thlawhna-a a chuang tur lai a ni.

A engapawhchu nose, Thunderball War Room ah chuan Largo nihna chu thudang awm leh hma chuan an pawmzam mai mai rih a ngai a. Tun mai at an chuan khawvel huapa an hmalakna chu ngawrh zawka beih an remti a, a biking Bahamas bial an ngaipawimawh hle a ni.

A pawimawh dan leh hun tam tawh loh dan chhutin Washington a British Attach Brigadier Fairchild CB, DSO leh US Chief of Staffs Committee Secretary ni thin, Rear Admiral Carlson te chu thukhat vua a rorel turin 1900EST ah President thlawhna, Boeing707 'Columbine' chuan alo thleng dawn a ni. Mr. Bond leh Mr. Leiter te tanpuina leh theihtawp chhuahna chu beisei a ni anga, heng kan mi sawi te ho lo thlen hma hi chuan darkar tin radio in London ah rawn thawn tur a ni a, a copy chu Washington ah thawn bawk tur a ni. Mr. Bond leh Mr. Leiter ten an hming an ziahhnan ve ve tur a ni bawk ang.

Bond te pahnih chu ngawi rengin an inen vang vang a, a tawpah Leiter chuan, 'James, thupek hnuhnungber kha chu ngaipawimawh rih lo ila a thain ka ring. Darkar4 lai hun kan bawhpelh tawh reng reng a, radio hmaa hun khawhral thei kan niin ka hrelo. Tih tur a tam lutuk. Chanchin hnuhnungber hrilh ila, emergency a awm thut avangin biakpawh theih kan ni tih dawn rihlo tih hrilh ila. Atir a kan sawi ang khan Palmyra ka va thlithlai anga, ka va kaldawn chuan lawngleng leh hnuhma vel pawh kha ka enngun viau ang. Ka sawi chu tha iti em aw.. Tichuan dar5 ah Manta chu kan lo chang anga, Disco a chhuak anih chuan kan umzui nghal mai dawn nia. President thlawhna a officer ho chu naktuk khawvar hma chuan lo thu mai mai se ka tideuh. Zanin hi a thlawnin kan liamtir thei lovang. Enge I ngaihdan?" a ti ta a.

Bond chu a han inngaihtuah vang vang a. Tunhma pawhin vawi tam tak thupek alo bawhchhe tawh thin. Mahse tuna Leiter a rawtna anga thil an ti anih chuan US President leh Prime Minister thupek an bawhchhe dawn tihna a ni a. Chutih rualin thil a thlengchak riau mai bawk si. M chuan helai Hmuna hnathawk tur hian a ti a, a dik emaw, diklo emaw M chuan a thiltihah atawp thlengin a thlawp leh ngei ang tih chu a hria. A tawp a tawpah chuan, "Felix, I ngaihdan chu ka pawm e," a ti ve ta a.

Amah vek chuan, "Manta lawng nen chuan kan duh anga kan chetve theih tho ka ring. Tuna pawimawh ta ber chu Disco-a bomb an lakluh hun hriat a ni ta. Chulamah chuan remruat dan ka nei a. Ka tum anga thil ka tih theih chuan Domino khan a tawrh a ngai dawn a ni. Mahse chulam chu ka buaipui turah ngai ila. Hotel kan thlen veleh ka chetnghal a ngai ang. Dar 4:00 ah kan inhmu leh anga, Harling pawh thuthar a awm leh awmloh ka zawt anga, a awm chuan ka rawn hriattir nghal ang che" a han tihzawm leh a.

Hotel chu an thleng ta. Bond chu hmanhmawh takin a lut a, reception counterah chuan telephone a thuthawn an lo hlanchhawng a. Lift-a inkhaichhoh pah chuan a chhiar a. Domino-in 'rang takin mi rawn phone rawh' tia a rawn kohna a lo ni. Room a thleng chuan sandwich tlem a ei a, bourbon a lem hlek bawk a. Police Commissioner a phone ta nghal a.

Disco chuan khawvar veleh tui a thunkhat a, a awmna pangngaiah a kir leh a. Darkar chanve kalta khan an thlawhna thilphurh chu tuiah an hlangthla a, Largo leh mi pakhatin khawchhak lam an pan a. Commissioner chuan Windsor field a an radar chuan chhuizui turin a hrilh a. Mahse thlawhna chu feet 300 vel hniama a thlawh bakah chhimchhak mel50  vela thliarkar thenkhat zingah an bo ta a ni. Vaukama hnathawkte chu American Atomic Submarine chu tlai dar 5:00 vela lo beisei tura hrilh an ni bawk.

Commissioner chuan Bond chu thuthar sawi mai tura awm leh awmloha rawn zawt ve nghal a.

Bond chuan sawi mai tur an neihloh thuin a lo chhang a. Radar enkawltute chu thlawhna in Disco a rawn pan leh hun chu lo chhuizui tura hrilh turin commissioner chu a ngen a. Chubakah radio dahna lam pan mek Leiter chu chinchang hrilh ve nghal turin a ngenzui bawk a. Lirthei hmanhawh tur nen.

Bond chuan phone chu dah mai lovin Domino chu a han be leh a. Nula chuan phur hmel deuh hian, "Khawnge I bo vang vang a, James? Vawiin chawhnuah tui cheng ila ka ti asin. Emilo chuan zanin hian rohlu chu lakchhuah an tum thu a sawi a. Min hruai ve a tum a, a fel iti em! Mahse thuruk anih avangin tumah hrilh suh ang che. Kan kirleh hun tur erawh chiang takin a sawi thei bik lo. Miami lamte a sawiri a, kan lo haw leh chuan New York ah ilo haw leh hman mai ang tih ka hlau a. Kan inhmu tlem si a, nizan lah khan I hawhma leh that si a, engtizia nge ni?" alo ti châl a.

"Nisa ka tawrh lutuk vang aniang, ka lu a na deuh alawm mawle. Tuichen chu ka chak lutuk alawm, khawi hmunah nge?"

Palmyra vaukam melkhat vela hla a lo ni a. Kawngpengin a pawh bakah di in alo awm bawk a. Vaukam chu fianrial leh nuam deuh tak niin nula chuan a sawi a. A hmun hi Swedish millionaire ta a ni a, a neitu a zinbo lai a ni hlauh va. Bond chuan darkar chanve vela a thlenphei theih mai a rinthu a hrilh a, phone chu a dah ta a.

Bond chuan a sandwich chu a ei zo va, chutia nula sawmna a han dawng chu a zauthau rilru ve hle a. Mahse nula hlimna reh rawih tur thil tih angai tih erawh chu a hai hauhlo. Domino a hmuh hmasak ber dante chu a han ngaihtuah let a....

A tuichen thawmhnaw leh inhrukpuan chu bagah a khung a, Leiter a Geiger Counter chu a bat bawk a. Tourist satliah ang ve thawkhat hlein a inhria a. A ipte a identification banbun chu a han dap a, pindan chhuahsanin lift chuan inhnuailam a pan thla ta a.

A lirthei dawn chu Land Rover a ni a, a thutna chu dup nuam viau mah se Nassau vaukam hnaihlam chu a kawng a chhiat em avangin chuan a nuam hran chuanglo hle. Ni lah chu a sa rum rut mai bawk si. Vaukam panna kawngpeng a thlenphei meuh chuan a ning hman hle tawh a. Vaukama diin an sak chu a bang mau tah hi a ni a, a chhunga pindan tepen pahnihah chuan 'Mipa' tih leh 'Hmeichhia' tih hi a intar vang bawk a.

'Hmeichhia' tih intarna chhungah chuan thawmhnaw tlem leh vawthlep pakhat hi alo awm sa a. Bond pawh chuan a thawmhnaw chu inthlak felin pawn nisa ah chuan a chhuak ve ta a.

Vaukam tiauvut var sur mai chu lunghmun hian a hualvel khup a, nula hmel reng reng hmuhtur a awm lo. Vaukam chu awihtlan deuh, tuipuia inchhung lut vut mai a ni a. Bond chuan tui chu a dai a, a han liluh vang vang a. A chhuak leh a, nula hmel hmuh beisei deuh mai chuan a han hawikual leh a. Nula hmel reng ala lang lo. Chutah tui atang chuan a chhuak a, a bawk ta a.

Minute tam pawh chutia a awm hma chuan eng nge maw avang chuan a han mengchhuak a, tuipuiah chuan alam pan hian boruak a rawn phuan phei berh berh a, reilote ah tuichhung luhna thuam inbel chungin nula chu vaukamah a lo chhuak ta a. Nula chuan a hmaia darthlalang hlihpah chuan, "Khatia mang lama cheng mai mai lovin min rawn chhanchhuak ta che," a rawn ti a, tiauvut chungah chuan a tlu zui ta nghal a.

Bond chuan hmanhmawhlo takin a pan phei a, "Mahnia tuichhung luh tur a ni hleinem. Eng thil nge iva rawn a? Shark in chhunga chawah an hmang che em ni?" a han ti a.

"Fiamthu ho deuh deuh tawh teh suh. Sea-egg hling ka rap palh a ni. I lakchhuah a ngai dawn tlat mai. Mahse a hmasa in ka thil ah, cylinder ritpui mai hi min han chhawk hmasa teh. Heng thil an reng chung chuan ka awm reng thei lovang," tih pahin a kawnga cylinder hrenbeh na chu a han phelh a.

Bond chuan nula cylinder ah chu a han phelhpui a, an piahlawka daihlim hnuaiah chuan ava dah ta a. Nula chuan tui chin chin pawnlang deuh va thu chung chuan a ke hnuai chu alo en mek a. "Pahnih ka raplut a nih hi. Phawi a harsa viau maithei a ni," a lo ti a.

Bond chu nula bulah chuan a thingthi a, a han enpui ve a. A kezunglai hnuai deuh chiah, a pawnglai ah chuan hling pahnih chu a lo dum ran mai a. Bond chu dingchhuakin, "Kal rawh. Hun a duh deuh dawn avangin daihlim chuh ila a that zawk ka ring. Ka pawm mai ang che aw, I rahleh chuan a lutthuk zual sauh mai ang," a ti ta a.

Nula chu a han nuisak a, "Awle, mahse min thlauhpalh hlauh ange aw," tih pahin a ban pahnih chu pawm rem turin a han pharchhuak a, Bond pawh chu kunin, a kaihza leh zakhnuaiah a zu dawm a, nula pawh chuan a nghawngah a rawn kuah ve nghal a. Bond chuan zo deuh mai hian a han dinpui a, a han chhuk en a. Nula mitmengah chuan a inphal hle a ni tih a zu hmu thei a. Chutah kunhniamin nula hmuisen, vap ham maiah chuan a zu fawp ta siah mai a.

Nula pawh chuan reilote chu a lo fawplet ve a, mahse a hmui laksawn pah chuan tham chhel chawl hian, "Hmabak zawh hmain lawmman lak tur a ni ngailo," a lo ti sap a.

"A hming maiin ka han chhin anih kha,"

Chutah a kut lehlam chuan nula hnute um kawhlah mai leh khal al mai chu a han hum a, thinghlim lamah chuan a pheipui ta nghal a.

Daihlim an thleng chuan dimte hian a han nghat a, nula chuan a sam a bawlhhlawh kaitur vengin a kut pahnih chu a lukham a, a sam kar atang chuan mitmeng si sep leh no nghelh mai chuan Bond chu a han en chho va.

Bond chuan nula mal var leh tuai nalh zet mai leh a invuahkhawmna lai, a kekawrte vum âl mai leh a hnute bu tha tak mai, chhinglah mai chu a han en a, insum harsa ti deuh hian, "Bawk rawh," a han ti a, a aw chu a lawi lek lek hian a hriat a.

Nula pawh chu a bawk ve nghal mai a, Bond chuan a ke dinglam hnuai chu ngun deuh hian a han en a. A ke chu a tein a nem thep mai a. Vaivut kai liai chu a han tihfai hnu chuan hlinglut mawnglam, a rawn lawr deuhna lai chu a hmuam ta a. Cheetah a han fawp vang vang a, a hlingthem hipchhuah chu chhah pahin, "A nat ve deuh dawn bakah hun a duh deuh dawn a nih hi. I inpeih em?" a han ti zui a.

Nula chu a insang mar a, "Inpeih e," a han tisap a.

Bond chuan hling bullam chu zawitein a seh a, a fawp pah nghal a. Nula na ti chuan talchhuah a han tum a, Bond chuan nghet taka dawm pah chuan a hling them sehchhuah chu a han chak leh phawrh a. Hling luhna lai chu a rawn thi ser ser a, thisen chu a han liakfai a. Hlingthem chu hmuhtur pawh a awm ta lo.

"Tun hi nula ka ei vawikhatna a ni. In lo tui phian hi le,"

Nula chu a ngawi ran reng a.

Bond chuan vawikhat la buaipui leh a ngai tih a hriat avangin "Vawikhat dang ka han fawp leh ange aw, Domino?" a han ti a. A hma ang bawkin hling lakchhuah fai vek tum chuan a bei leh ta a.

Minute hnih khat lekah hling la awm ho chu a lachhuak ta vek a. Nula ke chu dimtea nghatin, "Vaivut tihluh loh a tha ang. Inah sawn ka pawmphei che anga, pheikhawk I bun dawn nia," a ti a.

Nula chu a inlet a, a mithmul, sei kawhsang mai chu a na tawrh avanga mittui chhuak chuan a lo tihuh par mai a. A mit a nuai a, ngun taka Bond a en chung chuan, "Nang chiah hi mipa, min titap thei awm chhun ila ni," a ti a, inphal tih hriat tak hian a kut chu a pharchhuak ta nghal a.

Bond chuan a pawmkang a, Di inah chuan a luhpui ta a. Mipa awmna pindan zawk chu a panpui a, leiah chuan a kawr leh puante chu mut maitheih turin a thehthla a. Chung thawmhnaw chunga chuan nula chu a dintir a, nula chuan a nghawngah nghet takin ala kuah reng a. Bond chuan a hnute dawmna chu a hlipthla a, amah pawh chuan a kekawr a phelh ve ta nghal a.

Chhuata thuamhnaw phah ah chuan inkuah tlat chungin an zal ta riai riai a.