James Bond: The Man With The Golden Gun-3

PISTOLS SCARAMANGA

Nidang ang bawkin M chuan Blades ah chhunchaw a ei a, kilkhata tukverh bulah chuan The Times chanchinbu a inhliahin a thu a. Chanchinbu chu chhiar niawm takin a khat tawkin a keu a keu na a, a chhiar miahlo. A hawiher leh chetdanah chuan waiter ho pawh chuan chawhma lamah thil tawn engemaw tak a nei emawni chu aw an ti hlawm a. Blades a waiter, Porterfield chuan kilkhata dawhkan phenah chuan waitress Lily hnenah chuan, "Sir Miles a awmdan saw ilo chik em? A zu in thin thalo deuh kha ila hria anga, amah Sir Miles pawh hian he wine hi Navy ho chuan thin a tih-ur duh em a vangin 'infuriator' an ti niawmin min hrilh nghe nghe asin. Kum 10 zet chu Miles hi ka lo hre ve tawh a, qhe wine hi tlemte chauh a lam thin a. Vawiin khan a umin he zu hi zu lama mawle! Tukin lamah Sir Miles nghawng deuhtu thil a thleng ni ngei tur a ni," a ti mawlh mawlh a.

M chuan a ei leh in man chu pound 5 tlangin a pe a, a kir chu pound note leh silver leh copper Penny thar hlir in an pekir a. Blades hian anmahni dawrtute pawisa kir ngai chu a thar ngatin an kir thin a ni. M chuan pawisa nawi chu a ak a, pawnlam a panphei ta a. Amah betu te chu ngaihthalo deuh hian lu a bukkhum a. Chawhnu dar 2 a ri tawh a, a Phantom Rolls dum chuan Oxford Street paltlangin Wigmore an tlanpel a, Birkeley Square chu an hnawih phei ta thuai a. M chu car hnungah chuan a thu a, a hmelah chuan a ngaihtuah thuk hle tih a hriattheih a. A car khalhtu tukkhum chu hmu miah silo hian a thlir vung vung a.

Zing lama a office a chhuahsan atang khan a thutlukna chu vawi tam tak  'a dik em' tiin a ngaihtuahnawn tawh a. Sir James Malony chuan Bond chu a tidam leh hlauh thei anih pawhin double O sectiona awmtir lehnghal ringawt chu thil atthlak lutukah a ngai a ni. Thil kaltawh chu ngaihdam theih nimah se theihnghilh mai theih a ni dawn em ni? A dinhmun siamnan Bond-a chuan eng thil emaw tal a tihloh chuan han dah zalen ngawt mai chu thil chinchang hria leh amah M tan ngei pawh chuan a nuam lovin a zahthlak thei dawn tlat a ni.  M chuan James Bond chu target mumal tak kawhhmuh anih chuan silai thaber ai pawhin a hluzawk tih a hria a ni.

Pindan atang chuan a chhuk a, a pindan chhawng 8-na lam chu a panchho leh ta a. Corridor vela thil rim danglam tak chuan a hnar chu a verh nghal a.

Corridor tawpa ama room bika lut talo chuan Miss Moneypenny roomah chuan a lut a, ani chuan khawl alo chhu mawlh mawlh a. M loluh chuan alo ding vat a.

"Chu thil rimchhe deuh chu enge maw ni le, Miss Penny?"

"A hming ka hre ta lo, ka pu. Head of Security chuan War Office atangin Chemical Squad ho a rawn tir a, tunah chuan i office pawh a hman lehtheih tawhin an sawi. Mahse tukverh erawh chu la hawng rih la a duhthu a sawi bawk tak asin. Chief of Staff chu a chhin chawei a lo la haw lo. Mahse engkim i duh anga tih anih thu hrilh tur chein min ti a ni. Sir James pawhin dar 4 thleng hna a thawk dawn a, chumi hnu chuan be turin a duh che a ni. Hei i file duh chu, ka pu,"

M chuan file kawm uk, a tlang dinglam kila arsi lem inchhu chu a la a, "007 chu enge a an? A harhchhuak tha em?" a han ti a. 

Hmel danglam chuang miahlo hian Penny chuan, "A harhtha ang chu ka ti mai. Medical officer Khan damdawi a pe a, chhun chawei hun lai khan an zawnchhuak ta anih kha. A chanchin rawn zawt an la awm lo," a lo ti a.

"A tha anih chu. Thil tuldang a awm leh min rawn pe mai dawn nia. Tul mang hlei lovah kan buai vak mai a," tiin M chu file pawm chung chuan a office ah a lut ta a. Moneypenny chuan signal lolut thar kengin a zuilut thuai a, engemawchen chu an han buaidun leh rih a.

A chhuah leh hnu chuan M chuan file uk chu keu vin, a kuaite a tan te te a, a file chu a chhiar ta a.

Scaramanga chanchin hnuai lamah chuan Carribean leh Central American section hotu chuan 'Kei pawhin he ngaihdan hi ka thlawp e' tih hi a hming nen a ziak a, a hnuai lehah Chief of Staff chuan pentui sen hian, 'Noted COS' tih hi a ziak ve leh a.

M chuan minute 5 vel lai pawnlam a thlir vel a. Pen ala a, pentui hring hian, "Chetzui tur em ni ang, M?' tih hi a hming nen a ziak a, a han thu ngawi leh vang vang a, James Bond-a thihna turin hming ka ziahhnan ta mai em ni ang tihte chu a ngaihtuah zui nasa hle a.