James Bond - Thunderball-19

19. WHEN THE KISSING STOPPED

Bond chuan a kiuva indawm kang chu nula zawi tak, lungawi tak hmel si chu a zu en a. Nula chal leh mit vel chu a hma lawka an hnathawhna avangin a thlan hlap mai a, a marphu pawh ala rang zaih zaih hle mai. A hmel a inlak khunkhanna zawng zawng kha mipa in an han chinphar tak ah chuan a rehfai vek a, a lo meng dava riai a, Bonda chu a han en vang vang a.

Bond chuan, "Tihloh tawp tur kan ti niin ka hria," a lo ti a.

Nula chu a nui a, "Vawikhat tihna ang maia I tawng le. Fa neih I hlau leh si a ni maw? Nupui te bula sawi a ngaih I hlau a nih hi," a lo tilet a.

Nula lam chu hawiin, a taiah a khan a, chutah a taksa rem thlapa pawmbet in a chalah chuan a han fawp vang vang a. "Kal rawh, tui I cheng teh ang. Hrilh tur che ka nei a nia," a ti ta a. A tho va, nula pawh chu a kaitho nghal a. Nula chuan zei zet hian a han nawkkual vel a, nui chung hian a kut chu a hleitir hle bawk a. Bond chuan dim lutuklo hian a han hrawm vel a. Hun reilote chauh hlimdunna hun an nei tawh tih pawh a hria. "Inhlei tawh suh, Domino. Kawr pawh kan mamawh loh hi. I keah vaivut a lut tak tak lovang, ka tihder che a nih kha. Tui iva cheng teh ang," a ti ta a.

Nula pawh chuan, "Tui atanga ka lo chhuah khan keipawhin ka tider ve tho alawm. Hling khan chuti lutukin min tina reng reng hleinem. Bakah mahni pawhin ka kheichhuak thei tho alawm. I lakah beisei ka neih vang anih kha," a lo tilet a.

Bond chu a nui hawk a, chu nula hlim hmel tak chu a en vang vang a, chutah tuipui lamah a tlanpheisan ta a.

Vaukam a thlen leh chuan nula chuan thawmhnaw alo ha mawlh mawlh tawh a. Bond chu a inhru hul a, nula in hlim taka a chhanna chu a rilru avah thui deuh avangin tawite tein a chhanglet bauh bauh zel a. Nula ngaihthalo chuan, "Engtizia nge ni, James? Thil diklo a awm em ni?" tiin a zawt ta phawng mai a.

A kekawr inthawlh pah chuan Bond chuan, "Ni e, chutiang lam chu sawi tur a awm tlat mai. Darling, pawnah sawn iva sawidun nghe nghe teh ang," a ti ta a.

Bond chu inte atang chuan a chhuak a, in pakhat zawkah chuan ava thu a. Nula pawh chu ngawireng chuan a rawn chhuak ve thuai a, Bond a hmaah chuan ava ding a. A khup kuah chung hian Bond chuan tuipui lam chu a thlir vang vang a, nula pawh chuan a bula rawn thut hnaih pah chuan, "Ka rilru I tina dawn tih ka hre mai. Nang lehzel pawh I kalbo dawn em ni? Sawitlang pawp mai teh, ka tap lovang," a han ti a.

Thutak deuh hian Bond chuan, "Chu aia ngaihthlak nuamlo I unaupa chanchin a ni tlat mai, Domino," a ti thawp sut a.

"Min hrilhtlang law law teh,"

Bond chuan a ipte a banbun chu a phawrh a, nula chu ngawirengin a pe ta a.

Nula chuan ala vat a, inher hlek pah chuan, "A thi tawh a ni maw? Enge thil awm dan?" a ti ve ta a.

"Thawnthu ngaihnawmlo leh neplo tak a ni. I thianpa Largo pawh hian inhnawmhnawihna thuk tak a nei. Inphiarrukna rapthlak tak nen a inkungkaih vek mai. Ka nihna ang deuh chu police a ni. Hei hi ka hrilh chhan che chu mi za tam mai pawh nilo, sang tam takin an thihphah theih thil anih vang a ni. Chuvang chuan banbun kha ka pe che a, I rilru a natphah ta a nih kha. Hetia ka hrilh che avangin hian keipawhin ka thutiam ka bawhchhe ve tho a nia. Eng rilru pawh puin eng ngaihdan pawh lo neila, ka thil hrilh tur che hi sawichhuak lo hram turin ka ngen che a ni," 

Nula chu a inpet fan fan a, thinur inseh ruh theuh chung chuan, "I duh ang ti thei turin min mutpui hmasa te te a, ka unaupa thihthu in min han deng leh a; ka haw hluah hluah che," a ti ta sap a.

"I unaup chu Largo ngeiin a tihlumlo anih pawhin a thupek ngeia thah a ni. Mahse ka tum loh takin ka ngaina ta si che anih hi. Khang thil kha hnial tur leh do tur ka ni a, mahse ka lakah I duhawm em a, ka that zolo anih kha. Tuna ka hrilh tur che hi lo ngaithla la, reilo teah keini pawh hi kan pawimawh phaklohzia I hre thuai mai ang," tiin Bond chuan Manata lawng lokal thu erawh sawi tello lovin thil awmdan chu a hrilhfai ta vek a.

A tawpah chuan tihian a thu sawi chu a han tlip leh a. 

"Chuvangin ralthuam te chu Disco-a lakluh an nih hma chuan tih theih kan nei tak taklo. Largo lahin rohlu zawng anga a awm hi han phehthlak ngaihna a awm rih si lo va. Thlawhna tla leh SPECTRE nen chuan hmehbel ngaihna a awm tlatlo. Tuna kan man anih chuan an thil ruahman an tlai hlek dawn tihna chauh a ni. Khawilai remchang ah an dah anga, a hnuah an va la leh mau dawn a ni. I hrethiam em?"

Aw fiak thak hian nula chuan, "Hrethiam tehreng mai. Engtia hma lak tur nge ni ta?" a lo ti a.

"Disco a bomb an lakluh hun kan hriat angai. Chu aia pawimawh a awm lo. Kan hriat veleh kan che nghal bawk ang. Tuna kan dinhmun titha em emtu chu Largo a ngaihdan hi a la tha em em hi a ni. An thil ruahman hi la kaltluang hlein a hria a, chu chu kan tan vanneihna a ni," 

"Lawnga bomb na dah hun chu engtinnge kan hriat ang?"

"Min hrilh theih ka lo beisei a ni,"

"Ni e. Mahse hria pawh ni ila engtinnge ka rawn hrilh ang che? Sawpa saw mi â a ni lo tih I hriat kha!"

"Largo chuan engtikah nge kir leh tura a tih che?"

"Dar 5:00. Lawngin Palmyra ah min rawn lam dawn a ni."

A sana bihzawk pah chuan, "Tunah dar4 a ni a. He thil ka rawn ken, bomb an hlan leh hlan loh I hriattheihna tur Geiger Counter hi I keng dawn nia. Bomb an lakluh chuan lawng tukverhah khan I rawn tieng anga, I duh leh I tieng zawt zawt dawn nia. In lawng saw mi engemaw zatin an enthla reng a, ka lo hrethuai mai ang. Chuan tuiah I thlakbo daih dawn nia,"

Ngaihsanloh hmel zet hian nula chuan, "Remruatna atthlak tak anih chu. Miin lehkhabua an ziah ang vel chauh anih chu. Bomb chu an lakluh chuan i naute hmuhah, lawng bathlarah ka rawn inklan anga, an lakluh loh chuan inlan lovin pindanah ka inkhung mai zawk ange," alo ti ve thung a. 

"I duh ang chu ni rawh se. Mahse iti duh ngei ang maw?" 

"Tehreng mai. Largo ka hmuh hunah chuan thatlo turin ka insum thei hram ang chu maw. Mahse in man hunah a thi ngei tur a ni tih min tiam ve a ngai ang," tiin nula chuan thutak deuh hian Bond chu a han en a. 

"Chu zawng a thlen ka ring lo. Mahse an vaiin damchhunga tantir erawh chu an ni ngei ang," 

Nula chuan a han ngaihtuah vang vang a, "Aw, chu chu a tha zawk ang. He khawl hmandan hi min han hrilh teh le," a ti a. A banbun chu a han en vang vang a, vaukamah chuan kalin, tuifinriat dumpawl kuk maiah chuan a paihbo ta daih a. 

Bond chuan khawl hmandan chu ngun takin a hrilh a, lawngchhunga hmun pawimawh lai nia a hriatte chu a hrilh vek bawk a. Nula chuan ngun takin alo ngaithla a, an inhrilh zawh hnu chuan dim taka Bond-a bana va vawn pah chuan, "Ka hua che ka tih kha a dik miah lo; ka hriatthiamloh vang zawk a ni. I thilsawi, rapthlak tak tak te kha engtin nge ka rin vek theih ang? Tunah pawh hian rin harsa ka la ti a ni. Largo ala inrawlh zui lehnghal!! Rohlu zawn lam chu ka lo phur vena zawng tak mai a lo ni bawk si. Mahse nang ka tawng leh ta che a, nichin tlaia kan in englo hnu phei kha chuan Largo hnenah zui ka tum tawhloh thu hrilh mai ka rilruk a ni a. Helaia la cham a, i kalna a zui ve mai che ka lo rilruk asin," tiin Bond-a mitmenga ngenngawl taka en kal chung chuan a han ti a, "Chu chu i remti angem? a han tileh sak a. 

Bond chuan a bianga chulsak hauh hauh pah chuan, "Tehlul mai, ka duhthusam a ni ang chu," a lo ti a. Mitmeng phur sarh mai, nung va chung hian, "Anih leh engtinnge kan hmalak zel dan tur ni ta le? Engtikah nge ka hmuh leh ang che? Kan hmabak a sawi theioh em?" tiin zawhna tam tak a han zawt nghal a. 

Chung zawhna te chu Bond-a chhan hreh rilruk ber a ni. Geiger Counter nena lawnga tirhkir leh chuan a nunna chu a letin a derthawng dawn tih a hria a. Leiler-a'n a hriatchhuah vaih chuan chawplehchilhin a that nghal duh ngei ang tih pawh a hria. In-um buai a ngaih vaih chuan lohtheihlohvin Disco chu Manta chuan a kahpil a ngai dawn a, chung chu Bond chuan a hresa vek mai si. Mahse a ngaipawimawhlo lui tlat a. "He thil hi a fel veleh khawiah pawh awm mah la, ka rawn zawng zel ang che. I ti hreh lovang tiraw?" a ti ta ngawt a. 

Nula chuan a sana a han bih a, dar 4:30 a lo ni tawh a. "Ka kalsan ang che. Carah chuan min zui pheilo mai la. Vawikhat min fawp la, ka kal hma chu lo muang rih rawh. Ka hmabakah chuan min ngaihtuah duh suh, ka theihtawpa thain ka bei ang. Chuti anih loh chuan Stilletto zum hriam takin a hnungzangah ka vitlut ngei ang. Min han fawp teh," tihpahin a ban a pharnghal a. 

Minute reilo teah MG Car chu a rum ta ham ham a, Bond chuan vaukama a liam thleng chuan a nghak a. Ban an invai lauh lauh hnu chuan a Land Rover lamah chuan a phei ve ta chauh va. Vaukam hrul mel chanve vel a kalhnu chuan Palmyra luhna gate chu a tlanpel a, nula chu lawnga chuang mai lo tura khap a duh rum rum a, mahse a inngaihtuah harh leh vat a. Old Fort Point lamah chuan chak takin a tlan ta zel a. 

Chulai hmuna in pakhat ruak chu police hovin Disco an thlir rukna hmun a ni. Hetih lai hian police pakhat chuan tukverh puanzar awng atang chuan entlang hmangin Disco chu a thlir reng a, a bulah chuan amah thlaktu tur chuan chanchinbu chhiar chung hian alo nghak mek bawk a. 

Bond chuan a pawh phei vat a, thil pawimawh a hrilh nghal zung zung a. An radio chuan Commissioner chu a va bia a, ani chuan Leiter-a thuchah chu a lo hrilh veleh nghal bawk a. Leiter-a'n Palmyra ava tlawhnaah chuan engmah ava hmuchhuak lo va. Nula thawmhnaw chu chawhnu lam khan Disco-ah sengluh a ni tawh a; Tin, Manta chu minute 20 hnu velah alo thlen tur thu alo hrilh bawk a. A rawn thlenna tur Prince George Wharf-ah Bond chu kal tura hriattir a ni nghal a. Vaukam lam chu MAnta nuclear Submarine chuan muang leh fimkhur takin a rawn panphei a, a hmel chu tuihnuai lawng dangte anga mam leh nalh a ni ve lo. Hmawr bul deuh tuk mai, nalhlo zet mai hi a ni a, a hmawr chuan fanghma ta pawh a ang lek lek zawk a, a hmawr phei chu Radar scanner leh solar lam thil pawimawh awmna anih avangin vantlang hmuh theihloh turin tarpaulin-in an tuam tlat a, han en mai pawhin a chak dan tur pawh hriatthiam a harsa hle a ni. Leiter-a sawidan chuan tuihnuaiah knot40-a chakin a kal thei a ni.

 "Mahse chiangkuangin an hrilh duh lovang che. Jame, thuruk a ni. Lawngah hi chuan an lehkha chhia mai mai emaw kan tihte pawh hi pawimawh tak tak, classified vek an ni. Tunlai phei hi chuan an fimkhur lutuk a, ring taka irhfiak ringawtte pawh hi security tan a thalo ah an ngai hial a ni," tiin Leiter chuan Bond chu a hrilh mawlh mawlh a. 

"A chanchin dang hriat ilo nei em?" 

"Awle, Captain saw chu hrilh lo ila. Mahse CIA ah chuan nuclear tuihnuailawng ho chanchin hi kan hriat angaih nual avangin engemaw chen chu a hriatloh theihloh va, tuna mi hi George Washington Class Ton 4000 vela rit a ni a, a man pawh dollar maktaduai 100 vel a ni ang. A kalhlat theihlam chu eitur an neih chhung ti ta pawh ni ila a sual lo. Mel 100,000 a kal hnuah a nuclear laimu recharge a ngai chauh a ni. Chunglama kahchhuah chi missile dawt 16 a nei a, hmalama kahchhuah chi tlar hnihin Polaris Missile 8 a pai bawk a, chungte chu mel 1200 vel kapphak a ni. Heng missile te hi rawng hring vek niin an ding thuau mai si a, lawng hnathawkte chuan a hmingah 'Sherwood Forest' tiin an phuah nghe nghe." 

"Heng Polaris missile te hi tuichhung atanga kahchhuah an ni ber a. An target chu Star-Tracker Periscope leh radio atangin an hrethei zel a, chu chu missile computer ah thunluh a ni a. Chumi hnu chuan missile kahchhuahna hmehkhep chu Chief Gunner chuan a han hmet a, missile chu boruak hmangin tuichung lamah a dawk chho va. Chu veleh missile-a solic fuel chu a nung a, a kalna tur lamah a thlawkta pur pur mai thin a ni." 

"Han ngaihtuah mai mai pawhin ralthuam hlauhawm tak chu a tlingin ka hria. An missile pai hi tuipui khawilai emaw atanga rawn thlawkchhuakin khawvel a khawpui tam tak hi a dengchhe vek thei tlat mai a. Heng tuihnuailawng hi kan nei nual a, an siambelh mek a ni awm e. Invau behna tha tak pawh a tling awm e. Khawi tuipuiah nge an bihruk lah a hriat der mai si lo. Bomber tumna hmunpui leh rocket base a ang ve tlatlo a ni," a ti ta duah a. 

Bond chuan, "Hmuhchhuah dan kawng an la hre leh mai ang. Atomic Depth Charge an thlak ve vaih chuan melza tam biala tuichhunga awm chu a tichhe thei ngei bawk si. Mahse he tuihnuailawng hian missile tihloh ralthuam tenau deuh a nei em?" ban deuh hian a lo ti a. "Lawng hmalamah sawn torpedo kahchhuahna paruk a awm a, Machine Gun pawh an kawl nual turah ka ngai. HArsa ber tur chu a kaptur a an captain hmin anih ber zawk ka ring. Mipahnih, uniform pawh ha ve hauhlo thu a civil lawng kah ngawt mai chu a duh hauh lovang. Nanglah hi English ilo ni leh zel nen; Navy department atanga thupek dawn chu kan thupek dawn ang thova fiah leh khauh a ni ve em ang chu maw," 

Submarine lianpui mai chuan vaukam bula lawngkai chu zawite hian a rawn su dut a, lawng atang chuan hruizen rawn thehkaiin alluminium leilawn an rawn dawhnghal bawk a. Vaukama mipui lo pungkhawm police hovin an dan beh mekte chu lawmin an au dur dur a. Leiter chuan, "Khaile, chibai buk pui tur lukhum tak ngial pawh kan khum ve lo lehnghal a," a ti a, submarine chu an panphei ta a.