James Bond : Thunderbolt - 10

10. THE DISCO VOLANTE

Yatch chhung atanga lo thlir rengtu No1 chuan a zan thlirna entlang chu a dah a, a kawrhma ipte atang chuan Charvet rawmawl a han phawrh a, a chal vel chu a han dep a. A inhrukna Schiaparelli Snuff rim nam chuan a nunkhaw nawmzia leh a bialnu Dominetta chu a ngaihtuah chhuahtir zawk a. 

Dominetta chuan tunah hian zanriah a kil vel mek emaw chauh a ni ang a. Nassau a chengte chuan Spanish ho hun hmandan an entawn tlat avangin thil an tihma in an che zung zung ngailo a ni.

No1 chuan a rawmawl chu a ak leh ta a. An chetdan chu lungawithlak hle hian a hria a ni. A sana a han en a, dar 10:15 chauh a lo ni a. Thlawhna rawn tlai dan kha darkar chanve vel chauh a ni a, mahse kha darkar chanve chhung kha chu an rilru a nuamlo hman hle reng a nih kha. Thlawhna kha nalh takin a rawn tum a, Vargas khan kha Italian pilot kha rang takin a lo dahtha nghal hmiah bawk si.

Tunah hian an lo tumdan aiin minute 15 in an tlai a. Tuichhunga lut hote khan bomb lachhuak tura an buai rei viau loh chuan an hun khawhral pawh chu an buaibo leh theih tho a rinawm a ni. Mahse buaina neilo tura inngaih chi chu a ni hauh lova. Darkar khat zet thim hnuaiah hnathawhna tur hun an nei a, rilru fim tak leh uluk taka thiltih chu a pawimawh ber a ni.

No1 chu a awmna atang chuan a chhuak a, radio pindanah a lut thla ta a. Inchhungah chuan thlan rim a nam nasa in boruak a tang at mai a. No1 chuan chuta lo duty te hnenah chuan, "Nassau Control Tower atangin thu in dawng tawh em? Thlawhna hniam deuhva thlawk a awm em? Bimini hnaivai tuipuia thlawhna tla a awm em? Chuti chu ngun takin in beng chhi ula, No2 min han biaktir teh ule. Hmanhmawh rawh u," a ti zung zung a.

Cigarette a tan a, radio operator ho hnathawklai chu a thlir ta a. A enkawltu chuan dim leh fimkhur takin a han herh a, radio chu a tawp ta a. Ngun deuh hian a han ngaithla a, a tiring leh hret a, a kutzungpui chu a ham tipir ta a. 

No1 chuan, "No1 ka ni," a han ti a. 

Radio atang chuan aw hian, "No2 in ka ngaithla e," a rawn ti a. Aw chu duh anga fiah leh chiang phei chu nilo mah se Blofeld-a aw ngei a ni tih a hrethei a. No1 pawh chuan a rawn betu aw chu a pa aw aimahin a hrechiang zawk ta ve ang.

"Kan hlawhtling e. Tunah dar 10:15 a ni a, dar 10:45 ah ka rawn be leh ang che, kan che zui zel e, over,"

"Ka lawm e, out,"

An inbiak chhung hi a reilo em mai a, an waveband ah phei chuan tu tan mah rawn man hman chi ziazang a ni lo.

No1 chu lawngchhung pindan zau tak maiah chuan a chhukthla ta a. Tuichhung lut tur B team te chu an hmanrua inchhawp chungin mei an lo zu mek bawk a. Lawng chhuat kawnglhar chu a rawm inhawng a, chu kawngkhara tui feet 6 vel lolut atang chuan thla engin a chhun tuipui mawnga tiaulung pawh chiang takin a lang thei a ni. Tuichhung lut tur ho bul maiah chuan thelret puan rawng uk leh hring uka tial buai mai hi engemawzat a intel ul mai a. No1 chuan, "Engkim a kaltluang hle zel e. Recovery team te pawhin an hna an thawk mek a, an rei lovang. Chariot leh a hnuh tur chu enge a dinhmun?" A han ti a.

Tuichhung luttur zinga pakhat chuan, "Tuichhung tiaulung zingah khuan kan dah mai, chet a rang zawk ang," a lo ti a.

"A dik chiah," tih pahin No1 chu a bu nghut nghut a. Lawng banga thil inkhaina khawl niawm tak en pag chuan, "Kan khawl hian a chawi zo maw?" a han ti a.

"A let pawh a zawh ka ring,"

"Anih leh pump te kha?"

"An tha e. Minute 7 chhungin an tihtur an ti thei ang,"

A tha a nih chu. Hmanhmawh lutuk lo, fimkhur tak siin kan che ang. Zan pawh a rei duh viau ang," tiin No1 chu lawmg chung bathlar lamah chuan a chhuak chho leh ta a. 

Yard 200 a hla lawng dinglamah chuan motor boat chu a lo ding a, a hnuaia tui chhunga electrict an chhit avangin a eng phut mai a. Eng pechhuaktu generator te chi chu a thawm a ring phian mai bawk a. Hetiang ang zanreh lai, tuipui chungah lehnghal chuan an thawm chu a thleng thui thei viau ta ve ang. 

Mahse hetianga risk tenau lak hi chu lohtheihloh, fimkhur taka an lo dawnsa vek a ni a. Thliarkar hnaiber chu mel5 vela hlaa awm anih bakah thliarkar ruak mai a ni lehnghal a. Helai hmun an rawn panna lamah hian ngun leh uluk takin an endik hmasa vek tawh a ni. Fimkhur thu hla ah an ngaihtuah theih chin chu an finfiah fel vek tawh a, an chet leh zel dan tur bak chu ngaihtuah hah tur pawh a awm tawh lo. 

No1, Emilia Largo chu lawng pindan sangah chuan a chho va, an chart chu ngun fahran mai hian a han thlir leh a.

Amah hi palian pui mai, kum 40 bawr vel a ni a. Roman niin, a an ber erawh tunlai Roman ho ni lovin hmanlai Rome mi, pa hmaitluak riau ruau, pawisa hlui a an tarlan thin hnar ngul sang tak ang hmel hi a pu a. A mitmu buang deuh chu a fiah tha hle a, hmui chhah lam deuh leh benghlai lam, ki deuh vah mai a nei bawk. A khabe hmul chu sei takin a zuah a, a sam dum chhah tha tak chu uluk takin a khuh bawk a. Pa ruhrel lian leh tisa phiar tha tak mai, thau pu chuang miah silo a ni.

Largo hi Sap hovin'Adventurer' an tih ang chi, harsatna han suttlang vel nuam ti mi a ni a. Ani ang hi chu ramsa ah pawh a sehtu pawl, midangte sa ei thin ang chi a ni. Kum 200 kalta te kha chuan lo piang tawh sela chuan lawng suamhmang, pawisak nei maplo leh rothap tak a nih a rinawm.

Lawng hnathawk pakhat chuan kawngkhar chu a rawn kik a, a rawn dak a. 'Chariot' leh 'Q' a hnuh chu an peih tawh tih a rawn hrilh a. 

Largo chuan lawmthu a lo hrilh a, eng thiltih leg harsatna ah pawh Largo hi a phili in a chebuai ve ngai lo va, rilru fim leh dai raih hi a pu thei reng a ni. Hetiang ti thei tur hian amah a inthunun nasa hle reng a ni. Mahse hetia a inthunun tlat theihna hian a thawhpuite rinna a hlawhphah hle a. Amah an ring a, a thu pawh an awihphah thin hle reng a ni.

Largo chuan a thil hriatduh ber chu hre tawh mah se hmanhmawh chuang miahlo hian a divider ken chuan a hmaa chart chu rinkual niawm tak hian a han buaipui leh phawt a, chumi hnu chuan a chhuak ta chauh va.

An piah deuhva motorboat 'Q' awmna tuihnuaiah chuan eng hi fiahlo takin a phei zar zar a, hei hi indo laia Italian hovin mi pahnih chauh chuan theih nana tuihnuai tawlailir an siam ang kha a ni a. A siamtu company 'Ansaldo' hnen atanga an lei a ni a, an chei danglam nual tawh bawk a. He company hi mi pakhat chauh chuan theihna tuihnuailawng (Submarine) siamtu an ni nghe nghe a ni.

Chu Chariot chuan tuichhunga thil rit deuh phurhnan a an siam 'sled', mahni pawha lang thei deuh hi a hnuk a, reilote ah chu chariot eng chuan Yatch lam chu a rawn pan phei ta a.

Largo chu lawng chhungrilah chian Atomic ralthuam pahnih te an lo thleng lai chu en tur chhukthla awm tak hi a ni a, mahse a hote chu a rintawk avangin chesawn lovin a awmna ngaiah cbuan a awm reng a. Reilo teah chariot chu thlawhna tlakna lakah a kir leh tawh a ni tih hriat fahran mai hian a eng phei leh ta zar zar a.

Tumah hian vawi tam tak an lo zir thin angin 'sled' chuan tarpaulin lian tak a phyr phei ang tih a hre mai a. He tarpaulin hi hmuh harsa thei tur ang bera siam, rang buai mai, thlawhna khuh bo na tur a ni a. Kil tinah thir kawmin uluk takin an kilh leh vek anga, tuifawn nasa tak pawhin a thehhlim theihloh tura khawpa kilhngheh tur a ni.

Motorboat piah deuh tuichhung atang chuan eng a rawn langchhuak nawlh a, a bulah chuan a dang a rawn lang leh a, a dang dang pawh a rawn lang ta sup sup mai a. Tuihnuai a lutte pawh kha an rawn chhuak chho dawn a ni tih pawh a hriat nghal mai a. Thoa engah chuan an hmaikawr a darthlalang chu a rawn tle zawk zawk a.

Motorboat lamah chuan annhleuh phei nghal a, Largo chuan anni chu a lo chhiar a, pariat chiah an lo ni a. An vai chuan motorboat sira leilawnah chuan an lawn chho va, an inthuamna avang chuan chet an harsat viau lehnghal a. Lawnga mechanic leh Petacchi lo thattu German killer Brondf chuan an lo tanpui zung zung a. Tuihnuaia search light pawh chu an tithim a, lawngah chuan an hnukchho nghal a. Motorboat khawlphir chu an tinung a, Yatch lamah chuan a rawn tlanphei ta a. Yatch sira a khaina ah chuan nghet takin an thlung a, mihring chawp chuan Yatch ah chuan an khaichho ta a. 

Yatch captain chu Largo bulah chuan a rawn phei ve a. Chupa pawh chu ruhrel hrawl leh hmel durkhuih reng mai, zu ruih ching leh aia lalte zahloh vanga Canadian Navy atanga ban a ni a. Lawng pindan lianberah hian, nikhat chu Largo nen an thu a inhmu ta lo. Largo chuan chair keh vek khawpin a chhipthlak ta pawp mai a, chumi ni atang chuan Captain chu Largo hnuaiah chuan zo takin a intulut thei ta a ni. Chutianga in enkawla in thununna chu ani hriatthiam zawng tak chi a ni tlat a ni. 

Captain chuan, "Lawng chhung kan singsa fel a, kan kal mai dawn em ni?" a han ti a.

"Zu chechhuak ho chu an lungawi em?"

"Lungawi chu an in tia lawm. Chetsualna engmah an nei lo ve"

"A hmasa in whiskey tlem pe hlawm la, hahchawlh tir ang che. Darkar khat lek hnuah an chet chhuah leh a ngai dawn a ni. Kotze kha min hmu turin han hrilh la, minute 5 hnua chechhuak thei turin lo inpeih rawh,"

"Aw le,"

An physicist, Kotze a mitmeng chu thlaeng hnuaiah chuan fiah takin a hmuh theih a. A phur hle tih pawh a hriattheih a, a khir deuh der der tih pawh Largo chuan a hrethei.

"Aw le, ka thian. Infiamna tur thar chu i duhzawng a ni meuh emaw chu? I duhzawng a kim em?"

Kotze chuan phur luattuk vanga hmui khur der der chung chuan, "A tha lutuk, suangtuah phak piahlam a ni. Hetiang ang ralthuam tha hi a awm thei ang tih pawh ka hre ngai lo. An siam awlsam thiam lutuk mai bawk si. A him tha a, naupang pawhin a himthat em avangin duh duhin an khal kual vel thei hial ang," a ti zung zung a.

"A dahna kha a zau tawkin hnathawhna tur hmun i nei thei ang maw"? 

"Nei tehreng mai, harsatna engmah a awm ka ring lo. A fuse hi awlsam tea thlawn theih a ni a, time mechanism a thlawk chu thil harsa lo tak a ni ang. Tunah hian Maslov-an a herh dik mek a, a herhna suan chi ka hmang dawn a ni, enkawl pawh a awlsam zawk ang,"

"Anih leh a tipuaktu i tih plug pahnih te chu an him meuh maw? Tuichhunga lut ho khan khawiah nge an hmuh?"

"Pilot thutna hnuai thingrem, suana siam chhungah a lo awm a, ka endik vek tawh. Hman awlsam tak a ni. Mahse hmun hranah daih ka thukru ang. A dahna tur thelret ip te pawh kha duhthusam a tha an ni. Kan mamawh ang chiah an ni e. Tin, a chhin pawh kha a phui tha a ni tih ka fiah vek tawh e,"

"Radiation zungzam a hlauhawm lovang maw?"

"Tuiah chuan hlauhawm lo ve. A vaiin suan bawm chhunga dah vek an ni. Ka khawihlai khan kai deuh chu ka nei mai thei a, mahse invenna kawr ka ha a, ka in en ru mai ang. A awmdan ka hre tho alawm,"

"I huaisen hle mai Kotze. Lohtheihloh anih lih chuan kei chuan ka hnaih dawn lo. Ka mipatna hi ka la hlut tlat a ni. Harsatna i neilo tiraw? Thlawhna ah khan  engmah hnutchhiah in neilo maw?"

Kotze chu a hmelah pawh a hlim hle tih a hriat a. An harsatna te pawh chu a enkawl theih thil vek an nih avangin nuam hi a ti hliah hliah mai a ni.

Largo chuan chu scientist cher din den kalsawn lai chu a enzui vung vung a, ani pawh chuan scientists ho hi mak a ti ve hle thin. An rilru ah science bak chu yhildang engmah a lenglo ni hian a hre ve a. Kotze chuan a hmabak la thimzia chu a hre phalo ni ber hian a hre ve a. 

Lawngkhalhna cockpit ah chuan a han chho va, captain chu lawng khalhtu thutna, alluminium chair derdep zetah hian a lo thu a.

"Khai le, kal ang ule," a tih chuan Captain chuan a hmaa hmehna engemawzat tlar tuarh zinga STAR BOTH tih inziak chu a hmet nghal a. Lawng hnunglam chu a thum hum hum a, a khawl pahnih chu a nung ve ve tih entir nan Captain hma a sana chu a eng zawk zawk a.

Captain chuan Electro Magnetic Gear chu 'SLOW HEAD BOTH' tih awmna ah chuan a han kuaisawn a, Yatch chu a chesawn tan ta a. A lhawl pahnihte pawh chu 4-Stroke Diesel Engine an ni a, chumi tichak lehzual tur chuan Brown-Boveri Turbo Super charger phir hmantel a ni. He lawng hi ton 100 vela rit a ni a, mahse darkar khatah knot .50 vel zeta chakin a tlan thei a ni. Vawikhat diesel thunah mel 400 a thui a kal thei a, a man pawh a tlemlo hle reng a ni. England pound 2,000,000 man vel zet a ni a. Bahama tuipui pawnlang taka duh duha che thei, a phurh theihtawk anga tam phur a a chak dan anga chak chu he lawng bak hi khawvel hmun dangah a awm kher awm lo ve.

Hetiang hi SPECTRE duhdan ang chiah a ni a. Lawng nghet tak leh tuiah pawh a inphum thuklo tak mai, Italian hovin 'ALISCAFOS' an tih ang hi a ni a. Magnetic field in a tibuai lo va, tui a su fawn lutuk lo bawk. Disco Volante hi police atanga tlanchhiat tum pawh ni se a chunga kan sawite khi pawimawh lutuk an ni tlat a ni.

Disco chuan eng pakhatmah a chhin lang lo va, thlana chhuah hmanpawh khan a thleng hla tawh hle a. Khawthlang lam hawiin a kal a, tunah chuan Nassau atanga mel 100 velah a awm tawh a ni. Khawvar dawn tepah hmun pawimawh pakhat a tlawh leh anga, tichuan mi a bumna chhimlam atanga a lo haw ri chu Nassau a mite chuan an hre dawn a ni.

Largo chu a thutna atang chuan a tho va, chart an pharhna dawhkan lamah chuan a phei a. A han bih a, an kalna kawng hi vawi tam an lo zawh tawh avangin harsatna engmah an neih a ring lo. Mahse phase I leh II a kaltluan em avangin phase III naah chuan tihsual palh a awm theih avangin fimkhur a ngai zual tih a hria a ni. An kalna kawng pawh cgu ala dik zel tih a hria a, an thlenna tur pawh darkar khat hnuah an thleng thei turah a inngai a ni. 

Captain chu thiltih dan tur a hrilh a, amah chu pindan hnuaia radio room ah chuan a lut thla ta a. Dar 11:45 anih tep tawh avangin inbiak pawh hun a hnai tlat a ni. 

Disco chuan chak takin thliarkar chu a hnaih phei a, chutah a ding ta a. Tuiah chuan a pilhniam ruai ruai a, a tuisut phuan chuan thliarkar chu a bawh hlup hlup a. Thirchakai chu feet 40 vel a thukah chuan an thlakthla ta a.

Mi 5 te chuan tuichhunga luhna tur oxygen bur an pai vek a. Largo chuan electrict hmehen hrawl tak mai chu a hum a, mi pali inkawp chuan len ang deuh hi chelhin, chutah chuan thelret a tuam feet 6 vela sei thil pahnih ve ve hi an zawn ta bawk a.

Tuipui zing chuai maiah chuan an kal ta a, reiloteah thliarkar bulthut chu an thleng ta a. A leilung chu a thim muk run mai bawk a.

Largo chu lei kawrawng hma a lung chhawrdawh ah chuan a lawn chho va. Lei kawrawng chhung chu a han bih a, a kawtlang ni mai hian a hria a. A naute chu rawn lawn hnai turin a han hrilh a, lei khikak zau deuh laiah chuan an Atomic bomb zawnlai nghahna tur chu an buaipui ta a. Khaw engang karah pawh a chetsawn theihloh na turin nghet takin an tawnbet ta tlat mai a.

An vai chian lawng lamah an kir leh ta a, reilo te-ah DISCO khawl chu a rum leh ta vut vut mai a, chak takin a lo kalna lamah chuan an kir leh ta a ni.

Hrukpuan chauh vengin Largo chu radio room ah chuan a lut phei a. Zanlaia an inbiak tur pawh a thulh tawh a. Tunah hian zan dar 1:15 a ni a, an hotu ber Blofeld tan chuan zinglam dar 7:15 a ni thung.

Radio puin biakpawh tuma a beih chhung chuan Blofeld a rilru tur chu Largo chuan a lo ngaihtuah neuh neuh va.

Reilo teah an inbe pawp thei ta.

"Hei hi No1 a ni e,"

"No2 in ka ngaithla e,"

"Phase III kan zo fel ta. Kan hlawhtling e."

"A lungawithlak anih chu,"

Largo chuan a earphone chu a dah a, "Kei pawh ka lungawi khawp mai. Kan hmabak chanve aia tam kan zo ta, tunah chuan ramhuai lalpa chauhvin min dang thei tawh ang,' a ti rilru neuh neuh va.

A pindanah a lut phei a, intur uluk takin a insiam nghal a. A duhtawka a in hnu chuan cockpit lam panin a chho leh ta a.