James Bond:The Man With The Golden Gun - 2

ATTENTAT

M dawhkan hmaa ding chung hian Chief of Staff chuan titak deuh hian, "Ka Pu, kei chu tha ka ti lo. I aiah kei emaw, midang tuin emaw lo hmachhawn zawk ila a thain ka hria. Ka ngaih a tha thei tlatlo. Kei chuan 007 hi a chiang tawhlo ni berin ka hria. Amah tak phei chu a ni ngei mai a, a kutzia pawh Chief of Security in a enfiah tawh a, a thlalak leh aw ah pawh rinhlelh rual lohvin amah ngei niin a lang. Nimahsela thil felhlel a tam lutuk tlat a ni. Ritz Hotel a a passport lemte kha han ngaihtuahnawn leh teh. A lo haw leh duhin a ti anih a rinawm a, mahse a felfai lutuk dan khan a tirinhlelhawm vek asin, KGB ho kutchhuak anih hial ka lo ring nghe nghe a. A zinna hnuhnungber inziak lah chu West Germany a ni leh nghal a. Chuta a kal chu engah nge Station B emaw, W ah emaw a in-report mai loh!! Heng station hotute hi a thiante vek an ni lehnghal si. Berlina 016 lah chu a thiantha tak a ni lehnghal. Alo haw hnu hian engah nge a chenna a pan hmasak loh? A in enkawltu Scot hmeichhia, May lah chuan ala dam ngei ringin ama pawisa hmangin a chenna chu ala tuaihnumsak lehnghal. A kawrte lah kha... A thar hlira inthuam enge a tulna? Thawmhnaw nei miahlo pawhin lo thleng se ka phone no a kawl tho va, min rawn phone se ka lo ngaihtuah mai tur. Chutiang ni lovin tunah lawng dangdaih hmanga rawn luh leh a tum a, security lam tan chuan a ngaihthatthlak hlei thei thlawt lo a ni," a ti bawrh bawrh a.

A han ngawi hlek a, a thusawi chuan awmzia a nei tehchiamlo tih a hmuh leh tak avang chuan a ngaihdan pawh a nilo lek lek a. A thusawi chhung zawng khan M chuan a chair a tivir a, London khua thlir chung chuan ngawirengin a kuaite chu a pet a. Chutah luhlul deuh hian Chief of Staff chuan, "Ka pu, ka kutah dah mai ta che. Sir James Malony ka bepawp anga, 007 chu enkawl turin kan buaipui zui mai dawn nia. Dimte in kan ti ang. VIP anga buaipui tho chu a thain ka hria. Cabinet-a koh thut inih thu emaw hrilhin ka lo pha mai ang. 007 chu a cher deuhhlek niin security lam chuan an sawi a,chhuanlamah enkawl dam hmasak kan duh thu ka lo hrilh mai dawn nia. A cher bawraw deuh leh damdawiin kan chiu mai ang. Ka thiantha tak a ni a, kan lakah thinurphah nan a hmang hauh lovang. Kan thei anih chuan siamthat leh ngei a tul niin alang," a han ti leh a.

M chuan a chair chu muangchangin a han tivir leh a, ngaihthalo taka amah ko en rengtu leh kum 10 chhung zet Secret Service a number 2 nihna tluk deuhthaw lo chelh tawh chu a en a. "I mi ngaihtuahna avangin ka lawm e, Chief of the Staff. Mahse i rawtna ang ngawta thil awlai chu a ni lovang. 007 hi a hnathawh hnuhnung berah hian intih harhnan a ka tirhchhuah a ni a, thil awmdan chu i hriat ve vek kha. Hna hahdam tak nia lang tur hetu hian atawpah Blofeld te nena inbeihna hautakah a inlet ang tih ka hre phalo a ni. 007 chu kumkhat zet hmuh leh tur awm lovin a bo ang tih ka hrepha hek lo. Tunah hian a thil va rawn chu kan hriat ve a tul a, 007 ngaihdan chu a dik hlein ka hre bawk. Ka tirhchhuah a ni a, ka hnenah bawk rawn in-report leh chu a tihawm tak a ni reng a ni.  007 hi ka hrechiang a, mi luhlul tak a ni. Midang tunah ka hrilh dawnlo a tih chuan a hrilh Miah lovang. Ni e, eng thil nge a tawn chu ka hre duh a ni. Nangpawhin ilo ngaithla ve tho anga,  hnaivai deuhvah mifel deuh lo awmhnai se, a chetdan a dikloh chuan in lo man mai dawn nia. Asilai chu keiman ka buaipui mai ang. He thil hi in enfiah tawh maw?" tiin chunglam chu a han en a.

"Enchhin tawh e, ka pu. A tha vek. Mahse......"

A kut pharin M chuan, "A pawi ngawt mai, Chief of Staff. Ka thilsawi kha thupek a ni tlat mai," a ti a, intercom chu a rawn de zawr zawr a. M chuan, "A lothleng tawh a ni ang. Rawn luhtir nghal mai ta che u," a han tizui a.

Chief of Staff pawh chuan alu a bunghat a, a chhuak ve ta nghal a.

James Bond chuan dava deuhva nui chung hian Monopenny chu alo dinchilh a, ani lah chu alo mangan hmel hle bawk a. Bond chu a rawn dakchhuak a, la nui deuh reng chung hian, "Chibai, Bill," a han ti a. Bill Tanner pawh chuan, "Chibai, James. Kan inhmulo rei ta hle mai," alo ti ve vat a. A mitsir chuan Miss Moneypenny lu thinglai chu alo hmuru reng a. Bill Tanner chuan Moneypenny en chung chuan, "Tunah M chuan 007 hi a hmuduh a ni,"a han tileh a.

Miss Moneypenny chuan, "Minute 5 lekah Cabinet office a Chief of Staff meeting ah kal a ngaih kha i hria ang chu maw?" tiin dawt a han phuahchawp a.

"Ni e, ka hria alawm. Lo sawifel turin a duh che anih chu," tiin Bill Tanner (Chief of Staff) chuan James Bond lam chu a han hawi a. "Aw le, James, valut rawh. Chawei i hman dawnlo chu a pawi hle mai. M i biak zawhah min rawn hmu ang che," a ti ta a.

Zoram On-line Store ah hian lo leng ve ta che.

Bond pawh chuan, "Ni e," a lo ti ve mai a, kawngkhar chunga bulb sen awmna ah chuan a lut ta a.

Moneypenny chuan hmai hup thuaiin,"Oh! Bill. A chungah enge maw thleng ta le??!!" a han ti a.

"Intipachang rawh, Penney. Theihtawp ka chhuah dawn alawm," tih pahin Tanner chu a pindanah a lut a, dawhkana hmehna awm chu a han hmet nghal a. M aw chuan, "Chibai, James. Ilo kir leh chu a lawmawm hle mai. Thu la, chanchin min lo hrilh teh khai," a han ti a.

Bill Tanner chuan phone in Head of Security chu a bepawp ta nghal a.

James chuan nidang ang bawkin M dawhkan hmaa chairah chuan thuthmun a han rem a,a rilru ah chuan film khawl thalo va film rawn lang, bhai nuaih ang mai hian a tunhma thil tawn leh lo hriat tawhte chu a rawn lanpawlh zut zut a. A mit a han chhung a, a sawitur leh tihtur chauh tithei turin a rilru a han sawrbing a. A chal khawihpah chuan, "Ka la hriatchhuah theihloh thil ala tam mai, ka pu. Ka lu ka sawh deuh va, chu chu Japana min tirh hnu lawka thleng a ni. A bak chu Vladivostok lawngchawlhna a police hovin min chhar chu ka hriat a ni leh deuh mai. Chulai hmun ka thlen dan pawh ka hrelo reng reng. Min dimlo deuh a ni ang, ka lu-ah hliam ka tuar leh a, chuta tang chuan tunge ka nih ka hrechhuak ta a ni. Japanese ka ni lo tih pawh ka hre ta. A hma chuan Japanese sangha mantuah riak ka lo inngai a. Police ho chuan KGB ah min hlan a, ka thla leh kutziate chu thawnin, an buai phili nasa ta mai a. Vtoraya Rechka khaw hmarlam a sipai thlawhna tumhmun atangin Moscow ah min thawn a, kar tam tak min dawp a. Mahse anmahniin ka thil hriatsa hmanga min sawi hmawrhmuh loh chuan engmah sawiturka hre theilo tlat mai. Sawibelh tur ka hriat pawh a fiahfel ngailo hle a, an tan chuan beidawnthlak tak a ni,"

"Anih dawn tak chu," tiin M chuan a chal a han chuar a. "Tichuan i hriat ang ang chu i hrilh ta mai a maw?" a han ti hlak a.

"Kawng engkimah min duat khawp asin. Ka tana tihtheih awmchhun a ni tlat alawm. Leningrad ah chuan institute pakhat a awm a, VIP ang chiahin min enkawl a ni. An mi chhawrte reng reng chu specialist vek an ni a, anmahni neiin ka damchhung hun tam zawk ka hmang tih pawh hrelo ang maiin min enkawl a. Politics awmdan leh kalphung pawh min sawipui nasa hle a ni. Khawvela inremna a awmtheih nan khawchhak leh khawthlang ramte thawhho a tulzia pawh an sawi nasa hle. Tunhmaa ka lo ngaihtuah ngailoh thil tam tak min hrilh a, mi pawh an hmun hle a ni," tiin Bond chuan luhlul deuh hian M thinur mitmeng chu a han en a. 

"Ka sawi awmzia chu i hrethiam kherin ka ring lo. Ka pu, i hun zawng zawng deuhthaw chu midang phiarnan leh do nan i hmang a, tunah pawh hian chu bak chu i rilru ah a awm kher lovang. Keulah hmanrua ah min hmang bawk nen. Vanneihthlak takin chu erawh chu a tawp thei ta hram anih hi," a han ti a.

Vin deuh hlur hian M chuan, "Ni e, a tawp ta anih hi. Korea indona a kan sipai an man the khatte thluak an suk dan i chhiarte kha ila hria emaw chu? Russian ho chuan inrem an duh viau anih chuan engah nge KGB ho hi an dah lal viau? Chetna hnuhnung berah chuan an mi leh sa 1,00,000 vel zetin keini leh ramdang an phiarru a,  an do mek asin. Chu pawl chu ania Leningrad a lo duat em em tu che chu! Thlahlui kalta a Harcher leh Stutz an thah thu te kha an hrilh che em?" a han ti a.

'Aw hrilh e, ka pu. Khawthlang lam Secret Service ho lak an inven ve a ngai alawm. In inthiahdarh vek theih chuan hlim takin anni pawhin KGB chu an thiat ve mai ang. Chu chu chiang takin an sawi a ni,"

M chuan thinur awfiak thak hian, "Chu chuan an sipai division 200 rual leh tuihnuailawng rualte, ICBM (Intercontinental Ballistic Missile) leh thildang pawh a huam ang chu maw?" a han ti leh a.

"Huam tel vek e, ka pu,"

"A, chung mite chu chuti taka rilru tha leh mi hriatthiamna ngah nia i hriat si chuan engah nge an zinga i awm hlen mai loh? Chamhlen pawh tam tak an awm asin. Burgess chu a thi tawh a, MacLean nen in inmil phian ang chu,"

"Inremna siam tura theihtawp chhuah tura ka lo kir leh hi a pawimawh zawkin ka hria a ni, ka pu. Nang leh i hote hian a ruka inbeihna a hmantur thiam thil min zirtir teuh va, inremna nei tur chuan heng thiamthilte hi hman a ngai thin tih min hrilh a ni," tih pahin Bond chuan a kawrchung ipte dinglam chu a han zen a.

M pawh chuan a chair chu hnunglamah a han nawr hlek a, a kut veilamin a chair ban hnuailam a hmehna chu a dap vat a. "Eng ang chiahin maw?" a han tisap a, sawi ngai lovin a hma a thu chuan thihna rim a nam tih a hailo.

Bond chu a inpetruh a, hmu awm pawha langlo hian M chu a en a. Chhungril tak atanga nawrchhuahluih ang mai hian, "Indona chawkchhuak tute tihrem tumba kawnga pakhat a chu ka ngaihdan ah chuan nang hi ini," aw fiak deuh hian a han ti a. A kut atang chuan silai dum deuh hi a rawn chawkchhuak a, a kawma tur a chikchhuah rual chuan inching atang chuan darthlalang chhah, kah keh mai theilo tur hi an inkar dawhkan hmaah chuan a rawn inkhawhthla zawk a, chu darthlalangah chuan silai atanga tur rawn chhuak chu a luang nguai nguai a.

Pindanah chuan Chief of Staff leh Head of Security chu an rawn tlanlut nghal a, James Bond chu an rawn bawhphei a. Mahse annin va chelh hmanlo sela chuan amah pawhin alo thungil do tawh lo va. An phih tho va, a lo thildang reng tawh a. Head of Security chuan a hnar lenkualin, "Cyanide rim a nam tlat mai, i chhuak vat ang u," a ti a. Bond a silai thlauh chu petsawnin, darthlalang phen atanga M lochhuak mek chu pindan atanga inthiarfihlim nghal turin a hrilh a. Kawngkhar pawnlamah chuan Penny chu kut humruh tlat hian alo dingkhur zaih zaih a. Chief of Staff pindana James an hnuklut lai chu hmuh hrehawm ti deuh hian alo thlir a.

Thupe aw deuh hian M chuan, "Kawngkhar kha khar la, Miss Penny. Medical officer va ko vat teh. Tuma hnenah engmah sawiloh tur. I hria em," a han ti thur thur a. Chief of Staff room ah chuan a lut ve ta nghal a. 

Head of Security chuan thingthiin Bond chu a lo buaipuia. A nghawngawrh phelhin a marphu alo dek mek a. Bond-a hmai chu a dangin thlantuiin a bualhuh vek a, hah awm tak hian a thaw bawrh bawrh mai bawk a. M pawh chuan a han en vang vang a, "Awle, ka hmaa mi kha ka thutna chairah tho khan a thi a, mahse ani kha chu silaimu pangngai kah a ni a. Ani pawh officer rilru buai kutthlak bawk kha a ni. Mi a hri hi chu dan anga rorelsak hleihtheih pawh a ni lo. Tuna kan invenna kha Office of Works ho chuan an siamtha hle mai. He thil hi mi hriat ka duh dawn lo va, The Park a 007 in lakthlak veleh Sir James Malony ka be duh ang. 007 hi ambulance-ah vengtu nen inhruai dawn nia. Vawiin ah thil awmdan hi Sir James chu ka hrilh ang. KGB hovin a thluak an suksak a ni tih a hriat mai a, a hriatrengna pawh a hloh nasa hle niin alang. Ritz a a bungrua va lachhuak ula, a pawisa chawitur pawh pe nghal vek ang che u. Tin, Press ho hriat atan 'Nikum November a Japan a hnathawka chhuak Commander James Bond, thi tawha ngaih, him taka alo haw leh chu Ministry of Defence chuan lawmawm a tihle a. Soviet Union kaltlanga Commander Bond hi lo haw leh anih avangin a hriselna in a tuar hle a, tunah hian damdawi hmanga enkawl mek a ni' tihlam hawiin thu lo hlan ang che u. Tin, fimkhur thu hlaah Commander Bond awmna hriat tum chuan hlawkna a nei miah lovang tih intelh bawk dawn nia," a ti a.

Bill Tanner chuan M thusawi chu alo ziakchhawng zel a. "Mahse ka pu, a phatsanna che leh thah tumba che avang Khan engmah charge i tum lovem ni? I court martial dawnlo tihna a ni maw?" a rawn tichhuak a.

"Dawn lo. 007 kha a damtha lo tih kan hmu a, a thiltihah khan mawlh a phutlo a ni. Mi thluak suksak thei an awm anih chuan suknawnleh dan tur pawh a awm ngei tur a ni. A tithei tur te an awm anih chuan; Sir James Malony-a'n a theih ngei ka ring bawk. Tunah chuan hlawh chanve la tur angin ti ula, a section hluiah dahlet leh ang che u. Tin, a awmloh chhung hlawh leh thildang pawh a hmu vek bawk tur a ni. KGB ho chuan ka mi chhuanber hmanga min bei ngam anih chuan amah vek hmangin ka chhulet ngam tih an la hre dawn alawm. 007 hi agent tha tak a ni thin a, anih nawn leh lohna tur ka hrelo reng reng. Chawei khamah Scaramanga file kha ka duh ang. Kan tufan leh thei anih chuan 007 tum tawk tak tur anih pawh ka ring," 

Chief of staff chuan, "Ngawiteh, ka pu. 007 neih pawhin a erpha dawn em ni? Mahni intihlum ang tho a ni ang," tiin alo hnial a.

Ram zet hian M chuan, "Tun maia 007 chetdan kha hrem ni ta se angang nge ni ang? Kum 20 chu a tang mai lovang maw? Chu pawh chu a reilo ber pawl anih ka ring. Ani tan chuan inbeihna hmun ngeia thih a tha zawk. A hlawhtlin tak hlauh leh a dinhmun pangngai a lush leh thei dawn tihna a ni mai a, thil kaltawh pawh kan theihnghilh vek thei ang chu. Chu chu ka thutlukna a ni," a ti ta hmak a.

Kawngkhar chu an rawn kik a, Medical Officer hi a lolut a. M chuan chibai buk zetin a chhuahsan leh nghal a. 

Chief of Staff chuan M chu thlir zui reng chung chuan zawite hian, "Lainatna tlachham ve tak chu inih hi maw le," a tizui sap a, an hmabak tihtur chu a buaipui nghal zung zung a.