Bung 6
Ka mumangah chuan Kristiana chuan a phurrit chu a tihbosak theih leh theih loh a zawt a; a phurrit chu a la bo si lo va, amah mai chuan a ti bo thei si lo va. Tin, ani chuan, "I phurrit hi zawng a bo theihna hmun I thlen hma loh zawng lungawi takin phur zel la, nakinah amahin a tla mai ang", a ti a. Chutichuan Kristiana chuan a puan a veng a, kal tur chuan a insiam leh ta a. Tin, a thian chuan Kristiana chu kawngkhar aia hla deuh hlekah Hrilhfiahtuain a va thleng ang a, a kawngkhar chu i va kik ang a, ani chuan thil nasa tak a lo entir ang tih a hrilh a: tin, Kristiana chu a thian hnenah chuan, "Dam takin," an inti a, an inthen ta a.
Tichuan Hrilhfiahtua in a thlen hma loh chuan a kal zel a. A va thlen chuan a kawngkhar chu a va kik a, a tawpah chuan mi pakhat a lo chhuak a. "Tunge ni?" a rawn ti a. Kristiana chuan, "Ka pu, he mi in neitu hmelhriat hian he mi ina lo kal tur hian min tir a, in neitu hi biak ka duh a ni.” a ti a. Chutichuan ani chuan in neitu chu a va ko va. Nakin deuh vah chuan Kristiana hnenah chuan a lo kal a, ‘Engnge a duh’ a rawn zawt a. Ani chuan. "Ka pu, Boralna khua atanga lokal ka ni a, Zion tlangah ka kal dawn a ni. Tin, mi pakhat, he mi kawng bula mi hian nang hi ka rawn tlawh che chuan ka kalna kawnga min pui turin thil ropui tak min entir ang tih min hrilh a ni." a ti a. Chutichuan Hrilhfiahtua chuan, "Aw le, lo lut rawh. I tana thil tangkai tak tur chu ka entir ang che," a ti a.
Tin, Hrilhfiahtua chuan a chhiahhlawh chu khawnvar a haltir a. Kristiana chu amah zui turin a ti a. Chutichuan pindan pakhatah a hruai a; chutah chuan Hrilhfiahtua chuan a chhiahhlawh chu kawngkhar a hawntir a. Kawngkhar a han hawn chuan Kristiana chuan milem pakhat lungawi awm tak hmel pu hi banga inkhai a hmu a. A mit chuan van lam a en a, a kutin lehkhabu tha tak hi a keng a. A hmuiah chuan dan dik taka ziak a awm a, a hnungah chuan khawvel a awm bawk a. Rangkachak Lallukhum a khum a, mihring tana dilsak ni awm takin a lang a.
Chutichuan Kristiana chuan, "Hei, engtihna nge ni?" a ti a. Hrilhfiahtuan, " He milem hi a ang a vang hle a ni. Nau a nei thei a, a enkawl thei a, nau an pian veleh a awm nghal thin a , (I Kor. 4:I5; Gal. 4:I9) A mita va a en a, a kuta lehkhabu tha tak awm te, a hmuia dan dik tak ziak I hmuhte hi a hnathawh chu misualte tan thil harsa tak tihlan nan a ti a ni tih i hriatna tur a ni; mihringte a thuawi tura ngen niawm taka i hmuh leh Lallukhum khuma I hmuhte pawh hi, thil te tak te leh hmuhsitawm takte pawhin Lalpa an hmangalh avang Ieh, a rawng an bawl avanga ropuina leh lawmna nakina an la hmuh tur entima a ni. Tuna he milem ka entir hmasak che hi, chu mi i kalna tur hmun Lalpa chuan, amah hi i kalna apianga hruai tur chein a ruat a ni: Chuvangin ka thil entir hi tha takin ngaihtuah la, I thil hmuh apiangte hi I rilruin vawng tlat rawh; chutilochuan kawngah miin an lo tihder ang chia; kawng dik tiin an hruai ang chia; nimahsela chu kawng chu thihnaah a lut ang,” a ti a.
Tin, Hrilhfiahtua chuan pindan bawlhhlawh tak, phiah ngai hauh lovah hian a hruai lut a. Chu mi pindan chu reife a en hnuin Hrilhfiahtuachuan a phiat turin mi a ko va. Chu mi chuan a han phiat a, bawlhhlawh chu a leng chum chum mai a. Kristiana hnar ah chuan bawlhhlawh khute chu a lut a, a hahchhiau va, a khuh dawt dawt ta mai a. Tin, Hrilhfiahtua chuan a kianga nula ding hnenah chuan, "Tui han la la, pindan hi theh rawh,” a ti a; Tin, nula chuan tui a theh hnu chuan a han phiat leh a, a fai ta duak mai a. Chutichuan Kristian chuan, "Hei engtihna nge ni le?" a ti a. Hrilhfiahtuachuan, "He pindan hi mihring rilru chanchin thain a tihthianghlim ngai loh ang a ni a, bawlhhlawh chu mihring pianpui leh rilru sualin a tihbawlhhlawh entima a ni a. Tin, a han phiat tantu chu Dan entir na a ni a. Chutichuan a phiat tantu chuan a tifai thei lo va, bawlhhlawh a leng chum chum a. Chung chu i hak a; chu chu danin sual a tifai thei lo va, chawk thovin a tiharh zawk a. (Rom 7:9) Sual ngam turin thiltihtheihna a pe thei lo tih entima a ni. (I Kor. I5:I6; Rom 5:20) Tin, nulain pindan chu tuiin a han theh a, a lo fai thei ta tih i hmuh hi rilrua Chanchin Tha a lo lut ang hi a ni; Tin, nulain chhuata tui thehin vaivut leng a ti reh ang bawkin Chanchin Tha in rilrua sual chu a ti bo va, a ngam a. a tithianghlim a; chutichuan Ropuina Lal luhtlakin a lo fai thin a ni tih entirna a ni e," a ti a. (Joh. I5:3; Eph. 5:26 T.T. I5:9; Rom I6:25:26; Joh. I5:I3)
Comments