Kristiana Vanram Kawngzawh-13

BUNG 13 

Chutichuan ka mumangah chuan Kristiana chu a thian tha tak takte chuan chhang leh grep tui saidawium khat nen; grep ro bawr khat nen an pe a, tin, an kalsan ta a. Nimahsela Zahna Kawna kal chu Kristian tan chuan a harsa em em mai a. 

Thui lo te a va kal a, ramhuai bawlhhlawh tak amah tawk tura lo kal a hmu a, a hming chu Setana a ni. 

Chu chu Kristiana chuan a hlau tan ta deuh va, a rilruin, "Kir leh tur nge ni ang, kal zel tur aw" tiin a inhnial ta deuh va. Nimahsela a han ngaihtuah a, a hnungzang lamah chuan thlrkawr a ha lo tih a inhre chhuak a. Chuti chuan a hnung lam a chhawn hlauh chuan Setana chuan a thalin a rawn kap fuh hlauh mai ang tih a hlau ta a. Tin, a intihuai a, a awmna hmunah chuan a lo awm reng a, Setana chuan a rawn tawk ta a. 

Chu mi mak tak chu a hlauhawm hle mai. Sangha angin phuhlip a nei a, chungte chu amah timawitu an ni a. Dragon angin thla a nei a, a ke chu savawm ke ang a ni a, a pum atang chuan meialh leh meikhu a lo chhuak a. Tin, a ka chu sakeibaknei ka ang a ni. 

Kristiana hnen a lo thlen chuan chapo hmel tak mai hian amah chu a han en a, hetiang hian thu a han zawt a. "Khawiatanga lo kal nge i nih, khawiahnge i kal dawn?" a han ti a. Kristiana chuan, "Boralna khua atanga lo kal ka ni a, chu chu sual bawlhhlawh hlir awmna a ni; tin, Zion khawpulah ka kal dawn a ni," a ti a. 

Setana chuan, "I thusawiah chuan ka khua leh tuia mi zu ni chia le. Chu khua chu ka ta vek a ni alawm; An lal leh an pathian ka ni. Engtizia nge ni i lal k tlanbosan? Ka rawng i la bawl that leh deuh beisei lo ila chu ka han vaw thlu der mai tur che a." a ti a. 

Kristiana chuan, "I ramah zawng ka piang tak a, nimahsela i hna a khirh lutuk a, hlawh lah chu mihring han khawsak theihna zia a ni si lo. 'Sual hlawh Chu thihna a ni si a.' (Rom 6:23) Chuvangin ka lo upat deuh hnu hlan mi thil ngaihtuah miten an ngaihtuah ang bawkin ka ngaihtuah a, ka insiam tha thei mahna ka ti deuh a ni," a ti a. 

Setana chuan, "Lal, chuti lawk maia khua leh tui chan an awm ngai lo. Kei pawhin chuti lawkin ka chan rih mai bik lovang che. Chutiang hnathawh leh hlawh thu I sawi chu zawng, lo kir leh phawt mai ‘langin, ka rama miin an pek ang apiang chu pe tur chein tunah hian ka tiam a che," a ti a. 

Kristiana chuan, "Lal fapate Lal ber hnenah chuan ka inpe tawh si a. I rama kir lehte chu engti duhin nge ka duh tawh ang?" a ti a. 

Setana chuan, "A tha zawkin a tha lo zawk chu thleng rawh," tih thufing ang khan i awm a nih chu; mi tam tak a hnenah chuan an kal thin a, mahse reilo teah ka hnenah bawk an lo kir leh thin a ni. Nang pawh chutiang chuan ti ve la a tha ve mai ang," a ti a. 

Kristiana chuan, "A mah chu ka ring tlat tawh si a, ka kirsan leh mai chuan mi mantirtu aiin awhhlum tir tur ka ni dawn lawm ni?' a ti a. 

"Ka chungah pawh chutiang bawk chuan I ti a; nimahsela I lokir leh phawt chuan chung zawng zawng chu ka theihnghilh vek mai ang," Setana chuan a ti a. 

Kristiana chuan, "Chung chu ka at laiin ka lo tiam ta mai che a ni a, tuna a rawng ka bawl ka Lalpa chuan I chunga thil ka lo tih tawh zawng zawng chu min ngaidam vek thei a ni. Chu lo rengah pawh, nang tiboraltu Setan, ani rawngbawl te, a chhiahhlawh nih te, a mi nih te, a hlawhte chu nanga ta ai chuan ka duh zawk em em a ni. Chuvangin tunah chuan min thlem tawh suh, a chhiahhlawh ka ni, amah chu ka zui dawn a ni," a ti a. 

Tin, Setana chuan, "Nakinah I rilru a fim deuh hunin kalkawngah eng engnge I tawh dawn la ngaihtuah ang che. A chhiahhlawh tam takte ka thu leh ka dan an duh loh avangin hrehawm takin an awm tih I hria a ni. Mi engzat nge ni zahthlak taka an tihhlum tawh? A rawngbawl chu ka rawngbawl aiin a tha zawk I ti a, nimahsela a awmna ata chu a mite chhanhim turin a lo chhuk ngai hauh lo a ni. Khawvel mi zawng zawngin an hre huai a ni. Nang pawh ka chhanhim ang che," a ti ta a. 

Kristiana chuan, "A tawp thlengin amah chu an hmangaihin a hnenah an tang ngam dawn emaw tih hriat nan a mite chhan turin a Iam thuai lo a ni. Tin, Chung hrehawmna I tihte chu anni chuan ropuina berah an ngai a ni. Tunah chuan chhanhimna chu lo hmuhlawk an beisei lo. An ropuina chu an la nghak rih a ni. Chu chu nakinah an Lalpa chu a vantirhkohte nena ropui taka a lo kal hunin an la chang ang," a ti a. 

"Tun apangin a rawngbawlah chuan i rinawm si lo va, engtinnge a hna a hlawh hmuhte chu i beisei theih?" Setana chuan a ti a. Kristiana chuan, "Setan. khawiahnge ka rinawm lohna?" a ti a. 

Setana chuan, "I chhuahtirh laia lungngaihna hmunaal awm lal khan l beldawng a. l Lalpan I phur a tihbo nan i awm rih tur kha kawng ni lo lamah chuan I pensan a, tha lo takin i muhil a, chutah chuan i lawmna thil chu I hloh va, tin, kawnga in thu khawchang sawi lai khan pawn lam thu thiltih leh i thu sawiah chuan l duh tih a lang bawk a ni." a ti a. 

Kristiana chuan, "Heng zawng zawng hi a dik teh meuh mai, tam tak l la sawihmaih zawk mah a ni; nimahsela Lalpa a rawng ka bawl-a chu zahngai thei tak leh mi ngaidam thei tak ani. Chung sualna zawng zawngte chu I rama ka awm laiin ka nei a, chu mi avang chuan lungngaiin ka rum thin a, tunah chuan chung thuah chuan ngaihdamna ka Lalpa hnen ata ka hmu tawh a ni." a ti a. 

Tin, Setana chu nasa takin a lo thinur ta a, "Chu Lal chu a mite leh a dan hi ka hua a ni. Chuvang chuan a dodal tur chein ka lokal a ni," a ti a. 

Kristiana chuan, "Setan, I thiltih hi ngaihtuah rawh. Lalpa kawng thianghlima awm ka nih hi, nangma chungah fimkhur rawh," a ti a. 

Tin, Setana chuan, "He mi thuah hian engmah ka hlau tawp lo mai. Thi turin in buatsaih mai rawh khai. Hetah hian ka tihlum ang che," a ti a. Chutichuan a awmah meialh thalin a kap ta vak mai a. 

Nimahsela Kristiana chuan phaw a nei a, a phaw chuan a lo dang hman hlauh va, a Inveng thei ta a. Chuti chuan Kristiana chu a thin a rim a, a ngunhnam a phawi a; Setana chuan a lu-ah leh a kut leh a keah a hliam a. Chuti chuan Kristiana chu a hnungtawlhtir hlek a: Setana chuan a han kap leh thuai thuai a. Tin, Kristiana chu a intipachang a, nasa takin a han bei vak a, chawhma lai an Inbei a, Kristiana chu a hah der mai a, a hliam khan a tichau hle bawk ang tih a rinawm a ni. Tin, Setana chuan remchang a hmuh veleh chuan Kristiana chu a hnaih a, a pawm a, a keuh ta chiam mai a: Tin, Kristiana chuan a kawlhnam ken chu a thlauh ta a. 

Tin, Setana chuan, “Tunah zet chuan ka ngam ta che a ni," a ti a. Kristiana chu a tihlum lek lek mai a, ani pawhin nun reng a inring tawh lo hial a. 

Nimahsela Pathian thiltih Kristiana chungah a lo lang ta a. Setana’n vuakhlum der tuma a tiang a han lek lai tak chuan, "Ka hmelma pa, ka chungah lawm suh. Tlu mah ila ka tho leh ang,” (Mlk. 7:8) tichungin Setana chu a chhun vak a, chu chuan a tawlh kirtir hlek a. Kristiana’n chu chu a hmuh chuan, "Heng thil zawng zawngah hian min hmangaihtu azarah chuan hnehtu aiin kan ropui zawk" (Rom 8:37) a ti a. A han chhun leh a, chu veleh chuan Setana chuan a thla a zar a. a thlawk bo ta daih a. Kristiana chuan a hmu leh ta lo va. (Jakoba 4:7) 

Chu mi an Inbei lai ka hmuhleh ka hriat anga hre ve lo chuan Setana au leh rum nasatzia chu an suangtuah thiam lovang. Kristiana rilru pawh nasa takin a rum thin a ni. A kawlhnam hriam tawnin Setana chu a hliam tih a hriat hma loh chuan lawm hmel reng a pu hauh lo mai a. A han hmuh hnuah erawh chuan a lawm a, a nui ta a. Insual ka hmuh zawng zawngah chuan a la nasa ber mai ka ti! 

Chutichuan an Insual zawh hnu chuan Kristian chuan "Sakeibaknei leh Setana laka min chhandamtu hnenah chuan ka lawmthu ka sawi ang," tiin heti hian a sawi ta a. 

"Setanan ka chhiatna zawngin, 

Nasa takin min bei a; 

Mahse min tanpuitu avangin, 

Keiin ka hnawt bo thei; 

I hming thianghlim fakin awm rawh se, 

Chatuanin ropui rawh se." tiin. 

Tin, chung zawhah chuan tuemaw hian nunna thinghnah a rawn pe a. Chu chu a la a, a hliamahte chuan a hnawih a. rang takin a dam leh ta mai a. Tin, chhang leh uain an pek kha a ei a. Tin, a lo harh a, a harh hnu chuan, "Hmelma dang an la awm leh mahna,” tiin a kawlhnam keng reng chungin a kal leh ta a. Nimahsela chu mi kawnah chuan Setana lo chu hmelma dang tumah a tawk ta lo.