Kristiana Vanram Kawngzawh - Bung 1-na

KRISTIAN VAN RAM KAWNG ZAWH THU 

BUNG 1 

Hemi khawvela ka vah ka vah laiin khawii hmun emaw puk awmna ka va thleng a, chutah chuan ka han muhil a; tin, chuta ka muthilh lai chuan mumang ka lo nei ta a. Ka mumangah chuan Mi pakhat puan chhe tak sina a in lam chu hawisan renga dingin ka hmu a. Chu mi chuan lehkhabu pakhat hi a keng a, a hnungzangah chuan phurrit tak hi a phur bawk a. (Isaia 64:6; Lk. 14:33. Sam 38:4), Tin, ka en reng a. A lehkhabu chu a keu va, a han chhiar a; tin, a han chhiar chuan a tap a, a khur a. Chutichuan a ngawi hle hle thei ta lo va. "Engtinnge ka tih tak ang?" tiin lungngai takin a tap ta chiam mai a. (T.T.2:37; 16:30; Habakuka 1:2,3)’, 

Chutichuan lungngai takin a in lamah a haw leh ta a. A lungngaihna chu a nupui leh fate hriat theih loh nan a inthup hram hram a. Nimahsela, a lungngaihna chu a lo nasat deuh deuh avangin a inthup rei thei ta lo va, chutichuan a nupui leh a fate hnenah chuan, "Aw, ka nupui leh ka fa duh tak te u. Kei, in Mi duh tak hlan phur rit tak ka phur a. chu Mi avang chuan ka boral dawn a ni. Chu lo rengah pawh he mi kan khua hi van atangin meiin a rawn kang chhe vek ang tih miin min hrilh a. Chu mi hlauhawm tak chuan nangni ka fa duh tak te, ka nupui nen; keimah chawp hlan Min tiboral vek ang, a pumpelhna kan hmuha kan him theih mial nghal loh chuan," a ti a. 

Chutichuan, a laichinte chu an mangang a; chung a thu sawite chu a dik ang tih an rin vanga mangang zawng an ni lo va, thil tha lo engemaw a zawl a ni ang tih an rin avanga mangang an ni zawk a. 

Khuate pawh a lo thim dawn tawh a, chutichuan muhil sela a reh deuh ang e, tih an rin avangin an muttir ta thuai a. Nimahsela, zanah pawh chuan chhun ang bawkin a lungngai a, muthilh ahnekin lungngai rum leh khurin a tap zankhua zawk a.

Khua a lo var chuan eng angin nge a awm tih an zawt a, ani chuan a zual deuh deuh zawk tih a hrilh a. Tin, an hnenah chuan a lungngaihna thute chu a sawi leh a, nimahsela an rilru an tikhauh ta tlat a. Tin, anni chuan tihnawmnah leh vauin a reh theih an ring a, chutichuan achangin an nuihsan a, a changin an zilh a, a changin an thlahthlam thin a. Chutichuan an tan tawngtai sak tur leh a lungngaihna tireh tura dil turin ama pindanahte a kal thin a. Amah chauh tein phulah a leng thin a; achangin a lehkhabute a chhiar a, achangin a tawngtai a; chutiang chuan ni engemaw zat lai chu a awm a. 

Chutia phula a kal a, a lehkhabu a chhiar lai chuan a rilru a lo mangang ta em em mai a. Hmana a tih ang bawk khan "Chhandama ka awm theih nan engtinnge ka tih ang?" (T.T. 16:30,31) tiin a au leh ta chiam a. Tin, tlan tur ni awm takin a hawl vel ruai mai a, nimahsela khawi lama tlan tur nge tih a hriat loh avangin a ding reng a. 

Chutichuan ka en reng a, mi pakhat a hming Pathianthuhriltua a hnenah chuan a lo kal a. "Engvangin nge i tah?" a ti a. Tin, ani chuan, "Ka pu, ka lehkhabu kenah hian thi tura ruat ka nih leh chu mi hnua rorelna a kal tur ka nih ka inhria a, (Heb 9:27, Ezek. 22:14) Tin, thihte chu ka ngam si lova, (Job. 19:21,22) rorel saka awm pawh chu ka zuam bawk hek lo", a ti a. Tin, Pathianthuhriltua chuan, "Engahnge thih i duh loh? He khawvelah hian sual a tam vei nen?" a ti a. Tin, ani chuan, "Ka phurrit phurh hian leilawtah min pilpulin ang tih ka hlauh vang a ni; (Isa. 30:33) Tin, thih chu ka ngam si loh chuan rorelna a kal pawh chu ka ngam chuang si lo. Chuta ka kal chuan hrem ka ni ngei dawn si a. Chung ang chu ka ngaihtuahin ka tah a chhuak a, ka tap thin a ni," a ti a. 

Tin, Pathianthuhriltua chuan, ”Chutiang chu i awm dan a nih si chuan engatinge hetia i din reng mai?" a ti  a. Ani chuan, "Kalna tur chuang hre hek lo I," a ti a. Tin, Pathianthuhriltua chuan lehkhabu a pe a, chutah chuan, "Thinur lo thleng tur chu tlansan rawh u." (Mat. 3:7) tih ziak hi a lo chuang a. Chu chu a han chhiar chuan Pathianthuhriltua chu ngun takin a en a. "Khawiah nge ka tlansan ang." tiin a zawt a. Tin, ani chuan phul zau tak lam a kawhhmuh a. "Saw ta kawngkhar saw i hmu em?" (Mat. 7:l3,14) a ti a. Ani chuan, "Hmu lo." a ti  a. "Anih leh sawta eng saw i hmu em?" (Sam 1 10:105: 2. Pet. 1:19) a ti  leh a. Ani chuan, "Ka hmu awm e." a ti a. Chutichuan Pathianthuhriltua chuan,  "Sawta eng saw ngun taka enin pan ta la, kawngkhar i va hmu ang a, chu chu han kik la, i tih tur chu an lo hrilh ang che," a ti  a. 

Chuti chuan ka mumangah chuan chu mi chu tlan ta chiam hian ka hmu a. A in atanga hla mang lo a thlen chuan a nupui leh a faten an lo hria a, kir leh turin an au chiam thin a; mahsela ani chuan a beng a hup a, “Nunna. Nunna, chatuana nunna" (LK. 14:26) tichungin a tlan ta zel a. Chutichuan hnunglam hawi duh hauh lovin (Gen. 19:14) a kal tumna lam chu panin a tlan ta  zawk a.