Kristiana Vanram Kawngzawh Thu-14

BUNG 14

Kristiana awmna tawpah chuan kawn dang pakhat Thihna Luikawr a awm a. Chu mi chu van ram kalkawng chuan a tan tlang riah si a: chuvangin Kristian chuan a kaltlang ngei ngei turr a ni. Chu mi hmun chu hmun reh tak a ni a. Zawlnei Jeremian hetlangin a hrilhfiah a ni. Thlaler ram ro tak, khuarkhurumte leh thihna hlim awmna, Kristiante chauh lo chu tuma kal lohna a ni," (Jer- 2:6) a ti a. Chu mi hmuna a awm chu Setana nena an inbeihna ai khan a tha lo zawk mah tih in la hria ang. 

Chutichuan ka mumangah chuan Kristiana chuan Thihna Luikawr kam chu a va thleng a, chutah chuan mi pahnih a va tawk a. Chu mite chuan ram tha chanchin chu lolam takin an rawn sawi a, (Num. 13:32) hmanhmawh takin an lo kal a. 

Kristian chuan, "Khawiah nge in kal dawn?" a lo ti a. Anni chuan, "Kan kir leh dawn. Nunna leh thlamuanna I duh anih chuan nang pawh kir leh ve mai rawh khai," an ti a. Kristiana chuan, "Engah maw? Engtizia nge ni ta?" a ti a. "Engtizia nge ni ang! I kalna turah hian nangmah ang bawkin keini pawh kan kal a, kan ngam chin kan kal a, kan lokir leh thei lo thelh a ni. Thui deuh phei chu kal ila chanchin rawn thlen tur pawh kan awm lo vang chu," an ti a. 

Kristiana chuan, "Anih leh engnge maw in hmuh le?" a ti a. "Kan hmuh chu maw? Thihna Luikawr chu kan lut thelh thelh tawh a, kan hma lam ngun takin kan han en a, a thim khup mai a. (Sam 44:19; 107:10) Chutah chuan phung te, dragon-te an awm noh noh mai a, chung lo pawh chu hlauhawm dang tam tak kan hmu a ni. Tin, mihring mangang lungngai tak rum anga rum pawh kan hre bawk a ni. Tin, mi thir khaidiat buna lungngai taka thu rengte pawh kan hmu bawk a; chu mi kawr chungah chuan lungngaihna chhum a zing mup mai a. Tin, thihna pawhin chu mi chungah chuan thla a zar chamchi mai a, a hlauhawmzia chu sawi thiam theih pawh a ni lo ve," (Job. 3:5; I0:22) an ti a. Kristiana chuan, "In thu sawiah chuan he mi kawng hi ka kal duhna kawng a la ni lo chuang lo ve," (Sam 44: 18, 19, Jer. 2:6) a ti a. Anni chuan, "I duh leh kal zel rawh, keini zawng kan duh lo a ni," an ti a. 

Chuti chuan an inthen ta a; Kristiana chuan a kawng chu a zawh ta zel a, kawlhnam pawh chu a la keng reng zel a. Kawngah chuan hlauhawm engemaw tawh chu a inring tlat a. 

Tin, ka mumangah chuan chu mi kawn chu a va thleng a. Chu mi kawr kam ding lam pangah chuan khuarkhurum thuk tak, mitdelin mitdel vek a hruaia an tlak a, an pahniha an boral takna chu a awm zui mai a. Tin, vei lam pangah chuan chirhdup hmun nasa pui hi a awm a, chutah chuan mi tha tak pawh tla sela ke han nghah derna eih pawh hmun a awm chuang lo. Chutah chuan vawi khat pawh Lal Davida a tla a, Pathianin amah chu tichhuak lo sela chu a thi ngei tur a ni. (Sam 64: 14) 

Chuta kawng awm chu a zim em em bawk a, chuvangin Kristiana tan chuan kal a har hle mai. Khuarkhurum kalsanin lehlam pang chu han pan thin mah selangin chu mi chirhdupah chuan tlak mai a hlau si, chirhdup kalsan a tum lah chuan khuarkhurumah chuan a tla dawn bawk si. 

Chutiang chuan a kal zel a, nasa taka a rumte pawh ka hre bawk thin a. Khing hlauhawm ka sawi chang pawh khi ni lovin, chu mi hmun chu a thim em em mai a. Kristiana chuan a ke a han khai apiang chuan khawia nghah tur nge tih leh eng chunga nghah tur nge tih reng reng a hre thei lo a ni. 

Tin, chu mi kawr lai takah chuan hremhmun kotlang pawh awmin ka hmu a, chu chu kawng bul takah a awm a. 

Chu chu a hmuh chuan, Kristiana chuan, "Engtinnge ka tih ang aw?" tiin a inngaihtuah a. Chu miah chuan Setana a beihna a kawlhnam a chhawr ang khan chhawr theih a ni ta si lo. 

Chutichuan a kawlhnam chu a dah a, hriamhrei dangin a inthuam ta a. Chu hriamhrei chu tawngtaina a ni (Ephe. 6:I8) "Aw Lalpa, nangin ka thlarau chhanchhuak ang che," (Sam 116:4) tiin a au va. 

Chutiang chuan reife a ti a, nimahsela meialh chuan a la hliau pha dawn ta fo mai a; tin, thawm hlauhawm tak a hre bawk a, chutichuan pawh sawm vek a, tuallai chirhdiak ang maia awm a hlau va. Chutiang hlauhawm takte chu a hmu a, thawm hlauhawm tak tak a hre bawk a, chutiang chuan thui fe a kal a. 

Nakin deuhvah chuan hmun pakhat a va thleng a, chutah chuan ramhuaiho aw ni awm tak hi ava hre ta a. Engtia tih nge tha ang tih ngaihtuahin a ding a. A chang chuan kir leh te a han rilruk ut ut thin a, a chang chuan chu mi kawn chu kalchhuak dawn tawhin a inhre thin a. Hlauhawm tam tak a tawn tlang takte kha a hrereng a, chungte chu a kirleh chuan a va tawh ngei tur a ni tih a hre si a; tichuan a hnu lamah chuan hlauhawm tam zawka a rin avangin a hma lamah chuan kal zel a tum ta a. 

Nimahsela ramhuaiho kha lo hnai deuh deuh zelin a hria a. Chu veleh chuan, "Lalpa Pathian thahruiin ka kal zel ang," tiin ring takin a au vak a; chuti chuan an tawlhkir a, an lo hnai leh ta chuang lo va. 

Thil pakhat ka hmaih hauh loh tur a awm; Kristiana chu a lungngai em em a, ama aw leh aw lo pawh a hre tawh lo va. Meialh lo chhuahna hmun ava thlen veleh chuan ramhuai pakhatin a zui a, zawitein Kristiana hnenah chuan ama rilrua chhuak reng ni awm takin Pathian hming a rawn sawichhia a. 

Chutichuan Kristiana chu a hmaa a thil hmuh dang zawng zawngte ai chuan Pathian a hmangaih em em thin han sawichhiatna chuan a tilungngai ber ta a. Hre lovin awm thei sela chu hre lova awm a duh a, nimahsela hre thei lo tura han tih dan tur leh Pathian sawichhiatna chu khawia lo chhuak nge a nih a hre thei si lo va. 

Tin, Kristiana chu chutianga lungngai taka rei fe a awm hnu chuan a hma lamah chuan mi kal a, 'Thihna Hlimkawr ruam zawh mah ila, thil thalo reng reng ka hlau lo vang, nang ka hnenah I awm si a," (Sam 23:4) tia au aw a hria a. Chuti chuan a lawm ta a, a lawmna chu heng vang hi a ni. 

Pakhatna chu, chu mi kawrah chuan amah ang bawka Pathian tih mi an awm ve bawk avang a ni. 

Pahnihna chu, hmun thim tak leh hrehawm tak ni mah sela, an hnenah chuan Pathian a awm tih a hria a. Ani chuan a rilruin, "He hmunah hian mi tihnungtawlhtu tam mah sela, engahnge ka hnenah Pathian a awm loh bik ang?" tih rilru a lo pu ta a ni. (Joh. 9:11) 

Tin, a pathumna chu, anmahni umphak a, pawl theih a inrin vang a ni. 

Chutichuan Kristiana chu a kal zel a. A hma lama mi chu a han au va: nimahsela chu mi chuan amah chauhva awm bawkah a inruat avangin chhan ngaihna reng reng a hre lo va. Tin, nakinah chuan khua a lo var ta a. 

Tin, Kristian chuan, "Ani chuan thihna hlim chu zingah a chantir ta," a ti a. (Amosa 5:8) 

Tin, zing chu a lo ni a. Hnung lam chu a han hawi a, nimahsela kir leh duha hawi a ni lo va, hlauhawm tak tak thim zinga a pelhte chu chhun engah hmuh a duh vang a ni zawk a. 

Chutichuan kawngsira khuarkhurum leh a lehlam panga chirhdiak hmun chu fiah takin a hmu a, a inkar zimzia te pawh chu a hmu vek a. Tin, phungte leh rulte pawh kha a hmu vek a, nimahsela hla takah an awm vek a, khawvar hnu chuan a hnaihah an kal lo va. Nimahsela anmahni chu a hmu thei vek a. "Thima thil harsate chu a hmu chhuak a, thihna hlim chu a tieng," (Job. I2:22) tih ziak angin. 

Kristiana chuan hlauhawm tam tak ata chhanchhuaha a awmzia chu nasa takin a ngaihtuah a. Hlauhawm, a hmaa a hlauh em emte kha engah chuan a hmu fiah lehzual zawk a. Tin, chutih lai tak chuan ni a lo chhuak leh a, chu chu Kristiana chunga khawngaihna lo thleng pakhat chu a ni. 

Thihna Luikawr tantirhna chu hlauhawm hle mah se tuna a kal lehna tur pawh hi a hlauhawm lehzual a ni. Tuna a dinna hi kawr tawp lam deuh ni mah sela a kalna turah chuan kawng tluanin thangte a inkam a, lente a inzar a. Khuarkhurum tam tak a awm a, khamte a awm bawk a. Tunah hian a hmasaa a kalna ang bawk khan thim chu nasa sela chu Thlarau sang tam tak pawh nei sela boral reng reng tur hi a ni a; nimahsela ka sawi tawh ang khan ni chu a lo chhuak ta a. Chutichuan ani chuan, "A khawvar chuan a lu chung a en a, Amah nen chuan thim ka su tlang." (Joh. 2(:3) a ti a. Chu mi engah chuan kawr tawp chu a thleng ta a.