BUNG 8
Tin, ka mumangah chuan Kristiana kalna tur kawng chu a sir tawn hian bang lo awm zui mai hian ka hmu a. Chu mi bang chu a hmingah Chhandamna an vuah a. (Isaia 26: I) Chu mi kawng chhovah chuan Kristiana chu a phurrit phur chung chuan a tlan vak mai a. Chutichuan Kristiana chu hmun chho tak a thlen hma loh chuan a tlan zel a. Chu mi hmunah chuan Kraws hi a awm a, a hnuai deuhvah chuan thlan a awm a.
Chutichuan ka mumangah chuan Kristiana’n kraws kiang a thlen veleh chuan a phurrit chu a tla ta a. Thlan a thlen hma loh chuan a lum zel a, thlanah chuan a lum lut a, chuta chin chu ka hmu leh ta reng reng lo.
Chutichuan Kristiana chuan lawm tak leh rilru hlim takin, "A lungngaihnain chawlhna min pe a, a thihnain nunna min pe,” a ti a. Tin, mak tiin reife chutah chuan a ding a; chutia kraws a hmuh mai avanga a phurrit a lum bo ta mai chu mak a ti em em mai a. Tin, kraws chu a en reng a, a tawpah phei chuan a mittuite pawh a tla ta hial mai a. (Zach. I2:I0) Tin, chutia mittui tla chunga a din reng lai chuan mi pathum eng zet zet hi an lo kal a. "I chungah thlamuanna thleng rawh se,” tiin chibai an rawn buk a. Tin, pakhat chuan, ” I sualnate ngaihdamin awm rawh se.” (Mk. 2:5) a ti a. Midang chuan a puan chhia chu a hlihsak a, puan dang a sintir a. (Zach. 3:4) Tin, pathumna chuan a chalah a chhinchhiah a. (Ephe. I:I3). Tin, lehkhabu chhinchhiahna awm a pe a, chu chu a kal paha a en tur leh kawngkhara mite a pek atan a pe bawk a; tin, an kal leh ta a. Chutichuan Kristiana chu a lawm avangin vawi thum a zuang a. Tin, hla sa chungin a kal ta a.
”Ka sual rit tak chu phur chungin,
He hmun hi ka lo thleng;
Bo lovin a awm reng.
He hmun ka thlen hma hi chuan.
Sual hrui min phuartu zawng zawng hi.
Tunah ka phur a bo ta hi.
Malsawmna hlu a ni.
A lo chat vek ta, tih hla hi a sa a
Comments