LA VIE: HMANGAIHNA RAPTHLAK!

LA VIE: HMANGAIHNA RAPTHLAK!

~Familia Fanai Lalṭansanga

Khawvelah hian thu leh hla ţha leh ril, lemziak  leh rimawi lam thil hlu,,rangkachak ang, tuiek,sűlrűl leh hun-in a eichhiat theih loh tam tak a awm . Chutiang tam tak karah chuan mite thinlunga  nung reng ṭhin erawh tlemtê chauh a ni.

Lemziak khawvel-ah pawh lemziak ṭha leh hmingthang tam tak a awm ngei a.  Chutiang karah chuan  kum zabi 20-na lemziak thiam ropui ber, Pablo Picasso (1881–1973) kutchhuak 20,000 chuang zingah “La Vie” erawh hi chuan ngaihtuah a tithuiin hriat reng leh chhinchhiah reng a hlawh a. A entu rilru-ah an piana hnu lama an thil ngaihtuah ngai miah loh thil tam tak a ngaihtuah chhuahtir thei (inspiring, /ɪnˈspʌɪərɪŋ/) tlat thung a ni . A lemziak hming hi a French ṭawngin ‘La Vie’ an ti a, a Sap hming chuan ‘Mysteries of Life’ kan ti  ve mai ang a, a Mizo ṭawng chuan ‘Hmangaihna Rapthlak’ kan han ti mai a ni ang chu. 

Mizo ṭawng upa-ah chuan ‘sial rângin sial râng a hring, sakâwlin sakâwl’ an lo ti mathlawn lovin Spain ram Mailaga khua lemziak zirtirtu, Catalan hnam pa pakhat  chuan fapa a nei a,  A hming chu Pablo Picasso a ni a. Chu naupang chu a saisen tet aṭangin a pa dung thulin lemziak lama a chemkalzia chu a nu leh a pa chuan an hmuchhuak ta thuai a, lemziak zirna hmun  Barcelona leh Madrid khawpui-ah te an sei lentir ta a. A naupan lai aṭanga a lemziak zirpui, a ṭhian bulfuk pakhat, kawm ngeih bik riau  a nei bawk a .  Chu a ṭhianpa hming chu Carlos Casagemas a ni.

Tichuan he Catalan rawlthar lungmawl pahnih hian Spain rama  lemziak finthiamna khawpkham lovin khawvel ram zau zawkah thiamna ril zawk  zir tur leh hai chhuak turin an feh chhuak ta. Thiamna ril zawka an tuihalna avang chuan sum leh pai rohlu eng mah nei lo, kut ruak tak meuh meuhvin  France ram khawpui, Paris-ah an invawm lut ve ta rawih mai a. Lemziak khawvelah an liluh ta a. Chhuanchhâm chang an ngah. Mei alh en chang a awm.

Chutih mek lai chuan ṭhianpa Castro chu Paris lanu tleitir sakhmelṭha, Germaine zûnah a uai ta tlat mai le! Ṭuan zai reng a rêl thei mawlhlo! Hmangaihna zûn hian  hrualhrui iangin mi a lo va han  phuar nghet thei ngai the lul em! Chhan let loh hmangaihna, hmangnaihna khingbai zet hi zawng a nâ a ni . Ṭhianpa Picasso chawmhlawmin a awm teh tawl a. Paris khawpuia khawsa reng thei pawh an ni ta lo va,  rawlthar lungmawl pahnih chu an puanthuah telin an khua Malaga-ah  kut beng bawkin  lamang an let leh ta. An retheih barkberhzia leh an ṭâwp, an bâlh, an pâwrzia chuan an chhungte a barakhaih nasa hle mai. Picasso chuan a ṭhianpa chu a ngai thei ta bik lova, a awm hransan ta a.

.

Chhuihthangval Castro lungleng lutuk awm ngaihna hre lo chuan a chhailaidi tual lenna, Paris khawpui-ah lam ang a let leh ta poh va. A hmangaih si, a dam chhan a luah loh lung di, Germaine chu Café-a a ṭhutpui lai chuan, mi beidawng, fam dairial chan nûam ta zawk, a riang val Castro chuan a pistol a phawi ta lawk a, a chhai lai di Germaine chu a kap ta thawi mai a. Ani a lo bu zeuh hman a, mangang thlabarin  dawhkan hnuaiah a biling a balangin a tlu sawp nghai ṭhuai. Chutah le! A changtupa chuan a silai chu a a chalpadar-ah tak  a chuktuah. A cheng a hmet. A puak ta……………. Dur!

Chu zan, zan chhinchhiahtlak loh, chhinchhiah loh theih bawk si loh zan-a, (to be precise; on the 17th Feb 1901) Paris khawpui laili-a,mipui zi mur mur kara  hmangaihna avanga sipai puak ri thangkhawk leh  chhan let loh hmangaihna, hma-ngaihna rapthlak tak  avanga  a ţhian kawm ngeih ber maiin a nunna a lak tak mai  thu, chanchin lunghchiathlak tak mai  leh  thu thin ṭhawng zet maiin  Picasso  a han barakhiah zet mai chu!..... “Keimah vang a ni, ka thiam lo a ni, ka ṭhianpa nun beidawng ka lo hnuchhawn kha ka thiam lo a ni!” a rilru-in a ti mawlh mawlh mai a, a inthiam thei thlawt lo. A lainat ngawih ngawih a, a khawngaih bawk si! Se bo hnua se kawng khar–in awmzia a nei law. Phengphehlepa khua a tlai zo ta. 

Picasso tan Ni leh Thla a lo thim zo ta! A thinlung, a ngaihtuahna zawng zawng leh a suangtuahna zawng zawngah chuan Hmangaihna kal sual lo rapthlak theihzia mawlh mai chu a inthumrawn tlut tlut ta mai a. Hringnun khawvela lungngaihna, nguina, manganna, sahalna, ṭahna, nun kawrawng, nun beidawng - heng thil ṭha lo leh thil duhawm lo, kan nun chhuahpui leh kan nun chhuahpui kher loh hringnun chhungril (the realm of  human mind) ah hian Hmangaihna hian bu a lo va khuar nasa-in mi a lo va ching rethei zozai tak em!

Hringfate mittui titla-tu, lusun chhungte khaw-hartirtu, lanu valrual tam tak thinlai tihnîmtu, suihlunglen avanga hmangaihna biathu hla mawi tin reng Sihtui ianga  hringfate lungruka  rawn hnamtirtu! Aw Hmangaihna! I lo va han rapthlak the lul em? Awmlai ai pawh hian! 

Picasso chuan a ṭhianpa ber, a rilru mangan baihvaih ber laia a hnuchhawn tak avanga Rih sang mual  liama fam dai rial a chang ta mai chu a hre thiam thei lo va, a tuar thiam thei mawlh lo. 

A tan khawvel hi a letlingin a khaikhup hlauh hian  a hria a. Chu a thinlung chhungril bera lungngaihna runthlak tawpkhawk  aṭanga lo rih chhuak , a  lungngaihzia leh a tuarzia (feeling & emotion) chu  ngawih bo pui ta lo chuan a rawng leh a lemziakna hmanrua a la a, a ṭhianpa sûn nan lem a ziak ṭan ta a. Lungngaihna chhumpui kara leng a ni bawk a, a thinlungah rawng dang reng a lang lo; lungngaihna lantir theitu rawng pawl (blue colour)  chauh lo chu! Tichuan, eng nge lo thleng ta?  Khawvel History lo ni ta, “The Blue Period of Pablo Picasso Painting” an tih chu a lo piang ta!

He ‘La Vie’ lemziak hi ngun takin han thlek la, a langsar mi 3 dingte mitmengah hian eng nge i hmuh?

Mipa  hi tu dang ni lovin  Hmangaihna rapthlak tak avanga mahni intihlum ta, Carlos Casagemas  hmel a ni a. Nu, nausen  pawm hian eng nge a ngaihtuaha i rin? Duhte’n hraileng awi  Chhûnu hian a enchim loh, a bûng dawn tuai, thing delh loh lung delh lova, ṭhang liana a lo puitlin theih dan tur  a hmangaih avanga  a ngaihtuah nasat turzia leh a rilru sen nasatzia tur i hmu thei em?

A hnunglama fiah lo rei ruai a ziak, hmeichhe vial ngawn ngawn te hian eng nge an lungkhama an eng helh  ang le? Hling hi hnahthel chunga a tlakin emaw hling chungah hnahthel a tlak pawhin a tuartu chu hnahthel? Hma-khawsang aṭangin hmeichhia lungmáwl te hi hmangaihna avanga a tuartu an lo ni chawk! A vanduai falte phei chu mahni taksa hralhin ei hmuh nan nawh chi an zuar!  Nawhchizuar, khawtlang entleute hi mahni farnute kan hmangaihna mit aṭanga kan en chuan an nun hi a va rapthlak em? 

Chu Hmangaihna rilru nen chuan Picasso kutchhuak Hmangaihna Rapthlakzia hi lo en ve la, lo temchhin la, i thinlung leh rilru ngaih-tuahna leh suangtuahna chhungril ber kawngkharpui kha hawngin  lo seng lut ve la, lo vei zui ve teh le!

Hmangaihna hi a ropui ber a, a nunrawng ber a, a lo rapthlak thei ber bawk a ni lo em ni?