Manipur Buaina leh BJP (Chhunzawmna)

 MANIPUR BUAINA LEH BJP (CHHUNZAWMNA) 

~Zairemthanga

Manipur buainaah hian mi challang tak tak an tawng chhuak tawh a, an dem ber chu Prime Minister Narendra Modi leh Manipur Chief Minister Biren Singh te an ni. India rama Muslim sakhaw zuitute zinga an hruaitute pawhin an dem hle a, 'PM berin a hmui a chip tlat hi thil mak a ni. A tuartu ber chu Kuki te an ni a, mi 50000 chuang zet an raltlan tawh a, chenna nei tawh lo pawh tam tak an awm tawh. Silai ni se, 6000 chuang zet ruk chhuah a ni tawh. Saruaka an kaltir hmeichhiate lah kha Police zawkin mipui kutah an dah a nia.! Chutah CM Biren Singh lah chuan Meitei chauh a ngaihtuah bawk si' an ti a ni. Thil nih dan dik tak an hmu chiang viau a nih hmel. 

Women and Child Development Minister Smriti Irani lah chu hmeichhia ni chung siin a reh vung vung a. Hman deuh khan ani hi a fanu chungchangah a buai nak tawh lehnghal. Power nei an ni bawk a, an fihlim chu a ni leh mai a. Hei vang tak hian Media leh eptu lamte chuan, 'i fanu chungchangah i chet chak vei vut vut nen, tun boruakah hian i ngawi thei hle mai. Hmeichhia ni ve tlak pawh i ni lo. Thi rawh' an ti siah siah mai a ni. Eptu lam an nih lai khan henu hian gas bur nen boruak a siam chiam tawh a, tunah an sawrkarah gas man a pung thur thur si a, mi tam takin gas bur nena che chhuak leh turin an ngen a ni. Mahse, a che chhuakin a rinawm lem loh. 

Modi chungchangah hian sawi a tam hle a, chung zingah chuan Pulwama a CRPF mi 40 chuang zet thihna khan sawi a hlawh khawp mai. Khatih laia Lt. Governor Pu Satyapal chuan hetiang hian a sawi a. 'Khami tum khan CRPF te'n by road chuan a him lo si a, thlawhna pali tal min ngaihtuahsak thei ang em?' tiin an ngen a. Mahse, Modi hian a pe duh lo a. Tichuan, kawng lakah beih an tâwk ta ngei a, CRPF mi 40 chuang an thi a nih kha. Lt.Governor hian, 'PM hnenah pawh ka sawi a, Kan mualphona a ni hei hi chu. Kan thiam loh liau liau a ni ka ti a. Mahse, PM hian ngawi tlat turin min ti a ni' a ti a ni interview pakhatah chuan. Tak tak a nih chuan a rapthlak khawp mai. 

BJP leh Modi te hian an thil tum tih hlawhtlin an tumna lamah Manipur ah hian an dai pelh niin a lang a, an che sual dawn a ang khawp mai. Eptu party tan lah BJP beihna remchang lutuk a inher chhuak ti ila, kan sawi sual lo ang. Mahse, political issue a hnuh luh dan tawk an thiam em em. Helaia NDA leh NEDA pawh hre hrang loin boruak eng emaw hlek an lo ti kual ve mai mai ang hi an ni lo. 28th July hi han thleng sela, thil tam tak kan hriat belh mai thei. Apex Court in Manipur sawrkar hnena thil thlen dan kimchang hriattir tura hun a pek deadline a ni. 

Rahul Gandhi kha an hek a, MP atanga bantirin a chenna hmun atanga chhuahtir zui a ni a, ani chuan, 'dikna ka duh avanga a man pek a ngai a nih chuan ka pe zel ang. Pawi tihna ka nei lo. Dikna ka tan tlat ang' a ti a. BJP sawrkar chu theihpatawpa CBI leh ED nen an tangkawp chung pawhin State hrang hrangah Congress an vung chhoh phah a, CBI leh ED te chu BJP Ui tê angah an ngai fur ta mai a ni. (A tul danin la chhunzawm leh ila) 

Thu belh: Thlalaka mi khuan ngaihtuah a ti thui angreng. MNF te'n NDA leh NEDA, BJP kaihhruai hi thlawp tawh lo se kan duh hlawm. A bik takin Manipur boruak vang phei hi chuan. Chutih laiin kan CM thar ni mai tura kan ngaihin 'mai thei/lo mai thei' a ti ni ãwm taka tawngkam a nei hi chu a fuh lo khawp mai. 'Helai BJP te thlawh khûmin khulamah thianah kan siam daih dawn a ni' a tihna video kan hmu tawh bawk. Party rui chilhho chuan 'party dang pawhin an thawhpui ve tho' an ti tlat thung. Thil tha lo tih dawna 'ani pawh' tih hi chhuanlam tling a ni lo. 

Eng pawh ni se, mawng sawh dawp khawpa Congress kan paihna a la rei lo a, an tho kâng hlek ang em ka hre lo. MNF pawh Central lama BJP thawhpuitu an ni a, ZPM lam pawh sawrkar ta se, an thawhpui thut mai thei tho bawk a, i vote tur erawh i duhthlanna liau liau a ni e.

(Min chuk leh luai luai mai teh u) edited.