MIZO HMEICHHIA MOTOR KHALH THIAM HMASA BER K. THANSIAMI

MIZO HMEICHHIA MOTOR KHALH THIAM HMASA BER K. THANSIAMI (DURTLANG NURSE)

~Tedika Chawngthu

Mizoram chhunga hmeichhe motor khalh hmasa ber chu zosap Scottish mi Dr. Parul Robert (Pi Puii) a ni thung. 1955 hma lam in Jeep te pawh a lo khalh tawh a ni.

Pi Puii vek hian Durtlang hospital Welsh Mission Hospital a nih lai te pawh khan Mission veng ah clinic an nei thin a. Health dept a thawk staff te a phur in a lo khalh lauh lauh tawh a, engmaw changin Pu Dara'n a khalh chhawk ve bawk ṭhin.

Mizo ngei hmeichhia motor khalh thiam hmasa ber chu Pi K. Thansiami a ni a, kum 1973 khan tuna minister nita Pu Tlanghmingthanga M.V.I  hotu a nih lai khan driving licence a zu dil a, mahse Pu Tlanghmingthanga hian "All India Driving licence a nia, hmeichhe tan  a theih loh" a lo ti bur.

Learner licence erawh a pe hram.( Learner hi tunhma chuan temporary licence an ti) Tichuan motor chu 1973 atang in a khalh ta vang vang mai reuh a nih chu!

A motor hma ah L tih a lo tar theihnghilh thin a vawi hnih lai town police man a tawk. Lerner ah hian a sen in L tih motor hnung lam leh hma lamah tar tur a lo ni a. Town police in an man a, pawisa chawi tir theihna an nei si lova. Magistrste hma ah an hruai nghe nghe. Heta thu neitu hi P. Lalnithanga IAS  beng thlengin warrant te pawh an thawn chhuak.  Ngaihdamna sang ber in cheng 50/- in a ngaidam. Ka pi te reuh hi warrant te pawh an pe hial. Hun lo kal zelin a motor hma leh hnung ah L a dah theihghilh  leh pek a, town police te kha a strict viau nge ni. A hnu ah town police in an man leh a, hei hi IAS GUGRAL a hunlai a ni a cheng za a chawi thung.

A motor  khalh hi Jeep a ni tlangpui a,  a number pawh ZRM-0365 a, army jeep world model te pawh a khalh ṭhin.

Pi Siami hi nu huaisen tak a ni a, nurse hna thawk ṭhin in, ka pian seillenna Serchhip Hospital ah te pawh a lo thawk  tawh ṭhin. Rambuai lai a sipai Aizawl an kah khan chhim lam an la rawn thleng lova. Serchhip aṭanga  Chhiahtlang thleng Pu Chalthuama Jeep a khalh a, mi a phurh zingah hian Pu Bawihhranga intelligent ASI a lo phur tel a, an man phah nghe nghe. Pu Bawihhranga a phurh tel vang hian man a tawk.

Amah Pu Bawihhranga a chhuah hnu in MNF hnenah  an man dan a sawina ah  Nurse Pi K. Thansiami khan motor a lo khalh ah khan a chuang ve  a, kha vang khan  intelligent hovin an man a, rambuai a tan chhan pakhatah ah an ziak a ni.

NURSE PI SIAMI JAIL AH A TANG

He case hi intelligent lamin an lo la thu tak hle a ni ang chu. Kum 1967 june thla khan IPC 121 (damchhung tan/ khaihlum) leh Assam Act etc in man a ni. Kum 1968 ah parole leave in a chhuak a, Mizoram haw an phal lo. Shillong a parole chu Khasi in luah in zing dar 6 - tlai dar 6 curfew zirtawp ni apiangin a in report ta ziah a ni.

NURSE ROPUI CHUNGCHANG A LANG  ZEL

Pi Siami tan hunlai External affairs changtu  Assam DIG Mohdi a ni a. Hepa hian a office ah intelligent te kal tlangin a ko va. 

Chutiang chuan a dawhkan ah a chungchang man a nihna te chu a lo kawl vek a ni.  DIG chuan, "Motor i khalh thiam a ni maw?" a ti a. Ani chuan, "Ka khalh ngailo, ka khalh thiam lo," a han ti chu Mizoram CID hovin an hekna ah ASI/ Intelligent phurtu ti a hekna chu a hmuhtir ta a ni.

DIG chuan, "Ka car hi khalh la, kan in ah ka chaw chhun eitur min va lak teh," a tih paw'n, "Motor ka khalh thiam lo" a ti tlat a ni. 

DIG hian a ngaisang ru fu a niang, "Kan deptt ah lo lut la, i hmingah DIANA kan vuah che anga, tichuan heng i case hi i nei tawh lovang a, tuman an hre lo che ang a, lungin aṭangin i chhuak nghal a ni mai"  a ti a

Pi Siami ve thung chuan, "Mizoram buai avangin eng ni ah emaw a tanna aṭang hian ka la chhuak tho dawn va, ka tuina ber Nurse hi ka la chhunzawm leh dawn a ni" tia a chhan chuan, DIG chuan "I hna Nurse ah i tui a a lawmawm e," a ti then. 

Pu Mehdi hi Mizoram U.T kan neih a Indira Gandhi rawn escort tu kha a ni.

Pi Siami vek hi mizo hmeichhia scooter khalh thiam a lei hmasa ber a ni bawk. Aizawl a Bata agent ten agent room Zarkawt a Kinetic show room an rawn hawn tirh phat khan la chhuak ve in, 1981 ah scooter a lo khalh tawh a ni. Mizo hmeichhe scooter khalh hmasa ber a ni mai thei. Serchhip a scooter nei hmasa ber chu Pu H. D Rosanga (L) Serchhip college principal a ni 197? khan a lo nei tawh. Serchhip khua a scooty nei hmasa ber pawh Rohnuni (2005) Dinthar veng a ni.

Scooter a leina chhan hi Durtlang atangin Aizawl civil hospital a thawk ṭhin a ni a, Durtlang leitan leh Aizawl civil hospital inkar kawng chhe lutuk chu an pa in motor ken a phal lova, chumi atan chuan scooter a lei ta a ni. 

Pi Siami hian Learner a hmang rei hle a. Learner a neih aṭanga kum 13 (1986) ah driving licence puitling a nei chauh a ni. 

Mizo zinga driver hmasa ber chu Chalmawia, Durtlang niin 1934 hma lam a ni a, a dawt ah Aikhama niin 1934 hmalam bawk a ni. Anni pahnih hian Thingpui huan sap motor an khalh ṭhin. Aikhama hi kum 48 mi niin 1949 ah a boral.

Serchhip khaw mi leh sa, driving licence nei hmasa ber chu Zaduha a ni. 1949 ah neiin Mizoramah licence a la lak theih lova, Silchar aṭanga zuk la in Silchar bial ah a driving licence number hi 67 a ni.

Serchhip dik tak chhulchhuak/ original driving licence nei hmasa ber te chu Lengzuala(L) leh Chalthuama (L) ten an nei hmasa ber a. Kum 1959 ah temporary licence in motor an khalh a, 1960 ah driving licence puitling an nei. Lengzuala driving licence number hi 239 a ni a, Chalṭhuama hi 240 a ni.

Tin, Serchhip a hmeichhe driving licence nei hmasa ber chu C. Lalkhumpuii a ni a, 1987 ah a lo nei tawh.

Pi Thansiami hi Asst. Nursing superintendent in 1998 khan a pension. 23rd April, 1938 a piang a ni a, tun thlengin a la dam. Pi Siami hi kan hriat theih dan tur chu nuihza siam thin ZEPHYR drama club a mi APAKUNGTEA u pasala nu a ni.

A lema kan hmuh- Pi Thansiami

Pi Thansiami Driving licence