James Bond - The Man With the Golden Gun-5

No3. And Half Love Lane

Jamaica hi thliarkar mawi tak mai a ni a, mahse hmarlam vaukam ai chuan chhimlam chu tlema chhengchhia leh mawilo deuh zawk emaw ni chu tih tur hi a ni a. Kingston leh Savannah La Mar inkar mel 120 a thui chu ram hmelhmang chi dang dang engemawzat kaltlang ngai hi a ni a. Mary chuan car ke chhiatpalh pawha tanpuitu ah tiin kal ve a tum tlat mai si a, Bond pawh chuan a hniallui duh ta bik lo va.

Chak takin an tlan zel a, Spanish town, May Pen, Alligator pond, Black river, Whitehouse Inn te chu an tlanpel a, a hnuhnung berah hian chhunchaw an fak ta a. Ni a sa in boruak pawh a lum hulh mai. Dar 4 a rik chuan kawng ngil deuh takah hian an tlan leh a, in mawi tak taka sak leh uluk taka huan inhung te chu an tlan thleng ta a. Helai hmun hi Savannah La Mar veng intanna chu a lo ni ta reng mai.

Tuipui kam lawngchawlhna lianlo tak tih mai loh chu chu vengchhung landan chuan Jamaica khawdang a ang hranlo hle mai a. Khaw lai takah chuan nhil takin kawng a kal ruah mai a, in te chu Frome Sugar Estate a thawkte chenna tur a sak an ni hlawm a. He khua hi kum 1920 bawr vela dingtan anih daih tawh avangin a landan pawh a hmanlai deuh raih bik a. 

Zoram Online Store ah hian lo leng ve ta che.

Bond chuan car chu garrage hmasa ber ah chuan a tiding a, petrol thunbelh tirin car dang a hire leh a, May chu haw lehnghal turin a hrilh ta a. Nula pawh chuan thil tullo tak tak a zawt duh bik lo va. Nula chu remchang hmasa bera biakpawh a intiam a, thuawih takin nula pawh chu a inkhalh let leh ta a.

Bond pawh chuan lawngchawlhna lam panin a car chu a khalhthla ve nghal a. Love Lane tak phei chu tuipui kam atanga khaw hnunglama in chhete te karah kawng zim takin a inzamlut ngiai a. Chulai vel awmdan chu hriatchian a duh avangin a han helkual te te a, sangha mantuten lawngleng an hunkhawmna tiau zingah chuan a car chu a tiding ta a. Love Lane lamah chuan kein a chho ta a. Khawlaia mi veivak te pawh chu mirethei te te leh sangha mantu te hlir an ni. Dawr pakhatah hian Royal Blend Cigarette a lei a, dawrnghaktu hnenah chuan No3 and Half Lane awmna tak chu a han zawt a. Dawrnghaktu chuan Bond chu a han en vang vang hnu chuan, "Kawtthler hi zawh chho la, dinglama in lian tak kha a ni mai," tiin alo chhang ve mai a.

Bond chu kawtthler atang chuan a chhuak a, kawtthler chu a zawhchho ta a. Kilkhat atang chuan tourist ho vakvel chu ngun takin a han thlek hlek a, a kal leh ta a. Dinglamah chuan in lian tak pakhat hi alo awm a, meizial tan that der pah chuan a han thlithlai leh a.

Chhawng hniha sang, a vela nathlar nei, thinga sak hi a ni a. Mahse inchung bathlar tlang vel cheimawina leh thing chu a bal nasa tawh hle a, rawng mumal pawh a pu tawh heklo. Inchhawng chung tukverh phei chu hawntheih loh tura kilhbur an ni hlawm. Tualzawlah chuan ar cher leh nghawng sei zet zet hi an tla ve dam dam a, Ui dum leh a buanga rang, Mongrels an tih pathum hian mei phiat vat vat chung hian kawtthler lehlama awm Bond-a chu an lothlir ve bawk a. Mahse chung ui ho hnung lawkah chuan thing chikhat, Lignumvitae an tih chu a ding thluah a. Chung thing daihlim hnuaiah chuan nula pakhat hi lehkha chhiarin chair buk thei chi ah hian a thu a, ralkhat atang mai chuan nula nalh leh duhawm tak ni hian alang nghe nghe a ni. Bond chuan in chu a kalpel a, nula lan theihlohna lam atang chuan in chu ngun deuh hian a han thlek leh a.

Kawngkhar lamah chuan thing kailawn a indawh chho va, kawngkhar lu chungah chuan rawngvar da lam pang tawh hian '3 & Half' tih hi a inziak kalh a. Kawngkhar sir tawn tawnah chuan tukverh lian tak tak pahnih hi a awm a, veilam zawk ami chu hawn theihloh tur hian thinga kilhbeh tlat a ni a, dinglam zawk a mi erawh chu darthlalang paw zet mai hi a lo la invuah ve thing. Kawngkhar chungah chuan thirphek inthen theiah hian 'Dreamland Cafe' tih hi a inkhai bawk a. Bangah cbuqn Red Stripe Beer, Royal Blend, Four Aces Cigarettes, Coca cola tih vel fakna hiba intar thluah mai bawk a. Kuta ziah 'SNAR' tih hnuaiah hian 'Arsa tuihang a awm e' tih hi a inziak bawk a.

Zoram Online Store ah hian lo leng ve ta che.

Bond chuan kawtthler chu a paltlang a, kailawnah chuan chhovin, kawngkhara hrui inkhai teuh chu keuvin inchhungah chuan a lut ta a. Kilkhata dawhkan sei chu a panphei a, a phena an thil zawrh chu a enkual a, pawn lamah chuan ke pen ri a hre ta nghal a. Pawna nula, lehkhabu chhiar kha a lo ni reng mai. Hang lam rawngkai, hmeltha zet mai hi a ni a, mitmu buang deuh leh sam dum nalh zet mai a ni. A mit awmdan ah chuan Chinese thisen te pawh a kai hialin a rinawm. A pian leh fuke awmdan chu a mawi tawkin, a nu hnap mai a. Nuichung leh mitmeng lerh hmel tak hian, "Chibai," a rawn ti ta a.

"Chibai. Red Stripe Beer i nei maw?"

"Tehreng mai," tiin nula chu dawhkan phen lamah chuan a phei a, beer lachhuak tur chuan tul fahran lo hle mah se a hnute lang thei deuh ngei tur chuan a han kun a. Beer dahna vurbawm chu a khup a nawr khar lehin beer chhin chu a hawng a, dawhkana no pakhat bulah chuan hungin a man zat a sawi nghal a.

Bond chuan beer man chu a pe a, stool pakhat chu pawthnaiin dawhkan kil chuan a thu ta a. Nula pawh chuan pawisa a dahfel hnu chuan dawhkan chu a rawn bawh ve a. "I rawn zin mai mai em ni?" a han ti a.

"A ni deuh ber ang chu. Nimin chanchinbu chhuakah khan helai hi hralh tur a nih thu ka lo chhiar ve a, ka rawn thlithlai mai mai a ni. In lian leh juam tak pawh anih hi. I ta em ni?" 

Nula chu a nui hawk a, a han nuih zawnga a ha lolang chu fu fep nasa tih hriat tak hian a hriam hrâk mai a. "I ti anglo e! A manager ka ni ber ang chu. Cafe kan neih bakah thildang zawrh tel kan nei tih pawh i hrethei mai ang chu tiraw?" a ti leh a.

Hrethiamlo hmel deuh hian Bond chuan, "Eng thildang maw?" a lo ti hû a.

"Nula mawle. Inchung lamah khian mutna pindan fai tak tak paruk kan nei a, pound khat bak chawi a ngai lo. Tumah hian Sarah chu amah dawrtu nen an awm mek a, i kawm duh lawm ni?" 

"Vawiin chuan duhlo mai ang. A lum lutuk reng reng. Pakhat te tein an inthlak mai thin em ni?" 

"Lindy pawh a awm tho alawm. Mahse ani pawh a buai lai tak a ni. Nula lianpui mai a ni a, i duhzawng anih chuan darkar chanve lekah a hman tawh mai ang," tiin nula chuan a hnung banga sana intar chu a han en a. "Dar rukah chuan a hman tawh ka ring. Boruak pawh a dai tawh ngei bawk ang chu," a han tihzawm leh a.

"Nang ang hi a ni ka duh. Enge i hming?"

Nui har har chung hian nula chuan, "Ka nu hian fanu paruk ngawt mai min hring a, pangpar hming hlir a vuah hlawm a. Violer, Rose, Cherry, Ponsy, leh Lily te a v7ah hlawm a. Ka rawn pian ve hian pangpar hming dang phuah tur a hriat tawhloh avangin 'Artificial' tiin minkonta ringawt a. School ah hming diklo  a ni e tiin miin min nuih thin a. Tichuan Tiffy tiin an lamtawi aka pu hlen ta reng mai a ni,"

"Hming mawi tak pawh a nih chu. Kei chu Mark ka ni,"

Nula chuan, "Mi thianghlim chu i ni em lovang chu maw?" tiin a han fiamzui leh a.

Zoram Online Store ah hian lo leng ve ta che.

"Tumahin chutiang hawizawngin min la puh ngailo. Helai hmun vel hi nuam ka ti a, luahhawh tur ka rawn zawng deuh a ni. Ka duhdan tak chuan tunai hian tuipui hnaih theise a tha ang. Hawikual deuh rih chu ka la ngai. In pindan te chu zan lamah a luahhawh theih emaw chu?"

Nula chuan inngaihtuah muk hmel tak chung hian, "Thei tehreng mai. Mahse bengchheng itih ka ring.  Min rawn dawrtute hi a chang chuan an luruh hi a ring mah mah fo thin si a," a lo ti a. A rawn kunhnai a, zawisap hian, "Luah lola ka duhpui zawk che. A chung pawh a chhe ve tawh reng reng a," a han ti leh a.

"Chutia min hrilhtlang hlauh chu a tihzia hle mai. Police ho nen buaina in nei thin nge ni, engtiziaa hralh tum nge in nih?"

"Chulam a ni lo, kan fimkhur ve khawp asin. Chanchinbu a Mr. Brown-a hming tawpa 'et ux' tih kha ilo hmu em?"

"Hmu e,"

"Kha kha 'a nupui nen' tihna a niawm e. Pi Agatha Brown chu Church of England mi leh sa a lo ni thin awm e. Catholic ah a inlet a, helai hmun ang hi chu pangngai taka enkawl pawhin an pawmzam theihloh chi tak tur a ni a. Helaia an kohhran lah chu khilai lawka awm khi a ni a, a chung tur rangva thar an lo mamawh bawk nen; Pi Brown-i chuan lung pakhata sava pahnih perhthlak tum ranin a pasal chu helai hmun hi hralh a, a man thenkhata Biak In chung lei turin a nawr ta a ni,"

"Ava zialo ve. Hmun nuam tak niin alang si a. Nang chu engtin nge i awm zel ang le?"

"Kingston lam ka pan mai ang chu. Ka laizawnte ka bel tawh mai ang chu. Mahse helai hmun hi chu ka ngai khawp ang. Mi tam takin hlimna an hmu a, a lane hi kawtthler mawi tak a lo ni bawk si. Kan vaiin kan inngaina vek a, a awmdan hi......."

"A boruak a nuam i tihna a ni maw?"

"Ni chiah e. Tunhma Jamaica ang chiah kha a ni. Tumah an inhaw lo va, tanpui ngai an intanpui liam liam thin. Nula ho pawh hian anmahni dawr thang leh ngainat deuhte chu a thlawn pawhin an khilai fo thin alawm," tiin nula chuan Bond chu ngun tak hian a enkal mai a.

"An va titha ve. Mahse sumdawn nan chuan a tha vak hauh lovang,"

Nula chu a nui hawk a. "Helai hmun ka enkawl chhung chuan sumdawnna a chhiartlak pawh a ni chiahlo reng a ni, Mr. Mark. Tui, eng, hriselna leh education a awm ang tho hian...." a ti bawrh bawrh a, banga sana inkhai chu enin, "E hiau! Dar 5:45 a ni tawh ka ti!! Ka tawngtui lutuk a, Joe leh Mary pawh ka lo mangnghilh tlat mai. An zanriah ei a hun tawh asin," a ti ta thut mai a.

Tukverh darthlalang chu ava hawng a, pawnlam thingzar atang chuan sava dum lian tak tak pahnih hi an rawn thlawklut a. Choak ai chuan an te deuh va, hram chul chungin Bond-a bawhna bul dawhkan seiah chuan an rawn fu ta a.

Sava pahnihte chuan Bond chu hlauhna tel miahlo hian an kalpel a. An mitmu rawng chu rangkachak rawng a ni a an hram zawng chuan an han intiparh vel a.

Tiffy chu dawhkan phenah chuan a phei a, a bag atangin pawisa nawi a phawrh a, pawisa bawmah chuan a thlak ta a. Chhuara ginger cake pahnih chu lain a pawt them a, sava te chu a pe ta a. A te zawk, a nu chu a pe hmasa zel a. An eizawh hnu chuan a kut an chuk tel avangin Tiffy chuan a han hau va, sava pahnihte chu lungawi awm deuh hian an hmui chu dawhkanah an tat a, an hawi valh valh a. 

"Keini chuan Kling-Klings kan ti mai a, mahse mithiamte chuan Jamaican Grackles an ti thung. Sava ngainatawm leh khawingam awlsam tak an ni. Doctor Bird an tih mai, Humming bird mei sei chi hi Jamaican hnam sava a ni a, mahse hetiang sava hi kei chuan ka ngaina zawk," tiin hlim tain a tawng bawrh bawrh a. 

Zoram Online Store ah hian lo leng ve ta che.

James pawh chuan pawisa nawi a phawrh a, "An hmuhnawm hle mai. Ka hmingin eitur leisak leh ta che," a han ti a.

Tiffy chuan pawisa nawi chu a bawmah a khung leh a, cake dang chu ava la leh a. "Ngun deuhvin lo ngaithla rawh u. Joe, May, he gentleman hi Tiffy chungah a fel em em a, in chungah pawh a fel hle anih hi. Ka kut chuk tawhlo ula, dawhkan hi tihnawk tawh bawk suh u. Chutilo chuan ani hian min rawn tlawh duh tawhlo mai ang," a ti a. Chutia a sava  chaw a pek lai chuan a beng a chhi ta hra mai a.

Inchung lamah chuan thingphel a auh ri tuar tuar a, ke pen ri hian a zui leh a. Tiffy chuan ngaihthalo hmel deuh hian, "Chu chu Linda dawrtu anih ngei dawn chu. Mi pawimawh leh thiltithei tak a ni. Mi pawh a dawr tha hle a, mahse kei chu a duh anga ka awm ve theihloh avangin min ngaina tlat lo. A tawngkam hman lah a hraw a, Joe leh May pawh hi an bengchheng tiin a ngaitheilo hle bawk," tiin sava te chu tukverh lamah chuqn hnawhchhuah a han tum a, mahse sava te chuan a chhangthem ken chu an la hmu ve reng si a, an thlawksawn duh mai bik lo. Tiffy chuan, "Khawngaihin engti pawhin tawng se chhang lovin thu mai mai ang che. Mi tihthinur a..." a tihmek lai chuan a tawp leh chawt a. "Red Stripe dang i duh em, Mister," a tihzawm ta daih a.

Pindan thimlai deuhva hrui inzar chu a ri deuh seng seng a.

Bond chu a kut dinglama khabe dawm hian a thu a, thawm a hriat veleh a kut chu dawhkanah chuan a nghat a, a thu ngil ta nghal a. A rilru ah chuan a kawng veilama Walter PKK automatic pistol chu a rawn lang nghal zawk a, a silai chu chuh nghal mai thei turin a inkau rilru ran bawk a. A ke veilam chu stool ke rahchhan atang chuan la sawnin chhuat a rap nghal bawk a. A kut veilam chuan a silai phawina daltu ber a kawrchung kilhna chu a phelh nghal a. A dinglam a rawmawl phawrhin a hmai chu a han hru pawk pawk a. "Duh leh Undertaker thli a rawn tleh hma dar 6 rik dawn vel hi chuan a lum zual thin riau anih hi," a han ti a.

A hnunglam atang chuan aw nelawmlo zet hian, "Mister, Undertaker chu ka lo thleng e, thlithaw chu i hreduh chiah maw?" a rawn ti a.

Bond chuan muangchangin aw lo chhuahna lam chu a han thlek a. Khua pawh a thim deuh thet thet tawh avangin chupa chu pa sang, ria deuhlam a ni tih chauh chu a hre thei a. Chupa chuan a suitcase rawn khai chu chhuatah chuan dahin a rawn panphei ta a. A pheikhawk hnuai chu thelret ni ngei tur a ni; a pen zawng chuan thawm hriattur pakhatmah a awm hauh lo. 

Tiffy chu dawhkan phenah chuan tim deuhvin a tawlhphei a, electric hmehna a han hmeh chuan bangah chuan bulb eng vaklo 6 vel hi a rawn eng nghal a.

Bond chuan aw pangngai thlap hian, "Min tiphu thelh alawm," a lo ti boh a.

Scaramanga chuan dawhkan chu a rawn bawh ve a, Bond-a chuan a hmel pianhmang chu Secret Service hovin an lo record nen chuan inang chiahin a hria a. Mahse hmun leh hmuna a chetdan inzo tak mai leh nelawmlo tak mai chu an ziak tello chiang hle. A darpharh a hlaitha in a tai a fek hle a. Bond-a chu ngaisanglo leh engto lo tih hriat tak mai hian a han en a. Suit thui malh zet mai hi a inbel a. Savun pheikhawk buang, rawng vara chei hi a bun bawk a. Nghawngawrh aiah rangkachak pin a kawrnghawngah chuan a kilh bawk a. Chu pin chu rangkachak pistol lem piana siam a ni. A inchei dan chu a palian bawk a, a inhmeh thlup mai.

Scaramanga chuan, "A chang chuan ka chhaih lâm hmasa a, an ke ka kah bulh sak mai thin," a lo ti a. A awphawi atang mai chuan English a ni lo tih a hriat hauhloh mai.

"Ava rothap thlak awm ve. Engvanga chutia ti nge maw inih chiah le?"

"A hnuhnung ber kha chu dollar 5000 vang chauh a ni. I mi biak danah tunge ka nih ila hrelo niin a lang. He nula hian a hrilh lo che em ni?"

Bond chuan Tiffy chu ava en phei a, ani chu che miahlo hian alo ding a. A kut chu a sirah a thlakthla a, a kuttum a humruh tlat a. Chutah Bond chuan, "Engah nge min hrilh kher ang? Hriat pawh engah nge ka duh khera i rin?" a lo tilet a.

Scaramanga kut chu a phe vuai a, a kuta rangkachak pistol a Bond-a chu tin pah chuan, "Hei vang hian maw le. Helaiah hian enge i tih a, mikhualpa? 3 and half-a khawpui mi ka hmu che hian ka ngaih a titha lo rum rum mai. Police lam mi chu ini lovang chu maw? Nge, an thiante zingah ilo tel ru reng zawk?" a ti ta a.

Bond chuan fiamthu titak deuh hian, "Ka tlawm e," tih pahin a kut chu a han pharchhuak a, Tiffy lam chu hawiin, "Hepa hi tunge maw ni le? Mahni a Jamaica rawn tlawm a tum em ni? Nge, circus atanga rawm tlanchhuak em ni zawk? Enge a in duh ang zawt teh. Tu-a pawh chu lo ni ta se, a chezei khawp mai," a han ti a. Scaramanga chezia leh hawiherah chuan a silai a hmetpuak thelh a ni tih a hrethei. Tiffy hmel pawh chu a danglam vek tawh mai. Ka âng hau leh meng bial kal chung hian Bond-a chu a han en a, ho te a thi nghal mai thei a ni tih pawh a hai biklo. Sava pahnih, Joe leh May pawh chuan boruak tang tak mai chu hre ve niawm tak hian te chul chungin tukverh lamah chuan an thlawk phei ta a.

Scaramanga Colt.45 puak ri chu pindan chhungah chuan a ring hle mai. Sava pahnihte chu boruakah chuan an darh nghal vek a, an taksa leh hmul them chu a leng chum chum a.

Bond chu che miah lovin a thu a; Tiffy  erawh chuan te thawt chungin Bond-a beer in lai chu a laksak thut a, zeilo deuh hian a rawn vawm a. Beer um chuan bang a deng keh chuai a, Tiffy chu chhuatah a thingthi hnawk a, a inhnit hlawp hlawp a.

Bond pawh chu muangchangin a dingchhuak ve ta a. Scaramanga lam chu a panphei a, a kalpel tep tihin ani chuan a banah alo dawm a. A silai hmawr chu a han hnim leh te te a. A mitmeng nelawmlo tak chu a dava ruai mai. "Mister, thihna rim hian danglamna bik riau a nei asin. I chhin ve duh em?" tih pahin a silai chu Bond-a lak maitheih turin a han lek a.

Zoram Online Store ah hian lo leng ve ta che.

Bond chuan, "Min thlah la, i awmdan hi fimkhur deuh teh," a ti chang ta fak a.

Scaramanga chuan a mitko a san âk a, Bond chu a han en vang vang a, a vawnna pawh chu a thlah ta a. Nula chu ala insut hlawp hlawp a, kawtthler in pakhat, hla vak lovah chuan 'Calypso' hi an play ri ruai ruai mai a.