PARTITION OF INDIA

 PARTITION OF INDIA LEH KASHMIR BUAINA 

– Familia Fanai Laltansanga

A sawp chu na tak a ni tih ziak ai khan a na a ni, India ram atanga Pakistan ram thar sahthlak hi! A sawhkhawk chuan chhung-kaw maktaduai tam tak nun a la nghawng mek zel a ni.

Khawvel ni tla seng lova roreltu Kumpinu awpna hnuaiah khan India ram chu Kumpinu lalrama ram rangkachak leh  hlu tak a lo ni thin a, kum 1947 a lo thlen chuan thil engkim chu a lo inthlakthlengin a lo danglam ta vek mai  a ni.

INDIA RAMAH KUMPINU

Kum 1600 khan India ramah British an lo lut ţan a, British East India Company hmingin sumdawnna hmun tam tak siamin sipai chak tak an din a. Kum 1857 khan india ramah Kumpinu laka helna namen lo a lo alh  chhuak a. He helna hi British sipaite’n thisen tam tak chhuaha an hmet mih meuh chuan india ram pum deuh thaw chu Kumpinu kut-ah a tlu lut ta a ni.

QUIT INDIA

Kum 1885  khan The Indian National Congress din a ni a, sakhaw tih bik nei lo political party a ni a, India mipuite rilruah   ram leh hnam hmangaihna rilru an tuh nasa hle a. Nationalist leader Mahatma Gandhi te hian he pawl lian tak hi rei tak an kaihruai a, tharum thawh lohva British rorelna an do va. Prime Minister Winston Churchill chuan India ram chu German ral lian dona kawnga thlawp tura a sawmna chu Mahatma Gandhi chuan a hnawl fithla hlauh va. Kumpinu-in India ram mipuite kan ram ngeiah min tihduhdaha min rahbeh reng  laiin eng tin teh reng nge Kumpinu sorkar chu German ral lian donaah kan ţanpui theih ang? a ti a ni.

Kum 1942 August thla ni 8 khan Congress chuan India ram atanga British mite chhuak tura phutna, the Quit India movement, an huaihawt ta a.  British sorkar chuan he nawrhna hi dan bawhchhiatna a ni tiin Congress chu dan pawnah a hnawl a, an hotu lawk zawng zawng  Gandhi, Jawaharlal Nehru leh an committee member te manin jail bang a zuttir hlawm a. Hei hi duh lovin India ram mipuite chuan a ram pum huapin nawrh an huaihawt a, tharum thawhnate a thleng a.

Congress member Sri Sadiq Ali chuan Quit India movement hian India mipuite a tichak thar a ni, a ti.

HINDU LEH MUSLIM INŢHEN DUHNA LIAN TUAL TUAL

Kum 1930 vel atang khan Congress leh kum 1906-a din Muslim hma ngaitu pawl Muslim League inkarah inrin loh tawnna a lo lian tual tual a, kum 1940 khan Muslim League hruaitu Muhammad Ali Jinnah chuan India ram hmun hrang hranga darhsarh Muslimte pual bik ram, India ram hmar thlang lam leh hmar chhak lama din a rawt ta mauh mai a. A ram hming atan ‘Pakstan’ tih hming ‘i’ tel lo hi an chherchhuak a, P chu Punjab, A chu Afghanis, K chu Kashmir, S chu Sind leh Tan chu Baluchistan tihna a ni a. ‘Pakstan’ chu Urdu ţawng chuan ram thinghlim tihna a lo ni a.

MOUNBATTEN A LO THLENG TA

British sorkar chuan India rama politics boruak inlumlet leh  inmun vel dan chu chiang taka a han zirchian chuan an vanglaini a kin ta tih hriain thuneihna pek dan tur an ngaihtuah ţan ta a. India viceroy ni turin Lord Loius Mountbatten chu kum 1947 khan India ram a lo thleng ta a. Bristish sorkar chuan India ram chu an tum lawk aia kum khata hmaa chhuahsan an tum rum rum hman hial a.

Mi fel tak India viceroy Lord Louis Mountbatten meuh pawhin India ram buaina chu a chingfel thei ta mai bik lo va, india ram ţhendarh lova Muslim te himna tur a siam puitling thei ta bik lo va.

Chuvang chuan Lord Mountbatten chuan kum 1947 June thla khan India ram ţhenhran tumna chu a puangchhuak ta a, hei hi Muslim League hruaitu Muhammad Ali Jinnah duhaisam a ni a, Indian National Congress hruaitu Jawaharlal Nehru pawhin a pawm lo thei ta bik lo va, an inchalrem a ni ta ber ang chu.

RAMRI SIAM FEL HNA

Tichuan, India ram chu ţhen a lo ngai ta si a, Muslim tamna hmun chu Pakistan ram atan ramri siam fel turin British Judge Cyril Radcliffe kutah an dah ta a. Kha tih hun lai vel kha British tan India ram leh Burma ram kha a ralmuang tawh lo va, hmanhmawh bak lengin mawnga hawlh ang maiin British Judge Cyril Radcliffe chuan Muslim awmna ram atan India rama Punjab leh Bengal  chu a phel ta phawk phawk mai a!

India rama vawite khat pawh rawn kal ngai lo Cyril Radcliffe ramri siam chuan India leh Pakistan ram tan buaina zakhua a thlen kumkhua dawn ta a nih hi le!

PAKISTAN RAM THAR A PIANG TA

India ram atanga an sahthlak tak Pakistan ram chuan kum 1947 August thla ni 14 khan zalenna kawl eng an lo hmu ta a. Muslim ram khat ni si Pakistan ram chu East Pakistan leh West Pakistan ram tiin ţhen a lo ni ta a, a inkar hlat zawng hi km 1,500 chuang a ni.

Lord Mountbatten chuan Jinnah chu thu tiamtirin Pakistan ram governor general atan an khawpui thar Karachi-ah a la lut a.

Larry Collins leh Dominique Lapierre-te ziak Freedom at Midnight tih lehkhabu-ah chuan Jinnah khan TB a vei a, a dam rei dawn tawh lo tih kha an zep ru tlat a, kha thuruk kha India ram hruaitute khan lo hria se, hun pawt fan hlek se, Pakistan ram hi a piang lo mai awm mang e, an ti a ni.

INDIA INDEPENDENCE

Kum 1945 August thla ni 15  zanlai a lo rik chiah khan India ram chuan zalenna dar a lo khawng ri thei ta a, chutih rual chhiah chuan a ram bung zat ve deuhthaw chu Pakistan ram a lo ni ta nghal a, India ram ţhenhranna, Partition of India chu official a lo ni ta chiah bawk a ni.

AUGUST NI 15 KHER?

August ni 15 hi Lord Mountbatten hian a hringnun kawng zawha a vanneihna ni-ah a ngai tlat a, Indopui II-naa Japan an tlawm ni, Lord Mountbatten hi commander of the allied forces a nih laia a hmaa Japan an inpek ni kha kum 1945 August ni 15 a ni a, chuvangin India ram zalenna ni atan hian August ni 15 hi a thlang chat a ni.

Lord Mountbatten chuan Jawaharlal Nehru chu India ram, sakhaw tih bik nei lo Hindu tamna rama Prime Minister hmasa ber ni turin thuthiamtirin a la lut ta a ni.

India zalenna an lawmnaah hian Mahatma Gandhi chu a tel ve lo va, India ram thenhran duh lotu kha a ni bawk a, zalenna an lawm ni hian Kokkatta-ah Indian Muslimte zingah hun a hmang ta zawk a ni.

Hmanhmawh taka independence an pek dawn chawlhkar tlemte chhunga an siam India leh Pakistan ramri hi independence an puan hnu ni hnihnaah pawh an tlangzarh hman lo cheu a nih chu!

Chutichuan, nikhat thil thua ram hrang daih han nih takah chuan Hindu leh Muslin tawh phawt chu hmelma an lo ni ta thut  a, India rama awm duh zawk leh Pakistan rama awm duh zawkte chu an insulpel ta zut zut hlawm a, kut an inthlak a, an hriamhrei neih apiangin an insam a, an inrawk a, an insuat bawk a, an inthat ţeuh ţeuh va. Mitthi zat chiah hi hriat chian theih a ni tawh lo va, mi 500,000 aia tlem lo an thi a, mi 12,000,000 chu nikhat thil thu-ah refugee an ni ta nghal pang mai a. A rapthlakzia hi mihring ţawnga sawiin a siak lo a ni e.

1947/48 INDONA

Ramthar pahnihte chu zalennna an hmuh hnu lawkah Kashmir ram inchuhin an indo nghal pang a. Partition dan an siamah khan Kashmir ram hian India emaw Pakistan emaw a duh zawk zawk a zawm thei ang tih ziak a ni a.  Kashmir rama mipuite hi Muslim an ni a, an lal chu Hindu a ni thung a. An lal chuan India ram zawm a thlang ta si a. Kum 1947-ah indona a chhuak ta hial a, Pakistan chuan Kashmir-a hel pawl a fuihpawrh a.

JINNAH LEH GANDHI TE AN THI 

India leh Pakistan ram tana zalenna sualtute chu zalenna an hmuh hnu lawkah an thi ve ve a ni.

INDO-PAKISTAN INDONA 1965

kum 1965 khan Pakistan chuan Inda-administerd Jammu and Kashmir a rawn bei thut a, India chuan chhang let nghalin chawlhkar 3 chhung an indo ta a, India sipai 100,000 laiin Pakistan sipai 60,000 an bei a, an sawp a. India-in ramri  pelin Lahore tleng rawk a la a ni ber e.

BANGLADESH RAM A LO PIANG TA

Kum 1971 khan East Pakistan-ah tualchhung buaina leh indona a chhuak a, a chhuah chhan chu Bengali nationalist party, Awami League-in kum 1970 inthlannaah hnehna an chang chiang hle a, mahse West Pakistan sorkarin inthlan result a pawm duh tlat lo va. East Pakistan atanga hnawhchhuah Awami League party hruaitute chuan ram pawn atangin kum 1971 March thla khan an ram independence an puang a. West Pakistan sipaite chuan lainatna tel miah lova helna chu nuai mih an tum laiin India sorkarin  tanpuiin a rawn chhan  ta hluah va. India leh Pakistan an indo va, Pakistan a tlawm a, Bangladesh ram thar a lo piang ta a ni. He indonaah hian mi an thi hnem hle a, India ramah mi mtd 10 vel an rawn tlan lut a ni.

KASHMIR BUAINA

Kashmir phairuamah kum 1989 atang khan India laka inlakhran duh pawl an lo hrâng leh ta a, heng hel pawlte hi Pakistanin a tanpui tlat zel a. kum 1990 hnu lamah phei chuan Islamic firfiak pawl an rawn inrawlh ta bawk nen , an inveh reng a, an inkap reng a, an inthat reng bawk a ni.

NUCLEAR RALTHUAM NEI RAM 2

Kum 1998 khan India leh Pakistan chuan nuclear bomb an enchhin hlawhtling ve ve a, heng avang hian he ram pahnihte hi US leh Europe ram ţhenkhat chuan an hrek nghe nghe a ni.

Kum 1999 khan Pakistan sipaite bawkin India administered Kashmir vur ramah an lo inkhuar leh pek a, an indo va, India indo thlawhna te’n dim baksak lova an chhut tak ngheng ngheng avangin Pakistan sipaite an tawlh lut leh ta hram a ni. Thi leh hliam an tam nemen lo khawp mai.

Pakistan leh India ram  kum 71 chhunga an hmasawnna tam tak karah British hun laia ramri an kham fel loh avanga leh phuai luai ang reng taka min chhuahsan avanga  buaina , manganna, ţah leh ha ţhialna, indona leh a behbawm tlangpui kan han chuk lawr a, Jammu and Kashmir buaina hi a chinchhuakin a hranpa sawi tham fe a awm.