Pastor bo khan thu a sawi dawn-2

 BO SERMON: 2

PASTOR BO KHAN THU A SAWI DAWN – LALSAWMA

3.1 Kawng dik lo, dika ngaih luih chu a kal fuh theih loh 

Lui kamah chuan thingzai putna kawng hnim tawh tak hi a awm a, lui hnâr lam hawiin kawi khat chu ka zawh a. Chuta ṭang chuan, Puilo kawng hlui pawh tumin ‘Mausen’ mual panin ka chho ta a nih chu! Thim thet thetah ngaw leh thûn hmun ka lut a, rei lo teah khua a lo thim ta a. Ka hma lamah hian mupui lian deuh hi a lo thlawk a, min rawn ṭham tum ni âwm tak hian a lo bir thut a, kei chuan, “Hei!” tiin ka au phut a, ani pawh chu a ṭe tuar a, min thlawh pel a, ngaw thing lerah chuan châng a tum ta ruih ruih a. 

3.2 Tel ve tum an tam 

Khua a thim tak tak tak a, ka tui pawh a hâl tawh hle a, ka hma sîr ding lamah tui luang ri ker ker ka hre ta a. Ka va pan a, a dapa dapin tui chu ka zu ṭhûm a, ka in ta a. Chutih lai tak chuan ka hnung ding lamah hian hnahchhâwl rawn pal ri ṭhuai hi a awm a. Kei chuan a lam hawiin pâwr fe hian, “Eng nge maw i nih a, mi hnaih viau chu le? Mi rawn hnaih vaih suh, silai ka keng a nia, ka kâp dur mai ang che,” ka han ti a, a reh ve ta mai a. Tui chu ka zu in leh a, ka veil amah hian a lo ri leh a. “Mi hnaih suh’ ka tih kha! Ka kâp mai tur che nia,” ka ti leh a. “I duh leh mi rawn zui rawh; mahse, ka hma lamah chuan kal hauh suh,” ka ti a. Chutia eng mah pawh hmu si lovina silaia kaha ka han vau vel chu keima nuih chu a za deuh va. He kawrtê hi ‘Hrangbela tui’ an ti. 

Khua a thim tak tak a, kawrtê zawh ka tum a; mahse dap ringawt chuan khawi mah ka thleng dawn lo va, khawmualah chuan ka kai a, chhak lam leh thlang lam dap chungin ka vak chho ta a. Thingthlavar a tam e mem a, hnah ṭawih apiang hi a vâr chuai a; mahse a eêng si lo. Dumde a 0076âng hle a, pakhat chu ka han man a; mahse pangang a lo ni a, ka hmet keh bawk si. Arsi pawh khi a lo êng khawp mai. Ngaw thing kara lo êng fuh chuan lei pawh hi a rawn chhun êng ve kalh a ni. 

Favang hnâwm lum a ni a, vangvatsaiṭial a tam a, chhunah khan ka hmu ṭhin. Hetia eng mah hmu lova han vah takah chuan an duh duhin an lo kai a, an puar dawn hian a thak a, ka khawih tla leh tup ṭhin. Ka hrawka zuktu phei kha chu zungpui tiat dawn lai ni maiin ka hria, han pawh thlaka khal ṭulh tham a ni. Ngaw pelh hnu chuan pangang pawh a awm deuh a ni ang, nghâwng hi a lo thak ṭhuk ṭhuk a, zuanbak puitling ni âwm ta khan hûm nawlh chang pawh a awm a ni. 

3.3. Zanriah atan hmarchapui

Ram a lo pik tawlh tawlh a, hling leh khawih nuam lo tak tak pawh ka su tam. Ka jeans kekawr pawh vei lam khup chungah hian kai-ha hling emaw ni hian a lo man a, ka pal lul a, a thler ta kâwk a, chhum chu a chhum lo deuh. Chhak deuhvah chuan hmun zawl, tapchhak tiata zau, sei deuh hi ka han thleng a. thla nghak chhuak ila a ṭha ang, tiin ka ṭhu ta a. Ka ril a lo ṭam ta vang vang a; ,ahse chaw ka pai si lo. Ka iptea hmarchapui fun chu ka zen pawp a, ka han ei ta bawrh bawrh a, ka ei ṭeuh chuan pum tan a ṭha lo vang tih ka ring a, pum li chu ka ei a. A hmin ṭha bawk a, a thlum khawp mai. Ṭam chu a hnêm ve mai a ni. 

Min zuitu pawh kha a la awm ve zel a. Lehlamah thingṭang a rap tliak a, lehlamah lung a tilum bap bap a. Min hel ni awm tak a ni. Ka hmu si lo va, eng nge a nih ka hre lo. Sangha rai chuan a lian ngei mai a, sakei chu a nih ka ring lo, chhun lamah sakei hnuhma ka hmu hauh lo va. Ka rilru chuan, “Hei, ka hlau em aw?” tiin ka inzawt a. Ka vannei khawp mai. Hemi zan hian hlauhna reng reng a lo kal lo. Ka dawizep the lul ṭhin nen, Pathianin hlauh lohnain min thuam a ni ber ang. 

Nakinah chuan kâwlah thla a lo chhuak a. Chhuahchhawnga awm ka ni a. Mahse a êng nghal mai lo. Thlawhbuaa awm ka ni a, rei lo deuhvah chuan sana a en theih ta a.  dar sawm leh minute sawm niin ka hria a, kal ka rem leh ta a ni. 

3.4 Awmpuitu ṭhian dang

Thing leh maute hi ruangâm a hmuh theih a; mahse vawn chiah loh chuan a hriat hran loh. Vawi khat chu ka pen sual a, kawrtê ruamah a tla dawn a, mau ka vuan hman hlauh va, ka uai nawlh mai a ni. Vawi khat chu tukkhum nghawr dawtin khuarkhurumah ka tla a, ka insawh na lo hlauh va, vah chhuah erawh chu a buaithlak deuh. 

Piah deuhvah chuan mau hmun thelh ka va thleng a, thla êng pawh a rin theih ta viau mai. Ka chau deuh va, ka ṭhu chawl a. Ka ṭhutna aṭanga hlam thum velah chuan ‘mi’ pakhat hi a lo ṭhu ve ta mai a. Ka hmu miah lo, a thawn pawh ka hre hek lo; mahse ka thinlungah a chiang a ni. Chuta ṭang ka hank al leh chu nikang mau ramchang, ṭhâng nêm hmunah hian paivat deuhvin ka chho va. Ka hnung lam ka engto lo va, ka sir lam pawh ka veng hek lo. Kalna tur chauh ka ngaihtuah a. Chhun ênga ṭhian dun ramvak inzui ang maiin rilru ka pu a ni. Chhak deuhvah chuan ka ṭhu chawl leh a, those a tam hle. Towel-in ka inzap phur phur a. Ka kal leh tur chu ka ṭawng chhuak a, “Kal leh taw hang hmiang. Ipte mi ahpui lah chu i tum hlei lo va!” ka’n ti ta rawk a, ka neuih chu a za hnuhnawh a. 

3.5 Tui leh phung inlar

Tlang hnum rem deuh, tiar thing hmun ka han thleng a, a êng vak lo va, tah chuan tui a lo tling kalh mai a. Ka lawm khawp mai. Aichhe hnah ka la a, kûnin ka’n suak dawn a, hnah ro tla khawm mai chu a lo ni a, ka nui mai a. A piah deuhvah chuan tui bawk hi a lo tling kual zai mai a, tih sual leh ka hlauh avangin ka’n chil hmasa a, a hma ang bawkin a ri ta ruap ruap a. Lung phek nuam deuh a awm a, ka ṭhu chawl leh a, thlifim hi a thaw heuh heuh va. Ka han dak chhuak chu ka hma deuh, thing zarah hian a vir zet zet a, mipa naupang kum 4 mi vel âwm hi fel tak hian a ṭhu vâng mai a. A piah deuh thing zar âwnah chuan lian pui mai, dum ther thur hi a ṭhu luau bawk a, a hawi hruk hruk mai a, ka lam a lo hawi a, a mit ni âwm tak hi a challah a de ru bawk a. Ka tho va, ka va en chiang ve ve a. ê, mak tak a ni! Thliin chhawl ro inkhai a chhem cheetah an chang thuai mai, ka khaw en a chian tawh lohzia ka hre thiam a. 

Ka han kal leh a, kawrtê hi a lo awm a, tui ka’n zawng a, a lo kangchat tawh a. Mahse, lungsumah hian a lo tling kalh a, tiar hnah hlai deuh ka khâwr a, ka zu suak da da a, balu tla khawm a lo ni a. 

(Chhunzawm zel tur)

Reference & Acknowledgement: -

Pastor bo khan thu a sawi dawn – Lalsawma, 2nd edition 1998, published by Saroj Laldinpuii, printed at Lengchhawn Press, Bethel House, Khatla, Aizawl.