Prometheus Unbound

 PROMETHEUS UNBOUND

Our sweetest songs are those that tell of saddest thought 

~P.B.Shelley

 Prometheus Unbound hi Percy Bysshe Shelly hlaphuah  (a lyrical drama) pakhat hming a ni a. A hla hming ringawt atang pawh hian thin a ţhawng hle mai! Prometheus han tih chuan sa hlauhawm leh ţihbaiawm tak a nih duh hmel hle mai a. Unbound han tih chuan phuarna leh a ţawnna atanga pitchhuak emaw talchhuak tihna emaw a lo ni leh a. Chuti a nih chuan Prometheus Unbound han tih chuan sa kawlh leh sa ţih-bai-awm tak, a phuarna leh a hlinna atanga talchhuak a, pawikhawih tur leh mi seh tur zâwnga phi ruai ruai laite pawh rilru mitthlaah a lo lang nghal  thei hial ta mai a ni. 

PB Shelley

Promotheus Unbound

 Prometheus chu enge maw a nih le? tih hriat tumin Greek Mythology kan han luhchilh chuan  Greek Titan hnam mi pakhat hming a lo ni a,mi danglam tak leh huaisen em em mai, mi naran leh mi pangngaiin tih-awm leh tih tina an tin miah loh, Van atanga mei (fire) ru chhuak a, Greek mipuite hnena a thlawna semchhuak tu a  ni a. Greek mipuite chuan mei an lo neih tak avangin ka khawsak a lo awlsam phah ta hle a, chuvang chuan Prometheus chu mite ngaihsan a hlawh ta em em mai a, pasaltha, mi tlawmngai, mi huaisen tiin a hming a lo thangin  a lo lar ta em em a ni. Greek Pathian Zeus hriat loh leh a remtihna tel lova chutianga dankalha thil a lo ti ta mai chu Zeus ngaihdan a ni lo nasa ta mai a,a rapthlak thei ang bera hrem a tum ta! A man a, lung tohlawt chungah thirkhaidiatin a thlung bet a,a thin(liver) chu Muvanlai (Eagle) a eitir ta a ni. Thawnthu a nih angin Prometheus thin chu zanah a lo insiamthar leh thin a, muvanlai chuan a thin chu nitin a eisak chatuan  ta  a ni. 

 English Romantic poet ropui leh thawmna ber lo ni ta,P.B.Shelly hi a naupan lai atang renga mi dangdai, rilru no (hypersensitive) tak, ngaihdan danglam,  revolu-tionary idea nei mi a ni a. A hmel lah chu a hmeichhe ţhat reuh lehnghal a. A tleirawl chhuah hlimin Pathian awm a rinloh thu (the necessity of Atheism) lehkhabu tě a ziak a, a semdarh chiam a, a zirna sikul & hostel atanga hnawhchhuah a ni. A puanthuah tela an in-a a  haw chu sakeibakneipuka lut ang hlauh! A pa thinrim ngaihdan ni lo lutuk chuan a lo be duh eih si lo va.

Chutianga rilru tawt leh ipik taka a awm lai chuan a tleirawl ngaihzawng Harriet Grove laizawn, Harriet Westbrook, kum 16 mi lek chu a pa chuan a duh lo chung Hostela dahluh a tum a, Harriet Westbrook chuan  hostela awm ai chuan intihhlum a tum tih a hriat chuan Hmangaihna la na mi Shelley chuan chhanchhuah ngai ta  tlatin a hria a. Harriet Westbrock chu a ru a, Scotland khawpui Edinburge lamah a tlanpui ta   a, Ireland-ah honeymoon an hmanpui ta daih a. England rama an rawn kir leh meuh chuan Shelley, kum 21 mi chu naute pa a lo ni ve ta reng mai.

A hla phuah (poems) lehkhabu tihchhuah a ni a, a hla-ah hian sakhuana a sawichhe nasa hle mai a, Sap khawtlang nun kherkhiap lutuk leh puithu lutuk  leh khunkhan ipik lutuk chu a sawi bawrhbang nasa hle bawk a. Hmangaihna la na mi leh sem zai thiam Shelley chu a hnu lawkah Mary Godwin, kum 17 mi lek tleitir sakhmeltha hmangaihna zun-ah a uai leh ta tlat pek a nih chu! A nupui  rai puar teuh leh a fa sěn te Elizabeth lanthe Shelley hnuchhawnin Mary Godwin nen chuan Switzerland-ah an tlan leh ta! A nupui hmasa Herriat chuan an tlan hlan hian Shelley fa pahnihna Charles Shelley a lo nei leh si. Mary nen chuan Switzerland atanga England rama lam ang an lo let leh chuan a nupui hmasa chu a lo intihlum! London khawpuia Hyde park  Serpentine luiah a ruang  hi char a ni.

Shelley-a’n a nupui hmasa Herriat ruang a han hmu zet chu….a rilru a khawihin a barakhaih nasa khawp a, a dam chhung Shelley hian rilru lamah ngai a awh pha tawh lo hial a ni. 

 Lungngaihna leh manganna te hi a mal tě tě in a lo kal lova, a hlawp hlawp hian a lo thleng thin! It never rains but pours! Mary nen chuan an innei a, fanau maltluan chawia chhungkaw hlim tak din an tum mek laiin an rin loh lam daih atangin thu dengkhawng zet mai an hre leh ta! A puzawn hmasa, a nupui hmasa Herriet pa chuan Shelly chu a fate pahnih enkawl tlak lo khawpa mi rilru sawngnawi a ni e tiin Court-ah a tűte 2 chu  ama enkawl turin a dil ta mauh mai le! Sappui lung fing Kumpinu  dan hre mi roreltute chuan ngun taka an han ngaihtuah hnu chuan Shelley chu mahni fate enkawl tlak lovah ngaiin a pu zawna enkawl a tan an relsak ta a, Mi rilru no ber mai chi leh lungleng mi tak mai Shelley tan Van pui a chim  a ni hrim e.

 Amah Siamkima Khawlhring (May his tribes increase & his Soul Rest in Perfect Peace) khan P.B.Shelley thuhlaril hi a han eiin a han ngaisang mai mai khawp a,a thuziak pakhat “In Defence of Poetry” tih a ziak avang ringawt pawh hian Shelley hian  Westminster Abbey hmuna Poet’s Corner an tih mai, English thu leh hla thiam filawrte  leh  an hnam pasaltha te sakruang  an zalhna hmun pawimawh lutuk chang tlak a ni e’ a ti mauh mai. Hranghlui Mizo zinga English thu leh hla lipuia liluh hmasa-in chuti fakauva a han fak na vei chu, khaw nge ka’n chhiar ve teh reng ang ka ti a. Ka han chhiar ve ta a le(h)!.... E heu!.. E khaia!..Ha-le-lu..i.. Awh! ka tihpalh.. Aih-ka-leih-saih!

 Shelley rauthalengin hlimsang tawnghriatloh changah ah min chhuah a ni ta ber e.

A thuziak changtin mai chuan ka hriat ve nial nual ka sawichhuah thiam si loh thinlai lung ruka ka lo vei zâwng kha Sap tawng mawl te te hmangin a rawn sawi chhuak ta zar zar mai a. Simple English is good English! an tih hi a lo dik na ngei e. Polish thuziak mi Joseph Conrad (1857-1924) khan  HEART OF DARKNESS tih thawnthu (novel) tha zet mai a ziak a, English literature critic ropui,  W. Somerset Maugham (1874-1965) chuan a thuziak hi English a ni lo e, a ti tlat. Polish mi lungkham leh  rilru mita a thilhmuh leh  a thil ngaihtuah kha Sap tawngin a ziak a, Sap pachal tan a  a sawi tum leh  a awmzia  hriat theih a ni lo” a tihna a ni. Father of Modern Linguistics an tih mai, Naom Chomsky ngaisang pha chin hi Mizo thalai lehkhathiam zingah engzat tak awm ang maw? ka hre lo va. Frontline Editor N.Ram hi chuan a ngaisang vet vet khawp a vawi tam tak a interview a, a kamchhuak  a ngaihnawm thin khawp mai.

 Mizo thu leh hla ngaihnawm lehlin lama sul lo sutu J.F Laldailova thawh hlawkzia hi mi â ni leng tan lo chuan hai rual a ni lova,a dictionary siam, zirlai ten an tangkaipuizia te leh Zosap-ho  Pathian fakna hla siam  biboh lutuk leh ţiţoh lutuk a sawiselna leh Bible lehlindan a duh khawp lohzia a tarlan thin atangin nasa takin kan mit a lo var phah a. Chutih rualin a sap tawng ziak  love letter erawh ka chhiar zo thei thlawt lo. Somerset Maugham pawhin chhiar ve ta se, hei hi chu English writer a ni lova, lexicographer a ni zawk e, a tih te ka lo  ring ve mai mai a. 

Mizo pa Sap tawng thuziak rau rau-ah chuan Rev.Dr. C.L.Hminga kohhran chan-chin a ziak kha a sap tawng ber niin an sawi a, A.Thanglura’n Scotch Whisky; nunna tui a han lem sek hnua Saptawnga a titi  khabe liam kha ka ngaihtla ve hman lo va, sap ţawng hrim hrim hi  a thiamin a hnehsawh hle a, a chhip samah ţhruaiin a duh duhin a chinglet thei niin  hmaichhana amah kawmtu L.Keivom chuan a sawi a.  Thawk la lovin hlam thum a sawi hman a ni awm e! Rev.Dr.Vanlalnghaka anga sap tawnga Pathian thu sawi thei hi Zofate zingah piang leh tak ang maw? Lalpa zawn chhuah ram leh hnamah kan inchhal ta sa sa, a aia tha zawk Lalpa hriakthih kan la nei turah ngai phawt ang.Rev.Dr.K.Thanzauva hi a ril-in, a Pathian thu hriat a zau hle a, a sap tawng pawh a ziakah na na na chuan han khan pha awm  Mizo theologian zingah an awm pawh ka lo ring lo ve ngawt pek a. Mizo Bible scholar ho khan inhre chiang zawk e. Tuna a ziak zawh tawh a bu-a a la tihchhuah loh phei hi chu India rama Theological  College hrang hranga zirlaibu-ah  a la chuang  ngei ang le. 

Rev.Dr.Lalsawma’n kum tam tak Mizorama harhna lo thlen dan a zirbingna, Mizoram Gospel Centenary puala Saptawnga a lehkhabu ziak Revivals- the Mizo Way tih kha ngun thluk deuhvin ka chhiar a, hmaichhanah “I saptawng hman a un em mai” tiin ka sawisel a, a ngawi vang vang a….. Chutah a rawn ţawng chhuak ta a, “I sawi dik khawp mai. German Theologian-ho hian Sap tawngin an Pathian thuzir Bible aia chhah chhah an ziak a, kan chhiar a, a awmzia kan hre thei hlek lo,” tiin mi chhang a. Mizo thlarau mi thenkhat thiangzau ngaihdan pakhat “Jehova iptepuiah chuan leng lo reng reng hi a awm lo ve” han tih te hi Kumpinu sumtuala seilian Sap pachal hriatthiam tura han lehlin chu har tak tur reng a lo ni.Hmangaih Johana ziak  Chanchin Tha Johana bung khat thu, King James Version ngei mai han chhiar hi chuan engemaw chung lam thilpek mak danglam tak hi chu a dawng chiang a ni tih keini kawr tial leh kawr rang, a rukrak ha ve mai mai te tan pawh hai rual a ni lo.

 Rev.Dr.Zairema’n “Mizo thalai M.A.English degree neite  kan interview a, George Bernard Shaw (1856-1950) kutchhuak te sawi thei a bar an awm lo” tih a ziak ka chhiar lai chuan ka ţim ur ur a,ka râ a sõ va, ka khua a sik lo chauh a ni.

University degree te hi hna hmuh nan kan inthěisem vel ta mai mai em ni le? Rev.Dr.Zairema han sawi kai tak a zarah  chuan kan tunlai kohhran lianho hian tunlai Mizo thalai lehkhathiamte hnangfak khawp leh  hrawkfah khawp relevant ministry hi min pe thei em aw? tih te ka ngaituah ve reuh reuh thin a, kan kohhran lian ten LPS leh Zonet kaltlangin TV programme te an han nei ve bawk a, a tihchangtlun leh hakzauh tumna target leh budget dah lem si lovin, a ţhing her lum min barh lui vel mai mai em ni aw? te ka ti vel mai mai a. Kan berampu thenkhat lahin inthlan dawn khan, ţhahnemngaih a na bawk a ni ta ve ang, chal hnawih sen hi Milem chibai bukna a ni tiin Pulpit-ah an lo sermon hűk dum dum bawk a, Puithiam Lal ber pakhat lahin Mizoram sorkar hmalakna te  an lo sawichhe ngar ngar vei nen!. Zotalk lamah lah  kan  mi chhuanvawr thlanchhuahten Mizoram mipui vote nei mihring nuai ruk vel lek mar dek tura fehchhuak si lovin EVM rintlak lohzia leh rinhlelhawmzia lam kha  evidence engmah entir tur nei si lovin hahipin an lo sep rawtui ve  chiam pek a, Zirtirtu hlun fel tak pakhat chuan EVM tihchingpen lai thlalak nei angin a insawi, an ti leh ta zel! Mahni kuang lo nawr thiam apiang hi Mizo zingah chuan mi “fel” a chhiar an ni lawi bawk si. Hna hmuh nan mai ni lo, Mahni hna ngai pawimawh leh mahni hna-a rinawm tlat, chhangchhiat  barhberh lai pawh a Sappui lung fing hmasate finthiamnaa tuihalna avanga zir ţang ţang,  Prof. Margaret Ch. Zama-in  Mizo thawnthu Rimenhawihi  a lehlin hi tha ka ti mai mai leh pek khawp a, Somerset Maugham pawhin han chhiar ve se, thiam a ti ve khawp hian ka ring a, “He nu hi ngal fim khup bilhin dam se, Mizo thawnthu zawng zawng hi   sap tawngin letling  vek se a tha khawp ang; 

Mizo forklores te hi B. Lalthangliana  lakkhawm, Burmese prominent writer, People’s U Hlah kaihhruaina leh endikna hnuaiah   Burmese version chuan  lehlin a ni deuh vek tawhin  vai buh ringa inti vai-tingtang thalaiten an ngaihnep em em, Burma  sorkar chuan  sorkar sumin Ram buai lai vel daih tawh khan a bu-in a lo tichhuak daih tawh   bawk  a” a tih ka ring hial zuk nia maw le! Awle… ka tlak  ta duah a, Hlum bela mâi-ân bai  phűl liam  hlűai ang maiin ka sõ liam  nasa  ta mah mah e.

 Tichuan, England rama hmelma doral kara mi hmaisâ tawn reng ai chuan tiin Shelley leh a nupui thar Mary  Shelley lo ni ta te chuan  Italy ram an pan ta a, zawhte no nei ang hrimin khaw hran hranah an cheng kual a, Rome khawpuia an awm laiin Shelley chuan a kutchhuak ropui Prometheus Unbound tih lyrical drama hi a ziak ta a ni. A hnu chuan Pisa khawpuiah awmhmun  bengbelin thuhlaril lama a sangawi zawnpui leh a aihnah phahpui Lord Byron leh Leigh Hunt  te nen inaialh tawn turin The Liberal tih chanchinbu chhuah   an tum a,an phurin an inthurual hle mai a. Shelley chuan thu leh hla  ril phuah lama a vanglai a hmang chho tan dawn chauh va, kum 30 a tlinna tur thla khat chiah a awm tawh tihin  “Rilru lo ruahman lawkna chu mihring chan a ni a, Lei chhanna erawh LALPA atangin a ni” tih  Chung Khuanu khűa rěl chu a chungah dan rual lohvin a lo theng ta si a ni. 

Shelley chu a ţhian  kawm ngeih tak  Navy officer pension Edward Ellerker Williams leh an chuanna lawng Don Juan khalhtu Charles Vivien  te  nen Leghorn atanga Leciri khaw lam pana,  Italy vaukam tuifinriata  an lo haw lam chu thlipuiin a nuai ta thut mai a, eng ang chiahin nge an chetsual tumahin an hre lo. An hriatchian chhun  erawh chu; kar hnih zet hnuah Shelley ruang chhe tawh tak mai chu vau kamah a rawn lâng chhuak ta tih hi a ni. 

Khatih hun lai vel khan Italy ramah hripui a len vanglai anih avangin a ruang hi khawchhunga lakluh an phal lo va, vaukam tiau vut-ah chinai tat lêm luamin an phum. A hnu-ah a ţhiante chuan a ruang phawrh lehin Viareggio khaw dai tuifinriat kam ţiau phovah  an hal ta a. A ruang halna meipui a alh vut vut tawh, Shelley ruang chu mei chuan a hlap alh zuai zuai! A thian duh tak Edward John Trelawny chuan a chem tě a phawrh! Shelley dul a zai ţět hawk!.A kawchhung a dap!. a lung a phawrhchhuak ta! 

Shelley ruang vap hi Rome khawpui Protestant thlanmualah phum a ni a, a thlan lungah chuan Latin tawngin Cor Cordium  "Heart of Hearts" tih ziak a ni a,a hnuaiah Shakespeare ziak the Tempest thawnthu-a  Ariel-a hla chang sawi “Nothing of him that doth fade / But doth suffer a sea-change / Into something rich and strange." tih ziak a ni bawk. A thih atanga kum 100  zet liam hnu-ah Westminster Abbey-a Poet’s corner-ah amah hriatrengna lung phunin Kumpinu chuan English romantic poet ropui (ber) hi a chawimawi ve ta a ni. Hringfa zinga Sap hla thu mawi elkhen leh  tha el tiang (the purest lyrical poetry ever written)  lo phuahtu Shelley fam channa kum 200 dawn  lai lo liam tawh  mah se  a hla chang pakhat  The trumpet of prophesy.O! Wind .If winter comes can Spring be far behind? a han tih  lai zet hi chu English thu leh hla  lipuia liluh pha ve lo, a vaukama lo cheng ve mai mai keini ang duang tawnah pawh Premetheus thin a lo insiamthar leh zel  thin ang khan   thinlai-ah a hlui lo a thar leh thin! Lairil a la fan ta fân e!

Aw! Virthlileng! 

Sik-nieng mawi  chuan Nipui a rawn herchhuak dawn ta,

Tih kawlvalencham atang  rawn puangchhuak e.

Hringfate thinlaia sual, hnah hluite iangin 

Chhem ţil la, par ang  chula uaiin,

Thinlung thianghlim, tha leh duhawm, 

Zalenna famkim zawk nen;

 Nipui siahthing hnah nem iangin 

Thinlaiah rawn chawrthartir ta che aw, Virthlileng!