Sikni Eng

TLEITIR SAKHMELIN A CHO LOH SIKNI ENG 

~Familia Fanai Lalṭansanga

“Tleitir sakhmelin a cho lo che,

Par tin mawina pawh i zar an ni;

Sappui thil tin tuahrem thiam pawh hian,

Nang anga rawng mawi an ban ngai lo.

Aw, khawvel mawina sikni êng,

Ka fak seng lo’ng che lungmawla’n;

Nang hi i ni ve ang remna,

Lal fa pawh khan a rawn pan.”

Zikpuii pa hian khawvel mawina hi a hmu chiang a, Zoram mawina a hmu chiang lehzual.

Chu Siamtu kutchhuak mawi leh ropui tak takte chuan a thinlung a tithinghlimin a rilru pawh a ṭhat phah niin ka hre ṭhin. Chu mai a ni lo va, science zir sang si lova khuanu kutchhuak mawina zawng zawng awmtir tu Sikni êng (Ni) pawimawhzia, “Par tin mawina pawh i zar an ni” a han ti thei tlat mai hi mak ka tiin a ngaihtuahna rilzia a pho lang chiang lehzual hle ka ti a. Chu mai a la ni lo leh ta zel! Sappui lemziak thiam kutchhuak meuh pawhin Sikni êng anga rawng mawi an ban ngai lo tiin nature mawina ropui ber awmtir tu chu sikni êng(Ni) a nihzia keini ang duang, mi mawl ber tan pawha hriatthiam awlsam tak Mizo hlathu tluang taka an han dah thiam mai pawh hi ropui ka ti em em a ni.

Sappui nature lemziak thiam hmingthang,  Joseph Mallord William Turner meuh pawhin, “Khuanu kutchhuak hi hringmi kutchhuak hian a tluk ngai lo vang,” a lo tihte, Khawvel lemziak dan phung rawn her danglam bawih thei, French artist ropui Claude Monet-a’n Impressionism a rawn tihchhuahna, ‘Impression Sunrise’ lem a ziak laia a rilru te nen pawh Zikpuii pa ngaihtuahna hi la duang khat anga zai khata luang an ni a. Kei lunglai-mawla hian sikni êng mawizia hi ka fak thiam lul lo ve, Vanlal fapa meuh pawh kha he khawvel thlaler ram ro, mihring ngaihtuahna reng rengin a hriatsen loh manganna, lungngaihna leh thihna hial hmachhawn tura  a lo kal chhan kha he sikni êng mawi vang hi a ni hial lo maw? He sikni êng rawn chhim tur hian thlasik khawvawh lai tak hian Ranchaw thlenga pian an rawn thlang ta hial em ni le? a ti a nih hi!

Zikpuii pa hla phuahah hian amah pawltu eng emaw rau a awm niin a lang a, spontaneity a awm tlat! A hla thu inlaklawn ṭhat danzia leh a thu inrem dan flow, rhyme & rhythm mar ṭhatzia aṭang hian he hla hi hâr laka hel nuaia phuah hram hram a ni lo tih a chiang e! Pathian hla phuahtu nazawngin hlimsang zia la-a “Pathianin min pek” an han ti teh chawk, an hla phuahte ai hi chuan Zikpuii pa hian hla petu chu a nei ṭha zawk niin a lang ka ti.

Hmangnaih Johana’n “Atirin Thu a awm, Thu chu Pathian hnenah a awm, Thu chu Pathian a ni. Chu mi chu atirin Pathian hnenah a awm. Engkim azain ama siam a ni; thilsiam zawng zawng hi ama siam loh engmah a awm lo. Amahah chuan nunna a awm; chu mi nunna chu mihringte enna a ni a.” a tih hi Pathinin Thu bawk hmanga êng awm tirtu Ni a siam a ni a, chuvangin Thu tih aiah hian Ni êng tiin thlakthleng ta vek chhin ta ila, a la dik em em tho a ni.

“A tirin Ni êng a awm, Ni êng chu Pathinin a siam a ni, Ni êng chu Pathian inlarna mihring mit-a hmuh theih chu a ni. Chu mi chu a tirin Pathian hnenah a awm. Engkim a zain Ni êng siam a ni; thil siam zawng zawng hi Ni êng siam loh engmah a awm lo. Amahah chuan nunna a awm; chu mi nunna chu mihringte ênna a ni a”.

Ni êng hi khawvela nunna nei tinreng thil nung, ramsa leh rannung bakah thing leh mau leh fuliafa zawng zawngte nunna hnar a lo ni a, thli te, chhum te, ruah te, ṭek te thleng hian a bul thum-ah hian Ni siam loh engmah reng a lo awm lo a ni.

Ni-ah khian atomb bomb aia chak fe zawk, Hydrogen bomb hi nuclear fusion reaction avangin a puak reng ang a ni a, chuta ṭanga lo kal, êng zungzam leh lum chu khawvel hian a lo dawng a. Ni êngah hian mit lawnga hmuh theih, ni zungzam bakah mit lawnga hmuh theih loh infrared rays te, ultraviolet rays te, gamma rays te an awm a. Infrared ray tih loh rays dang hi chu kan leilung tuamtu boruak hian a lo hip ral a, khawvela rawn thleng pha ta ber chu lumna petu ber infrared rays hi a ni ta a ni.

Ni zung hi mit lawnga a var anga kan hmuh theih hi kum 1665 daih tawh khan Sir Isaac Newton chuan chhimbal rawng ang rawng chi 7 insiam a lo ni tih a hmu chhuak a, rawng sen hi ti dal tial tial ta ila, a tawp-ah rawng var-ah a chhuak ang. Chu rawng sen bawk chu titak ta tial tial ila, a tawpkhawkah rawng dum-ah a chhuak leh ang. Chutichuan, rawng var leh rawng dum inkarah hian khawvela rawng engkim mai hi a lo inkhung leng vek mai a lo nih chu! Hmangaih Johana tawngkam bawkin Ni eng chu han sawifiah leh dawn ta ila, “Kei Alpha leh Omega, a Hmasaber leh a Hnuhnungber, a Bul leh a Tawp ka ni” a tih ang khan Ni hi kan hrilhfiah thei bawk ang chu.

Tichuan Ni zung hi a mur sin te te photon leh mobile signal ang electromagnetic waves nihna a nei khawp a ni. Thu hi hla a ni a, hla hi thu a ni an tih ang deuh rohvin hla tlar khat hian thu a pai tam em a ni. Ka han tlak leh ta duah a ni e.

Mizo thuziak mi ṭhenkhat ṭhahnem ngai leh lutuk te hian Mizo hlaphuah thiamte hla hi an zir chiang a, poetry an lepse angin a hla thu-ah chauh an ngaihtuahna zawng zawng sawr bingin critical appreciation & critical analysis an ziak chiam chiam ṭhin a, hla-ah hian a pawimawh lai ber chu a hla thu leh a hla thluk a inrem em? tih hi a ni zawk!

Keini ang duang hla phuah ve, “Mahni hla phuah mahni-in kan sa ri rut rut,” an tih ang ni lo hian Zikpuii pa hla phuah chhun hi chu a hla thu dam dap ang hian a hla thluk nen a inrem em em a, a hla thu pawh a tirilin a titak ta a, benga hriatna aṭangin thinlai a fan raih bik a, Zoram mawina hmu thei lo mitdel tan pawh mitvarna tling, Zoram mawina min hmuhtir aṭanga mahni ram leh hnam hmangaina (nationalism) ramah min hruai lut ta dial a lo ni! Nationalism hi thusawi thiam leh ṭawngkam bungraw ngah, Pu Laldenga chuan ‘mahni hnama chian’tiin a sawichhuak thung. A awmzia a la phawkchhuak zo lo fe!

P.B. Shelley te kha English romantic Movement mei si rawn hlap alhtu zinga mi an ni e kan ti a nih chuan 1950 kuma he hla ropui ‘Sikni Eng’ lo phuahtu Zikpuii pa hi Mizo Romantic Movement sulsutu chu a lo ni chiang bang e kan ti thei ve dawn lo em ni? Chutiang bawkin P.B. Shelley-a’n “If Winter comes, can Spring be far behind?’a tih ang hian Zikpuii pa’n Kumsul lam ang a lo her chang hian, Sikni êng mawi a rawn thlen leh ta’ a tih rual ruala Zofa leng zawngte rilru-a lo lang ta chu kum tir aṭanga Tlumtea thlira kan lo thlir “Lal pian hun champha” a lo hnai ta a, Sikni êng leh zan daifim chawmin Tleitir sakhmel iangin Tlaizawng par a rawn vul leh dawn ta’ tih hi a ni dawn lo vem!

Shelley khan thlifim leh virthlilenga chan tak hi a napin a chak et et ṭhin a, a kawchhunga rawn chenga thlifim anga zalen taka rilru hahna leh ipikna tel miah lova khuavel han chuan velte hi a chak hliah hliah ṭhin a. Chu thlifim hnenah chuan “My spirit, Be thuo me, impetuous one’ a ti hial reng a, a duhaisam leh a hmathlir a rukte-a biathu anga hlanin “The trumpet of Prophecy! O wind, I winter comes, can spring be far behind” a ti ta chiah reng a ni.

Thlasik lai hian hnah hluite chu a lo uai-in a lo chuai a, Zo thlifimin a chhem ṭil ṭhin a. Chutiang chiah chuan Shelly hian a hla hril hmang hian thil hlui, ngaihdan hluite chhem ṭil vek se a duh hle ṭhin a. Nipui a rawn thaw ṭan a, Chhemdam thli thaw heuh heuh karah siahthing zar tin-ah hnah nem leh thar leh no a rawn chawr no hlep hlep ang hian mihring rilrua Chhura rual rilru leh ngaihtuahna ṭhing leh mawlte chu ngaihtuahna tharte hian rawn thlak se, chu mihring chu siam thar lehna chang ‘thil siam thar’ lo ni se tia Shelley duhaisam leh lungkham a sawina a ni ber ‘Ode to the West Wind’ hi.

Chutiang deuh chiah chuan Zikpuii pa lei taksa, a sakruang chu piallei thuah riat thuai-ah dar tui ang luang ral tawh mah se, Zikpuii pa Sikni eng chu a ngaite in a rawn her chhuak leh ngei ṭhin a. Chu Sikni êng mawi lo her chhuah rual chuan Mizo ṭhalaite thinlai-ah kan Zoram, chhawrpial run iang mawina leh duhawm bikna te hmuh belh zelin Zoram hmangaiha Zo nun ze mawi ngaihlut nachang hre deuh deuh ila, chu ngei chu a ni dawn lawm ni Zikpuiipa duhaisam leh a lungkham chu?

Sangzuala pa chu Bairabi thlang, Tlawng lui kamah a ding ang teu to va, Zoram chin leh Assam ram chin, Tlawng lui dunga rairuangte chu a han thlir a. Ngai teh! Assam ram lama rairuang ai chuan Mizorama rairuang ngei chu a hmu mawi bik ta hliah hliah mai a nih chu! Chu tak chu a ni nationalismbul inṭanna chu!

P.B. Shelley kha English literature lama mi thiamte chuan vantirhkoh mawi tak leh fing tak, a thla mawi tak zap-a thlawh tum, thlawk chhuak thei si lo (a beautiful and intelligent angel, beating in the void his luminous wings in vain) angin an tehkhin a, a dikna chen pawh a awm ngei chhap e! A tumruh luat-ah Sappui khawtlang nun a tawng chiam chiam a, a vawtuin ek a cheh a. Amah zawk chu mi ang lo angin ram dangah an hnawtchhuak ta zawk a! Kum 30 a tlin hma-in Italy tuifinriat-ah lawngleng chesualah Shelley chu fam dai rial changin Awmlai hrang kut vawt tak chuan chawnbanah kaiin Rih sang mual a liampui ta si! A sap ṭawng ṭhat tehlul nen a tum ram, raltiang ram kai pha lovin a hla thu chheh a fuh thei tlat lo! A ngaihdan thar chawk luh erawh English literature-ah hian hmun sang a luah reng a, a chuai tawh lo vang khawvel awm chhung chuan!

Zikpuii Pa hian khawvel hun inher danglam dan leh khuanu kutchuakte an inher rem dan mawlh mai hi a hre chiangin a hmu fiah em em a, a hun a zir zelin thing leh mau leh nungchate nunphung danglam dan te a hre chiang hle a ni. Mi tam zawk ten thing leh mau ten hnah thar chhuahin an nunphung an thlak danglam a ni tih pawh kan hriat loh lai, ngaihtuah pawh kan ngaihtuah phak loh lai leh, nungchate hram pawh bengchheng leh ninawm mai a kan ngaih laiin Zikpuii Pa thlirna mit leh beng aṭang chuan an mawiin an hlu em em a, Siamtu fak nana ze thar chhuah a, awrawl chhuah niin a hria a, chu a hmuh dan anga hmufiah a hrethiam ve turin min duh a, “Thlir ve u, khawvel mawina hi..” tiin min au lawm lawm a, a hmuh dan leh a hriatdan ang a hmuthiama hrethiam ve tur hian min ring ngam leh meuh silo a niang, “ Hringmi leng hian dawn thiam ve maw?” a ti thlawt ta mai.

Kumsul lam ang a lo her chang hian,

Sikni eng mawi a rawn thlen leh ta,

Zingtian lenkawl leh ram loh lentu;

Thingsiri zar tin an mawi mang e,

Thlir ve u khawvel mawi na hi,

Nungcha rawl leh par tin hian;

Siamtu famkim zia an tar,

Hringmi leng hian dawn thiam ve maw?

Thlasik rim a lo nam a, kan hma lawkah Krismas hunpui in min hmuak a, rilru hi eng emaw ni hian min mawlh a, sawifiah thiam hleihtheih loh zun hian min uap tlat ṭhin. Rilru-ah tun hma nun hlui a lo lang a, mitthla ah tu tu te hmel te pawh a rawn lang iar iar a....mahse koh let theih a ni tawh lo....hun in a liam pui tawh si...mahse...'Sikni êng' zunzam vang hian rilru-ah erawh an lo thar leh ṭhin a nih hi.

Zana van boruak thiang tak karah si meikhu leh thlasik kawng khu zam raih te khian boruak dangdai hun lawmawm a entir a. A ni, chhum zingin thlapui eng mawi tak mai a khuh no paw riai mai a. Chhawr-loh-Thlapui chuan chhum zing chu a chhun eng paw riai mai bawk a, heng thil pahnihte hi han thlir vang vang pawh hian a inhmeh zia leh a inchawih mawi tawnzia a lang a ni. Heng te hian Siamtu khuarel famkimzia leh ropuizia a puangchhuak chiang ṭhin. Damhauhvan, “Zankhua a thiang, thlasik kawng, chung siar pawl riai e,” a tih angin amah Zikpuii Pa hlathu ang hian lunglenna thlarau-in min pawl chang te hi chuan sava te nen a nun inthlenga an mahni ang mai a hla te khua a thlawk bovin khawvel lungkhamna awm lohna hmun a duhtawk a nun hman a chakawm ṭhin.

Thinlai a fan nun hlui mual liam hnu,

Thinlai darthlalenga’n a lo lang,

Suihlung lengin khua tin hawi ila;

Chuan ka nuam lentu zo thing tin dir,

Sirva len thiam nun in thlengin;

Khawvel taksa lungkham pelin,

Chuan ka nuam ram loh lentu,

Zingtian sikni eng mawi lawmin.

Pathianin Mosia hnenah dan a pe a, Chu dan chuan Lalpa hnam thlante a chhanhim lo va, sual hriatna mai chauh a ni si a. Pharisaite chuan uire den hlum tur zawng reng rengin an phi ruai ringawt! Mizoramah zu an khap bur a, chu dan sakei chuan mihring rilru a hmin lo bawk a, a hlawhchham let der! Zu aia ṭha lo zawk ruihhlo a tipung chiam ringawt. Mahni kenkawh zawh loh tur tih hriat sa reng dan siam hi khawchhak mi fing Lao Tse chuan, “Sual lian pui (crime) a ni tawh hrim hrim,” a ti.

Thu leh hla thiamte hian kan rilru chhung rila ziak loh dan min lo siamsak erawh hi chu a zia a dang daih mai a, dan bawhchhiatute mantu tur police awm a ngai lo va, kan chungthu reltu tur roreltu awm a ngai hek lo va, dan bawhchhiaa thiamloh an chantir te hremna tan in awm a ngai na hek lo. Thu leh hla ṭha chuan kan thinlung phekah zawk ziak loh dan chu a lo dah ru khiau va, a ruktein kan hriat loh hlanin kan chhia leh tha hriatna min lo kaihruai daih mai hi a lo ni a. Felna kawngah te min hruaiin mahni ram leh hnam hmangaihna-ah te min hruai lut ṭhin a lo ni. Helai thu, P. B. Shelley ziak ngei hi a ngial a nganin ka han ziakchhuak ang a, Mizo ṭawngin ka letling dal rai tingtang lo mai ang e!

“Poets are the hierophants of an unapprehend inspiration; the mirrors of the gigantic shadows which futurity casts upon the present; the words which express what they understand not; the trumpets which sing to battle, and feel not what they inspire; the influence which is moved not, but moves. Poets are the unacknowledged legislators of the world.”