Supreme Court beng a thleng

 Manipur violence>>

SUPREME COURT IN MANIPUR BUAINA A NGAIHTUAH ZEL

"He buaina CBI chhuitir hi kan duh lo"

- Colin Gonsalves 

Advocate 

JULY  31, 2023 :

Vawiin Thawhtanni hian Supreme Court chuan Manipur buaina chhuak chungchang thu buai a ngaihtuah zui leh a. 

Solicitor general Tushar Mehta, Attorney General of India, R. Venkataramani te chu Central sorkar aiawhin a ding a, he thu buai ngaihtuahtu bench hi Chief Justice DY Chandrachud in a ho thung a ni. Central sorkar chuan Manipur  buaina leh tharum thawhna chungchang chhui chianna atan hian apex court-in a bawhzui zel (monitors the investigation) hnialna a nei lo tih Supreme Court hi hriattir a ni. 

He thu buai ngaihtuahtu bench ah hian CJI DY Chandrachud, Justice JB Pardiwala leh Justice Manoj Misra te an ni.

He bench hian Manipur Tribal Forum Delhi in thu buai an theh luh leh Supreme Court in Sou moto hmanga thu buai a siam kha ngaihtuah chhunzawmna an ni. 

He thu buai ngaihtuahna a thu buai theh luttu aiawha ding advocate te hi Supreme Court Advocates hmingthang țhiau, Kapil Sibal, Colin Gonsalves, Indira Jaising, te an ni a. Manipur state buaina hian India ram a nghawr nghing hle a, Parliament monsoon session pawh ro rel hlei thei loa Prime Minister Manipur buaina chungchang thu sawi tura Opposition party lamin an la phut zel a, chuvangin ngaihven loh theih a ni lo.

1. Senior advocate Kapil Sibal, chu May 4 a hmeichhe pahnih saruaka kawng zawhpui aiawhin a ding. 

2. Kapil Sibal hian Supreme Court hnena a thlen chu. Hmeichhe pahnih saruaka kawng zawhpuite khan he thu buai chhui turin CBI an duh lo a, he thu buai ngaihtuahna hmun ( trial court) sawnna atan Assam an duh lo.

Central chuan he thu buai ngaihtuahna hmun ruat theitu hi Supreme Court chauh anih avangin Central hian he thu buai ngaihtuahna hmun atan khawi state mah a thlang lo tih Supreme Court a hriattir . 

3. “Hmeichhe pahnih saruaka kawng zawhpui viral video chauh kha he state chhunga hmeichhia chunga tharum thawhna  thleng awm chhun a ni mai lo. Thil thleng dang tam tak pawh a awm. Chuvangin, zau zawka ngaihtuah tur (wider mechanism) hmanrua eng emaw tak khatiang thil thleng dodala a, thil tisual leh hrem ngai te hrem thei tur a awm a ngai a,” Supreme court chuan a ti.

4. Sorkar aiawha ding Attorney General (AG) R Venkataramani chuan Supreme court hnenah, “Keimah hian mimal takin CBI thil  chhui chianna chu ka vilvangin ka enpui ( monitor) thei ang. Chu chu ka intiamna a ni e,” tih Supreme Court a hrilh. 

5. Senior Advocate Kapil Sibal, thu buai theh luttu aiawh chuan, “Hemi chungchang chhui zui tur hian Supreme Court in a enzui zel  Special Investigation Team (SIT) siam ngei se, chu chu CBI ai chuan kan duh zawk,” a ti. 

6. “Solicitor General (SG) Central Sorkar aiawh Tushar Mehta chuan, “Central hian he thu buai chhui chian hna CBI in an thawh zel a, Supreme Court in a enpui zel hi hnialna a nei lo.”

7. Senior advocate Indira Jaising chuan chu thu chu rawn hnialin high-powered committee-in  Manipur hi a hmun ngeiah tlawh se, he buaina vanga kut tuar (dam chhuakte) thu sawi ngei hriat anih hnuah report siam ni se. Supreme Court hian chu report ațang chuan a hnu lama hma lak zel dan tur rel rawh se, tih a sawi zui nghal. 

8. Senior advocate Colin Gonsalves, thu buai theh luttu aiawha ding chuan  Manipur buaina nasa tak leh tharum thawhna thlen chhan chhui chiang tur hian  SIT (Special Investigation Team) din ngei turin Supreme Court hi a ngen a. SIT member atan pawh retired senior police officer te awm ngei se. A sawi zel dan chuan pawngsual tura ruahman leh remruatna pawh a awm ngei a, chutiang thil thleng chu hmun 16 ah a thleng a ni.

 Supreme Court hnena ngenna a thlen belh chu he buaina chhui chiang tur SIT member zingah hian retired police officer te ruat ngei ni se, Manipur a thawk tawh chu ruatctel ni lo se tih a sawi.

Supreme Court a ngen nawn leh chu, "Manipur buaina hi SIT ngeiin chhui se, CBI chhui an duh loh thu" hi a ni.

9. "Thil thleng chungchang inrawlh  (intervenors) an awm ngei thu Supreme Court hnenah hian thlen a ni. “Police hnena thu buai (FIR) theh luh hi thil ti sualtu man chhuahna hmanrua (criminal procedure) atan a tawk lo a ni,” tih thu advocate Vrinda Grover chuan Supreme Court chu a hrilh a. Thil thleng pahnih thlen dan ziaka a thehluh telah chuan Imphal khawpui chhunga Kuki hmeichhe pahnih car silna (car wash) hmuna inhlawhte chu an pahnih hian pawngsual rawn an nih hnuah thah an ni.  An chhungte chu  relief camps ah an awm a, Police hnena FIR theh luh anih hnu hian țanpuina leh thil dang an dawn ve zawng zawngte pawh tih tawpsak vek an nih thu a lehkha thehluhah hian a ziak tel bawk. 

10. Advocate Grover sawi dan chuan Kuki hmeichhiate an hmeichhiatna bitum zawnga tharum thawhna hi chiang takin a awm tih thu a sawi chu  Central Sorkar aiawha ding Solicitor General chuan a pha thung a ni. 

11. Senior advocate Indira Jaising-in Central in report a dawn a sawi dan chuan FIR 595 ziah luh tawh a ni a, heng zingah hian pawngsual, in rawk, tualthah thu buai te an ni tih Supreme Court a hrilh. 

12. Hmeichhe pahnih aiawha ding India ram Advocate lar Kapil Sibal chuan, hmeichhe pahnih mualpho taka saruaka kawng zawhpui kha Manipur police remruatna leh puihna vanga thleng anih thu leh hmeichhe pahnihte kha police in mipui kal khawm hnenah an hlan, hnutchhiah a, khatiang thil kha a thleng zui ta a ni tih Supreme Court hnenah a sawi. 

13. Kapil Sibal chuan, hmeichhe pakhat zawk pa leh a unaupa chu thah an ni a, an ruang pawh tun thlengin an kutah hlan a la ni lo. Hemi chungchangah hian May 18 ah FIR ziah luh a ni chauh. Hemi inkarah hian thil dang tam tak a thleng ang. Heti chung hian kan la ring zel ang maw a ti. ( Hriatthiam theih tur takin Manipur police chungchang a sawi). Chuvangin, he thil thleng chhui tur hian CBI ni lo, Independent probe a ni kan duh, tih thu Supreme Court hnenah hian a ngen a ni. 

PIL HNAWL

Mayianglambam Bobby Meitei chuan "poppy cultivation and narco terrorism" chungchang SIT chhuitir tura PIL vawiin July 31, 2023 a a theh luh chu Supreme Court hian a hnawl. Advocate atan a hman Madan Diwan hetianga hnawl anih tak avangin a thu theh luh chu hnuhdawh a dil leh ta a ni. 

A LA TAWP LO

Thu buai ngaihtuah (hearing) hi Supreme Court hian a la zo lo, naktuk August 01, 2023 chawhnu dar 2:00 ah chhunzawm leh a ni ang.

CBI Vs SIT

Kuki hmeichhe pahnih chungchang leh  Manipur buaina chhui chiang tur hian Central Sorkar chuan CBI a ruat tawh a, thu buai theh luttu lam erawh chuan SIT (Special Investigation Team) ngeiin chhui se tih leh CBI chhui an duh loh thu chiang takin Supreme Court hnenah hian an thlen thung a ni.

THU TLUKNA

Vawiin Manipur tharum tharum thawhna thu buai chungchanga thil thlen dan leh chhui zui zel dan Supreme Court chuan a ngaithla a, thil thlen dan tam tak pawh a hriat belh ngei ang. Chawpchilh taka thu tlukna leh bawhzui anih dan tur hi  Supreme Court hian a puang nghal lo. A thu rel leh tih tluk dan erawh ngaihven a hlawh hle ang.

Source :

• Hindustan Times 
• July 31, 2023 
• Times of India 
• July 31, 2023 
• Bar and Bench 
• July 31, 2023 

~Huna Kawlvawm