THUNDERBOLT-1

TAKE IT EASY, MR. BOND

Mi tam tak chuan tuk țhenkhat hi chu sut huphurhin buaina hlir in min hmuak ni mai hian kan hre thin a. Chumi tuk zet zawng James Bond pawhin hrehawm a tiin han phurna tur chhan awm hi vang hlein a hria a ni.

Chumi tuk ber kher chuan ala tawn ngai zen zen loh rilru ala pu zui leh ta nghal a, amah leh amah a inzahpui ve tlat mai a ni. Zan lamah alo lem hnem deuh avangin a pentawng nasa in a lu chu a na rit bur mai a, a han khuh zawng te chuan a khawhmuh te chu a thim mup mup mai thin a. Hei hi a mei heh lutuk vang a ni a, zu in tam chuan mei heh a chawchhuak fo reng a ni. Zana park lane-a whiskey leh soda no 10 a in-na phei kha chu a hma a mite ang thovin a lem a nuam ná a, a hnu-ah a ka a kha deuh fuk tlat mai a, chu chu a intam lutuk deuh vang pawh niawm tak a ni.

Chutiang hunah te chuan zu mai bakah a card khelhlai chu chawlhsan tawh mai awm tak a ni a. Mahse a zu in chuan phurna danglam tak a pe tlat a. Finthlak loh takin a khel zui leh ta reng a ni. A tawpah phei chuan a card ken chu Zum Queen in a vawthla fai vek a, pounds 100/- zet ba a insiam ta mai reng  a ni.

Tunah Thawhtan ni an chuangkai leh ta si a, kartluan maiin a hna pangngai chu a thawk leh dawn a nih hmel lehnghal a. May thla ruahsur chuan tukverh darthlalang chu a rawn theh thawt thawt a, Bond chuan nachhawkna damdawi mum 2 a lem a, phurlo dehvin a inchei ta a. Chulai tak chuan a mut pindan a phone chu a rawn ri ta a, a ri rindan leh ki atang chuan an HQ lam atanga rawn biak a ni tih pawh a hrethei nghal a.

James Bond chuan beiseina avanga thinphu dawt dawtin chair a pawtchhuak a, a thutfel hnu chuan a lo hmachhawn tawh fo, a pu mitmeng uk fiah tak mai chu a han en a. 

"Chibai, James. Ala hma viau na a, ka rawn ko hluai che a, i lo hrethiam dawn nia. Hna ka ngah si a, ka buai tak tak hma a hmuh che ka duh a ni."

An pu M-in a number ni lova a hminga a koh tawh hi chuan beisei angin thil a awm ngailo tih a hriatchian avangin Bond-a phurna pawh chu a chuai nghal rawih rawih a, a lo biak danah hna lam thil ni lovin mimal thil zawk niin a lang a. M hmel chu a nelawmin hna lian tham a awm changa a hmel put thin ang kha a pu tlat lo a ni. 

M chuan, "Kan inhmu lo rei viau mai a, James, enge i an? I hriselna lam ania ka tih ber ni." a ti a, a hma dawhkan a lehkha chu a la a, a han bih a.

Bond chuan a lehkha ah chuan eng thil lam nge inziak ang tih a ngaihtuah zui nghal a, ngaih thalo rilru deuh hian, "Ka tha e, ka pu," a han ti liam puat a.

Dam duam hian M chuan, "Chu zawng, Medical Officer ngaihdan a ni hauhlo mai, James. I in entirna hnuhnung ber kha hei, ka kawl a, a rawn ziahdan hi i hriat ve a that ka ring," a ti ta a.

Thinur teuh chung chuan Bond chuan lehkha hnunglam chu a han en a, insum hram hram chung hian, "I thu alawm, ka pu," a lo ti a.

M chuan Bond chu a han en vang vang a, tihian a lehkha ken ah chuan a lo inziak a.

'He officer hi a taksa landan mai chu a tha a, mahse a nun hmandan han chhutin hetiang hi chuan rei a awm thei lovang tih a hlauhawm khawp mai. Vawi tam hrilh anih hnuah pawh nitin cigarettes 60 zet a la zu fo va, a mei zukte hi nicotine paitam chi Balkan mixture an ni a, a mantlawm chi aiin thur an pai tam zawk daih a ni. Hna hrehawm leh hlauhawm a thawhloh lai chuan he officer hian  nitin zu chak chi, za-a 60-70 zu hlang, um chanve a in ziah a, uluk taka han en chuan a taksa hi a tlahniam ve deuh tih a hriat theih a ni. A lei a chhah a, a BP hi 160/90 ah a sang a, a kaldan a mumal lo bawk. He officer hi han dawp deuh chuan a lu a nat thin thu leh tihrawl, phu zeih zeih thin a neih thu a pha lo bawk. Heng te hi a nun hman rahchhuah vek niin a lang. A insum lohna hian a hnathawhna kawngah thleng a nghawngbuai thei a ni tih chu a pawm vaklo lehnghal a; hei hian officer ni tur leh a hna tlin tura a dinhmun a tiphet vek mai ang tih a hlawuhawm hle. Kei chuan No .007 hian karthum vel insum nan leh inthunun nan hmang se ka duh a ni. Chumi hnu ah chuan a taksa pawh a hma ang bawkin a 'fit' leh ngei ka ring bawk.'

M chuan a lehkha chhiar chu a hma a lakchhuahna tur dahna, 'out' tih intarna thlengah chuan a dah a, dawhkana a kut pharh chung chuan Bond chu mitmeng thutak deuh va en chung chuan, "A tha zan lo a ni lawm ni, James?' a han ti a.

Bond chuan, "Ka tha alawm, ka pu. Tupawh an lu te chu a na zeuh zeuh fo alawm. Kartawpa Golf khel hote pawh hian tisa phu zeih zeih te hi chu an nei fo va, damdawi ei chuan a reh leh mai a ni. Eng vak a ni lo, ka pu," tiin phat mawi a han tum a.

M chuan vin deuh lek lek hian, "Chutah tak chuan i tisual a ni, James. Damdawi ei ringawt hian kan kan natna a tidam ni lovin a thunun satliah mai zawk a ni. Damdawi hian natna bulpui tak a zu khawihpha lo va, a hliahkhuh mai chauh a ni. Damdawi ei fo chuan natna chu atawp ah benvawn angin a chhuah thei zawk a ni. Pathian thilsiam dan nena inhawisan tlat mai a ni a, kan ei leh inah te pawh hian hei hi a hmehbel theih vek a ni. Chhang thenkhat chu a vitamin lai paih vek a ni a, chini te lah khawlin a thatna lai ber a thligfai vek a; bawnghnute te pawh hi chhuan rei lutuk chuan a hriselna pai a thi vek thei bawk a sin," tiin chutiang lam chu a sawi ta teuh mai a.

Bond pawh chuan, "Kei chuan chhang ka eitam vaklo," a lo ti ringawt a.

M chuan, "Chu phei chu a ni mai thei. Mahse wheat lam leh bawnghnute lamte hi engzat chiah nge i ei thin? Thlai leh theirah lam te pawh hi?" a han ti leh a.

Nui chung hian Bond chuan, "I sawi ang chi chu engmah eilo ang ka ni, ka pu," a lo ti a.

Dawhkan khawng ri kauh kauh chung chuan M chuan, "Nuihzatthlak a ni lo a nia, ka sawi hi lo chhinchhiah rawh. Hriselna kawng zawh tur chuan nun pangngaia nun  hi a tha ber a ni. I buaina leh harsatna zawng zawng chu..." Bond-a'n hnial a lo tum vhu a han vai a, tihian a sawizawm lehnghal a. "MO-in a sawi ang khan i nundan kawng dikloh vanga tur inchhekkhawl hnathawh vek a ni. Bircher Brenner hming i hre tawh em? A nihloh leh Kneipp, Preissnitz, Rikkli, Schroth, Gorssman leh Bilz te hi?"

"Hrelo, ka pu,"

I hre tawp reng nang. Ka sawi tak ho chanchin hi i tan chuan zir chi tak a ni ang. An zirtirna hi atthlak takah ngaihsak lo la," tiin M chuan a hma aia phur hian, "Hengho zirtir chhuah zinga thenkhat chuan England ah hian bu an khuar hlauh mai a, Nature Cure chu banphak maiah a awm a, a tihzia hle mai," a han tihzawm a.

Bond chuan M chu makti tak hian a han en a, a thusawi awmzia chu a man chiahloh avangin 'tar at intanna a ni mai lovang maw' tiin a lo ngaihtuah hman a. Mahse M chu nidang zawng aia harh leh rilru fim ni hian a langa a, a mitmeng lah a fiahtha hle mai bawk  si. Chutianga thudang leh inpersan awm tak tak a sawi ta chiam chiam mai chu Bond chuan hriatthiam har a ti hle a ni.

M chuan a hma a lehkha dahna thleng chu a han pawthnai a, nelawm hmel deuh zawk hian, "Awle, kha zawng kha ka sawiduh chu a ni. James, Miss Moneypenny in pindan a hauhfel vek tawh a, karhnih ava khawsak chuan a tawk thei mai ang. Ilo chhuah leh meuh chuan nangmah pawh i inhai rum rum mai ang," a ti ta a.

Bond chuan phurlo fahran leh awki lawi deuh hian, "Khawiah maw, ka pu,?" a han ti a.

A hmun hming chu Shrubland an ti mai a, a enkawltu chu a hna lamah chuan lar thawkhat tak a ni. A hming chu Joshua Wain a ni. Kum 65 lai a ni tawh na a, kum 40 pel hmel pawh ala pu lo. An hmanrua a tunlai a, hnimhnah huan pawh tha deuh mai an nei bawk. Sussex-a Washington bula awm a ni. He lama i hna chu ngaihtuah duh suh. Theihnghilh hmak la, 009-in section chu a lo enkawl mai ang,"

Bond chuan awih harsa ti deuh mai hian, "Mahse ka pu, ka tha alawm. Kal ngei chu tul iti a maw? A tul iti kher em ni?" a han ti a.

Za lo deuhva nui chung hian M chuan, "A ngai ka ti satliah mai ni lovin, thil tul tawp leh tihmakmawh a ni. Chu chu double O section a awm zel i duh chuan tihna a nih ber chu. In section ah hi chuan officer za-a za infit lo tan chuan tel theih a ni lo." a ti a.  A hma a thleng chu a han phawrh a, "Chu zawng chu a ni e, 007" thutawp sawi awki deuh chuan a ti ta a. 

Bond chu a tho va, ngawi reng a chhuak in kawngkhar chu zawite in a khar ta a.

Miss Moneypenny chuan nui lek lek hian a lo en a, Bond chuan Typewriter kang lawp khawp chuan dawhkan chu a han chum dawt mai a. Thinur deuh hian, "Engemaw thil awmzia hi le, Penny? Putara saw a rilru a buai deuh a ni lo maw? A thil rawt atthlak tak hi enge a sawtna le?! Ka kal dawn hrep lo. A rilru a buai anih saw," a ti nghal bawrh bawrh mai a.

Nui chung hian Miss Moneypenny chuan, "Manager lah chu a hawihhawm khawp lehnghal a. Annex ah Myrtle a pindan an lo ruahmansak dawn che anih chu. Pindan nuam tak leh hnimhnah chinna huan langthei laia awm niawmin a rawn sawi a, anmahni hian hnimhnah damdawi leh eitur siamna tur huan an nei sa ve nghe nghe asin," a lo la ti ta deuh deuh va.

"Khai, keipawhin an huan phiangsen chungchang te chu ka hre ve tho alawm. Ngawiteh, Penny. Thil awmdan min Han hrilhchiang teh, Putara sawn enge a vei pek a?"

Moneypenny hian a ruk tak chuan Bond hi alo ngaizawng thin hle a, a mumang leh suangtuahna ah pawh vawi tam alo hmu țhin a. Chutianga a ngenna aw chuan a rilru-ah lainatna thlen ta. Awka zawi deuh zawk hian, "Ni e, thil engto zawng hi a nei leh thut mai thin a, a hmertel leh hlauh che hi I vanduai ta anih hi. Kan pawl hnathawh that dan leh chakdan chungchang hi a vei hle tih chu I hailo anga; kan vai mai hian insawizawina ngawrh taka kan neih te pawh a țul hial kha. Rampawna a chhuahsan khan rilru lam zirmi a ruai pek a, Section hruaitute pawhin lohtheih lohvin an mumang an hrilh nghe nghe a. Mahse an mumang a rapthlak deuh nge, chupa chu a awm reilo khawp mai. Thla hmasa khan kan pu hi a thian pakhatin tuna I kalna tur hmun hi a hrilh a, a fak nasa mai lehnghal a. Chupa chuan kan vai mai hian motor ang deuh, a khat tawka 'decarbonized' ngai kan ni tiin a hrilh a. Ani pawhin helai jmun hi kumtin tlawhin a insawi a, Kar khatah Guineas20 chauh sengin a insawi bawk. Awle, I hriat angin M hian thilthar han chhin hi nuam a tive reng deng a. Ani pawh hi ni 10 va awm ve a, alo haw leh chuan a atchilh zui a ni ta ringawt mai a ni. A chanchin hi keipawh min hrilh teuh mai a; tukin dakah hriselna lam chi, eitur mak tak tak ka dâwng teuh bawk a. Engtia han tihtur nge pawh Ka hre lo, ka uiin a ei tawh mai ang chu. Chu chu thil awmdan a ni a, amah pawh hi hetianga a thothang a țhat hi ka la hre ngai lo," 

"Engah nge kei kher min thlan?"

Nui chung hian Moneypenny chuan, "A ngaithuk hle che tih I hrelo pawh a ni maithei. I dinhmun ziahna a hmuh khan luhtir nghal tur che in min hrilh a, ka ti ta vat a ni," a ti a, hnar ner nang nang chung chuan, "James, mei chu ilo zu tam tak tak emni? I tan a tha hauh lovang," a han ti leh a.

Bond-a thinur chu a insum hram hram a. 

"Dangro va boral ai chuan kan ti mai alawm. Meizial chungchangah chuan ka kut hi ka thunun zo meuhlo a ni ber mai," a ti ta ringawt mai a.

Moneypenny chuan, "I kut chungchangah chuan meizial chauh lo pawh I hlei hle tih an hria alawm," a ti a, an han inmelh ralh a.

Bond chuan, "Nang tal hi chu lo ngawi mai mai teh, Penny. Thutthleng dup ngai hial khawpin I mawngah khan ka vaw mai ang," thinur teuh chung chuan a ti a, kawngkhar lam chu a pan ta nghal a.

Ngawi mai duh biklo hian Moneypenny chuan, "Mai mai á. Karhnih chhung thei leh sertui I rin hnu chuan min  vaw peih tur pawh I awm kher lovang, James," nui sâng chung chuan a lo tilet a.