Tears-in-Heaven

 TEARS IN HEAVEN 

~Familia Fanai Lalţansanga

Kum 1991 March thla ni 20 chawhma dar 11 am khan vanduaithlak tak maiin New York khawpui in chhawng 53-na tukverh atangin naupang pakhat a tla hlum hlauh mai a. He naupang lainatawm tak hi kum 4 mi Conor Claptona a ni a. Eric Clapton-a’n Italian actress Lori Del Santo laka a fa a ni a. Italy ram atangin an nufa hian New Yorka an zin laiin an tlennate awmpuiin turkverh a hru fai a, a khar leh hmain naupang hi tukverh atangin a tla ta a ni. Conor Clapton hi kum 1986 August hlaa piang a ni.  Eric Clapton hian nupui a nei a. A nupui chu George Harrison-a nupui hlui Pattie Boyd a ni a. Ani nen hian fa an nei thei lo. Pattie Boyd nen innei reng chungin Yvonne Khan Kelly lakah kum 1985 khan fanu, Ruth Kelly a nei bawk a, kum 1991 thleng khan a fa neih hi an zep tlat bawk a ni. 

Tichuan, a fapa chetsual thu a hriat veleh New York khawpuia cham mek Eric Clampton chu helicopter-in a fapa chetsualna inchhawng sang bulah a rawn ţum ta a. A bung dawn tuai a han sun ta mai chu tuar thiam har a ti ngei mai. A khawchhung hi a kaw rawng rawngin a hria a ni ber. Fam ngaih zawng a na a ni. Fam ngaih tinkim dawnin ţapin tlai ni a leng a, tlai tla har a ti a, zan khua hrui ang a sei leh si. Fam ngaih zun leng tuar chuan chin lem a nei lo ve. 

A par mawi kung vul lai a tliak, piallei thuah riat hnuaia zal chu. Thlafam ngaia tlai nilen chu thinlai a zing riai e. 

He khawvel damlai thlaler chhumpui zing hnuaiah hian Eric Clapton chu thla 9 zet a fapa sunin a indawm kun a. Chutah le, a rilru a siam a, a chemkalna rimawi khawvelah liluh zai a rel ta a. A lusun khawharna chuan a rimawi tum rik a tidanglam ta hlauh zawk a. A rilru leh ngaihtuahna zawng zawng sawrbingin a ţingţang fender a han zut chu a mawi dangdai ta hle mai a. A ţingţang tum ri chuan chakna thar leh thiltihtheihna thar a rawn nei ta a, a ngaithlatute lairil a fan hliah hliah ta bik a nih chu. 

Kum 1991 khan Rush film atan a ţhianpa Will Jennings nen hla “Tears in Heaven” hi an phuah a, he hla-ah hian Eric Clapton chuan a fapa a sunna zawng zawng a bunchhuak a ni ber a, an rin leh beisei ai daihin an hla phuah chu a hlawhtling a. Lawmman pathum; Grammy Awards for Best Pop Vocal Performance, Male, Song of the Year, leh  Record of the Year a dawng nghal ţhawt a, Rolling Stone magazine chuan khawvel hla ropui chuai thei lo "The 500 Greatest Songs of All Time" zinga 362-naah a dah a ni. 

Eric Patrick Clapton, CBE, English rock & blues guitarist, singer, songwriter hi kum 1945 khan a lo piang a, a ţingţang perh ri hi a mawi danglam bik em em a, khawvela guitarist ropui a ni a, Rock and Roll Hall of Fame-ah a hming hi vawi thum ngawt an seng lut tawh a ni. Grammy Award 18 a dawng tawh a, Brit Award for Outstanding Contribution to Music an hlan tawh bawk a ni. Kum 2004 khan rimawi lama a thawh hlawk em avangin Lalnu Elizabeth-i’n CBE (Order of The British Empire) tangkapui a hlan.

Zu leh ruihhlo bawi-ah a tang rei fu mai a. Mahni intihhlumte a tum rum rum tawh a, a thih chuan zu a in thei dawn tawhin a hre si lo va, a intihlum ta lo mai chauh a ni. Amah A.Thanglura pa ang deuhvin zu kha a lo duh fu a ni ang. A.Thanglura pa khan, “Ha pawh nei hlei lo, lem nuam bawk si zu hi chu ka nghei dawn lo reng reng,” a ti ţhin a nih kha. Eric Clapton hian zu leh ruihhlo a nghei hnuin ruihhlo bawi-a tangte chhanchhuah nan Crossroads Centre a din nghe nghe a ni. 

A nupui Pattie Boyd nen an inţhen fel hnuin kum 2001 khan Melia McEnery nen an innei a, fanu pathum an nei a ni. 

Eric Clapton hian a chemkalna a hai teuh hle a. A kum 13 piancham-ah German siam acoustic Hoyer guitar an leisak a. hetiang ţingţang hi tum a har avangin a rimawi lama tuina a hloh deuh thaw hman a. Kum hnih a ral hnuah rimawi lamah a tui thar leh ta a. Tih tak takin a han zir ta a. Blues lam hian a lung a len tlat mai a, Grundig reel-to-reel tape recorder hmangin a hla duh zawng a ngaithla a, ţingţang tum a zir a zir ta mai a. A duh anga a thiam nal hma chuan a bei ngar ngar mai a ni. 

Kum 1961 khan Surbiton khuaa Hollyfield School chhuahsanin Kingston College of Art-ah a lut ta a, u Butta Mandalay Fine Art School-a lut ang maiin lemziak lam zir ta lo chuan Eric Clapton chuan rimawi tum lam ringawt chu a atchilh tak avangin  Kingston College of Art chuan an ban ta nge nge a ni. Rimawi tum a thiam em avangin kum 16 mi a nih chuan mi hriat a lo hlawh nghal ta pang reng a, the rest hi history ti leh tawh mai ang. Wonderful tonight rimawi phei hi chu rimawi ngaina lo ber tan pawh ngainat loh theih a ni lo hial ang. Eric Clapton rimawi hian universal appeal a nei a, a record hi maktaduai 130 vel zet hralh chhuah a ni tawh a ni. 

TEARS IN HEAVEN LYRICS

Would you know my name

If I saw you in heaven?

Would it be the same

If I saw you in heaven?

I must be strong and carry on

'Cause I know I don't belong here in heaven

Would you hold my hand

If I saw you in heaven?

Would you help me stand

If I saw you in heaven?

I'll find my way through night and day

'Cause I know I just can't stay here in heaven

Time can bring you down, time can bend your knees

Time can break your heart, have you begging please, begging please

Beyond the door there's peace I'm sure

And I know there'll be no more tears in heaven

Would you know my name

If I saw you in heaven?

Would it be the same

If I saw you in heaven?

I must be strong and carry on

'Cause I know I don't belong here in heaven

Songwriters: Eric Patrick Clapton / Will Jennings

A hlathu hi han bih chiang leh lawk ila; ‘If I saw you heaven’ a tih ta daih mai a, past tense hmanna tur em ni? kan ti a ni mai thei a. 

Zirtirtu nih manah social media hi blackboard angin ka hmang ţangkai ta viau mai a, hun awl hman ţhat lamah pawh ka YMA ta hle bawk a ni. 

Remchanna leiin English Grammar zir nan hmang leh hlauh mai ang.  If Clause hi chi thum a awm a. Zirlai tam tak buaina a ni fo mai. 

If, ‘ta se’, ‘chuan’ tih hi chi thum a awm a, a chi khatna chu thil ni thei sawina a ni a. If clause-ah khan simple present tense hman tur a ni a, conditionah khan  will- future emaw, modal leh infinitive khan a zui ang. Entirna: If I study (simple present tense), I will pass the exam.

If clause pahnihna chu thil a thuphunga la ni thei sawi nan an hmang a. If clause-ah khan simple past tense hman tur a ni a, main clause-ah khan would+ infinitive a ni tur a ni ta a ni. Entirna: If I studied (simple past tense), I would pass the exam. Tears in heaven hla-a, “Would you know my name

If I saw you in heaven?” a tih hi If clause chi hnihna a ni a. Past tense a hmang hi English grammar dik tak a ni. 

Tin, If clause chi thumna chu thil ni thei tawh lo sawina a ni a. If clause-ah past perfect tense a hmang ang a, main clause-ah would have+ Past perfect tensen a ni tawh ang. Entirna:  If I had studied (past perfect tense), I would have passed the exam. Exam a fail der tawh a, thil ni thei tawh lo sawina a ni ta thung a ni. Hmeichhe thudawn an sawi ang lek sawina a ni.