James Bond : The Man With The Golden Gun-4

THE STARS FORETELL

Khawlum ni, chawhnu her lehnghal a hun hman nan chuan Jamaica Kingston International Airport aia nuamlo chu a tam vak awm lo ve. Thlawhna tumhmun leh passenger ho innghahna hmun erawh chu tunhma zawng ai chuan an chei ve deuh va. Darkar hnih kalta khan Trinidad atanga BWIA lo thlawklut ah James Bond chu a rawn chuang a. A kawrchung phelhin a bul vel dawr a rimtui, zu leh thil eng eng emaw an zawrh chu a enkual a. Chhun chaw lah thlawhna ah a rawn ei diam tawh si; zu han lem nan lah a lum lutuk bawk si. Duh pawh ni tehreng se Kingston lama taxi a kal tur pawhin a lum mah mah si a. A hmai leh nghawng vela thlan chu a han hru thuak thuak a, mahni hriattawk lekin a ang bawrh bawrh a.

Bond chu a tho va, dawr dang atang chuan Daily Gleaner ava lei a, a thutna ngaiah chuan a thu leh ta a. He chanchinbu hi a ngainat ber pakhat a ni nghe nghe a. Phek hmasa lamah chuan ganza khapdan leh hralhdan tur lampang a inziak khat deuh vek a, a phêk hnuai veilamah chuan France President De Gaule-a'n Red China a recognise thu chu an inziak ve a. Hun a ngah bawk a, a horoscope an chuan heti hian a lo inziak a.

'Hlim rawh. Vawiin hian thil lawmawm tak, ilo duh em em thin i tawng ngei ang. Mahse i vanneihna chu i hmuh veleh i khinghniha i chuh vat a ngai ang.'

Bond chu zalo deuh hian a han kiaisak a. Havannah a thlen ni-ah ber kher chuan Scaramanga hnu chu a chhuifuh nghal pawh a inring chiah lo. Helai hmunah hian Scaramanga chu a awm tih pawh a hrelo va, bei tihdawn nan a helai rawn kal mai chauh a ni a, kar 6 chhûng zet chu Caribbean leh Central America velah alo umkual tawh a ni. Trinidad an khan ni 1 in a nanglo chiah a, Caracus an phei chuan darkar tlemte chauhvin a umphalo a lo ni. 

Chanchinbu chu an han let a, a hnunglam a advertisement pakhat chuan a mit ala riau mai. Heti hian a lo inziak a.

'LILAM TUR'

KINGSTON 77 HARBOUR STREET

MAY 28, NILAINI DAR 10:30-AH

Corneluir Brown in a hnêna dahkham a nih angin a thuneihna hmangin a hralh dâwn a ni.

'No3 and half LOVE LANE

SAVANNAH LA MAR CHU'

Hemi hnuaiah hian he in leh ram awmna hi a inziak leh a.

THE CD ALEXANDER CO LTD

77 HARBOUR STREET, KINGSTON

PHONE-4897 

A thilchhiar chuan tiharh sawng sawng hian a inhria a. Jamaica leh a chhehvêl ah hian tûnhma pawhin hna chi hrang hrang thawkin a lo kal vel tawh thin a ni.

A sana a han bih a, GLEANER chhiar nan darkar 1 zet hun alo hmang reng tawh a ni tih a hre nghal a. Duh aiin a tlai thelh a ni. A kawrchung pawmin a suitcase a khai a, Airlines hrang hrangten ticket an pêk chhuahna ah chuan a phei ta a.

Ngun takin a han inngaihtuah let a, nun hian nawmna tak a nei ve chuan a hria. A hun kal tawhah te khan thil hrehawm lam aiin a nuam lam leh hlimawm lamte chu hriatchhuah tha zawkin a hriat phah hial a. 

Dr No. a beihna a nula duhawm tak mai a tawn, Honeychile Rider te chu a han ngaihtuah let a, a chungah khân eng nge maw thleng ta zel le? Lehkha lah chu a rawn thawn ta miahlo lehnghâl a. A chanchin a hriat hnuhnun berah kha chuan Philadelphia Doctor a nei a, fa pawh pahnih a nei tawh tih kha a ni mai.

Thli lum deuh lo thaw chuan vaivut a chhêm leng chum chum a. Control Display Stand-ah chuan passenger te thudawn tur an pechhuak thin a. Bond chuan a ta tur a awm ve angem tih a han ngaihtuah a, Mahse tûnhma pawhin vawikhatmah chutiang chu ala dawng ngai tlat lo. 

Bond chuan counter a lehkha chi hrang hrang a neitute lam tura tarchhuahna chu a han en a. A hming bul 'B' tih zâwnah chuan engmah alo awm pek lo. A hming lem, Mark Hazard tih hnuaiah pawh engmah a awm heklo. Bond chuan beisei neilo deuh hian lehkhaip chu a han melhkual a, a en ngai chu a en ta reng a. Reiloteah thlirtu an awm em tih a han enkual a, amah han ngaihventu tumah reng a hmu lo. Tichuan a kut rawmawla tuam chung chuan lehkhaip pakhat, 'Lima atanga lokal BOAC passenger Scaramanga ta tur' tih chu an la vat a, a ak nghal hmiah a. Reilote a han ding vang vang a, mipa inthiarna lamah chuan a phei ta a.

Kawngkhâr chu a kalh a, lehkhaip chu phawrhin, a inchang loh avangin awlsam tein a hawng nghal a, hawrawp fiahtha tak hian heti hian a lo inziak a.

'Kingston atanga thu lo thleng chu dar 12:15 ah dawn a ni. A enchhinna tur chu naktuk chhunlai atangin No3 and Half SLM ah a hmuh theih ang.'

A bak chu engmah hming inziak pawh a awm lo va. Bond chu lungawi deuh hian a nui hawk a, SLM chu Savannah La Mar lamtawi anih ngei a ring a, thildang ni theiin a hrelo a ni. A tawpah chuan a mihring chhui chu an chhuifuh dâwn ta niin a hria a. GLEANER horoscope a chhiar tak kha a hrechhuak uai uai a. Lehkha chu thlep lehin a ak tha leh a. Inthiarna atang chuan a chhuak leh a, hawi zak zak chungin an dahna pângngaiah lehkha chu a va dah leh ta a. 

Chuan Airlines ticket pêkna ah chuan a phei a, a ticket reservation chu ava cancel leh ta a. An thlawhdan kalhmang chu ava en a, a lehkha chhiar zawh hlim nemnghet thei tur chiah chuan Lima atanga KINGSTON pan tur, New York leh London rawn paltlang tur chuan atuk dar 13:15 ah chiah alo thleng dawn a ni. 

Tanpuitu mamawh dawna a inhriat avangin Bond chuan Station J hotupa chu a ngaihtuah chhuak zawk a. Telephone dahna lam chu a panphei a, Commander Ross a number chu a han tuaivir nghal a. Reiloteah hmeichhe aw hian, "Commander Ross-a Assistant ka ni a, ka tanpui thei che ang em?" a rawn tipuam talh a.

Chu aw chu a hriat fo tawh hnu ni tlat hian Bond chuan a hria a.  "London-a a thian ka ni a, amah ka be lawk thei angem?" a han ti leh a.

Nula chuan aw zangkhai leh harh zet mai hian, 'Tunah tak chuan Commander Ross chu Jamaica ah hian a awm lo tlat mai. Tihsak theih che ka nei em? I hming kha tunge i tih kha?" a rawn ti a.

"Ka hming ka sawi awm pawh ka la hrelo ka ti!! Mahse ka hming chu i hriatduh chuan........"

Nula chuan phur tak hian,  "Min hrilh duh suh, ka hre mai. James ini chiang mai," a rawn ti ta a.

Nui chung hian Bond pawh chuan, "Ta mai mai thin a!! Goodnight-i i ni maw? Helaiah eng nge maw i tih teh tlat le?" a han tilet ve a.

"I hnuaia ka thawh ang tho kha maw le. I lo haw thu ka hria a, i damtha meuhlo tihte pawh. Mahse khawi atangin nge min rawn biak le?"

"Kingston Airport. Aw le, lo ngaithla teh. Darling, i tanpui ka ngai dawn tlat mai. I che nghal zar zar thei angem?"

"Thei tehreng mai. Ngawi lawk rawh, pen ka han la lawk ange...... Khawi le, sawi rawh le,"

Reife thil an inhrilh hnu chuan, "Thuruk neuh neuh i ngah awm hle mai. Eng thawmhnaw nge ka rawn inbel ang?"

"Kawrkilh tamlo leh tawt tha tak kha rawn inbel ringawt rawh,"

Nula chu a nui hawk a, "I nihna a chiang ta e. Awle, i thu min chah chu ka han buaipui nghal zung zung ange. Dar 7 velah kan inhmu dawn nia," a ti a, phone chu a dah ta a.

Telephone dahna inte, lum lutuk mai atang chuan Bond chu a chhuak a, a han inhru pawk pawk a. Ava biak kha 00 section hluia a Secretary Mary Goodnight-i a lo ni reng mai a. HQ ah khan rampawna a awm thu an sawi a, dilchhut takin engmah a zawt zui ta bawk si lo. Amah ber a bo tak vang vang avang khan hmun hrana insawnte pawh a duh a ni maithei a, a engapawh ni se ani ber kher alo awm hlauh chu lawmawm hle hian a hria a ni. 

A airbag khaiin pawnah a chhuak a, taxi hmangin Morgan Harbour a pan nghal a. Car tlan zawnga thlifim han thaw neuh neuh chuan tiharh sawng sawng hian a hria a.

Morgan Harbour Hotel hi Port Royal bul Palisadoes hmawra awm a ni a. A neitupa hi intelligence lama lo thawk hrep tawh anih avangin Bond-a pawh chu eng ang hnathawk nge ni ang tih rindan alo nei daih tawh nghe nghe a. Hawihhawm takin a lo lawm a, air condition pindan, Kingston Harbour lan theihna ah chuan a hruailut a, "Tun tum chu eng nge i chhui ber?" a han ti a.

"Ka rawn chawl satliah zawk a ni e. Lobster i nei em?"

"Nei e,"

"Tlai lama eitur pahnih min lo khek ta che. Butter nen kan duh ang. I intur man to deuh nen khan,"

"Aw le, Champagne leh vur pawh in duh ang chu maw?"

"Duh ang. Inbuala mut hlek thain ka hria. Kingston Airport kha a lum mah mah a ni,"

A muhil chu dar 6-ah chiah a rawn harh a, a tirah chuan a awmna chu a hrenghal mai lo va, mahse reilote-ah a hre chawpchilh leh thuai a. Sir James Malony pawh khan hun engemaw chen chu a hriatrengna a hnufum hle ang tih kha alo sawi tawh reng a ni. 

Kent-a an enkawlna 'ECT Treatment' kha a neplo hle hian a hriat a. Ni 30 chhung chu kha khawl dum rin ren hmang khan a thluak chu chawl miahlo hian an shock zawm char char mai a, a hnua a sawi leh danah pawh Sir James chuan 'America a tih chu ni se la chuan ni 18 bak chutiang anga mihring thluak khawih chu an remti kher lovang' tiin alo sawi tawh hial a ni. A tir chuan Bond pawh chuan khawl leh a chal sir tawn tawna electric nena inzawma an nembeh chu a nellovin a huphurh hle a. Tunhmaa damlo leh rilru buai te anlo shock thinte chu an phuarbehna atanga talchhuak lehte an lo awm hial tawh a. Mahse chutiang em em chu ani chuan a tuar ve ta lo va. An chiu hmasa a, electric an han tihnun khan a mitvun a phu zawk zawk tihbak chu a taksa ah engmah a lang chuang lem lo. Rinai takin a hmalakna ah chuan an hlawhtling lehnghal a, a hnu chuan analyst tawngkam nem tak hian Bond chu Russian hovin an lo tihdante chu a hrilh teuh mai a. Bond chuan M a thah teuhzia a han hriat chuan hrehawm a tiin a rilru a hahphah hle a. Tunhma a KGB leh an thawhpuite huatnain a khat lehnghal a. Kar 6 an enkawl hnu chuan apu chunga kutthlaktirtu te chunga phuba lak chak hian a za leh zek zek tawh a ni. A hnu lamah chuan taksa intuaitharna lam a neizui leh a. Maidstone police range ah silai kah a zir leh mawlh mawlh a, chumi hnu chuan Chief of Staff chuan rawn hmuin order, lehkha hnuai lama rawng hringa 'M' tih inziahna a rawn pe ta a, thil awmzia te chu a rawn hrilhpah nual bawk a. Chumi hnuah Bond chuan London Airport a panding ta nghal anih kha.

Bond chu a inbual leh phawt a, thuam dahlau tak inbelin bar ah chuan a lut phei ta a. Walker de Luxe Bourbon Double a lam a, zu lem pah chuan tuipui sava pelican ten sangha man tuma tui an liluh lai te chu a thlir ta a.

Nitla tur sen phut mai chuan tuifinriat tui chu a chhundum kuk mai a. Nula ban, Channel no.5 rimnam thar thar hian a hnunglam atang chuan a rawn kuah a, a kamsirah chuan a rawn fawpzui nghal a. Bond chuan nula ban chu a han dawm a, a rawn kuahtu nula chuan hlim aw tak hian, "Oh!! James, ilo haw leh hi ka lawm em mai a, ka ti lo theilo anih kha," inthlahrung tak si hian a rawn ti a.

Bond chu a inher a, nula khabe ah chuan dawmkangin a hmuiah chuan a han fawhsak a. "Khanglai hun liam zozai ah te khan engati nge hetianga tih nachang kan lo hriat miahloh le! Mary, kumthum lai kawngkhar pan te kan indaidan tir a, enge maw hetiang lam hi kan lo ngaihtuah ngai reng reng loh le!" a han ti hluai a.

Nula chu a bul maiah chuan a ding a, a sam rangkachak rawng chu a koki thlengin a zuah a, a hmai chu a tawk chauhvin a chei a. A mitmu dumpawl chuan ngun tak hiwn a lo thlir ran mai a, nui hmel lek lek hi a pu a. HQ a an inchei dan anglo tak hian a incheidan pawh a lo tunlai tawh hle. A enngun em avang chuan nula chuan nuichung hian, "Ka kawrkilh chu hnunglamah hian a awm. Ka thawmhnaw hi hetiang ram lumah hi chuan kan form a ni deuh mai," alo ti a.

"Niawm tak pawh anih kha. I pearl awrh pakhatah kha chuan tûr a awm ngei ang maw?"

"Awm e. Mahse khawiber hi nge a awmna ka hre lo. Avaia ka ei vek angai dawn tihna anih chu. Daiquiri in tur min pe thei em?"

"Ka tihpalh, Mary. Ka mawl hle tak mai a! Helaia ka rawn hmu che hi ka â zo vek niber in ka hria. I hnathawh kawr inbel lai ka la hmu ngailo bawk nen; Thuthar min han hrilh teh. Khawnge Ross chu? Helai ah hian engtia rei nge i awm tawh le? Ka thilchah che kha i tifel thei em?" tiin Bond chuan in tur chu a lamsak ta nghal a.

Nula chuan a intur chu a han lem hlek a. Bond chuan zu a in ngai meuhlo tih leh; meizial phei chu a zu lo hrim hrim tihte a ngaihtuahchhuak uaih uaih a. Amah pawh chuan intur chu a han lam leh a, a vawithum lamna anih tawh avangin a zahthlak lek lek hian a hria a. 

Mary chuan Bond-a zawhna hnuhnung ber chu a chhanna a hre hmasa ber duh ang tih a hria a. A bag khai atang chuan lehkha ip chhah tak hi a han lachhuak a, Bond chu a han pe a. "Pawisa hlui deuh vek a ni a, expense ah nge, i hlawh atanga cut turin kan tih ang?" a han ti a.

"Hlawh atanga cut ni rawh se,"

"Car chu pawnah sawn a awm. Strangways (Dr. No en rawh) kha ila hria em?  Sunbean Alpine hlui kha a ni a, kan hmangzui ta a ni. A tui pawh thunkhah sa diam a ni a, khalh pawh a nuam khawp mai. Wisco hotupa ber chu Tony Hugil a ni a....." tiin Bond-a zawhna chu a chhang ta teuh mai a.

Ngaisang deuh hian Bond chuan, "Mary, iva hlu tak em!! I thil chîkdan leh hriatdan hian i hlutna a târlang chiang hle mai," a lo ti var a.

Nula chuan chu fakna awka chu hreawm pawhin a lang chuang lo.

"Anih leh thil pakhat ka zawt leh ang che. Khawnge Ross chu a awm?"

Mary chuan ngaihthatloh hmel tak hian, "Ka hrechiahlo tlat. Kar hmasa khan tihtur nei anga insawiin Trinidad ah a kal a, mi pakhat Scaramanga a chhui dawn niin a insawi. Amah chu gunman a ni awm e. Chu bak chu hriat ka nei vaklo. Mahse HQ chuan chhuizui duhna an nei niawm tak a ni. Tunlai hian chanchin danglam deuh chu engmah min hrilh duh ngailo. Aw le. Commander Ross chu nihnih kalta khan rawn haw tawh tur a ni a, mahse tun thlengin ala rawn haw talo chu a nih hi. Red warning ka thawn tawh a, mahse karkhat dang nghak leh hlek turin min ti a ni," a ti ta a.

"Min tikhawtlai tur a awm lo va, a tihzia zawk anih chu. A number 2 hi i kawmtlak zawkin ka hria. Anih he 3 and half Love Lane chanchin hi i hriatbelh thei em?" 

Mary chu a sen awp awp a, "Hriatbelh e. Zawhloh tur tur min zawhtir a ni. Special branch ho ka va zawt a, rei tak chu ka va inlan ngamloh phah dawn anih tâk hi. Eng angin nge min ngaih ang tih pawh ka hrethiamlo. Saw in saw Sav La Mar a in bawlhhlawh a ni," a ti ta a.

Bond chu a nui hawk a, fiamthu titih deuh hian, "Mihur in a ni i tihna a ni maw?" a han tileh hram a.

"James, i tawngkam a mawilo lulai êmai!"