James Bond : The Man With The Golden Gun-1

Can I help you

Secret service te hian an pawl a mi hlun leh un tak tak te pawhin an hriat ve lem loh thuruk vawn an ngah thin a. M leh cheif of state te chauh chu thil tul zawng zawng hretu an ni. Chief of state phei hi chuan thuruk tawpkhawk 'top secret,' a hming hran a, 'the war book' an tih mai chu uluk takin avawng a, heihi heihi an hotu lu ber nen pawh a an thih palh hlauh pawha an aiawh tu ten an pawl chanchin mumal tak a an hriat theih nan an hnut chhiah tur a ni.

  James Bond pawhin a hriat loh pakhat chu an HQ ah chuan mipui lo dawnsawn dante, zu-ngawlvei leh mi a te pawhin hnathawh an rawn dil a lo buaipui dan tur te leh anpawl a rawn inphum ruk leh tualthah tumna lo beih let dan te thlengin ruahmanna felfai tak a awm tih hi a ni.

  He ruahmanna hnathawh dan chi hi chumi November tuk zing vawt vur mai ah chuan ahmu dawn ta a ni.

  Ministry of defence a telephone switchboard enkawltu nula chuan a rawn be tu chu lo nghak turin a hrilh a, a bul a a thiannu lam chu a hawi a, "Tu in emaw ni James Bond angin a rawn inchhal leh ta anih chu, ama Code Number a hriat thu leh M ngei biak a duh a nih awm chu" a han ti a.   

  Nula upa zawk chuan a koki a Dan vak a. Kum kum khat kal ta a Japan a James Bond thih thu chanchinbu ten an chhuah hnu khan hetianga rawn bia hi an awm nual tawh a. Nula chuan, "Liaison biak hmasak tir rawh, Pat" a lo ti a. 

  Liaison section hi secret service a mi pawimawh biak dawn chuan paltlang hmasak a ngai ngei ngei a ni,  an phone operator chuan, "Min longhak lawk rawh ka pu,  nangmah tanpui theitu ngei tur Officer ka han biak pawp sak ang che" a ti a. 

  Khum tlang a thu Chung hian James Bond chuan phone chuan phone ah chuan lawmthu ahan sawi a, a nihna tak tak an finfiah hma pawhin eng emaw chen chu a buai deuh a ring reng a, hetianga lo chhaih chhunga lo buaipuitu ber 'Colnel Boris' chuan a hrilh sa vek a ni. Phone ah chuan mipa aw hian "Captain Walker ka ni a,  ka pui thei che ngem?" arawn ti ta a. 

  Muang fiah cherh chawrh hian James Bond chuan, "Heihi commander James Bond Number 007 a ni.  M emaw min biak pawh sak ta che. Hmuh theihna hun ka duh dawn avangin ka be duh khawp mai" a han ti a. 

  Captain Walker chuan a telephone sir hmehna pahnih chu a han hmet a, pakhat chu an inbiakna la chhawngtu khawl tihnunna a ni a,  pakhat zawk chuan Scotland Yard a special Branch bik a Action Room a Duty Officer te ngaihthlak ve theih turin an phone chu khawlaiah nge awm tih khawl changkang takin an chhui nghal dawn a ni. An chhui theihna turin Captain Walker chuan minutes 5 vel tal chu a biak buai a ngai ta a ni. Walker hi Military Intelligence a Prisioner Of War te dawptu thluak tha zet mai a ni a,  "I mi sawi te chu ka hre mai hauhlo mai,  i rawn phone dik si amaw?" a han ti a. 

  James Bond chuan secret service ten pawnlam atanga an rawn phone na Regent Number chu dawhthei takin a han sawi leh a, thil theihnghilh angah tawh avangin he number pawh hi Colonel Boris chuan a theihnghilh mai a hlauh avangin a Passport lem hmalamah chuan a ziahtir sa diam a,  a passport ah a hming chu Frank Westmacott,  Company Director ni awmin a inziak a. 

  Hrethiam awmtak hian Captain Walker chuan, "Ni e. Number kha chu a dik si anih chu. Mahse i biak duhte hi ka hre mai tlat lo,  tunge an nih reng reng a? I sawi, EM itih ang hming pu hi Ministry ah an awm pawh ka hrelo a ni" a han ti leh a. 

  "Kan inbiak na hi ngaihthlak ruk theih Open Line a ni tih i hria ang chu maw? An hming ka rawn sawi vek dawn em ni?"

  Bond a aw leh thusawi dan chuan Walker chu a hneh hle mai a, a dawhkan a hmehna chu a han hmet leh a, phone a ri leh nghal char char a. Bond a hriat theih ngei turin Phone Mouthpice chu a keng a, "Min lo nghak lawk ta che, midang min rawn bia an awm tlat mai" a ti a, rang takin Phone dangah an section  hotu chu a be pawp a, "Ka pu,  min lo hrethiam la, James Bond nia inchhalin min rawn be pawp a, M be duhlo tlat mai. Ka han chhaih kual a, kan inbiakna hi lo ngaithla ve la ka duh ngawt mai" a ti a. 

  Walker a awmna atanga pindan pathumna a Secret Security Officer chuan a buailai tak a nih avangin thinur rilru deuh hian dawhkan a hmehna chu a hmet a, dawhkan a tawng ngaihthlakna chu a rawn nung ta a, ngun tak leh che lovin a ngaithla ta a. Walker chuan, "Ka innghah tir che a, min hrethiam dawn ani ang chu,  kan thu chu khel leh ta ila. I biak duh EM i tih hi sawifiah ka duh a, hlauhthawn tur a awm lovang, i sawifiah deuh thei em?" a han ti leh a. 

  James Bond chuan a chal a han chuar a,  mahse amah chuan a chal a chuar tih a hrelo a, hre mahse a chhan erawh chu a hre kher lo ang. A hma aia aw zawi deuh zawk hian,  "M chu Admiral Sir Messervy a ni, chhawng 8- na a No. 12 na a ni thin a, a Secretary chu Miss Moneypenny a ni a, samdum leh chhelo tak a ni. Chief Of Staff hming ka sawi leh dawn em? A ngailo maw?  Awle, vawiin hi nilai ni a ni a, in Canteen a eitur awm thin ho ka hrilh leh dawn che em? Bawngsa leh Kidney Pudding a ni ang" a ti charh charh a.

  Chief Of security chuan Direct in Captain Walker chu a phone vat a,Walker chuan Bond a hriat atan chuan,  "Hrep chuan, phone dang a ri leh ta. Ka reilo vang" tiin phone hring chu a la kang vat a. "Enge ni ka pu?" a han ti a. 

  "Bawngsa leh Kidney Pudding tih vel khan min tibuai tlat mai. Hard Man hnenah hlan chhawng mai rawh. Aih, nilo, Soft Man hnenah zawk a tha ang. 007 a thih dan khan makna riau a nei a,  a ruang hmuh a nilo a, an hmuh hnuhnunna ber James thliarkar a chengte lah saw an tawng mawh nasa hlawm mai si a. Hei vang hian ngaihtuahna thui tak a neih theih a ni, thil engkim min rawn hriattir zel ang che."

Captain Walker chuan James Bond chu a bepawp lehnghal a, "Min lo hrethiam hram a ni ang chu, kan buaizual deuh a ni e. I hriatduh hunah chuan keimah tak chuan ka buaipui hman lovang che. Ka hriatloh lam tak a ni a, i biakber tur chu Major Townsend a ni. I hmuhduh chu a hre ngeiin ka ring. Pencil i inchhawp em? No.. 44 Kensington cloisters a ni, i ziakfel em? Kensington 5555 a ni. Minute khat lek min longhak leh la, a tanpui thei dawn che em tih ka han zawt ange," a ti ta zung zung a.

Bond chuan nguai rilru deuh tak chung hian, "A lawmawm khawp ang chu," a lo ti a. Phone chu a dah ta a. Minute 10 chiah a nghak a, Walker a number rawn pek chu a tuaivir lehnghal a.

A awmna hi Ritz Hotel a ni a, helaia thlengtur hian Colonel Boris chuan a hrilhsa diam a. KGB a Bond a chanchin an ziahna ah chuan khawsak sangtak anga ziah a ni a. Chuvangin London a rawn thlen chuan KGB ho hriatdan ang ngei chuan a khawsak a ngai ta a ni. Bond chuan a pindan a chhuahsan a, lift hmangin inhnuai lamah chuan a chhukthla ta a. Arlington Street chu a thlengthla thuai a, kawngsira chanchinbu zawrhna dawr bula mi pakhat chuan a thla chu a kawrkilh kha atang chuan a lo la fel nghal thuai a. Kawtthlera Bond-a taxi ngaihtuahlai chu a piahlawka thawmhnaw phur motor tukverh atang chuan Canon Flex, zoom lens vuah hian a thla a lo la mawlh mawlh bawk a. Chu motor chuan Bond-a taxi chuanna chu a zui ta nghal a. A chhunga chuangte chuan special branch-a Action Room chu thil awmdan an hrilh zel bawk a.

No.44 Kensington Cloister chu Victoria Lal lai a sak leirawhchan sen chi, han en mai pawh a puithu khup mai hi a ni a. He hmun hi Empire League for Noise Abatment ho office thin a ni a, Commonwealth Relation Office kaltlangin secret service chuan an lei a. Inhnuaiah chuan a tul anga mi dawpna tur pindan te pawh an nei nghal vek a ni.

Kawngkhara Bond-a luh hnu chuan amah zuitu motora mite chuan an enzui thap a, an thlalak chu motor chhungah chuan an siam nghal mawlh mawlh bawk a. Scotland Yard hmunpui bul maia lirthei dahna lam chu an pan nghal a.